جولائی

یسوع نے اپنی تلیم تے معجزیاں توں اپنے باپ دی سوچ تے جذبات نُوں ظاہر کیتا۔ (‏یوحنا 14:‏9‏)‏ اَسی یسوع دے معجزیاں توں کیہڑیاں گلاں سکھنے آں؟ یسوع تے اوہدا اسمانی باپ سانوں بوہت پیار کردے نیں۔ جدوں یسوع زمین تے سی تے اوہنے معجزے کر کے لوکاں دِیاں تکلیفاں نُوں دُور کیتا جدے توں ظاہر ہویا کہ اوہنوں انساناں نال بوہت پیار اے۔ اِک موقعے تے دو اَنھے بندیاں نے یسوع کولوں مدد لئی اِلتجا کیتی۔ (‏متی 20:‏30-‏34‏)‏ غور کرو کہ یسوع نُوں اوہناں تے ”‏ترس آیا“‏ تے فیر اوہنے اوہناں نُوں ٹھیک کیتا۔ ایس ایت چ جیہڑے یونانی لفظاں دا ترجمہ ”‏ترس آیا“‏ کیتا گیا اے، اوہ ہمدردی دے اوس احساس وَل اشارہ کردے نیں جیہڑا انسان دے اندروں اُٹھدا اے تے بڑا گُوڑھا ہوندا اے۔ یسوع لوکاں نال پیار کردا سی ایس لئی اوہنوں اوہناں نال ہمدردی سی۔ ایسے وجہ توں اوہنے بُھکھے لوکاں نُوں کھانا کھوایا تے اِک کوڑھی نُوں وی ٹھیک کیتا۔ (‏متی 15:‏32؛‏ مرقس 1:‏41‏)‏ اَسی ایس گل تے پورا یقین رکھ سکنے آں کہ ساڈا رحم‌دل خدا یہوواہ تے اوہدا پُتر سانوں بڑا پیار کردے نیں تے سانوں تکلیف چ ویکھ کے اوہناں نُوں بڑا دُکھ ہوندا اے۔ (‏لُوقا 1:‏78؛‏ 1-‏پطرس 5:‏7‏)‏ ایہدے چ کوئی شک نئیں کہ اوہ دِلوں چاہندے نیں کہ اوہ انساناں دِیاں ساریاں تکلیفاں نُوں ختم کر دین۔ م23.‏04 ص.‏ 3 پ.‏ 4، 5

اَسی پوری کوشش کر سکنے آں کہ اَسی ایہو جہیاں غلط گلاں نُوں نہ تے پڑھئے تے نہ ای سنئے جیہڑیاں شیطان دی دُنیا چ بوہت عام نیں۔ اَسی بائبل پڑھن تے ایہدے تے سوچ وچار کرن نال اپنے ذہن نُوں چنگیاں گلاں نال بھر سکنے آں۔ نالے جدوں اَسی عبادتاں تے جانے آں تے مُنادی کرنے آں تے ساڈی سوچ غلط گلاں توں محفوظ رہندی اے۔ یہوواہ نے وعدہ کیتا اے کہ اوہ سانوں کدی وی کسے ایہو جہی ازمیش چ نئیں پین دَوے گا جیہڑی ساڈی برداشت توں باہر ہووے۔ (‏1-‏کُرنتھیوں 10:‏12، 13‏)‏ ایس آخری زمانے چ یہوواہ دا وفادار رہن لئی سانوں پہلے توں وی زیادہ دُعا کرن دی لوڑ اے۔ اوہ چاہندا اے کہ اَسی اپنے دل دا حال اوہدے سامنے کھول دَئیے۔ (‏زبور 62:‏8)‏ یہوواہ دی وڈیائی کرو تے جو کجھ اوہ تواڈے لئی کردا اے، اوہدے لئی اوہدا شکریہ کرو۔ اوہدے کولوں مدد منگو تاکہ تُسی دلیری نال مُنادی کر سکو۔ مشکلاں توں نبڑن تے ازمیشاں توں بچن لئی اوہدے کولوں مدد دی اِلتجا کرو۔ کسے وی چیز یاں بندے دی وجہ توں دُعا کرنا نہ چھڈو۔ م23.‏05 ص.‏ 7 پ.‏ 17، 18

اَسی عبادتاں تے کیوں جانے آں؟ ایہدی سب توں خاص وجہ ایہہ وے کہ اَسی یہوواہ دی وڈیائی کرنا چاہنے آں۔ (‏زبور 26:‏12؛ 111:‏1)‏ اَسی ایس لئی وی عبادتاں تے جانے آں تاکہ اَسی ایس مشکل دَور چ اِک دُوجے دا حوصلہ ودھا سکئے۔ (‏1-‏تھسلُنیکیوں 5:‏11‏)‏ عبادتاں تے جواب دین نال اَسی ایہہ دونویں کم کر رہے ہُنے آں۔ پر جواب دیندے ویلے شاید سانوں کجھ مشکلاں دا سامنا ہوئے۔ ہو سکدا اے کہ سانوں جواب دین چ گھبراہٹ محسوس ہووے یاں فیر سانوں جواب دینا بڑا پسند ہووے پر ہتھ کھڑا کرن دے باوجود ہر وار ساڈے کولوں جواب نہ پچھیا جائے۔ تے فیر اَسی کیہہ کر سکنے آں؟ پولُس رسول نے کہیا کہ سانوں اپنا دھیان اِک دُوجے دا حوصلہ ودھان تے رکھنا چاہی دا اے۔ جدوں اَسی ایہہ گل سمجھ جانے آں کہ جواب دین نال اَسی اپنے ایمان دا اظہار کر رہے ہُنے آں نالے ساڈے سادے جہے جواب توں وی دُوجیاں دا حوصلہ ودھ سکدا اے تے سانوں جواب دین لئی ہتھ کھڑا کردے ویلے گھبراہٹ نئیں ہوئے گی۔ ایہدے علاوہ جے ساڈے کولوں ہر وار جواب نئیں پچھیا جاندا تے اَسی ایس گل توں خوش ہو سکنے آں کہ دُوجیاں نُوں جواب دین دا موقع مِل رہیا اے۔—‏1-‏پطرس 3:‏8‏۔ م23.‏04 ص.‏ 20 پ.‏ 1-‏3

ایہہ خبر اَگ وانگوں پھیل گئی سی کہ جیہڑے یہودی 70 سال توں بابل چ غلام سن، اوہ ہُن اپنے ملک اِسرائیل واپس جا رہے سن۔ (‏عزرا 1:‏2-‏4)‏ صرف یہوواہ ای ایہہ کم کر سکدا سی کیونکہ بابلی اپنے غلاماں نُوں کدی وی آزاد نئیں کردے سن‏۔‏ (‏یسعیاہ 14:‏4، 17)‏ پر ہُن اِک نویں بادشاہ نے بابل نُوں فتح کر کے ایہدے تے حکومت کرنی شروع کر دِتی سی تے اوہنے یہودیاں نُوں کہیا سی کہ جے اوہ چاہن تے اوہ بابل نُوں چھڈ کے اپنے ملک واپس جا سکدے نیں۔ ہر یہودی خاص کر گھر دے سربراہواں نُوں اِک بوہت ای اہم فیصلہ کرنا سی کہ کیہہ اوہ بابل نُوں چھڈ کے جان گے یاں ایتھے ای رہن گے۔ شاید ایہہ فیصلہ کرنا اسان نئیں سی۔ کجھ یہودی اینے وڈیرے ہو گئے سن کہ اوہ ایناں لما سفر نئیں کر سکدے سن تے زیادہ‌تر یہودی بابل چ ای پیدا ہوئے سن۔ ایس لئی بابل ای اوہناں دا گھر سی۔ اوہ سوچدے سن کہ اِسرائیل اوہناں دا نئیں سگوں اوہناں دے پیو دادیاں دا ملک اے۔ ایہدے علاوہ لگدا اے کہ کجھ یہودی بابل چ رہ کے بوہت امیر ہو گئے سن۔ ایس لئی شاید اوہناں نُوں اپنا گھر بار تے کاروبار چھڈ کے اِک نویں ملک چ جانا مشکل لگ رہیا سی۔ م23.‏05 ص.‏ 14 پ.‏ 1، 2

خدا دے کلام چ سانوں ہلاشیری دِتی گئی اے کہ اَسی اپنے اندر ثابت‌قدمی، ہمدردی تے محبت نُوں پیدا کرن لئی کوشش کردے رہیے۔ جیویں کہ لُوقا 21:‏19 چ لکھیا اے:‏ تُسی آخر تک صبر نال برداشت کر کے اپنی جان بچا سکو گے۔ کُلسّیوں 3:‏12 چ لکھیا اے:‏ ہمدردی دا لباس پاؤ۔ 1-‏تھسلُنیکیوں 4:‏9، 10 چ لکھیا اے:‏ خدا نے توانوں سکھایا اے کہ اِک دُوجے نال پیار کرو۔ پر بھراوو، اَسی تواڈے کولوں اِلتجا کرنے آں کہ اِک دُوجے نال ہور زیادہ پیار کرو۔ ایہہ ساریاں گلاں پہلی صدی دے مسیحیاں نُوں کہیاں گئیاں سن جیہڑے پہلے ای ثابت‌قدمی، ہمدردی تے محبت ظاہر کر رہے سن۔ پر فیر وی اوہناں نُوں ایہناں خوبیاں نُوں نکھاردے رہن دی لوڑ سی۔ سانوں وی اِنج ای کرنا چاہی دا اے۔ پر تُسی ایہناں خوبیاں نُوں کیویں نکھار سکدے او؟ ایہدے لئی سب توں پہلاں ویکھو کہ پہلی صدی دے مسیحیاں نے ایہناں خوبیاں نُوں کیویں ظاہر کیتا۔ فیر تُسی ویکھ سکو گے کہ تُسی اوہناں مسیحیاں وانگوں کیویں بن سکدے او تے ثابت کر سکدے او کہ تُسی وڈی مصیبت لئی تیار او۔ فیر جدوں وڈی مصیبت شروع ہوئے گی تے توانوں پتہ ہوئے گا کہ تُسی مشکلاں چ کیویں ثابت‌قدم رہ سکدے او تے تُسی ثابت‌قدم رہن دے اپنے عزم تے قائم رہ پاؤ گے۔ م23.‏07 ص.‏ 2 پ.‏ 4؛‏ ص.‏ 3 پ.‏ 8

بھانویں اَسی اسمان تے جان دی امید رکھنے آں یاں زمین تے رہن دی، سانوں مُقدس راہ تے چلدے رہنا چاہی دا اے کیونکہ ایہدے تے ٹُرن نال اَسی اَج یہوواہ دی عبادت کر سکاں گے تے ایہہ سانوں اوس بادشاہی تک وی لے کے جائے گی جدے وچ سانوں بوہت ساریاں برکتاں مِلن گیاں۔ (‏یوحنا 10:‏16‏)‏ 1919 توں لکھاں لوکاں نے وڈے بابل یعنی جھوٹھے مذہب نُوں چھڈ دِتا اے تے مُقدس راہ تے چلنا شروع کر دِتا اے۔ یہوواہ نے بابل توں اِسرائیل جان والے یہودیاں دی راہ چوں رُکاوٹاں ہٹا دِتیاں سن۔ (‏یسعیاہ 57:‏14)‏ ساڈے زمانے چ ایس مُقدس راہ نُوں تیار کرن لئی یہوواہ نے کیہہ کیتا؟ 1919 توں کئی صدیاں پہلاں یہوواہ نے مُقدس راہ نُوں تیار کرن لئی ایہو جہے لوکاں نُوں استمال کیتا جیہڑے دِلوں اوہدا احترام کردے سن۔ (‏یسعیاہ 40:‏3 تے غور کرو۔)‏ اوہناں دی محنت دی وجہ توں بعد چ لوکاں لئی ایہہ ممکن ہو گیا کہ اوہ وڈے بابل یعنی جھوٹھے مذہب نُوں چھڈن تے یہوواہ دے بندیاں نال مل کے اوہدی عبادت کرن۔ م23.‏05 ص.‏ 15، 16 پ.‏ 8، 9

یہوواہ چاہندا اے کہ اَسی خوشی تے پورے دل نال اوہدی خدمت کریئے۔ (‏2-‏کُرنتھیوں 9:‏7‏)‏ پر جدوں ساڈے اندر اپنے کسے منصوبے نُوں پورا کرن دی خواہش نئیں ہوندی تے کیہہ سانوں ایہنوں پورا کرن دی کوشش کرنی چاہی دی اے؟ ذرا ایس بارے پولُس رسول دی مثال تے غور کرو۔ اوہنے کہیا:‏ مَیں اپنے جسم نُوں مار کٹ کے اپنا غلام بنانا واں۔ (‏1-‏کُرنتھیوں 9:‏25-‏27‏)‏ پولُس اوس ویلے وی صحی کم کرن دی پوری کوشش کردا سی جدوں اوہدے اندر ایہنوں کرن دی خواہش نئیں ہوندی سی۔ پر کیہہ یہوواہ اوہدے کماں توں خوش ہویا؟ جی بالکل!‏ تے یہوواہ نے اوہنوں ایہدے لئی بوہت ساریاں برکتاں وی دِتیاں۔ (‏2-‏تیمُتھیُس 4:‏7، 8‏)‏ ایسے طرحاں یہوواہ ایہہ ویکھ کے بوہت خوش ہوندا اے کہ اَسی خواہش نہ ہون دے باوجود وی اپنے منصوبے نُوں پورا کرن دی کوشش کر رہے آں۔ اوہ ایس لئی خوش ہوندا اے کیونکہ اوہ جان‌دا اے کہ بھانویں سانوں ایہہ کم کرنا چنگا نئیں لگدا پر فیر وی اَسی ایہنوں ایس لئی کر رہے آں کیونکہ اَسی اوہنوں پیار کرنے آں۔ جیویں یہوواہ نے پولُس نُوں برکتاں دِتیاں اوہ سانوں وی دَوے گا۔ (‏زبور 126:‏5)‏ جدوں اَسی ایہہ ویکھاں گے کہ اوہ سانوں برکتاں دے رہیا اے تے ہو سکدا اے کہ ساڈے اندر اپنے منصوبے نُوں پورا کرن دی خواہش وی پیدا ہو جائے۔ م23.‏05 ص.‏ 29 پ.‏ 9، 10

جیہڑے لوک یہوواہ دے دن توں نئیں بچ سکن گے، پولُس رسول نے اوہناں نُوں ایہو جہے لوکاں وانگوں کہیا جیہڑے سُتے ہوندے نیں۔ اوہناں نُوں اپنے آلے دَوالے دی کوئی ہوش نئیں ہوندی تے ایہہ وی نئیں پتہ ہوندا کہ کِنّاں وقت لنگھ گیا اے۔ ایس لئی اوہ نئیں جان دے کہ اوہناں دے آلے دَوالے کیہڑے اہم واقعے ہو رہے نیں تے نہ ای اوہ ایہناں دے حوالے نال کجھ کر سکدے نیں۔ بوہت سارے لوک اَج روحانی لحاظ نال سُتے ہوئے نیں۔ (‏رومیوں 11:‏8‏)‏ اوہ ایس گل دے ثبوتاں تے یقین نئیں رکھدے کہ اَسی آخری زمانے چ رہ رہے آں تے بوہت چھیتی وڈی مصیبت شروع ہون والی اے۔ (‏2-‏پطرس 3:‏3، 4‏)‏ پر اَسی ایس گل نُوں سمجھنے آں کہ جیویں جیویں وقت گزر رہیا اے، ساڈے لئی جاگدے رہنا ہور وی ضروری ہوندا جا رہیا اے۔ (‏1-‏تھسلُنیکیوں 5:‏6‏)‏ سانوں چاہی دا اے کہ اَسی سیاسی تے سماجی معاملیاں چ نہ اُلجھئے۔ جیویں جیویں یہوواہ دا دن نیڑے آئے گا، اونویں اونویں ایہناں معاملیاں چ کسے دی طرف‌داری کرن دا دباؤ ودھدا جائے گا۔ پر سانوں پریشان ہون دی لوڑ نئیں اے کہ اَسی ایہو جہی صورتحال چ کیہہ کراں گے۔ خدا دی پاک روح پُرسکون رہن، اپنے ہوش قائم رکھن تے چنگے فیصلے کرن چ ساڈی مدد کرے گی۔—‏لُوقا 12:‏11، 12‏۔ م23.‏06 ص.‏ 9، 10 پ.‏ 6، 7

جدوں تُسی سمسون دا ناں سُن دے او تے تواڈے ذہن چ کیہہ آندا اے؟ شاید تواڈے ذہن چ اِک بوہت طاقت‌ور انسان آئے۔ ایہہ گل سچ اے کہ سمسون بوہت طاقت‌ور سی پر اوہنے اپنی زندگی چ کجھ غلط فیصلے کیتے جدے بڑے بھیڑے نتیجے نکلے۔ پر فیر وی یہوواہ نے ایس گل تے دھیان دِتا کہ سمسون کِنّی وفاداری نال اوہدے نال چلدا رہیا اے۔ ایس لئی اوہنے اوہدی مثال نُوں بائبل چ لکھوایا تاکہ اَسی اوہدے تے غور کر کے فائدہ حاصل کر سکئے۔ یہوواہ نے اپنی قوم اِسرائیل دی مدد کرن لئی سمسون دے ذریعے بڑے زبردست کم کیتے۔ سمسون دے مرن توں کئی صدیاں بعد یہوواہ نے پولُس رسول دے ذریعے اوہدا ناں اوہناں لوکاں چ لکھوایا جیہڑے ایمان دی ودھیا مثال نیں۔ (‏عبرانیوں 11:‏32-‏34‏)‏ سمسون دی مثال توں ساڈا حوصلہ ودھدا اے۔ اوہنے مشکل حالاتاں چ وی یہوواہ تے بھروسا رکھیا۔ اَسی سمسون توں بوہت کجھ سکھ سکنے آں تے اوہدی مثال تے غور کرن نال سانوں بوہت حوصلہ مِلدا اے۔ م23.‏09 ص.‏ 2 پ.‏ 1، 2

اَسی ثابت‌قدمی دی خوبی نُوں نکھارن لئی باقاعدگی نال یہوواہ کولوں دُعا کر سکنے آں تے کُھل کے اوہنوں اپنیاں فکراں بارے دَس سکنے آں۔ (‏1-‏تھسلُنیکیوں 5:‏17‏)‏ شاید توانوں فی‌الحال کسے وڈے مسئلے دا سامنا نئیں اے۔ پر فیر وی جدوں تُسی اُداس ہوندے او، اُلجھن دا شکار ہوندے او یاں توانوں سمجھ نئیں آ رہیا ہوندا کہ توانوں کیہہ کرنا چاہی دا اے تے کیہہ تُسی اوہدوں یہوواہ کولوں دُعا کردے او؟ جے تُسی اپنے چھوٹے چھوٹے مسئلیاں لئی وی باقاعدگی نال یہوواہ کولوں مدد منگو گے تے فیر تُسی اوہدوں وی اِنج کرن توں نئیں جھکو گے جدوں توانوں وڈے مسئلیاں دا سامنا ہوئے گا۔ ایس طرحاں توانوں پکا یقین ہو جائے گا کہ یہوواہ نُوں پتہ اے کہ اوہنے کدوں تے کیویں تواڈی مدد کرنی اے۔ (‏زبور 27:‏1، 3)‏ جے اَسی اَج مشکلاں چ یہوواہ دے وفادار رہواں گے تے اَسی وڈی مصیبت چ وی ثابت‌قدم رہ سکاں گے۔ (‏رومیوں 5:‏3‏)‏ اَسی ایہہ گل کیوں کہہ سکنے آں؟ بوہت سارے بھین بھراواں نے ایس گل دا تجربہ کیتا اے کہ ہر واری جدوں اوہناں نے ثابت قدمی نال کسے مشکل دا مقابلہ کیتا تے فیر اوہ آن والی مشکل لئی وی تیار ہو گئے۔ ثابت‌قدمی نے اوہناں دی شخصیت نُوں ہور نکھاریا تے ایس گل تے اوہناں دے ایمان نُوں مضبوط کیتا کہ یہوواہ اوہناں دی مدد کرنا چاہندا اے تے ایہدے لئی ہر ویلے تیار اے۔ اوہناں دے ایس ایمان نے اوہناں نُوں اگلی مشکل چ ثابت‌قدم رہن لئی تیار کر دِتا۔—‏یعقوب 1:‏2-‏4‏۔ م23.‏07 ص.‏ 3 پ.‏ 7، 8

یہوواہ اپنی خاکساری تے ہمدردی دی وجہ توں لچک‌دار اے۔ مثال لئی، یہوواہ نے اوہدوں خاکساری ظاہر کیتی جدوں اوہ سدوم دے بھیڑے لوکاں نُوں تباہ کرن والا سی۔ یہوواہ نے اپنے فرشتیاں دے ذریعے اپنے بندے لُوط نُوں کہیا کہ اوہ بھج کے اِک پہاڑی علاقے چ چلا جائے۔ پر لُوط اوتھے جان توں ڈر رہیا سی۔ ایس لئی اوہنے یہوواہ توں درخاست کیتی کہ اوہ اوہنوں تے اوہدے گھرانے نُوں اِک چھوٹے شہر ضُغر چ پناہ لین دَوے جد کہ یہوواہ نے اوس شہر نُوں وی تباہ کرنا سی۔ یہوواہ چاہندا تے لُوط نُوں کہہ سکدا سی کہ جو اوہنوں کہیا گیا اے، اوہ اوہی کرے۔ پر یہوواہ نے اِنج نئیں کیتا۔ بھانویں کہ ایہدی وجہ توں یہوواہ نُوں شہر ضُغر نُوں تباہ کرن توں اپنا ہتھ روکنا پیا۔ (‏پیدائش 19:‏18-‏22)‏ ایہدے کئی صدیاں بعد یہوواہ نے شہر نینوہ دے لوکاں لئی ہمدردی ظاہر کیتی۔ اوہنے اپنے نبی یُوناہ نُوں اوہناں کول گھلیا تاکہ اوہ اوس شہر تے اوہدے بھیڑے لوکاں دی تباہی دا اعلان کرے۔ پر جدوں لوکاں نے دِلوں توبہ کیتی تے یہوواہ نے اوہناں لئی ہمدردی وکھائی تے اوس شہر نُوں بخش دِتا۔—‏یُوناہ 3:‏1، 10؛ 4:‏10، 11۔ م23.‏07 ص.‏ 21 پ.‏ 5

اَسی یوآس دی زندگی توں کیہہ سکنے آں؟ یوآس اِک ایہو جہے درخت وانگوں سی جدیاں جڑاں کھوکھلیاں ہون تے جنہوں کھلوتے رہن لئی سہارے دی لوڑ ہوئے۔ جدوں یوآس دا اوہ سہارا نئیں رہیا یعنی یہویدع مر گیا نالے گمراہی دِیاں ہواواں چلیاں تے یوآس ڈِگ پیا یعنی اوہ یہوواہ توں دُور ہو گیا۔ ایہدے توں پتہ چلدا اے کہ سانوں یہوواہ دا خوف صرف ایس لئی نئیں رکھنا چاہی دا کیونکہ ساڈے گھر والے یاں کلیسیا دے بھین بھرا ساڈے تے چنگا اثر پا رہے نیں۔ سگوں جے اَسی یہوواہ دے نیڑے رہنا چاہنے آں تے سانوں آپ اپنے دل چ یہوواہ لئی محبت تے عزت نُوں ودھانا چاہی دا اے۔ اِنج کرن لئی سانوں باقاعدگی نال دُعا تے ذاتی مطالعیا کرنا چاہی دا اے نالے پڑھیاں ہوئیاں گلاں تے سوچ وچار کرنا چاہی دا اے۔ (‏یرمیاہ 17:‏7، 8؛‏ کُلسّیوں 2:‏6، 7‏)‏ یہوواہ ساڈے کولوں بوہت زیادہ دی توقع نئیں کردا۔ اوہ ساڈے کولوں جو چاہندا اے، اوہدے بارے واعظ 12:‏13 چ دَسیا گیا اے۔ ایس ایت چ لکھیا اے:‏ خدا توں ڈرو تے اوہدے حکماں نُوں منو کیونکہ ایہی انسان دا فرض اے۔ جدوں اَسی یہوواہ دا خوف رکھاں گے تے اَسی مستقبل چ آن والیاں مشکلاں چ یہوواہ دے وفادار رہ سکاں گے۔ نالے اِنج کرن نال کوئی وی چیز یہوواہ نال ساڈی دوستی نُوں نئیں توڑ سکے گی۔ م23.‏06 ص.‏ 19 پ.‏ 17-‏19

مُکاشفہ 21:‏5 دے شروع چ لکھیا اے:‏ جیہڑا تخت تے بیٹھا سی، اوہنے کہیا۔ مُکاشفہ دی کتاب چ صرف تِن ایہو جہے موقعے نیں جتھے یہوواہ نے آپ گل کیتی تے 5 ایت چ لکھی گل اوہناں وچوں اِک اے۔ ایہدا مطلب اے کہ 5 تے 6 ایت چ کسے فرشتے یاں یسوع نے نئیں سگوں یہوواہ نے آپ اپنے وعدے نُوں پورا کرن دا یقین دَوایا اے۔ ایس وجہ توں ساڈا اوس گل تے بھروسا ہور ودھ جاندا اے جیہڑی 5 ایت چ اَگے کہی گئی۔ایہدی کیہہ وجہ اے؟ کیونکہ یہوواہ جھوٹھ نئیں بول سکدا۔ (‏طِطُس 1:‏2‏)‏ ایہدا مطلب اے کہ اَسی مُکاشفہ 21:‏5، 6 چ لکھی گل تے پورا بھروسا کر سکنے آں۔ آؤ غور کرنے آں کہ ایس توں بعد یہوواہ نے کیہہ کہیا۔ اوہنے کہیا:‏ ویکھو!‏ جیس یونانی لفظ دا ترجمہ ”‏ویکھو“‏ کیتا گیا اے، اوہ مُکاشفہ دی کتاب چ وار وار استمال ہویا اے۔ ایس توں بعد یہوواہ نے کیہہ کہیا؟ اوہنے کہیا:‏ مَیں سب کجھ نواں بنا رہیا واں۔ سچ اے کہ یہوواہ دَس رہیا سی کہ اوہ مستقبل چ کیہہ کجھ کرے گا۔ پر اوہنوں اپنے وعدے تے ایناں پکا یقین سی کہ اوہ اِنج گل کر رہیا سی جیویں اوہنے تبدیلیاں کرنیاں شروع کر دِتیاں نیں۔‏‏—‏یسعیاہ 46:‏10۔ م23.‏11 ص.‏ 3، 4 پ.‏ 7، 8

پطرس رسول نے اپنیاں خامیاں تے قابو نئیں پایا سگوں اوہنوں ایہناں نال لڑنا پیا۔ ذرا کجھ مثالاں تے غور کرو۔ جدوں یسوع نے اپنے رسولاں نُوں دَسیا کہ پیشین‌گوئی دے مطابق اوہنوں اذیت سہنی پووے گی تے مرنا پووے گا تے اوہدوں پطرس نے یسوع نُوں ٹوکیا تے کہیا کہ اوہدے نال اِنج بالکل نئیں ہوئے گا۔ (‏مرقس 8:‏31-‏33‏)‏ پطرس تے دُوجے رسول وار وار ایس گل تے بحث کردے سن کہ اوہناں وچوں وڈا کون اے۔ (‏مرقس 9:‏33، 34‏)‏ یسوع دی موت توں تھوڑی دیر پہلاں، پطرس نے بغیر سوچے سمجھے اِک بندے دا کن وڈھ دِتا۔ (‏یوحنا 18:‏10‏)‏ اوسے رات پطرس نے لوکاں دے ڈر دی وجہ توں تِن وار اپنے دوست یسوع نُوں جانن توں اِنکار کر دِتا۔ (‏مرقس 14:‏66-‏72‏)‏ ایس وجہ توں پطرس پُھٹ پُھٹ کے رون لگ پیا۔ یسوع نے اپنے ایس بے‌حوصلہ رسول توں مُونہہ نئیں موڑیا۔ جدوں یسوع زندہ ہو گیا تے اوہنے پطرس نُوں ایہہ ثابت کرن دا موقع دِتا کہ اوہ ہُن وی یسوع نال محبت کردا اے۔ یسوع نے پطرس نُوں ایہہ ذمے‌داری دِتی کہ اوہ اوہدیاں بھیڈاں دی دیکھ‌بھال کرے۔ (‏یوحنا 21:‏15-‏17‏)‏ پطرس اوہ سب کجھ کرن لئی تیار سی جو یسوع نے اوہنوں کہیا سی۔ اوہ عیدِپنتِکُست تے یروشلم چ موجود سی تے اوس پہلے گروہ چ شامل سی جنہوں یہوواہ نے اپنی پاک روح نال مسح کیتا سی۔ م23.‏09 ص.‏ 22 پ.‏ 6، 7

پطرس رسول نے اپنے ساتھی بزرگاں نُوں کہیا:‏ خدا دِیاں بھیڈاں دی دیکھ‌بھال کرو۔ (‏1-‏پطرس 5:‏1-‏4‏)‏ جے تُسی اِک بزرگ او،تے سانوں پتہ اے کہ تُسی بھین بھراواں نال بوہت پیار کردے او تے اوہناں دی دیکھ‌بھال تے مدد کرنا چاہندے او۔ پر شاید کدی کدی توانوں لگے کہ تُسی اینے مصروف او یاں تھک گئے او کہ تُسی ایہہ ذمے‌داری پوری نئیں کر سکدے۔ فیر تُسی کیہہ کر سکدے او؟ دُعا چ اپنے دل دی گل یہوواہ نُوں دَسو۔ پطرس نے لکھیا:‏ جے کوئی خدمت کردا اے تے اوس طاقت دے سہارے کرے جیہڑی خدا دیندا اے۔ (‏1-‏پطرس 4:‏11‏)‏ شاید بھین بھرا ایہو جہیاں مشکلاں دا سامنا کر رہے نیں جنہاں نُوں صرف خدا دی بادشاہی حل کر سکدی اے۔ پر یاد رکھو کہ عظیم چرواہا یسوع مسیح اوہناں دی تواڈے نالوں وی زیادہ مدد کر سکدا اے۔ اوہ اَج وی اِنج کر سکدا اے تے نوِیں دُنیا چ وی کرے گا۔ یہوواہ بس ایہہ چاہندا اے کہ بزرگ بھین بھراواں نال پیار کرن، اوہناں دی دیکھ‌بھال کرن تے اوہناں لئی چنگی مثال قائم کرن۔ م23.‏09 ص.‏ 29، 30 پ.‏ 13، 14

سانوں اوہناں لوکاں دی سوچ نُوں نئیں اپنانا چاہی دا جیہڑے خدا دے حکماں نُوں نئیں من دے۔ جے اَسی ایہو جہے لوکاں وانگوں سوچن لگ پَواں گے جیہڑے خدا نُوں نئیں من دے تے شاید اَسی یہوواہ تے اوہدے معیاراں نُوں نظرانداز کر دَئیے۔ (‏1-‏کُرنتھیوں 3:‏19‏)‏ بوہت سارے لوک دُنیا دی عقل‌مندی مطابق چل کے خدا دی نافرمانی کردے نیں۔ پرگمن تے تھواتیرہ دے کجھ مسیحی اپنے شہراں دے اوہناں لوکاں وانگوں سوچن لگ پئے جیہڑے بُت‌پرست تے بدکار سن۔ یسوع مسیح نے سختی نال ایہناں دونواں کلیسیاواں دی درستی کیتی کیونکہ اوہ بدکاری نُوں روکن لئی کجھ نئیں کر رہیاں سن۔ (‏مُکاشفہ 2:‏14،‏ 20‏)‏ اَج وی شاید لوک ساڈے اُتے اوہناں ورگی سوچ اپنان دا دباؤ پان۔ شاید ساڈے رشتے‌دار تے واقف‌کار سانوں کہن کہ اَسی اپنیاں خواہشاں نُوں پورا کرئیے تے یہوواہ دے حکماں نُوں توڑ دَئیے۔ مثال لئی، شاید اوہ سانوں کہن کہ بائبل چ اپنے چال چلن نُوں پاک رکھن لئی جیہڑے معیار دِتے گئے نیں اوہ پرانے زمانے دے لوکاں لئی سن، اَج ایہناں تے عمل کرنا ضروری نئیں۔ کدی کدار شاید سانوں لگے کہ یہوواہ نے جیہڑی ہدیت دِتی اے اوہ اینی واضح نئیں اے۔ ہو سکدا اے کہ اَسی لکھیاں ہوئیاں گلاں توں اَگے ودھ جائیے۔—‏1-‏کُرنتھیوں 4:‏6‏۔ م23.‏07 ص.‏ 16 پ.‏ 10، 11

یسوع دی ماں مریم نُوں بڑی ہمت دی لوڑ سی کیونکہ حالے اوہدا ویاہ نئیں ہویا سی پر اوہنے حاملہ ہونا سی۔اوہنوں تے بچے پالن دا وی کوئی تجربہ نئیں سی۔ پر اوہنوں اِک ایہو جہے بچے دی دیکھ‌بھال کرنی سی جنہے اَگے چل کے مسیح بننا سی۔ ایہدے علاوہ اوہنوں اپنے منگیتر یوسف نُوں ایہہ دَسنا کِنّاں مشکل لگیا ہوئے گا کہ اوہ جنسی تعلق قائم کیتے بغیر ای ماں بنن والی اے۔ (‏لُوقا 1:‏26-‏33‏)‏ مریم نُوں ہمت تے طاقت کیویں ملی؟ اوہنے دوجیاں کولوں مدد لئی۔ مثال لئی، اوہنے اپنی ذمے‌داری بارے جبرائیل توں ہور معلومات لئی۔ (‏لُوقا 1:‏34‏)‏ ایہدے تھوڑے چِر بعد ای اوہ یہوداہ دے پہاڑی علاقے دا سفر کر کے اپنی رشتے‌دار الیشبع نُوں مِلن گئی۔ الیشبع نے مریم دی تعریف کیتی تے یہوواہ دے الہام نال اوہدے ہون والے بچے بارے اِک پیشین‌گوئی کیتی جدے توں اوہنوں بڑا حوصلہ ملیا ہوئے گا۔ (‏لُوقا 1:‏39-‏45‏)‏ مریم نے کہیا کہ یہوواہ نے اپنے بازو نال بڑے زبردست کم کیتے نیں۔ (‏لُوقا 1:‏46-‏51‏)‏ یہوواہ نے جبرائیل فرشتے تے الیشبع دے ذریعے مریم نُوں ہمت تے طاقت دِتی۔ م23.‏10 ص.‏ 14، 15 پ.‏ 10-‏12

مسیح دے کجھ شاگرداں نُوں پاک روح نال مسح کیتا گیا اے جدی وجہ توں اوہناں دا یہوواہ نال بڑا خاص رشتہ اے۔ اوہناں مسیحیاں دی تعداد 1 لکھ 44 ہزار اے۔ اوہناں نُوں اسمان تے یسوع نال کاہناں دے طور تے خدمت کرن لئی چُنیا گیا اے۔ (‏مُکاشفہ14:‏1)‏ پاک کمرے دا اشارہ ایس گل وَل اے کہ خدا نے زمین تے ایہناں مسیحیاں نُوں اپنی پاک روح دے ذریعے اپنے پُتراں دے طور تے گود لے لیا اے۔ (‏رومیوں 8:‏15-‏17‏)‏ پاک‌ترین کمرے دا اشارہ اسمان وَل اے جِتھے یہوواہ رہندا اے۔ پردہ یسوع دے جسم وَل اشارہ کردا اے۔ جیویں خیمے چ پردے دی وجہ توں اعلیٰ کاہن دے علاوہ کوئی وی پاک‌ترین کمرے دے اندر نئیں جا سکدا سی، اوسے طرحاں یسوع اپنے انسانی جسم دی وجہ توں پاک‌ترین کمرے یعنی اسمان تے نئیں جا سکدا سی۔ پر انساناں لئی اپنے جسم دی قربانی دے کے یسوع نے سارے مسح‌شُدہ مسیحیاں لئی اسمان تے جان دی راہ کھولی۔ مسح‌شُدہ مسیحی وی اپنے انسانی جسم نال اسمان تے نئیں جا سکدے سگوں اوہدوں ای جا سکدے نیں جدوں زمین تے اوہناں دی زندگی ختم ہو جاندی اے۔—‏عبرانیوں 10:‏19، 20؛‏ 1-‏کُرنتھیوں 15:‏50‏۔ م23.‏10 ص.‏ 28 پ.‏ 13

جدوں اِفرائیم دے لوکاں نے جدعون چ نُقص کڈھے تے اوہ غصے چ نئیں آیا۔ (‏قُضاۃ 8:‏1-‏3)‏ ایہدی بجائے اوہنے بڑے دھیان نال اوہناں دی گل سُنی تے نرمی نال اوہناں نُوں جواب دِتا۔ اِنج اوہناں لوکاں دا غصہ ٹھنڈا ہو گیا۔ بزرگ وی جدعون وانگوں دھیان نال اوہناں لوکاں دی گل سُن‌دے نیں جیہڑے اوہناں چ نُقص کڈھدے نیں تے فیر اوہناں نُوں نرمی نال جواب دیندے نیں۔ (‏یعقوب 3:‏13‏)‏ اِنج اوہ کلیسیا چ امن نُوں قائم رکھدے نیں۔ جدوں جدعون نے مِدیانیاں نُوں جنگ چ ہرا دِتا تے لوکاں نے اوہدی بڑی تعریف کیتی پر اوہنے ایس کامیابی لئی یہوواہ دی وڈیائی کیتی۔ (‏قُضاۃ 8:‏22، 23)‏ بزرگ جدعون وانگوں کیویں بن سکدے نیں؟ جدوں اوہناں دی تعریف کیتی جاندی اے تے اوہ اوہدے لئی یہوواہ دی وڈیائی کر سکدے نیں۔ (‏1-‏کُرنتھیوں 4:‏6، 7‏)‏ مثال لئی، جدوں اِک بزرگ دی ایس لئی تعریف کیتی جاندی اے کہ اوہ بڑی چنگی طرحاں تلیم دیندا اے تے اوہ دُوجیاں دا دھیان خدا دے کلام یاں اوہدی تنظیم وَلّوں مِلن والی تربیت تے دَوا سکدا اے۔ بزرگاں نُوں سوچنا چاہی دا اے کہ کیہہ اوہ ایس طرحاں تلیم تے نئیں دے رہے کہ لوکاں دا دھیان یہوواہ دی بجائے اوہناں تے آ رہیا اے۔ م23.‏06 ص.‏ 4 پ.‏ 7، 8

جے سانوں اوہ چیز نئیں مِلدی جیہڑی اَسی دُعا چ یہوواہ کولوں منگ رہے آں تے سانوں اپنے آپ کولوں ایہہ سوال پچھنا چاہی دا اے کہ ”‏کیہہ مَیں صحی چیز لئی دُعا کر رہیا واں؟“‏ اکثر سانوں لگدا اے کہ سانوں پتہ اے کہ ساڈے لئی کیہہ بہتر اے۔ پر ہو سکدا اے کہ اَسی دُعا چ جو منگ رہے آں، اوہدا سانوں بوہتا فائدہ نہ ہووے۔ جے اَسی کسے مسئلے بارے دُعا کر رہے آں تے ہو سکدا اے کہ جو اَسی سوچ رہے آں اوہ اوس مسئلے دا بہتر حل نہ ہووے تے ایہہ وی ہو سکدا اے کہ ساڈیاں دُعاواں یہوواہ دی مرضی مطابق نہ ہون۔ (‏1-‏یوحنا 5:‏14‏)‏ ذرا اِک ماں پیو دی مثال تے غور کرو جنہاں نے یہوواہ کولوں دُعا کیتی سی کہ اوہناں دا بچہ کدی وی یہوواہ توں دُور نہ ہووے۔ ایس بارے دُعا کرنا صحی اے۔ پر یہوواہ ساڈے چوں کسے نُوں وی اپنی عبادت کرن لئی مجبور نئیں کردا۔ اوہ چاہندا اے کہ اَسی سارے، ایتھوں تک کہ ساڈے بچے وی اوہدی عبادت کرنا دا فیصلہ دِلوں کرن۔ (‏اِستثنا 10:‏12، 13؛ 30:‏19، 20)‏ ایس لئی ماں پیو یہوواہ کولوں ایہہ دُعا کر سکدے نیں کہ یہوواہ بچیاں دے دل تک پونچن چ اوہناں دی مدد کرے تاکہ بچیاں دے دل چ اوہدے لئی محبت ودھے تے اوہ اوہدے دوست بنن۔—‏اَمثال 22:‏6؛‏ اِفسیوں 6:‏4‏۔ م23.‏11 ص.‏ 21 پ.‏ 5؛‏ ص.‏ 23 پ.‏ 12

دُوجیاں نُوں تسلی دینا، اوہناں لئی محبت ظاہر کرن دا اِک خاص طریقہ کیوں اے؟ لفظ ”‏تسلی“‏ لئی پولُس رسول نے جیہڑا لفظ استمال کیتا سی اوہدے مطلب بارے اِک کتاب چ ایہہ دَسیا گیا اے:‏ ”‏جدوں کوئی مشکل چوں لنگھ رہیا ہوئے تے اوہدا حوصلہ ودھان لئی اوہدے نال کھلونا۔“‏ جدوں اَسی مشکلاں چ اپنے کسے ہم‌ایمان دا حوصلہ ودھانے آں تے اِنج اَسی اوہدی مدد کر رہے ہُنے آں کہ اوہ ہمیشاں دی زندگی دی راہ تے چلدا رہوے۔ جدوں وی اَسی اپنے کسے بھین بھرا نُوں تسلی دینے آں تے اَسی اوہدے لئی محبت ظاہر کر رہے ہُنے آں۔ (‏2-‏کُرنتھیوں 7:‏6، 7،‏ 13‏)‏ ہمدردی محسوس کرن تے تسلی دین دا آپس چ گُوڑھا تعلق اے۔ پر کیس لحاظ نال؟ جیہڑے بندے دے دل چ دُوجیاں لئی ہمدردی ہوندی اے، اوہدا دل چاہندا اے کہ اوہ اوہناں نُوں تسلی دَوے تے اوہناں دی تکلیف نُوں دُور کرن دی کوشش کرے۔ ایہدا مطلب اے کہ پہلاں اَسی کسے لئی ہمدردی محسوس کرنے آں تے فیر اوہنوں تسلی دینے آں۔ غور کرو کہ پولُس رسول نے ایہہ کیویں دَسیا کہ یہوواہ ہمدردی دی وجہ توں دُوجیاں نُوں تسلی دیندا اے۔ اوہنے کہیا:‏ یہوواہ عظیم رحمتاں دا باپ اے تے بڑی تسلی دیندا اے۔ —‏2-‏کُرنتھیوں 1:‏3‏۔ م23.‏11 ص.‏ 9، 10 پ.‏ 8-‏10

مسیح دے کسے وی پیروکار نُوں مصیبتاں دا سامنا ہو سکدا اے۔ ذرا پولُس رسول دی مثال تے غور کرو۔ اوہنے تھسلُنیکے دے مسیحیاں نُوں کہیا:‏ جدوں اَسی تواڈے نال ساں تے اَسی توانوں دَسنے ہُنے ساں کہ سانوں اَذیتاں چکنیاں پین گیاں تے اِنج ہویا وی اے۔ (‏1-‏تھسلُنیکیوں 3:‏4‏)‏ اوہنے کُرنتھس چ رہن والے مسیحیاں نُوں کہیا:‏ اَسی چاہنے آں کہ تُسی اوہناں مشکلاں بارے جانو جیہڑیاں اَسی برداشت کیتیاں نیں، ایتھوں تک کہ سانوں اپنی جان دا خطرہ سی۔ (‏2-‏کُرنتھیوں 1:‏8؛‏ 11:‏23-‏27‏)‏ اَج وی مسیحیاں نُوں فرق فرق مصیبتاں دا سامنا کرنا پے سکدا اے۔ (‏2-‏تیمُتھیُس 3:‏12‏)‏ جدوں تُسی یسوع تے ایمان لیائے تے اوہدی راہ تے چلنا شروع کیتا تے شاید تواڈے رشتے‌داراں تے گھر والیاں نے تواڈے نال بوہت بُرا سلوک کیتا ہووے۔ کیہہ ایمانداری نال کم کرن دی وجہ توں تواڈے کم دی تھاں تے تواڈے لئی مسئلے کھڑے ہو گئے؟ (‏عبرانیوں 13:‏18‏)‏ کیہہ دُوجیاں نُوں اپنی امید بارے دَسن دی وجہ توں توانوں حکومت وَلّوں مخالفت دا سامنا کرنا پیا؟ بھانویں سانوں جیہڑیاں وی مشکلاں دا سامنا کرنا پووے، پولُس رسول نے کہیا کہ اَسی خوش رہ سکنے آں۔ م23.‏12 ص.‏ 10، 11 پ.‏ 9، 10

یعقوب نے بڑیاں مشکلاں برداشت کیتیاں۔ اوہدے پُتراں شمعون تے لاوی دی وجہ توں پورے خاندان نُوں شرمندگی چکنی پئی تے یہوواہ دے ناں دی بدنامی ہوئی۔ ایہدے علاوہ اوہدی پیاری بیوی راخل اپنے دُوجے پُتر دی پیدائش دے ویلے فوت ہو گئی۔ نالے جدوں یعقوب بڈھا ہو گیا تے اوہنوں مصر جانا پیا کیونکہ اوہدے ملک چ کال پے گیا سی۔ (‏پیدائش 35:‏16-‏19؛ 37:‏28؛ 45:‏9-‏11، 28)‏ ایہناں ساریاں مشکلاں دے باوجود یعقوب دا یہوواہ تے اوہدے وعدیاں اُتے بھروسا قائم رہیا۔ نالے یہوواہ نے وی ایہہ ثابت کیتا کہ اوہ یعقوب دے نال اے۔ مثال لئی، یہوواہ نے یعقوب نُوں بوہت ساریاں برکتاں دِتیاں۔ ذرا سوچو کہ جدوں یعقوب دُبارہ توں اپنے پُتر یوسف نُوں ملیا تے اوہ یہوواہ دا کِنّاں شکرگزار ہویا ہوئے گا۔ اوہنوں اِنج محسوس ہویا ہوئے گا جیویں کہ اوہدا پُتر دُبارہ زندہ ہو گیا اے۔ یہوواہ نال گُوڑھی دوستی دی وجہ توں یعقوب ایہناں ساریاں مشکلاں نُوں برداشت کر پایا۔ (‏پیدائش 30:‏43؛ 32:‏9، 10؛ 46:‏28-‏30)‏ یہوواہ دے نیڑے رہ کے اَسی وی اوہناں مشکلاں نُوں برداشت کر سکنے آں جنہاں بارے اَسی کدی سوچیا وی نئیں ہوندا۔ م23.‏04 ص.‏ 15 پ.‏ 6، 7

زبور 23 چ داؤد نے دَسیا کہ اوہنوں ایس گل دا پکا یقین سی کہ یہوواہ اوہنوں پیار کردا اے تے اوہدا خیال رکھدا اے۔ داؤد نے اوس دوستی دا ذکر کیتا جیہڑی اوہدے تے اوہدے چرواہے یہوواہ دے درمیان سی۔ داؤد پوری طرحاں یہوواہ تے بھروسا کردا سی تے اوہ چاہندا سی کہ یہوواہ اوہدی رہنمائی کرے۔ داؤد نُوں ایس گل تے بھروسا سی کہ یہوواہ ہر دن اوہدے لئی محبت وکھائے گا۔ پر داؤد نُوں یہوواہ دی محبت تے ایناں یقین کیوں سی؟ داؤد نے محسوس کیتا سی کہ یہوواہ نے ہمیشاں اوہدا خیال رکھیا اے تے جیس چیز دی اوہنوں لوڑ سی اوہنوں دِتی سی۔ داؤد یہوواہ دا قریبی دوست سی تے یہوواہ اوہدے توں خوش سی۔ ایس لئی اوہنوں ایس گل دا پکا یقین سی کہ بھانویں کجھ وی ہو جائے، یہوواہ اوہدیاں لوڑاں نُوں پورا کردا رہوے گا۔ کیونکہ داؤد نُوں ایس گل دا پکا یقین سی کہ یہوواہ اوہنوں پیار کردا اے تے اوہدا خیال رکھے گا ایس لئی اوہ حدوں ودھ پریشان نئیں ہویا سگوں خوش تے مطمئن رہیا۔—‏زبور 16:‏11۔ م24.‏01 ص.‏ 28، 29 پ.‏ 12، 13

دُوجی عالمی جنگ دے بعد توں یہوواہ دے بندے بوہت سارے مُلکاں چ کسے حد تک آزادی نال مُنادی کر رہے نیں، ایتھوں تک کہ ایہہ کم پوری دُنیا چ ہو رہیا اے۔ اَج گورننگ باڈی دے ممبر مسیح وَلوں مِلن والی رہنمائی تے بھروسا رکھدے نیں۔ اوہ چاہندے نیں کہ اوہ بھین بھراواں نُوں جیہڑیاں ہدیتاں دین، اوہناں توں پتہ چلے کہ ایہہ ہدیتاں یہوواہ وَلّوں نیں۔ فیر اوہ حلقے دے نگہبان تے بزرگاں دے ذریعے ایہہ ہدیتاں بھین بھراواں تک پونچاندے نیں۔ ایہہ روح نال مسح ہوئے بزرگ یسوع دے سجے ہتھ چ نیں۔ (‏مُکاشفہ 2:‏1‏)‏ ظاہری جہی گل اے کہ ایہہ بزرگ عیب‌دار نیں ایس لئی اوہناں کولوں وی غلطیاں ہوندیاں نیں۔ کجھ موقعیاں تے موسیٰ تے یشوع کولوں وی غلطیاں ہوئیاں تے بعد چ رسولاں کولوں وی ہوئیاں۔ (‏گنتی 20:‏12؛ یشوع 9:‏14، 15؛‏ رومیوں 3:‏23‏)‏ پر یسوع مسیح بڑے دھیان نال وفادار غلام تے کلیسیا دے بزرگاں دی رہنمائی کردا اے تے اوہ اِنج کردا رہوے گا۔ ایس لئی سانوں اوس رہنمائی تے پورا بھروسا رکھنا چاہی دا اے جیہڑی یسوع مسیح پیشوائی کرن والے بھراواں دے ذریعے سانوں دے رہیا اے۔ م24.‏02 ص.‏ 23، 24 پ.‏ 13، 14

اَج جدوں اَسی اپنیاں گلاں توں ظاہر کرنے آں کہ اَسی یہوواہ دے کِنّے شکرگزار آں تے اوہدے نال کِنّاں پیار کرنے آں تے اِنج اَسی اوہدے دل نُوں خوش کرنے آں۔ مُنادی کردے ویلے اَسی ایہہ گل یاد رکھنے آں کہ ساڈا مقصد ایہہ وے کہ اَسی لوکاں نُوں اپنے اسمانی باپ یہوواہ وَل لیائیے تاکہ اوہ وی اوہدے بارے اُنج ای محسوس کرن جِنج اَسی محسوس کرنے آں۔ (‏یعقوب 4:‏8‏)‏ سانوں اوہدوں بڑی خوشی ہوندی اے جدوں اَسی لوکاں نُوں بائبل چوں یہوواہ دِیاں خوبیاں بارے دَسنے آں جیویں کہ محبت، اِنصاف، حکمت، طاقت تے ہور وی کئی شاندار خوبیاں۔ اَسی اوس ویلے وی یہوواہ دی وڈیائی کرنے آں تے اوہنوں خوش کرنے آں جدوں اَسی اوہدی مثال تے عمل کرن دی کوشش کرنے آں۔ اِنج اَسی ایس بھیڑی دُنیا توں فرق نظر آنے آں۔ تے جدوں لوک ایس گل نُوں ویکھدے نیں تے اوہ سوچدے نیں کہ اَسی دُوجے لوکاں توں فرق کیوں آں۔ (‏متی 5:‏14-‏16‏)‏ فیر جدوں سانوں لوکاں نال گل بات کرن دا موقع مِلدا اے تے اَسی اوہناں نُوں ایہہ دَسن دے قابل ہُنے آں کہ اَسی دُوجے لوکاں ورگے کم کیوں نئیں کردے۔ ایہدا ایہہ نتیجہ نکلدا اے کہ نیک‌دل لوک اوہدے نیڑے آ جاندے نیں۔ جدوں اَسی ایہناں طریقیاں نال اپنے اسمانی باپ یہوواہ دی وڈیائی کرنے آں تے اوہنوں بڑی خوشی ہوندی اے۔—‏1-‏تیمُتھیُس 2:‏3، 4‏۔ م24.‏02 ص.‏ 10 پ.‏ 7

جے تُسی اِک پُختہ مسیحی بننا چاہندے او تے توانوں ایہو جہے ہنر تے مہارتاں سکھن دی لوڑ اے جیہڑیاں زندگی چ تواڈے کم آن گیاں۔ ایہہ تواڈی مدد کرن گیاں کہ تُسی کلیسیا چ اپنیاں ذمے‌داریاں نبھا سکو، اپنی تے اپنے خاندان دِیاں ضرورتاں نُوں پورا کر سکو تے دُوجیاں نال چنگے تعلقات رکھ سکو۔ مثال لئی چنگی طرحاں پڑھنا تے لکھنا سکھو۔ بائبل چ دَسیا گیا اے کہ جیہڑا بندہ ہر روز خدا دے کلام نُوں پڑھدا اے تے ایہدے تے سوچ وچار کردا اے اوہ خوش رہندا اے تے کامیاب ہوندا اے۔ (‏زبور 1:‏1-‏3)‏ جدوں اِک بندہ ہر روز بائبل پڑھدا اے تے اوہ یہوواہ دی سوچ نُوں جان پاندا اے۔ اِنج اوہدی سوچن سمجھن دی صلاحیت ودھدی اے تے اوہ ایہہ وی سکھ لیندا اے کہ اوہ اپنی زندگی چ بائبل دے اصولاں نُوں کیویں کم چ لیا سکدا اے۔ (‏اَمثال 1:‏3، 4)‏ ساڈے بھین بھراواں نُوں ایہو جہے بھراواں دی مدد چاہی دی ہوندی اے جیہڑے اوہناں نُوں بائبل چوں تلیم تے چنگے مشورے دے سکدے نیں۔ جے توانوں چنگی طرحاں پڑھنا تے لکھنا آندا ہوئے گا تے تُسی ایہو جہیاں تقریراں تے جواب تیار کر سکو گے جنہاں توں دُوجیاں نُوں بڑا فائدہ ہوئے گا تے اوہناں دا ایمان مضبوط ہوئے گا۔ ایہدے علاوہ تُسی ایہو جیہاں گلاں نوٹ کر سکدے او جیہڑیاں تواڈی مدد کرن گیاں کہ تُسی اپنے ایمان نُوں مضبوط کر سکو تے دُوجیاں دا حوصلہ ودھا سکو۔ م23.‏12 ص.‏ 26، 27 پ.‏ 9-‏11

جدوں توانوں ڈر لگدا اے تے ایس گل تے سوچ وچار کرو کہ یہوواہ مستقبل چ کیہہ کجھ کرے گا جدوں شیطان نئیں ہوئے گا ۔ 2014 دی کنونشن تے اِک منظر چ وکھایا گیا سی جدے چ اِک پیو اپنے خاندان نُوں دَسدا اے کہ جے 2-‏تیمُتھیُس 3:‏1-‏5 نوِیں دُنیا بارے لکھی جاندی تے ایہدے چ کیہہ لکھیا ہوندا:‏ ”‏نوِیں دُنیا چ خوشیاں نال بھریا وقت آئے گا۔ کیونکہ لوک دُوجیاں نال پیار کرن والے، سچائی نال پیار کرن والے، فروتن، خاکسار، خدا دی وڈیائی کرن والے، ماں پیو دے فرمانبردار، شکرگزار، وفادار، خاندانی محبت نال بھرے ہوئے، لچک رکھن والے، دُوجیاں بارے چنگیاں گلاں کرن والے، اپنے آپ تے قابو رکھن والے، نرم‌مزاج، اچھائی نال پیار کرن والے، بھروسے دے لائق، گل منن والے تے دُوجیاں نُوں اپنے نالوں بہتر سمجھن والے ہون گے۔ اوہ موج مستی نُوں پیار کرن دی بجائے خدا نال پیار کرن گے۔ اوہ دِلوں خدا دی عبادت کرن والے ہون گے۔ ایس طرحاں دے لوکاں نال جُڑے رہوو۔“‏ کیہہ تُسی اپنے گھر والیاں تے ہم‌ایماناں نال ایس بارے گل کردے او کہ نوِیں دُنیا چ زندگی کیہو جہی ہوئے گی؟ م24.‏01 ص.‏ 6 پ.‏ 13، 14

سانوں ایس گل توں بڑا حوصلہ مِلدا اے کہ یہوواہ اپنے بندیاں توں خوش اے۔ بائبل چ دَسیا گیا اے:‏ یہوواہ اپنے لوکاں توں خوش ہوندا اے۔ (‏زبور 149:‏4)‏ پر شاید کدی کدار اَسی اینے مایوس ہو جائیے کہ اَسی سوچن لگ پئیے کہ ”‏کیہہ یہوواہ میرے توں خوش اے؟“‏ بائبل چ وی ایہو جہے کئی لوکاں بارے دَسیا گیا اے جنہاں نُوں کدی کدار ایس گل تے یقین کرنا مشکل لگدا سی۔ (‏1-‏سموئیل 1:‏6-‏10؛ ایوب 29:‏2، 4؛ زبور 51:‏11)‏ بائبل چ صاف صاف دَسیا گیا اے کہ عیب‌دار انسان یہوواہ نُوں خوش کر سکدے نیں۔ پر ایہدے لئی ضروری اے کہ اَسی یسوع مسیح تے ایمان ظاہر کرئیے تے بپتسمہ لئیے۔ (‏یوحنا 3:‏16‏)‏ بپتسمہ لے کے اَسی ساریاں سامنے ایہہ ظاہر کرنے آں کہ اَسی اپنے گُناہواں توں توبہ کر لئی اے تے خدا نال وعدہ کیتا اے کہ اَسی اوہدی مرضی تے چلاں گے۔ (‏اعمال 2:‏38؛‏ 3:‏19‏)‏ جدوں اَسی یہوواہ دے نیڑے جان لئی ایہہ قدم چُکنے آں تے اوہ بڑا خوش ہوندا اے۔ جے اَسی پوری کوشش کراں گے کہ اَسی یہوواہ نال کیتے اپنے وعدے دے مطابق چلدے رہیے تے اوہ ساڈے توں خوش ہوئے گا تے ساڈے نال دوستی قائم رکھے گا۔—‏زبور 25:‏14۔ م24.‏03 ص.‏ 26 پ.‏ 1، 2

جدوں حکومت سانوں مُنادی کرن توں منع کردی اے تے اَسی شاگرداں دی مثال تے عمل کردے ہوئیاں مُنادی کرنا نئیں چھڈدے۔ اَسی ایس گل دا یقین رکھ سکنے آں کہ یہوواہ مُنادی کرن چ ساڈی مدد ضرور کرے گا۔ ایس لئی اَسی دُعا چ یہوواہ کولوں دلیری تے سمجھداری منگو نالے مشکلاں نُوں برداشت کرن لئی مدد وی منگو۔ ساڈے وچوں بوہت سارے کسے بیماری، شدید پریشانی، کسے عزیز دی موت، خاندان دی کوئی مشکل، ظلم یاں کسے ہور مسئلے دا سامنا کر رہے نیں۔ وباواں تے جنگاں دی وجہ توں ایہہ مشکلاں ہور وی ودھ سکدیاں نیں۔ جدوں اِنج ہوندا اے تے دل کھول کے یہوواہ کولوں دُعا کرو۔ اوہنوں اپنی صورتحال بارے بالکل اُنج ای دَسو جیویں تُسی اپنے کسے قریبی دوست نُوں دَسدے او۔ تے ایس گل دا یقین رکھو کہ اوہ تواڈی مدد کرن لئی سب کجھ کرے گا۔ (‏زبور 37:‏3، 5)‏ جے اَسی دُعا کرن چ لگے رہواں گے تے اَسی مصیبتاں چ ثابت‌قدم رہ سکاں گے۔ (‏رومیوں 12:‏12‏)‏ یہوواہ جان‌دا اے کہ اوہدے بندے کیہہ کجھ سہہ رہے نیں تے اوہ اوہناں دی فریاد سُن‌دا اے۔—‏زبور 145:‏18، 19۔ م23.‏05 ص.‏ 5، 6 پ.‏ 12-‏15

جدوں سانوں زندگی چ اہم فیصلے کرنے پیندے نیں تے اوہدوں سانوں ”‏یہوواہ دی مرضی“‏ نُوں سمجھنا چاہی دا اے تے اوہدے مطابق عمل کرنا چاہی دا اے۔ (‏اِفِسیوں 5:‏17‏)‏ جدوں اَسی کسے معاملے بارے فیصلہ کردے ویلے بائبل چوں اوہناں اصولاں نُوں لبھنے آں جیہڑے اوس معاملے تے لاگو ہوندے نیں تے اصل چ اَسی یہوواہ دی سوچ نُوں جانن دی کوشش کر رہے ہُنے آں۔ فیر جدوں اَسی اوہناں اصولاں تے عمل کرنے آں تے اَسی چنگے فیصلے کر پانے آں۔ ساڈا دُشمن ”‏شیطان“‏ سانوں دُنیا دے کماں چ ایناں مصروف رکھنا چاہندا اے کہ ساڈے کول یہوواہ دی خدمت کرن دا وقت ای نہ رہوے۔ (‏1-‏یوحنا 5:‏19‏)‏ ہوسکدا اے کہ اِک مسیحی پیسے، تلیم تے اپنے کم نُوں یہوواہ دی خدمت توں وی زیادہ اہمیت دینا شروع کر دَوے۔ جے اوہ اِنج کردا اے تے ایہدا مطلب اے کہ اوہدی سوچ تے دُنیا دا اثر ہو گیا اے۔ ایہہ گل سچ اے کہ ایہہ چیزاں غلط نئیں نیں پر ایہناں نُوں ساڈی زندگی چ سب توں زیادہ اہم نئیں ہونا چاہی دا۔ م24.‏03 ص.‏ 24 پ.‏ 16، 17