کیہہ یہوواہ میریاں دُعاواں دا جواب دَوے گا؟‏

1، 2.‏ سانوں اِنج کیوں لگ سکدا اے کہ یہوواہ ساڈیاں دُعاواں دا جواب نئیں دے رہیا؟‏

یہوواہ چ خوش رہ تے اوہ تیرے دل دِیاں مُراداں پوریاں کرے گا۔ (‏زبور 37:‏4)‏ ایہہ کِنّاں چنگا وعدہ اے!‏ پر کیہہ سانوں ایہہ سوچنا چاہی دا اے کہ اَسی یہوواہ کولوں جو وی منگاں گے اوہ سانوں فوراً دے دَوے گا؟ سانوں ایس سوال تے غور کیوں کرنا چاہی دا اے؟ ذرا ایہناں مثالاں بارے سوچو۔ اِک بھین دُعا کردی اے کہ اوہ بادشاہی دے مُناداں لئی سکول چ جاوے پر کئی سالاں بعد وی اوہنوں سکول چ نئیں بلا‌یا جاندا۔ اِک بھرا نُوں بڑی خطرناک بیماری اے تے اوہ یہوواہ کولوں دُعا کردا اے کہ اوہدی بیماری ٹھیک ہو جائے تاکہ اوہ کلیسیا چ ہور ودھ چڑھ کے خدمت کر سکے پر اوہدی صحت ٹھیک نئیں ہوندی۔ اِک ماں پیو دُعا کردے نیں کہ اوہناں دا بچہ یہوواہ دے نیڑے رہوے پر اوہ یہوواہ دی خدمت کرنا چھڈ دیندا اے۔‏

² شاید تُسی وی دُعا چ یہوواہ کولوں کجھ منگیا ہووے پر حالے تک توانوں دُعا دا جواب نئیں ملیا۔ ایہدی وجہ توں شاید توانوں لگے کہ یہوواہ صرف دُوجیاں دِیاں دُعاواں سُن‌دا اے۔ یاں شاید تُسی سوچو کہ تواڈے کولوں کوئی غلطی ہو گئی اے ایسے لئی یہوواہ نے تواڈی نئیں سُنی۔ جولیاb ناں دی اِک بھین نُوں وی اِنج ای محسوس ہویا۔ اوہنے تے اوہدے شوہر نے دُعا چ یہوواہ نُوں دَسیا کہ اوہ بیت‌ایل چ خدمت کرنا چاہندے نیں۔ بھین دَسدی اے:‏ ”‏مینوں لگیا کہ سانوں فوراً ای بیت‌ایل بلا لیا جائے گا۔“‏ پر کئی سال بعد وی اوہناں نُوں بیت‌ایل نئیں بلا‌یا گیا۔ بھین جولیا نے کہیا:‏ ”‏مَیں بوہت دُکھی ہو گئی تے سوچن لگ پئی کہ کِتے مَیں یہوواہ نُوں ناراض تے نئیں کر دِتا؟ نالے مَیں بیت‌ایل جان بارے کِنّی واری دُعا کیتی اے پر اوہنے میری دُعا دا جواب کیوں نئیں دِتا؟“‏

3.‏ ایس مضمون چ اَسی کیس بارے گل کراں گے؟‏

³ کدی کدار شاید اَسی ایہہ سوچن لگ پئیے کہ کیہہ یہوواہ ساڈیاں دُعاواں سُن‌دا وی ہے؟ ایہہ گل ماضی چ خدا دے وفادار بندیاں دے ذہن چ وی آئی۔ (‏ایوب 30:‏20؛ زبور 22:‏2؛ حبقوق 1:‏2)‏ تُسی ایہہ یقین کیوں رکھ سکدے او کہ یہوواہ تواڈیاں دُعاواں دا جواب دَوے گا؟ (‏زبور 65:‏2)‏ ایس سوال دا جواب جانن لئی اَسی ایہناں تِن گلاں تے غور کراں گے:‏ (‏1)‏جدوں اَسی دُعا کرنے آں تے یہوواہ کیہہ کردا اے؟ (‏2)‏یہوواہ ساڈے توں کیہہ چاہندا اے؟ (‏3)‏سانوں اپنیاں دُعاواں نُوں بدلنا کیوں پے سکدا اے؟‏

جدوں اَسی دُعا کرنے آں تے یہوواہ کیہہ کردا اے؟‏

4.‏ یرمیاہ 29:‏12 دے مطابق یہوواہ نے کیہہ وعدہ کیتا اے؟‏

⁴ یہوواہ نے ساڈیاں دُعاواں نُوں سُنن دا وعدہ کیتا اے۔‏ (‏یرمیاہ 29:‏12 نُوں پڑھو۔)‏ یہوواہ نُوں اپنے بندیاں نال بوہت پیار اے ایس لئی اوہ اوہناں دِیاں دُعاواں تے دھیان دیندا اے۔ (‏زبور 10:‏17؛ 37:‏28)‏ پر ایہدا مطلب ایہہ نئیں اے کہ سانوں اوہ سب کجھ مل جائے گا جو اَسی منگنے آں کیونکہ کجھ چیزاں سانوں صرف نوِیں دُنیا چ ای مل سکدیاں نیں۔‏

5.‏ یہوواہ ساڈیاں دُعاواں نُوں سُن‌دے ویلے کیس گل تے غور کردا اے؟ وضاحت کرو۔‏

⁵ یہوواہ ایس گل تے غور کردا اے کہ ساڈیاں دُعاواں دا اوہدے مقصد نال کیہہ تعلق اے۔‏ (‏یسعیاہ 55:‏8، 9)‏ یہوواہ دا مقصد ایہہ وے کہ زمین تے اوہدی حکمرانی دے تحت سارے انسان خوش رہن۔ پر شیطان نے ایہہ دعویٰ کیتا اے کہ انسان آپ حکومت کر کے خوش رہ سکدے نیں۔ (‏پیدایش 3:‏1-‏5)‏ ایس لئی یہوواہ نے انساناں نُوں حکمرانی کرن دی اجازت دِتی ہوئی اے تاکہ ثابت ہو جائے کہ شیطان دا دعویٰ جھوٹھا اے۔ انساناں دی حکمرانی دی وجہ توں اَج سانوں بوہت ساریاں مشکلاں دا سامنا کرنا پیندا اے۔ (‏واعظ 8:‏9)‏ سانوں پتہ اے کہ یہوواہ حالے ایہناں مسئلیاں نُوں حل نئیں کرے گا کیونکہ جے اوہنے اِنج کیتا تے شاید لوک سوچن کہ انسان چنگی طرحاں حکمرانی کر رہے نیں تے اوہ سارے مسئلیاں نُوں حل کر سکدے نیں۔‏

6.‏ سانوں ایس گل تے پورا یقین کیوں ہونا چاہی دا اے کہ یہوواہ جو وی کم کردا اے، اوہ محبت دی بنا تے کردا اے؟‏

⁶ یہوواہ شاید اِکو جہیاں دُعاواں دا جواب فرق فرق طریقیاں نال دَوے۔‏ مثال لئی، جدوں حزقیاہ بادشاہ بوہت بیمار سی تے اوہنے یہوواہ توں دُعا کیتی کہ اوہ اوہنوں ٹھیک کر دَوے۔ یہوواہ نے اوہدی دُعا سُنی تے اوہنوں ٹھیک کر دِتا۔ (‏2-‏سلاطین 20:‏1-‏6)‏ پر جدوں پولُس نے یہوواہ کولوں دُعا کیتی کہ اوہ اوہدی تکلیف نُوں جیہڑی اوہنوں اِک کنڈے وانگوں چبھ رہی سی، دُور کر دَوے تے اوہ دُور نئیں ہوئی۔ (‏2-‏کُرنتھیوں 12:‏7-‏9‏)‏ ذرا یعقوب تے پطرس دی مثال تے وی غور کرو۔ بادشاہ ہیرودیس اوہناں دونواں دی جان دا دُشمن بنیا ہویا سی۔ اوہناں دی کلیسیا نے پطرس تے شاید یعقوب لئی وی دُعا کیتی سی۔ پطرس نُوں اِک فرشتے نے بچا لیا پر یعقوب ماریا گیا۔ (‏اعمال 12:‏1-‏11‏)‏ شاید اَسی سوچئے کہ ”‏یہوواہ نے پطرس نُوں تے بچا لیا پر یعقوب نُوں کیوں مرن دِتا؟“‏ بائبل چ ایہدے بارے کجھ نئیں دَسیا گیا۔‏c پر اَسی ایس گل دا پکا یقین رکھ سکنے آں کہ یہوواہ انصاف کرن والا خدا اے۔ (‏اِستثنا 32:‏4)‏ سانوں ایہہ گل وی پتہ اے کہ یہوواہ پطرس تے یعقوب دونواں توں خوش سی۔ (‏مکاشفہ 21:‏14‏)‏ کدی کدار ہو سکدا اے کہ یہوواہ ساڈیاں دُعاواں دا جواب اُنج نہ دَوے جیویں اَسی چاہنے آں۔ پر سانوں ایس گل تے پورا بھروسا اے کہ یہوواہ جو وی کردا اے، اوہ بالکل صحی ہوندا اے تے محبت دی بنا تے ہوندا اے۔ ایس لئی اَسی اوہدے کماں تے سوال نئیں چُک‌دے۔—‏ایوب 33:‏13۔‏

7.‏ سانوں کیہہ کرن توں بچنا چاہی دا اے تے کیوں؟‏

⁷ سانوں اپنے حالاتاں دا مقابلہ دُوجیاں دے حالاتاں نال نئیں کرنا چاہی دا۔ مثال لئی، شاید اَسی دُعا چ یہوواہ کولوں کوئی شے منگئے پر سانوں اوہ نہ ملے۔ پر بعد چوں سانوں پتہ چلے کہ کسے ہور نے وی اوہی دُعا کیتی سی پر اوہدی سُنی گئی اے۔ بھین اینا نال وی اِنج ای ہویا۔ اوہدے شوہر میتھیو نُوں کینسر سی تے بھین نے یہوواہ کولوں دُعا کیتی سی کہ اوہ ٹھیک ہو جائے۔ اوسے دوران دو وڈیریاں بھیناں وی کینسر نال لڑ رہیاں سن۔ بھین اینا نے وار وار یہوواہ کولوں دُعا کیتی کہ اوہ اوہدے شوہر تے اوہناں بھیناں نُوں ٹھیک کر دَوے۔ اوہ بھیناں تے ٹھیک ہو گئیاں پر اوہدا شوہر فوت ہو گیا۔ شروع چ بھین اینا سوچن لگ پئی کہ جے یہوواہ نے اوہناں بھیناں نُوں ٹھیک کر دِتا اے تے اوہدے شوہر نُوں کیوں نئیں ٹھیک کیتا؟ اَسی ایہہ نئیں جان‌دے کہ اوہ بھیناں کیویں ٹھیک ہوئیاں۔پر سانوں ایہہ ضرور پتہ اے کہ یہوواہ ساڈیاں ساریاں تکلیفاں نُوں دُور کر دَوے گا تے اوہ اپنے اوہناں بندیاں نُوں زندہ کرن دی خواہش رکھدا اے جیہڑے فوت ہو گئے نیں۔—‏ایوب 14:‏15۔‏

8.‏ (‏الف)‏ یسعیاہ 43:‏2 دے مطابق یہوواہ ساڈی مدد کیویں کردا اے؟ (‏ب)‏مشکلاں چوں لنگھ‌دے ویلے دُعا کرن نال سانوں کیہہ فائدہ ہوندا اے؟ (‏ویڈیو ‏”‏دُعا مشکل گھڑی چ اِطمینان بخشدی اے‏“‏ نُوں ویکھو۔)‏

⁸ یہوواہ ہمیشاں ساڈی مدد کردا اے۔‏ ساڈا اسمانی باپ یہوواہ پیار کرن والا خدا اے۔ اوہ سانوں تکلیف چ نئیں ویکھ سکدا۔ (‏یسعیاہ 63:‏9)‏ پر اوہ ساڈے تے آن والیاں ساریاں مشکلاں نُوں نئیں روکدا جیہڑیاں سیلاب تے اَگ ورگیاں ہو سکدیاں نیں۔ ‏(‏یسعیاہ 43:‏2 نُوں پڑھو۔)‏ پر اوہنے وعدہ کیتا اے کہ اوہ ایہناں چوں لنگھ‌دے ویلے ساڈی مدد کرے گا تاکہ کوئی وی مشکل سانوں اوہدے توں دُور نہ کر دَوے۔یہوواہ اپنی پاک روح دے ذریعے وی سانوں مشکلاں نُوں برداشت کرن دی طاقت دیندا اے۔ (‏لُوقا 11:‏13؛‏ فِلپّیوں 4:‏13‏)‏ ایس لئی اَسی پورا یقین رکھ سکنے آں کہ مشکلاں نُوں برداشت کرن تے اوہدے وفادار رہن چ یہوواہ اپنے بندیاں دی مدد کرے گا۔‏d

یہوواہ ساڈے توں کیہہ چاہندا اے؟‏

9.‏ یعقوب 1:‏6، 7 دے مطابق سانوں ایس گل تے بھروسا کیوں رکھنا چاہی دا اے کہ یہوواہ ساڈی مدد کرے گا؟‏

⁹ یہوواہ چاہندا اے کہ اَسی اوہدے تے بھروسا رکھیئے۔‏ (‏عبرانیوں 11:‏6‏)‏ کدی کدار شاید اَسی مشکلاں دی وجہ توں اینے پریشان ہو جائیے کہ اَسی سوچن لگ پئیے کہ پتہ نئیں یہوواہ ساڈی مدد کرے گا یاں نئیں۔ پر بائبل چ سانوں ایس گل دا یقین دَوایا گیا اے کہ خدا دی مدد نال اَسی مشکلاں دی اُچی دیوار نُوں پار کر سکنے آں۔ (‏زبور 18:‏29)‏ ایس لئی سانوں شک نئیں کرنا چاہی دا سگوں پورے ایمان نال یہوواہ توں دُعا کرنی چاہی دی اے تے ایس گل دا بھروسا رکھنا چاہی دا اے کہ یہوواہ ساڈیاں دُعاواں دا جواب دَوے گا۔‏‏—‏یعقوب 1:‏6، 7 نُوں پڑھو۔‏

10.‏ مثال دے کے دَسو کہ اَسی دُعا کرن دے نال نال ہور کیہہ کر سکنے آں؟‏

¹⁰ یہوواہ چاہندا اے کہ اَسی دُعا کرن دے نال نال آپ وی کجھ کریئے۔‏ مثال لئی، شاید اِک بھرا دُعا چ یہوواہ نُوں کہوے کہ اوہنوں اوہدے کم توں چھٹی مل جائے تاکہ اوہ کنونشن تے جا سکے۔ یہوواہ اوس دُعا دا جواب کیہڑے طریقیاں نال دے سکدا اے؟ ہو سکدا اے کہ یہوواہ اوہنوں دلیری دَوے تاکہ اوہ اپنے مالک نال گل کر سکے۔ پر اوس بھرا نُوں دُعا کرن دے نال نال آپ وی کجھ کرن دی لوڑ اے۔ شاید اوہنوں وار وار اپنے مالک نال گل کرنی پووے یاں اوہنوں کسے ہور دن کم کرنا پووے۔ یاں شاید اوہ اوہنوں ایہہ کہہ سکدا اے کہ اوہ اوہدیاں چھٹیاں دے پیسے کٹ لوے۔‏

11.‏ سانوں کسے معاملے بارے وار وار دُعا کیوں کرنی چاہی دی اے؟‏

¹¹ یہوواہ چاہندا اے کہ اَسی اپنے معاملیاں بارے وار وار دُعا کریئے۔‏ (‏1-‏تھسلُنیکیوں 5:‏17‏)‏ یسوع نے جیہڑی گل کہی اوہدے توں پتہ چلدا اے کہ سانوں ساڈیاں دُعاواں دا جواب فوراً نئیں مل جائے گا۔ (‏لُوقا 11:‏9‏)‏ ایس لئی ہمت نہ ہارو سگوں دلوں دُعا کردے رہوو۔ (‏لُوقا 18:‏1-‏7‏)‏ جدوں اَسی کسے معاملے بارے یہوواہ کولوں وار وار دُعا کرنے آں تے اَسی ظاہر کرنے آں کہ ساڈے لئی اوہ معاملہ اہم اے۔ نالے اَسی ایہہ وی ظاہر کرنے آں کہ سانوں پورا یقین اے کہ یہوواہ ساڈی مدد کر سکدا اے۔‏

سانوں اپنیاں دُعاواں نُوں بدلنا کیوں پے سکدا اے؟‏

12.‏ (‏الف)‏ سانوں اپنیاں دُعاواں بارے اپنے آپ کولوں کیہڑا سوال پچھنا چاہی دا اے تے کیوں؟ (‏ب)‏اَسی کیہہ کر سکنے آں تاکہ ساڈیاں دُعاواں توں یہوواہ لئی عزت ظاہر ہوئے؟ (‏بکس ‏”‏کیہہ میریاں دُعاواں توں یہوواہ لئی عزت ظاہر ہوندی اے؟‏‏“‏ نُوں ویکھو۔)‏

¹² جے سانوں اوہ چیز نئیں مِلدی جیہڑی اَسی دُعا چ یہوواہ کولوں منگ رہے آں تے سانوں اپنے آپ کولوں تِن سوال پچھنے چاہی دے نیں۔ پہلا،‏‏”‏کیہہ مَیں صحی چیز لئی دُعا کر رہیا واں؟“‏ اکثر سانوں لگدا اے کہ سانوں پتہ اے کہ ساڈے لئی کیہہ بہتر اے۔ پر ہو سکدا اے کہ اَسی دُعا چ جو منگ رہے آں، اوہدا سانوں بوہتا فائدہ نہ ہووے۔ جے اَسی کسے مسئلے بارے دُعا کر رہے آں تے ہو سکدا اے کہ جو اَسی سوچ رہے آں اوہ اوس مسئلے دا بہتر حل نہ ہووے تے ایہہ وی ہو سکدا اے کہ ساڈیاں دُعاواں یہوواہ دی مرضی مطابق نہ ہون۔ (‏1-‏یوحنا 5:‏14‏)‏ ذرا اِک ماں پیو دی مثال تے غور کرو جنہاں دا ذکر پہلے پیراگراف چ کیتا گیا سی۔ اوہناں نے یہوواہ کولوں دُعا کیتی سی کہ اوہناں دا بچہ کدی وی یہوواہ توں دُور نہ ہووے۔ ایس بارے دُعا کرنا صحی اے۔ پر یہوواہ ساڈے چوں کسے نُوں وی اپنی عبادت کرن لئی مجبور نئیں کردا۔ اوہ چاہندا اے کہ اَسی سارے، ایتھوں تک کہ ساڈے بچے وی اوہدی عبادت کرنا دا فیصلہ دلوں کرن۔ (‏اِستثنا 10:‏12، 13؛ 30:‏19، 20)‏ ایس لئی ماں پیو یہوواہ کولوں ایہہ دُعا کر سکدے نیں کہ یہوواہ بچیاں دے دل تک پونچن چ اوہناں دی مدد کرے تاکہ بچیاں دے دل چ اوہدے لئی محبت ودھے تے اوہ اوہدے دوست بنن۔—‏امثال 22:‏6؛‏ اِفسیوں 6:‏4‏۔‏

13.‏ عبرانیوں 4:‏16 دے مطابق یہوواہ ساڈی مدد کدوں کرے گا؟ وضاحت کرو۔‏

¹³ دُوجا سوال اَسی اپنے آپ کولوں ایہہ پچھ سکنے آں:‏ ‏”‏کیہہ یہوواہ دی نظر چ میری دُعا دا جواب دین دا ایہہ صحی وقت اے؟“‏ شاید سانوں لگے کہ سانوں اپنیاں دُعاواں دا جواب فوراً ملنا چاہی دا اے۔ پر یہوواہ بہتر جان‌دا اے کہ مدد کرن دا صحی ویلا کیہڑا اے۔ ‏(‏عبرانیوں 4:‏16 نُوں پڑھو۔)‏ جدوں سانوں فوراً اوہ نئیں مِلدا جو اَسی یہوواہ کولوں منگیا اے تے شاید سانوں لگے کہ یہوواہ دا جواب ”‏نہ“‏ اے۔ پر ہو سکدا اے کہ یہوواہ دا جواب ہوئے ”‏حالے نئیں۔“‏ ذرا فیر توں اوس بھرا بارے سوچو جنہے دُعا کیتی سی کہ اوہدی خطرناک بیماری ٹھیک ہو جائے۔ جے یہوواہ معجزہ کر کے اوہدی بیماری ٹھیک کر دیندا تے شیطان نُوں ایہہ اِلزام لان دا موقع مل جاندا کہ اوہ بھرا یہوواہ دی خدمت صرف ایسے لئی کر رہیا اے کیونکہ یہوواہ نے اوہنوں ٹھیک کر دِتا اے۔ (‏ایوب 1:‏9-‏11؛ 2:‏4)‏ ایہدے علاوہ یہوواہ نے اِک وقت طے کیتا ہویا اے جدوں اوہ ساریاں بیماریاں نُوں ختم کر دَوے گا۔ (‏یسعیاہ 33:‏24؛‏ مکاشفہ 21:‏3، 4‏)‏ جدوں تک اوہ وقت نئیں آندا سانوں ایہہ نئیں سوچنا چاہی دا کہ یہوواہ کوئی معجزہ کر کے ساڈی بیماری ٹھیک کر دَوے گا۔ ایس لئی بھرا یہوواہ کولوں ایہہ دُعا کر سکدا اے کہ اوہ اوہنوں ہمت تے دلی سکون دَوے تاکہ اوہ اپنی بیماری نال لڑ سکے تے وفاداری نال اوہدی خدمت کردا رہوے۔—‏زبور 29:‏11۔‏

14.‏ تُسی بھین جولیا دی مثال توں کیہہ سکھیا اے؟‏

¹⁴ ذرا فیر توں بھین جولیا دی مثال تے غور کرو جنہے بیت‌ایل چ خدمت کرن بارے دُعا کیتی سی۔ 5 سالاں بعد اوہ سمجھ گئی کہ یہوواہ نے اوہدی دُعا دا جواب کیویں دِتا اے۔ بھین جولیا کہندی اے:‏ ”‏ایس پورے وقت دے دوران یہوواہ نے مینوں بوہت کجھ سکھایا اے تے اِک بہتر مسیحی بنن چ میری مدد کیتی اے۔ مینوں اوہدے تے اپنے بھروسے نُوں ودھان دی لوڑ سی تے بائبل دا مطالعیا کرن دی اپنی عادت نُوں بہتر بنان دی لوڑ سی۔ نالے مینوں ایہہ سمجھن دی لوڑ سی کہ مَیں جتھے وی یہوواہ دی خدمت کر رہی آں، اوہدے توں مینوں خوشی مل سکدی اے۔“‏ بعد چوں بھین دے شوہر نُوں حلقے دا نگہبان بنا دِتا گیا۔ اوس وقت بارے سوچدے ہوئیاں بھین جولیا نے کہیا:‏ ”‏یہوواہ نے میریاں دُعاواں دا جواب دِتا اے پر اونویں نئیں جیویں مَیں سوچیا سی۔ مینوں ایہہ سمجھن چ تھوڑا وقت لگیا کہ یہوواہ نے کِنّے ودھیا طریقے نال میری دُعا دا جواب دِتا اے۔ پر مَیں یہوواہ دی بوہت شکرگزار آں کہ مینوں اوہدی محبت تے مہربانی ویکھن دا موقع ملیا۔“‏

15.‏ کدی کدار سانوں دُعا چ کسے خاص شے دے علاوہ ہور درخاستاں دا ذکر کیوں کرنا چاہی دا اے؟ (‏تصویراں نُوں وی ویکھو۔)‏

¹⁵ تیجا سوال اَسی اپنے آپ کولوں ایہہ پچھ سکنے آں:‏ ‏”‏کیہہ مینوں کسے ہور شے بارے دُعا کرنی چاہی دی اے؟“‏ دُعا چ کسے خاص شے دا ذکر کرنا چنگی گل اے پر جے اَسی جاننا چاہنے آں کہ یہوواہ ساڈے توں کیہہ چاہندا اے تے شاید سانوں اپنیاں دُعاواں نُوں بدلن دی لوڑ ہووے۔ ذرا اوس بھین دی مثال تے غور کرو جنہے بادشاہی دے مُناداں لئی سکول چ جان بارے دُعا کیتی سی۔ سکول چ اوہ ایس لئی جانا چاہندی سی تاکہ اوہ اوس جگہ جا کے خدمت کر سکے جتھے مبشراں دی زیادہ ضرورت اے۔ ایس لئی اوہ سکول چ جان بارے دُعا کرن دے نال نال یہوواہ نُوں ایہہ وی کہہ سکدی اے کہ اوہ دُوجے طریقیاں نال خدمت کرن چ اوہدی مدد کرے۔ (‏اعمال 16:‏9، 10‏)‏ ایہدے علاوہ اوہ دُعا کرن دے نال نال آپ وی کجھ کر سکدی اے۔ اوہ حلقے دے نگہبان کولوں پچھ سکدی اے کہ کیہہ آلے دوالے دِیاں کلیسیاواں چ ہور پہل‌کاراں دی لوڑ ہے وے۔ یاں اوہ برانچ نُوں خط لکھ کے پچھ سکدی اے کہ کیہہ کوئی ایہو جہی جگہ ہے جتھے زیادہ مبشراں دی لوڑ اے۔‏e

16.‏ اَسی کیہڑی گل دا پکا یقین رکھ سکنے آں؟‏

¹⁶ اَسی سکھ لیا اے کہ اَسی ایس گل دا پکا یقین رکھ سکنے آں کہ یہوواہ ساڈیاں دُعاواں دا جواب بڑے پیار نال تے سب توں ودھیا طریقے نال دَوے گا۔ (‏زبور 4:‏3؛ یسعیاہ 30:‏18)‏ کدی کدار شاید سانوں اپنیاں دُعاواں دا اوہ جواب نہ ملے جو اَسی سوچیا ہویا اے۔ پر یہوواہ کدی وی ساڈیاں دُعاواں نُوں نظرانداز نئیں کردا۔ اوہ ساڈے نال بوہت پیار کردا اے تے اوہ کدی وی سانوں کلّا نئیں چھڈے گا۔ (‏زبور 9:‏10)‏ ایس لئی ہمیشاں یہوواہ تے پورا بھروسا رکھو تے دل کھول کے اوہدے کولوں دُعا کردے رہوو۔—‏زبور 62:‏8۔‏