“Kam Long Mi, . . . and Mi Bae Strongim Iufala”
Olketa Meeting wea Muvim Man for Showimaot Love and Gudfala Waka
FROM Toronto go kasem Tokyo, from Moscow go kasem Montevideo—samfala taem each week, staka million Jehovah’s Witness and olketa fren bilong olketa go long olketa ples bilong worship. Midolwan olketa hia hem olketa famili man wea waka hard, wea taed tumas bihaen olketa waka for full day; olketa waef wea waka hard and olketa mami wea kam witim olketa smol pikinini; olketa young wan wea stap full day long skul; olketa olo wan wea wik and wakabaot slow bikos body soa and pain; olketa widow woman and pikinini wea no garem dadi or mami; and olketa wea sorre wea needim comfort.
Olketa Witness bilong Jehovah hia iusim planti difren kaen transport—olsem train wea speed tumas and olketa donkey; olsem olketa car and bihaen long trak. Samfala mas akrosim olketa river wea fulap witim crocodile, taem olketa narawan mas deal witim busy traffic bilong olketa bigfala taon wea savve mekem man fraet. Why nao evri pipol hia trae hard olsem?
Main samting hem bikos wei for attendim and tekpart long olketa Christian meeting hem wanfala important wei for worshipim Jehovah God. (Hebrews 13:15) Aposol Paul hem storyim nara reason taem hem raet olsem: “And letem iumi tingim and muvim narawan for showimaot love and gudfala waka, no lusim wei for hipap tugeta, . . . bat encouragem narawan, and duim long bigfala wei moa taem iufala lukim datfala day hem kam klosap.” (Hebrews 10:24, 25) Long hia Paul talem moa olketa feeling bilong David, man wea raetem psalm, wea sing olsem: “Mi hapi tumas taem olketa talem mi: ‘Long haos bilong Jehovah nao iumi mas go.’”—Psalm 122:1.
Why nao olketa Christian hapi taem olketa stap long meeting bilong olketa? Bikos olketa wea attend no go for lukluk nomoa. Bat, olketa garem chance long olketa meeting for savve gud long narawan. Especially taem olketa hipap for give, no for kasem samting nomoa, and for muvim narawan for showimaot love and duim olketa nambawan waka. Diswan mekem taem bilong meeting hem taem for strongim man. And tu, olketa Christian meeting hem wanfala wei wea Jesus fulfillim promis bilong hem: “Kam long mi, . . . and mi bae strongim iufala.”—Matthew 11:28.
Ples Bilong Comfort and Kea
Olketa Jehovah’s Witness garem gud reason for tingim olketa meeting olsem samting for strongim man. Wan samting, long olketa meeting iu savve kasem spiritual kaikai long barava taem thru long “datfala faithful and wise slave.” (Matthew 24:45) And tu, olketa meeting duim important part for mekem olketa servant bilong Jehovah for garem savve and kamap strong teacher bilong Word bilong God. Nara samting, long Kingdom Hall, iu savve faendem pipol wea loving, kea, and olketa fren wea redy and willing for help and comfortim narawan taem olketa kasem hevi.—2 Corinthians 7:5-7.
Diswan nao samting wea kasem Phillis, wanfala widow wea lusim hasband bilong hem taem olketa pikinini bilong hem faev and eit year. Taem hem storyim wei wea olketa Christian meeting strongim hem and olketa young wan bilong hem, hem sei: “Hem wanfala comfort for go long Kingdom Hall bikos olketa narawan wea garem sem biliv evritaem showimaot love and kea long wei for hug, toktok from Bible, or wei wea olketa lelebet holem hand strong. Hem ples wea mi laek for stap evritaem.”—1 Thessalonians 5:14.
Bihaen Marie hem kasem wanfala big operation, doctor talem hem hao hem bae tekem samting olsem six week for hem healap. Insaed olketa first week wea hem start for kamap gud moa, Marie hard for attendim olketa meeting. Doctor bilong hem lukim hao hem no hapi olsem bifor. Taem hem luksavve hao hem no attendim olketa meeting, hem encouragem hem for duim olsem. Marie talem hem hao hasband bilong hem, wea no garem sem biliv olsem hem, bae no willing for letem hem go long olketa meeting from hem wari abaotem health bilong hem. So datfala doctor raetem wanfala official pepa wea givim “order” for Marie go long Kingdom Hall for kasem encouragement and kaban wea savve buildim hem ap. Marie hem sei: “Bihaen mi attendim wanfala meeting, mi feel moabeta. Mi start for kaikai moa, mi sleep full naet, mi no need for tekem medicine evritaem for stopem pain, and mi savve smile moa!”—Proverbs 16:24.
Pipol aotsaed tu lukim loving wei wea kamap insaed olketa Christian meeting. Wanfala college student chus for go lukluk long Olketa Jehovah’s Witness mekem hem raetem wanfala report for class bilong hem. Hem raet olsem insaed report bilong hem abaotem olketa meeting hia: “Loving welkam wea mi kasem . . . mekem mi barava tinghae long olketa. . . . Kaenfala fasin bilong Olketa Jehovah’s Witness hem barava main fasin and diswan nao mi ting hem important.”—1 Corinthians 14:25.
Insaed disfala world wea fulap witim trabol, Christian kongregeson nao hem wanfala spiritual sef ples. Hem ples bilong peace and love. Taem iu stap long olketa meeting, iu savve feelim wei wea olketa toktok bilong man wea raetem psalm hem tru: “Lukim! Hem gud and naes tumas for olketa brata for stap tugeta witim wan mind!”—Psalm 133:1.
[Box/Piksa long page 25]
SATISFAEM WANFALA SPESOL NEED
Hao nao olketa wea no savve herem eni samting savve kasem gud samting from olketa Christian meeting? Raonem world, Olketa Jehovah’s Witness go ahed for mekem olketa saen-languis kongregeson kamap. Insaed 13-fala year wea just go pas, 27 saen-languis kongregeson and 43 saen-languis grup kamap long United States. Distaem samting olsem 140 saen-languis kongregeson stap long 40-fala nara kantri. Olketa redyim olketa Christian buk long video insaed 13-fala saen languis.
Christian kongregeson givim chance long olketa wea earpas for praisem Jehovah. Odile, wanfala Catholic man long France bifor wea kasem sorre feeling and ting for suisaed, barava thankiu for Bible education wea hem kasem long olketa Christian meeting. “Mi kasem bak health and hapi bilong mi long laef,” hem sei. “Bat winim evri samting, mi faendem truth. Distaem laef hem garem mining long mi.”