Wakabaot Witim God, and Harvestim Gud Samting
“From olketa gohed for plantim wind, bae olketa harvestim cyclone.”—HOSEA 8:7.
1. Hao nao iumi savve wakabaot witim Jehovah?
SAPOS iu wakabaot thru long wanfala ples wea danger, bae iu sef sapos wanfala man wea savve long datfala ples nao leadim iu. Hem wise for wakabaot witim datfala man winim wei for go seleva nomoa long datfala ples. Datwan hem piksarem samting wea kasem iumi distaem. Long tokpiksa wei, Jehovah hem willing for leadim iumi thru long disfala wicked world wea hem wanfala danger ples. Hem wise for iumi wakabaot witim hem winim wei for trae for wakabaot seleva. Hao nao iumi savve wakabaot witim God? Thru long wei for followim direction wea hem provaedem insaed Bible.
2. Wanem nao bae iumi story raonem long disfala article?
2 Long first article iumi storyim wanfala drama wea stap long Hosea chapter 1 go kasem 5. Olsem iumi lukim, datfala drama hem teachim iumi plande samting for helpem iumi wakabaot witim God. Distaem bae iumi storyim samfala point wea stap long Hos chapter 6 go kasem 9. Bat, firstaem bae iumi lukluk long samfala main point insaed fofala chapter hia.
Lukluk Lelebet Long Olketa Main Point
3. Storyim lelebet samfala point from Hosea chapter 6 go kasem 9.
3 Main wan wea Jehovah sendem Hosea for talem profesi long hem nao hem ten-tribe kingdom bilong Israel long north. Datfala nation, wea samfala taem olketa kolem Ephraim bikos hem nao nem bilong main tribe long there, hem lusim God. Hosea chapter 6 go kasem 9 showim hao pipol nating loyal bikos olketa no followim covenant bilong Jehovah and olketa duim olketa nogud samting. (Hosea 6:7) Winim wei for go bak long Jehovah, olketa trustim olketa agreement wea olketa mekem witim olketa nara nation. From olketa gohed for plantim samting wea nogud, olketa bae harvestim samting wea nogud. Diswan minim Jehovah bae judgem olketa. Bat profesi bilong Hosea hem garem tu wanfala message wea muvim heart. Jehovah promis hao pipol bilong hem savve kam bak long hem and bae hem showim mercy sapos olketa showimaot olketa repent from heart.
4. Wanem nao samfala samting wea bae iumi story raonem long profesi bilong Hosea wea savve helpem iumi?
4 Fofala chapter hia long profesi bilong Hosea hem teachim iumi samfala nara samting wea savve helpem iumi for wakabaot witim God. Bae iumi storyim fofala samting: (1) Trufala wei for repent hem showaot thru long samting wea man duim, no long toktok nomoa; (2) God no hapi long wei for givim sakrifaes nomoa; (3) Jehovah savve feel sorre taem olketa wea worshipim hem lusim hem; and (4) sapos iumi laek for harvestim gud samting, iumi mas plantim gud samting.
Wei wea Trufala Wei for Repent Hem Showaot
5. Talem olketa main point bilong toktok long Hosea 6:1-3.
5 Profesi bilong Hosea hem teachim iumi plande samting abaotem wei for repent and mercy. Long Hosea 6:1-3, hem sei: “Iufala pipol, kam, and iumi go bak long Jehovah, from hem nao pisisim evri samting bat hem bae healim iumi. Hem gohed for panisim iumi, bat bae hem bandagem iumi moa. Hem bae mekem iumi laef bihaen tufala day. Long mek-thri day hem bae mekem iumi standap, and iumi bae gohed stap front long hem. And bae iumi savve, bae iumi aftarem wei for savve long Jehovah. Gogo bilong hem bae stap for olowe, olsem wei wea sun kamap. And hem bae kam long iumi olsem big rain; olsem rain long spring season wea tuwetem graon.”
6-8. Why nao wei wea Israel hem repent hem nating stret?
6 Hu nao talem olketa toktok long olketa verse hia? Samfala tingse hem toktok bilong olketa Israelite wea no faithful and olketa talem hao olketa hia wea nating obey act olsem olketa repent and laek mekius long mercy bilong God. Bat olketa narawan sei diswan hem toktok bilong profet Hosea, and hem barava askem olketa Israelite for kam bak long Jehovah. Nomata hu nao talem datfala toktok, barava important kwestin nao hem, Waswe, staka long olketa long ten-tribe kingdom bilong Israel kam bak long Jehovah and showimaot trufala wei for repent? Barava nomoa nao. Jehovah hem sei olsem thru long Hosea: “Wanem nao bae mi duim long iu, O Ephraim? Wanem nao bae mi duim long iu, O Judah, from loving-kaeness bilong iufala hem olsem cloud wea float antap long graon long morning and olsem dew wea kwiktaem nomoa hem finis?” (Hosea 6:4) Diswan showimaot hao spiritual saed bilong pipol bilong God barava kamap nogud tumas! Loving-kaeness, or loyal love, hem klosap lus evribit—olsem cloud wea float antap long graon wea kwiktaem lus long morning taem sun kamap. Nomata olketa pipol act olsem olketa repent, Jehovah hem no lukim eni reason for showimaot mercy long olketa. Why nao olsem?
7 Israel nating showimaot trufala wei for repent wea kam from heart. Hosea 7:14 sei olsem abaotem wei wea Jehovah no hapi long pipol bilong hem: “Olketa no kol kam long mi from heart bilong olketa for mi helpem olketa, nomata olketa gohed for krae big long bed bilong olketa.” Verse 16 hem sei: “Olketa start for kam bak, bat no long samting wea moa hae”—wea minim, “no long wei for worship wea hem moa hae.” (Footnote) Olketa nating willing for change mekem olketa fren moa witim Jehovah and kam bak long worship bilong hem wea moa hae. Tru nao, olketa no really want for wakabaot witim God.
8 Nara problem stap tu saed long wei wea olketa Israelite repent. Pipol hia gohed for duim sin. Staka sin nao olketa duim olsem wei for raverave, killim man dae, steal, worshipim idol, and mekem olketa agreement witim olketa nara nation. Long Hosea 7:4, hem sei olketa pipol hia olsem oven bilong wanfala man for beikem bred. Luk olsem hem talem diswan bikos olketa garem olketa wicked feeling insaed long olketa wea hem strong olsem fire. From spiritual saed bilong olketa hem barava nogud tumas, waswe, olketa pipol hia fit for kasem mercy? Barava nomoa nao! Hosea talem olketa bighed pipol hia hao Jehovah bae “rememberim rong bilong olketa” and “deal witim sin bilong olketa.” (Hosea 9:9) Bae olketa no kasem mercy nao!
9. Toktok bilong Hosea hem teachim iumi wanem samting abaotem wei for repent and mercy?
9 Taem iumi readim toktok bilong Hosea, wanem nao iumi lanem abaotem mercy and fasin for repent? Warning example bilong olketa Israelite wea no garem faith hem teachim iumi hao sapos iumi laek for kasem mercy bilong Jehovah, iumi mas showimaot iumi repent from heart. Hao nao iumi savve showimaot wei for repent olsem? Hard for iumi laea long Jehovah thru long toktok or wei for krae. Trufala wei for repent hem showaot long samting wea man duim. For kasem mercy, man wea duim rong mas lusim evribit olketa nogud fasin bilong hem and changem laef bilong hem for followim olketa hae standard bilong worship bilong Jehovah.
God No Hapi Long Wei for Givim Sakrifaes Nomoa
10, 11. Olsem iumi lanem from example bilong Israel, why nao God no hapi long wei for givim sakrifaes nomoa?
10 Distaem bae iumi story raonem mek-tu samting wea savve helpem iumi for wakabaot witim Jehovah: Wei wea God no hapi long wei for givim sakrifaes nomoa. Hosea 6:6 hem sei: “Mi [Jehovah] hapi long loving-kaeness, and no long sakrifaes; and long savve abaotem God winim full sakrifaes wea olketa bonem.” Tingim hao Jehovah hem hapi long loving-kaeness, or loyal love, wea hem wanfala fasin wea kam from heart, and tu, long wei for savve abaotem hem. Bat maet iu ting: ‘Why nao disfala verse sei Jehovah hem no hapi long “sakrifaes” and “full sakrifaes wea olketa bonem”? Waswe, hem no tru hao Law bilong Moses sei olketa mas givim olketa samting hia?’
11 Law hem sei olketa mas givim olketa sakrifaes hia, bat, olketa wea stap long taem bilong Hosea garem wanfala serious problem. Luk olsem samfala Israelite evritaem givim olketa sakrifaes for mekem hem luk olsem olketa lovem God. Bat long semtaem, olketa gohed for duim sin. Wei wea olketa gohed sin showimaot olketa no garem eni loyal love. Olketa showimaot tu hao olketa rejectim savve abaotem God, from olketa no followim datfala savve. Sapos heart bilong pipol hem nogud and olketa no aftarem wei for duim olketa samting wea stret, sakrifaes bilong olketa bae mekem Jehovah feel nogud.
12. Wanem warning for pipol distaem nao stap long Hosea 6:6?
12 Toktok bilong Hosea hem olsem wanfala warning for plande pipol distaem wea attendim church evritaem. Wei wea olketa duim worship bilong olketa hem olsem wei for mekem olketa sakrifaes long God. Bat diswan hem iusles nomoa from hem nating affectim fasin wea olketa showimaot evriday. Waswe, pipol olsem really savve mekem God hapi sapos heart no muvim olketa for kasem stretfala savve abaotem God, and olketa no followim datfala savve and lusim olketa nogud fasin bilong olketa? No eniwan fit for tingse wei for duim nomoa waka saed long lotu bae mekem God hapi. Jehovah no savve hapi long pipol wea trae for mekem hem acceptim olketa thru long wei for duim samting wea luk olsem olketa worshipim hem bat really olketa no barava followim Bible.—2 Timothy 3:5.
13. Wanem kaen sakrifaes nao iumi savve givim, bat wanem nao iumi mas tingim saed long datwan?
13 Iumi olketa tru Christian tingim evritaem hao God no hapi long wei for givim sakrifaes nomoa. Hem tru, iumi distaem no givim olketa animal sakrifaes long Jehovah. Nomata olsem, iumi savve “givim wanfala sakrifaes bilong praise long God, hem nao, frut bilong mouth wea talemaot nem bilong hem long pablik.” (Hebrews 13:15) Hem barava important for iumi no kamap olsem olketa Israelite wea sin long taem bilong Hosea. Iumi shud no tingse wei for givim olketa sakrifaes bae mekem Jehovah forgivim sin wea iumi duim. Tingim example bilong wanfala young sista wea duim dirty fasin bat wea haedem datwan. Hem sei: “Mi spendem moa taem long field ministry, from mi tingse diswan bae kavarem datfala sin.” Datwan hem olsem samting wea olketa Israelite trae for duim. Bat, only wei wea Jehovah bae acceptim olketa sakrifaes bilong praise from iumi, hem sapos iumi showimaot fasin wea God appruvim and stretfala feeling from heart nao muvim iumi.
Jehovah Savve Feel Sorre Taem Olketa wea Worshipim Hem Lusim Hem
14. Wanem nao profesi bilong Hosea hem showimaot abaotem feeling bilong God?
14 Mek-thri samting wea iumi lanem from Hosea chapter 6 go kasem 9 hem abaotem feeling bilong Jehovah taem olketa worshiper bilong hem lusim hem. God hem garem olketa strongfala and loving feeling. Hem hapi and kea long olketa wea repent from sin bilong olketa. Bat taem pipol bilong hem no repent, hem savve strong for disaedem samting and then duim datwan. From God hem barava kea for iumi, hem hapi tumas taem iumi wakabaot long faithful wei witim hem. Psalm 149:4 hem sei olsem: “Jehovah hem hapi long pipol bilong hem.” Bat hao nao God hem feel taem olketa servant bilong hem no faithful?
15. Wanem nao Hosea 6:7 hem sei samfala Israelite duim?
15 Jehovah hem sei olsem abaotem olketa Israelite wea no faithful: “Olketa seleva, olsem man bilong earth, olketa sin againstim datfala covenant. Hem nao hao olketa deal witim mi long wei wea brekem trust.” (Hosea 6:7) Hebrew word wea olketa transleitim “brekem trust” hem minim tu “for deal witim man long giaman wei, (deal witim man) long wei wea no faithful.” Long Malachi 2:10-16, Bible iusim datfala sem Hebrew word for storyim wei wea olketa Israelite no faithful long marit partner bilong olketa. Wanfala reference buk hem talem hao disfala toktok long Hosea 6:7, “hem tokpiksa abaotem marit, wea showimaot datfala klos wei for fren . . . Hem klos wei for fren wea finis from samwan spoelem datfala love.”
16, 17. (a) Wanem nao Israel duim saed long covenant bilong olketa witim God? (b) Wanem nao iumi mas tingim saed long samting wea iumi duim?
16 Jehovah ting long Israel olsem tokpiksa waef bilong hem from hem garem covenant witim datfala nation. So taem pipol bilong hem no obeyim datfala covenant, hem olsem olketa duim adultery. God hem olsem wanfala faithful hasband, bat pipol bilong hem lusim hem!
17 Waswe long iumi? God barava laekem iumi for wakabaot witim hem. Hem gud for iumi remember hao “God hem love” and samting wea iumi duim bae affectim hem. (1 John 4:16) Sapos iumi duim olketa samting wea no stret, iumi savve mekem Jehovah barava feel sorre and bae hem no hapi. Wei for evritaem tingim diswan savve barava helpem iumi for no foldaon long olketa test.
Hao Nao Iumi Savve Harvestim Gud Samting
18, 19. Wanem principle nao stap long Hosea 8:7, and hao nao datfala principle kamap tru saed long olketa Israelite?
18 Distaem, iumi bae ting raonem mek-foa samting iumi savve lanem from profesi bilong Hosea—hao for harvestim gud samting. Saed long olketa Israelite wea no garem faith and wei wea samting olketa chusim hem krangge and iusles, Hosea hem sei olsem: “From olketa gohed for plantim wind, bae olketa harvestim cyclone.” (Hosea 8:7) Diswan showimaot wanfala principle wea bae gud for iumi tingim evritaem: Samting wea iumi duim distaem hem barava affectim wanem bae happen long iumi long future. Hao nao disfala principle hem kamap tru saed long olketa Israelite wea no faithful?
19 Taem olketa gohed for duim sin, olketa Israelite plantim nogud samting. Waswe, olketa savve gohed for duim olsem and no harvestim eni nogud samting? Hard for olketa missim judgment. Hosea 8:13 hem sei: “[Jehovah] bae rememberim sin bilong olketa and askem ansa for sin bilong olketa.” And long Hosea 9:17, hem sei: “God bilong mi bae rejectim olketa, from olketa no lisin long hem, and bae olketa ranawe and haed midolwan long olketa nation.” Jehovah bae askem olketa Israelite for ansa for sin bilong olketa. From olketa plantim nogud samting, olketa bae harvestim nogud samting. Olketa kasem judgment from God long 740 B.C.E., taem olketa bilong Assyria tekovarem datfala ten-tribe kingdom bilong Israel and olketa tekem go olketa for kamap prisoner.
20. Samting wea kasem olketa Israelite hem teachim iumi wanem?
20 Samting wea kasem olketa Israelite teachim iumi wanfala barava tru samting: Iumi harvestim samting wea iumi plantim. Bible talem disfala warning for iumi: “No giamanim iufala seleva: Iufala no savve mekful long God. Eni samting man hem plantim, datwan nao bae hem harvestim.” (Galatians 6:7) Sapos iumi plantim nogud samting bae iumi harvestim nogud samting. Olsem example, olketa wea duim dirty fasin bae kasem olketa barava nogud samting wea kamap from kaen living olsem. Man wea duim rong and no repent bae kasem nomoa sorre samting.
21. Hao nao iumi savve harvestim gud samting?
21 So, hao nao iumi savve harvestim gud samting? Iumi savve iusim wanfala simpol tokpiksa for ansarem datfala kwestin. Sapos iu laek for harvestim puteto, waswe, bae iu plantim kasava? Hard tumas! Iu mas plantim samting wea iu laek for harvestim. So, sapos iumi laek harvestim gud samting, iumi mas plantim gud samting. Waswe, iu laek gohed for harvestim gud samting, wea hem nao laef wea mekem iu satisfae distaem and wea garem hope for laef olowe long niu world bilong God? Sapos olsem, iu mas gohed for plantim gud samting long wei for wakabaot witim God and followim olketa raeteous standard bilong hem.
22. Wanem nao samfala samting wea iumi lanem long Hosea chapter 6 go kasem 9?
22 Long Hosea chapter 6 go kasem 9, iumi lanem fofala samting wea savve helpem iumi for wakabaot witim God: (1) Trufala wei for repent bae showaot thru long samting wea man duim, no long toktok nomoa; (2) God no hapi long wei for givim sakrifaes nomoa; (3) Jehovah savve feel sorre taem olketa wea worshipim hem lusim hem; and (4) sapos iumi laek for harvestim gud samting, iumi mas plantim gud samting. Hao nao bae information long last faevfala chapter bilong disfala buk savve helpem iumi for wakabaot witim God?
Wanem Nao Ansa Bilong Iu?
• Hao nao man savve showimaot hem really repent?
• Why nao Dadi bilong iumi long heven no hapi long wei for givim sakrifaes nomoa?
• Hao nao feeling bilong God taem olketa worshiper bilong hem lusim hem?
• Wanem nao iumi mas plantim sapos iumi laek harvestim gud samting?
[Piksa long page 23]
Loyal love bilong Israel hem olsem cloud wea float antap long graon wea kwiktaem lus long morning taem sun kamap
[Piksa long page 23]
Olketa wicked feeling insaed long olketa Israelite hem strong olsem fire insaed oven
[Piksa long page 24]
Why nao Jehovah rejectim olketa sakrifaes bilong pipol bilong hem?
[Piksa long page 25]
For harvestim gud samting, iumi mas plantim gud samting