Kal ki Dus Rasons ku Pui Deus ka ta Obi Alguns Orasons?

Resposta di Biblia

I ten alguns orasons ku Deus ka ta ruspundi. Jubi dus rasons ku pudi pui pa ka Deus obi orason di algin.

1. Orason ka sta di akordu ku vontadi di Deus

Deus ka ta ruspundi pididus ku ka sta di akordu ku si vontadi, o ku si normas, ku sta na Biblia. (1 Jon 5:14) Pur izemplu, Biblia fala pa ka no sedu ganansiosu. Jugu di apostas ta nsentiva ganansia. (1 Koríntius 6:9, 10) E ku manda Deus ka na ruspundi bu orason si bu pidil pa ngaña lotaria. Deus ka pudi danu tudu kusa ku no pidil. Na bardadi, bu dibi di kontenti manera ki sedu sin. Si ka sin, bu ka pudi imaẑina ke ku utrus na pidi Deus pa fasi. — Tiagu 4:3.

2. Algin ku fasi orason ta aẑi di manera rebeldi

Deus ka ta obi orason di kilis ku sta disididu pa fasi kusas ku ta ofendil. Pur izemplu, Deus fala kilis ku ta fala kuma e ta adoral ma e ta aẑi di manera rebeldi: “Ora ku bo distindi bo mon pa mi, N ta sukundi ña rostu pa bos. Nin ku bo ora ciu, N ka na obi, pabia bo mon susu ku sangi.” (Isaias 1:15) Ma si e mudaba se manera di yanda e “ruma” ku Deus, i na sukutaba se orason. — Isaias 1:18.