Waswe, Iu Tingim Yet?
Waswe, iu readim olketa Wastaoa magasin wea iumi kasem no longtaem go nomoa and ting raonem samting wea iu readim? Trae for ansarem olketa kwestin hia:
Wanem nao savve helpem iumi for kontrolem toktok bilong iumi and no tok spoelem narawan?
Iumi shud lukluk gud long heart bilong iumi. Iumi shud no tok spoelem brata bilong iumi, bat hem gud for ting raonem why nao iumi garem nogud tingting olsem abaotem hem. Maet hem bikos iumi laekem nara pipol for tinghae long samting wea iumiseleva duim and for showimaot iumi gud winim hem. Tingim tu, wei for tok spoelem narawan no savve helpem iumi for stretem eni problem.—8/15, page 21.
Long wanem wei nao Law showimaot tingting bilong God abaotem olketa woman?
Olketa woman long Israel free for disaedem samting, and olketa savve kasem education. Olketa narawan mas respectim olketa woman, and Jehovah protectim raet bilong olketa woman.—9/1, page 5-7.
Wanem nao olketa samting wea no happen yet wea join witim bigfala day bilong Jehovah?
Olketa world leader bae sei “Iumi garem peace and stap gud nao!” Olketa nation bae attakim and distroem Bigfala Babylon. Olketa bae attakim pipol bilong Jehovah. Armageddon bae happen, then Christ bae torowem Satan and olketa demon insaed “datfala hol wea deep tumas.”—9/15, page 4..
Why nao hem gud iumi no savve long barava day and taem wea end bae kam?
From iumi no savve wanem taem nao end bae kam, datwan givim iumi chance for showimaot long Jehovah wanem kaen man nao iumi. Hem givim chance long iumi for mekem heart bilong God hapi. Hem helpem iumi for showimaot iumi no tingim iumiseleva bat iumi laek for duim wanem God laekem, and hem helpem iumi for barava depend long God and traem best for obeyim samting wea Bible talem. And hem helpem iumi for lane from olketa hard samting wea kasem iumi, wea datwan strongim faith bilong iumi.—9/15, page 24-25.
Long wanem wei nao God forgivim and no tingim moa sin bilong man wea repent?
Jehovah sei olsem aboatem olketa wea worshipim hem: “Bae mi no tingim moa sin bilong olketa.” (Jer. 31:34) Jehovah savve forgivim sin bilong man bikos long datfala ransom. Taem hem forgivim iumi and no tingim moa sin wea iumi duim, datwan minim no enitaem moa God bae accusim or panisim iumi for sin wea hem forgivim finis.—10/1, page 21.
Long Revelation 1:16, 20, “sevenfala star” wea stap long raet hand bilong Jesus piksarem hu?
Olketa piksarem olketa anointed elder, bat diswan savve minim tu evri elder long olketa kongregeson.—10/15, page 14.
Long wanem wei nao Jesus showimaot wei for hambol, olsem Isaiah 50:4, 5 hem talem?
Olketa verse hia sei man wea Jehovah “lanem hem hao for story gud” bae “no les for herem hem.” Jesus hem hambol, and hem lisin gud and followim wanem Jehovah teachim long hem. Jesus laekem tumas for lane from Jehovah, and tu, hem lukim wei wea Jehovah hambol taem hem showimaot mercy long olketa man wea sin.—11/15, page 11.