بائبل پڑھن توں ہور زیادہ فائدہ حاصل کرو

1.‏ ایہہ گل کیویں پتہ چلدی اے کہ یسوع مسیح دی نظر چ پاک کلام دی بڑی اہمیت سی؟‏

ذرا سوچو کہ جدوں یسوع مسیح تلیم دیندا سی تے لوکاں نُوں سُن کے کیہو جیہا لگدا ہوئے گا؟ اوہ اکثر ایتاں دا حوالہ دیندا سی تے اوہنوں ایہہ ساریاں ایتاں زبانی یاد ہوندیاں سن۔ اصل چ بائبل توں پتہ چلدا اے کہ اپنے بپتسمے دے فوراً بعد تے اپنی موت توں کجھ دیر پہلاں یسوع مسیح نے جیہڑیاں گلاں کہیاں اوہناں چ اوہنے ایتاں دا حوالہ دِتا سی۔‏b (‏اِستثنا 8:‏3؛ زبور 31:‏5؛‏ لُوقا 4:‏4؛‏ 23:‏46‏)‏ ایہناں دونواں واقعیاں دے وچ تقریباً ساڈھے تِن سال دا وقفہ سی۔ ایس سارے عرصے دے دوران یسوع مسیح نے لوکاں دے سامنے ایتاں پڑھیاں، زبانی ایتاں دَسیاں تے ایہناں دا مطلب سمجھایا۔—‏متی 5:‏17، 18،‏ 21، 22،‏ 27، 28؛‏ لُوقا 4:‏16-‏20‏۔‏

2.‏ بچپن چ کیہڑی چیز نے پاک کلام نُوں چنگی طرحاں جانن چ یسوع دی مدد کیتی؟ (‏پہلے صفحے دی تصویر نُوں ویکھو۔)‏

² زمین تے اپنی خدمت شروع کرن توں کئی سال پہلے یسوع نے بوہت واری خدا دے کلام نُوں پڑھیا تے سُنیا سی۔ اوہنے ویکھیا ہوئے گا کہ یوسف تے مریم گھر چ گل بات دے دوران پاک کلام چوں ایتاں دا ذکر کردے نیں۔‏c (‏اِستثنا 6:‏6، 7)‏ ایہدے چ کوئی شک نئیں کہ یسوع مسیح ہر سبت تے اپنے گھر والیاں دے نال عبادت‌گاہ چ جاندا سی۔ (‏لُوقا 4:‏16‏)‏ اوتھے اوہ خدا دے کلام نُوں بڑے دھیان نال سُن دا سی۔ ہولی ہولی اوہنے پاک کلام نُوں آپ پڑھنا سکھ لیا۔ ایس وجہ توں اوہ نہ صرف پاک کلام نُوں چنگی طرحاں جانن لگ پیا سگوں اوہنوں ایہدے نال گُوڑھا لگاؤ وی ہو گیا تے اوہنے ایہدے مطابق چلنا وی شروع کر دِتا۔ ذرا اوس واقعے نُوں یاد کرو جدوں یسوع مسیح 12 سال دی عمر چ ہیکل چ رہ گیا سی۔ اوہ اوتھے اُستاداں نال گل بات کرن لگ پیا جیہڑے موسیٰ دی شریعت توں چنگی طرحاں واقف سن۔ اوہ اوہدے جواباں نُوں سُن کے حیران رہ گئے۔—‏لُوقا 2:‏46، 47،‏ 52‏۔‏

3.‏ ایس مضمون چ اَسی کیہڑیاں گلاں تے غور کراں گے؟‏

³ جے اَسی خدا دے کلام نُوں باقاعدگی نال پڑھاں گے تے اَسی ایہدے توں چنگی طرحاں واقف ہو جاواں گے تے ایہدے نال محبت کرن لگ پواں گے۔ پر اَسی کیہہ کر سکنے آں تاکہ سانوں خدا دے کلام نُوں پڑھن توں زیادہ فائدہ ہوئے؟ ایہدے لئی اَسی اوہناں گلاں تے غور کراں گے جیہڑیاں یسوع نے شریعت دے عالماں، فریسیاں تے صدوقیاں نُوں کہیاں سن۔ ایہہ مذہبی رہنما خدا دے کلام نُوں پڑھدے تے سن پر اوہناں نُوں ایہدے توں فائدہ نئیں ہو رہیا سی۔ یسوع مسیح نے تِن ایہو جہے کم دَسے جیہڑے ایہناں مذہبی رہنماواں نُوں کرنے چاہی دے سن تاکہ اوہناں نُوں خدا دے کلام توں فائدہ ہوندا۔ یسوع مسیح نے اوہناں نُوں جیہڑیاں گلاں کہیاں، اوہناں تے عمل کرن نال اَسی (‏1)‏ خدا دے کلام نُوں پڑھدے ویلے ایہنوں سمجھ سکاں گے، (‏2)‏ ایہدے چوں سنہریاں گلاں لبھ سکاں گے تے (‏3)‏ اپنے آپ نُوں ایہدے مطابق ڈھال سکاں گے۔‏

اِنج پڑھو کہ سمجھو

4.‏ لُوقا 10:‏25-‏29 توں اَسی خدا دے کلام نُوں پڑھن بارے کیہہ سکھنے آں؟‏

⁴ جدوں اَسی خدا دے کلام نُوں پڑھنے آں تے اَسی چاہنے آں کہ ایہہ سانوں سمجھ وی آئے، نئیں تے سانوں ایہنوں پڑھن دا کوئی فائدہ نئیں ہوئے گا۔ ذرا ایس بارے یسوع مسیح تے شریعت دے اِک ماہر دی گل بات تے غور کرو۔ ‏(‏لُوقا 10:‏25-‏29 نُوں پڑھو۔)‏ اوس بندے نے یسوع نُوں پچھیا کہ ہمیشاں دی زندگی حاصل کرن لئی اوہنوں کیہہ کرنا چاہی دا اے۔ ایہدے تے یسوع نے اوہدی توجہ خدا دے کلام تے دَوائی تے اوہنوں پچھیا:‏ شریعت چ کیہہ لکھیا اے؟ تُوں کیہہ پڑھیا اے؟‏ اوس بندے نے پاک کلام چوں ایس سوال دا بالکل صحی جواب دِتا کہ سانوں خدا تے اپنے گوانڈھی نال محبت کرنی چاہی دی اے۔ (‏احبار 19:‏18؛ اِستثنا 6:‏5)‏ پر غور کرو کہ ایہدے بعد اوہنے کیہہ کہیا۔ اوہنے کہیا:‏ پر میرا گوانڈھی کون اے؟ اوس بندے دی ایس گل توں پتہ چلدا اے کہ اوہنے خدا دے کلام چوں جیہڑیاں ایتاں پڑھیاں سن، اوہ اوہناں نُوں نئیں سمجھدا سی۔ ایس وجہ توں اوہ نئیں جان دا سی کہ اوہ اوہناں تے کیویں عمل کر سکدا اے۔‏

5.‏ بائبل نُوں چنگی طرحاں سمجھن لئی دُعا کرنا تے فیر ایہنوں ہولی ہولی پڑھنا کیویں فائدہ‌مند ہو سکدا اے؟‏

⁵ بائبل نُوں چنگی طرحاں سمجھن لئی ضروری اے کہ اَسی ایہنوں پڑھدے ویلے کجھ چنگیاں عادتاں اپنائیے۔ ایس بارے کجھ مشوریاں تے غور کرو۔ بائبل پڑھن توں پہلاں دُعا کرو۔ بائبل دِیاں گلاں نُوں سمجھن لئی سانوں یہوواہ دی مدد دی لوڑ اے۔ ایس لئی اوہدے کولوں پاک روح منگو تاکہ تُسی پورے دھیان نال بائبل نُوں پڑھ سکو۔ ایہدے بعد ایہنوں ہولی ہولی پڑھو۔‏ اِنج تُسی اوہناں گلاں نُوں چنگی طرحاں سمجھ سکو گے جیہڑیاں تُسی پڑھ رہے او۔ بائبل نُوں اُچی آواز چ پڑھن یاں ایہدی ریکارڈنگ چلا کے ایتاں نُوں نال نال ویکھن نال وی توانوں بوہت فائدہ ہو سکدا اے۔ اِنج تُسی بائبل دِیاں گلاں نُوں اپنیاں اکھاں نال پڑھن دے نال نال اپنے کناَں نال سُن وی رہے ہووو گے۔ ایس لئی اوہ گلاں تواڈے دل تے دماغ اُتے چھپ جان گیاں۔ (‏یشوع 1:‏8)‏ بائبل پڑھن توں بعد دُبارہ یہوواہ کولوں دُعا کرو تے اوہدے کلام لئی اوہدا شکریہ ادا کرو نالے اوہناں گلاں تے عمل کرن لئی اوہدے کولوں مدد منگو جیہڑیاں تُسی پڑھیاں نیں۔‏

6.‏ بائبل پڑھدے ویلے اپنے آپ کولوں سوال پچھن تے چھوٹے چھوٹے نوٹس لین نال توانوں فائدہ کیوں ہوئے گا؟ (‏تصویر نُوں وی ویکھو۔)‏

⁶ بائبل چ لکھیاں گلاں نُوں ہور چنگے طریقے نال سمجھن لئی ذرا دو ہور مشوریاں تے غور کرو۔ پہلا ایہہ وے کہ بائبل پڑھدے ویلے اپنے آپ کولوں سوال پچھو۔‏ جدوں تُسی کسے خاص واقعے تے غور کر رہے ہوندے او تے اپنے آپ کولوں پچھو:‏ ”‏ایس واقعے دے اہم کردار کون نیں؟ گل کون کر رہیا اے؟ اوہ کدے نال گل کر رہیا اے تے کیوں کر رہیا اے؟ ایہہ واقعہ کدوں تے کتھے ہویا سی؟“‏ ایہو جہے سوالاں دی مدد نال تُسی اوس واقعے بارے سوچ سکو گے تے اوہدے اہم نکتیاں نُوں سمجھ سکو گے۔ ایہدے علاوہ بائبل پڑھدے ویلے چھوٹے چھوٹے نوٹس وی لوَو‏۔ جیہڑیاں گلاں اَسی سکھنے آں، اوہناں نُوں لکھن نال اَسی اپنی سوچ نُوں لفظاں چ بیان کر سکنے آں تے اِنج اَسی اوہناں گلاں نُوں چنگی طرحاں سمجھ جانے آں۔ ایہدے علاوہ جدوں اَسی پڑھیاں ہوئیاں گلاں نُوں لکھ لینے آں تے اوہ سانوں یاد رہندیاں نیں۔ تواڈے ذہن چ جیہڑے سوال آندے نیں اوہناں تے تحقیق کرن توں بعد تُسی جیہڑے نتیجے تے پونچ‌دے او، اوہنوں تے خاص نکتیاں دے خلاصے نُوں لکھ لوَو۔ تُسی ایہہ وی لکھ سکدے او کہ جو کجھ تُسی پڑھیا اے، اوہ تواڈے کم کیویں آ سکدا اے یاں فیر تُسی اوہناں گلاں بارے کیہو جیہا محسوس کردے او۔ بائبل پڑھدے ویلے چھوٹے چھوٹے نوٹس لین نال توانوں محسوس ہوئے گا کہ خدا دا کلام تواڈے لئی اے۔‏

7.‏ بائبل پڑھدے ویلے سانوں کیس چیز دی ضرورت ہوندی اے تے کیوں؟ (‏متی 24:‏15‏)‏

⁷ یسوع مسیح نے دَسیا سی کہ جے اَسی بائبل چ لکھیاں گلاں نُوں چنگی طرحاں سمجھنا چاہنے آں تے سانوں اپنی سمجھ نُوں استمال کرنا چاہی دا اے۔ ‏(‏متی 24:‏15 نُوں پڑھو۔)‏ سمجھ کیہہ اے؟ ایہہ اِک ایہو جہی صلاحیت اے جدی مدد نال اِک بندہ ویکھ سکدا اے کہ دو گلاں دا آپس چ کیہہ تعلق اے یاں فیر اوہ اِک دُوجے توں فرق کیویں نیں۔ سمجھ دی وجہ توں اَسی اوہناں گلاں نُوں وی ویکھ پانے آں جیہڑیاں صاف صاف نئیں دَسیاں گئیاں ہوندیاں۔ ایہدے علاوہ یسوع مسیح نے دَسیا سی کہ سانوں ایہہ پچھانن لئی وی سمجھ دی ضرورت اے کہ کیہڑے واقعیاں توں بائبل دِیاں کیہڑیاں پیشین‌گوئیاں پوریاں ہو رہیاں نیں۔ جے اَسی چاہنے آں کہ اَسی بائبل چوں جو کجھ پڑھنے آں اوہدے توں سانوں فائدہ ہوئے تے ایہدے لئی وی سانوں ایسے صلاحیت دی لوڑ اے۔‏

8.‏ اَسی بائبل نُوں سمجھ کے کیویں پڑھ سکنے آں؟‏

⁸ یہوواہ نے اپنے ہر بندے نُوں سمجھ دِتی اے۔ ایس لئی اوہدے کولوں دُعا کرو تے اوہدے توں ہور زیادہ سمجھ منگو۔ (‏امثال 2:‏6)‏ دُعا کرن توں بعد اوہناں گلاں دا گہرائی نال جائزہ لوو جنہاں نُوں تُسی پڑھیا اے۔ نالے لکھ لوو کہ جو کجھ تُسی پڑھیا اے، اوہدا اوہناں گلاں نال کیہہ تعلق اے جنہاں بارے تُسی پہلے توں جان دے او۔ تُسی تنظیم دِیاں کتاباں توں وی مدد لے سکدے او، جیویں کہ اُردو زبان چ کتاب ‏”‏یہوواہ کے گواہوں کے لئے مطالعے کے حوالے۔“‏ ایہو جہیاں کتاباں دی مدد نال تُسی بائبل چ لکھیاں گلاں نُوں چنگی طرحاں سمجھ پاؤ گے تے ویکھ سکو گے کہ تُسی ایہناں تے کیویں عمل کر سکدے او۔ ‏(‏عبرانیوں 5:‏14‏)‏ جدوں تُسی ایس طریقے نال بائبل نُوں پڑھو گے تے تُسی ایہدے چ لکھیاں گلاں نُوں ہور چنگی طرحاں سمجھن لگ پووو گے۔‏

سنہریاں گلاں لبھو

9.‏ صدوقیاں نے بائبل دی کیہڑی اہم سچائی تے دھیان نئیں دِتا سی؟‏

⁹ صدوقی عبرانی صحیفیاں دِیاں پہلیاں 5 کتاباں نُوں چنگی طرحاں جاندے سن۔ پر اوہناں نے ایہناں چ لکھیاں اہم سچائیاں تے دھیان نئیں دِتا سی۔ مثال لئی،جدوں صدوقیاں نے یسوع نال مُردیاں دے جی اُٹھن بارے گل کیتی تے یسوع نے اوہناں نُوں پچھیا:‏ کیہہ تُسی موسیٰ دی کتاب چ بلدی ہوئی جھاڑی والا واقعہ نئیں پڑھیا؟‏ اوہدے چ خدا نے موسیٰ نُوں کہیا کہ مَیں ابراہام دا خدا، اِضحاق دا خدا تے یعقوب دا خدا واں۔ (‏مرقس 12:‏18،‏ 26‏)‏ ایہدے چ کوئی شک نئیں کہ صدوقیاں نے ایس گل نُوں بوہت واری پڑھیا ہوئے گا۔ پر یسوع نے اوہناں کولوں جیہڑا سوال کیتا، اوہدے توں پتہ چلدا اے کہ اوہناں نے ایہدے چ مُردیاں دے جی اُٹھن دی سچائی تے دھیان نئیں دِتا سی۔—‏مرقس 12:‏27؛‏ لُوقا 20:‏38‏۔‏d

10.‏ جدوں اَسی بائبل پڑھنے آں تے سانوں کیہڑیاں گلاں تے دھیان دینا چاہی دا اے؟‏

¹⁰ ساڈے لئی کیہہ سبق اے؟ جدوں اَسی بائبل چوں کسے ایت یاں واقعے نُوں پڑھنے آں تے سانوں اوہناں ساریاں گلاں تے دھیان دینا چاہی دا اے جیہڑیاں اَسی ایہدے توں سکھنے آں۔ اَسی نہ صرف بنیادی سچائیاں تے سگوں ڈُونگیاں سچائیاں تے اصولاں تے وی دھیان دینا چاہنے آں جنہاں نُوں لبھن لئی کوشش کرنی پیندی اے۔‏

11.‏ 2-‏تیمُتھیُس 3:‏16، 17 دے مطابق اَسی بائبل چوں سنہریاں گلاں کیویں لبھ سکنے آں؟‏

¹¹ اَسی بائبل چوں سنہریاں گلاں کیویں لبھ سکنے آں؟ غور کرو کہ 2-‏تیمُتھیُس 3:‏16، 17 چ کیہہ لکھیا اے۔ ‏(‏ایہناں ایتاں نُوں پڑھو۔)‏ ایہناں ایتاں چ دَسیا گیا اے کہ پاک صحیفے (‏1)‏ تلیم دین، (‏2)‏ اِصلاح کرن، (‏3)‏ معاملیاں نُوں سدھارن تے (‏4)‏ تربیت کرن لئی فائدہ‌مند نیں۔ توانوں ایہہ چارے فائدے بائبل دِیاں اوہناں کتاباں توں وی ہو سکدے نیں جنہاں نُوں بوہت زیادہ استمال نئیں کیتا جاندا۔ ایس گل دا جائزہ لوو کہ بائبل دا کوئی واقعہ توانوں یہوواہ، اوہدے مقصد یاں اوہدے اصولاں بارے کیہہ تلیم دیندا اے۔ ایس گل تے وی غور کرو کہ ایہہ تواڈی اِصلاح کیویں کردا اے۔ اِنج کرن لئی ویکھو کہ ایہہ ایتاں غلط سوچ نُوں پچھانن، ایہنوں رد کرن تے یہوواہ دے وفادار رہن چ تواڈی مدد کیویں کردیاں نیں۔ ایس گل تے وی غور کرو کہ بائبل دِیاں ایہہ ایتاں اوس غلط سوچ نُوں سدھارن یاں ٹھیک کرن چ کیویں مدد کر سکدیاں نیں جدے بارے شاید مُنادی چ کسے نے تواڈے نال گل کیتی اے۔ ایہہ وی ویکھو کہ ایہہ ایتاں تواڈی تربیت کیویں کردیاں نیں تاکہ تُسی کسے معاملے نُوں یہوواہ دی نظر نال ویکھ سکو۔ جدوں تُسی ایہناں چارے فائدیاں نُوں اپنے ذہن چ رکھو گے تے تُسی بائبل نُوں پڑھدے ویلے بوہت ساریاں سنہریاں گلاں لبھ سکو گے جدے توں توانوں ہور زیادہ فائدہ ہوئے گا۔‏

خدا دے کلام دے مطابق اپنے آپ نُوں ڈھالو

12.‏ یسوع نے فریسیاں نُوں ایہہ کیوں کہیا:‏ ”‏کیہہ تُسی نئیں پڑھیا؟“‏

¹² یسوع نے فریسیاں کولوں ایہہ سوال وی کیتا:‏ ‏”‏کیہہ تُسی نئیں پڑھیا؟“‏ ایہہ سوال کر کے اوہ ظاہر کرنا چاہ رہیا سی کہ فریسی صحیفیاں نُوں صحی سوچ نال نئیں پڑھ رہے۔ (‏متی 12:‏1-‏7‏)‏e اوس موقعے تے فریسیاں نے ایہہ دعویٰ کیتا سی کہ یسوع دے شاگرد اوہناں حکماں نُوں توڑ رہے نیں جیہڑے سبت بارے دِتے گئے سن۔ ایس گل دا جواب دیندیاں ہوئیاں یسوع نے پاک کلام چوں دو مثالاں دِتیاں۔ نالے اوہنے ہوسیع دی کتاب توں اِک ایت دا حوالہ وی دِتا جدے توں اوہنے ثابت کیتا کہ فریسی ایہہ گل نئیں سمجھ پائے سن کہ سبت دا حکم کیوں دِتا گیا سی تے اوہ دُوجیاں تے رحم نئیں کر رہے سن۔ فریسی خدا دے کلام چوں جو کجھ پڑھ رہے سن، اوہ اپنے آپ نُوں اوہدے مطابق ڈھال کیوں نئیں رہے سن؟ کیونکہ اوہ خدا دے کلام نُوں ایس سوچ نال پڑھدے سن تاکہ اوہ اوہنوں دُوجیاں وچوں نُقص کڈھن لئی تے اپنے آپ نُوں وڈا بنان لئی استمال کر سکن۔ ایس وجہ توں اوہ جو کجھ وی پڑھدے سن اوہنوں سمجھ نئیں پاندے سن۔—‏متی 23:‏23؛‏ یوحنا 5:‏39، 40‏۔‏

13.‏ سانوں بائبل پڑھدے ویلے کیہہ سوچ رکھنی چاہی دی اے تے کیوں؟‏

¹³ یسوع مسیح نے جو کجھ کہیا، اوہدے توں اَسی سکھنے آں کہ سانوں بائبل نُوں صحی سوچ نال پڑھنا چاہی دا اے۔ سانوں فریسیاں وانگوں نئیں بننا چاہی دا سگوں سانوں خاکسار تے سکھن لئی تیار ہونا چاہی دا اے۔ سانوں اوس کلام نُوں خاکساری نال قبول کرنا چاہی دا اے جیہڑا ساڈے دِلاں وچ بیجیا جاندا اے۔ (‏یعقوب 1:‏21‏)‏ جے اَسی خاکسار ہوواں گے تے اَسی خدا دے کلام نُوں اپنے دل چ جڑ پھڑن دَواں گے۔ بائبل چ رحم، ہمدردی تے محبت بارے جیہڑی تلیم دِتی گئی اے، اَسی اوہدے مطابق اپنے آپ نُوں اوہدوں ای ڈھال سکاں گے جدوں اَسی اپنے دل چوں غرور تے نُقص کڈھن والی سوچ نُوں ختم کراں گے۔‏

14.‏ ایہہ کیویں پتہ چلدا اے کہ اَسی اپنے آپ نُوں خدا دے کلام دے مطابق ڈھال رہے آں؟ (‏تصویراں نُوں وی ویکھو۔)‏

¹⁴ اَسی جیویں دُوجیاں نال پیش آنے آں، اوہدے توں پتہ چلدا اے کہ اَسی اپنے آپ نُوں خدا دے کلام دے مطابق ڈھال رہے آں یاں نئیں۔ فریسیاں نے خدا دے کلام نُوں اپنے دل تک نئیں کھڑیا سی۔ ایس وجہ توں اوہ ”‏بے‌قصوراں تے اِلزام“‏ لاندے سن۔ (‏متی 12:‏7‏)‏ ایسے طرحاں اَسی دُوجیاں بارے جیویں سوچنے آں تے اوہناں نال جِنج دا رویہ رکھنے آں، اوہدے توں ظاہر ہوندا اے کہ اَسی خدا دے کلام دے مطابق اپنے آپ نُوں ڈھال رہے آں یاں نئیں۔ مثال لئی، کیہہ اَسی دُوجیاں دے چنگے کماں لئی اوہناں دی تعریف کرنے آں یاں اوہناں دِیاں غلطیاں بارے زیادہ گل کرنے آں؟ کیہہ اَسی رحم‌دل آں تے دُوجیاں نُوں معاف کرن لئی تیار ہنے آں یاں کیہہ اَسی دُوجیاں چوں کیڑے کڈھنے آں تے اپنے دل چ اوہناں لئی ناراضگی پالنے آں؟ اپنے آپ کولوں ایہو جہے سوال پچھن نال اَسی ویکھ سکنے آں کہ کیہہ اَسی اپنی سوچ، احساسات تے کماں نُوں پاک کلام دے مطابق ڈھال رہے آں۔—‏1-‏تیمُتھیُس 4:‏12،‏ 15؛‏ عبرانیوں 4:‏12‏۔‏

خدا دا کلام پڑھن نال خوشی مِلدی اے

15.‏ یسوع خدا دے کلام بارے کیہو جیہا محسوس کردا سی؟‏

¹⁵ یسوع نُوں خدا دے کلام نال بڑی محبت سی تے زبور 40:‏8 چ پہلے توں دَسیا گیا سی کہ یسوع نُوں خدا دے کلام نال کِنّی محبت ہوئے گی۔ ایس ایت چ لکھیا اے:‏ اَے میرے خدا!‏ میری خوشی تیری مرضی پوری کرن چ اے سگوں تیری شریعت میرے دل چ وے۔ کیونکہ یسوع نُوں خدا دے کلام نال محبت سی ایس لئی اوہ خوش رہیا تے یہوواہ دی خدمت کردا رہیا۔ جے اَسی خدا دے کلام نُوں پڑھاں گے تے ایہدے نال محبت کراں گے تے اَسی وی خوش رہواں گے۔ تے یہوواہ دی خدمت کردے رہواں گے۔—‏زبور 1:‏1-‏3۔‏

16.‏ اَسی کیہہ کر سکنے آں تاکہ سانوں بائبل پڑھن توں ہور زیادہ فائدہ ہووے؟ (‏بکس ‏”‏یسوع مسیح نے جو کجھ کہیا،‏ اوہدی مدد نال اَسی پاک کلام دِیاں گلاں نُوں سمجھ پانے آں‏“‏ نُوں ویکھو۔)‏

¹⁶ آؤ، یسوع دِیاں گلاں تے اوہدی مثال تے عمل کرن نال بائبل پڑھن توں ہور زیادہ فائدہ حاصل کریئے۔ اَسی بائبل دِیاں ایتاں نُوں چنگی طرحاں سمجھن لئی دُعا کر سکنے آں، ہولی ہولی پڑھ سکنے آں، اپنے آپ کولوں سوال پچھ سکنے آں تے چھوٹے چھوٹے نوٹس لے سکنے آں۔ پڑھیاں ہوئیاں گلاں نُوں سمجھن لئی اَسی تنظیم دِیاں کتاباں تے رسالیاں توں مدد لے سکنے آں۔ اَسی بائبل دے اوہناں حصیاں چوں وی سنہری گلاں لبھ سکنے آں جنہاں نُوں عام طور تے اَسی زیادہ استمال نئیں کردے۔ اِنج اَسی بائبل نُوں چنگی طرحاں استمال کرنا سکھ سکنے آں۔ ایہدے علاوہ خدا دے کلام نُوں صحی سوچ نال پڑھ کے اَسی اپنے آپ نُوں ایہدے مطابق ڈھال سکنے آں۔ جدوں اَسی ایہہ سارا کجھ کراں گے تے اَسی بائبل پڑھن توں زیادہ فائدہ حاصل کر سکاں گے تے یہوواہ دے ہور نیڑے ہو جاواں گے۔—‏زبور 119:‏17، 18؛‏ یعقوب 4:‏8‏۔‏