Helpem Young Pipol Ranawe From “Death Culture”

Why nao young pipol distaem interest tumas long subject bilong dae? Henry Hyde, member bilong gavman long state bilong Illinois, U.S.A., hem sei: “Wanfala spiritual hol hem stap insaed olketa young pipol hia wea death culture and raf fasin nao fulimap.”

WANFALA man wea readim Time magasin hem raet olsem: “Parents wea lesy, raf hapitaem and wei for no garem faondeson long fasin and spiritual saed nao kosim disfala death culture midolwan olketa young pipol distaem.”

Wei for feel lonely hem nara big problem wea affectim olketa young wan. Samfala kam from famili wea dadi and mami waka and no stap long haos full day; olketa narawan garem wanfala parent nomoa. Wanfala buk sei olketa young wan long United States stap for 3.5 hour seleva evriday and taem wea olketa spendem witim parents evri week hem 11 hour smol winim olketa young wan long 1960’s. Tru nao, parents bilong samfala young wan no stap witim olketa or givim saport long saed bilong feeling.

Wanem Parents Savve Duim

From young pipol stragol witim disfala “spiritual hol,” hao important nao waka bilong parents? Parents wea wise luksavve hao long wansaed, pikinini bilong olketa needim gudfala hapitaem and long narasaed, olketa needim saport evritaem. From loving interest wea parents garem, tufala savve story witim pikinini abaotem wanem olketa laekem saed long music, television program, video, buk, video game, and movie. Nomata young pipol maet no talemaot, planti long olketa barava laekem love and gaedens from parents bilong olketa. Olketa needim stretfala ansa bikos olketa stap insaed world wea fulap witim wei for no sure. Olketa wea full-grown shud luksavve hao olketa pikinini feisim wanfala world wea moa hard winim taem olketa seleva young.

Parents wea laek for protectim pikinini bilong olketa bae story witim olketa evritaem, really lisin long olketa, and warnim olketa long eni danger bilong living distaem. Taem parents markem spialaen and semsem evritaem bat long semtaem balance and showimaot feeling long pikinini bilong olketa, olketa savve kasem gud samting.—Matthew 5:37.

Olketa Jehovah’s Witness parents trae for story evritaem witim pikinini bilong olketa long Bible and Bible pablikeson and video.a Olketa iusim kaen taem olsem, no for hotem pikinini bilong olketa, bat for storyim olketa subject wea buildimap olketa long spiritual wei. Taem famili hipap olsem, parents lisin long olketa problem and challenge wea affectim evri pikinini bilong olketa mekem olketa young wan hia savve kasem help wanwan.

Young pipol wea no kasem eni spiritual gaedens from parents savve kasem strong from Psalm 27:10, wea sei: “Sapos dadi bilong mi and mami bilong mi lusim mi, Jehovah nao bae keepim mi.” Hao nao Jehovah, dadi bilong kaenfala mercy, hem helpem young pipol? Olketa kongregeson bilong Olketa Jehovah’s Witness they olsem wanfala sef ples wea planti faendem love from nara pipol and kasem ansa for evri daot bilong olketa. Josías, wanfala young man wea faendem diswan hem tru, hem sei: “Organization bilong Jehovah duim wanfala important waka. Mi bin feel laef hem iusles. Laef bilong mi no garem mining, no garem hope bifor. For savve mi no stap seleva hem changem full laef bilong mi. Mi faendem long olketa brata insaed kongregeson famili wea mi lusim. Olketa elder and olketa famili insaed kongregeson olsem wanfala anka long saed bilong feeling.”

Tru nao, health bilong planti young wan saed long mind and spiritual kamap moabeta taem olketa evritaem attendim olketa kongregeson meeting bilong Olketa Jehovah’s Witness. Woman wea studyim living bilong man, Patricia Fortuny sei olsem abaotem disfala gud samting long story bilong hem Los Testigos de Jehová: una alternativa religiosa para enfrentar el fin del milenio (Olketa Jehovah’s Witness: Religion for Feisim End Bilong Millennium): “Olketa Jehovah’s Witness offerim barava klia system wea followim order long evriday living, wanfala system bilong olketa law wea leadim tingting and akson.” Datfala “system wea followim order” and “law” wea hem storyim kam from Bible. Dastawe, nomata Olketa Jehovah’s Witness feisim olketa sem problem and hevi olsem olketa neiba, olketa kasem strong from spesol wisdom bilong datfala old buk. Tru nao, olketa Witness faendem sef ples long olketa klia teaching and principle wea stap insaed long Bible.

Taem “Dae Bae Nomoa”

Teaching wea kamaot insaed olketa Kingdom Hall bilong Olketa Jehovah’s Witness hem strongim moa and moa promis bilong God for wanfala niu world wea klosap for start, wea “raeteous fasin bae stap” and wea “no eniwan bae mekem olketa seksek.” (2 Peter 3:13; Micah 4:4) And tu, profet Isaiah sei God “bae finisim dae evribit, and Sovereign Lord Jehovah bae aotem evri krae from evri feis.” Dae hem kasem olketa man from sin bilong first man, Adam, bat promis bilong God hem for klosap nao “dae bae nomoa.”—Isaiah 25:8; Revelation 21:3, 4; Romans 5:12.

Sapos iu wanfala young wan wea lukaotem help, mifala invaetem iu for faendem hope and reason for laef, thru long olketa page bilong Bible. Witim help bilong Olketa Jehovah’s Witness, iu savve garem hope hao olketa best taem long living stap yet front long iumi insaed niu world wea God promisim.

[Footnote]

[Piksa long page 9]

Parents shud tek taem for barava lisin long pikinini and minim problem bilong olketa

[Piksa long page 10]

“Olketa Jehovah’s Witness offerim barava klia system wea followim order long evriday living”