“Spirit Helpem Iumi for Minim . . . Wisdom Bilong God wea Big Tumas”
“Spirit helpem iumi for minim evri samting, nomata wisdom bilong God wea big tumas.”—1 COR. 2:10.
1. Long 1 Corinthians 2:10, Paul sei holy spirit duim wanem? Iumi bae ting raonem olketa wanem kwestin?
IUMI barava tinghae long wanem holy spirit bilong Jehovah duim! Bible sei holy spirit helpem iumi, hem wanfala present, hem givim witness, and hem askem God for helpem iumi. (John 14:16; Acts 2:38; Rom. 8:16, 26, 27) Aposol Paul mekhae long nara important samting wea holy spirit duim. Hem sei: “Spirit helpem iumi for minim evri samting, nomata wisdom bilong God wea big tumas.” (1 Cor. 2:10) Jehovah iusim holy spirit for helpem iumi minim trufala wisdom bilong hem. Holy spirit nao helpem iumi for savve long plan bilong Jehovah! (Readim 1 Corinthians 2:9-12.) Bat hem gud for ting raonem samfala kwestin hia: Hao nao ‘spirit helpem iumi for minim wisdom bilong God wea big tumas’? Long first century, Jehovah showimaot wisdom hia long hu? Waswe distaem, hao nao spirit helpem iumi for minim wisdom bilong God wea big tumas and hu nao luksavve long wisdom hia?
2. Wanem nao tufala wei wea holy spirit savve helpem iumi?
2 Jesus storyim tufala wei wea holy spirit savve helpem iumi. Taem Jesus klosap dae, hem talem olketa aposol: “Holy spirit wea Dadi bae sendem kam long nem bilong mi for helpem iufala bae teachim iufala evri samting and bae mekem iufala tingim moa evri samting wea mi talem long iufala.” (John 14:26) Holy spirit bae teachim olketa Christian for minim gud olketa samting wea firstaem olketa no minim. Holy spirit bae helpem olketa for tingim moa and followim samting wea olketa lanem finis.
Long First Century
3. Wanem nao Jesus talem wea showimaot iumi bae isisi minim “wisdom bilong God”?
3 Jesus teachim olketa disaepol staka trufala samting wea olketa no savve bifor. Nomata olsem, olketa mas lanem staka samting moa. Jesus talem olketa aposol: “Mi laek for talem iufala staka samting bat hem hard for iufala minim long distaem. Bat taem holy spirit hem kam wea showimaot samting wea tru, bae hem helpem iufala for barava minim gud olketa samting wea tru.” (John 16:12, 13) Jesus showimaot holy spirit bae helpem iumi for isisi minim wisdom bilong God wea big tumas.
4. Long Pentecost 33 C.E., hao nao holy spirit teachim and helpem Peter for tingim moa wanem hem lanem finis?
4 Long Pentecost 33 C.E., “holy spirit hem kam wea showimaot samting wea tru.” Datwan happen taem samting olsem 120 Christian hipap long Jerusalem and kasem holy spirit. Olketa lukim samting olsem smolfala fire antap long evriwan and herem wanfala noise. (Acts 1:4, 5, 15; 2:1-4) Olketa disaepol toktok long staka languis “abaotem olketa nambawan samting wea God duim.” (Acts 2:5-11) Hem taem nao for olketa savve long niu samting. Profet Joel storyim finis God bae givim kam holy spirit. (Joel 2:28-32) Staka no minim gud profesi hia, so aposol Peter start for minim kam samting wea happen. (Readim Acts 2:14-18.) So holy spirit hem olsem teacher wea helpem Peter for duim datwan. Holy spirit helpem Peter tu for tingim moa profesi long Joel and tufala psalm wea David raetem. (Ps. 16:8-11; 110:1; Acts 2:25-28, 34, 35) Evriwan wea hipap lukim and herem wisdom bilong God.
5, 6. (a) Wanem nao samfala important kwestin wea kamap abaotem niu covenant? (b) Hu nao laek faendem ansa long olketa kwestin hia? Hao nao olketa disaedem wanem for duim?
5 Olketa Christian long first century no minim gud staka samting. Samfala garem kwestin abaotem niu covenant wea start long Pentecost. Waswe, niu covenant hem for olketa Jew and olketa wea followim religion bilong olketa Jew nomoa? Waswe, God mekem niu covenant witim pipol wea no Jew tu and anointim olketa witim holy spirit? (Acts 10:45) Waswe, man wea no Jew mas circumcise firstaem and followim Law bilong Moses? (Acts 15:1, 5) Hem barava important for savve long ansa bilong olketa kwestin hia. Olketa needim spirit bilong Jehovah for minim wisdom bilong God wea big tumas. Bat hu nao bae holy spirit helpem for luksavve long wisdom hia?
6 Olketa brata wea garem responsibility nao laek for faendem ansa long olketa kwestin hia. Peter, Paul, and Barnabas stap tu long taem wea governing body garem meeting and thrifala storyim wanem Jehovah duim for pipol wea no Jew wea no circumcise. (Acts 15:7-12) Taem governing body herem datwan and ting raonem olketa samting wea Hebrew Scripture talem and holy spirit helpem olketa, olketa disaedem wanem for duim. Then olketa raetem leta long olketa kongregeson for talem olketa abaotem datwan.—Readim Acts 15:25-30; 16:4, 5; Eph. 3:5, 6.
7. Wanem nao helpem olketa Christian for minim wisdom bilong God?
7 Holy spirit helpem John, Peter, James, and Paul for raetem olketa leta wea ansarem staka nara kwestin wea kamap. Bihaen olketa finis for raetem Greek Scripture, paoa wea God givim long man for talem profesi and paoa for kasem savve, hem finis. (1 Cor. 13:8) Waswe, holy spirit bae gohed for teachim and helpem olketa Christian for tingim moa wanem olketa lanem finis? Waswe, bae hem gohed for helpem olketa for minim wisdom bilong God wea big tumas? Profesi talem holy spirit bae duim datwan.
Taem World Gogo for Finis
8, 9. Taem world gogo for finis, hu nao bae “shaen” and garem wei for luksavve?
8 Wanfala angel story abaotem taem wea world gogo for finis. Hem sei: “Olketa wea garem wei for luksavve bae shaen braet tumas olsem skae. And olketa wea teachim nara pipol for followim stretfala wei bae shaen braet tumas olsem olketa star wea stap long skae for olowe. . . . And trufala savve bae kamap big.” (Dan. 12:3, 4) Hu nao bae garem wei for luksavve and shaen braet? Tokpiksa bilong Jesus abaotem wheat and rabis grass helpem iumi for savve long diswan. Taem Jesus storyim “world hem gogo for finis,” hem sei: “Long datfala taem nao olketa wea raeteous bae shaen braet tumas olsem sun insaed kingdom bilong Dadi bilong olketa.” (Matt. 13:39, 43) Jesus sei “olketa wea raeteous” nao “olketa son bilong kingdom,” wea minim olketa anointed Christian.—Matt. 13:38.
9 Waswe, evri anointed Christian nao bae “shaen”? Ia, from evri Christian nao mas preach, teachim pipol for kamap disaepol, and strongim narawan long olketa meeting. Olketa anointed Christian mas showimaot gudfala example long diswan. (Zech. 8:23) Bat taem world gogo for finis, God bae showimaot wisdom bilong hem wea big tumas. Long datfala taem nao pipol bae ‘minim’ profesi wea Daniel raetem. (Dan. 12:9) Hao nao bae spirit minim kam wisdom bilong God wea big tumas and hu nao bae luksavve long datwan?
10. (a) Long olketa last day distaem, hu nao holy spirit helpem for luksavve long wisdom bilong God wea big tumas? (b) Storyim hao Governing Body helpem iumi for minim gud moa nambawan spiritual temple bilong Jehovah.
10 Taem Jehovah laekem iumi for minim gud niu samting long Bible, holy spirit helpem samfala bilong “wakaman wea faithful and wise” wea stap long world headquarter for luksavve long olketa tru samting wea olketa no minim bifor. (Matt. 24:45; 1 Cor. 2:13) Governing Body story tugeta abaotem olketa niu samting hia. (Acts 15:6) Then taem olketa savve long olketa niu samting, olketa talem kam long olketa pablikeson for helpem evriwan. (Matt. 10:27) Gogo taem olketa minim gud samfala samting moa, olketa talem kam tu.—Lukim box “Holy Spirit Helpem Iumi for Savve Wanem Nao Spiritual Temple.”
Kasem Gud Samting From Holy Spirit
11. Wanem gud samting nao evri Christian kasem from holy spirit?
11 Evri Christian wea faithful kasem gud samting from holy spirit helpem olketa for minim wisdom bilong God. Olsem olketa Christian long first century, iumi tu studyim Bible and tingim moa wanem iumi lanem finis and followim wanem holy spirit helpem iumi for minim. (Luke 12:11, 12) Man no need for go long bigfala skul mekem hem minim wisdom bilong God wea stap long olketa buk bilong iumi. (Acts 4:13) So wanem nao iumi savve duim for minim gud moa wisdom bilong God? Tingim samfala samting wea iumi savve duim.
12. Wanem taem nao iumi shud prea for holy spirit?
12 Prea for holy spirit. Bifor iumi studyim eni buk bilong iumi, iumi shud prea long God for holy spirit leadim iumi. Iumi savve prea taem iumi study seleva or nomata sapos iumi study for lelebet taem nomoa. Jehovah hapi tumas for herem prea bilong iumi. Jesus talem hao Jehovah hapi for givim holy spirit sapos iumi barava askem hem.—Luke 11:13.
13, 14. Taem iumi prepare for olketa meeting, hao nao datwan helpem iumi for minim wisdom bilong God?
13 Prepare for olketa meeting. Wakaman wea faithful and wise givim iumi spiritual “kaikai long barava taem.” Hem talem iumi olketa samting wea kam from Bible and encouragem iumi for markem taem for study and for go long olketa meeting. Wakaman hia ting raonem gud wanem “evri brata” need for studyim. (1 Pet. 2:17; Col. 4:16; Jude 3) Taem iumi traem best for duim wanem wakaman hia talem, iumi followim holy spirit.—Rev. 2:29.
14 Taem iumi prepare for olketa meeting, hem gud for readim olketa scripture and trae for minim hao olketa join witim wanem iumi lanem. Taem iumi duim olsem evritaem, iumi bae isisi minim gud Bible. (Acts 17:11, 12) Sapos iumi readim olketa scripture, datwan savve helpem iumi for no forgetim and holy spirit savve helpem iumi for tingim moa. Nara samting tu, sapos iumi lukim olketa scripture insaed Bible, hem bae isi for iumi faendem moa.
15. Why nao iumi shud readim evri niu pablikeson? Wanem nao iumi savve duim for readim evri niu pablikeson?
15 Readim evri niu pablikeson. Taem iumi go long olketa meeting, iumi no herem evri point wea stap long olketa pablikeson wea olketa redyim for iumi and pipol wea no Witness tu. Long disfala world wea pipol busy tumas, staka taem iumi mas weit for samwan or samting. Sapos iumi tekem pablikeson wea iumi no readim yet or iumi readim lelebet finis, maet iumi savve readim long taem wea iumi weit. Samfala lisin long recording taem olketa wakabaot or taem olketa gogo long trak. Olketa wea redyim olketa pablikeson duim gudfala research mekem olketa wea no kasem big education barava minim gud wisdom bilong God.—Hab. 2:2.
16. Wanem gud samting nao iumi kasem taem iumi raetem olketa kwestin and lukaotem ansa?
16 Ting raonem gud. Taem iu readim Bible or olketa buk bilong iumi, ting raonem wanem iu readim. Maet iu garem samfala kwestin abaotem wanem iu readim. Iu savve raetem olketa kwestin hia and lukaotem ansa long narataem. Samting wea iumi interest tumas long hem nao iumi savve barava studyim gud. Taem iumi kasem moa savve, datwan savve helpem iumi long taem wea iumi needim.—Matt. 13:52.
17. Wanem nao iumi savve duim long famili study or taem iumi study seleva?
17 Markem taem for Famili Worship. Governing Body encouragem iumi for markem taem evri week for study seleva or for famili study. From olketa changem schedule for olketa meeting, iumi garem taem for duim datwan. Wanem nao iufala duim long Famili Worship? Samfala readim Bible and duim research long olketa Bible verse wea olketa no minim gud and raetem olketa point insaed Bible bilong olketa. Staka famili storyim wanem olketa savve duim for followim wanem olketa lanem. Samfala famili hed storyim samting wea fitim famili bilong olketa or olketa kwestin and subject wea famili laek storyim. Gogo iu bae tingim samfala nara subject for storyim.a
18. Why nao iumi mas studyim wisdom bilong God?
18 Jesus sei holy spirit bae helpem iumi. So iumi mas studyim wisdom bilong God wea big tumas wea hem nao “barava savve bilong God.” (Readim Proverbs 2:1-5.) Bible storyim staka samting abaotem wanem “God redyim for olketa wea lovem hem.” Taem iumi waka hard for lanem staka samting long Bible, “spirit helpem iumi for minim evri samting, nomata wisdom bilong God wea big tumas.”—1 Cor. 2:9, 10.
[Footnote]
Wanem Nao Ansa Bilong Iu?
• Wanem nao tufala wei wea holy spirit savve helpem iumi for minim “wisdom bilong God wea big tumas”?
• Long first century, hu nao holy spirit helpem for luksavve long wisdom bilong God?
• Wanem nao holy spirit duim for helpem iumi minim gud moa olketa samting distaem?
• Wanem nao iumi savve duim for kasem gud samting from wanem holy spirit duim?
[Box long page 22]
Holy Spirit Helpem Iumi for Savve Wanem Nao Spiritual Temple
Wanfala samting wea olketa long first century lanem from “wisdom bilong God wea big tumas,” hem abaotem tabernacle and olketa temple wea piksarem arrangement for tru worship. Paul sei tru worship nao “trufala tent wea Jehovah wakem, and no olketa man.” (Heb. 8:2) Datwan hem nambawan spiritual temple wea helpem man fren witim God from Jesus Christ dae for pipol and hem kamap priest.
Long 29 C.E., taem Jesus baptaes, Jehovah acceptim hem for kamap perfect sakrifaes. Long datfala taem nao “trufala tent” kamap. (Heb. 10:5-10) Bihaen Jesus dae and laef bak moa, hem go insaed Most Holy bilong spiritual temple and givim go “long God” price bilong perfect laef wea hem sakrifaesim.—Heb. 9:11, 12, 24.
Paul sei olketa anointed Christian “gohed for kamap holy temple for Jehovah.” (Eph. 2:20-22) Waswe, datfala temple hem semsem witim “trufala tent” wea Paul storyim long Hebrews? For staka year finis, pipol bilong Jehovah tingse hem sem wan. Olketa tingse Jehovah redyim olketa anointed Christian long earth for kamap “olketa ston” long temple bilong hem long heven.—1 Pet. 2:5.
Nomata olsem, klosap long year 1971, wakaman wea faithful and wise start for luksavve temple wea Paul storyim long Ephesians hem no nambawan spiritual temple bilong Jehovah. Sapos olketa anointed Christian wea laef bak nao “trufala tent,” datwan minim “trufala tent” kamap nomoa bihaen olketa anointed Christian start for laef bak long taem wea “Lord stap.” (1 Thess. 4:15-17) Bat taem Paul storyim tabernacle, hem sei: “Disfala tent hem for teachim iumi long taem God markem wea hem nao distaem.”—Heb. 9:9.
Taem olketa studyim gud olketa scripture hia and samfala nara scripture, olketa start for luksavve God no gohed for wakem spiritual temple distaem and olketa anointed Christian long earth bae no kamap “olketa ston” long spiritual temple. Bat olketa anointed Christian worshipim God long courtyard and long Holy ples bilong spiritual temple. Evriday olketa givim “sakrifaes for praisem God.”—Heb. 13:15.
[Piksa long page 23]
Wanem nao iumi savve duim for minim gud “wisdom bilong God wea big tumas”?