Word Bilong Jehovah Hem Laef
Olketa Main Point From Buk Bilong Proverbs
KING SOLOMON bilong Israel bifor “savve talem thri thousand wisefala toktok.” (1 Kings 4:32) Waswe, iumi savve readim olketa wise toktok bilong hem? Ia. Solomon raetem plande long olketa wisefala toktok bilong hem insaed Bible buk bilong Proverbs wea olketa finis for raetem long samting olsem 717 B.C.E. Tufala last chapter bilong datfala buk nomoa tufala difren man raetem—Agur son bilong Jakeh and King Lemuel. Bat samfala sei Lemuel hem nara nem bilong Solomon nomoa.
Olketa toktok bilong God wea stap insaed buk bilong Proverbs hem garem tufala goal—“for man savve long wisdom and discipline.” (Proverbs 1:2) Toktok hia helpem iumi for garem wisdom, wea hem nao for garem fasin for luksavve and for iusim datfala savve for deal witim olketa problem. Iumi kasem tu discipline and training saed long fasin from olketa wise toktok hia. Wei for tingting strong long olketa wise toktok hia and followim advaes bilong olketa savve affectim heart bilong iumi, wea savve mekem iumi hapi, and garem gudfala laef.—Hebrews 4:12.
‘KASEM WISDOM AND HOL STRONG LONG DISCIPLINE’
Solomon hem sei: “Trufala wisdom gohed for singaot big long road.” (Proverbs 1:20) Why nao iumi shud lisin long laod and klia voice bilong wisdom? Plande gud samting wea man savve kasem from wei for kasem wisdom, hem stap long Chapter 2. Chapter 3 storyim wei wea man savve fren gud witim Jehovah. Then Solomon hem sei: “Wisdom hem main samting. Kasem wisdom; and witim evri samting wea iu kasem, kasem wei for minim samting. Hol strong long discipline; no lusim.”—Proverbs 4:7, 13.
Wanem nao bae helpem iumi for stand strong againstim olketa nogud fasin bilong disfala world? Proverbs chapter 5 hem ansa olsem: Iusim gudfala tingting, and luksavve long olketa wei bilong world wea savve switim iumi. And tu, tingim olketa barava nogud samting wea kamaot from wei for duim dirty fasin. Nextfala chapter hem warnim iumi long olketa nogud fasin and tingting wea savve spoelem wei wea iumi fren witim Jehovah. Long Chapter 7 iumi lane abaotem nogud wei bilong samwan wea duim dirty fasin from samting wea Solomon barava lukim. Chapter 8 storyim long interesting wei hao wisdom hem important and hem samting wea man barava laek for garem. Chapter 9 hem endim olketa wise toktok wea stap long chapter 1 go kasem chapter 8 witim wanfala nambawan tokpiksa wea savve muvim iumi for aftarem wisdom.
Ansa for Olketa Bible Kwestin:
1:7; 9:10—Long wanem wei nao wei for fraet long Jehovah hem “start bilong savve” and “start bilong wisdom”? Sapos man no fraet long Jehovah hem no garem savve, from Jehovah nao Man wea wakem evri samting and hem nao givim kam Bible. (Romans 1:20; 2 Timothy 3:16, 17) Evri trufala savve kam from Jehovah. Dastawe, wei for respectim and fraet long Jehovah hem start bilong savve. And tu, wei for fraet long God hem start bilong wisdom, bikos sapos man no garem savve bae hem no garem wisdom tu. And tu, man wea no fraet long Jehovah bae no iusim savve wea hem garem for honorim Creator.
5:3—Why nao Proverbs kolem wanfala jury woman, “wanfala woman wea hem stranger”? Proverbs 2:16, 17 storyim wanfala “woman wea hem stranger” olsem samwan “wea forgetim covenant bilong God bilong hem.” Eniwan wea worshipim olketa false god or no laek followim Law bilong Moses, wea insaed diswan hem wanfala jury tu, hem wanfala stranger.—Jeremiah 2:25; 3:13.
7:1, 2—Wanem nao samfala samting wea insaed “olketa toktok bilong mi” and “olketa komandment bilong mi”? Wanfala samting insaed diswan hem olketa Bible teaching, and tu, hem olketa rul or law wea parents markem for helpem olketa member long famili kasem gud samting. Olketa young wan need for followim olketa rul hia, and tu, followim olketa Bible teaching wea olketa kasem from parents bilong olketa.
8:30—Hu nao datfala “nambawan wakman”? Disfala wei for storyim wisdom olsem wanfala man hem no for explainim olketa difren samting abaotem wisdom, bat long tokpiksa wei diswan hem minim firstborn son bilong God, Jesus Christ. Bifor hem kam long earth, ‘Jehovah wakem hem olsem start bilong wei bilong Hem.’ (Proverbs 8:22) From hem nao wanfala “nambawan wakman,” hem barava waka witim Dadi bilong hem for creatim evri samting.—Colossians 1:15-17.
9:17—Wanem nao “wata wea olketa stealim,” and why nao hem “swit”? From Bible markem wei for enjoyim sex insaed marit olsem wei for drinkim klinfala wata from wanfala well, wata wea olketa stealim hem piksarem wei wea man duim sex long wei wea haed witim samwan wea hem no maritim. (Proverbs 5:15-17) Wei wea olketa tingse no eniwan bae faendaot long samting wea olketa duim, mekem datfala wata hem olsem samting wea swit long olketa.
Olketa Leson for Iumi:
1:10-14. Iumi shud careful for no letem olketa nogud wei bilong olketa sinner switim iumi thru long wei wea olketa promisim iumi for kasem richfala samting.
3:3. Iumi shud barava tinghae long loving-kaeness and wei for tok tru, and mekem nara pipol lukim hao iumi garem olketa fasin hia olsem wei for showim wanfala nekles wea garem hae price. Iumi need tu for putim olketa fasin hia insaed heart bilong iumi, and mekem olketa kamap barava part long laef bilong iumi.
4:18. Long isisi wei spiritual savve hem kakamap moa big. Iumi mas gohed for showimaot hambol fasin and kwaet fasin mekem iumi gohed for stap long laet.
5:8. Iumi mas stap klia long eni samting long music, hapitaem, Internet, or olketa buk and magasin wea savve pullim iumi for duim nogud samting.
5:21. Waswe, man wea lovem Jehovah bae changem wei wea hem fren witim trufala God witim wei for hem enjoyim samting wea rong for tu-thri minute nomoa? Barava nomoa nao! Main samting wea muvim iumi for gohed garem klin fasin hem wei wea iumi savve Jehovah lukim fasin bilong iumi and iumi mas ansa for samting wea iumi duim.
6:1-5. Olketa verse hia garem olketa gudfala advaes abaotem wei for “mekem promis,” wea diswan hem minim for mekem wanfala bisnis agreement wea no wise witim nara pipol! Sapos bihaen iumi lukluk gud long datfala promis wea iumi mekem and luksavve hem no wise, iumi shud stretawe ‘story gud long fren bilong iumi’ and duim samting wea iumi fit for duim for stretem datwan.
6:16-19. Sevenfala samting long disfala list hem garem klosap evri fasin wea no stret. Iumi shud lane for heitim olketa fasin hia.
6:20-24. Taem parents start for trainim young wan taem hem smol yet from Bible, datwan savve protectim hem from trap for foldaon long dirty fasin. Parents shud no slakdaon for givim kaen training olsem.
7:4. Iumi shud mekem kamap moa big wei wea iumi lovem wisdom and fasin for minim samting.
OLKETA WISE TOKTOK FOR LEADIM IUMI
Olketa nara wise toktok bilong Solomon olketa short nomoa. Staka taem olketa wise toktok hia markem wanfala samting witim narafala samting, storyim wei wea samting hem semsem witim nara samting, and wei wea tufala samting hem difren. Olketa toktok hia teachim iumi olketa barava important leson saed long fasin, toktok and tingting.
Start long chapter 10 go kasem 24 hem mekhae long wei for respectim and fraet long Jehovah. “Olketa man bilong King Hezekiah long Judah” olketa copyim olketa wise toktok wea stap long chapter 25 go kasem 29. (Proverbs 25:1) Olketa wise toktok hia teachim iumi wei for depend long Jehovah and olketa nara barava important leson.
Ansa for Olketa Bible Kwestin:
10:6; footnote—Long wanem wei nao ‘mouth bilong olketa wea wicked haedem raf fasin’? Maet diswan hem long wei wea olketa iusim toktok wea here gud for haedem nogud plan bilong olketa for spoelem nara pipol. Or maet from evritaem pipol tok kros long olketa wea wicked, datwan mekem olketa stap kwaet.
10:10—Hao nao “man wea sat eye” kosim narawan for feel pain? “Wanfala iusles man” maet talem olketa “toktok wea no tru,” bat tu, maet hem trae for haedem olketa samting wea muvim hem for duim samting witim akson long body, olsem wei for “sat eye.” (Proverbs 6:12, 13) Diskaen wei for trikim man savve barava mekem man wea hem trikim kasem bigfala hevi.
10:29—Wanem nao “wei bilong Jehovah”? Diswan hem story abaotem wei wea Jehovah deal witim olketa man, hem no storyim wei wea iumi shud followim long laef. Wei wea God deal witim olketa man hem minim nogud samting for olketa wea wicked, bat protection for olketa man wea duim stret samting.
11:31—Why nao reward bilong man wea wicked hem winim reward bilong man wea raeteous? Reward hia hem panis wea fitim samting wea each wan duim. Reward wea raeteous man kasem taem hem duim rong samting hem discipline. Man wea wicked hem min for duim sin and hem no willing for duim gud samting. Dastawe hem fit for kasem barava big panis.
12:23—Long wanem wei nao man “haedem savve”? For man haedem savve hem no minim man barava no showimaot savve wea hem garem. Bat, hem minim man iusim datfala savve long wisefala wei, and no tok praod abaotem datwan.
14:17—Long wanem wei nao “pipol heitim man wea garem gudfala tingting”? Hebrew toktok wea olketa transleitim “gudfala tingting” savve minim fasin for luksavve or tingting wea wicked. Hem tru, pipol heitim man wea garem tingting wea wicked. Bat pipol heitim tu man wea garem fasin for luksavve and wea garem gudfala tingting and wea chus for “no part bilong world.”—John 15:19.
18:19—Hao nao ‘wanfala brata wea samwan sin againstim hem strong winim wanfala strong taon’? Kaen man olsem hem olsem wanfala strong taon wea army kam for attakim, long wei wea hem barava no willing for forgivim mistek bilong nara man. Wei wea hem and narawan feel nogud long each other savve kamap barava olsem “iron door bilong wanfala taoa” wea minim wei wea tufala feel nogud long each other hem barava stopem tufala for stretem datwan, long sem wei wea iron door stopem man for go insaed taoa.
Olketa Leson for Iumi:
10:11-14. For narawan kasem encouragement from toktok bilong iumi, iumi shud evritaem kasem stretfala savve, love mas muvim heart bilong iumi, and wisdom nao bae disaedem wanem iumi talem.
10:19; 12:18; 13:3; 15:28; 17:28. Iumi shud tingting bifor iumi talem samting, and no toktok tumas.
11:1; 16:11; 20:10, 23. Jehovah laekem iumi for honest saed long bisnis.
11:4. Hem krangge samting for letem wei for aftarem material samting mekem iu no garem inaf taem for duim Bible study seleva, attendim olketa meeting, prea, and field ministry.
13:4. Hem no inaf for ‘barava laek’ for kasem responsibility long kongregeson or for kasem laef long niu world, bat iumi mas waka hard for kasem olketa mark wea fitim datwan.
13:24; 29:15, 21. Mami or dadi wea lovem pikinini bilong hem bae no givim nomoa eni samting wea pikinini laekem or no wari long olketa wik point bilong hem. Bat, mami or dadi bae duim samting for stretem pikinini bifor olketa wik point hia barava kamap wei bilong hem.
14:10. From plande taem iumi bae faendem hem hard for talemaot really feeling bilong iumi and maet plande taem olketa narawan no minim iumi, comfort wea iumi kasem from pipol maet no evritaem helpem iumi. Maet iumi need for depend long Jehovah nao for helpem iumi deal witim samfala hard taem wea iumi kasem.
15:7. Olsem wanfala man wea waka long farm hem no torowem evri seed bilong hem long wanfala ples nomoa, hem no wise tu for stretawe talem evri samting wea iumi savve long narawan. Man wea wise hem talemaot savve bilong hem long isisi wei long taem wea fitim.
15:15; 18:14. Wei for evritaem tingim gud saed bilong samting bae helpem iumi for hapi nomata iumi kasem olketa barava hard taem.
17:24. Iumi mas no olsem “man wea stupid,” wea lukluk and tingting long samting wea no wise and no tingim olketa important samting, bat iumi mas aftarem savve mekem iumi duim samting long wisefala wei.
23:6-8. Iumi mas evritaem careful long eniwan wea showimaot kaenfala fasin long iumi bat really hem duim datwan for ososo long iumi.
27:21. Wei wea iumi ting long praise wea iumi kasem showimaot wanem kaen man nao iumi. Iumi showimaot iumi hambol sapos datfala praise wea iumi kasem muvim iumi for luksavve and talem hao really Jehovah nao mekem iumi fit for kasem datfala praise and datwan encouragem iumi for gohed servem hem. Taem praise hem mekem iumi tingse iumi winim olketa narawan, datwan showimaot iumi no hambol.
27:23-27. Wei wea olketa wise toktok hia hem iusim olketa example abaotem samting wea wanfala farmer savve duim, hem mekhae long wei for garem simpol laef wea mekem man satisfae taem hem waka hard. Olketa shud strongim long iumi hao iumi need for depend long God.a
28:5. Sapos iumi “lukaotem Jehovah” thru long wei for prea and studyim Word bilong hem, iumi “savve minim evri samting” wea iumi need for savve mekem hem hapi long worship bilong iumi.
‘BARAVA IMPORTANT MESSAGE’
Bible buk bilong Proverbs hem finis witim tufala ‘barava important message.’ (Proverbs 30:1; 31:1) Thru long wei for markem samting witim olketa nara samting for mekem man tingting gud, Agur storyim greedy fasin bilong wanfala man wea hard for hem satisfae and hao wei wea hem switim wanfala young gele hem hard for eniwan luksavve hem duim datwan.b Hem warnim iumi tu for no mekhae long seleva or for tok raf.
Important message wea Lemuel kasem from mami bilong hem garem gudfala advaes saed long wine and alcohol, and tu, for judgem olketa samting long raeteous wei. Datfala story abaotem gudfala waef hem finis witim disfala toktok: “Givim hem frut bilong waka bilong hand bilong hem, and waka bilong hem bae praisem hem.”—Proverbs 31:31.
Kasem wisdom, acceptim discipline, mekem grow wei for fraet long God, depend long Jehovah. Olketa wisefala toktok hia barava teachim iumi olketa nambawan leson! Hem barava gud for iumi followim advaes bilong olketa and kasem hapi bilong “man wea fraet long Jehovah.”—Psalm 112:1.
[Olketa footnote]
a Lukim The Watchtower bilong August 1, 1991, page 31.
b Lukim The Watchtower bilong July 1, 1992, page 31.
[Piksa long page 14]
Evri trufala savve kam from Jehovah
[Piksa long page 16]
Wanem nao hem minim for “torowem go savve long evri ples”?