Waswe, Iufala Mas Givim Tithe?

Nomoa, Olketa Jehovah’s Witness no givim tithe. Olketa donation wea pipol givim nao sapotim waka bilong mifala. Wanem nao hem minim for givim tithe, and why nao Olketa Jehovah’s Witness no givim tithe?

Law bilong Moses wea God givim long nation bilong Israel long bifor, hem garem wanfala komand for givim tithe. Taem man givim tithe, datwan minim hem mas givim 1-fala long evri 10-fala samting wea hem ownim. Bat Bible showimaot datfala Law hem for olketa Israelite no olketa Christian.​—Hebrew 7:​5, 18; Colossae 2:​13, 14.

Olketa Jehovah’s Witness no givim tithe, bat olketa duim sem samting wea olketa firstfala Christian duim for sapotim waka bilong olketa. Tufala samting nao sapotim waka bilong mifala. First samting, mifala no kasem pei for preaching and teaching waka wea mifala duim. Mek-tu samting, mifala givim olketa donation for sapotim datfala waka.

Long wei olsem mifala followim instruction wea Bible talem for olketa Christian wea sei: “Evri man mas givim samting followim wanem hemseleva tingim, nogud hem givim samting bat hem no hapi nomoa for givim datwan, or eniwan forcem hem. God hem lovem man wea hapi for givim samting.”​—2 Corinth 9:7.