نھیرے توں دُور رہ کے روشنی چ چلدے رہوو

1، 2.‏ (‏الف)‏جدوں پولُس رسول نے اِفِسیوں دے ناں خط لکھیا تے اوس ویلے اوہدے حالات کیہو جہے سن؟ (‏ب)‏ایس مضمون چ اَسی کیہڑے سوالاں دے جواب حاصل کراں گے؟‏

جدوں پولُس روم چ اپنے گھر وچ قید سی تے اوہدوں وی اوہ اپنے بھین بھراواں دا حوصلہ ودھانا چاہندا سی۔ اوہ اوہناں نُوں جا کے نئیں مل سکدا سی۔ ایس لئی اوہنے اوہناں نُوں خط لکھے۔ ایہناں وچوں اِک خط اوہنے اِفسس دے مسیحیاں نُوں 60 یاں 61 عیسوی چ لکھیا۔—‏اِفِسیوں 1:‏1؛‏ 4:‏1‏۔‏

² ایس توں 10 سال پہلاں پولُس کجھ عرصے لئی اِفسس چ رہیا سی تے اوتھے اوہنے لوکاں نُوں خوش‌خبری دا پیغام سنایا سی تے تلیم دِتی سی۔ (‏اعمال 19:‏1،‏ 8-‏10؛‏ 20:‏20، 21‏)‏ پولُس اپنے بھین بھراواں نال بوہت پیار کردا سی۔ ایس لئی اوہ چاہندا سی کہ اوہ یہوواہ دے وفادار رہن۔ پر اوہنے پاک روح نال مسح ہوئے مسیحیاں نُوں خط لکھدے ویلے نھیرے تے روشنی دا ذکر کیوں کیتا؟ تے پولُس نے ایس خط چ جیہڑیاں گلاں لکھیاں، اوہناں توں اَسی کیہہ سکھنے آں؟ آؤ ایہناں سوالاں دے جواب حاصل کرنے آں۔‏

نھیرے توں روشنی دا سفر

3.‏ پولُس نے اِفسس دے مسیحیاں نُوں خط لکھدے ویلے کیہڑے دو لفظ استمال کیتے؟‏

³ پولُس نے اِفسس دے مسیحیاں نُوں کہیا:‏”‏تُسی پہلاں نھیرے چ سو، پر ہُن تُسی روشنی چ آ گئے او۔“‏ (‏اِفِسیوں 5:‏8‏)‏ نھیرا تے روشنی اِک دُوجے دے اُلٹ نیں۔ ایس لئی ایہناں لفظاں نُوں استمال کر کے پولُس سمجھانا چاہ رہیا سی کہ اِفسس چ رہن والے مسیحیاں نے اپنے آپ نُوں کِنّاں بدل لیا اے۔ آؤ ویکھنے آں کہ پولُس نے ایہہ کیوں کہیا کہ اِفسس چ رہن والے مسیحی ”‏نھیرے“‏ چ سن۔‏

4.‏ کیہڑیاں گلاں دی وجہ توں ایہہ کہیا جا سکدا اے کہ اِفسس دے لوک مذہبی لحاظ نال نھیرے چ سن؟‏

⁴ مذہبی لحاظ نال نھیرے چ۔‏ سچائی سکھن توں پہلاں اِفسس چ رہن والے مسیحی جھوٹھے مذہبی عقیدیاں تے جادو ٹونے دے غلام سن۔ شہر اِفسس چ ارتمس دیوی دا اِک بڑا مشہور مندر سی جنہوں اوس ویلے دُنیا دے سَت عجوبیاں وچوں اِک منیا جاندا سی۔ لوک اوتھے جا کے بُت‌پرستی کردے سن۔ اِفسس دے لوک ارتمس دیوی تے اوہدے مندر دے بُت بناندے سن تے ایہناں نُوں ویچ کے بڑے پیسے کماندے سن۔ (‏اعمال 19:‏23-‏27‏)‏ ایہدے علاوہ ایہہ شہر جادو ٹونے دی وجہ توں وی بڑا مشہور سی۔—‏اعمال 19:‏19‏۔‏

5.‏ کیہڑیاں گلاں دی وجہ توں ایہہ کہیا جا سکدا اے کہ اِفسس دے لوک چال‌چلن دے لحاظ نال نھیرے چ سن؟‏

⁵ چال‌چلن دے لحاظ نال نھیرے چ۔‏ شہر اِفسس دے لوک جنسی بدکاری کرن لئی مشہور سن تے اوہناں نُوں اِنج کرن چ کوئی شرم نئیں آندی سی۔ جدوں شہر دے وڈے وڈے تھیٹراں چ ڈرامے ہوندے سن تے اوہناں چ بے‌ہودہ گلاں کیتیاں جاندیاں سن، ایتھوں تک کہ اوہناں دے مذہبی تہواراں چ وی اِنج ہوندا سی۔ (‏اِفِسیوں 5:‏3‏)‏ ایس شہر دے زیادہ‌تر لوک ”‏بے‌شرمی دِیاں ساریاں حداں پار“‏ کر چُکے سن۔ جنہاں لفظاں دا ترجمہ ”‏بے‌شرمی دِیاں ساریاں حداں پار کرنا“‏ کیتا گیا اے، اوہناں دا مطلب اے ”‏سُن ہو جانا۔“‏ (‏اِفِسیوں 4:‏17-‏19‏)‏ صحی تے غلط بارے یہوواہ دے معیار سکھن توں پہلاں اِفسس چ رہن والے مسیحیاں دا ضمیر سُن سی تے اوہناں نُوں ایس گل دی کوئی پرواہ نئیں سی کہ یہوواہ اوہناں دے کماں بارے کیہہ سوچدا اے۔ ایس لئی پولُس نے اوہناں نُوں کہیا کہ ”‏اوہناں دی عقل اُتے نھیرا چھایا ہویا“‏ سی تے ”‏اوہ اوس زندگی توں بوہت دُور“‏ سن ”‏جیہڑی خدا وَلّوں مِلدی اے۔“‏

6.‏ پولُس نے اِفسس دے مسیحیاں نُوں ایہہ کیوں کہیا کہ ہُن اوہ روشنی چ نیں؟‏

⁶ اِفسس چ رہن والے کجھ لوک نھیرے چوں نکل آئے۔ پولُس نے اوہناں نُوں کہیا:‏ ”‏ہُن تُسی مالک نال اِک مُٹھ ہون دی وجہ توں روشنی چ آ گئے او۔“‏ (‏اِفِسیوں 5:‏8‏)‏ اوہناں نے خدا دے کلام دے مطابق زندگی گزارنی شروع کر دِتی سی جیہڑا اوہناں لئی روشنی وانگوں سی۔ (‏زبور 119:‏105)‏ ایہناں لوکاں نے جھوٹھے مذہبی رواجاں تے جنسی بدکاری نُوں چھڈ دِتا سی۔ اوہناں نے ”‏خدا دی مثال تے عمل“‏ کرنا شروع کر دِتا سی تے پورے دل و جان نال اوہدی عبادت کرن تے اوہنوں خوش کرن دی کوشش کر رہے سن۔—‏اِفِسیوں 5:‏1‏۔‏

7.‏ اَسی کیس لحاظ نال اِفسس دے مسیحیاں وانگوں آں؟‏

⁷ اَسی وی پاک کلام توں سچائی سکھن توں پہلاں مذہبی لحاظ نال تے چال‌چلن دے لحاظ نال نھیرے چ ساں۔ ساڈے وچوں کجھ جھوٹھے مذہبی تہوار مناندے سن تے کجھ بدکار زندگی گزاردے سن۔ پر جدوں اَسی صحی تے غلط بارے یہوواہ دے معیار سکھ لئے تے اَسی اپنے آپ نُوں بدل لیا۔ اَسی یہوواہ دے معیاراں مطابق زندگی گزارنی شروع کر دِتی تے ایس وجہ توں سانوں بوہت ساریاں برکتاں مِلیاں نیں۔ (‏یسعیاہ 48:‏17)‏ پر اَسی جیہڑے نھیرے چوں نکل آئے آں، اوہدے توں دُور رہنا ہمیشاں اسان نئیں ہوندا۔ ایس لئی ایہہ بوہت ضروری اے کہ اَسی ”‏روشنی دے پُتراں وانگوں چلدے“‏ رہیے۔ پر اَسی اِنج کیویں کر سکنے آں؟‏

Image digitally reproduced with the permission of the Papyrology Collection‎,‎ Graduate Library‎,‎ University of Michigan‎,‎ P‎.‎Mich‎.‎inv‎.‎ 6238‎.‎ Licensed under CC by 3‎.‎0

نھیرے توں دُور رہوو

8.‏ اِفِسیوں 5:‏3-‏5 دے مطابق اِفسس چ رہن والے مسیحیاں نُوں کیہڑے کماں توں بچن دی لوڑ سی؟‏

⁸ اِفِسیوں 5:‏3-‏5 نُوں پڑھو۔‏ اِفسس چ رہن والے مسیحیاں نُوں روشنی چ چلدے رہن لئی ہر اوس کم توں بچن دی لوڑ سی جدے توں یہوواہ ناراض ہوندا اے۔ ایہدے چ صرف جنسی بدکاری ای نئیں سگوں بے‌ہودہ گلاں وی شامل سن۔ پولُس نے اِفسس چ رہن والے مسیحیاں نُوں ایہہ گل یاد دَوائی کہ جے اوہ ”‏مسیح تے خدا دی بادشاہی“‏ دے وارث بننا چاہندے نیں تے اوہناں نُوں ایہو جہے کماں توں دُور رہن دی لوڑ اے۔‏

9.‏ سانوں ہر اوس چیز توں کیوں بچنا چاہی دا اے جدی وجہ توں اَسی جنسی بدکاری کرن دے خطرے چ پے سکنے آں؟‏

⁹ سانوں اوہناں فضول کماں توں بچن دی سخت کوشش کرنی چاہی دی اے ”‏جیہڑے نھیرے چ چلن والے لوک کردے نیں۔“‏ (‏اِفِسیوں 5:‏11‏)‏ ایہہ گل بالکل سچ اے کہ جِنّاں زیادہ اِک بندہ ناپاک تے بے‌ہودہ چیزاں نُوں ویکھدا اے، اوہناں بارے سُن دا اے یاں اوہناں بارے گل کردا اے؛ اوناں زیادہ اوہ اوہناں نُوں کرن دے خطرے چ پیندا اے۔ (‏پیدائش 3:‏6؛‏ یعقوب 1:‏14، 15‏)‏ اِک ملک چ ساڈے کجھ بھراواں نے سوشل میڈیا تے اِک گروپ بنایا تے اوہ اوہدے چ اِک دُوجے نُوں میسج کرن لگ پئے۔ شروع چ تے اوہ بائبل دِیاں سچائیاں بار ے گل کردے سن۔ پر وقت دے نال نال اوہ گندیاں گلاں کرن لگ پئے۔ ایہناں چوں بوہت ساریاں نے بعد چوں دَسیا کہ اوہ ایہو جہی گل بات دی وجہ توں جنسی بدکاری کر بیٹھے۔‏

10.‏ شیطان سانوں کیویں دھوکھا دیندا اے؟ (‏اِفِسیوں 5:‏6‏)‏

¹⁰ شیطان دی دُنیا سانوں دھوکھا دین لئی ایس گل دا یقین دَواندی اے کہ جیہڑے کم یہوواہ دی نظر چ بدچلن تے ناپاک نیں، اصل چ اوہ غلط نئیں نیں۔ (‏2-‏پطرس 2:‏19‏)‏ ایہہ اوہدی کوئی نوِیں چال نئیں اے۔ اوہ شروع توں ای لوکاں دِیاں عقلاں نُوں اَنھا کردا آ رہیا اے تاکہ اوہناں نُوں سمجھ ای نہ آئے کہ صحی کیہہ اے تے غلط کیہہ اے۔ (‏یسعیاہ 5:‏20؛‏ 2-‏کُرنتھیوں 4:‏4‏)‏ ایسے وجہ توں اَج کل فلماں، ڈرامیاں تے اِنٹرنیٹ تے ایہو جہے کماں نُوں اِنج وکھایا جاندا اے جیویں اوہ صحی ہون۔ پر اصل چ اوہ یہوواہ دے اصولاں دے خلاف نیں۔ شیطان چاہندا اے کہ اَسی ایہہ سوچن لگ پئیے کہ ناپاک کم کرنا تے بدچلن زندگی گزارنا نہ صرف صحی اے سگوں ایہدے چ مزہ وی آندا اے تے سانوں کوئی نقصان وی نئیں ہوندا۔—‏اِفِسیوں 5:‏6 نُوں پڑھو۔‏

11.‏ بھین اینجلا دے تجربے توں ایہہ کیویں پتہ چلدا اے کہ اِفِسیوں 5:‏7 چ لکھی گل تے عمل کرنا بوہت ضروری اے؟ (‏تصویر نُوں وی ویکھو۔)‏

¹¹ شیطان چاہندا اے کہ اَسی ایہو جہے لوکاں نال وقت گزارئیے جیہڑے یہوواہ دے معیاراں تے نئیں چلدے۔ ایس لئی پولُس نے اِفسس چ رہن والے مسیحیاں نُوں کہیا کہ ”‏اوہناں دے کماں چ شامل نہ ہووو“‏ جیہڑے خدا دی نظر چ غلط کم کردے نیں۔ (‏اِفِسیوں 5:‏7‏)‏ سانوں یاد رکھنا چاہی دا اے کہ ساڈے ساتھی صرف اوہ لوک نئیں ہوندے جنہاں نال اَسی آمنے سامنے وقت گزارنے آں سگوں ایہدے چ اوہ لوک وی شامل نیں جنہاں دی ویڈیوز اَسی سوشل میڈیا تے ویکھنے آں یاں اوہناں نال گل کرنے آں۔ سوشل میڈیا اِک ایہو جیہا خطرہ اے جدا اِفسس چ رہن والے مسیحیاں نُوں سامنا نئیں سی۔ ایشیا چ رہن والی اِک بھین جدا ناں اینجلا اے،‏a اوہنے ویکھیا کہ سوشل میڈیا کِنّاں خطرناک ہو سکدا اے۔ اوہنے کہیا:‏ ”‏ایہہ اِک پھندا اے جیہڑا آہستہ آہستہ تواڈے ضمیر نُوں سُن کر دیندا اے۔ میری زندگی چ اِک وقت آیا جدوں مینوں اوہناں لوکاں نال دوستی کرنا غلط نئیں لگدا سی جیہڑے بائبل دے اصولاں تے نئیں چلدے سن۔ اخیر مینوں ایہہ لگن لگ پیا کہ یہوواہ دے معیاراں دےخلاف جان چ کوئی حرج نئیں۔“‏ پر بھین اینجلا دی کلیسیا دے بزرگاں نے بڑے پیار نال اوہدی مدد کیتی تاکہ اوہ اپنے آپ نُوں بدل سکے۔ اوہ کہندی اے:‏ ”‏ہُن مَیں اپنا دھیان سوشل میڈیا دی بجائے اوہناں گلاں تے رکھنی آں جنہاں توں یہوواہ خوش ہوئے۔“‏

12.‏ کیہڑی چیز ساڈی مدد کرے گی کہ اَسی صحی غلط بارے یہوواہ دے معیاراں تے چلدے رہیے؟‏

¹² شیطان دی دُنیا لوکاں دے اندر ایہہ سوچ پیدا کردی اے کہ بدکار زندگی گزارن چ کوئی حرج نئیں اے۔ (‏اِفِسیوں 4:‏19، 20‏)‏ پر سانوں چنگی طرحاں پتہ اے کہ ایہہ سوچ غلط اے۔ فیر وی اَسی اپنے آپ کولوں پچھ سکنے آں:‏ ”‏کیہہ مَیں پوری کوشش کرنا واں کہ مَیں اپنے نال کم کرن والے، اپنے نال پڑھن والے تے دُوجے ایہو جہے لوکاں نال بلا‌وجہ وقت نہ گزاراں جیہڑے یہوواہ دے معیاراں تے نئیں چلدے؟ کیہہ مَیں یہوواہ دے معیاراں تے قائم رہنا واں، فیر بھانویں لوک مینوں سخت ای کیوں نہ کہن؟“‏ 2-‏تیمُتھیُس 2:‏20-‏22 دے مطابق سانوں کلیسیا چ وی دوست بناندے ویلے سمجھ‌داری نال کم لینا چاہی دا اے۔ سانوں یاد رکھنا چاہی دا اے کہ ہر کوئی یہوواہ دا وفادار رہن چ ساڈی مدد نئیں کر سکدا۔‏

‏”‏روشنی دے پُتراں وانگوں چلدے رہوو“‏

13.‏ ”‏روشنی دے پُتراں وانگوں“‏ چلن دا کیہہ مطلب اے؟ (‏اِفِسیوں 5:‏7-‏9‏)‏

¹³ پولُس رسول نے اِفسس چ رہن والے مسیحیاں نُوں نصیحت کیتی کہ اوہ نہ صرف نھیرے توں دُور رہن سگوں ”‏روشنی دے پُتراں وانگوں“‏ وی چلدے رہن۔ ‏(‏اِفِسیوں 5:‏7-‏9 نُوں پڑھو۔)‏ صاف لفظاں چ ایہدا مطلب ایہہ وے کہ اَسی ہر ویلے اپنا چال‌چلن یہوواہ دی مرضی دے مطابق رکھئے۔ اِنج کرن دا اِک طریقہ ایہہ وے کہ اَسی دھیان نال بائبل پڑھئے تے ایہدے چ لکھیاں گلاں نُوں سمجھن لئی تنظیم دِیاں کتاباں تے رسالیاں چوں مدد لئیے۔ ایہہ بوہت ضروری اے کہ اَسی یسوع مسیح دی مثال تے اوہدی تلیم تے خاص طور تے دھیان دَئیے کیونکہ یسوع ”‏دُنیا دا چانن“‏ اے۔—‏یوحنا 8:‏12؛‏ اَمثال 6:‏23۔‏

14.‏ پاک روح ساڈی مدد کیویں کر سکدی اے؟‏

¹⁴ ”‏روشنی دے پُتراں وانگوں“‏ چلدے رہن لئی سانوں خدا دی پاک روح دی وی لوڑ اے۔ پر کیوں؟ کیونکہ ایس بدچلن دُنیا چ اپنا چال‌چلن پاک رکھنا اسان نئیں اے۔ (‏1-‏تھسلُنیکیوں 4:‏3-‏5،‏ 7، 8‏)‏ پاک روح ساڈی مدد کردی اے کہ اَسی دُنیا دی سوچ دا مقابلہ کرئیے جدے چ اوہ فلسفے تے نظریے شامل نیں جیہڑے خدا دی سوچ دے خلاف نیں۔ پاک روح ساڈی ایہہ مدد وی کردی اے کہ اَسی ہر طرحاں دا ”‏بھلا کم“‏ کرئیے تے ”‏نیک“‏ بنئے۔—‏اِفِسیوں 5:‏9‏۔‏

15.‏ سانوں پاک روح کیویں مِل سکدی اے؟ (‏اِفِسیوں 5:‏19، 20‏)‏

¹⁵ پاک روح حاصل کرن دا اِک طریقہ ایہہ وے کہ اَسی ایہدے لئی دُعا کرئیے۔ یسوع نے کہیا سی کہ یہوواہ اوہناں نُوں پاک روح ضرور دَوے گا جیہڑے اوہدے کولوں منگدے نیں۔ (‏لُوقا 11:‏13‏)‏ جدوں اَسی عبادتاں تے اپنے بھین بھراواں نال مِل کے یہوواہ دی وڈیائی کرنے آں تے اوہدوں وی سانوں پاک روح مِلدی اے۔ ‏(‏اِفِسیوں 5:‏19، 20 نُوں پڑھو۔)‏ ایہہ پاک روح ساڈی مدد کردی اے کہ اَسی ایس طرحاں زندگی گزارئیے جدے توں یہوواہ خوش ہوئے۔‏

16.‏ کیہڑی چیز چنگے فیصلے کرن چ ساڈی مدد کرے گی؟ (‏اِفِسیوں 5:‏10،‏ 17‏)‏

¹⁶ جدوں سانوں زندگی چ اہم فیصلے کرنے پیندے نیں تے اوہدوں سانوں ”‏یہوواہ دی مرضی“‏ نُوں سمجھنا چاہی دا اے تے اوہدے مطابق عمل کرنا چاہی دا اے۔ ‏(‏اِفِسیوں 5:‏10،‏ 17 نُوں پڑھو۔)‏ جدوں اَسی کسے معاملے بارے فیصلہ کردے ویلے بائبل چوں اوہناں اصولاں نُوں لبھنے آں جیہڑے اوس معاملے تے لاگو ہوندے نیں تے اصل چ اَسی یہوواہ دی سوچ نُوں جانن دی کوشش کر رہے ہُنے آں۔ فیر جدوں اَسی اوہناں اصولاں تے عمل کرنے آں تے اَسی چنگے فیصلے کر پانے آں۔‏

17.‏ اَسی اپنے وقت نُوں سمجھ‌داری نال کیویں استمال کر سکنے آں؟ (‏اِفِسیوں 5:‏15، 16‏)‏ (‏تصویر نُوں وی ویکھو۔)‏

¹⁷ پولُس نے اِفسس چ رہن والے مسیحیاں نُوں ایہہ وی کہیا کہ اوہ اپنے وقت نُوں سمجھ‌داری نال استمال کرن۔ ‏(‏اِفِسیوں 5:‏15، 16 نُوں پڑھو۔)‏ ساڈا دُشمن ”‏شیطان“‏ سانوں دُنیا دے کماں چ ایناں مصروف رکھنا چاہندا اے کہ ساڈے کول یہوواہ دی خدمت کرن دا وقت ای نہ رہوے۔ (‏1-‏یوحنا 5:‏19‏)‏ ہوسکدا اے کہ اِک مسیحی پیسے، تلیم تے اپنے کم نُوں یہوواہ دی خدمت توں وی زیادہ اہمیت دینا شروع کر دَوے۔ جے اوہ اِنج کردا اے تے ایہدا مطلب اے کہ اوہدی سوچ تے دُنیا دا اثر ہو گیا اے۔ ایہہ گل سچ اے کہ ایہہ چیزاں غلط نئیں نیں پر ایہناں نُوں ساڈی زندگی چ سب توں زیادہ اہم نئیں ہونا چاہی دا۔ جے اَسی چاہنے آں کہ اَسی ”‏روشنی دے پُتراں وانگوں“‏ چلدے رہیے تے ایہدے لئی ضروری اے کہ اَسی ”‏اپنے وقت نُوں سمجھ‌داری نال استمال“‏ کرئیے تے اوہناں چیزاں نُوں اہمیت دَئیے جیہڑیاں واقعی اہم نیں۔‏

18.‏ بھرا ڈیوڈ نے اپنے وقت نُوں سمجھ‌داری نال استمال کرن لئی کیہہ کیتا؟‏

¹⁸ غور کرو کہ تُسی کیہڑے طریقیاں نال یہوواہ دی ہور چنگی طرحاں خدمت کر سکدے او۔ جنوبی افریقہ چ رہن والے بھرا ڈیوڈ نے اِنج ای کیتا۔ اوہنے دَسیا:‏ ”‏مَیں اپنے حالاتاں تے غور کیتا تے یہوواہ کولوں اِلتجا کیتی کہ اوہ میری مدد کرے کہ مَیں مُنادی دے کم چ ہور زیادہ حصہ لے سکاں۔ مَیں ایہہ دُعا وی کیتی کہ مینوں کوئی ایہو جہی نوکری ملے جدی وجہ توں مَیں اپنا زیادہ وقت مُنادی کرن چ استمال کر سکاں۔ یہوواہ دی مدد نال مینوں ایہو جہی نوکری مِل گئی۔ فیر مَیں تے میری بیوی نے مِل کے کُل وقتی طور تے یہوواہ دی خدمت کرنی شروع کر دِتی۔“‏

19.‏ اَسی کیہہ کر سکنے آں تاکہ اَسی روشنی دے پُتراں وانگوں چلدے رہیے؟‏

¹⁹ پولُس رسول دے خط توں اِفسس چ رہن والے مسیحیاں نُوں یہوواہ دے وفادار رہن چ یقیناً بڑی مدد ملی ہوئے گی تے اوہدے ایس خط تے غور کرن نال سانوں وی بڑا فائدہ ہوندا اے۔ مثال لئی، ایہدے توں سانوں ایہہ مدد مِلدی اے کہ اَسی تفریح کرن تے دوست بنان بارے چنگے فیصلے کر سکئے۔ ایہدے توں ساڈے دل چ ایہہ خواہش وی ودھدی اے کہ اَسی بائبل دا باقاعدگی نال مطالعیا کرئیے تے اِنج سچائی دی روشنی چ چلدے رہیے۔ ایس خط توں سانوں ایہہ وی پتہ چلدا اے کہ اپنے اندر خوبیاں پیدا کرن لئی سانوں پاک روح دی لوڑ اے۔ پولُس دِیاں لکھیاں گلاں تے عمل کرن نال سانوں یہوواہ دی سوچ دے مطابق فیصلے کرن چ مدد مِلدی اے۔ ایہہ سارے کم کرن توں سانوں مدد ملے گی کہ اَسی ایس دُنیا دے نھیرے توں دُور رہ کے روشنی چ چلدے رہیے۔‏