Love blo God Hem Stap for Olowe

1-2. Wat nao wanfala challenge wea staka Christian feisim?

IMAGINIM wanfala boat lo midol lo raf sea. Olketa big maeti wave mekem datfala boat go ap and daon. Olketa wave bae pushim datfala boat lo eni ples, if man no iusim wanfala anka. Datfala anka bae keepim boat hia for stedy and for mekem hem no drift go difren during lo datfala raf sea.

² Taem iu feisim wanfala hard taem wea olsem raf sea, iu maet feel olsem datfala boat. Olketa feeling blo iu savve go ap and daon. Lo wanfala day iu confident dat Jehovah lovem and sapotim iu, next day iu maet even wonder if hem lukim hard taem wea iu feisim. (Ps. 10:1; 13:1) Maet wanfala fren talem toktok for comfortim iu, and iu feel gud for lelebet taem. (Prov. 17:17; 25:11) Bat then olketa daot kam bak moa. Iu maet wonder if Jehovah still lovem iu. So wat nao iu savve iusim olsem anka taem iu deal witim situation olsem? Or hao nao iu savve confident dat Jehovah lovem and sapotim iu and iu gohed for sure lo datwan?

3. Wat nao mining blo “loyal love,” wea Psalm 31:7 and 136:1 storyim, and why nao iumi sei Jehovah hem best example lo diswan? (Lukim tu piksa.)

³ Wanfala samting wea iu savve iusim olsem anka taem iu go thru lo hard taem, hem nao for rememberim loyal love blo Jehovah. (Readim Psalm 31:7; 136:1.) Datfala toktok “loyal love” hem minim strongfala love wea samwan garem for narawan wea mekem hem for gohed faithful lo datfala person for olowe. Jehovah hem best example lo wei for showimaot loyal love. Bible sei “loyal love blo hem big tumas.” (Ex. 34:​6, 7) Bible sei olsem tu abaotem Jehovah: “Loyal love wea iu showim lo evriwan wea kol lo iu hem big tumas.” (Ps. 86:5) So datwan minim, no enitaem Jehovah bae lusim olketa faithful servant blo hem! Taem iumi rememberim dat Jehovah hem loyal, datwan hem olsem anka for iumi taem iumi feisim hard taem wea olsem raf sea.—Ps. 23:4.

TINGIM DAT LOVE BLO JEHOVAH HEM WANFALA MAIN BIBLE TEACHING

4. Storyim example blo wanfala main Bible teaching, and explainim why iumi barava bilivim datwan.

⁴ Nara samting wea hem olsem anka taem iu feisim hard taem, hem for tingim dat love blo Jehovah hem wanfala main Bible teaching. Taem iu herem disfala toktok “main Bible teaching,” wat nao iu tingim? Maet iu tingim olketa tru teaching wea iu lanem from Bible. For example, iu lanem dat nem blo God hem Jehovah, dat Jesus hem spesol Son blo God, olketa wea dae no savve lo eni samting, and earth bae kamap paradaes wei pipol bae laef olowe insaed. (Ps. 83:18; Eccl. 9:5; John 3:16; Rev. 21:​3, 4) Bihaen iu acceptim olketa teaching hia, hem lelebet hard for eniwan tanem tingting blo iu from datwan. Why? Bikos iu luksavve olketa teaching hia hem base lo wat hem tru. Distaem bae iumi storyim hao hem important for tingim dat love blo Jehovah hem wanfala main Bible teaching bikos datwan savve helpem iu for no daotem dat Jehovah kea abaotem iu taem iu feisim hard taem.

5. Describem hao samwan lusim olketa false teaching.

⁵ Taem iu start for studyim Bible, wat nao helpem iu for lusim olketa false teaching? Maet wanfala samting wea helpem iu, hem wei for comparem wat religion blo iu teachim witim wat Bible teachim. Tingim disfala example: Lo bifor maet iu biliv dat Jesus hem Olmaeti God. Taem iu gohed for studyim Bible, maet iu askem iuseleva, ‘Hao, disfala teaching hem really tru?’ Bihaen iu lukim olketa pruv lo Bible, iu savve hao datfala teaching hem no tru. Then iu lusim datfala false teaching and replacem witim disfala truth lo Bible: Jesus hem “firstborn lo evri samting wea God creatim,” hem “spesol Son blo God.” (Col. 1:15; John 3:18) Hem tru, olketa false teaching savve barava “strong olsem taoa” and hem no isi for winim. (2 Cor. 10:​4, 5) Bat afta iu lusim, iu disaed for no go bak moa lo olketa false teaching hia.—Phil. 3:13.

6. Why nao iu barava sure dat ‘loyal love blo Jehovah stap for olowe’?

⁶ Iu savve duim sem samting tu for helpem iu luksavve lo wat Bible teachim abaotem love blo Jehovah. Taem iu feisim hard taem and start for daotem love blo Jehovah, askem iuseleva, ‘Hao, tingting blo mi hem stret?’ Then comparem daot blo iu abaotem love blo Jehovah witim toktok wea stap lo Psalm 136:​1, wea hem theme scripture lo disfala article. Why nao Jehovah sei dat love blo hem “loyal”? Why nao disfala toktok “loyal love blo hem stap for olowe,” hem kamap 26 taems lo disfala psalm? Olsem iumi storyim finis, loyal love blo Jehovah for pipol blo hem, hem wanfala main important Bible teaching wea iumi shud acceptim olsem olketa nara Bible teaching wea iumi kwiktaem for acceptim. So wei for ting dat Jehovah no lovem iu or for tingse iu no important lo hem, hem no tru. Rejectim datfala tingting, olsem wei wea iu disaed strong for lusim olketa false teaching!

7. Storyim samfala example blo olketa scripture wea pruvim Jehovah lovem iumi.

⁷ Staka nara scripture lo Bible pruvim Jehovah lovem iumi. For example, Jesus talem olketa follower blo hem: “Iufala barava important winim staka sparrow.” (Matt. 10:31) Jehovah seleva talem pipol blo hem: “Bae mi strongim iu, ia, mi bae helpem iu, mi bae barava hol strong lo iu witim raet hand blo mi wea duim raeteous samting.” (Isa. 41:10) Lukim hao olketa verse hia barava klia. Jesus no sei ‘Iufala maet important,’ and Jehovah no sei ‘mi maet helpem iu.’ Bat Jesus sei: “Iufala barava important” and Jehovah sei: “Mi bae helpem iu.” If enitaem iu feisim hard taem and daotem love blo Jehovah, olketa scripture olsem bae no just mekem iu feel beta, bat olketa helpem iu for barava savve lo wat hem tru. Toktok lo olketa scripture hia hem base lo wat hem tru. Taem iu prea and ting abaotem olketa toktok hia, datwan bae motivatim iu for talem sem toktok olsem 1 John 4:16 wea sei: “Iumi savve and bilivim datfala love wea God garem for iumi.”a

8. Wat nao iu savve duim if samfala taem iu daotem dat Jehovah lovem iu?

⁸ Bat, hao if samfala taem iu still daotem love blo Jehovah? Comparem hao iu feel witim wat iu savve abaotem Jehovah. Iumi no fit for trustim feeling blo iumi bikos olketa feeling savve laea lo iumi, bat love blo Jehovah hem wanfala tru samting wea Bible storyim. If iumi no bilivim Jehovah lovem iumi, then hem olsem iumi no acceptim dat main quality blo Jehovah hem love.—1 John 4:8.

TINGIM DAT JEHOVAH ‘LOVEM IU TUMAS’

9-10. Wat nao context blo John 16:​26, 27 wea sei: “Dadi hem lovem iufala tumas”? (Lukim tu piksa.)

⁹ Iumi savve lanem nara samting abaotem love blo Jehovah taem iumi ting raonem disfala toktok wea Jesus talem lo olketa follower blo hem: “Dadi hem lovem iufala tumas.” (Readim John 16:​26, 27.) Jesus no talem diswan for mekem olketa disaepol feel gud nomoa. Context blo datfala scripture showim Jesus no story abaotem feeling blo olketa. Bat, hem story abaotem wei for prea.

¹⁰ Jesus talem olketa disaepol for prea thru lo nem blo hem bat no for prea go lo hem. (John 16:​23, 24) Hem important for olketa savve lo datwan. Afta Jesus resurrect, maet olketa disaepol bae laek for prea go lo hem bikos Jesus hem fren blo olketa. Olketa maet ting dat bikos Jesus lovem olketa bae hem willing for herem prea blo olketa, and then hem ask go lo Dadi on behalf lo olketa. Bat, Jesus talem olketa for no ting olsem. Why? Bikos hem sei: “Dadi hem lovem iufala tumas.” Datfala point hem wanfala lo olketa main Bible teaching abaotem prea. Tingim hao datwan savve helpem iu. Taem iu studyim Bible, iu start for savve lo Jesus and lovem hem. (John 14:21) Bat olsem olketa disaepol lo first century, taem iu prea lo God iu savve feel confident bikos iu savve dat ‘hem lovem iu tumas.’ And each taem iu prea lo Jehovah, iu showimaot iu bilivim datfala toktok.—1 John 5:14.

LUKSAVVE WEA NAO DAOT KAM FROM

11. Why nao Satan bae hapi if iumi daotem love blo Jehovah?

¹¹ Wea nao wei for daotem love blo Jehovah hem kam from? Maet iu sei hem kam from Satan, and datwan hem tru. Satan datfala Devil “laekem tumas for kaikaim” iumi, and hem bae hapi tumas if iumi daotem love blo Jehovah. (1 Pet. 5:8) Love nao muvim Jehovah for provaedem ransom, bat Satan laekem iumi for ting dat iumi no fit for benefit from datfala ransom. (Heb. 2:9) Bat if iumi daotem love blo Jehovah, hu nao bae hapi? Satan. And if iumi givap taem iumi kasem hard taem, hu nao hapi? Satan nao bae hapi. Tingim, Satan trae for mekem iumi daotem hao Jehovah lovem iumi. Bat really, Satan nao man wea Jehovah stop for lovem hem. Bat wanfala lo olketa barava “kleva trik” blo Satan, hem nao wei wea hem trae for mekem iumi feel dat Jehovah no lovem iumi and judgem iumi finis. (Eph. 6:11) Taem iumi luksavve lo wat enemy blo iumi trae for duim, iumi savve disaed strong for “againstim Devil.”—Jas. 4:7.

12-13. Hao nao sin wea iumi inheritim savve mekem iumi daotem love blo Jehovah?

¹² Wanfala nara samting savve mekem iumi daotem love blo Jehovah. Wat nao datwan? Hem nao sin wea iumi inheritim. (Ps. 51:5; Rom. 5:12) Sin hem spoelem frenship blo iumi man witim Creator. And hem spoelem tu mind, heart, and body blo iumi.

¹³ Sin mekem olketa feeling blo iumi for konfius olobaot, and iumi savve feel guilty, wari, no sef, and shame. Iumi savve garem olketa feeling hia taem iumi duim wanfala sin. Bat olketa feeling hia savve kamap tu bikos iumi luksavve dat iumi no perfect, and datwan hem barava difren from hao God creatim iumi. (Rom. 8:​20, 21) Olsem wanfala vehicle wea garem flat tyre hem no savve ran gud, iumi pipol wea no perfect hard for barava duim gud olketa samting olsem hao Jehovah designim iumi for duim. Dastawe iumi no sapraes dat samfala taem iumi savve stragol witim wei for daotem love blo Jehovah. If datwan happen, iumi shud remember dat Jehovah hem “God wea duim olketa nambawan samting and olketa man fit for fraet lo [hem]. And [hem] keepim covenant blo [hem] and showim loyal love lo olketa wea lovem [hem] and obeyim olketa komandment blo [hem].”—Neh. 1:5.

14. Hao nao wei for ting raonem ransom helpem iumi for rejectim tingting dat Jehovah hard tumas for lovem iumi? (Romans 5:8) (Lukim tu box “Faet Againstim ‘Paoa wea Sin Garem for Trikim Man.’”)

¹⁴ Hem tru, samfala taem maet iumi feel dat iumi no fit nomoa for Jehovah lovem iumi. And datwan hem tru, iumi no fit, bat datwan nao reason why love blo Jehovah for iumi hem barava spesol. Love blo Jehovah hem no wanfala payment wea iumi kasem bikos lo wat iumi duim. Bat, Jehovah provaedem ransom for kavarem sin blo iumi bikos hem lovem iumi. (1 John 4:10) Remember, Jesus kam for sevem olketa sinner, no perfect pipol. (Readim Romans 5:8.) No eniwan lo iumi savve duim samting lo perfect wei, and Jehovah no expectim iumi for olsem. Taem iumi understandim dat wei wea iumi no perfect hem mekem iumi for daotem love blo Jehovah, datwan helpem iumi for barava disaed strong for rejectim wei for daotem love blo Jehovah.—Rom. 7:​24, 25.

DISAED FOR GOHED LOYAL LO JEHOVAH

15-16. If iumi gohed loyal lo Jehovah, wat nao iumi savve sure lo hem, and why nao olsem? (2 Samuel 22:26)

¹⁵ Jehovah laekem iumi for mekem stret disison for gohed “hol strong lo hem.” (Deut. 30:​19, 20) If iumi duim datwan, iumi savve sure dat hem bae gohed loyal lo iumi. (Readim 2 Samuel 22:26.) If iumi gohed loyal lo Jehovah, iumi savve trustim dat hem bae helpem iumi lo eni situation wea kamap lo laef blo iumi.

¹⁶ Olsem iumi storyim finis, iumi garem staka reason wea olsem anka wea savve helpem iumi for stedy taem iumi feisim hard taem. Iumi savve Jehovah lovem iumi and bae sapotim iumi. Hem nao wat Bible teachim. If enitaem iumi daotem love blo Jehovah, hem gud for ting raonem wat iumi savve hem tru and no focus lo feeling for daot. Iumi laek gohed for barava sure lo disfala main Bible teaching, dat loyal love blo Jehovah hem stap for olowe.