Baem Taem for Read and Study

“Baem taem wea fitim for iufala, bikos olketa day hem wicked.”—EPHESIANS 5:16.

1. Why nao hem wise for markem taem bilong iumi, and wanem nao wei wea iumi iusim taem bilong iumi showimaot abaotem iumi?

SAMFALA sei “for chusim taem hem for sevem taem.” Man wea markem taem for duim samting wea hem need for duim bae hem duim planti samting. Wise King Solomon hem raet olsem: “Evriting garem taem wea set finis, wanfala taem for evri samting anda long heven.” (Ecclesiastes 3:1, Moffatt) Iumi evriwan garem sem namba long taem; and hem depend long iumi nao long wei wea iumi iusim. Wei wea iumi ting long wanem nao important and divaedem taem bilong iumi hem showimaot long bigfala wei wanem nao iumi barava tinghae long hem.—Matthew 6:21.

2. (a) Long Sermon bilong hem long Maunten, wanem nao Jesus talem abaotem spiritual need bilong iumi? (b) Wanem wei for lukluk long seleva nao iumi mas duim?

² Iumi mas spendem taem for kaikai and sleep bikos olketa hia samting wea body needim. Bat waswe long olketa spiritual need bilong iumi? Iumi mas kasem olketa samting hia tu. Long Sermon bilong hem long Maunten, Jesus sei: “Hapi nao olketa wea luksavve long spiritual need bilong olketa.” (Matthew 5:3) Dastawe “faithful and wise slave” evritaem remindim iumi long wei wea hem important tumas for spendem taem for duim Bible reading and study. (Matthew 24:45) Maet iu luksavve hao diswan hem important, bat maet iu ting iu no garem taem for study or readim Bible. Sapos olsem, letem iumi lukluk long samfala wei for mek-taem long living bilong iumi for readim Word bilong God, for duim study seleva, and for ting raonem samting.

Faendem Taem for Bible Reading and Study

3, 4. (a) Wanem kaonsel nao aposol Paul talem abaotem wei for iusim taem bilong iumi, and wanem nao insaed diswan? (b) Wanem nao Paul minim taem hem givim kaonsel for ‘baem taem wea fitim iumi’?

³ From taem wea iumi stap insaed, iumi evriwan need for followim disfala kaonsel bilong aposol Paul: “Go ahed for lukaot gud mekem wei wea iufala wakabaot hem no olsem man wea no wise bat olsem man wea wise, baem taem wea fitim for iufala, bikos olketa day hem wicked. From diswan, finis from fasin wea no balance, bat go ahed for luksavve wanem nao will bilong Jehovah.” (Ephesians 5:15-17) Tru nao, disfala kaonsel hem fitim evri part long living bilong iumi olsem olketa Christian wea dedicate, and tu wei for faendem taem for prea, study, go long olketa meeting, and share evribit long waka for preachim “gud nius bilong kingdom.”—Matthew 24:14; 28:19, 20.

⁴ Planti long olketa servant bilong Jehovah distaem hard for faendem taem for duim Bible reading and deep study long living bilong olketa. Tru, iumi no savve addim narafala hour long day bilong iumi, so kaonsel bilong Paul mas minim difren samting. Long Greek languis datfala toktok “baem taem wea fitim” hem minim baem taem from nara samting. Long Expository Dictionary bilong hem, W. E. Vine sei mining bilong diswan hem for “mekius long evri chance, iusim evriwan long best wei bikos chance hia no savve kamap moa.” From wanem or wea nao iumi savve baem taem for readim and studyim Bible?

Iumi Mas Markem Olketa Important Samting

5. Why and hao nao iumi savve “mek sure long olketa samting wea moa important”?

⁵ For join witim olketa nara responsibility bilong iumi, iumi garem planti spiritual samting tu for duim. Olsem olketa servant bilong Jehovah wea dedicate, iumi garem “planti samting for duim insaed long waka bilong Lord.” (1 Corinthians 15:58) From diswan, Paul givim instruction for olketa Christian long Philippi for “mek sure long olketa samting wea moa important.” (Philippians 1:10) Diswan minim for markem olketa important samting. Olketa spiritual samting mas evritaem kam firstaem long olketa material samting. (Matthew 6:31-33) Nomata olsem, iumi need for balance tu for duim olketa spiritual responsibility bilong iumi. Hao nao iumi divaedem taem bilong iumi long olketa difren part long Christian laef bilong iumi? Olketa traveling overseer reportim hao witim “olketa samting wea moa important” wea wanfala Christian mas duim, study seleva and Bible reading nao planti fail for duim.

6. Wanem nao wei for baem taem wea fitim hem minim long saed bilong waka for selen or waka long haos?

⁶ Olsem iumi lukim finis, wei for baem taem wea fitim hem minim tu for “mekius long evri chance” and “iusim evriwan long best wei.” So sapos wei wea iumi duim Bible reading and study hem no mas gud, iumi need for lukluk seleva long hao iumi iusim taem bilong iumi. Sapos iumi busy tumas long waka for selen, wea iusim staka taem and strong bilong iumi, iumi mas prea abaotem diswan long Jehovah. (Psalm 55:22) Maet iumi savve mekem samfala change wea bae givim iumi moa taem for olketa important samting long saed bilong worship bilong Jehovah, insaed diswan study and Bible reading. Hem barava tru taem pipol sei waka bilong olketa woman no savve finis. So olketa Christian sista mas markem tu olketa important samting and barava markem taem for duim Bible reading and deep study.

7, 8. (a) Man savve baem taem from wanem samting for read and study? (b) Wanem nao purpose bilong hapitaem, and hao nao wei for rememberim diswan savve helpem iumi for markem olketa important samting?

⁷ Planti long iumi savve baem taem for duim study from olketa samting wea no important. Maet iumi askem iumiseleva, ‘Haomas taem nao mi iusim for readim magasin or niuspepa bilong world, lukluk long TV, lisin long music, or pleim video game? Waswe, mi iusim moa taem front long computer winim Bible reading?’ Paul hem sei: “Finis from fasin wea no balance, bat go ahed for luksavve wanem nao will bilong Jehovah.” (Ephesians 5:17) Luk olsem wei for iusim tumas taem for lukluk long TV nao main reason why planti Witness no iusim inaf taem for study seleva and duim Bible reading.—Psalm 101:3; 119:37, 47, 48.

⁸ Samfala maet sei olketa no savve study evritaem, olketa needim samfala hapitaem. Nomata diswan hem tru, maet hem gud for tingim haomas taem nao iumi iusim for relax and markem witim taem wea iumi iusim for studyim or readim Bible. Samting iumi faendemaot maet mekem iumi sapraes. Hapitaem and wei for relax, nomata man needim, hem mas stap long stretfala ples bilong hem. Purpose bilong diswan hem for strongim man for duim moa spiritual waka. Planti television program and video game mekem man feel taed, bat wei for readim and studyim Word bilong God hem strongim man and mekem hem feel fresh.—Psalm 19:7, 8.

Hao Samfala Mek-taem for Study

9. Wanem nao olketa gud samting wea kamaot from wei for followim advaes insaed buklet Lukluk Long Olketa Scripture Evriday—1999?

⁹ Introduction bilong 1999 Lukluk Long Olketa Scripture Evriday buklet hem sei: “Bae hem gud for ting raonem text bilong day and olketa koment from disfala buk long morning. Bae iu feel olsem Jehovah, Barava Nambawan Teacher, hem wekapem iu witim instruction bilong hem. Long profesi wei, Bible hem sei Jesus Christ kasem gud samting from instruction bilong Jehovah evri morning: ‘Hem [Jehovah] wekapem long evri morning, hem wekapem ear bilong mi for herem samting olsem man wea lane finis.’ Olketa instruction olsem givim Jesus ‘tongue olsem man wea lane finis’ mekem hem bae ‘savve hao for ansarem man wea taed.’ (Isa. 30:20; 50:4; Matt. 11:28-30) For wekap long kaonsel from Word bilong God wea kam long barava taem evri morning bae helpem iu deal witim olketa problem bilong iu and tu redyim iu witim ‘tongue olsem man wea lane finis’ for helpem narafala pipol.”a

10. Hao nao samfala mek-taem for duim Bible reading and study, and wanem gud samting nao olketa kasem?

¹⁰ Planti Christian followim disfala advaes long wei for readim text and koment evriday and tu long wei for readim Bible and study long early morning. Long France, wanfala faithful pioneer getap early evri morning and iusim 30 minute for readim Bible. Wanem nao mekem hem fit for duim diswan insaed olketa year wea go pas? Hem sei: “Strong feeling nao muvim mi, and mi followim evribit reading schedule bilong mi nomata wanem hem happen!” Nomata wanem taem long day iumi chusim, important samting nao hem for followim evribit schedule bilong iumi. René Mica, wea insaed pioneer service for winim 40 year long Europe and North Africa, hem sei: “Start kam long 1950 hem goal bilong mi for readim full Bible evri year, wea hem samting mi duim for 49 taem finis. Mi feelim hao diswan hem barava important for keepim klos wei for fren witim Creator bilong mi. Wei for ting raonem Word bilong God helpem mi for minim long beta wei justice bilong Jehovah and olketa narafala fasin bilong hem and diswan hem barava strongim mi.”b

‘Kaikai Long Barava Taem’

11, 12. (a) Wanem spiritual “kaikai” nao “faithful wakman” provaedem? (b) Hao nao “kaikai” hem kam long barava taem?

¹¹ Olsem wei for kaikai gud evritaem hem mekem man healthy long body, schedule for duim study and Bible reading evritaem hem help for mekem man healthy long spiritual wei. Long Gospel bilong Luke, iumi readim toktok bilong Jesus: “Hu nao datfala faithful wakman, diswan wea wise, wea masta bilong hem bae markem hem for lukaftarem olketa servant for go ahed for givim kaikai wea fitim olketa long barava taem?” (Luke 12:42) For winim 120 year nao, spiritual “kaikai . . . long barava taem” hem kam thru long Wastaoa, and olketa Bible pablikeson tu.

¹² Lukim toktok “long barava taem.” Long taem wea barava stret, “Barava Nambawan Teacher” bilong iumi, Jehovah, thru long Son bilong hem and slave sekson, leadim pipol bilong hem long saed bilong teaching and fasin. Olsem wanfala sekson hem olsem iumi herem wanfala voice wea sei long iumi: “‘Diswan nao wei. Wakabaot long hem, iufala pipol,’ nogud iufala go long raet or nogud iufala go long left.” (Isaiah 30:20, 21) And tu, taem man wanwan readim gud Bible and olketa Bible pablikeson, planti taem hem garem feeling hao samting wea hem readim barava fitim hem. Tru nao, kaonsel and instruction bilong God bae kam long barava taem for iumi, mekem iumi fit for againstim test or mekem iumi disaedem samting long wise wei.

Mekem Grow Wei for Kaikai Gud

13. Wanem nao samfala wei for no kaikai gud long spiritual wei?

¹³ For kasem gudfala samting evribit from “kaikai” hia wea kam long barava taem, iumi needim wei for kaikai gud. Hem important tumas for garem schedule for duim Bible reading and study seleva evritaem and followim datwan evribit. Waswe, iu savve kaikai gud long spiritual wei and evritaem markem taem for deep study seleva? Or waswe, iu read kwiktaem nomoa long information wea olketa raetem, olsem iu kaikai kwiktaem nomoa, or maet missim kaikai tu samfala taem? Wei for no kaikai gud long spiritual wei hem mekem samfala for kamap wik long faith—maet lusim tu.—1 Timothy 1:19; 4:15, 16.

14. Why nao hem gud for studyim long careful wei information wea iumi readim planti taem finis?

¹⁴ Samfala maet ting olketa savve finis long olketa main teaching and no evri article storyim barava niu samting. So, no need nomoa for study and attendim olketa meeting evritaem. Bat, Bible showimaot iumi need for kasem reminder long olketa samting wea iumi lanem finis. (Psalm 119:95, 99; 2 Peter 3:1; Jude 5) Long sem wei wea man wea savve kuki gud hem redyim sem kaikai long planti naes wei, slave sekson provaedem gudfala spiritual kaikai long olketa difren wei. Nomata olketa article storyim olketa point wea kamap planti taem bifor, iumi no laek for missim samfala point wea kamap moa klia. Tru samting nao, haomas samting iumi kasem from wanem iumi readim barava depend long haomas taem and waka iumi duim for studyim datwan.

Olketa Gudfala Spiritual Samting wea Kamaot From Reading and Study

15. Hao nao wei for readim and studyim Bible hem helpem iumi for kamap minister wea moabeta long Word bilong God?

¹⁵ Staka gud samting nao iumi savve kasem from wei for readim and studyim Bible. Iumi kasem help for duim wanfala main Christian responsibility bilong iumi, hem nao, for iumi wanwan kamap “wanfala wakman wea no shame long eni samting, wea iusim word bilong truth long stretfala wei.” (2 Timothy 2:15) Sapos iumi readim and studyim Bible moa and moa, mind bilong iumi bae fulap moa and moa witim tingting bilong God. Then, olsem Paul, iumi bae fit for ‘story gud witim pipol from olketa Scripture, explainim and pruvim from olketa scripture’ olketa nambawan truth bilong purpose bilong Jehovah. (Acts 17:2, 3) Savve bilong iumi for teach bae kamap moabeta, and story, olketa tok, and kaonsel bilong iumi bae buildimap pipol long spiritual wei.—Proverbs 1:5.

16. Wanem nao olketa wei wea iumiseleva kasem gud samting from wei for readim and studyim Word bilong God?

¹⁶ And tu, taem wea iumi iusim for studyim Word bilong God bae helpem iumi for mekem living bilong iumi followim gud moa olketa wei bilong Jehovah. (Psalm 25:4; 119:9, 10; Proverbs 6:20-23) Hem bae strongim olketa spiritual fasin bilong iumi, olsem hambol fasin, loyal fasin, and hapi bilong iumi. (Deuteronomy 17:19, 20; Revelation 1:3) Taem iumi followim savve wea iumi kasem from wei for readim and studyim Bible, iumi enjoyim wei wea spirit bilong God stap witim iumi long living, and diswan mekem moa big wei wea iumi showimaot olketa frut bilong spirit long evri samting wea iumi duim.—Galatians 5:22, 23.

17. Hao nao haomas taem and gudfala wei wea iumiseleva duim Bible reading and study hem affectim wei wea iumi fren witim Jehovah?

¹⁷ Barava important nao, taem wea iumi baem from olketa nara samting for readim and studyim Word bilong God bae givim iumi richfala reward long saed bilong wei for fren witim God. Paul prea for olketa Christian brata bilong hem savve “kamap full witim stretfala savve long will bilong [God] witim evri wisdom and spiritual savve, mekem iufala savve wakabaot fitim Jehovah mekem hem hapi evribit.” (Colossians 1:9, 10) Long sem wei, for iumi “wakabaot fitim Jehovah,” iumi mas “full witim stretfala savve long will bilong hem witim evri wisdom and spiritual savve.” Hem klia tumas, wei wea iumi kasem blessing bilong Jehovah and hem appruvim iumi depend long bigfala wei long haomas taem and gudfala wei wea iumiseleva readim and studyim Bible.

18. Wanem nao olketa blessing iumi savve kasem sapos iumi followim toktok bilong Jesus long John 17:3?

¹⁸ “Diswan nao minim laef olowe, for olketa kasem savve long iu, only trufala God, and abaotem datwan wea iu sendem kam, Jesus Christ.” (John 17:3) Diswan hem wanfala scripture wea Olketa Jehovah’s Witness iusim planti taem for helpem pipol luksavve long wei wea hem important tumas for studyim Word bilong God. Hem important tumas for iumi tu duim diswan seleva. Hope bilong iumi for laef olowe hem depend long wei for grow long savve abaotem Jehovah and Son bilong hem, Jesus Christ. And tingim wanem nao datwan hem minim. Wei for lanem moa samting abaotem Jehovah bae nating finis—and iumi bae lane abaotem hem for olowe!—Ecclesiastes 3:11; Romans 11:33.

[Olketa Footnote]

Olketa Review Kwestin

• Wei wea iumi iusim taem bilong iumi showimaot wanem samting?

• Wanem nara samting nao iumi savve baem taem from for readim and studyim Bible?

• Why nao iumi mas lukluk long spiritual wei bilong iumi for kaikai?

• Wanem gudfala samting nao kamaot from wei for readim and studyim Bible?

[Piksa long page 20, 21]

Wei for readim and studyim Bible evritaem bae mekem iumi fit for “iusim word bilong truth long stretfala wei”

[Piksa long page 23]

Wei for balancem olketa nara samting long busy laef bilong iumi witim spiritual samting bae givim richfala reward