1 ENOKI
I yanda ku Deus
ENOKI sibiba ke ku signifika dingi. I seduba diferenti ku jintis di si tempu. I seduba uniku algin di si tempu ku Biblia fala del des manera: “Enoki yanda ku Deus.” Kuma ki pusivel pa un simplis pekadur na tera yanda ku Deus? I ke ku Enoki pudi nsinanu aserka di koraẑen?
Enoki yanda ku Deus di bardadi pelu menus di dus manera importanti. Purmeru i nega sedu suma jintis di si tempu ku nega kontenta Deus na se manera di vivi. Enoki seduba di setimu jorson dipus di Adon ku Eva; Adon staba di vida ki tempu ma i bejuba mal. (Jubi liña di tempu “Disna dias di papes antigu te na tempu di ŝefis.”) Disna ku Adon ku Eva rebela, kuas tudu jinti sigi se isemplu. Se fiju Kain mata si propi ermon Abel. Abel i purmeru algin ku mostra fe na Jeova. Alguns fijus ku netus di Kain seduba violentu suma el, o pior di ki el. (Kum 4:23, 24) Ku koraẑen Enoki nega sedu violentu suma jintis di si tempu. I kontinua sedu un omi di pas, i es pui Deus kontenti ku el.
Manga di anu antis di Enoki padidu, ‘jinti kumsa na coma nomi di Jeova.’ (Kum 4:26) I parsi di kuma e ta usaba nomi di Jeova di mau manera, tambi na adorason falsu. Ma Enoki negaba fasi suma elis. I ama, tambi i rispita nomi sagradu di Jeova, asin i mostra di kuma i diferenti ku jintis di si tempu.
Oca ku jintis mistiba mata Enoki pabia e paña raiba ku mensazen ki konta elis, Jeova proteẑil.
Sugundu manera ku Enoki yanda ku Deus, i atraves di fasi ke ku Deus falal pa i fasi. Pa pudi fasi kila i pirsisaba di mas koraẑen, pabia Jeova misti pa i konta mensaẑen pa tudu ki jintis mau. Ali mensaẑen ki dibi di kontaba: “Bo jubi, Siñor na bin ku milyaris di si santus pa julga tudu jinti, pa kondena kilis ku nega Deus pa kusas mau ke fasi sin mporta ku Deus, ku tudu se palabra duru ke fala kontra el.”
Enoki teneba sertesa di kuma, kusas ku Jeova fala del ka na maina, i na kontisi sin falta. Palabras ku Enoki konta, ta mostra raiba garandi ku Jeova teneba kontra komportamentu di ki jintis. Enoki mostraba di kuma jintis di ki tempu nega Deus, e seduba mau, tambi e ka mportaba ku Deus. Ku sertesa es palabras ku Enoki konta elis, ka sabiba elis, e fikaba ku raiba. Ku koraẑen i konta elis ke ku Jeova mistiba pa e obi.
Kuma ke reaẑi? Biblia ka konta izatamenti kuma ke reazi, ma i da ideia di kuma, i ciga un mumentu ku Enoki staba na pirigu garandi. Kuma ku no yanda no sibi es? Biblia fala sin: “I ka bin ojadu mas, pabia Deus lebal.” Ke ku kontisi? I parsi di kuma ki mau jintis pirsigiba Enoki. Jeova ka disa pa ki jintis molostral o matal. Suma Jeova gosta ciu di si amigu, i proteẑil di ki pirigus, i pul pa i durmi susegadu na morti. Des manera, Enoki na kontinua salvu na mimoria di Jeova, kau ku ningin ka pudi fasil mal.
Antis di Jeova leba Enoki, i dal un prenda garandi. Biblia fala: “Antis di [Enoki] lebadu, i tenba bon tustumuñu kuma Deus kontenti ku el.” Talves Jeova fasi pa Enoki oja na un suñu di kuma, i na bin tene un vida di pas na Paraísu li na tera! Antis di Enoki muri, i ka teneba duvida di kuma, Jeova amal tambi i bensual pabia di si fe forti ku koraẑen garandi ki mostra!
Lei es storia na Biblia:
Kumsada 5:21-24
Ebreus 11:5
Judas 14, 15
Pa kombersa del:
Di kal maneras ku Enoki mostra koraẑen?
Fasi piskisa pa ntindi minjor
1. Oca ku Biblia fala kuma ‘jinti kumsa na coma nomi di Jeova’, ke ki misti fala? (Kum 4:26; w01-T 15/9 paẑina 29 paragrafu 3)
2. Enoki seduba purmeru omi fiel ku fasi ke? Kuma ki konsigi kumpri tarbaju ki daduba? (w01-T 15/9 paẑina 31 paragrafu 5)
3. Antis mesmu di Enoki kumsa profetisa, kuma ku talves i sibi di kuma si koraẑen na testadu? (w06-T 1/10 paẑina 19 paragrafu 13 ku 14) A
Diseñu A
4. Kuma ku bu pudi splika di kuma Enoki ka lebadu pa seu, suma ku manga di jintis ta pensa? (Jon 3:13; Eb 11:5, 13)
Pensa na kuma di aplika es lisons
Na kal mumentu ku talves no na pirsisa di koraẑen pa prega? Si no pensa na isemplu di Enoki, ke ku pudi judanu? B
Foto B
Kuma ku Jeova ta sinti ora ku no na sirbil ku koraẑen? (Dit 27:11; Eb 11:5)
Kuma ku bu pudi kopia koraẑen di Enoki?
Pensa fundu na lisons mas garandi
Ke ku es storia nsinan aserka di Jeova?
Kal ligason ku es storia tene ku intenson di Jeova?
Ke ku N na gostaba di punta Enoki ora ki resusitadu?
Aprindi mas
Kuma ku isemplu di Enoki pudi judau lida ku violensia?
Kopia Kilis ku Tene Fe, ka bu Kopia Kilis ku ka Tenel — Kopia Enoki, ka bu Kopia Lameki (2:53)
Jubi ke ku juda Enoki tene fe.
“No yanda ku Deus nes tempus difisil” (w05-T 1/9 paẑina 13 te 17)