STUDY 11

Story Witim Feeling

Rome 12:11

WANEM FOR DUIM: Story witim feeling for mekem audience interest long story and muvim olketa for followim wanem iu talem.

Tinghae long information. Taem iu preparem tok bilong iu, tingting gud abaotem why nao datfala information hem important. Savve gud long information wea iu bae storyim, mekem iu savve story from heart.
Tingim audience bilong iu. Ting raonem hao information wea iu bae readim or teachim bae helpem olketa narawan. Ting raonem wanem iu savve talem for helpem audience luksavve long gud samting olketa savve kasem from datfala information.
Mekem story hem laef. Mekem story interesting and story witim feeling. Olketa akson bilong iu and lukluk long feis shud showimaot feeling bilong iu.

Keakea nogud iu start for iusim sem akson evritaem gogo hem kamap wei bilong iu, then audience bae tingim datwan nomoa. Iusim olketa akson wea fitim wanem iu storyim. Hem gud for story witim feeling taem iu storyim olketa main point or iu laek for encouragem audience for duim samting. Bat no trae for duim datwan for full tok bikos bae hem ova tumas and audience bae lus interest.