19 JEFTE KU SI FIJU FEMIA
E kumpri un purmesa difisil
SITUASON na Israel seduba difisil dimas. Mas un bias, povu para adora Jeova. Suma rusultadu, Jeova disa pa amonitas kastiga elis duranti 18 anu. (Ŝef 10:8) Pa fin, povu di Deus rikuñisi se pekadu, e kaba ku se deusis falsu, e kumsa mas adora Jeova. Ma, puku tempu dipus, amonitas junta na Jileadi pa ataka Israel.
Garandis di Jileadi, pidi un omi comadu Jefte pa i bin sedu se ŝef na gera. Parsi di kuma, alguns di ki garandis, seduba si ermons na ladu di pape, i elis propi ku serkalba di Jileadi. Sera ki Jefte fika ku raiba o ku odiu? Nau. i seta bai gera. Purmeru, i tenta fasi pas ku amonitas. Dipus di obi rei amonita ku iziẑi pa tornal tera ki pensa di kuma i di sil, Jefte splikal di manera klaru di kuma ki tera i ka di sil. Ke ku Jefte fala, ta mostra di kuma i sibi diritu kuma ku Jeova da israelitas Tera di Purmesa i juda elis vensi nasons ku moraba la. Nin ku sin, rei amonita nega sukutal. I staba disididu pa geria ku israelitas!
Oca ku Jefte na purpara pa gera, spiritu di Jeova bin riba del. Dipus, Jefte fasi un purmesa pa Jeova: “Si bu dan fijus di Amon na ña mon, si N riba ku pas pa ña kau, purmeru ku sai na porta pa bin kontra ku mi i na sedu di SIÑOR; N na dal suma oferta kemadu.” Sera ki es purmesa ki i fasi, ta mostra di kuma i turmenta nan o i ka sta nan ben di kabesa? Nau. Pabia spiritu di Jeova staba riba di Jefte na ki mumentu, i kila pudi tujil fasi un purmesa ki ka bon.
Sera ki purmesa ku Jefte fasi misti fala di kuma i na kema nan algin di bardadi? Nau i ka kila. Jeova nuju pratika di skrifika pekadur, i fala si povu pa e ka fasi nunka e kusa nujenti. (Lei 18:10, 12) Ma ke ku Jefte mistiba fala di kuma, purmeru algin di si kasa ku sai pa dal kontrada na ‘sedu di Jeova’, na sintidu di kuma si dunu na dedika tudu si vida pa sirvisu di Jeova, talves na tabernakulu na Siló. Jefte sibiba di kuma i pudi sedu difisil kumpri si purmesa. I teneba so un fiju, ku sedu si fiju femia ki gosta ciu del. I pudi sedu di kuma, i el ku na sedu purmeru algin ku na dal kontrada ora ki riba kasa dipus di gera.
Dipus di fasi purmesa, Jefte bai logu-logu pa gera. Ku koraẑen, i leba si omis pa gera. I Jeova da elis un vitoria garandi! E ngaña se inimigus, i e kaba ku 20 sidadis di amonitas, e “mata manga delis.”
Jefte riba kasa kontenti dimas. Talves i staba na spera di kuma, purmeru algin ku na sai di si kasa pa dal kontrada na sedu un di si servus. Si asin ki na pensaba, ke ku na bin kontisi nin i ka na tarda, na pul pa i sinti mal dimas. Purmeru algin ku sai di si kasa pa dal kontrada, i si fiju femia, ku staba na baja i na toka tambriña! Ku dur garandi, Jefte rumpi si ropa i cora, i fala: “A ña fiju! Bu kebran korson! Abo ku na pun pa N sta tristi. N fasi ja un purmesa pa SIÑOR, N ka pudi riba tras.”
Jefte ku si fiju femia tene un purmesa pa kumpri. Ma pa kumpril i na sedu un sakrifisiu garandi pa relis.
Fiju di Jefte ntindi logu di kuma, si vida na muda kompletamenti pabia di purmesa ku si pape fasi. I na dedika tudu si vida pa sirvisu sagradu di Jeova. Pabia des, nunka i ka na kasa o tene fijus. Pa un minjer na Israel, es i pior kusa ku pudi kontisi kel. Nin ku sin, es bajuda koraẑosu kalma si pape, i falal: “Bu fasi purmesa pa SIÑOR. Fasin suma ku bu fala.” I pidi si pape so un kusa, pa i disal pa i bai ku si amigas pa e cora, pabia nunka i ka na kasa o tene fiju.
Fiju femia di Jefte i un minjer koraẑosu tambi i ka ta pensa so na si kabesa. Pabia di kila, kada anu, bajudas di Israel ta pasa kuatru dia ku el pa konsolal i ngabal. Tambi i seduba un privileẑiu garandi pa rel sirbi Jeova na tabernakulu. Pudi sedu di kuma na ki tempu, mininu Samuel staba ja na vivi na tabernakulu. Sera ki fiju femia di Jefte juda na kria Samuel, nsentival sirbi Jeova i fasi kil ki bon? No ka sibi. Si i fasil, kila talves dal kontentamentu garandi, pabia i ka teneba fiju. Ke ku no sibi i di kuma, na ki tempu, alguns omis ku minjeris na tabernakulu ta kumitiba pekadu seksual. (1 Sam 2:22) Sera ki fiju femia di Jefte nvolviba na ki pekadus seksual? Nau. Biblia fala di kuma: ‘Nunka i ciga di tene relason seksual ku un omi.’
Apostolu Paulu nklui nomi di Jefte entri omis ku minjeris ku teneba fe garandi. (Eb 11:32) Tantu Jefte suma si fiju, disanu un bon isemplu di koraẑen. Jefte geria pa povu di Deus, i si fiju apoial na tudu sintidu. Juntu, e kumpri un purmesa difisil pa Jeova!
Lei es storia na Biblia:
Ŝefis 10:15, 16; 11:1-40
Pa kombersa del:
Di kal maneras ku Jefte ku si fiju femia mostra koraẑen?
Fasi piskisa pa ntindi minjor
1. Ke ku ta mostra di kuma amonitas ka staba so na geria pa dominda israelitas, ma tambi e staba na tenta kaba ku adorason di bardadi? (it-T “Jefté” paragrafu 6) A
Diseñu A: ‘E tira deusis strañu na se metadi, e adora Jeova.’ — Ŝef 10:16
2. Oca ku Jefte fasi si purmesa pa Jeova, kuma ku si manera di aẑi parsi ku di Jakó? (it-T “Jefté” paragrafu 11)
3. Ke ku manda purmesa ku Jefte ten ku kumpri i un sakrifisiu garandi pa rel? (w17.04-T paẑina 4 paragrafu 6)
4. Profeta Samuel padidu serka di anu 1180 AEK. Ke ku ta mostra di kuma, talves el ku fiju femia di Jefte e sirbi na tabernakulu na mesmu tempu? (it-T “Jefté” paragrafu 2; jubi liña di tempu “Disna di dias di papes antigu te na tempu di ŝefis.”)
Pensa na kuma di aplika es lisons
Ora ku papes mostra koraẑen suma Jefte, kuma ku kila pudi juda se fijus?
Kuma ku servus di Jeova aos, pudi kopia bajudas ku ngaba fiju femia di Jefte i judal kontinua sedu koraẑosu? B
Foto B
Kuma ku bu pudi kopia koraẑen di Jefte ku si fiju femia?
Pensa fundu na lisons mas garandi
Ke ku es storia nsinan aserka di Jeova?
Kal ligason ku es storia tene ku intenson di Jeova?
Ke ku N na gostaba di punta Jefte ku si fiju femia ora ke resusitadu?
Aprindi mas
Kuma ku isemplu di fiju femia di Jefte pudi juda servus di Jeova ku ka kasa?
Jubi kuma ku Jefte ku si fiju femia nsinanu kuma ku no pudi manti fiel pa Jeova.
“Sedu fiel ta pui no tene fabur di Deus” (w16.04-T paẑina 5 te 9)