جون

جدوں پہلی صدی دے کجھ مسیحیاں نے اپنے آپ نُوں نویں حالاتاں مطابق ڈھالیا تے یہوواہ نے اوہناں نُوں برکت دِتی۔ اکثر اوہناں تے ظلم کیتا جاندا سی۔ کدی کدار تے اِنج اوہدوں ہویا جدوں اوہناں نے سوچیا وی نئیں سی۔ ذرا غور کرو کہ پولُس تے برنباس نال اوس ویلے کیہہ ہویا جدوں اوہ لِسترہ دے علاقے چ مُنادی کر رہے سن۔ شروع شروع چ تے لوک اوہناں نُوں بڑی خوشی نال ملے تے اوہناں دے پیغام نُوں سُنیا۔ پر بعد چ مخالفت کرن والے کجھ یہودیاں نے لوکاں نُوں اُکسایا جدی وجہ توں کجھ لوکاں نے پولُس نُوں پتھراں نال ماریا تے اوہنوں مُردہ سمجھ کے چھڈ گئے۔ (‏اعمال 14:‏19‏)‏ پر پولُس تے برنباس دُوجے علاقیاں چ مُنادی کردے رہے۔ ایہدا کیہہ نتیجہ نکلیا؟ بوہت سارے لوک شاگرد بن گئے تے پولُس تے برنباس دِیاں گلاں تے اوہناں دی مثال توں اوہناں دے ہم ایماناں نُوں بڑی ہمت ملی۔ (‏اعمال 14:‏21، 22‏)‏ بوہت سارے لوکاں نُوں ایس لئی فائدہ ہویا کیونکہ پولُس تے برنباس نے ظلم دے باوجود ہمت نئیں ہاری سگوں اوہ مُنادی کردے رہے۔ جے اَسی وی ہمت ہارے بغیر اوس کم نُوں کردے رہواں گے جیہڑا یہوواہ نے سانوں دِتا اے تے اوہ سانوں برکتاں دیندا رہوے گا۔ م23.‏04 ص.‏ 16، 17 پ.‏ 13، 14

بادشاہ داؤد نُوں اپنی زندگی چ بوہت سارے خطرناک دُشمناں دا سامنا کرنا پیا تے اوہنے اکثر یہوواہ کولوں مدد دی اِلتجا کیتی۔ داؤد نُوں ایس گل دا یقین سی کہ یہوواہ اوہدیاں دُعاواں نُوں سُن دا اے تے اوہناں دا جواب دیندا اے۔ تُسی وی ایس گل دا یقین رکھ سکدے او۔ بائبل توں پتہ چلدا اے کہ یہوواہ مشکلاں نُوں برداشت کرن لئی سانوں دَنائی تے طاقت دے سکدا اے۔ ساڈی مدد کرن لئی اوہ کلیسیا دے بھین بھراواں یاں ایہو جہے لوکاں نُوں وی استمال کر سکدا اے جیہڑے حالے اوہدی عبادت نئیں کر رہے۔ ہوسکدا اے کہ یہوواہ ہمیشاں ساڈیاں دُعاواں دا جواب اُنج نہ دَوے جِنج اَسی سوچ رہے ہُنے آں۔ پر اَسی جاننے آں کہ اوہ ساڈیاں دُعاواں دا جواب دے گا ضرور۔ اوہ سانوں صحی وقت تے اوہ سب کجھ دَوے گا جدی سانوں ضرورت اے۔ ایس لئی دُعا کردے رہوو تے ایس گل دا یقین رکھو کہ یہوواہ تواڈی دُعا ضرور سُنے گا۔ بھروسا رکھو کہ اوہ ہُن وی تواڈا خیال رکھے گا نالے نوِیں دُنیا چ اوہ ہر جان‌دار دی خواہش پوری کرے گا۔—‏زبور 145:‏16۔ م23.‏05 ص.‏ 8 پ.‏ 4؛‏ ص.‏ 13 پ.‏ 17، 18

چنگا ہوئے گا کہ تُسی اپنے منصوبے نُوں پورا کرن دے فائدیاں تے غور کرو۔ توانوں اپنے منصوبے نُوں پورا کرن نال کیہڑے فائدے ہون گے؟ جے تُسی ہر روز بائبل پڑھن یاں اپنیاں دُعاواں نُوں بہتر بنان دا منصوبہ بنایا اے تے غور کرو کہ اِنج کرن نال یہوواہ نال تواڈی دوستی کِنّی مضبوط ہو جائے گی۔ (‏زبور 145:‏18، 19)‏ جے تُسی کسے خوبی نُوں نکھارن بارے سوچیا اے تے غور کرو کہ ایہدی وجہ توں دُوجیاں نال تواڈے تعلقات کِنّے چنگے ہو جان گے۔ (‏کُلسّیوں 3:‏14‏)‏ کیوں نہ اِک لسٹ بناؤ تے اوہدے تے لکھو کہ تُسی اپنے منصوبے نُوں کیوں پورا کرنا چاہندے او۔ باقاعدگی نال ایس لسٹ نُوں ویکھو۔ نالے ایہو جہے لوکاں نال وقت گزارو جیہڑے تواڈا حوصلہ ودھان۔ (‏اَمثال 13:‏20)‏ سچ اے کہ کجھ دن ایہو جہے ہوندے نیں جدوں ساڈے اندر اپنے منصوبے نُوں پورا کرن دی زیادہ خواہش نئیں ہوندی۔ پر کیہہ ایہدا ایہہ مطلب اے کہ اَسی ایہنوں پورا کرن دی کوشش نئیں کر سکدے؟ ایہہ گل نئیں اے۔ ساڈے اندر خواہش ہوئے یاں نہ ہوئے، اَسی اپنے منصوبے نُوں پورا کرن لئی کوشش کر سکنے آں۔ سچ اے کہ اِنج کرنا اسان نئیں اے پر ایہدے بڑے چنگے نتیجے نکلدے نیں۔ م23.‏05 ص.‏ 27، 28 پ.‏ 5-‏8

جے سانوں پتہ ہوئے گا کہ اَسی اپنے فیصلیاں دے آپ ذمے‌دار آں تے اَسی اپنیاں غلطیاں نُوں مناں گے، اوہناں نُوں سدھاراں گے تے اوہناں نُوں دہران توں بچ جاواں گے۔ ایہہ کم ساڈی مدد کرن گے کہ اَسی زندگی دی دوڑ چ دوڑدے رہیے۔ جے تُسی کوئی غلط فیصلہ کر بیٹھے او تے ایس گل نُوں سمجھن دی کوشش کرو کہ جو کجھ ہو گیا اے، تُسی اوہنوں بدل نئیں سکدے۔ اپنا وقت تے طاقت پچھتان چ، اپنے آپ نُوں صحی ثابت کرن چ یاں دُوجیاں نُوں اِلزام دین چ ضائع نہ کرو۔ ایہدی بجائے اپنیاں غلطیاں نُوں منو تے صورتحال نُوں بہتر کرن لئی جو کجھ کر سکدے او کرو۔ جے تُسی اپنی کسے غلطی تے شرمندہ او تے خاکساری نال یہوواہ کولوں دُعا کرو، اپنی غلطی نُوں منو تے اوہدے کولوں معافی لئی اِلتجا کرو۔ (‏زبور 25:‏11؛ 51:‏3، 4)‏ اوہناں لوکاں کولوں وی معافی منگو جنہاں دے خلاف تُسی غلطی کیتی اے۔ نالے جے ضروری ہوئے تے بزرگاں کولوں وی مدد لوو۔ (‏یعقوب 5:‏14، 15‏)‏ اپنیاں غلطیاں توں سکھو تے ایہناں نُوں دہران توں بچو۔ اِنج کرن نال تُسی ایس گل دا یقین رکھ سکو گے کہ یہوواہ تواڈے تے رحم کرے گا تے توانوں اوہ مدد دَوے گا جدی توانوں ضرورت اے۔—‏زبور 103:‏8-‏13۔ م23.‏08 ص.‏ 28، 29 پ.‏ 8، 9

یہویدع نے اِک چنگا انسان بنن چ بادشاہ یوآس دی بڑی مدد کیتی۔ ایس وجہ توں بادشاہ یوآس نوجوانی چ یہوواہ نُوں خوش کرنا چاہندا سی۔ پر جدوں یہویدع مر گیا تے یوآس اوہناں سرداراں دی گل سُنن لگ پیا جیہڑے یہوواہ توں دُور ہو چُکے سن۔ (‏2-‏تواریخ 24:‏4، 17، 18)‏ یہوواہ نُوں ایہہ ویکھ کے بڑا دُکھ ہویا۔ پر یہوواہ اپنے نبیاں نُوں اوہناں کول گھلدا رہیا تاکہ اوہ اوہناں نُوں اپنے کول موڑ لیاوے۔ پر اوہناں نے سُنن توں اِنکار کر دِتا۔ اوہناں نے تے یہویدع دے پُتر زکریاہ دی وی گل نہ سُنی جیہڑا نہ صرف نبی تے کاہن سی سگوں یوآس دی پھپھیُ دا پُتر وی سی۔ ایتھوں تک کہ اوہنے زکریاہ نُوں قتل کرا دِتا۔ (‏2-‏تواریخ 22:‏11؛ 24:‏19-‏22)‏ یوآس نے اپنے دل چ یہوواہ دا خوف نئیں رکھیا۔ یہوواہ نے کہیا سی:‏ جیہڑے میری عزت نئیں کردے، اوہناں نال نفرت کیتی جائے گی۔ (‏1-‏سموئیل 2:‏30)‏ ارامیاں دی اِک چھوٹی جہی فوج نے یوآس دی وڈی فوج نُوں ہرا دِتا تے یوآس نُوں بوہت زخمی کر دِتا۔ (‏2-‏تواریخ 24:‏24، 25)‏ یوآس دے اپنے خادماں نے اوہنوں ایس وجہ توں قتل کر دِتا کیونکہ اوہنے زکریاہ نُوں قتل کرایا سی۔ م23.‏06 ص.‏ 18، 19 پ.‏ 16، 17

پولُس کجھ عرصے لئی اِفسس چ رہیا سی تے اوتھے اوہنے لوکاں نُوں خوش‌خبری دا پیغام سنایا سی تے تلیم دِتی سی۔ (‏اعمال 19:‏1،‏ 8-‏10؛‏ 20:‏20، 21‏)‏ پولُس اپنے بھین بھراواں نال بوہت پیار کردا سی۔ ایس لئی اوہ چاہندا سی کہ اوہ یہوواہ دے وفادار رہن۔ اِفسس چ رہن والے مسیحی پہلاں جھوٹھے مذہبی عقیدیاں تے جادو ٹونے دے غلام سن۔ شہر اِفسس دے لوک جنسی بدکاری کرن لئی مشہور سن تے اوہناں نُوں اِنج کرن چ کوئی شرم نئیں آندی سی۔ جدوں شہر دے وڈے وڈے تھیٹراں چ ڈرامے ہوندے سن تے اوہناں چ بے‌ہودہ گلاں کیتیاں جاندیاں سن، ایتھوں تک کہ اوہناں دے مذہبی تہواراں چ وی اِنج ہوندا سی۔ (‏اِفِسیوں 5:‏3‏)‏ ایس شہر دے زیادہ‌تر لوک ”‏بے شرمی دِیاں ساریاں حداں پار“‏ کر چُکے سن۔ جنہاں لفظاں دا ترجمہ ”‏بے شرمی دِیاں ساریاں حداں پار کرنا“‏ کیتا گیا اے، اوہناں دا مطلب اے ”‏سُن ہو جانا۔“‏ (‏اِفِسیوں 4:‏17-‏19‏)‏ صحی تے غلط بارے یہوواہ دے معیار سکھن توں پہلاں اِفسس چ رہن والے مسیحیاں دا ضمیر سُن سی۔ ایس لئی پولُس نے اوہناں نُوں کہیا کہ ”‏اوہناں دی عقل اُتے نھیرا چھایا ہویا“‏ سی تے ”‏اوہ اوس زندگی توں بوہت دُور“‏ سن ”‏جیہڑی خدا وَلّوں مِلدی اے۔“‏ اِفسس چ رہن والے کجھ لوک نھیرے چوں نکل آئے۔ م24.‏03 ص.‏ 20 پ.‏ 2؛‏ ص.‏ 21 پ.‏ 4-‏6

اِک قاضی دے طور تے جدعون نے بڑی محنت نال کم کرنا سی۔ جدوں اوہنے اَدھی رات نُوں مِدیانیاں تے حملہ کیتا تے مِدیانی اپنی جان بچان لئی بھج گئے۔ جدعون نے یزرعیل دی وادی توں لے کے دریائے یردن تک اوہناں دا پچھا کیتا۔ (‏قُضاۃ 7:‏22)‏ کیہہ جدعون نے اوتھے پونچ کے مِدیانیاں دا پچھا کرنا چھڈ دِتا؟ نئیں۔ بھانویں کہ جدعون تے اوہدے 300 ساتھی بوہت تھک گئے سن پر ایہدے باوجود اوہناں نے دریائے یردن نُوں پار کیتا تے مِدیانیاں دا پچھا کردے رہے۔ اخیر اوہناں نے مِدیانیاں نُوں پھڑ لیا تے اوہناں نُوں ہرا دِتا۔ (‏قُضاۃ 8:‏4-‏12)‏ جدعون نُوں ایس گل تے بھروسا سی کہ یہوواہ اوہنوں ہمت دَوے گا تے یہوواہ نے اوہدا بھروسا ٹُٹن نئیں دِتا۔ (‏قُضاۃ 6:‏14، 34)‏ اِک واری جدعون تے اوہدے ساتھی پیدل دو مِدیانی بادشاہواں دا پچھا کر رہے سن جیہڑے اونٹاں تے سوار سن۔ (‏قُضاۃ 8:‏12، 21)‏ پر فیر وی یہوواہ دی مدد نال اوہناں نے مِدیانی بادشاہواں نُوں پھڑ لیا تے جنگ جت گئے۔ جدعون وانگوں بزرگ وی یہوواہ تے بھروسا رکھ سکدے نیں جیہڑا کدی وی نئیں تھک‌دا۔ اوہ اوہناں نُوں ہمت تے طاقت ضرور دَوے گا۔‏‏—‏یسعیاہ 40:‏28، 29‏۔‏ م23.‏06 ص.‏ 6 پ.‏ 14؛‏ ص.‏ 7 پ.‏ 16

اَسی ہر طرحاں دی مشکل دا سامنا کر دے ویلے ثابت‌قدم رہ سکنے آں۔ ایس لئی یہوواہ تے بھروسا کرو۔ ذرا برق دی مثال تے غور کرو جنہوں یہوواہ دِیاں ہدیتاں تے بھروسا کرن توں فائدہ ہویا۔ برق دے زمانے چ اِسرائیلی جنگ لئی تیار نئیں سن۔ اوہناں کول تے ہتھیار وی نئیں سن۔ پر یہوواہ نے برق نُوں کہیا کہ اوہ قنانی فوج دے سردار سیسرا تے اوہدی فوج نال لڑن جائے جنہاں کول بوہت سارے ہتھیار سن۔ (‏قُضاۃ 5:‏8)‏ دبورہ نبِیّہ نے برق نُوں کہیا کہ اوہ پہاڑاں توں اُترے تے میدان چ جا کے سیسرا تے اوہدے 900 رتھاں دا مقابلہ کرے۔ کُھلے میدان چ اِسرائیلیاں لئی تیزی نال اَگے ودھدے ہوئے رتھاں دا مقابلہ کرنا اسان نئیں سی۔ تے برق نُوں وی ایس گل دا پتہ سی۔ پر فیر وی اوہنے اوس ہدیت تے عمل کیتا جیہڑی یہوواہ نے اوہنوں دبورہ نبِیّہ دے ذریعے دِتی سی۔ جیویں ای برق تے اوہدی فوج تبور دے پہاڑ توں تھلے اُتری، یہوواہ نے بوہت تیز مینہ پایا جدی وجہ توں سیسرا دے رتھ چکڑ چ پھس گئے۔ اِنج یہوواہ نے برق نُوں جنگ جتوا دِتی۔ (‏قُضاۃ 4:‏1-‏7، 10، 13-‏16)‏ ایسے طرحاں جدوں اَسی وی یہوواہ دِیاں ہدیتاں تے عمل کراں گے جیہڑیاں اوہ اپنی تنظیم دے ذریعے سانوں دیندا اے تے اوہ سانوں وی کامیابی بخشے گا۔ م23.‏07 ص.‏ 18، 19 پ.‏ 17، 18

نجات حاصل کرن لئی صبر وکھانا بوہت ضروری اے۔ ماضی دے خدا دے بندیاں وانگوں سانوں وی صبر نال خدا دے وعدیاں دے پورا ہون دا اِنتظار کرنا چاہی دا اے۔ (‏عبرانیوں 6:‏11، 12‏)‏ بائبل چ دَسیا گیا اے کہ ساڈی صورتحال اِک کسان وانگوں اے۔ (‏یعقوب 5:‏7، 8‏)‏ اِک کسان بیہہ نُوں بیجن لئی تے ایہنوں پانی دین لئی بوہت محنت کردا اے۔ اوہنوں ایہہ تے نئیں پتہ ہوندا کہ ایہہ کدوں ودھے گا پر اوہنوں ایس گل دا یقین ضرور ہوندا اے کہ اوہ اِک دن ضرور فصل وڈھے گا۔ ایس لئی اوہ صبر نال اِنتظار کردا اے۔ ایسے طرحاں سانوں نئیں پتہ کہ ساڈا ”‏مالک کیہڑے دن آئے گا۔“‏ (‏متی 24:‏42‏)‏ پر فیر وی اَسی محنت نال خدمت کردے رہنے آں۔ اَسی صبر نال اِنتظار کرنے آں تے ایس گل دا یقین رکھنے آں کہ صحی وقت تے یہوواہ اپنے سارے وعدے پورے کرے گا۔ جے اَسی صبر کرنا چھڈ دَواں گے تے ہو سکدا اے کہ اَسی اِنتظار کردے کردے تھک جائیے تے ہولی ہولی یہوواہ توں دُور ہو جائیے۔ شاید اَسی ایہو جہیاں چیزاں دے پچھے بھجن لگ پئیے جنہاں نال سانوں بس تھوڑی دیر دی خوشی مِلدی اے۔ پر جے اَسی صبر نال کم لواں گے تے اَسی آخر تک اپنے ایمان تے ڈٹے رہواں گے تے نجات پانواں گے۔—‏میکاہ 7:‏7۔ م23.‏08 ص.‏ 22 پ.‏ 7

جدوں اَسی دانی‌ایل 2:‏41-‏43 چ لکھی پیشین‌گوئی دا موازنہ مُکاشفہ دی کتاب تے دانی‌ایل دی کتاب چ لکھیاں دُوجیاں پیشین‌گوئیاں نال کرنے آں تے اَسی ایہہ سمجھ جانے آں کہ مورت دے پیر امریکہ تے برطانیہ دی حکومت وَل اشارہ کردے نیں جیہڑی آخری عالمی طاقت اے۔ پیراں چ شامل مٹی عوام وَل اشارہ کردی اے۔ ایس عالمی طاقت بارے دانی‌ایل نبی نے کہیا کہ ایہہ حکومت کجھ مضبوط تے کجھ کمزور ہوئے گی۔ پر ایہہ کمزور کیوں اے؟ کیونکہ جیویں مٹی لوھے دی مضبوطی نُوں گھٹا دیندی اے اونویں ای ایہہ حکومت اپنی عوام دی وجہ توں کمزور اے۔ دانی‌ایل نے وڈی مورت بارے جو کجھ دَسیا، اوہدے توں اَسی بوہت ساریاں خاص گلاں سکھنے آں۔ اِک گل ایہہ کہ امریکہ تے برطانیہ دی عالمی طاقت نے کجھ معاملیاں چ ایہہ ثابت کیتا اے کہ اوہ کِنّی طاقت‌ور اے۔ مثال لئی، امریکہ تے برطانیہ اوہناں مُلکاں وچوں سن جنہاں نے پہلی تے دُوجی عالمی جنگ جتیِ سی۔ پر کیونکہ ایہناں دے شہری اِک دُوجے نال لڑدے نیں تے حکومت دے خلاف آواز چُک دے نیں، ایس لئی ایہہ کمزور وی اے تے ہور کمزور ہوندی جائے گی۔ دُوجی گل ایہہ کہ جدوں خدا دی بادشاہی ساریاں حکومتاں نُوں ختم کرے گی، اوہدوں امریکہ تے برطانیہ دی حکومت ای آخری عالمی طاقت ہوئے گی۔ م23.‏08 ص.‏ 10، 11 پ.‏ 12، 13

کدی کدار داؤد اپنیاں مشکلاں دی وجہ توں بوہت پریشان ہو جاندا سی۔ (‏زبور 18:‏4، 5)‏ پر جدوں اوہ ویکھدا سی کہ یہوواہ اوہنوں پیار کردا اے تے اوہدا خیال رکھدا اے تے اوہ تازہ‌دم ہو جاندا سی۔ یہوواہ اپنے ایس دوست نُوں ہرے ہرے میداناں چ بٹھاندا سی تے اوہنوں راحت دے چشمیاں کول لے جاندا سی۔ ایس وجہ توں داؤد نُوں ہمت مِلدی سی تے اوہ مشکلاں دے باوجود وی یہوواہ دی خدمت کردا رہندا سی۔(‏زبور 18:‏28-‏32؛ 23:‏2)‏ اَج جدوں اَسی مشکلاں دا سامنا کر رہے ہُنے آں تے اَسی وی کہہ سکنے آں کہ ایہہ یہوواہ دی شفقت اے کہ اَسی ہلاک نئیں ہوئے۔ (‏نوحہ 3:‏22؛‏ کُلسّیوں 1:‏11‏)‏ اکثر داؤد دی جان خطرے چ ہوندی سی تے اوہدے بوہت سارے دُشمن سن۔ یہوواہ دی محبت دی وجہ توں اوہ ایہہ محسوس کردا سی کہ اوہ محفوظ اے۔ داؤد ایہہ ویکھ سکدا سی کہ یہوواہ ہر موقعے تے اوہدے نال اے۔ ایس گل توں اوہنوں تسلی مِلدی سی۔ ایس لئی اوہ کہہ سکدا سی:‏ یہوواہ نے میرا سارا ڈر دُور کر دِتا۔ (‏زبور 34:‏4)‏ داؤد بوہت ساریاں گلاں دی وجہ توں ڈردا سی۔ پر یہوواہ دی محبت دی وجہ توں اوہ ایس ڈر تے قابو پا سکیا۔ م24.‏01 ص.‏ 29، 30 پ.‏ 15-‏17

یوآس دے بھیڑے فیصلیاں توں سبق سکھو۔کاہنِ اعظم یہویدع دے مرن توں بعد یوآس نے بھیڑے دوست بنا لئے۔ (‏2-‏تواریخ 24:‏17، 18)‏ اوہ یہوداہ دے ایہو جہے سرداراں دی گل منن لگ پیا جیہڑے یہوواہ نُوں پیار نئیں کردے سن۔ شاید تُسی وی کہوو کہ یوآس نُوں ایہناں لوکاں توں دُور رہنا چاہی دا سی۔ پر اوہنے اِنج نئیں کیتا سگوں اوہنے ایہناں بھیڑے مشورے دین والیاں دی سُنی۔ ایتھوں تک کہ جدوں اوہدی پھپھی دے پتر زکریاہ نے اوہنوں سمجھان دی کوشش کیتی تے اوہنے اوہنوں مروا دِتا۔ (‏2-‏تواریخ 24:‏20، 21؛‏ متی 23:‏35‏)‏ ایہہ کِنّاں وڈا گُناہ تے بے‌وقوفی سی۔ یوآس شروع چ تے یہوواہ دے نال چلیا پر افسوس دی گل اے کہ بعد چوں اوہنے یہوواہ توں مُونہہ موڑ لیا تے اِک قاتل بن گیا۔ اخیر یوآس دے اپنے نوکراں نے ای اوہنوں مار دِتا۔ (‏2-‏تواریخ 24:‏22-‏25)‏ جے اوہ یہوواہ تے اوہناں لوکاں دی گل من‌دا رہندا جیہڑے اوہنوں پیار کردے سن تے اوہدی زندگی کِنّی فرق ہوندی۔ م23.‏09 ص.‏ 9 پ.‏ 6

یسوع نُوں پتہ سی کہ پطرس اوہدا وفادار رہ سکدا اے۔ ایس لئی اوہنے بڑے پیار نال پطرس نُوں کہیا کہ ڈر نہ۔ یسوع نُوں پطرس تے بڑا بھروسا سی تے ایس وجہ توں پطرس دی پوری زندگی بدل گئی۔ بعد چوں پطرس تے اوہدے بھرا اندریاس نے مچھیاں پھڑن دا کاروبار چھڈ دِتا تے یسوع نال مِل کے سارا وقت مُنادی کرن لگ پئے۔ اوہناں دے ایس فیصلے دی وجہ توں یہوواہ نے اوہناں نُوں بوہت برکتاں دِتیاں۔ (‏مرقس 1:‏16-‏18‏)‏ جدوں پطرس یسوع دا شاگرد بنیا تے اوہنوں بوہت ای شاندار تجربے ہوئے۔ اوہنے یسوع نُوں بیماراں نُوں ٹھیک کردیاں، لوکاں چوں بُرے فرشتیاں نُوں کڈھدیاں، ایتھوں تک کہ مُردیاں نُوں زندہ کردیاں وی ویکھیا۔ (‏متی 8:‏14-‏17؛‏ مرقس 5:‏37،‏ 41، 42‏)‏ اوہنے تے اِک رویا چ یسوع نُوں خدا دی بادشاہی دے بادشاہ دے طور تے وی ویکھیا۔ ایہہ اِک ایہو جیہا واقعہ سی جنہوں اوہ ساری زندگی نئیں بُھلیا ہوئے گا۔ (‏مرقس 9:‏1-‏8؛‏ 2-‏پطرس 1:‏16-‏18‏)‏ جے پطرس یسوع دا شاگرد نہ بن‌دا تے اوہ اینے زبردست واقعیاں نُوں نہ ویکھ پاندا۔ یقیناً اوہ ایس گل توں بوہت خوش ہویا ہوئے گا کہ اوہنے اپنے ڈر تے قابو پایا تے اینیاں شاندار برکتاں پان دا موقع نئیں گنوایا!‏ م23.‏09 ص.‏ 21 پ.‏ 4، 5

اپنے پہلے خط چ پطرس رسول نے کہیا:‏ اِک دُوجے نال گُوڑھا پیار کرو۔ ایہو جیہا پیار صرف کجھ گُناہواں نُوں نئیں سگوں بوہت سارے گُناہواں نُوں ڈھک لیندا اے۔ (‏1-‏پطرس 4:‏8‏)‏ ایہہ گل لکھدے ویلے پطرس نُوں شاید اوہ گلاں یاد آئیاں ہون جیہڑیاں یسوع نے اوہنوں معافی بارے سکھائیاں سن۔ اوس وقت پطرس سوچ رہیا سی کہ اوہ بوہت وڈے دل والا اے کیونکہ اوہ اپنے بھرا نُوں سَت واری معاف کرن لئی تیار سی۔ پر یسوع نے اوہنوں تے سانوں ساریاں نُوں ایہہ سکھایا کہ سانوں ”‏ستتر (‏77)‏ وار“‏ معاف کرنا چاہی دا اے یعنی سانوں حساب نئیں رکھنا چاہی دا کہ اَسی کسے نُوں کِنّی واری معاف کیتا اے۔ (‏متی 18:‏21‏)‏ جے توانوں یسوع دی ایس گل تے عمل کرنا مشکل لگدا اے تے ہمت نہ ہارو۔ یہوواہ دے سارے بندے عیب‌دار نیں۔ ایس لئی کدی کدار سانوں ساریاں نُوں معاف کرنا مشکل لگدا اے۔ پر سب توں ضروری ایہہ وے کہ تُسی اپنے بھین یاں بھرا نُوں دِلوں معاف کرن تے اوہدے نال صلح کرن لئی اوہ سب کجھ کرو، جو تُسی کر سکدے او۔ م23.‏09 ص.‏ 29 پ.‏ 12

جدوں یُوناہ مچھی دے ٹیڈھ چ سی تے اوہنوں یقین سی کہ جے اوہ خاکساری نال یہوواہ کولوں دُعا کرے گا تے اوہدے کولوں معافی منگے گا تے یہوواہ اوہدی مدد ضرور کرے گا۔ بعد چ مچھی نے یُوناہ نُوں خشک زمین تے اُگل دِتا۔ ہُن یُوناہ یہوواہ وَلّوں مِلن والی نوِیں ذمے‌داری نُوں پورا کرن لئی تیار سی۔ (‏یُوناہ 2:‏10–‏3:‏4)‏ کیہہ کدی تواڈے نال اِنج ہویا اے کہ تُسی کسے مشکل چ اینے پریشان ہو گئے کہ تواڈے کولوں صحی طرحاں دُعا وی نئیں ہو پا رہی سی؟ یاں تواڈے اندر مطالعیا کرن دی وی ہمت نئیں سی؟ یاد رکھو کہ یہوواہ تواڈی صورتحال نُوں چنگی طرحاں سمجھدا اے۔ ایس لئی بھانویں تُسی دُعا چ زیادہ کجھ نئیں وی کہہ پاندے تے فیر وی تُسی ایس گل دا یقین رکھ سکدے او کہ اوہ توانوں اوہ سب کجھ دَوے گا جدی توانوں لوڑ اے۔ (‏اِفسیوں 3:‏20‏)‏ جے توانوں بیماری یاں کسے ہور پریشانی دی وجہ توں بائبل پڑھنا تے ایہدے تے سوچ وچار کرنا مشکل لگدا اے تے تُسی بائبل یاں کتاباں رسالیاں دی آڈیو ریکارڈنگ سن سکدے او۔ توانوں کوئی گیت سنن تے jw.org تے کوئی ویڈیو ویکھن نال وی مدد مل سکدی اے۔ جدوں تُسی یہوواہ کولوں دُعا کرو گے تے ایہدا جواب حاصل کرن لئی بائبل پڑھو گے نالے یہوواہ وَلّوں مِلن والیاں دُوجیاں سہولتاں نُوں استمال کرو گے تے اوہ توانوں طاقت ضرور دَوے گا۔ م23.‏10 ص.‏ 13 پ.‏ 6؛‏ ص.‏ 14 پ.‏ 9

موسیٰ دے زمانے چ استمال ہون والے خیمے چ دو خاص کمرے ہوندے سن۔ اِک پاک کمرہ تے دُوجا پاک‌ترین کمرہ۔ ایہناں دونواں کمریاں دے وچکار اِک پردہ ہوندا سی۔ بعد چ یروشلم دی ہیکل چ وی ایہہ دو کمرے ہوندے سن۔ (‏عبرانیوں 9:‏2-‏5؛‏ خروج 26:‏31-‏33)‏ پاک کمرے چ سونے دا اِک شمع‌دان، بخور بالن لئی اِک قربان‌گاہ تے نذرانے دِیاں روٹیاں رکھن لئی اِک میز ہوندا سی۔ صرف مسح شُدہ کاہناں نُوں ای پاک کمرے چ جان دی اجازت سی تاکہ اوہ اپنی مُقدس خدمت کر سکن۔ (‏گنتی 3:‏3، 7، 10)‏ پاک‌ترین کمرے چ سونے دا بنیا عہد دا صندوق ہوندا سی جدا اشارہ یہوواہ دی موجودگی وَل سی۔ (‏خروج 25:‏21، 22)‏ پاک‌ترین کمرے چ صرف اعلیٰ کاہن ای جا سکدا سی تے اوہ وی صرف کفارے دے دن۔ (‏احبار 16:‏2، 17)‏ اوہ ہر سال کفارے دے دن اوہناں جانوراں دا خون لے کے پاک‌ترین کمرے چ جاندا سی جنہاں نُوں اوہدے گُناہواں تے پوری قوم دے گُناہواں لئی قربان کیتا جاندا سی۔ وقت آن تے یہوواہ نے ظاہر کیتا کہ خیمے تے جانوراں دِیاں قربانیاں دا اشارہ کیہڑے بندوبست وَل سی۔—‏عبرانیوں 9:‏6، 7‏۔ م23.‏10 ص.‏ 27 پ.‏ 12

خدا دے کلام چ سانوں وار وار ایہہ حکم دِتا گیا اے کہ اَسی ”‏اِک دُوجے نال پیار کریئے۔“‏ (‏یوحنا 15:‏12؛‏ رومیوں 13:‏8؛‏ 1-‏تھسلُنیکیوں 4:‏9؛‏ 1-‏پطرس 1:‏22؛‏ 1-‏یوحنا 4:‏11‏)‏ پیار اِک ایہو جیہا احساس اے جیہڑا ساڈے دل چ ہوندا اے۔ پر کوئی وی انسان ساڈا دل نئیں ویکھ سکدا۔ تے فیر دُوجیاں نُوں ایہہ کیویں پتہ چلے گا کہ اَسی اوہناں نُوں پیار کرنے آں؟ ساڈیاں گلاں تے ساڈے کماں توں۔ اَسی کئی طریقیاں نال اپنے بھین بھراواں لئی محبت ظاہر کر سکنے آں۔ ایہدے لئی ذرا بائبل دِیاں ایہناں ایتاں تے غور کرو:‏ اِک دُوجے نال سچ بولو۔ (‏زکریاہ 8:‏16)‏ ”‏اِک دُوجے نال صلح صفائی نال رہوو۔“‏ (‏مرقس 9:‏50‏)‏ اِک دُوجے دی عزت کرن چ پہل کرو۔ (‏رومیوں 12:‏10‏)‏ اِک دُوجے نُوں قبول کرو۔ (‏رومیوں 15:‏7‏)‏ اِک دُوجے نُوں معاف کرو۔ (‏کُلسّیوں 3:‏13‏)‏ مشکلاں دا بوجھ چُکن چ اِک دُوجے دی مدد کرو۔ (‏گلتیوں 6:‏2‏)‏ اِک دُوجے نُوں تسلی دیندے رہوو۔ (‏1-‏تھسلُنیکیوں 4:‏18‏)‏ اِک دُوجے دا حوصلہ ودھاندے رہوو۔ (‏1-‏تھسلُنیکیوں 5:‏11‏)‏ اِک دُوجے لئی دُعا کرو۔—‏یعقوب 5:‏16‏۔ م23.‏11 ص.‏ 9 پ.‏ 7، 8

ہر روز اَسی کئی ایہو جہے فیصلے کرنے آں جنہاں لئی مضبوط ایمان دا ہونا ضروری اے۔ مثال لئی سانوں دوستاں، بچیاں، تفریح، تلیم، شادی تے نوکری بارے کئی اہم فیصلے کرنے ہوندے نیں۔ایس لئی فیصلہ کردے ویلے سانوں اپنے آپ کولوں پچھنا چاہی دا اے کہ ”‏کیہہ میرے فیصلیاں توں ثابت ہوندا اے کہ مینوں یقین اے کہ ایہہ دُنیا چھیتی ختم ہون والی اے تے ایہدی جگہ خدا دی نوِیں دُنیا قائم ہوئے گی؟“‏ یاں ”‏کیہہ میرے فیصلے ایہو جہے لوکاں ورگے ہوندے نیں جیہڑے نئیں من دے کہ اَسی ہمیشاں تک زندہ رہ سکنے آں؟“‏ (‏متی 6:‏19، 20؛‏ لُوقا 12:‏16-‏21‏)‏ جے اَسی ایس گل تے اپنے ایمان نُوں مضبوط کراں گے کہ نوِیں دُنیا چھیتی آن والی اے تے اَسی چنگے فیصلے کراں گے۔ سانوں کجھ ایہو جہیاں مشکلاں دا وی سامنا کرنا پے سکدا اے جنہاں چ سانوں مضبوط ایمان دی ضرورت ہوندی اے۔ ہو سکدا اے کہ اَسی ظلم دا سامنا کر رہے آں، کافی لمے عرصے توں بیمار آں یاں کسے وجہ توں بے‌حوصلہ ہو گئے آں۔ شاید سانوں لگے کہ اَسی اپنی مشکل نال نبڑ لَواں گے پر جے مشکلاں چھیتی ختم نئیں ہوندیاں تے سانوں اپنے ایمان نُوں مضبوط کرن دی لوڑ اے تاکہ اَسی ایہناں نُوں برداشت کر سکئے تے خوشی نال یہوواہ دی خدمت کردے رہیے۔—‏1-‏پطرس 1:‏6، 7‏۔ م23.‏04 ص.‏27 پ.‏ 4، 5

یہوواہ چاہندا اے کہ اَسی دُعا کرن دے نال نال آپ وی کجھ کریئے۔ مثال لئی، شاید اِک بھرا دُعا چ یہوواہ نُوں کہوے کہ اوہنوں اوہدے کم توں چھٹی مل جائے تاکہ اوہ کنونشن تے جا سکے۔ یہوواہ اوس دُعا دا جواب کیہڑے طریقیاں نال دے سکدا اے؟ ہو سکدا اے کہ یہوواہ اوہنوں دلیری دَوے تاکہ اوہ اپنے مالک نال گل کر سکے۔ پر اوس بھرا نُوں دُعا کرن دے نال نال آپ وی کجھ کرن دی لوڑ اے۔ شاید اوہنوں وار وار اپنے مالک نال گل کرنی پووے یاں اوہنوں کسے ہور دن کم کرنا پووے یاں فیر شاید چھٹیاں دے پیسے کٹانے پین۔ یہوواہ چاہندا اے کہ اَسی اپنے معاملیاں بارے وار وار دُعا کریئے۔ یسوع نے جیہڑی گل کہی اوہدے توں پتہ چلدا اے کہ سانوں ساڈیاں دُعاواں دا جواب فوراً نئیں مل جائے گا۔ (‏لُوقا 11:‏9‏)‏ ایس لئی ہمت نہ ہارو سگوں دِلوں دُعا کردے رہوو۔ (‏لُوقا 18:‏1-‏7‏)‏ جدوں اَسی اِنج کرنے آں تے اَسی ظاہر کرنے آں کہ ساڈے لئی اوہ معاملہ اہم اے۔ نالے اَسی ایہہ وی ظاہر کرنے آں کہ سانوں پورا یقین اے کہ یہوواہ ساڈی مدد کر سکدا اے۔ م23.‏11 ص.‏ 22 پ.‏ 10، 11

یہوواہ نے اپنے دوست ابراہام نال وعدہ کیتا سی کہ اوہدے ذریعے زمین دِیاں ساریاں قوماں برکت پان گیاں۔ (‏پیدائش 15:‏5؛ 22:‏18)‏ کیونکہ ابراہام خدا تے مضبوط ایمان رکھدا سی ایس لئی اوہنوں پورا یقین سی کہ ایہہ وعدہ ضرور پورا ہوئے گا۔ پر جدوں ابراہام تقریباً 100 سال دا سی تے اوہدی بیوی 90 سال دی سی، اوہدوں تک وی اوہناں دا پُتر پیدا نئیں ہویا سی۔ (‏پیدائش 21:‏1-‏7)‏ پر بائبل چ دَسیا گیا اے کہ اپنی امید دی بنیاد تے ابراہام نُوں پکا یقین سی کہ اوہ بوہت ساریاں قوماں دا باپ ہووے گا کیونکہ اوہنوں کہیا گیا سی کہ تیری اولاد بے‌شمار ہوئے گی۔ (‏رومیوں 4:‏18‏)‏ اَسی جاننے آں کہ ابراہام دی ایہہ امید پوری ہوئی۔ اوہدا پُتر اِضحاق پیدا ہویا جدے پیدا ہون دی اوہنوں بڑے لمے چِر توں امید سی۔ پر ابراہام نُوں یہوواہ دے وعدیاں تے ایناں پکا یقین کیوں سی؟ ابراہام دی یہوواہ نال گُوڑھی دوستی سی ایس لئی اوہنوں پکا یقین سی کہ خدا نے جو وعدہ کیتا اے، اوہ ضرور پورا ہوئے گا۔ (‏رومیوں 4:‏21‏)‏ ابراہام دے ایمان دی وجہ توں یہوواہ اوہدے توں خوش سی تے اوہنے اوہنوں نیک ٹھہرایا۔—‏یعقوب 2:‏23‏۔ م23.‏12 ص.‏ 8 پ.‏ 1، 2

جیہڑا بھرا بھروسے دے لائق ہوندا اے، اوہ بڑی محنت نال اپنیاں ساریاں ذمے‌داریاں نُوں پورا کردا اے۔ ذرا یسوع دی مثال تے غور کرو۔ اوہ اپنیاں ذمے‌داریاں بارے لاپرواہ نئیں سی۔ ایہدی بجائے اوہنے جی جان نال اپنیاں اوہناں ذمے‌داریاں نُوں پورا کیتا جیہڑیاں یہوواہ نے اوہنوں دِتیاں سن، اوس ویلے وی جدوں اِنج کرنا اوہدے لئی اسان نئیں سی۔ اوہنوں لوکاں نال پیار سی، خاص کر اپنے شاگرداں نال۔ ایس لئی اوہنے اوہناں واسطے اپنی جان دے دِتی۔ (‏یوحنا 13:‏1‏)‏ یسوع دی مثال تے عمل کردے ہوئے تُسی وی اپنیاں ذمے‌داریاں نُوں جی جان نال پورا کرو۔ جے توانوں نئیں پتہ کہ کسے ذمے‌داری نُوں کیویں پورا کرنا اے تے خاکسار بنو تے کلیسیا دے پُختہ بھراواں کولوں مدد منگو۔ بس اوناں کُو کم نہ کرو جِنّاں کُو ضروری اے۔ (‏رومیوں 12:‏11‏)‏ سگوں اپنی ذمے‌داری نُوں ایہہ سوچ کے چنگی طرحاں پورا کرو کہ ایہہ کم تُسی یہوواہ لئی کر رہے او، انساناں لئی نئیں۔ (‏کُلسّیوں 3:‏23‏)‏ سچ اے کہ تُسی بے‌عیب نئیں او ایس لئی تواڈے کولوں غلطیاں ہون گیاں۔ پر جدوں اِنج ہوئے تے خاکسار رہوو تے اپنی غلطی نُوں منو۔—‏اَمثال 11:‏2۔ م23.‏12 ص.‏ 26 پ.‏ 8

جدوں اَسی بپتسمہ لینے آں تے اَسی یہوواہ دے خاندان دا حصہ بن جانے آں تے سانوں بڑی خوشی ہوندی اے۔ جیہڑے لوک بپتسمہ لے چُکے نیں اوہ داؤد ورگے جذبات رکھدے نیں، جنہے کہیا:‏ خوش اے اوہ انسان جنہوں یہوواہ چُن‌دا اے تے اپنے نیڑے لیاندا اے تاکہ اوہ اوہدے گھر دے ویہڑیاں چ وَسے۔ (‏زبور 65:‏4)‏ یہوواہ ہر کسے نُوں اپنے خاندان چ شامل نئیں کردا۔ اوہ صرف اوہناں دے نیڑے جاندا اے جیہڑے ثابت کردے نیں کہ اوہ اوہدے دوست بننا چاہندے نیں۔ (‏یعقوب 4:‏8‏)‏ جدوں تُسی اپنی زندگی یہوواہ دے ناں کر کے بپتسمہ لیندے او تے تُسی یقین رکھ سکدے او کہ یہوواہ تواڈے اُتے اینیاں برکتاں ورسائے گا کہ توانوں کسے چیز دی کمی نئیں ہوئے گی۔ (‏ملاکی 3:‏10؛ یرمیاہ 17:‏ 8)‏ بپتسمہ تے بس شروعات اے۔ بپتسمہ لین توں بعد تواڈے دل چ ایہہ خواہش پیدا ہوئے گی کہ تُسی اپنی زندگی یہوواہ دے ناں کرن دے وعدے تے پورا اُترو، اوس ویلے وی جدوں توانوں مشکلاں یاں غلط کم کرن دی ازمیش دا سامنا کرنا پیندا اے۔ (‏واعظ 5:‏4، 5)‏ یسوع دے شاگرداں دے طور تے توانوں اوہدی مثال تے اوہدے حکماں تے جِنّاں زیادہ ہو سکے، عمل کرنا اے۔—‏متی 28:‏19، 20؛‏ 1-‏پطرس 2:‏21‏۔ م24.‏03 ص.‏ 8 پ.‏ 1-‏3

جے توانوں تے تواڈے جیون ساتھی نُوں اِک دُوجے نال وقت گزارنا ایناں پسند نئیں اے تے تُسی کیہہ کر سکدے او؟ ذرا اَگ دی مثال تے غور کرو۔ اَگ اِک دم تیز نئیں ہو جاندی سگوں توانوں آہستہ آہستہ اوہدے چ لکڑاں پانیاں پیندیاں نیں۔ ایسے طرحاں تُسی وی شروع چ ہر روز اِک دُوجے نال تھوڑا وقت گزار سکدے او تے فیر ہولی ہولی ایس وقت نُوں ودھا سکدے او۔ ایس گل دا خیال رکھو کہ ایس وقت دے دوران تُسی اوہ کم کرو جیہڑا توانوں دونواں نُوں پسند ہووے۔ (‏یعقوب 3:‏18‏)‏ اِنج دے چھوٹے چھوٹے قدم چُکن نال تُسی ویکھو گے کہ تواڈے وچ محبت فیر توں ودھ رہی اے۔ شادی‌شُدہ زندگی چ اِک دُوجے دی عزت کرنا بوہت ضروری اے۔ ایہہ اوس ہوا وانگوں اے جدی وجہ توں اَگ بلدی رہندی اے۔ جدوں اَگ نُوں ہوا نئیں مِلدی تے ایہہ بجھ جاندی اے۔ ایسے طرحاں جدوں میاں بیوی اِک دُوجے دی عزت نئیں کردے تے اوہناں دی محبت ٹھنڈی پے جاندی اے۔ پر جیہڑے میاں بیوی اِک دُوجے دی عزت کردے نیں، اوہ اِک دُوجے لئی اپنی محبت نُوں قائم رکھدے نیں۔ یاد رکھو کہ ایہہ گل اہم نئیں اے کہ توانوں لگے کہ تُسی اپنے جیون ساتھی دی عزت کردے او سگوں ایہہ گل اہم اے کہ اوہنوں وی اِنج لگنا چاہی دا اے۔ م23.‏05 ص.‏ 22 پ.‏ 9؛‏ ص.‏ 24 پ.‏ 14، 15

بائبل چ اکثر خدا دے بندیاں نے ایہو جہے موقعیاں دا ذکر کیتا جدوں اوہ اپنے دُشمناں یاں دُوجیاں گلاں دی وجہ توں بڑے پریشان سن تے ڈرے ہوئے سن۔ (‏زبور 18:‏4؛ 55:‏1، 5)‏ ایسے طرحاں شاید سانوں اپنے نال پڑھن والیاں، اپنے نال کم کرن والیاں، اپنے گھر والیاں یاں حکومت وَلّوں مخالفت دا سامنا ہو رہیا ہووے۔ یاں شاید سانوں کوئی بیماری ہووے تے سانوں ایس گل دا ڈر ہووے کہ اَسی مر نہ جائیے۔ ایہو جہی صورتحال دا سامنا کردے ویلے شاید اَسی اپنے آپ نُوں ایہو جہے بچے وانگوں سمجھئے جیہڑا اپنے آپ کجھ نئیں کر سکدا۔ ایہو جہے حالات چ یہوواہ ساڈی مدد کیویں کردا اے؟ اوہ سانوں تسلی دیندا اے تے تازہ‌دم کر دا اے۔ ایس لئی ہر روز یہوواہ نال وقت گزارو۔ اِنج کرن لئی تُسی ہر روز دُعا کر سکدے او تے بائبل پڑھ سکدے او۔ (‏زبور 77:‏1، 12-‏14)‏ جدوں توانوں ایہہ عادت پے جاوے گی تے فیر تُسی مشکل وقت چ مدد حاصل کرن لئی یہوواہ تے آس لاوو گے۔ یہوواہ نُوں دَسو کہ تُسی کیہڑیاں گلاں دی وجہ توں پریشان تے ڈرے ہوئے او۔ اوہدا کلام پڑھن نال اوہدی گل سنو تے ویکھو کہ یہوواہ کیویں توانوں تسلی دیندا اے۔—‏زبور 119:‏28۔ م24.‏01 ص.‏ 24، 25 پ.‏ 14-‏16

ایہہ بوہت ضروری اے کہ تواڈے دل چ اپنے منصوبے نُوں پورا کرن دی خواہش ہووے۔ جیہڑا بندہ اپنے منصوبے نُوں پورا کرنا چاہندا اے اوہ اِنج کرن دی کوشش وی کردا اے۔ ساڈے دل چ منصوبے نُوں پورا کرن دی خواہش جِنّی زیادہ ہوئے گی ایہہ اونی چھیتی پورا ہوئے گا۔ تے فیر تُسی کیہہ کر سکدے او تاکہ تواڈے دل چ وی ایہہ خواہش ودھے؟ منصوبے نُوں پورا کرن دی خواہش لئی دُعا کرو۔ یہوواہ اپنی پاک روح دے ذریعے تواڈے دل چ اپنے منصوبے نُوں پورا کرن دی خواہش پیدا کر سکدا اے۔ ایہہ چنگی گل اے کہ کدی کدار اَسی کوئی منصوبہ ایس لئی بنانے آں کیونکہ اَسی جاننے آں کہ سانوں اِنج کرنا چاہی دا اے۔ پر شاید ساڈے دل چ اوہنوں پورا کرن دی خواہش نہ ہوئے۔ یہوواہ نے تواڈے لئی جو کجھ کیتا اے، اوہدے تے سوچ وچار کرو۔ (‏زبور 143:‏5)‏ پولُس ایس گل تے سوچ وچار کردا سی کہ یہوواہ نے اوہدے تے کِنّاں رحم کیتا اے۔ ایس وجہ توں اوہدے دل چ ایہہ خواہش پیدا ہوئی کہ اوہ ہور زیادہ محنت نال یہوواہ دی خدمت کرے۔ (‏1-‏کُرنتھیوں 15:‏9، 10؛‏ 1-‏تیمُتھیُس 1:‏12-‏14‏)‏ ایسے طرحاں جِنّاں زیادہ تُسی ایس گل تے سوچ وچار کرو گے کہ یہوواہ نے تواڈے لئی کیہہ کجھ کیتا اے، اونی زیادہ تواڈے دل چ اپنے منصوبے نُوں پورا کرن دی خواہش ودھے گی۔—‏زبور 116:‏12۔ م23.‏05 ص.‏ 27 پ.‏ 3-‏5

جدوں اَسی اپنے اسمانی باپ دے ناں دی وڈیائی کرنے آں تے اوہ بڑا خوش ہوندا اے۔ (‏زبور 119:‏108)‏ تے کیہہ ایہدا مطلب ایہہ وے کہ خدا عیب‌دار انساناں وانگوں اے جیہڑے اپنی تعریف چاہندے نیں تاکہ ایہدے توں اوہناں دا حوصلہ ودھے؟ ایہہ گل نئیں اے۔ جدوں اَسی اپنے اسمانی باپ یہوواہ دی وڈیائی کرنے آں تے اَسی اوس اِلزام نُوں جھوٹھا ثابت کرنے آں جیہڑا شیطان نے انساناں تے لایا اے۔ شیطان ایہہ دعویٰ کردا اے کہ مشکلاں چ کوئی وی انسان یہوواہ دے ناں دی وڈیائی نئیں کرے گا۔ اوہدے مطابق کوئی وی انسان یہوواہ دا وفادار نئیں اے۔ اوہ ایہہ وی کہندا اے کہ جے سانوں یہوواہ نُوں چھڈن نال کوئی فائدہ حاصل ہوئے گا تے اَسی اوہدے توں مُونہہ موڑ لواں گے۔ (‏ایوب 1:‏9-‏11؛ 2:‏4)‏ پر ایوب نے شیطان نُوں جھوٹھا ثابت کیتا۔ کیہہ تُسی وی یہوواہ دے وفادار رہوو گے؟ اَسی سارے یہوواہ دے ناں دی وڈیائی کر سکنے آں تے وفاداری نال اوہدی خدمت کر کے اوہنوں خوش کر سکنے آں۔ (‏اَمثال 27:‏11)‏ ایہہ واقعی ساڈے لئی بڑے اعزاز دی گل اے۔ م24.‏02 ص.‏ 8، 9 پ.‏ 3-‏5

موسیٰ تے یشوع دے زمانے توں کجھ سالاں بعد یہوواہ نے اپنے لوکاں دی رہنمائی کرن لئی قاضیاں نُوں مقرر کیتا۔ فیر بادشاہواں دے زمانے چ یہوواہ نے نبیاں دے ذریعے اپنے لوکاں دی رہنمائی کیتی۔ جیہڑے بادشاہ یہوواہ دے وفادار سن، اوہناں نے یہوواہ دِیاں اوہناں ہدیتاں نُوں منیا جیہڑیاں اوہنے نبیاں دے ذریعے دِتیاں سن۔ مثال لئی، بادشاہ داؤد نے بڑی خاکساری نال ناتن نبی وَلّوں مِلن والی اِصلاح نُوں قبول کیتا۔ (‏2-‏سموئیل 12:‏7، 13؛ 1-‏تواریخ 17:‏3، 4)‏ بادشاہ یہوسفط نے یحزی‌ایل نبی وَلّوں مِلن والیاں ہدیتاں تے بھروسا رکھیا تے لوکاں نُوں کہیا کہ اوہ یہوواہ دے نبیاں تے یقین کرن۔ (‏2-‏تواریخ 20:‏14، 15)‏ جدوں بادشاہ حزقیاہ بڑا پریشان سی تے اوہنے یسعیاہ نبی کولوں مدد منگی۔ (‏یسعیاہ 37:‏1-‏6)‏ جدوں وی کوئی بادشاہ یہوواہ دی رہنمائی نُوں قبول کردا سی، اوہنوں برکت مِلدی سی تے اوہدی قوم محفوظ رہندی سی۔ (‏2-‏تواریخ 20:‏29، 30؛ 32:‏22)‏ لوک ویکھ سکدے سن کہ یہوواہ اپنے نبیاں دے ذریعے اوہناں دی رہنمائی کر رہیا اے۔ م24.‏02 ص.‏ 21 پ.‏ 8

شیطان چاہندا اے کہ اَسی ایہو جہے لوکاں نال وقت گزارئیے جیہڑے یہوواہ دے معیاراں تے نئیں چلدے۔ سانوں یاد رکھنا چاہی دا اے کہ ساڈے ساتھی صرف اوہ لوک نئیں ہوندے جنہاں نال اَسی آمنے سامنے وقت گزارنے آں سگوں ایہدے چ اوہ لوک وی شامل نیں جنہاں دی ویڈیوز اَسی سوشل میڈیا تے ویکھنے آں یاں اوہناں نال گل کرنے آں۔ شیطان دی دُنیا لوکاں دے اندر ایہہ سوچ پیدا کردی اے کہ بدکار زندگی گزارن چ کوئی حرج نئیں اے۔ (‏اِفِسیوں 4:‏19، 20‏)‏ پر سانوں چنگی طرحاں پتہ اے کہ ایہہ سوچ غلط اے۔ فیر وی اَسی اپنے آپ کولوں پچھ سکنے آں:‏ ”‏کیہہ مَیں پوری کوشش کرنا واں کہ مَیں اپنے نال کم کرن والے، اپنے نال پڑھن والے تے دُوجے ایہو جہے لوکاں نال بِلاوجہ وقت نہ گزاراں جیہڑے یہوواہ دے معیاراں تے نئیں چلدے؟ کیہہ مَیں یہوواہ دے معیاراں تے قائم رہنا واں، فیر بھانویں لوک مینوں سخت ای کیوں نہ کہن؟“‏ 2-‏تیمُتھیُس 2:‏20-‏22 دے مطابق سانوں کلیسیا چ وی دوست بناندے ویلے سمجھداری نال کم لینا چاہی دا اے۔ سانوں یاد رکھنا چاہی دا اے کہ ہر کوئی یہوواہ دا وفادار رہن چ ساڈی مدد نئیں کر سکدا۔ م24.‏03 ص.‏ 22، 23 پ.‏ 11، 12

کیہہ تُسی کدی ایہہ سوچن دی کوشش کیتی اے کہ یہوواہ کیہو جیہا نظر آندا اے؟ ایہہ گل سچ اے کہ اَسی یہوواہ نُوں ویکھ نئیں سکدے پر بائبل چ اوہدے بارے فرق فرق گلاں دَسیاں گئیاں نیں جیویں کہ اوہنوں سورج، ڈھال تے بھسم کر دین والی اَگ کہیا گیا اے۔ (‏زبور 84:‏11؛‏ عبرانیوں 12:‏29‏)‏ ایہدے علاوہ اوہدی موجودگی نُوں نیلم دے پتھر، چمک‌دار دھات تے خوب‌صورت دھنک وانگوں کہیا گیا اے۔ (‏حِزقی‌ایل 1:‏26-‏28)‏ اَسی یہوواہ نُوں ویکھ نئیں سکدے ایس لئی ہو سکدا اے کہ سانوں ایس گل تے یقین کرنا مشکل لگے کہ اوہ ساڈے نال پیار کردا اے۔ کجھ لوکاں نے اپنی زندگی چ بڑیاں تکلیفاں ویکھیاں ہوندیاں نیں ایس لئی اوہناں نُوں لگدا اے کہ یہوواہ اوہناں نُوں پیار نئیں کردا۔ یہوواہ ایہناں سارے احساسات نُوں سمجھدا اے تے اوہ جان‌دا اے کہ ایہناں دا ساڈے تے کیہہ اثر ہوندا اے۔ ایس لئی اوہنے بائبل چ اپنے بارے بوہت کجھ لکھوایا اے۔ بائبل چ دَسیا گیا اے کہ یہوواہ محبت اے۔ (‏1-‏یوحنا 4:‏8‏)‏ اوہ ہر کم محبت دی وجہ توں کردا اے۔ اوہ ایناں محبت کرن والا خدا اے کہ اوہ اوہناں لوکاں لئی وی محبت ظاہر کردا اے جیہڑے اوہنوں پیار نئیں کردے۔—‏متی 5:‏44، 45‏۔ م24.‏01 ص.‏ 26 پ.‏ 1-‏3

یہوواہ نے اِسرائیلیاں نُوں مصر چوں کڈھن لئی موسیٰ نُوں چُنیا تے اوہناں نُوں دن چ رستہ وکھان لئی بدّل دے ستون تے رات چ رستہ وکھان لئی اَگ دے ستون دا بندوبست کیتا۔ (‏خروج 13:‏21)‏ موسیٰ ایہناں ستوناں دے پچھے پچھے ٹُریا تے اوہ تے بنی‌اِسرائیل بحیرۂ احمر دے کول پونچ گئے۔ جدوں لوکاں نُوں لگن لگ پیا کہ اوہ پھس گئے نیں تے اوہ بوہت ڈر گئے کیونکہ اَگے سمندر سی تے پچھے مصریاں دی فوج۔ پر ایہہ کوئی غلطی نئیں سی کیونکہ یہوواہ سوچ سمجھ کے اوہناں نُوں موسیٰ دے ذریعے ایتھے لیایا سی۔ (‏خروج 14:‏2)‏ ایہدے بعد خدا نے بڑے زبردست طریقے نال اپنی قوم نُوں مصریاں توں نجات دَوائی۔ (‏خروج 14:‏26-‏28)‏ ایہدے بعد اگلے 40 سالاں تک موسیٰ بدّل دے اوس ستون تے بھروسا کردا رہیا کہ اوہ ویرانے چ خدا دے لوکاں دی رہنمائی کرے۔ (‏خروج 33:‏7، 9، 10)‏ یہوواہ ایس ستون دے ذریعے موسیٰ نال گل کردا سی تے موسیٰ اوہدیاں ہدیتاں پوری قوم نُوں دَسدا سی۔ اِسرائیلی ایہہ صاف صاف ویکھ سکدے سن کہ یہوواہ موسیٰ دے ذریعے اوہناں دی رہنمائی کر رہیا اے۔ م24.‏02 ص.‏ 21 پ.‏ 4، 5