20 SANSON
I mostra koraẑen oca ki sta fraku
SANSON ka staba na oja nada. Ma i pudiba obi manga di filisteus ku na gozal i provokal. Kuma ki yanda i sta nes situason? Ku tulesa i konta algin sigridu di si forsa. Pabia di kila, filisteus pañal, e fural uju i e maral. Dipus e pul na prison i e forsijal tarbaja suma se skravu. Gosi filisteus sta na gozal, tambi e sta na goza si Deus, Jeova. Sanson sibiba di kuma, el i kulpadu mas garandi pa tudu e kusas ku sta na kontisi. I seduba sempri un omi ku tene koraẑen garandi. Gosi, manera ki sta fraku dimas, sera ki i na konsigi mas mostra koraẑen?
Sanson sirbi suma ŝef na Israel pa 20 anu, ma i seduba diferenti di utru ŝefis. Di kal maneras? Utru ŝefis suma Baraki, Jidion, ku Jefte, teneba tropas ke ta leba pa bai geria kontra inimigus di Deus. Ma Sanson ka teneba tropas, el son ku ta bai geria kontra inimigus di Jeova. I mata manga di filisteus el son. Kuma ki i yanda i fasil? No riba pa kumsada di storia.
Oca ku un anju konta papes di Sanson di kuma e na tene un fiju, i konta elis tambi di kuma, Jeova misti pa Sanson sedu nazireu duranti tudu si vida. Nazireus ka ta pirmitiduba korta se kabelu, pabia di kila, Sanson nunka korta si kabelu. Nkuantu i obdisi ke ki i dibi di fasi suma nazireu, Jeova dal forsa garandi dimas. Un bias, Sanson rumpi lion na metadi so ku si mon! Sanson usa forsa ku Deus dal pa geria kontra filisteus, ku staba na kastiga israelitas ku torna rebela mas kontra Deus.
Un bias, dipus ku Sanson mata manga di filisteus, israelitas mediba di kuma, filisteus na bin vinga elis pabia di ke ku Sanson fasi. Pa kila, e mara Sanson e ntregal na mon di filisteus. Ma Sanson sapa ki kordas ke maral kel suma si kontra i fiu di liña. Dipus i toma os di keŝada di buru i mata 1.000 filisteus kel. Algun tempu dipus, oca ku Sanson sta na sidadi di Gaza, si inimigus monta mboskada, e fasi planu pa matal. Ma Sanson lanta me-noti, i rinka kil mbruta di porton di sidadi, ku tudu si dus batenti ku si ntrinkus. Dipus i lambul i pul riba di ombra, i yanda ku el kuas 60 kilometru te riba di monti ku sta dianti di Ebron!
Mas un bias, Sanson torna ngaña filisteus. I mostra elis di kuma se deusis suma Dagon, i ka nada dianti di un servu fiel di Jeova. Ma, filisteus oca un bon manera di vensi Sanson. E usa un minjer comadu Dalila.
Sanson gostaba del, ma Dalila trail. I seta suku di bas di filisteus, pa sibi kal ku sigridu di forsa di Sanson. Pa kila, Dalila ta fika i na punta-puntal tudu dia pa i kontal si sigridu, te na dia ku Sanson kansa, i kaba pa kontal si sigridu. Sanson falal di kuma si kontra si kabelu kortadu, i na pirdi forsa garandi ki i tene. Pa kila, Dalila pera tok i durmi, i coma un omi pa i bin kortal kabelu kumpridu ki teneba. Biblia fala di kuma Jeova ka sta mas ku Sanson. Pabia di kila, Sanson pirdi forsa ki teneba. Filisteus bin kinti-kinti e fural uju, i dipus e pul na prison.
Dipus, filisteus pui Sanson pa i ba ta rola un pedra pisadu pa fasi fariña pa relis. I seduba un tarbaju difisil dimas. Filisteus staba konteneti dimas, e sinti ben manera ku Sanson ku seduba se inimigu mas forti, torna gosi se skravu. E fasi un festa garandi pa ngaba se deus Dagon. Na ki dia di festa, manga di filisteus junta na un templu garandi. Alen di kilis ku sta dentru di templu bas, serka di 3.000 staba riba. Filisteus mistiba goza Sanson, pa kila, e tiral fora di prison e firmantal na metadi di dus pilar garandi ku suguraba templu. Na ki tempu, kabelu di Sanson kumsaba kirsi. I staba ripindidu dimas pa eru ki fasi.
Pabia di si eru Sanson sedu prisoneru ma i usa si forsa ultimu bias pa Jeova.
Sanson pui si mon na ki pilaris, dipus i pidi Jeova pa i dal forsa ki teneba. I ora i fala: “Lembra di mi, bu dan forsa son e bias, o Deus,” i grita risu: “N na muri ku filisteus!” Dipus i kumsa ku pinca pilaris ku tudu si forsa. I pincal ku forsa garandi, tok ku ki mbruta di pilaris kumsa ku balansa. Te pa filisteus na paral, pilaris rankaba ja ku kai, templu kai tudu! Es seduba ultimu bias ku Sanson usa forsa garandi dimas ki teneba. Inimigus di Deus ki mata oca ki na muri, mas ciu di ki kilis ki mata duranti tudu si vida.
Manga di anus mas tardi, oca ku apostolu Paulu na fala di omis ku minjeris ku teneba fe garandi, i fala tambi di Sanson. Paulu skribi aserka di kilis ku “na se frakesa e yangasa forsa”, ku sertesa i staba na pensa nes ŝef koraẑosu. — Eb 11:32-34.
Lei es storia na Biblia:
Ŝefis 13:1–16:31
Pa kombersa del:
Di kal maneras ku Sanson mostra koraẑen?
Fasi piskisa pa ntindi minjor
1. Kuma ki pusivel pa Sanson toka kurpu di kilis ku muri i kontinua sedu nazireu? (w05-T 15/1 paẑina 30 paragrafu 1 te paẑina 31 paragrafu 1)
2. Ke ku ta mostra di kuma, Sanson pirsisa di spiritu santu di Deus, pa lambu porton ku tudu si batentis disna di Gaza te Ebron? (w04-T 15/10 paẑina 15 paragrafu 7 ku 8) A
Diseñu A
3. Ke ku ta mostra di kuma, Dalila talves seduba un israelita? (w05-T 15/3 paẑina 28 paragrafu 3)
4. Pabia ku Sanson ora pa vinga so ‘un di si ujus’? (Ŝef 16:28; it-T “Sansão” paragrafu 10)
Pensa na kuma di aplika es lisons
Oca ku Dalila nsisti manga di bias pa Sanson kontal si sigridu, Sanson kontal kusas ki ka dibi di kontalba. Ke ku ansions ku se minjeris pudi aprindi des? B
Foto B
Sanson fasi un eru gravi, ma mas tardi, Jeova usal di un manera dimiradu. Si un servu di Deus aos fasi un eru, kuma ku isemplu di Sanson pudi judal pa ka i disisti?
Kuma ku bu pudi kopia koraẑen di Sanson na bu vida?
Pensa fundu na lisons mas garandi
Ke ku es storia nsinan aserka di Jeova?
Kal ligason ku es storia tene ku intenson di Jeova?
Ke ku N na gostaba di punta Sanson ora ki resusitadu?
Aprindi mas
Nsina bu fijus ke ku pui pa Sanson sedu un di omis ku mas tene forsa na tudu tempu.
Kal utru lisons ku no pudi aprindi di storia di Sanson?