Man wea Wise Laek for “Followim Stretfala Wei”
Samfala pipol sei laef hem olsem wanfala gogo long ship. Nomata olsem, wisdom bilong olketa man hem no evritaem helpem pipol long datfala gogo. From staka pipol no savve deal witim olketa hard samting long laef, olketa olsem ship wea hem rek long raf sea. (Ps. 107:23, 27) Why nao hem fitim for comparem laef witim wanfala gogo long sea?
Long bifor, olketa sailor wea gogo long sea mas barava savve gud hao for sail bikos datwan hem savve danger tumas. Man mas kasem training from wanfala sailor wea barava savve gud, wea maet hem man for steerim ship. (Acts 27:9-11) Long staka piksa long bifor kam, olketa drawim man wea steerim ship for luk big winim olketa nara sailor for mekhae long waka bilong hem. For go long open sea olketa sailor mas lane abaotem olketa star, wind, and olketa nara samting for helpem olketa savve wea for go. Taem Bible storyim samfala sailor wea barava savve gud, hem iusim wanfala word wea savve minim “wise.”—Ezek. 27:8; ftn.
Wei for deal witim olketa problem wea iumi feisim distaem hem savve hard tumas olsem wei for gogo long sea bifor. Wanem nao savve helpem iumi?
WANEM NAO BAE HELPEM IUMI FOR “FOLLOWIM STRETFALA WEI”?
Bible hem sei: “Man wea wise bae lisin and kasem moa instruction, and man wea minim samting bae hem savve hao for followim stretfala wei.” (Prov. 1:5, 6) Hebrew toktok wea iumi transleitim “followim stretfala wei” hem toktok wea olketa iusim for story abaotem wei wea kapten steerim ship and savve wea hem garem for steerim followim stretfala wei.
Iumi savve lane for “followim stretfala wei” wea bae mekem iumi garem gudfala laef. Buk bilong Proverbs hem sei iumi mas garem “wei for luksavve,” “wisdom,” and “wei for minim samting.” (Prov. 1:2-6; 2:1-9) Bat iumi needim moa samting tu bikos nogud pipol savve trikim iumi. So hem important tumas for iumi letem God leadim iumi.—Prov. 12:5.
So iumi mas evritaem studyim gud Bible. Datwan bae helpem iumi kasem nambawan savve abaotem Jehovah and Son bilong hem Jesus Christ wea barava followim wei bilong hem. (John 14:9) Iumi kasem staka gudfala instruction long olketa Christian meeting. Iumi savve lane tu from olketa narawan and dadi and mami bilong iumi.—Prov. 23:22.
LUKSAVVE AND MEKEM PLAN
Taem iumi kasem problem hem important tumas for iumi “followim stretfala wei,” olsem kapten mas duim taem ship stap long danger. Sapos iumi no “followim stretfala wei” bikos iumi no savve disaed gud, maet iumi shiprek nao.—Jas. 1:5, 6.
Hebrew toktok wea iumi transleitim “followim stretfala wei” savve minim tu “plan gud.” Bible iusim toktok hia taem hem story abaotem hao for faet insaed war. Hem sei: “Taem iu plan gud bae iu savve hao for faet, and taem plande pipol story tugeta bae olketa win.”—Prov. 20:18; 24:6.
Olsem komanda long army wea planim faet mas luksavve long danger samting, iumi tu mas luksavve long olketa samting wea maet spoelem iumi long spiritual wei. (Prov. 22:3) Olsem example, maet iu need for disaed sapos iu bae acceptim wanfala waka or nara position long waka. Bae iu ting raonem haomas pei iu bae kasem, wea nao datfala waka, and samfala samting moa. Bat iu mas tingim samfala nara samting tu. Waswe, datfala waka hem againstim eni Bible principle? Sapos mi mas duim shift, waswe, bae datwan spoelem taem bilong mi for go long olketa meeting and duim preaching waka?—Luke 14:28-30.
Wanfala Jehovah’s Witness wea nem bilong hem Loretta, hem garem gudfala waka. Taem company wea hem waka long hem redi for muv go long difren ples, olketa boss laek givim hae position long Loretta. Olketa sei: “Chance bilong iu nao ia! Kingdom Hall stap klosap long there tu.” Bat Loretta laek for mekem laef bilong hem simpol mekem hem duim moa samting for Jehovah. Hem luksavve niu position hia bae spoelem taem bilong hem for go long olketa meeting and duim preaching waka. So hem resign, nomata boss sei hem nomoa wakaman wea olketa laekem hem for gohed waka long company. Kam kasem distaem, Loretta regular pioneer for 20 year finis and hem barava sure hem kasem gud samting bikos hem followim wanem Bible talem. Datwan strongim wei wea hem fren witim Jehovah, and hem hapi for helpem samfala narawan for acceptim truth long Bible.
Hem important for dadi and mami mas helpem olketa pikinini for “followim stretfala wei.” For lukaftarem and trainim olketa pikinini hem no for tu-thri year nomoa, and wanem tufala disaed for duim for helpem famili saed long worship and for provaed for famili, bae affectim future bilong evriwan insaed long famili. (Prov. 22:6) Olsem example, dadi and mami savve ting raonem tufala kwestin hia: ‘Waswe, toktok bilong mifala and samting wea mifala duim hem trainim olketa pikinini for mekem olketa wise disison followim wanem Bible talem? Waswe, living bilong mifala trainim olketa for hapi nomoa long simpol laef, and encouragem olketa for strong for duim preaching waka?’—1 Tim. 6:6-10, 18, 19.
Pipol long world tingse bignem or olketa material samting bae mekem man garem gudfala laef, bat datwan hem no tru. King Solomon luksavve long datwan tu. Hem sei: “Gogo olketa wea fraet long trufala God bae kasem gud samting, bikos olketa fraet long hem.” (Eccl. 8:12) Dastawe hem wise for iumi “followim stretfala wei” wea iumi lanem long Bible.—2 Tim. 3:16, 17.
[Piksa long page 30]
Olketa drawim man wea steerim ship for luk big winim olketa nara sailor for mekhae long waka bilong hem
[Credit Line]
Su concessione del Ministero per i Beni e le Attività Culturali. It is forbidden to reproduce or duplicate this image in any way or by any means.