Waswe, Iu Garem Gudfala Wei?
“Mi prea long God for Lord bilong iumi Jesus Christ hem barava kaen long iufala from gudfala wei bilong iufala.” —PHILEM. 25.
1. Long olketa leta wea Paul raetem for olketa kongregeson, wanem nao hem talem plande taem?
LONG olketa leta wea aposol Paul raetem for olketa Christian long first century, plande taem hem sei hem laekem God and Christ for hapi long gudfala wei bilong olketa long kongregeson. Olsem example, hem sei long olketa long Galatia: “Olketa brata, mi prea long God for Lord bilong iumi Jesus Christ hem barava kaen long iufala from gudfala wei bilong iufala. Amen.” (Gal. 6:18) Wanem nao Paul minim taem hem storyim “gudfala wei” bilong olketa?
2, 3. (a) Paul encouragem olketa Christian for garem wanem kaen wei? (b) Iumi shud ting raonem olketa wanem kwestin?
2 Wei bilong man hem join witim tingting bilong hem. Samting wea man talem or duim nao hem showimaot wei bilong hem. Olsem example, maet hem wei bilong wanfala man for kaen, tingim narawan, hambol, or willing for forgive. Bible sei hem gud for man hem “kwaet and hambol” and “kontrolem feeling bilong hem.” (1 Pet. 3:4; Prov. 17:27) Bat maet hem wei bilong nara man for talem samting wea mekem narawan feel nogud, or maet hem laekem tumas material samting. Maet hem man for kwiktaem feel nogud, or followim nomoa tingting bilong hemseleva. Or maet hem wei bilong samfala narawan for tingim olowe olketa dirty samting, or bighed for againstim God.
3 So taem Paul hem sei “mi prea for Lord hem blessim iu from gudfala wei bilong iu,” hem encouragem olketa brata and sista for followim wei bilong Christ, and for garem gudfala wei wea God hapi long hem. (2 Tim. 4:22; readim Colossae 3:9-12.) Iumi wanwan shud ting raonem olketa kwestin olsem: ‘Waswe, mi garem gudfala wei? Wanem nao mi savve duim mekem God hapi long wei bilong mi? Hao nao mi savve helpem olketa narawan long kongregeson for garem gudfala wei?’ Tingim diswan: Long ples wea staka flaoa grow, evri flaoa nao mekem datfala full area luk naes. Waswe, iumi olsem wanfala long olketa flaoa hia? Waswe, wei bilong iumi hem help for mekem full kongregeson hem luk naes? Iumi shud traem best bilong iumi for garem wei olsem. Distaem bae iumi storyim olketa samting wea iumi savve duim mekem God hapi long wei bilong iumi.
NO GAREM TINGTING BILONG PIPOL LONG WORLD
4. Wanem nao mining bilong disfala toktok, “tingting bilong pipol long disfala world”?
4 Bible sei: “Iumi no kasem tingting bilong pipol long disfala world, bat iumi kasem holy spirit bilong God.” (1 Cor. 2:12) Wanem nao “tingting bilong pipol long disfala world”? Hem sem samting wea Paul storyim long Ephesus 2:2, wea sei: “Long bifor, iufala savve followim wei bilong pipol long disfala world. Iufala followim man wea rulim datfala air wea kontrolem pipol. Datfala air nao hem tingting bilong pipol long world and hem garem paoa ovarem olketa wea no obey.” Datfala “air” wea hem “tingting bilong pipol long disfala world,” hem stap evriwea raonem iumi, olsem really air. Olsem example, wei bilong staka pipol hem for no laek herem toktok bilong eniwan, and tingim nomoa raet bilong olketa seleva. Pipol wea garem tingting olsem nao “olketa wea no obey” long disfala world bilong Satan.
5. Wanem nogud wei nao samfala long Israel garem?
5 Pipol long bifor tu garem datkaen tingting. Long taem bilong Moses, Korah bighed for againstim olketa wea garem paoa long Israel. Olketa main wan wea hem tok againstim nao Aaron and olketa son bilong hem wea duim waka olsem priest. Maet Korah hem luksavve long wik point bilong olketa. Or maet hem tingse Moses givim privilege long olketa bikos olketa relative bilong hem nomoa. Nomata wanem nao really reason why Korah hem bighed, hem klia Korah no garem tingting bilong Jehovah. Korah showimaot hem no respectim olketa man wea Jehovah chusim taem hem sei long olketa: “Mifala taed long iufala nao . . . Why nao iufala tingse iufala fit for bossim pipol bilong Jehovah?” (Num. 16:3) Dathan and Abiram tu komplenim Moses and sei hem trae for bossim olketa. Taem Moses askem tufala for kam story witim hem, olketa sei: “Mitufala bae no kam!” (Num. 16:12-14) Jehovah hem nating hapi long bighed wei bilong olketa hia, and hem killim dae evriwan long olketa.—Num. 16:28-35.
6. Hao nao samfala long first century showimaot olketa garem rong tingting, and why nao olketa duim datwan?
6 Samfala long first century tu start for “luk daonem olketa wea garem paoa” long kongregeson. From olketa tok againstim olketa overseer, datwan no showimaot respect for olketa. (Jude 8) Maet olketa tingse olketa fit for kasem samfala nara privilege. Olketa trae for switim olketa narawan tu for no respectim olketa wea God iusim and wea waka hard for lukaftarem kongregeson.—Readim 3 John 9, 10.
7. Iumi mas keakea for no garem wanem kaen tingting?
7 Hem no fitim for eniwan long kongregeson for garem kaen tingting olsem. Dastawe iumi evriwan mas keakea nogud iumi start for garem datkaen tingting. Olketa elder no perfect, olsem olketa man wea lead long taem bilong Moses and taem bilong aposol John tu. Maet olketa elder duim mistek wea affectim iumi. Sapos datwan hem happen, hem no fitim for iumi ova tumas and demandim samwan for mas stretem diswan, or for iumi sei: “Datfala brata hem no fit for elder!” Kaen tingting olsem hem followim tingting bilong pipol long world. Maet Jehovah chus for forgivim olketa smol mistek bilong olketa elder. Iumi tu savve duim sem samting. Samfala wea duim olketa big sin les for meet witim olketa elder wea trae for helpem olketa bikos olketa no laekem samfala wei bilong olketa elder hia. Olketa olsem sik man wea no laek tekem treatment wea doctor givim wea savve finisim sik bilong hem bikos hem no laekem samfala wei bilong datfala doctor.
8. Olketa wanem scripture nao savve helpem iumi for garem stretfala tingting abaotem olketa elder long kongregeson?
8 Wanfala samting wea savve helpem iumi for stap klia long kaen tingting olsem hem for no forget Jesus “holem sevenfala star long raet hand bilong hem.” Olketa “star” piksarem olketa anointed elder, bat diswan savve minim tu evri elder long olketa kongregeson. Jesus savve duim eni samting wea hem laekem witim olketa “star” long hand bilong hem. (Rev. 1:16, 20) From hem Hed bilong kongregeson, Jesus barava savve gud wanem nao olketa elder duim. “Eye bilong hem olsem fire” and hem lukluk long evri samting. So sapos wanfala elder barava needim samwan for stretem hem, Jesus bae mek sure hem kasem datwan long barava taem and long best wei. (Rev. 1:14) Nomata olsem, iumi mas respectim olketa elder wea stap long “raet hand” bilong Jesus. Paul sei: “Olketa wea leadim iufala and lukaftarem iufala mas givim ansa for hao olketa duim diswan. So obeyim and stap anda long olketa mekem olketa hapi for lukaftarem iufala bikos sapos nomoa, datwan bae spoelem iufala.”—Heb. 13:17.
9. (a) Taem wanfala Christian kasem kaonsel, datwan chance for hem showimaot wanem? Storyim example. (b) Taem iumi kasem kaonsel, wanem nao iumi shud duim?
9 Taem wanfala brata or sista lusim eni privilege or olketa elder stretem hem, datwan chance for hem showimaot sapos hem garem gudfala tingting or nomoa. Olsem example, long kaenfala wei olketa elder kaonselem wanfala young brata wea savve pleim olketa raf video game. Sorre samting nao, hem no acceptim datfala kaonsel, so hem lusim privilege bilong hem olsem ministerial servant bikos hem no kasem mark nao. (Ps. 11:5; 1 Tim. 3:8-10) Bihaen datwan, datfala brata talem olketa narawan hem no agree witim disison bilong olketa elder. Hem raetem staka leta tu long branch office and talem olketa nogud samting abaotem olketa elder. Hem trae for mekem olketa narawan long kongregeson saedem hem and for olketa raet go long branch office tu. Disfala example showimaot sapos iumi mek excuse for rong samting wea iumi duim, datwan savve spoelem iumi and peace bilong full kongregeson tu. Taem iumi kasem kaonsel, hem gud for iumi ting long diswan olsem chance for luksavve wanem nao olketa wik point bilong iumi, and iumi shud hambol for acceptim datfala kaonsel.—Readim Lamentations 3:28, 29.
10. (a) Wanem nao iumi savve lanem from James 3:16-18? (b) Hao nao datfala “wisdom from heven” savve helpem iumi and full kongregeson?
10 James 3:16-18 storyim wanem kaen wei Christian shud garem and wanem kaen wei hem no fitim for hem garem long kongregeson. Hem sei: “Wei for barava jealous tumas and laek raoa olowe hem mekem evri samting olobaot and hem mekem pipol duim enikaen nogud samting. Bat wisdom from heven hem mekem man for klin, stap gud witim narawan, no forcem tingting bilong hem, willing for obey, showimaot mercy long narawan, duim gudfala samting, no favorim eniwan, and no laea. Pipol wea stap gud witim narawan mekem peace hem stap, and from diswan olketa duim samting wea raeteous.” Datfala “wisdom from heven” savve helpem iumi for garem olketa wei bilong God, and datwan bae encouragem narawan for garem gudfala wei and kongregeson bae garem peace.
SHOWIMAOT RESPECT LONG KONGREGESON
11. (a) Sapos iumi garem stretfala tingting, bae iumi no duim wanem samting? (b) Wanem nao iumi lanem from example bilong David?
11 Iumi shud no forget Jehovah nao markem olketa elder for “lukaftarem olketa sheepsheep” long kongregeson. (Acts 20:28; 1 Pet. 5:2) So nomata iumi elder or nomoa, iumi shud respectim arrangement bilong God. Sapos iumi garem stretfala tingting, bae iumi no ova tumas long hao iumi ting long position insaed kongregeson. Taem King Saul start for tingse David bae kamap king for changem hem, Saul no trustim hem nao. (1 Sam. 18:9) King Saul hem garem nogud tingting, and hem laek for killim dae David tu. Iumi shud no olsem Saul wea tingim tumas position bilong hem, bat iumi shud olsem David. Nomata staka samting wea kasem David hem no stret, hem evritaem respectim olketa wea God givim paoa long olketa.—Readim 1 Samuel 26:23.
12. Wanem nao iumi savve duim for helpem kongregeson garem wan mind?
12 From tingting bilong iumi evriwan no semsem, maet samfala taem iumi mekem narawan feel nogud. Diswan savve kasem olketa elder tu. Bible storyim tingting wea iumi shud garem. Hem sei: “Iufala mas willing for showimaot respect long narawan” and, “No tingse iufala nao savve tumas.” (Rom. 12:10, 16) Diswan minim iumi shud no sei tingting bilong iumi nomoa stret, bat iumi shud luksavve plande taem samfala difren wei stap for deal witim wanfala problem. Sapos iumi traem best for minim tingting bilong narawan, datwan savve helpem kongregeson for garem wan mind.—Phil. 4:5.
13. Bihaen iumi talemaot tingting bilong iumi, wanem nao iumi shud duim? Storyim example.
13 Waswe, datwan minim hem rong for iumi talemaot tingting bilong iumi sapos iumi tingse wanfala samting wea happen long kongregeson hem no stret? Nomoa. Long first century, plande long kongregeson no savve agree sapos hem stret for man circumcise or nomoa. So “olketa brata disaed for sendem Paul and Barnabas and samfala nara brata for go storyim diswan witim olketa aposol and olketa elder long Jerusalem.” (Acts 15:2) Iumi sure evri brata hia garem tingting bilong hemseleva abaotem wanem nao stret samting for duim. Bat bihaen each wan talemaot tingting bilong hem, and holy spirit helpem olketa for mekem disison, olketa brata no gohed storyim moa tingting bilong olketa seleva. Bihaen olketa kongregeson kasem leta wea talemaot datfala disison, “olketa hapi tumas long samting wea olketa readim” and “faith bilong olketa . . . gohed for kamap strong.” (Acts 15:31; 16:4, 5) Distaem tu, bihaen iumi story long olketa elder abaotem wanfala samting wea iumi tingse hem no stret, iumi shud leavim datwan long hand bilong olketa nao.
SHOWIMAOT GUDFALA WEI LONG NARAWAN
14. Hao nao iumi savve showimaot gudfala wei long olketa narawan?
14 Iumi garem staka chance for showimaot gudfala wei long olketa narawan. Olsem example, hem gud samting sapos iumi kwiktaem forgivim olketa narawan taem olketa mekem iumi feel nogud. Bible sei: “Nomata sapos eniwan long iufala hem feel nogud long narawan, hem mas no kros bat mas evritaem forgivim hem. Iufala mas olsem Jehovah wea hem willing for forgivim iufala.” (Col. 3:13) Datfala toktok “sapos eniwan long iufala hem feel nogud long narawan” hem showimaot samfala taem maet iumi garem gudfala reason for feel nogud long narawan. Nomata olsem, iumi mas no letem samfala samting wea iumi no laekem abaotem wei bilong narawan for mekem iumi feel nogud, bikos datwan savve spoelem peace long kongregeson. Iumi mas trae for followim wei bilong Jehovah for forgivim olketa brata bilong iumi, and gohed worshipim God witim olketa.
15. (a) Wanem nao iumi lanem from Job abaotem wei for forgive? (b) Hao nao wei for prea savve helpem iumi garem stretfala tingting abaotem narawan?
15 Job showimaot gudfala example for iumi long wei for forgivim narawan. Thrifala man wea kam for givim comfort long Job no duim datwan bat olketa talem toktok wea nating kaen nomoa. Nomata olsem, Job forgivim olketa. Wanem nao helpem hem for duim olsem? “Job prea for thrifala fren bilong hem.” (Job 16:2; 42:10) Wei for prea for narawan savve changem tingting bilong iumi abaotem hem. Taem iumi prea for evri brata and sista bilong iumi, datwan bae helpem iumi garem sem tingting abaotem olketa olsem Jesus. (John 13:34, 35) Iumi shud prea tu for holy spirit bilong God. (Luke 11:13) Holy spirit bae helpem iumi for showimaot gudfala wei long olketa nara Christian.—Readim Galatia 5:22, 23.
GUDFALA WEI BILONG IU HELPEM FULL KONGREGESON
16, 17. Wanem kaen wei nao iu laek for garem?
16 Taem iumi evriwan traem best for garem gudfala wei, datwan helpem full kongregeson. Maet disfala study mekem iu luksavve iu savve duim moa samting for showimaot gudfala wei and encouragem narawan. Sapos olsem, letem toktok bilong God helpem iu for changem samfala wei bilong iu. (Heb. 4:12) Paul laek showimaot gudfala example for olketa long kongregeson. Hem sei: “Mi no savve tingim eni samting wea mi duim wea hem no stret. Nomata olsem, datwan no mekem mi wanfala raeteous man, bat Jehovah nomoa hem judgem mi.”—1 Cor. 4:4.
17 Iumi evriwan savve encouragem narawan for showimaot gudfala wei long kongregeson. Iumi savve duim olsem sapos iumi followim olketa wei bilong God, no tingse tingting bilong iumi nomoa stret, and no tingim tumas for garem position insaed kongregeson. Sapos iumi kwiktaem forgivim narawan and garem gudfala tingting abaotem olketa brata and sista, bae iumi stap gud witim olketa. (Phil. 4:8) Iumi sure sapos iumi duim olketa samting hia, Jehovah and Jesus bae hapi long gudfala wei bilong iumi.—Philem. 25.