STUDY 2

Story Long Natural Wei

Luke 6:45a

WANEM FOR DUIM: Story long natural wei and from heart bilong iu. Showimaot iu laek helpem olketa wea lisin long iu.

Prepare gud. Prea and askem God for helpem iu for no fraet, and for storyim gud message bilong iu. Savve gud long olketa main point wea iu laek storyim. Story long toktok bilong iuseleva, and no just readim nomoa toktok wea stap insaed olketa pablikeson.

Sapos iu bae read from Bible or nara pablikeson, practice firstaem mekem iu savve readim gud datwan. Taem iu readim toktok bilong narawan, readim witim feeling, bat no ova tumas.
Story from heart bilong iu. Ting raonem why nao olketa wea lisin long iu need for herem datfala message. Taem iu tingim audience bilong iu and laek helpem olketa, datwan bae showaot long feis and akson bilong iu, and iu bae story kaen long olketa tu.

Showimaot respect taem iu story. Talem olketa word long stret and kliafala wei.
Luk long audience. Hem gud for luk long eye bilong pipol wea iu story witim. Taem iu givim tok, trae for luk long man wanwan, winim wei for lukluk long full audience nomoa.