Loyal Long Christ and Faithful Slave Bilong Hem
“Masta bilong hem . . . bae markem hem for lukaftarem evri samting bilong hem.”—MATTHEW 24:45-47.
1, 2. (a) Bible hem showimaot hu nao Leader bilong iumi? (b) Wanem nao showimaot Christ hem gohed leadim Christian kongregeson?
“NO LETEM eniwan kolem iufala ‘olketa leader,’ from iufala garem wanfala Leader nomoa, and hem nao Christ.” (Matthew 23:10) Long hia, Jesus talem stret long olketa follower bilong hem hao no eniwan long earth bae kamap leader bilong olketa. Olketa bae garem wanfala Leader wea stap long heven, wea hem nao Jesus Christ. God nao markem Jesus for kamap datfala Leader. Jehovah “mekem hem laef bak from dae and . . . mekem hem hed ovarem evri samting long kongregeson, wea hem nao body bilong hem.”—Ephesians 1:20-23.
2 From Christ hem “hed ovarem evri samting” long Christian kongregeson, hem garem paoa ovarem evri samting insaed long kongregeson and hem lukim evri samting wea happen. Hem barava interest for lukim sapos each kongregeson followim olketa Christian principle and fren gud witim God. Diswan hem showaot klia long message wea aposol John kasem long end bilong first century C.E. Faevfala taem Jesus talem long sevenfala kongregeson hao hem savve long samting wea olketa duim and gudfala fasin and wik point bilong olketa, and hem givim kaonsel and encouragement fitim each wan. (Revelation 2:2, 9, 13, 19; 3:1, 8, 15) Iumi barava sure Christ hem savve tu long spiritual saed bilong olketa nara kongregeson long Asia Minor, Palestine, Syria, Babylonia, Greece, Italy, and olketa nara ples. (Acts 1:8) Waswe long olketa kongregeson distaem?
Wanfala Faithful Slave
3. Why nao hem fitim for markem Christ witim wanfala hed and kongregeson bilong hem witim wanfala body?
3 Bihaen Jesus hem resurrect and bifor hem go ap long Dadi bilong hem long heven, hem talem olketa disaepol bilong hem: “Mi kasem evri paoa long heven and long earth.” Hem sei tu: “Mi stap witim iufala evriday go kasem end bilong disfala world.” (Matthew 28:18-20) Hem bae gohed leadim olketa olsem Hed bilong olketa. Insaed olketa leta wea aposol Paul raetem for olketa Christian long Ephesus and Colossae, hem markem Christian kongregeson witim wanfala “body,” wea Christ nao hem Hed. (Ephesians 1:22, 23; Colossians 1:18) The Cambridge Bible for Schools and Colleges talem hao disfala tokpiksa wea markem body witim kongregeson hem ‘showimaot hao kongregeson mas wan mind witim Hed, and tu, Hed nao hem leadim olketa insaed long kongregeson. Hem iusim olketa for duim waka bilong Hem.’ Hu nao datfala sekson wea Christ iusim for duim waka bilong hem start long taem hem kamap king long 1914?—Daniel 7:13, 14.
4. Olsem profesi bilong Malachi talem, wanem nao Jehovah and Christ Jesus lukim taem tufala kam for lukluk gud long spiritual temple?
4 Profesi bilong Malachi talem hao Jehovah, ‘datfala tru Lord,’ and Son bilong hem wea rul, Christ Jesus, datfala “man wea talemaot message bilong covenant,” bae kam for judgem and lukluk gud long “temple” bilong Jehovah, wea hem nao tokpiksa haos for worship. Luk olsem datfala ‘taem for judgem haos bilong God’ hem start long 1918.a (Malachi 3:1; 1 Peter 4:17) Tufala barava lukluk gud long olketa long earth wea sei olketa worshipim God long stretfala wei. Tufala rejectim olketa Christian religion wea teachim olketa false teaching and wea barava join insaed long World War I wea killim dae staka pipol. Wanfala smol sekson bilong olketa faithful anointed Christian kasem test, olsem fire nao klinim olketa, and Jehovah acceptim olketa olsem “pipol wea givim wanfala present witim raeteous fasin.”—Malachi 3:3.
5. Olsem profesi wea Jesus talem abaotem ‘taem wea hem bae stap moa,’ hu nao datfala faithful “slave”?
5 Olsem profesi bilong Malachi, insaed datfala saen wea Jesus givim long olketa disaepol bilong hem, hem helpem olketa for luksavve long ‘taem wea hem bae stap moa and end bilong world,’ and hem storyim tu wanfala “slave” sekson. Jesus sei olsem: “Hu nao datfala faithful and wise slave wea masta bilong hem markem for lukaftarem olketa wakman bilong hem, for givim olketa kaikai long barava taem? Hapi nao datfala slave sapos masta lukim hem duim datwan taem hem kam bak. Tru nao, mi talem iufala, Hem bae markem hem for lukaftarem evri samting bilong hem.” (Matthew 24:3, 45-47) Taem Christ “kam bak” for lukluk gud long datfala “slave” long 1918, hem faendem olketa faithful anointed disaepol wea start kam long 1879, olketa iusim The Watchtower and olketa nara Bible pablikeson for givim spiritual “kaikai long barava taem.” Hem acceptim olketa olsem “slave” sekson bilong hem, and long 1919 hem markem olketa for lukaftarem evri samting bilong hem long earth.
Lukaftarem Evri Samting Bilong Christ Long Earth
6, 7. (a) Jesus iusim wanem difren toktok taem hem story abaotem faithful “slave” bilong hem? (b) Wanem nao mining bilong datfala word “wakman” wea Jesus iusim?
6 Tu-thri month bifor Jesus talem profesi abaotem saen wea bae showimaot hem stap moa, wea insaed diswan hem storyim tu wanfala “slave” wea stand for hem long earth, hem iusim samfala difren toktok taem hem story abaotem disfala “slave” wea givim moa information abaotem olketa responsibility bilong hem. Jesus hem sei: “Hu nao datfala faithful wakman, datfala wise wan, wea masta bilong hem bae markem for lukaftarem olketa servant for gohed givim kaikai wea fitim long barava taem? Mi talem tru samting long iufala, Hem bae markem hem for lukaftarem evri samting bilong hem.”—Luke 12:42, 44.
7 Long hia, Jesus kolem datfala slave wanfala wakman, wea kam from wanfala Greek word wea minim “man wea mek sure evri samting hem gohed gud long haos.” Disfala faithful wakman hem no just wanfala grup bilong olketa savveman wea interest nomoa for explainim olketa interesting point from Bible. Olketa mas provaedem spiritual kaikai for strongim iumi “long barava taem,” and tu, Christ markem “datfala faithful wakman” for lukaftarem evri servant and kongregeson bilong hem long earth and waka wea olketa duim, wea hem nao “evri samting bilong hem.” Wanem nao samfala samting moa wea insaed long diswan?
8, 9. Wanem nao “evri samting” wea Christ markem datfala slave for lukaftarem?
8 Samfala responsibility bilong datfala slave hem for lukaftarem olketa building wea olketa follower bilong Christ iusim for duim Christian waka bilong olketa, olsem world headquarter and olketa branch office bilong Olketa Jehovah’s Witness, and tu, olketa ples for worship, wea hem nao olketa Kingdom Hall and Assembly Hall wea stap long plande difren ples long world. Samting wea moa important, datfala slave arrangem olketa spiritual program for strongim faith bilong iumi, olsem wei for studyim Bible long olketa meeting evri week and long olketa assembly and convention wea kamap insaed long year. Long olketa hipap olsem, iumi kasem information abaotem olketa Bible profesi wea fulfill, and information long taem wea barava fitim for helpem iumi savve hao for followim olketa Bible principle long laef bilong iumi.
9 Datfala wakman garem responsibility tu for leadim disfala barava important waka for preachim “disfala gud nius bilong kingdom” and for mekem “pipol long evri nation for kamap disaepol.” Datwan minim hem mas teachim pipol for duim evri samting wea Christ, Hed bilong kongregeson, hem komandim olketa for duim long taem bilong end distaem. (Matthew 24:14; 28:19, 20; Revelation 12:17) Disfala waka for preach and teach hem mekem kamap “wanfala big crowd” wea olketa loyal fren bilong olketa anointed Christian. For sure, “olketa barava spesol samting bilong evri nation” hia hem insaed long “evri samting” bilong Christ wea datfala faithful slave lukaftarem.—Revelation 7:9; Haggai 2:7.
Governing Body wea Stand for Datfala Slave
10. Taem Christian kongregeson hem start, wanem grup nao disaedem olketa samting, and hao nao datwan affectim olketa kongregeson?
10 From datfala faithful slave garem olketa bigfala responsibility, olketa mas mekem plande disison. Taem Christian kongregeson hem start, olketa aposol and elder long Jerusalem nao stand for datfala slave, wea minim olketa mas mekem olketa disison for evri Christian kongregeson. (Acts 15:1, 2) Thru long olketa leta and traveling overseer, evri kongregeson kasem olketa disison bilong datfala governing body wea stap long first century. Olketa Christian long datfala taem hapi for kasem olketa disison hia, and wei wea olketa willing for followim datwan hem mekem peace and wan mind kamap.—Acts 15:22-31; 16:4, 5; Philippians 2:2.
11. Long distaem, hu nao Christ iusim for leadim olketa kongregeson bilong hem, and iumi shud garem wanem tingting abaotem disfala grup bilong olketa anointed Christian?
11 Olsem long taem Christian kongregeson hem start, Governing Body wea leadim olketa follower bilong Christ long earth distaem, hem wanfala smol sekson bilong olketa anointed overseer. Thru long “raet hand” bilong hem wea piksarem paoa bilong hem, Christ, wea Hed bilong kongregeson, hem leadim olketa faithful man hia taem olketa lukaftarem olketa waka saed long Kingdom. (Revelation 1:16, 20) Insaed laef story bilong Albert Schroeder, wanfala member bilong Governing Body wea dae finis, hem raet olsem: “Governing Body garem meeting evri Wednesday. Olketa prea firstaem and askem spirit bilong Jehovah for leadim olketa. Olketa waka hard for mek sure evri samting wea olketa storyim and evri disison olketa mekem hem followim Word bilong God, Bible.”b Iumi barava fit for trustim olketa anointed Christian hia wea faithful. Saed long Governing Body, iumi shud followim disfala kaonsel bilong aposol Paul: “Obeyim olketa wea leadim iufala and stap anda long olketa, from olketa . . . gardim iufala.”—Hebrews 13:17.
Showimaot Respect Long Datfala Faithful Slave
12, 13. Wanem nao olketa reason from Bible why iumi shud showimaot respect for datfala slave sekson?
12 Main reason for showimaot respect for datfala faithful slave sekson hem bikos taem iumi duim olsem, iumi showimaot respect long Masta, Jesus Christ. Paul hem raet olsem abaotem olketa anointed Christian: “Man wea free taem Christ kolem hem, hem kamap slave bilong Christ. Hem baem iufala finis.” (1 Corinthians 7:22, 23; Ephesians 6:6) So taem iumi loyal for followim direction bilong faithful slave and Governing Body bilong hem, iumi stap anda long Christ, wea hem nao Masta bilong datfala slave. Wei wea iumi showimaot respect long sekson wea Christ iusim for lukaftarem evri samting bilong hem long earth, hem wanfala wei wea iumi “talemaot hao Jesus Christ hem Lord for givim glory long God wea hem Father.”—Philippians 2:11.
13 Narafala reason from Bible why iumi showimaot respect for datfala faithful slave hem bikos long tokpiksa wei, Bible storyim olketa anointed Christian olsem wanfala “temple.” Thru long “spirit” bilong hem, Jehovah stap insaed long datfala temple, and long wei olsem, olketa kamap “holy.” (1 Corinthians 3:16, 17; Ephesians 2:19-22) Jesus markem disfala sekson wea Bible kolem wanfala holy temple, for lukaftarem evri samting bilong hem long earth. Diswan minim samfala responsibility and privilege insaed Christian kongregeson hem bilong disfala slave nomoa. Dastawe, long tingting bilong evriwan insaed long kongregeson, for followim and sapotim lead bilong faithful slave and Governing Body bilong hem, hem olsem wanfala holy samting wea olketa mas duim. Tru tumas, olketa “nara sheep” ting long wei for helpem datfala slave sekson for lukaftarem evri samting bilong Masta olsem wanfala nambawan privilege.—John 10:16.
Loyal for Sapotim Olketa
14. Olsem Isaiah profesi abaotem, long wanem wei nao olketa nara sheep wakabaot followim datfala anointed slave sekson, and hao nao olketa serve olsem ‘olketa wakman wea no kasem pei’?
14 Isaiah hem profesi abaotem wei wea olketa nara sheep hambol for stap anda long olketa anointed member bilong spiritual Israel taem hem sei olsem: “Diswan nao samting wea Jehovah talem: ‘Olketa wakman bilong Egypt wea no kasem pei and olketa bisnisman bilong Ethiopia and olketa Sabean pipol wea barava tol tumas bae kam long iufala, and olketa bae kamap slave bilong iufala. Olketa bae wakabaot followim iufala witim chain long leg bilong olketa, and olketa bae kam long iufala and baodaon long iufala. Olketa bae sei long iufala, “Tru nao, God hem stap witim iufala, and no eniwan moa; no eni nara God stap.”’” (Isaiah 45:14) Long tokpiksa wei, olketa nara sheep distaem wakabaot followim lead bilong anointed slave sekson and Governing Body bilong hem. Olsem ‘olketa wakman wea no kasem pei,’ olketa nara sheep willing for givim strong and material samting bilong olketa for sapotim preaching waka wea gohed raonem full world wea Christ markem olketa anointed follower bilong hem long earth for duim.—Acts 1:8; Revelation 12:17.
15. Wanem nao profesi long Isaiah 61:5, 6 talem abaotem wei wea olketa nara sheep and spiritual Israel waka tugeta?
15 Olketa nara sheep hapi for servem Jehovah followim lead bilong datfala slave sekson and Governing Body bilong hem. Olketa luksavve hao olketa anointed Christian nao “datfala Israel bilong God.” (Galatians 6:16) Olketa kaban witim spiritual Israel olsem olketa tokpiksa “stranger” and “man from difren kantri.” Olketa hapi for serve olsem “olketa farmer” and “olketa man for plantim grape” followim lead bilong olketa anointed Christian, wea hem nao “olketa priest bilong Jehovah” and “olketa minister bilong God.” (Isaiah 61:5, 6) Olketa strong for share long waka for preach abaotem gud nius bilong Kingdom and for mekem pipol from evri nation kamap olketa disaepol. Olketa barava willing for helpem slave sekson long wei for shepherdim and lukaftarem pipol wea acceptim gud nius.
16. Wanem nao muvim olketa nara sheep for loyal for sapotim faithful and wise slave?
16 Olketa nara sheep luksavve hao olketa kasem barava gud samting from spiritual kaikai wea faithful slave waka hard for provaedem long barava taem. Olketa hambol for luksavve hao sapos no eni faithful and wise slave hem stap, bae olketa no savve olketa nambawan truth from Bible, olsem wei wea Jehovah hem haefala ruler, hao gogo, evriwan bae ting long nem bilong hem olsem holy, wanem nao Kingdom bilong hem, mining bilong datfala niu skae and niu earth, mining bilong soul, wanem nao happen long man wea dae finis, and truth abaotem hu nao Jehovah, Son bilong hem, and wanem nao holy spirit. From olketa nara sheep barava tinghae and loyal, olketa lovem and sapotim olketa anointed “brata” bilong Christ long earth long taem bilong end distaem.—Matthew 25:40.
17. From namba bilong olketa wea anointed hem gogo daon, wanem nao Governing Body luksavve hem mas duim, and wanem nao bae iumi storyim long next article?
17 From namba bilong olketa anointed Christian long earth hem gogo daon, olketa no fit for stap long evri kongregeson for lukaftarem evri samting bilong Christ. Dastawe Governing Body markem olketa brata bilong olketa nara sheep for duim waka olsem overseer long olketa branch office, distrik, circuit, and olketa kongregeson bilong Olketa Jehovah’s Witness. Waswe, wei wea iumi ting long olketa shepherd hia wea stap anda long lead bilong Christ hem savve affectim wei wea iumi loyal long Christ and faithful slave bilong hem? Bae iumi storyim diswan long next article.
[Footnotes]
a For moa information abaotem diswan, lukim Wastaoa, March 1, 2004, page 13-18, and The Watchtower, December 1, 1992, page 13.
b Long The Watchtower, March 1, 1988, page 10-17.
Review
• Hu nao Leader bilong iumi, and wanem nao showimaot hem luksavve long olketa samting wea happen insaed olketa kongregeson?
• Taem Jehovah and Jesus lukluk gud long “temple,” hu nao duim waka olsem faithful slave, and wanem nao evri samting wea tufala markem olketa for lukaftarem?
• Wanem nao olketa reason from Bible why
[Piksa long page 23]
“Evri samting” wea datfala “wakman” lukaftarem hem olketa material samting, olketa spiritual program for strongim faith bilong iumi, and preaching waka
[Piksa long page 25]
Olketa member bilong nara sheep sapotim faithful slave long wei wea olketa strong for preach
iumi shud loyal for sapotim faithful slave?