Tingting Bilong Bible
Hu Nao Michael Datfala Archangel?
OLSEM samting wea Bible talem, planti million angel stap long ples bilong olketa spirit. (Daniel 7:9, 10; Revelation 5:11) From start go kasem end, olketa Scripture story planti handred taem abaotem olketa angel wea stap loyal long God. Bat, Bible talem nem bilong tufala angel nomoa. Wanfala hem angel Gabriel, wea hem nao bringim message bilong God for thrifala difren man insaed samting olsem 600 year. (Daniel 9:20-22; Luke 1:8-19, 26-28) Mek-tu angel wea Bible talem nem bilong hem hem Michael.
Hem klia hao Michael hem wanfala barava nambawan angel. Olsem example, buk bilong Daniel storyim hao Michael faetem olketa wicked demon for pipol bilong Jehovah. (Daniel 10:13; 12:1) Insaed leta bilong Jude wea kam from God, Michael feisim Satan taem olketa raoa abaotem body bilong Moses. (Jude 9) Buk bilong Revelation showimaot hao Michael faet againstim Satan and olketa demon bilong hem and hem torowem olketa aot from heven. (Revelation 12:7-9) No eni nara angel garem bigfala paoa ovarem olketa enemy bilong God olsem hem. So iumi no sapraes hao Bible kolem Michael “datfala archangel,” first part bilong datfala word hem “arch” wea minim “chief,” or “main wan.”
Raoa Abaotem Hu Nao Michael
Olketa religion bilong Christendom, and tu Judaism and Islam, garem difren idea abaotem olketa angel. Samfala wei for explainim hem no klia. Olsem example, The Anchor Bible Dictionary hem sei: “Maet wanfala hae angel nomoa or wanfala smol grup archangel stap (maet fofala or sevenfala).” The Imperial Bible-Dictionary hem sei, Michael hem “nem bilong wanfala spirit creature, wea pipol garem tufala difren tingting abaotem, olketa sei hem nao Lord Jesus Christ, Son bilong God, or maet hem wanfala long wanem olketa kolem sevenfala archangel.”
Long kastom bilong olketa Jew sevenfala archangel hia nao Gabriel, Jeremiel, Michael, Raguel, Raphael, Sariel, and Uriel. Bat, olketa Muslim biliv long fofala archangel nomoa, wea nem bilong olketa hem, Jibril, Mikal, Izrail, and Israfil. Olketa Catholic tu biliv long fofala archangel: Michael, Gabriel, Raphael, and Uriel. Wanem nao Bible talem? Waswe, planti archangel nao stap?
Ansa Bilong Bible
Michael hem only archangel wea Bible storyim, and no enitaem olketa Scripture sei winim wanfala “archangel” stap. Bible kolem Michael datfala archangel, diswan showim hao hem nomoa garem datfala position. Dastawe, hem fitim for sei Jehovah God markem wanfala nomoa long olketa angel bilong hem long heven for garem paoa ovarem evri angel.
Witim Creator, only faithful wan wea Bible sei hem garem paoa ovarem olketa angel, hem nao Jesus Christ. (Matthew 13:41; 16:27; 24:31) Aposol Paul story abaotem “Lord Jesus” and “olketa strongfala angel bilong hem.” (2 Thessalonians 1:7) And Peter storyim Jesus bihaen hem resurrect olsem: “Hem stap long raet saed bilong God, from hem go long heven; and olketa angel and olketa gavman and paoa stap anda long hem.”—1 Peter 3:22.
Nomata no eni toktok stap insaed Bible wea barava talem stret hao Michael datfala archangel hem nao Jesus, wanfala scripture stap wea showim hao Jesus nao garem position bilong archangel. Long leta bilong hem for olketa long Thessalonica, aposol Paul profesi olsem: “Lord seleva bae kam daon from heven witim wanfala strongfala singaot, witim voice bilong archangel and witim trumpet bilong God, and olketa wea dae wea garem wan mind witim Christ bae rise ap firstaem.” (1 Thessalonians 4:16) Samting wea disfala scripture storyim showimaot Jesus kasem finis paoa olsem Messiah King bilong God. Bat, hem toktok witim “voice bilong archangel.” Lukim tu hao hem garem paoa for mekem olketa wea dae laef bak moa.
Taem hem man long earth, Jesus resurrectim pipol. Taem hem duim diswan, hem iusim voice bilong hem for singaot go long olketa. Olsem example, taem hem resurrectim son bilong wanfala widow long taon bilong Nain, hem sei: “Young man, mi talem iu, Getap!” (Luke 7:14, 15) Bihaen, just bifor hem resurrectim fren bilong hem Lazarus, Jesus “singaot witim bigfala voice: ‘Lazarus, kamaot!’” (John 11:43) Bat long olketa taem hia, Jesus iusim voice bilong wanfala perfect man.
Bihaen hemseleva resurrect, Jesus rise ap for kasem wanfala “hae position” long heven olsem wanfala spirit creature. (Philippians 2:9) Hem no wanfala man nao, hem garem voice bilong archangel. So taem trumpet bilong God hem mek noise for kolem “olketa wea dae wea garem wan mind witim Christ” for rise ap for go long heven, Jesus talem “wanfala strongfala singaot,” distaem “witim voice bilong archangel.” So hem fitim for tingim hao archangel nomoa savve singaot “witim voice bilong archangel.”
Hem tru, olketa narafala angel creature wea garem hae position stap, olsem olketa seraph and cherub. (Genesis 3:24; Isaiah 6:2) Bat, olketa Scripture showim hao Jesus Christ wea resurrect nao hem chief bilong evri angel—Michael datfala archangel.