Parents, Provaedem Wanem Famili Needim
“Sapos eniwan no provaed for olketa relative bilong hem, . . . hem lusim biliv bilong hem.”—1 TIMOTHY 5:8.
1, 2. (a) Why nao hem encouragem iumi for lukim olketa famili attendim olketa Christian meeting tugeta? (b) Wanem nao samfala hard samting wea famili savve deal witim mekem olketa no kam leit long olketa meeting?
BIFOR wanfala meeting insaed Christian kongregeson start, lukluk raon and iu savve lukim olketa pikinini wea werem gud kaleko sidaon witim parents bilong olketa. Hem naes tumas for lukim love wea olketa famili hia garem for each other and for Jehovah. Nomata olsem, hem gud for remember hao evriwan insaed famili nao mas waka hard mekem olketa no kam leit long meeting.
2 Staka taem, parents busy long full day, and long taem bilong meeting, evriwan bae moa busy. Samfala redim kaikai, narawan duim waka long haos, and olketa pikinini mas finisim homwak. Parents nao duim big samting taem olketa mas mek sure evriwan luk klin, kaikai, and redi for go. Bat, saed long olketa pikinini, samting wea man no expectim nao savve happen. Maet fasbon brekem kaleko bilong hem taem hem plei. Lasbon kapsaetem kaikai bilong hem. Olketa pikinini start for raoa. (Proverbs 22:15) Wanem nao savve kamaot from diswan? Nomata parents plan gud, eni samting savve spoelem plan. Bat, klosap evritaem famili arrive long Kingdom Hall bifor olketa meeting start. Hem encouragem iumi for lukim olketa kam evri week, and evri year, taem olketa pikinini growap and servem Jehovah!
3. Hao nao iumi savve Jehovah tinghae tumas long olketa famili?
3 Nomata samfala taem waka bilong iu olsem dadi or mami hem hard, wea maet mekem iu barava taed tu, iu savve sure hao Jehovah barava tinghae long hard waka bilong iu. Hem nao startim famili laef. Dastawe Word bilong hem sei evri famili “kasem nem bilong olketa” from Jehovah. (Ephesians 3:14, 15) So taem iufala parents traem best for duim gud waka bilong iu insaed famili, iu givim honor long Sovereign Lord bilong universe. (1 Corinthians 10:31) Datwan hem barava nambawan privilege! Dastawe hem barava fitim for iumi storyim disfala assignment wea Jehovah givim long parents. Long disfala article, bae iumi story abaotem disfala assignment saed long wei for provaed for famili. Distaem iumi reviewim thrifala wei wea God expectim parents for provaed for famili.
Provaedem Material Samting
4. Insaed long famili, wanem nao olketa arrangement wea Jehovah mekem for provaedem wanem olketa pikinini needim?
4 Aposol Paul hem raet olsem: “Tru nao sapos eniwan no provaed for olketa relative bilong hem, and especially for olketa klos famili member, hem showimaot hem lusim biliv bilong hem and hem moa worse winim man wea no biliv long God.” (1 Timothy 5:8) Taem Paul iusim disfala word “eniwan” long disfala verse, hu nao hem tingim? Hem minim hed bilong famili, wea staka taem hem nao dadi. God givim important waka tu long woman olsem helper for hasband bilong hem. (Genesis 2:18) Long taem bilong Bible, staka taem olketa woman helpem hasband bilong olketa for provaed for famili. (Proverbs 31:13, 14, 16) Distaem, olketa famili wea garem dadi or mami nomoa hem samting wea kamap staka tumas.a Long staka Christian famili wea garem dadi or mami nomoa, olketa dadi or mami hia provaed long barava gudfala wei. Bat, iumi evriwan savve hao hem moabeta for famili garem dadi and mami, and for dadi nao hem lead.
5, 6. (a) Olketa wea trae for provaedem material samting for famili feisim wanem kaen hard samting? (b) Wei for garem wanem tingting long waka nao bae helpem Christian for no laek lusim waka bilong hem?
5 Long 1 Timothy 5:8, Paul storyim wanem kaen wei for provaed? Olketa nara verse wea stap raonem datwan, showimaot hao hem story abaotem olketa material samting wea famili needim. Long world distaem, staka hardfala samting nao hed long famili mas feisim mekem hem savve provaedem datwan. Hard taem saed long selen kamap long evri ples long world, olsem wei for lei off, wei for no garem waka for selen, and wei wea kost bilong olketa samting hem hae tumas. Wanem nao savve helpem datwan wea provaed for gohed nomata hem feisim olketa hard samting olsem?
6 Datwan wea provaed shud remember hao wei for duim datwan hem wanfala assignment from Jehovah. Toktok bilong Paul showimaot hao man wea fit for obeyim disfala komand, bat no laek for duim hem olsem man wea “no biliv long God.” Wanfala Christian bae duim best for no kamap man olsem front long God. Nomata olsem, sorre samting nao hem wei wea staka pipol long world distaem “no garem love.” (2 Timothy 3:1, 3) Tru nao, staka dadi no willing for fulfillim responsibility bilong olketa saed long wei for sapotim famili bilong olketa. Olketa Christian hasband no garem tingting olsem saed long wei for provaed, wea showimaot wei for no tingim or no lovem famili. Olketa Christian wea provaed olketa difren from nara pipol bikos olketa ting long eni waka olsem hem important, and hem mekem Jehovah hapi. And tu, datfala waka mekem olketa fit for provaed for famili bilong olketa.
7. Why nao hem gud for parents ting raonem example bilong Jesus?
7 Olketa hed bilong famili savve kasem gud samting tu sapos olketa ting raonem perfect example bilong Jesus. Tingim hao profesi long Bible storyim Jesus olsem “Dadi [bilong iumi] for olowe.” (Isaiah 9:6, 7) From Jesus hem “lastfala Adam,” hem changem “fasfala man Adam,” and kamap dadi bilong olketa man wea showimaot faith. (1 Corinthians 15:45) Jesus no olsem Adam wea hem wanfala dadi wea selfish wea tingim hemseleva nomoa. Jesus hem best dadi. Bible sei olsem abaotem hem: “From diswan iumi savve wanem nao love, bikos datwan hem givim soul bilong hem for iumi.” (1 John 3:16) Tru tumas, Jesus willing for givim laef bilong hem for nara pipol. Nomata olsem, evriday hem tingim fastaem need bilong pipol long olketa nara wei tu. Iufala parents savve kasem gud samting sapos iufala followim datfala wei for sakrifaesim seleva.
8, 9. (a) Wanem nao parents savve lanem from wei wea olketa bird no tingim seleva bat provaedem wanem pikinini bilong olketa needim? (b) Long wanem wei nao staka Christian parents showimaot fasin for sakrifaesim seleva?
8 Parents savve lanem staka samting abaotem love wea no selfish from disfala toktok bilong Jesus for bighed pipol bilong God: “Plande taem mi laek hipimap olketa pikinini bilong iu, olsem wanfala mami kokorako hem hipimap olketa baby bilong hem andanit long wing!” (Matthew 23:37) Long hia Jesus hem storyim klia wei wea wanfala mami kokorako hem haedem olketa pikinini bilong hem andanit wing bilong hem. Tru nao, parents savve lanem staka samting from wei bilong mami kokorako for protectim pikinini bilong hem, and willing for putim hemseleva long danger for protectim olketa. Nomata olsem, samting wea olketa mami and dadi bird duim evriday hem spesol tumas. Olketa busy tumas for flae go, tekem kaikai, and flae kam bak long olketa pikinini. Nomata olketa taed fogud, olketa kam putim kaikai insaed mouth bilong baby bilong olketa wea kwiktaem kaikaim and laekem moa kaikai. Staka animal wea Jehovah wakem “born kam witim wisdom” saed long wei wea olketa givim wanem baby bilong olketa needim.—Proverbs 30:24.
9 Olsem tu, olketa Christian parents raonem world willing for sakrifaesim seleva. Iu willing for nogud samting kasem iu winim wei for datwan kasem pikinini bilong iu. And tu, iu willing for waka hard evriday mekem iu savve provaedem wanem famili bilong iu needim. Staka long iufala wekap early for go waka long kaen waka wea hard tumas and mekem iu taed. Iu trae hard for provaedem gudfala kaikai for famili bilong iu. Iu stragol for mek sure pikinini bilong iu garem klin kaleko, haos, and education wea fitim. And iu duim evri samting hia evriday, evri year. Tru tumas, kaen wei for givim iuseleva and gohed strong hem mekem Jehovah hapi! (Hebrews 13:16) Nomata olsem, iu luksavve tu hao iu mas provaedem olketa samting wea moa important for famili bilong iu.
Provaedem Spiritual Samting
10, 11. Wanem nao olketa man needim winim eni nara samting, and wanem nao Christian parents mas duim fastaem mekem olketa savve givim disfala samting wea pikinini needim?
10 Samting wea moa important hem for provaedem spiritual samting. Jesus hem sei: “Man mas laef, no from bred nomoa, bat from evri toktok wea kamaot from mouth bilong Jehovah.” (Matthew 4:4; 5:3) Wanem nao parents savve duim for provaedem spiritual samting?
11 Scripture wea pipol iusim staka taem saed long diswan hem Deuteronomy 6:5-7. Plis openem Bible bilong iu and readim olketa verse hia. Lukim hao fasfala samting parents mas duim hem for olketa seleva mekem grow wei for fren witim God, and for mekem love wea olketa garem for Jehovah and toktok bilong hem kamap moa big. Tru tumas, iu mas kamap student wea studyim gud Word bilong God long wei for readim Bible evritaem and ting raonem, mekem iu barava minim and lovem olketa wei, principle, and law bilong Jehovah. Samting wea bae kamaot from diswan nao, heart bilong iu bae fulap witim olketa nambawan truth insaed Bible wea bae mekem iu hapi, and garem respect and love for Jehovah. Bae iu garem staka gud samting for storyim long olketa pikinini bilong iu.—Luke 6:45.
12. Hao nao parents savve followim example bilong Jesus saed long wei for strongim olketa truth bilong Bible long pikinini bilong olketa?
12 Parents wea strong long spiritual wei fit for followim kaonsel wea stap long Deuteronomy 6:7, for iusim evri chance for “strongim” toktok bilong Jehovah long olketa pikinini bilong olketa. For “strongim” hem minim for teachim and talem samting evritaem. Jehovah barava savve hao wei wea evriwan lanem samting—especially olketa pikinini—hem for herem datwan plande taem. Dastawe Jesus duim diswan long ministry bilong hem. Olsem example, taem hem teachim olketa disaepol bilong hem for hambol and for no praod and laek winim narawan, hem iusim olketa difren wei for teachim moa datfala sem principle. Hem teach thru long wei for story gud raonem, givim example, and showim samting long olketa tu. (Matthew 18:1-4; 20:25-27; John 13:12-15) Wei wea Jesus evritaem showimaot patient fasin hem nambawan. Olsem tu, parents need for faendem olketa wei for teachim olketa main truth long pikinini bilong olketa, and patient for talem olketa principle bilong Jehovah staka taem long pikinini go kasem taem olketa minim and followim.
13, 14. Wanem nao samfala taem wea parents savve strongim olketa truth bilong Bible long olketa pikinini, and olketa wanem pablikeson nao savve helpem olketa?
13 Famili study hem gudfala taem for duim kaen teaching olsem. Tru tumas, wei for evritaem duim famili study wea buildimap and mekem famili hapi hem main samting wea mekem famili strong long spiritual saed. Olketa Christian famili raonem world hapi tumas for duim kaen study olsem, and mekius long olketa pablikeson wea organization bilong Jehovah provaedem and changem samting olketa studyim for fitim wanem olketa pikinini needim. Datfala buk Learn From the Great Teacher hem wanfala nambawan blessing saed long diswan, and tu, Questions Young People Ask—Answers That Work.b Bat, famili study hem no only taem for teachim olketa pikinini.
14 Olsem Deuteronomy 6:7 hem showimaot, staka chance stap for iufala parents storyim olketa spiritual samting witim olketa pikinini. Taem iufala wakabaot long road, waka tugeta, or enjoyim hapitaem, iu savve faendem olketa chance for provaedem olketa spiritual samting wea pikinini needim. Bat, no talem olowe olowe gogo olketa taed for herem. Trae for mekem olketa story bilong famili buildimap olketa long spiritual wei. Olsem example, Awake! magasin hem garem plande article abaotem staka difren topic. Iu savve iusim olketa article hia for storyim olketa animal wea Jehovah creatim, olketa ples long world wea luk naes, and staka didifren kaen living and wei bilong pipol. Kaen story olsem savve muvim olketa young wan for readim olketa nara pablikeson wea faithful and wise slave sekson provaedem.—Matthew 24:45-47.
15. Hao nao parents savve helpem pikinini bilong olketa for ting long Christian ministry olsem samting wea interesting and mekem olketa satisfae?
15 For story long wei wea buildimap olketa pikinini bilong iu bae helpem iu for provaedem narafala spiritual need bilong olketa. Olketa Christian pikinini need for lane for talemaot faith bilong olketa long nara pipol. Taem iu storyim interesting samting insaed Wastaoa or Awake! magasin, iu savve luk aotem olketa chance for storyim hao iu savve iusim datfala information long ministry. Olsem example, iu savve ask: “Hem bae gud tumas sapos moa pipol savve long diswan abaotem Jehovah, iaman? Long tingting bilong iu, hao nao iumi savve mekem man for interest long disfala topic?” Kaen wei for story olsem savve helpem olketa young wan for moa willing for storyim samting olketa lanem witim nara pipol. Then, taem olketa pikinini bilong iu go witim iu long ministry, olketa lukim iuseleva nao duim samting followim wanem iufala storyim. Maet olketa lanem tu hao ministry hem wanfala interesting waka wea mekem man hapi and barava satisfae.—Acts 20:35.
16. Wanem nao olketa pikinini savve lanem taem olketa herem prea bilong parents bilong olketa?
16 Parents provaedem spiritual samting wea pikinini needim tu taem olketa prea. Jesus teachim olketa disaepol bilong hem hao for prea, and hem prea witim olketa staka taem. (Luke 11:1-13) Tingim bigfala samting wea olketa lanem taem olketa herem Son bilong Jehovah hem prea! Olsem tu, olketa pikinini bilong iu savve lanem staka samting from olketa prea wea iu talem. Olsem example, olketa savve lanem hao Jehovah laekem iumi for free for storyim evri samting insaed heart bilong iumi long hem, talem hem eni problem wea iumi garem. Tru nao, olketa prea wea iu talem savve helpem olketa pikinini bilong iu for lanem wanfala barava important spiritual truth, hem nao wei wea olketa fit for fren witim Dadi bilong olketa long heven.—1 Peter 5:7.
Provaedem Wanem Olketa Needim Saed Long Feeling
17, 18. (a) Long wanem wei nao Bible showim hem important for showimaot love long olketa pikinini? (b) Hao nao olketa dadi shud followim Jehovah for talem and showimaot love long pikinini bilong olketa?
17 Olketa pikinini garem olketa important need saed long feeling tu. Word bilong God talem long parents hao hem important tumas for givim wanem olketa needim saed long diswan. Olsem example, olketa young woman kasem kaonsel for “lovem pikinini bilong olketa.” Wei for duim olsem minim olketa young woman hia wea garem pikinini garem stretfala tingting. (Titus 2:4) Tru nao, parents wea garem gudfala tingting nao showimaot love long pikinini. Diswan teachim pikinini for showimaot love and hem givim hem gud samting for full laef bilong hem. Long narasaed, hem krangge samting for parents no showimaot love long pikinini. Datwan mekem pikinini feel sorre fogud and sapos parents duim datwan olketa fail for followim Jehovah nao, wea showimaot bigfala love for iumi nomata iumi no perfect.—Psalm 103:8-14.
18 Jehovah duim samting fastaem tu saed long wei for lovem olketa pikinini bilong hem long earth. Long 1 John 4:19, hem sei “hem lovem iumi fastaem.” Iufala olketa dadi shud followim example bilong Jehovah, duim samting fastaem for buildim wei for lovem olketa pikinini bilong iu. Bible encouragem olketa dadi for no mekem pikinini bilong olketa feel nogud, “mekem heart bilong olketa no kamap hevi.” (Colossians 3:21) Wanfala samting wea barava mekem pikinini feel nogud hem sapos hem tingse parents bilong hem no lovem or tinghae long hem. Olketa dadi wea hol bak for talem feeling bilong olketa shud rememberim example bilong Jehovah. Jehovah tok kam from heven for talemaot hem appruvim and lovem Son bilong hem. (Matthew 3:17; 17:5) Masbi datwan barava encouragem Jesus! Olsem tu, taem parents talemaot olketa lovem and appruvim olketa pikinini, diswan barava strongim pikinini.
19. Why nao discipline hem important, and Christian parents trae for balance long wanem wei?
19 Hem tru, love wea parents garem for pikinini hem no showaot long samting olketa talem nomoa. Samting wea man duim nao main wei for showimaot love. Taem parents provaedem material and spiritual samting, datwan hem showimaot love, especially sapos parents duim from love nao main samting wea muvim olketa. Nara samting tu, discipline hem barava important wei for parents showimaot love. Tru nao, “man wea Jehovah lovem hem disciplinem.” (Hebrews 12:6) Long narasaed, parents wea no givim discipline showimaot olketa heitim pikinini bilong olketa! (Proverbs 13:24) Jehovah hem evritaem balance saed long diswan, taem hem givim discipline “wea fitim.” (Jeremiah 46:28) Hem no isi for parents wea no perfect for balance long diswan evritaem. Nomata olsem, iu bae kasem barava gud samting sapos iu traem best for balance olsem. Discipline wea iu strong for givim bat wea iu givim long loving wei bae helpem pikinini for garem laef wea hapi and hem duim gud samting. (Proverbs 22:6) Datwan nao samting wea evri Christian parents laekem for pikinini bilong olketa!
20. Hao nao parents savve givim best chance long pikinini bilong olketa for “chusim laef”?
20 Taem iufala parents duim important waka wea Jehovah givim long iufala—olsem wei for provaedem olketa need bilong pikinini saed long material and spiritual wei and saed long feeling—bae iufala kasem bigfala reward. Wei for duim olsem givim pikinini bilong iu best chance for “chusim laef” and “gohed for laef.” (Deuteronomy 30:19) Olketa pikinini wea chus for servem Jehovah and followim road wea lead go long laef taem olketa kamap mature, mekem parents hapi fogud. (Psalm 127:3-5) Kaen hapi olsem bae gohed for olowe! Bat, hao nao young pipol savve praisem Jehovah distaem? Next article bae storyim datwan.
[Olketa Footnote]
a Taem disfala article story abaotem datwan wea provaed, hem minim hasband. Nomata olsem, olketa principle hia fitim tu olketa Christian woman wea provaed for famili.
b Olketa Jehovah’s Witness pablisim.
Hao Nao Bae Iu Ansa?
Wanem nao parents savve duim for provaed for pikinini bilong olketa long
• material wei?
• spiritual wei?
• saed long feeling?
[Piksa long page 18]
Staka bird barava waka hard for provaedem kaikai for pikinini bilong olketa
[Piksa long page 20]
Parents mas strongim spiritual saed bilong olketa seleva fastaem
[Piksa long page 21]
Staka chance stap for parents teachim pikinini abaotem Creator
[Piksa long page 22]
Olketa pikinini feel strong taem parents talemaot love bilong olketa