Followim Wei Bilong King

“Hem mas raetem insaed long buk for hemseleva wanfala copy bilong disfala law . . . And diswan mas stap witim hem, and hem mas readim long full laef bilong hem.”—DEUTERONOMY 17:18, 19.

1. Wanfala Christian maet want for olsem hu?

MAET hem hard for iu ting long iuseleva olsem wanfala king or queen. No eni faithful Christian and student bilong Bible bae tingim long mind bilong hem hao hem garem paoa olsem king for duim samting, olsem faithful King David, Josiah, Hezekiah, or Jehoshaphat. Nomata olsem, long wanfala spesol wei iu fit for olsem and shud olsem olketa. Wanem wei nao datwan? And why nao iu shud want for olsem olketa long datfala wei?

2, 3. Jehovah luksavve long wanem saed long wanfala human king, and datfala king mas duim wanem samting?

² Long taem bilong Moses, longtaem bifor God letem olketa Israelite for garem human king, Hem luksavve hao gogo pipol bilong Hem bae want for garem wanfala king. So hem muvim Moses for putim samfala instruction saed long diswan insaed long Law covenant. Olketa nao instruction for wanfala king.

³ God hem sei: “Gogo, taem iufala kam insaed long land wea Jehovah God bilong iufala hem givim long iufala, . . . and iufala sei, ‘Letem mifala putim wanfala king ovarem mifala seleva olsem olketa nation wea stap raonem mifala’; iufala mas putim wanfala king wea Jehovah God bilong iufala chusim. . . . Hem mas happen hao taem hem sidaon long throne bilong kingdom, hem mas raetem insaed long buk for hemseleva wanfala copy bilong disfala law . . . And diswan mas stap witim hem, and hem mas readim long full laef bilong hem for mekem hem lane for fraet long God bilong hem Jehovah, for keepim evri toktok bilong disfala law and olketa rul hia long wei for followim olketa.”—Deuteronomy 17:14-19.

4. Wanem nao insaed olketa instruction wea God givim for olketa king?

⁴ Tru nao, king wea Jehovah bae chusim for olketa worshiper bilong hem mas copyim for hemseleva olketa raeting wea iu savve lukim insaed Bible bilong iu. Then datfala king mas readim datwan evriday, and olowe. Diswan hem no for helpem hem remember nomoa. Hem wei for study witim goal for helpem hem. King wea laekem Jehovah for appruvim hem mas duim kaen study olsem for mekem grow and keepim stretfala feeling long heart. And tu, hem mas studyim olketa raeting from God for win olsem king and for garem fasin for luksavve.—2 Kings 22:8-13; Proverbs 1:1-4.

Lane Olsem Wanfala King

5. Olketa wanem part bilong Bible nao King David garem for copyim and readim, and hao nao feeling bilong hem saed long diswan?

⁵ Iu tingse diswan min David mas duim wanem taem hem kamap king ovarem Israel? Hem minim hem mas mekem copy bilong olketa buk bilong Pentateuch (Genesis, Exodus, Leviticus, Numbers, Deuteronomy). Tingim hao wei for iusim eye and hand bilong hemseleva for raetem wanfala copy bilong Law mas barava affectim mind and heart bilong David. Luk olsem Moses raetem tu buk bilong Job and Psalms 90 and 91. Waswe, David copyim olketa hia tu? Maet olsem. And maet hem garem tu olketa buk bilong Joshua, Judges, and Ruth. From diswan iu savve lukim hao King David garem bigfala sekson bilong Bible for readim and studyim. And taem iu lukim olketa koment bilong hem abaotem Law bilong God, wea stap long Psalm 19:7-11, iu fit for biliv hem duim olsem.

6. Hao nao iumi savve sure Jesus interest long olketa Scripture olsem laen dadi bilong hem David?

⁶ Bigfala David—Jesus, Son bilong David—followim semkaen wei. Hem wei bilong Jesus for go long synagogue evri week. Long there, hem herem olketa readim and explainim olketa Scripture. And tu, samfala taem Jesus seleva read big long pablik from Word bilong God and explainim. (Luke 4:16-21) Hem isi for luksavve hao hem savve gud long olketa Scripture. Readim olketa Gospel story, and lukim haomas taem Jesus sei “olketa raetem finis” or samfala nara wei hem point go long samfala difren part bilong Bible. Olsem example, long Sermon long Maunten wea Matthew recordim, Jesus talem toktok from Hebrew Scripture 21 taem.—Matthew 4:4-10; 7:29; 11:10; 21:13; 26:24, 31; John 6:31, 45; 8:17.

7. Hao nao Jesus hem difren from olketa bigman bilong religion?

⁷ Jesus followim kaonsel long Psalm 1:1-3: “Hapi nao man wea no wakabaot long kaonsel bilong olketa wicked wan, . . . bat hem hapi long law bilong Jehovah, and hem read smol long law bilong Hem day and naet. . . . Evri samting wea hem duim bae win.” Datwan hem barava difren from olketa bigman bilong religion long taem bilong hem wea “sidaon seleva long chair bilong Moses” bat nating tingim “law bilong Jehovah”!—Matthew 23:2-4.

8. Why nao hem iusles for olketa bigman bilong Jew for readim and studyim Bible?

⁸ Bat, samfala maet konfius long wanfala scripture wea maet luk olsem Jesus stopem wei for studyim Bible. Long John 5:39, 40, iumi readim samting wea Jesus talem long samfala long taem bilong hem: “Iufala lukluk gud long olketa Scripture, from iufala tingse thru long olketa iufala bae kasem laef olowe; and olketa hia nao givim witness abaotem mi. Bat nomata olsem, iufala no want for kam long mi mekem iufala kasem laef.” Jesus no talem diswan for stopem olketa Jew wea lisin long hem for studyim olketa Scripture. Bat, hem talem diswan for showimaot hao olketa no honest. Olketa luksavve hao olketa Scripture savve leadim olketa long laef olowe, bat olketa sem Scripture wea olketa studyim shud leadim olketa tu long datfala Messiah, Jesus. Nomata olsem, olketa nating willing for acceptim hem. So olketa no kasem eni gud samting from wei for study bikos olketa no honest and willing for lane.—Deuteronomy 18:15; Luke 11:52; John 7:47, 48.

9. Olketa aposol and profet bifor showimaot wanem nambawan example?

⁹ Olketa disaepol and aposol bilong Jesus difren evribit! Olketa studyim “olketa holy raeting, wea fit for mekem [man] wise for salvation.” (2 Timothy 3:15) Long disfala wei olketa olsem olketa profet bifor wea “trae hard for faendemaot and lukaotem” samting. Long tingting bilong olketa profet, disfala wei for lukluk gud hem no strongfala wei for study for tu-thri month or wanfala year nomoa. Aposol Peter hem sei “olketa go ahed for lukluk gud” long samting, especially abaotem Christ and olketa nambawan samting wea hem duim for sevem olketa man. Long firstfala leta bilong hem, Peter talem toktok from tenfala difren buk bilong Bible, 34 taem.—1 Peter 1:10, 11.

10. Why nao each wan long iumi mas interest for studyim Bible?

¹⁰ So hem klia hao hem wanfala assignment bilong olketa king bilong Israel bifor for studyim gud Word bilong God. Jesus followim disfala sem wei. And olketa wea bae rul witim Christ olsem olketa king long heven, olketa tu studyim Word bilong God. (Luke 22:28-30; Romans 8:17; 2 Timothy 2:12; Revelation 5:10; 20:6) Olketa wea luk forward long olketa blessing long earth anda long rul bilong Kingdom mas followim disfala sem wei tu.—Matthew 25:34, 46.

Wanfala Assignment for Olketa King and Iu

11. (a) Wanem danger stap for olketa Christian saed long study? (b) Wanem nao olketa kwestin wea iumi shud askem iumiseleva?

¹¹ Hem barava klia hao evri tru Christian seleva mas lukluk gud insaed long Bible. Hem no samting wea iu need for duim taem iu just start for studyim Bible witim Olketa Jehovah’s Witness. Each wan long iumi mas disaed strong for no olsem samfala long taem bilong aposol Paul wea bihaen lelebet taem nomoa olketa slakdaon saed long study seleva. Olketa lanem “olketa firstfala samting bilong olketa holy toktok bilong God,” olsem “firstfala teaching abaotem Christ.” Bat, from olketa no go ahed for study olketa no “muv ahed for kamap mature.” (Hebrews 5:12–6:3) So hem gud for iumi askem iumiseleva: ‘Hao nao feeling bilong mi saed long wei for study seleva long Word bilong God, nomata mi insaed Christian kongregeson for shortfala taem or longfala taem finis? Paul prea for olketa Christian long taem bilong hem for “grow long stretfala savve bilong God.” Waswe, mi showimaot mi garem semkaen feeling?’—Colossians 1:9, 10.

12. Why nao hem important for go ahed for lovem Word bilong God?

¹² Wanfala important samting for helpem iu garem gudfala wei for study hem for mekem grow feeling for lovem Word bilong God. Psalm 119:14-16 storyim hao for ting raonem Word bilong God evritaem hem wanfala wei for mekem grow wei for hapi long datwan. Diswan tu hem tru nomata hao long nao iumi bin wanfala Christian. For strongim datwan, tingim example bilong Timothy. Nomata disfala Christian elder hem go ahed for serve finis olsem “wanfala gudfala soldia bilong Christ Jesus,” Paul encouragem hem for duim best bilong hem for “iusim word bilong truth long stretfala wei.” (2 Timothy 2:3, 15; 1 Timothy 4:15) Hem klia hao, for duim “best” bilong iu hem minim for garem gudfala wei for study.

13. (a) Wanem nao samfala wei for faendem moa taem for studyim Bible? (b) Olketa wanem change nao iu fit for duim for kasem moa taem for study?

¹³ Wanfala samting wea savve helpem man for kasem gudfala wei for study hem for markem taem for studyim Bible. Waswe, iu duim datwan? Nomata wanem nao honest ansa bilong iu, waswe, iu tingse iu savve kasem gud samting sapos iu spendem moa taem for duim study seleva? Maet iu ting ‘Hao nao mi savve markem taem for datwan?’ Samfala wekap early long morning for spendem moa taem for studyim Bible. Olketa maet readim Bible for 15 minute or duim study seleva long wanfala project. Olsem nara idea, waswe sapos iu mekem samfala change long schedule bilong iu each week? Olsem example, sapos iu readim niuspepa evriday or lukluk long nius long television, waswe sapos iu no duim datwan for wanfala day each week? Iu savve iusim datfala taem for studyim Bible. Sapos for wanfala day insaed week iu changem wei for readim nius witim wei for study seleva for maet 30 minute, hem minim iu iusim extra 25 hour for study seleva insaed wanfala year. Tingim olketa gud samting wea iu savve kasem from extra 25 hour wea iu readim Bible or duim study seleva! Narafala idea: Insaed nextfala week, long end bilong each day ting raonem samting wea iu bin duim. Lukaotem eni samting wea iu maet fit for leavim or no spendem tumas taem long hem for mekem iu garem moa taem for duim Bible reading or study.—Ephesians 5:15, 16.

14, 15. (a) Why nao hem important for garem olketa goal saed long study seleva? (b) Wanem nao maet samfala goal saed long wei for readim Bible?

¹⁴ Wanem samting nao savve mekem study hem moa isi for iu, and for iu enjoyim moa? Olketa goal. Wanem nao samfala study goal wea iu fit for kasem? For planti, wanfala gudfala first goal hem for readim full Bible. Maet, kam kasem distaem, iu readim samfala sekson bilong Bible and kasem gud samting from datwan. Waswe sapos distaem iu disaed strong for readim full Bible? Maet first goal for helpem iu readim full Bible hem for readim fofala Gospel, then nara goal, readim evri nara buk insaed Christian Greek Scripture. Taem iu kasem gud samting and satisfae from iu duim datwan, maet next goal hem for readim olketa buk bilong Moses and olketa nara history buk go kasem Esther. Bihaen iu duim datwan finis, bae iu luksavve hem no hard tumas for go ahed readim evri nara buk bilong Bible. Wanfala woman, wea kamap Christian taem hem samting olsem 65 year, hem raetem insaed kava bilong Bible bilong hem date wea hem start for readim full Bible and bihaen, date wea hem finis readim. Distaem hem readim Bible finis faevfala taem! (Deuteronomy 32:45-47) And winim wei for readim long computer or pepa wei computer printim, hem holem Bible long hand bilong hem.

¹⁵ Samfala wea kasem finis goal for readim full Bible duim samfala nara samting for kasem gud samting from study bilong olketa. Wanfala wei hem for readim samfala study information wea join witim Bible buk wea iu bae readim. Insaed “Evri Scripture”—Tru and Givim Help and Insight on the Scriptures, nambawan information hem stap abaotem history, stael bilong raeting, and gudfala leson for lanem from each Bible buk.a

16. Iumi shud stap klia long wanem kaen wei for studyim Bible?

¹⁶ Taem iu study, stap klia long wei bilong planti Bible savveman. Olketa ova tumas for studyim olketa verse witim tingting hao olketa man nao raetem. Samfala long olketa strong for sei each buk hem for wanfala grup pipol nomoa or trae for mek-ap wanem nao goal and tingting bilong man wea raetem each buk. Tingting bilong man olsem savve mekem pipol ting long olketa Bible buk olsem history nomoa or olsem samting wea showimaot wei wea religion hem change. Samfala nara savveman busy tumas for studyim olketa word wea stap insaed Bible. Olketa moa busy for studyim history bilong olketa word and for talemaot mining bilong olketa Hebrew and Greek word winim wei for studyim mining bilong message bilong God. Waswe, iu ting wei for study olsem savve givim man deep faith wea savve muvim hem?—1 Thessalonians 2:13.

17. Why nao iumi shud ting long Bible olsem message for evriwan?

¹⁷ Waswe, tingting bilong olketa savveman hem important? Waswe, hem tru hao each buk bilong Bible garem wanfala purpose or hem for wanfala grup pipol nomoa? (1 Corinthians 1:19-21) Really, olketa buk insaed Word bilong God savve givim gud samting for olowe long pipol wea young and olo and from evrikaen living. Nomata sapos firstaem wanfala buk hem for wanfala man, olsem Timothy or Titus, or for wanfala grup, maet olketa long Galatia or Philippi, iumi evriwan savve studyim and shud studyim olketa buk hia. Olketa important for iumi evriwan, and each wan long olketa buk savve storyim planti theme and helpem planti pipol. Tru nao, message bilong Bible fitim full world, dastawe olketa transleitim long olketa difren languis bilong pipol raonem full earth.—Romans 15:4.

Kasem Gud Samting for Iuseleva and Nara Pipol

18. Taem iu readim Word bilong God, wanem samting nao iu shud ting raonem?

¹⁸ Taem iu study, bae iu kasem gud samting sapos iu trae for minim Bible and for minim tu hao evri part bilong hem join tugeta. (Proverbs 2:3-5; 4:7) Samting wea Jehovah showimaot thru long Word bilong hem barava join long klos wei witim purpose bilong hem. So taem iu read, joinim datfala information and kaonsel witim purpose bilong hem. Maet iu ting raonem hao wanfala samting wea happen, wanfala idea, or profesi hem join witim purpose bilong Jehovah. Askem iuseleva: ‘Wanem nao diswan talem mi abaotem Jehovah? Hao nao hem join witim purpose bilong hem wea Kingdom bilong hem fulfillim?’ Maet iu ting raonem tu: ‘Hao nao mi savve iusim disfala information? Waswe, mi savve iusim for teachim narawan or givim advaes wea garem faondeson long Bible?’—Joshua 1:8.

19. Hu nao savve kasem gud samting taem iu storyim samting wea iu lanem? Explainim.

¹⁹ Wei for tingim narafala pipol hem gud long nara wei tu. Taem iu go ahed for readim and studyim Bible, bae iu lanem samfala samting wea niu and moa deep. Trae for storyim samting hia witim olketa famili member or nara pipol for buildimap olketa. Sapos iu duim olsem long taem wea fitim and long hambol wei, kaen story olsem savve gud tumas. Wei wea iu hambol and willing for talem samting wea iu lanem or samting wea iu tingse hem interesting bae mekem nara pipol no forgetim datfala information tu. And bae hem helpem iu tu. Long wanem wei? Olketa savveman talem hao man savve rememberim for longfala taem samting wea hem just lanem sapos hem iusim or explainim long nara pipol kwiktaem bihaen hem lanem.b

20. Why nao hem gud for readim Bible evritaem?

²⁰ Evritaem iu readim wanfala Bible buk moa, bae iu lanem niu information. Bae iu tinghae long samfala verse wea bifor iu no tingting tumas long olketa. Savve bilong iu long olketa verse hia bae moa deep. Diswan shud strongim hao olketa Bible buk no kam from man bat olketa olsem olketa treasure wea fitim for iu studyim evritaem and kasem gud samting. Remember, wanfala king olsem David, mas “readim long full laef bilong hem.”

21. Wanem reward nao bae iu kasem sapos iu spendem moa taem for studyim Word bilong God?

²¹ Tru nao, olketa wea spendem taem for duim deep study long Bible barava kasem gud samting. Olketa kasem gudfala spiritual samting and savve. Wei wea olketa fren witim God hem kamap moa strong and klos. Olketa helpem tu olketa famili member, olketa brata and sista long Christian kongregeson, and olketa wea no worshipim Jehovah yet.—Romans 10:9-14; 1 Timothy 4:16.

[Olketa Footnote]

Waswe, Iu Remember?

• Wanem samting nao olketa king bilong Israel mas duim?

• Wanem nao example bilong Jesus and olketa aposol saed long Bible study?

• Wanem nao samfala change wea iu savve duim mekem iu garem moa taem for study seleva?

• Wanem tingting nao iu shud garem taem iu studyim Word bilong God?

[Box long page 15]

“Long Hand Bilong Iumi”

“Sapos iumi wantem . . . wanfala Bible concordance, Internet nao best tul for datwan. Bat sapos iumi want for readim Bible, for studyim, tingting abaotem, ting raonem, iumi shud holem long hand bilong iumi, from hem nomoa wei for putim insaed long mind and heart bilong iumi.”—Gertrude Himmelfarb, distinguished professor emeritus, City University, New York.