No Tingse Bible Garem Magic Paoa
“TOKTOK bilong God hem laef and hem garem paoa.” (Heb. 4:12) Datfala toktok bilong Paul mekhae long wei wea toktok bilong God savve kasem heart bilong man and hem garem paoa for changem laef bilong man.
Bihaen olketa aposol dae, olketa apostate mekem pipol garem olketa rong idea abaotem paoa bilong toktok bilong God wea stap insaed long Bible. (2 Pet. 2:1-3) Samfala bigman bilong olketa church start for sei Bible garem magic paoa. Wanfala savveman Harry Gamble storyim biliv bilong Origen wea hem wanfala bigman bilong church long mek-thri century. Hem sei Origen tingse wei for man herem nomoa olketa holy word savve mekem hem kasem gud samting. Origen tingse “sapos olketa word wea olketa heathen talem garem magic paoa, masbi olketa word long Bible wea kam from God olketa garem bigfala magic paoa.” John Chrysostom, wea laef long mek-foa century, sei: “Hard for devil go klosap long haos wea wanfala buk bilong Gospel stap.” Hem sei tu samfala hangem long nek bilong olketa samfala toktok from olketa Gospel wea olketa tingse bae protectim olketa. Harry Gamble sei long tingting bilong datfala Catholic bigman Augustine, “sapos hed bilong man soa hem savve putim Gospel bilong John andanit long pilo bilong hem taem hem sleep”! Olketa teaching hia mekem staka pipol long bifor tingse Bible garem magic paoa. Waswe, iu tingse Bible garem magic paoa for protectim iu from olketa nogud samting?
Staka pipol iusim Bible long nara wei wea no stret. Olketa bilivim sapos olketa openem Bible long eni page, first verse wea olketa lukim bae talem olketa wanem olketa need for duim. Olsem example, Harry Gamble sei wantaem Augustine herem wanfala pikinini long nara haos sei: “Tekem and readim, tekem and readim.” Augustine tingse God iusim datfala pikinini for talem hem for openem Bible and readim firstfala scripture wea hem lukim.
Waswe, iu savve long eniwan wea iusim Bible long wei olsem for trae stretem problem wea olketa garem? Hem gud olketa hia laek kasem help from Bible, bat datwan hem no stretfala wei for kasem help from Bible.
Jesus promisim olketa disaepol hem bae sendem holy spirit for helpem olketa for “tingim moa” olketa samting wea hem teachim olketa. (John 14:26) So iumi savve kasem help from Bible long wei for iusim samting wea iumi lanem finis from datwan, no long wei for openem Bible long eni page nomoa.
Plande pipol iusim Bible olsem magic samting bikos olketa tingse datwan bae protectim olketa, stretem problem bilong olketa, or mekem olketa savve long samting wea bae happen long future. Bat Bible tambuim wei for duim magic. (Lev. 19:26; Deut. 18:9-12; Acts 19:19) Bible savve helpem iumi bat iumi mas iusim long stretfala wei. Bible no garem magic paoa. Stretfala savve wea iumi kasem taem iumi studyim Bible nao savve helpem iumi for garem gud laef. Stretfala savve from Bible helpem staka pipol for savve wanem hem stret and no stret, and for lusim rabis wei bilong olketa, garem hapi famili, and for fren gud witim Jehovah God wea givim kam Bible.