2 NOE
I kondena mundu
DIPUS di tempu di Enoki, situason di mundu piora. Ke ku kontisi? Pabia di se diseẑu, alguns anjus mau rebela kontra Deus, e bin pa Tera e toma kurpu di pekadur, i e toma minjeris ke misti e kasa ku elis. Se fijus ka seduba pekaduris normal pabia e sedu fijus di pekaduris ku anjus. E ta comaduba Nifilins i e seduba violentu i mau dimas. Pabia di se maldadi, jintis na Tera pasa sedu mau dimas. Oca ku Deus oja ke ku kontisi, i fika tristi dimas, pabia pekaduris ka sedu suma ki mistiba pa e sedu. Ma bisnetu di Enoki seduba diferenti di tudu utru jintis. Si nomi i Noe.
Noe bin kirsi i sedu un omi justu suma Enoki, i sempri i obdisi Deus. Kila ku pui Biblia fala sin aserka del: “I ta yandaba ku Deus.” Ku tempu i bin kasa, i el ku si minjer e nsina se fijus obdisi Jeova tambi. Es pui pa se familia sedu diferenti di tudu utrus familia.
Un dia, Jeova fala Noe di kuma, i disidi kaba ku tudu pekaduris mau na Tera. Ma Jeova da tambi Noe un speransa. I falal pa i kumpu un arka garandi asin i na pudiba salva alguns jinti. Noe nunka oja un cuba garandi ku kubri tudu Tera suma ku Jeova falalba i na bin sedu. Tambi nunka i kumpu un kusa garandi suma es arka. Ma i konfia na purmesa di Jeova, asin i kumsa kumpu arka.
Noe ku si familia teneba inimigus puderosus i mau, ku odiaba se mensaẑen ku se tarbaju.
Noe ku si familia pirsisaba di koraẑen pa fasi es tarbaju. Talves manga di jinti staba kontra elis i e goza elis. Ku sertesa anjus ku tomaba kurpu di pekadur seduba inimigus garandi di Noe ku si familia. Se fijus ta trataba jintis mal dimas. Ma Noe, si minjer, si tris fiju ku se minjeris, elis tudu oitu e kontinua fasi se tarbaju. Pa manga di anus, talves serka di 50 anu, e tarbaja duru na kumpu arka. Puku-puku arka kumsa ku toma si forma.
Duranti ki tempu Noe ka fika kaladu. Biblia fala i “konta jinti kuma e dibi di yanda diritu.” Suma ŝef di familia, Noe toma diantera na avisa jintis aserka di ke ku na bin. Ma, alen di jintis di si kasa, ningin mas ka sukutal. Parsi di kuma te mesmu manga di si familia nega sukutal. Jintis nega para fasi kusas mau. Fe garandi ku Noe tene fasil sedu diferenti di utrus jintis. El ku manda Biblia fala sin aserka di Noe: ‘Pabia di si fe, mundu kondenadu.’
Finalmenti Noe ku si familia kaba kumpu arka. Gosi, Noe ku si familia pirsisa di guarda kusas di kume pa relis i pa limarias ke na bin entranda la. Ku tempu, un kusa dimiradu kontisi. Tudu tipu di limarias macu ku femia bin diretamenti pa arka! Dipus, e yentra dentru di arka “dus dus.”
Deus fala Noe pa i purpara i yentra na arka, pabia cuba na bin kumsa dentru di seti dias. No pudi imaẑina familia di Noe na ultimu minutus ku sobra, sta na ruma-ruma, organiza kusas, i organiza limarias dentru di arka. I pudi sedu kuma na ki mumentu ku jintis mas goza elis inda. Ma oca ke kaba pui tudu kusas dentru di arka, Jeova propi ku fica porta. Talves es kalanta tudu kilis ku na goza ba elis. Dipus cuba ranka cubi! Yagu kumsa ku inci. I kontinua aumenta pa 40 dia, tok i kubri tudu montañas. Asin Jeova kaba ku tudu maldadi na Tera.
Noe ku si familia fika suguru na arka pa mas di un anu. Duranti es tempu yagu fika i na baŝa puku-puku. Finalmenti arka sinta na un monti, dipus Jeova fala Noe di kuma i pudi ja sai di arka. Oca ku familia sai di arka e fasi sagrifisiu pa gardisi Jeova manera ki salva elis. Jeova purmiti kuma nunka mas i ka na tisi cuba garandi suma kila, i pui arku-iris suma sinal o garantia di si purmesa.
Tudu pekaduris ku na vivi aos na Tera bin di familia di Noe. No kontenti dimas pa manera ke teneba koraẑen di sedu diferenti di jintis mau di se tempu.
Lei es storia na Biblia:
Kumsada 6:1–8:22; 9:8-19
Ebreus 11:7
2 Pedru 2:5
Pa kombersa del:
Di kal maneras ku Noe mostra koraẑen?
Fasi piskisa pa ntindi minjor
1. Kuma ku mundu seduba antis di diluviu? (w02-T 1/3 paẑina 5 paragrafu 3 te paẑina 6 paragrafu 4)
2. Kal tempu ku Deus fala Noe pa i kumpu arka? I kal tempu ki falal di kuma diluviu na kumsa? (w12-T 15/4 paẑina 23 paragrafu 5 te 8)
3. Pabia ku no pudi fia di kuma na bardadi diluviu kontisi? (ijwbq-TPO artigu 156 paragrafu 2 te 5 ku kuadru) A
Historic Collection/Alamy Stock Photo
Diseñu A: Un storia indianu antigu fala di kuma un omi kumpu un barku pa salva di un cuba garandi. Dipus di cuba, i fasi un sakrifisiu, i dipus tudu jintis bin del.
4. Ke ku kontisi mas di sen anu dipus di diluviu, i kuma ku kila afeta Noe ku teneba ja idadi avansadu? (it-T “Noé” paragrafu 13) B
Diseñu B
Pensa na kuma di aplika es lisons
Kuma ku no tempu parsi ku tempu di Noe? (Mat 24:36-39)
Ke ku isemplu di Noe ta sinanu aserka di . . .
organiza no tempu diritu? C
Foto C
pega tesu na tarbaju? D
Foto D
sedu pasienti? E
Foto E
Kuma ku bu pudi kopia koraẑen di Noe na bu vida?
Pensa fundu na lisons mas garandi
Ke ku es storia nsinan aserka di Jeova?
Kal ligason ku es storia tene ku intenson di Jeova?
Ke ku N na gostaba di punta Noe ora ki resusitadu?
Aprindi mas
Jubi sforsu garandi ku un ŝef di familia fasi pa kopia isemplu di Noe.
Juda bu fijus pa e aprindi lisons aserka di Noe.