Iusim Bible for Helpem Narawan and Iuseleva Tu

1. Why nao iumi mas barava trustim Bible?

FOR wanfala Bible study fit for kamap anbaptaes pablisa, hem mas showimaot hem bilivim Bible hem kam from God.a Samting wea iumi evriwan duim and talem mas showimaot iumi trustim Bible. Taem iumi barava trustim Bible and lane for iusim gud long ministry, iumi savve helpem olketa narawan for savve long Jehovah and for kasem laef olowe.

2. Why nao iumi shud gohed for followim olketa samting wea iumi lanem?

² Aposol Paul talem why nao Bible hem barava important. Hem sei long Timothy: “Gohed for followim olketa samting wea iu lanem.” “Olketa samting” wea Timothy lanem hem olketa tru teaching long Bible wea mekem hem for garem faith long datfala gud nius. Olketa samting wea iumi lanem from Bible savve mekem faith bilong iumi tu for strong, olketa savve mekem iumi wise, and savve sevem iumi. (2 Tim. 3:14, 15) Samting wea Paul talem long next verse showimaot Bible hem kam from God. Bat wanem moa iumi savve lanem from 2 Timothy 3:16? (Readim.) Bae iumi storyim verse hia and datwan bae helpem iumi for barava sure olketa teaching bilong Jehovah hem “stret.”—Ps. 119:128.

BIBLE SAVVE “TEACHIM PIPOL”

3-5. (a) Wanem nao happen bihaen Peter story long wanfala big sekson long Pentecost, and why nao olsem? (b) Wanem nao mekem staka long Thessalonica for acceptim truth? (c) Taem iumi preach long pipol, olketa luksavve long wanem?

³ Jesus sei olsem long olketa Israelite: “Mi sendem olketa profet, olketa man wea wise, and olketa teacher long iufala.” (Matt. 23:34) Long hia Jesus story abaotem olketa disaepol bilong hem. Hem lanem olketa for iusim olketa Holy Raeting taem olketa duim ministry. Long Pentecost 33 C.E., aposol Peter story long wanfala big sekson wea hipap long Jerusalem. Hem talem toktok wea kam from olketa Hebrew Scripture. Taem olketa herem Peter explainim gud olketa verse hia, staka sorre tumas bikos olketa duim olketa nogud samting. Olketa repent and askem God for forgivim olketa. Long datfala day, samting olsem thri thousand pipol nao kamap olketa Christian.—Acts 2:37-41.

⁴ Iumi savve lane tu from example bilong aposol Paul wea preachim gud nius long olketa difren ples. Long Thessalonica, wea hem wanfala taon long Macedonia, hem story long olketa Jew long sinagog. Long thrifala Sabbath hem “iusim olketa Holy Raeting for story witim olketa” and pruvim why Christ mas safa and laef bak. Wanem nao kamaot from datwan? Samfala long olketa Jew and staka pipol bilong Greece olketa biliv.—Acts 17:1-4.

⁵ Staka pipol distaem luksavve iumi iusim Bible for pruvim wanem iumi teachim. Taem wanfala sista long Switzerland readim scripture long haosholder, datfala man askem sista hia hem bilong wanem church. Sista hia sei: “Mifala Olketa Jehovah’s Witness.” Datfala man sei: “Mi shud savve finis bikos Olketa Jehovah’s Witness nomoa savve kam long haos bilong man and readim scripture long Bible.”

6, 7. (a) Hao nao olketa wea teach long kongregeson savve iusim Bible long gudfala wei? (b) Hao nao iumi savve iusim gud Bible taem iumi conductim Bible study?

⁶ Hao nao iumi savve iusim Bible long gudfala wei taem iumi teachim olketa narawan? Sapos iu kasem assignment for givim tok or nara part long meeting, iusim olketa scripture. Winim wei for talem nomoa toktok bilong wanfala scripture long audience, or for readim olketa scripture from mobile, or from wanfala pepa wea iu printim finis, readim from Bible bilong iu. Askem audience tu for iusim Bible bilong olketa. Explainim mining bilong olketa verse and hao olketa scripture savve helpem audience for fren gud witim Jehovah. Winim wei for iusim olketa tokpiksa wea hard for man minim, or for storyim olketa experience for mekem audience laflaf nomoa, iusim datfala taem for storyim Bible.

⁷ Wanem nao iumi shud tingim taem iumi teachim olketa Bible study bilong iumi? Taem iumi study witim samwan, iumi shud encouragem hem for readim evri scripture wea stap long paragraf taem hem prepare. Taem iutufala study, iu nao bae disaedem olketa wanem scripture iutufala bae readim. Askem student for readim olketa scripture hia. Then, taem iumi explainim scripture, iumi shud no story tumas bat letem student for talem tingting bilong hem. Winim wei for talem hem wanem hem shud bilivim or wanem hem shud duim, iumi savve askem olketa gudfala kwestin wea bae helpem hem for minim olketa teaching long Bible.b

BIBLE “SHOWIM IUMI SAMTING WEA NO STRET”

8. Wanem nao Paul mas faet againstim?

⁸ Olketa elder long kongregeson garem responsibility for stretem olketa wea gohed for duim sin. (1 Tim. 5:20; Titus 1:13) Bat iumi tu mas stretem iumiseleva. Paul hem gudfala Christian wea garem gudfala konsens. (2 Tim. 1:3) Nomata olsem, hem sei: “Mi luksavve nara law wea stap long body bilong mi hem againstim law wea stap long mind bilong mi. Nara law hia hem law bilong sin wea stap long body bilong mi and hem bossim mi.” Bae iumi storyim wanem Paul duim mekem hem savve faet againstim olketa wik point bilong hem.—Readim Rome 7:21-25.

9, 10. (a) Maet wanem nao samfala wik point bilong Paul? (b) Maet wanem nao Paul duim for faet againstim olketa wik point bilong hem?

⁹ Paul no talem wanem nao olketa wik point bilong hem, bat hem storyim hao long bifor, hem “nating showimaot respect.” (1 Tim. 1:13) Taem hem no wanfala Christian yet, Paul hem barava spoelem olketa Christian. Hem sei hem “barava kros long olketa.” (Acts 26:11) Paul hem lane for kontrolem kros bilong hem, bat masbi samfala taem hem stragol for kontrolem feeling bilong hem and wanem hem talem. (Acts 15:36-39) Wanem nao helpem hem?

¹⁰ Long firstfala leta wea Paul raetem for olketa long Corinth, hem explainim wanem hem duim for stretem hemseleva. (Readim 1 Corinth 9:26, 27.) Hem barava traem best bilong hem for winim olketa wik point bilong hem. Masbi hem lukaotem eni kaonsel long olketa Holy Raeting, then hem prea long Jehovah for helpem hem taem hem traem best for followim datwan.c Iumi savve lane from example bilong hem bikos iumi tu mas faet againstim olketa wik point bilong iumi.

11. Wanem nao iumi savve duim for ‘gohed for lukluk gud long iumiseleva’ for mek sure iumi followim yet olketa tru teaching?

¹¹ Hem important for iumi gohed faet againstim olketa wik point bilong iumi. Iumi mas ‘gohed for lukluk gud long iumiseleva’ for mek sure iumi followim yet olketa tru teaching. (2 Cor. 13:5) Taem iumi readim olketa scripture olsem Colossae 3:5-10, iumi savve ting raonem olketa kwestin hia: ‘Waswe, mi traem best for faet againstim olketa wik point bilong mi? Or waswe, mi start for laekem olketa samting wea Jehovah sei hem no stret? Olsem example, sapos Web site kamap long mobile or computer wea garem olketa rabis piksa, waswe, mi satem kwiktaem? Or waswe, mi nao lukaotem olketa rabis Web site?’ Sapos iumi ting raonem hao iumi savve followim kaonsel from Bible long laef bilong iumiseleva, datwan bae helpem iumi for “gohed wekap and garem gudfala tingting.”—1 Thess. 5:6-8.

BIBLE “STRETEM EVRI SAMTING”

12, 13. (a) Wanem nao datfala toktok “stretem evri samting” hem minim, and hao nao iumi savve followim example bilong Jesus long diswan? (b) Sapos iumi mas stretem problem witim narawan, iumi mas no tok hao?

¹² Datfala toktok long Bible wea sei “stretem evri samting,” savve minim for mekem samting kamap gud or stret. Samfala taem sapos samwan minim rong wanem iumi talem or duim, iumi mas stretem datwan. Olsem example, olketa bigman bilong olketa Jew komplen and sei Jesus hem kaen long “olketa wea tekem tax and pipol wea sin.” Jesus stretem olketa taem hem sei: “Pipol wea sik nao need for go lukim doctor, no olketa wea strong. Iufala go, and lanem mining bilong disfala toktok wea sei: ‘Mi no laekem sakrifaes, bat mi laekem iufala for showimaot mercy long nara pipol.’” (Matt. 9:11-13) Jesus stretem tingting bilong pipol tu abaotem God. Hem patient and kaen taem hem teachim pipol Jehovah hem “God wea showimaot mercy and kaen tumas, hem no savve kros kwiktaem and hem garem bigfala love and hem evritaem duim samting wea hem talem.” (Ex. 34:6) From Jesus duim olsem, staka pipol wea hambol garem faith long gud nius.

¹³ Iumi shud followim example bilong Jesus taem iumi trae for helpem narawan. Datfala toktok long 2 Timothy 3:16 hem no minim iumi shud tok kros taem iumi trae for stretem wanfala problem. Bible no sei iumi garem raet for tok strong long narawan and no tingim feeling bilong hem. Sapos iumi tok strong long samwan, toktok bilong iumi savve olsem “sword wea katem man.” Bae iumi spoelem feeling bilong hem, and nating helpem hem nomoa.—Prov. 12:18.

14-16. (a) Wanem nao olketa elder savve duim for helpem olketa narawan wea garem problem? (b) Why nao hem important for dadi and mami iusim Bible for stretem tingting bilong pikinini bilong olketa?

¹⁴ Hao nao iumi savve patient and kaen taem iumi iusim Bible for stretem samting? Tingim sapos wanfala hasband and waef raoa olowe. Tufala askem wanfala elder for helpem olketa. Hem bae no saedem eniwan long tufala. Hem bae storyim olketa Bible principle for helpem tufala luksavve wanem tufala savve duim for no raoa. Maet hem savve storyim olketa principle wea stap long chapter 3 long buk Secret for Kasem Hapi Famili. Taem olketa story raonem olketa principle hia, maet hasband and waef luksavve tufala mas changem samfala samting. Long narataem bihaen, datfala elder bae askem hao nao tufala, and bae hem helpem tufala moa sapos olketa needim.

¹⁵ Hao nao olketa dadi and mami savve stretem tingting bilong pikinini? Tingim sapos teenage dota bilong iu garem niufala fren. Bat iu no sure sapos wei bilong datfala fren hem gud or nomoa. First samting, hem gud for faendemaot moa samting abaotem datfala fren. Then, sapos iu still wari and no laekem dota bilong iu for fren witim hem, iu savve story witim hem. Maet iu savve storyim olketa Bible principle long datfala buk Questions Young People Ask—Answers That Work, Volume 2. Then iu mas spendem moa taem witim hem. Lukim hao nao wei bilong hem and tingting bilong hem taem hem duim preaching waka or spendem taem witim famili. Sapos iu patient and kaen taem iu story long dota bilong iu, bae hem luksavve iu lovem and tingim hem. Datwan bae helpem hem for followim wanem iu talem hem abaotem olketa fren bilong hem, and for no chusim olketa fren wea bae spoelem hem.

¹⁶ Hu moa maet needim help bilong iumi? Long patient and kaenfala wei iumi savve encouragem olketa narawan wea wari from olketa sik, wari bikos olketa lusim waka bilong olketa, or wea konfius abaotem samting wea Bible teachim. Taem iumi iusim Bible for “stretem evri samting,” iumi evriwan kasem barava gud samting.

BIBLE ‘STRETEM TINGTING FOLLOWIM OLKETA RAETEOUS MARK BILONG GOD’

17. Why nao iumi shud hapi taem samwan stretem iumi?

¹⁷ Bible sei: “Taem samwan stretem iumi, datwan savve mekem iumi feel nogud tumas long firstaem.” Bat bihaen, “sapos iumi followim datwan, iumi savve garem peace and bae iumi raeteous.” (Heb. 12:11) Plande Christian wea growap long truth sei wei wea dadi and mami stretem olketa helpem olketa. And taem olketa elder iusim Bible for stretem iumi, datwan helpem iumi for gohed wakabaot long road wea lead go long laef.—Prov. 4:13.

18, 19. (a) Taem olketa elder stretem olketa narawan, why nao hem important for followim kaonsel long Proverbs 18:13? (b) Wanem nao savve happen taem olketa elder kaen and showimaot love long man wea duim sin?

¹⁸ Wanem nao bae helpem olketa elder and olketa dadi and mami for stretem narawan long gudfala wei? Jehovah talem olketa Christian for stretem narawan “followim olketa raeteous mark bilong God.” (2 Tim. 3:16) Diswan minim iumi mas iusim olketa Bible principle taem iumi stretem narawan. Wanfala important Bible principle hem stap long Proverbs 18:13, wea sei: “Sapos man ansarem samting bifor hem herem, hem krangge, and bae hem kasem shame.” So sapos samwan talem olketa elder wanfala brata or sista duim bigfala sin, olketa elder mas mek sure olketa savve long full story bifor olketa stretem datfala brata or sista. (Deut. 13:14) Sapos olsem, olketa savve stretem hem “followim olketa raeteous mark bilong God.”

¹⁹ Bible talem olketa elder tu for stretem olketa narawan “long kaenfala wei.” (Readim 2 Timothy 2:24-26.) Hem tru, maet sin wea man duim hem spoelem nem bilong Jehovah or spoelem nara pipol. Bat sapos wanfala elder hem kros taem hem kaonselem datfala man, hem bae no helpem hem nao. Sapos olketa elder followim example bilong God and tok kaen taem olketa stretem man wea duim sin, maet man hia hem repent.—Rome 2:4.

20. Olketa wanem principle nao dadi and mami mas followim taem olketa stretem pikinini bilong olketa?

²⁰ Olketa dadi and mami tu mas followim olketa Bible principle taem olketa stretem pikinini bilong olketa. (Eph. 6:4) Olsem example, wanem nao wanfala dadi shud duim sapos samwan talem hem boy bilong hem duim nogud samting? Dadi mas mek sure hem savve long full story bifor hem panisim boy bilong hem. Hem barava no fitim for eniwan long Christian famili for kros gogo hem raf long narawan. “Jehovah hem lovem man and hem showimaot mercy long hem,” and dadi and mami mas followim example bilong hem taem olketa stretem pikinini bilong olketa.—Jas. 5:11.

BIBLE HEM NAMBAWAN PRESENT FROM JEHOVAH

21, 22. Wanem toktok long Psalm 119:97-104 nao storyim feeling bilong iu abaotem Bible?

²¹ Wanfala man wea worshipim God bifor storyim why nao hem lovem law bilong Jehovah. (Readim Psalm 119:97-104.) Taem hem studyim olketa Holy Raeting, datwan mekem hem wise, and hem luksavve and minim samting. Taem hem followim olketa principle long olketa Holy Raeting, hem no duim sem mistek wea olketa narawan duim. Hem laekem tumas for studyim olketa Holy Raeting and hem kasem gud samting taem hem followim datwan. Hem laekem tumas for obeyim olketa law bilong God long full laef bilong hem.

²² Waswe, iu tinghae long Bible? Bible savve helpem iu for garem strongfala faith long plan bilong God. Hem garem olketa kaonsel from Jehovah wea helpem iumi for no gohed duim sin wea lead go long dae. Iu savve iusim Bible for helpem olketa narawan faendem road wea lead go long laef and for gohed wakabaot followim datfala road. Iumi laek gohed iusim Bible long olketa wei hia taem iumi worshipim God bilong iumi, Jehovah, wea lovem iumi and wea barava wise.