Kwestin From Reader

Wanem nao iumi lanem long Proverbs 24:⁠27?

Man wea raetem Proverbs talem disfala advaes long wanfala young man: “Planim waka wea iu bae duim long aotsaed, and redyim garden bilong iu. Then bihaen iu mas strongim famili bilong iu.” Wanem nao main point bilong disfala scripture? Man mas redi gud firstaem bifor hem marit and garem pikinini. Hem mas luksavve long waka wea hem mas duim sapos hem disaed for marit and garem pikinini.

Long bifor, samfala taem olketa buk bilong iumi sei datfala scripture minim hasband and dadi mas waka for kasem selen bat hem mas strongim tu famili bilong hem, olsem for lanem olketa abaotem God and Bible. Nomata datwan hem tru and hem nao samting wea Bible talem olketa mas duim, hem no main point bilong disfala scripture. Why nao olsem? Tingim tufala samting hia.

First samting, datfala scripture no story abaotem man wea garem famili finis hem strongim famili bilong hem. Bat hem storyim wei for buildim wanfala haos. Nomata long Hebrew languis olketa transleitim datwan olsem for ‘buildim wanfala haos,’ long tokpiksa wei hem savve minim for startim wanfala famili olsem for man marit and garem olketa pikinini.

Mek-tu samting, datfala scripture mekhae long wei for duim samting long stretfala wei. Hem nao “for man duim wanfala samting firstaem, then bihaen hem duim nara samting.” Sapos olsem, waswe, datfala scripture talem for iumi mas firstaem duim samting for kasem need bilong iumi and bihaen nao iumi duim samting wea God talem? Barava nomoa!

Long bifor, sapos man laek for marit and garem pikinini, hem mas tingim diswan firstaem: ‘Waswe, mi fit for lukaftarem waef bilong mi and sapotim hem and eni pikinini wea maet mitufala garem bihaen?’ Taem hem no marit yet, hem mas waka long garden. Dastawe Today’s English Version Bible transleitim datfala scripture olsem: “No buildim haos bilong iu and startim famili sapos iu no redyim firstaem garden bilong iu and garem waka for kasem selen.” Waswe, toktok hia fitim distaem tu?

Ia. Man wea laek marit mas redi gud firstaem bifor hem marit. Sapos hem fit for waka, hem mas waka nao. Man mas waka hard for provaedem wanem famili needim, bat Bible talem hao man mas tingim feeling bilong narawan long famili and duim olketa samting for helpem olketa worshipim Jehovah tu. Sapos nomoa, pipol wea no biliv long God gud winim hem! (1 Tim. 5:⁠8) Dastawe taem wanfala young man tingting for marit and garem pikinini, hem gud for hem ting raonem olketa kwestin hia: ‘Waswe, mi fit for provaedem wanem famili needim? Waswe, mi redi for kamap hed long famili and helpem famili for worshipim Jehovah? Waswe, bae mi evritaem duim famili study witim waef and olketa pikinini?’ Bible talem hem important tumas for hasband duim olketa samting hia.​—⁠Deut. 6:​6-8; Eph. 6:⁠4.

So young man wea laek marit mas ting raonem gud Proverbs 24:27. Young gele wea laek marit tu mas duim olsem. Hem gud for hem tingim sapos hem redi for duim waka bilong waef and mami. Young hasband and waef savve ting raonem olketa semkaen kwestin tu taem tufala tingting for garem pikinini. (Luke 14:28) Taem pipol bilong God followim kaonsel olsem long Bible, olketa bae no kasem staka nogud samting bat famili bilong olketa bae hapi.

[Piksa long page 12]

Wanem nao olketa kwestin abaotem marit wea wanfala young man mas ting raonem?