Mekem Olketa Gudfala Disison Taem Iu Young

1. Olketa wanem naesfala experience nao plande young wan kasem?

IUMI stap long barava important taem long history. Winim enitaem bifor, plande million pipol from staka kantri chus for worshipim Jehovah. (Rev. 7:9, 10) Staka young wan garem olketa naesfala experience taem olketa helpem pipol for minim olketa tru teaching long Bible, wea savve mekem man kasem laef olowe. (Rev. 22:17) Olketa young wan hia studyim Bible witim pipol and datwan helpem olketa for garem gudfala laef. Samfala young wan willing for lanem difren languis for helpem pipol from olketa difren ples wea stap long territory bilong olketa. (Ps. 110:3; Isa. 52:7) Wanem nao iu savve duim mekem iu tu duim disfala waka wea mekem man satisfae?

2. Hao nao example bilong Timothy showimaot Jehovah laekem olketa young wan for kasem olketa responsibility long kongregeson? (Lukim piksa long start bilong study.)

² Iufala young wan savve mekem olketa disison distaem wea bae mekem iufala garem chance for duim moa samting long waka bilong Jehovah long future. Olsem example, Timothy mekem olketa gudfala disison taem hem young, wea gogo datwan mekem hem fit for duim missionary waka taem hem klosap kasem 20 year nomoa. (Acts 16:1-3) Maet hem tu-thri month bihaen diswan nomoa taem Paul askem Timothy for go long niu kongregeson long Thessalonica. From pipol barava againstim olketa brata long Thessalonica, Paul lusim datfala ples bat hem trustim Timothy for go and strongim olketa brata long there. (Acts 17:5-15; 1 Thess. 3:1, 2, 6) Masbi Timothy barava tinghae long datfala assignment!

DISISON WEA IMPORTANT WINIM ENI NARA DISISON

3. Wanem disison nao hem important winim eni nara disison, and wanem nao best taem for iu mekem datfala disison?

³ Taem iu young nao hem taem for mekem olketa important disison. Wanem disison nao hem important winim eni nara disison? Hem nao disison bilong iu for worshipim Jehovah. Wanem nao best taem for iu mekem datfala disison? Jehovah sei for iu tingim hem taem iu young. (Eccl. 12:1) Taem iu worshipim Jehovah long full heart bilong iu, datwan nao showimaot iu tingim Jehovah. (Deut. 10:12) Hem disison wea important winim eni nara disison bikos hem bae affectim full laef bilong iu.—Ps. 71:5.

4. Olketa wanem important disison nao bae affectim wei wea iu worshipim God?

⁴ Bat olketa nara disison wea iu mekem tu bae affectim future bilong iu. Olsem example, iu mas disaed tu sapos bae iu marit or nomoa, hu nao bae iu maritim, and wanem kaen waka nao bae iu duim. Olketa samting hia important tumas for disaedem, bat firstaem iu mas disaed sapos iu bae worshipim Jehovah long full heart bilong iu. (Deut. 30:19, 20) Why nao olsem? Bikos disison bilong iu abaotem marit and waka bae affectim worship bilong iu. And disison bilong iu for worshipim God bae affectim wanem iu chusim saed long waka and marit. (Comparem Luke 14:16-20.) So disaedem wanem nao main important samting long laef bilong iu.—Phil. 1:10.

WANEM NAO BAE IU DUIM TAEM IU YOUNG?

5, 6. Hao nao experience bilong Yuichiro showimaot iumi savve duim moa samting long waka bilong Jehovah taem iumi mekem olketa gudfala disison? (Lukim tu “Samting wea Mi Disaedem Taem Mi Pikinini,” long page 32.)

⁵ Bihaen iu disaed finis for worshipim Jehovah, ting raonem wanem nao hem laekem iu for duim, and then iu savve disaedem wanem nao iu bae duim long laef bilong iu. Wanfala brata from Japan sei: “Taem mi 14 year, mi waka witim wanfala elder long kongregeson long preaching waka, and hem luksavve mi no enjoyim ministry. Hem tok kaen olsem long mi: ‘Yuichiro, iu go bak long haos. Sidaon long desk bilong iu, and ting raonem olketa samting wea Jehovah duim for iu.’ Mi duim datwan. Tu-thri day nao mi ting raonem diswan and prea abaotem long Jehovah. Gogo, tingting bilong mi hem change. No longtaem bihaen, mi start for enjoyim wei for worshipim Jehovah. Mi laekem tumas for readim experience bilong olketa missionary, and mi start for tingting for duim moa samting long waka bilong God.”

⁶ Yuichiro start for mekem olketa gudfala disison. From hem duim olsem, gogo hem savve duim waka bilong Jehovah long nara kantri. Hem sei: “Mi chus for duim course for lanem English languis. Taem mi finis skul, mi chusim wanfala part-taem waka for teachim English mekem mi savve pioneer. Taem mi 20 year, mi start lanem Mongolian languis, and mi visitim wanfala Mongolian grup. Tufala year bihaen, long 2007, mi go holiday long Mongolia. Taem mi waka witim samfala pioneer and lukim staka pipol laek savve long truth, mi laek for muv go long there for helpem olketa. Mi go bak long Japan firstaem for planim gogo bilong mi. Start long April 2008 mi pioneer long Mongolia. Laef hem no isi long hia, bat pipol acceptim gud nius, and mi savve helpem olketa for fren gud witim Jehovah. Mi chusim best samting for duim long laef bilong mi.”

7. Wanem nao samfala samting wea iuseleva mas disaedem, and wanem nao iumi savve lanem from example bilong Moses?

⁷ Evri Jehovah’s Witness wanwan mas disaedem wanem hem bae duim long laef bilong hem. (Josh. 24:15) Mifala no savve talem iu sapos iu shud marit or nomoa. And mifala no savve talem iu hu for iu maritim, or wanem kaen waka nao iu shud duim. Waswe, bae iu chusim waka wea iu needim lelebet training nomoa? Samfala long iufala young Christian stap long olketa vilij wea pipol poor, and samfala stap long olketa rich taon. Iufala evriwan garem olketa difren wei, savve, and education. No evriwan long iufala interest long sem samting, and samfala long iufala just start for worshipim Jehovah tu. Long bifor, laef bilong olketa young wan wea worshipim Jehovah tu hem no semsem. Olsem example, Moses wea growap long Egypt, hem rich, bat olketa nara young Hebrew olketa slave nomoa. (Ex. 1:13, 14; Acts 7:21, 22) Olsem iufala, olketa tu stap long barava important taem long history. (Ex. 19:4-6) Bat each wan long olketa tu mas chus for worshipim Jehovah or nomoa. Moses mekem stretfala disison for duim wanem Jehovah laekem.—Readim Hebrew 11:24-27.

8. Wanem nao savve helpem iufala young wan for mekem olketa gudfala disison?

⁸ Jehovah givim advaes long iufala young wan for helpem iufala mekem olketa gudfala disison. Hao nao hem duim diswan? Hem teachim iu olketa Bible principle wea iu savve followim long laef bilong iu. (Ps. 32:8) Sapos iu no savve hao for followim olketa principle hia, iu savve askem parents or olketa elder for helpem iu. (Prov. 1:8, 9) Iumi bae storyim thrifala Bible principle wea savve helpem iu for mekem olketa gudfala disison taem iu young.

THRIFALA BIBLE PRINCIPLE FOR HELPEM IU

9. (a) Wanem nao showimaot Jehovah letem iumi for disaedem samting seleva? (b) Wanem gud samting nao bae iu kasem sapos Kingdom hem first samting long laef bilong iu?

⁹ Kingdom and olketa samting wea God sei hem stret mas first samting long laef bilong iu. (Readim Matthew 6:19-21, 24-26, 31-34.) Jehovah letem iuseleva for disaedem hao for iu iusim taem bilong iu. Hem no sei for iu mas iusim full taem bilong iu for preach nomoa. Nomata olsem, Jesus sei hem barava important for Kingdom nao mas first samting long laef bilong iumi. Taem iu duim olsem, bae iu garem staka chance for showimaot iu lovem God and nara pipol, and for showimaot iu tinghae long hope wea iu garem for laef olowe. Waswe, olketa disison bilong iu saed long marit and waka bae showimaot iu warim nomoa olketa material samting, or bae hem showimaot “Kingdom and olketa samting wea God sei hem stret” hem first samting long laef bilong iu?

10. Wanem nao mekem Jesus hapi, and wanem nao iu mas duim for iu hapi?

¹⁰ Kasem hapi long wei for helpem olketa narawan. (Readim Acts 20:20, 21, 24, 35.) Diswan hem wanfala principle wea Jesus hem teachim. From hem savve diswan hem tru, hem duim wanem Dadi bilong hem laekem and hem helpem pipol taem hem storyim gud nius long olketa. Datwan mekem hem hapi. (Luke 10:21; John 4:34) Masbi iu tu iu hapi taem iu helpem narawan. So followim olketa principle wea Jesus teachim taem iu disaedem eni samting, and bae iu hapi, and Jehovah tu bae hapi.—Prov. 27:11.

11. Why nao Baruch hem no hapi for lelebet taem, and wanem kaonsel nao Jehovah givim long hem?

¹¹ Wei for worshipim Jehovah savve mekem man barava hapi. (Prov. 16:20) Luk olsem Baruch, wea hem secretary bilong Jeremiah, hem forgetim datwan. For lelebet taem hem no hapi long waka bilong Jehovah. Baruch start for tingting tumas abaotem wanem hemseleva laekem, and no wanem Jehovah laekem. Taem Jehovah lukim diswan, hem talem Baruch for stop for “aftarem olketa bigfala samting” for hemseleva. Sapos hem obeyim Jehovah, hem bae no dae taem Jerusalem distroe. (Jer. 45:3, 5) Hao nao tingting bilong iu? Waswe, Baruch bae hapi sapos hem duim wanem hemseleva laekem nomata datwan bae mekem hem dae taem Jerusalem distroe, or bae wei for duim wanem Jehovah laekem nao mekem Baruch hapi?—Jas. 1:12.

12. Wanem nao olketa disison wea Ramiro mekem wea helpem hem for hapi?

¹² Ramiro hem wanfala brata wea hapi tumas taem hem helpem nara pipol. Hem sei: “Famili bilong mi poor and mifala stap long wanfala vilij long Andes Mountains. So taem brata bilong mi sei hem bae peim skul fee bilong mi for go long university, datwan hem nambawan chance for mi garem bigfala education. Bat mi just baptaes and wanfala pioneer laekem mi for go for preach long wanfala smol taon witim hem. Mi go long there and lane for kat hair. Mi startim bisnis for kat hair mekem mi savve kasem need bilong mi.” Staka pipol long datfala taon laek for studyim Bible. Gogo, wanfala niu kongregeson hem start long languis bilong pipol wea stap long there. So Ramiro disaed for joinim datfala kongregeson and hem pioneer long there for tenfala year finis. Hem sei no eni waka mekem hem hapi olsem waka for helpem pipol lanem Bible long languis bilong olketa seleva.

13. Why nao taem iu young hem best taem for iu duim waka bilong Jehovah long full heart bilong iu?

¹³ Hapi for worshipim Jehovah taem iu young. (Readim Ecclesiastes 12:1.) No tingse iu mas garem gudfala waka firstaem bifor iu savve start pioneer. Taem iu young nao hem best taem for duim waka bilong Jehovah long full heart bilong iu bifor iu garem famili bilong iuseleva for lukaftarem. Iu healthy and iu strong for duim olketa assignment wea no isi. Wanem nao iu laek duim for Jehovah? Maet iu garem goal for pioneer or preach long pipol wea story long nara languis. Or maet iu savve duim moa samting long kongregeson wea iu stap long hem distaem. Nomata wanem goal nao iu garem, iu mas waka for kasem need bilong iu. Ting raonem diswan: ‘Wanem kaen waka nao bae mi duim, and haomas month or year nao mi mas kasem training for duim datfala waka?’

IUSIM OLKETA BIBLE PRINCIPLE FOR MEKEM OLKETA GUDFALA DISISON

14. Wanem nao iu mas keakea long hem taem iu lukaotem waka?

¹⁴ Thrifala Bible principle wea iumi storyim finis bae helpem iu for disaedem wanem kaen waka for selen nao hem fitim for iu duim. Maet pipol encouragem iu for kasem bigfala education mekem iu savve garem bigfala waka bat iu mas keakea. Pipol wea no lovem Jehovah maet trae for switim iu for lovem world. (1 John 2:15-17) Taem iu ting raonem difren kaen waka wea iu garem chance for duim, iu mas no forgetim, heart bilong iu savve laea long iu.—Readim Proverbs 14:15; Jer. 17:9.

15, 16. Hu nao savve givim gudfala advaes long iu saed long waka?

¹⁵ For disaedem wanem waka iu bae duim for kasem need bilong iu, bae iu needim gudfala advaes. (Prov. 1:5) Hu nao savve helpem iu for ting raonem olketa Bible principle abaotem diswan? Followim advaes bilong pipol wea lovem Jehovah, lovem iu, and wea savve gud long iu. Olketa bae helpem iu for luksavve wanem iu fit for duim and why nao iu laek for duim datwan. Maet advaes bilong olketa mekem iu luksavve iu mas changem olketa goal bilong iu. Sapos parents bilong iu worshipim Jehovah, olketa savve barava helpem iu long diswan. Olketa elder long kongregeson tu savve givim iu gudfala advaes. Story witim olketa pioneer and traveling overseer and askem olketa why nao olketa disaed for duim full-taem service. Wanem nao olketa duim mekem olketa savve start for pioneer, and hao nao olketa kasem need bilong olketa? Olketa wanem blessing nao olketa kasem?—Prov. 15:22.

¹⁶ Olketa wea savve gud long iu savve givim gudfala advaes long iu. Olsem example, waswe sapos iu les for gohed long hae skul and laek for pioneer bikos iu no willing for waka hard long skul? Samwan wea savve gud long iu bae luksavve why iu les for skul. So hem savve helpem iu for luksavve hem important for iu gohed skul bikos datwan teachim iu for no givap kwiktaem. Iu mas lane for no givap sapos iu laek for duim moa samting long waka bilong Jehovah.—Ps. 141:5; Prov. 6:6-10.

17. Wanem kaen waka nao iu shud no chusim?

¹⁷ Evriwan wea worshipim Jehovah bae kasem olketa test wea maet spoelem faith bilong olketa and wei wea olketa fren witim Jehovah. (1 Cor. 15:33; Col. 2:8) Samfala waka savve mekem iu kasem olketa test wea maet spoelem faith bilong iu. Maet iu savve long samfala wea chusim wanfala kaen waka, gogo olketa no worshipim Jehovah nao. (1 Tim. 1:19) Hem wise for no chusim waka wea savve spoelem wei wea iu fren witim Jehovah.—Prov. 22:3.

ENJOYIM WEI FOR WORSHIPIM JEHOVAH TAEM IU YOUNG

18, 19. Sapos iu no tingting for pioneer distaem, wanem nao iu savve duim?

¹⁸ Sapos iu laek for duim moa samting long waka bilong Jehovah, mekius long olketa chance wea hem givim long iu taem iu young. Mekem olketa disison wea bae helpem iu for duim moa samting long waka bilong God long disfala barava important taem long history.—Ps. 148:12, 13.

¹⁹ Waswe sapos iu no tingting for duim moa samting long waka bilong Jehovah distaem? No givap, and gohed strongim faith bilong iu long Jehovah. Paul storyim wanem hem duim for kasem blessing from Jehovah. Hem sei: “Sapos iufala garem difren tingting, bae God hem showim iufala stretfala tingting wea iufala mas garem. Bat nomata iumi kamap strong finis, iumi mas gohed for followim sem wei wea iumi followim kam kasem distaem.” (Phil. 3:15, 16) Iu mas no forget, Jehovah hem lovem iu. Advaes bilong hem nao best wan, so letem hem helpem iu for mekem olketa gudfala disison distaem taem iu young.