Olketa Olo—Wanfala Blessing for Olketa Young Wan
“Plis God bilong mi, nomata taem mi olo and garem gray hair, no lusim mi go kasem taem wea mi savve story abaotem hand bilong iu long datfala genereson, abaotem strong bilong iu long evriwan wea bae kam.”—PSALM 71:18.
1, 2. Wanem nao olketa olo servant bilong God shud luksavve long hem, and wanem nao bae iumi storyim distaem?
WANFALA Christian elder long West Africa visitim wanfala olo anointed brata and askem hem, “Hao nao iu distaem?” Disfala olo brata hem sei, “Mi savve ran, mi savve hophop, mi savve jamp,” and hem trae for duim olketa samting hia taem hem talem. Then hem sei: “Bat mi no savve flae.” Disfala elder minim nao samting wea olo hia talem. ‘Samting wea mi savve duim, mi willing for duim, bat samting wea mi no savve duim, mi no duim.’ Distaem, elder wea go visitim datfala olo brata hem kasem 80 year, and hem mekem hem feel hapi taem hem tingim wei wea datfala olo hem man for fani, and hem faithful.
2 Olo wea showimaot olketa fasin bilong God, savve muvim olketa narawan for plande year. Bat nomata man hem olo datwan no minim hem garem wisdom and olketa fasin olsem Christ. (Ecclesiastes 4:13) Bible hem sei: “Gray hair hem olsem crown wea luk naes tumas long man wea garem raeteous fasin.” (Proverbs 16:31) Sapos iu wanfala olo, waswe, iu luksavve hao samting wea iu talem and duim savve barava helpem olketa narawan? Tingim samfala example long Bible wea showimaot hao olketa olo savve kamap wanfala blessing for olketa narawan.
Faith wea Helpem Pipol for Staka Year
3. Long wanem wei nao faithful fasin bilong Noah helpem evri man wea laef distaem?
3 Faith and wei for no givap wea Noah showimaot hem helpem pipol kam kasem distaem. Noah hem gogo for 600 year taem hem buildim ark, hipimap olketa animal, and preach long olketa neiba bilong hem. (Genesis 7:6; 2 Peter 2:5) From Noah hem fraet long God, hem and famili bilong hem no dae long datfala big Flood, and hem kamap laen dadi bilong evri man wea laef distaem long earth. Hem tru, Noah stap long taem wea pipol savve laef longtaem winim distaem. Bat, nomata long taem hem barava olo, Noah gohed for faithful, and plande nambawan blessing kamaot from diswan. Hao nao olsem?
4. Long wanem wei nao olketa servant bilong God distaem kasem gud samting from wei wea Noah gohed faithful?
4 Noah klosap kasem 800 year taem Nimrod start for buildim datfala Tower bilong Babel wea diswan hem againstim komand bilong Jehovah for “fulimap earth.” (Genesis 9:1; 11:1-9) Bat Noah no sapotim wei wea Nimrod againstim God. So luk olsem languis bilong hem no change taem God hem changem languis bilong olketa wea againstim hem. Noah hem faithful and no givap long full laef bilong hem, no just taem hem olo nomoa. Hem barava fitim for olketa servant bilong God, nomata wanem age nao olketa, for followim example bilong Noah for faithful and no givap.—Hebrews 11:7.
Example for Famili
5, 6. (a) Wanem nao Jehovah talem Abraham for duim taem hem 75 year? (b) Wanem nao Abraham duim for followim komand bilong God?
5 Samting wea olketa faithful man wea laef bihaen Noah duim hem showimaot wei wea olketa olo savve strongim faith bilong olketa insaed long famili bilong olketa. Abraham kasem samting olsem 75 year taem God sei long hem: “Go aot from kantri bilong iu and from olketa relative bilong iu and from haos bilong dadi bilong iu and go long kantri wea mi bae showim long iu; and mi bae mekem wanfala big nation kamaot from iu and mi bae blessim iu.”—Genesis 12:1, 2.
6 Tingim sapos samwan askem iu for lusim hom bilong iu, olketa fren bilong iu, ples wea iu born, and olketa famili bilong iu, and go long nara ples wea iu nating savve long hem. Hem nao samting wea Jehovah talem Abraham for duim. Hem “followim samting wea Jehovah talem long hem, and hem go,” and go kasem taem hem dae, hem no stap olowe long wanfala ples bat hem olowe muv go long olketa difren ples insaed Cannan, wea datwan hem no hom bilong hem, and hem stap insaed olketa tent. (Genesis 12:4; Hebrews 11:8, 9) Nomata Jehovah talem finis hao Abraham bae kamap “wanfala big nation,” hem dae longfala taem bifor olketa pikinini bilong hem kamap staka. Abraham stap long promis land for 25 year finis bifor waef bilong hem Sarah just bornem only boy bilong tufala, Isaac. (Genesis 21:2, 5) Nomata olsem, Abraham no kamap taed and go bak long hom bilong hem long Ur. Datwan hem nambawan example bilong faith and wei for no givap!
7. Hao nao wei wea Abraham no givap encouragem Isaac, and hao nao datwan hem helpem olketa man?
7 Wei wea Abraham hem no givap barava encouragem Isaac, bikos Isaac stap long Canaan for 180 year, wea datwan hem full laef bilong hem, nomata datwan hem no hom bilong hem. Samting wea helpem Isaac for no givap, hem faith wea hem garem long olketa promis bilong God. Samting wea mekem hem garem faith nao hem training from olo mami and dadi bilong hem, and olketa samting Jehovah talem long hem bihaen. (Genesis 26:2-5) Wei wea Isaac gohed strong hem wanfala main samting wea help for fulfillim promis bilong Jehovah. Datfala promis hem for wanfala “seed” wea bae kam from famili bilong Abraham wea bae blessim olketa man. Plande handred year bihaen, Jesus Christ, wea hem nao main part bilong datfala “seed,” mekem wei kamap for evriwan wea garem faith long hem savve kam bak long God and kasem laef olowe.—Galatians 3:16; John 3:16.
8. Long wanem wei nao Jacob showimaot strongfala faith, and wanem nao kamaot from datwan?
8 Isaac tu helpem son bilong hem Jacob for garem strong faith wea helpem hem go kasem taem hem olo. Jacob hem 97 year taem hem stragol witim wanfala angel for full naet for kasem wanfala blessing. (Genesis 32:24-28) Bifor Jacob dae taem hem 147 year, hem garem lelebet strong wea fitim for blessim 12-fala son bilong hem. (Genesis 47:28) Profesi toktok bilong hem, wea datwan hem long Genesis 49:1-28, hem kamap tru, and hem gohed for fulfill kam kasem distaem.
9. Long wanem wei nao olketa olo wea mature long spiritual wei savve encouragem famili bilong olketa?
9 Tru tumas, olketa olo servant bilong God wea loyal savve barava encouragem olketa insaed long famili bilong olketa. Teaching from Bible and gudfala advaes wea wanfala young wan kasem from wanfala olo wea showim gudfala example long wei for gohed faithful and no givap, savve barava strongim faith bilong hem. (Proverbs 22:6) Olketa olo mas no ting smol long wei wea olketa savve barava encouragem famili bilong olketa.
Encouragem Olketa Christian Brata and Sista
10. Wanem nao Joseph ‘komandim saed long wanem for duim long olketa bon bilong hem,’ and long wanem wei nao diswan strongim olketa Israelite?
10 Olketa olo savve encouragem tu olketa Christian brata and sista. Joseph, wea hem son bilong Jacob, showimaot faith taem hem olo, and diswan helpem plande million trufala worshiper bilong Jehovah wea laef bihaen long hem. Taem hem kasem 110 year, hem “talem komand saed long wanem for duim long olketa bon bilong hem,” wea datwan nao hem for olketa Israelite tekem olketa bon bilong hem taem olketa lusim Egypt. (Hebrews 11:22; Genesis 50:25) Datfala komand hem givim hope for olketa Israelite wea kamap slave for staka year bihaen Joseph hem dae, hem mekem olketa feel sure hao bae olketa kamap free.
11. Long wanem wei nao Moses wea olo hem helpem Joshua?
11 Moses hem wanfala long olketa wea kasem strong from wei wea Joseph showimaot faith. Taem Moses kasem 80 year, hem garem privilege for tekem olketa bon bilong Joseph go aot from Egypt. (Exodus 13:19) Long datfala taem, hem meetim Joshua wea barava young winim hem. Insaed long next 40 year, waka bilong Joshua hem for helpem Moses. (Numbers 11:28) Hem go witim Moses long Maunt Sinai and hem stap tu taem Moses kam daon from datfala maunten witim tufala ston wea garem ten komandment long hem. (Exodus 24:12-18; 32:15-17) Masbi Joshua hem barava kasem staka kaonsel and wisdom from Moses wea olo!
12. Long wanem wei nao Joshua barava helpem nation bilong Israel go kasem taem hem dae?
12 Joshua tu encouragem nation bilong Israel go kasem taem hem dae. Long Judges 2:7 hem sei: “Olketa gohed for servem Jehovah long taem wea Joshua hem laef, and long taem wea olketa olo man laef wea laef bihaen long Joshua, wea olketa nao lukim evri nambawan samting wea Jehovah duim for Israel.” Bat long next 300 year bihaen Joshua and olketa olo man dae, samfala taem olketa duim tru worship and samfala taem olketa duim false worship go kasem taem bilong profet Samuel.
Samuel “Mekem Raeteous Fasin Kamap”
13. Wanem nao Samuel duim for “mekem raeteous fasin kamap”?
13 Bible no talem haomas year nao Samuel taem hem dae, bat buk bilong First Samuel hem storyim olketa samting wea happen insaed samting olsem 102 year, and Samuel lukim klosap evri samting hia. Long Hebrews 11:32, 33, iumi readim hao olketa raeteous judge and olketa profet “mekem raeteous fasin kamap.” Tru nao, example bilong Samuel hem helpem samfala wea laef long taem bilong hem for no duim olketa rong samting. (1 Samuel 7:2-4) Long wanem wei? Hem gohed faithful long Jehovah for full laef bilong hem. (1 Samuel 12: 2-5) Hem no fraet for givim strongfala kaonsel long king. (1 Samuel 15:16-29) And tu, taem Samuel hem “olo and garem gray hair,” hem showim nambawan example saed long wei for prea for olketa narawan. Hem sei, “bae hem hard for mi sin againstim Jehovah long wei wea mi bae no prea” for olketa nara Israelite.—1 Samuel 12:2, 23.
14, 15. Long wanem wei nao olketa olo distaem savve followim example bilong Samuel saed long prea?
14 Evri samting hia mekhae long important wei wea olketa olo savve encouragem and helpem olketa nara servant bilong Jehovah. Nomata olketa olo no savve duim staka samting from health or living bilong olketa hem change, olketa savve prea for olketa nara brata and sista. Olketa olo, waswe, iufala luksavve hao olketa prea bilong iufala savve barava helpem kongregeson? From faith wea iu garem long blood wea Christ pourimaot, iu enjoyim wei wea Jehovah acceptim iu, and bikos long staka year wea iu gohed strong and no givap, diswan mekem faith bilong iu kasem “test” and hem kamap strong. (James 1:3; 1 Peter 1:7) No forgetim: “Prea wea wanfala raeteous man talem from heart savve garem bigfala paoa.”—James 5:16.
15 Disfala Kingdom waka needim olketa prea wea iufala talem for sapotim datwan. Samfala brata bilong iumi stap long prison from olketa no teksaed long politik. Olketa narawan safa from natural disaster, olketa war, and ethnic tension. Samfala moa insaed olketa kongregeson bilong iumi kasem olketa temptation and hard taem. (Matthew 10:35, 36) Olketa wea leadim preaching waka and wea lukaftarem olketa kongregeson tu needim prea bilong iufala evritaem. (Ephesians 6:18, 19; Colossians 4:2, 3) Hem barava gud for askem Jehovah for helpem olketa brata and sista taem iumi prea, olsem Epaphras hem duim!—Colossians 4:12.
Teachim Next Genereson
16, 17. Wanem nao Psalm 71:18 hem talem, and long wanem wei nao diswan hem kamap tru?
16 Wei for kaban witim olketa insaed datfala “smolfala sekson bilong sheep” wea faithful, wea bae go long heven, hem givim barava important training long olketa bilong “nara sheep” wea garem hope for laef olowe long earth. (Luke 12:32; John 10:16) Hem nao samting wea Psalm 71:18 hem talem, wea hem sei: “Plis God bilong mi, nomata taem mi olo and garem gray hair, no lusim mi go kasem taem wea mi savve story abaotem hand bilong iu long datfala genereson, abaotem strong bilong iu long evriwan wea bae kam.” Olketa wea spirit anointim barava willing for trainim olketa nara sheep wea kaban witim olketa for kasem moa responsibility bifor olketa hia wea anointed go long heven and kasem glory witim Jesus Christ.
17 So samting wea Psalm 71:18 storyim saed long wei for givim instruction long “evriwan wea bae kam” savve fitim tu olketa nara sheep, wea kasem instruction from olketa wea God anointim. Jehovah givim privilege long olketa olo hia for story abaotem hem long olketa wea acceptim tru worship distaem. (Joel 1:2, 3) Olketa nara sheep ting long samting wea olketa lanem from olketa anointed wan olsem wanfala blessing and diswan barava muvim olketa for sharem samting olketa lanem from Bible long samfala moa wea laek for servem Jehovah.—Revelation 7:9, 10.
18, 19. (a) Wanem spesol information nao olketa olo servant bilong Jehovah savve storyim? (b) Wanem nao olketa Christian wea olo savve sure long hem?
18 Olketa olo servant bilong Jehovah, nomata olketa wea anointed or olketa nara sheep, savve rememberim olketa important samting wea happen bifor. Samfala olo distaem lukim datfala “Photo-Drama of Creation” long olketa first taem wea olketa showim datwan. Samfala savve gud long olketa brata wea leadim Kingdom waka long datfala taem wea stap long prison long 1918. Samfala share for givim olketa tok long Watchtower radio station, WBBR. Samfala moa savve storyim taem wea olketa bigfala kot case kamap abaotem freedom for worship bilong Olketa Jehovah’s Witness. Staka narawan gohed strong long tru worship, nomata long taem olketa raf gavman rul. Tru nao, olketa olo savve storyim wei wea pipol bilong Jehovah isisi minim truth long Bible long wei wea moa klia. Bible encouragem iumi for kasem gud samting from plande savve hia.—Deuteronomy 32:7.
19 Olketa Christian wea olo kasem encouragement for showimaot gudfala example for olketa narawan. (Titus 2:2-4) Maet distaem iu no lukim hao wei wea iu no givap, olketa prea bilong iu, and kaonsel wea iu givim for olketa narawan, hem encouragem olketa. Noah, Abraham, Joseph, Moses, and samfala moa, maet no savve hao faithful fasin bilong olketa hem bae barava helpem olketa genereson wea bae kam bihaen. Bat example wea olketa showimaot for faithful hem barava helpem pipol; and example bilong iu tu savve helpem olketa wea no olo yet.
20. Wanem nao olketa blessing wea stap for olketa wea keepim hope bilong olketa strong go kasem end?
20 Nomata sapos iu bae sev taem datfala “big trabol” hem kam, or bae resurrect bihaen, bae hem barava gud for kasem “datfala really laef”! (Matthew 24:21; 1 Timothy 6:19) Tingim datfala Thousand Year Rul bilong Christ taem Jehovah bae finisim wei for olo. Winim wei wea body bilong iumi gogo for nogud, iumi bae wekap evriday witim wanfala body wea isisi kamap gud. Bae iumi garem moa strong, eye bae kamap gud, bae iumi herehere gud, and lukluk bilong iumi bae naes tu! (Job 33:25; Isaiah 35:5, 6) Taem iumi tingim hao laef bae gohed for olowe, olketa wea kasem blessing for insaed niu world bilong God bae young olowe. (Isaiah 65:22) So iumi evriwan mas gohed for keepim hope bilong iumi strong go kasem end and gohed for servem Jehovah witim full heart. Iumi savve barava sure hao Jehovah bae fulfillim evri promis bilong hem and samting wea hem bae duim bae moabeta winim wanem iumi savve tingim.—Psalm 37:4; 145:16.
Hao Nao Bae Iu Ansa?
• Wanem nao olketa blessing wea olketa man kasem from wei wea Noah no givap?
• Long wanem wei nao faith bilong olketa faithful pipol bifor helpem olketa pikinini bilong olketa?
• Long taem wea Joseph, Moses, Joshua, and Samuel olo, long wanem wei nao olketa strongim olketa narawan wea worshipim God?
• Wanem samting nao olketa olo garem wea olketa savve iusim for helpem olketa narawan?
[Piksa long page 28]
Wei wea Abraham no givap barava helpem Isaac
[Piksa long page 30]
Wise kaonsel from Moses helpem Joshua
[Piksa long page 31]
Olketa prea wea iu talem for olketa narawan savve duim plande gud samting
[Piksa long page 32]
Olketa young wan savve kasem gud samting taem olketa lisin long olketa olo wea faithful