Ke ku Biblia Fala Aserka di Natal?

Resposta di Biblia

Biblia ka konta data di nasimentu di Jesus, nin i ka fala kuma no dibi di fasi si aniversariu. Cyclopedia McClintock ku Strong fala: “Selebrason di Natal i ka un ordi ku bin di Deus nin i ka bin di NT [Nobu Testamentu].”

En ves di kila, un analisi di storia di Natal ta mostra kuma i bin di kustumus pagon. Biblia mostra kuma no ta ofendi Deus si no tenta adoral di un manera ki ka gosta. — Saida 32:5-7.

Storia di Kustumus di Natal

1. Selebrason di Nasimentu di Jesus: “Purmerus kriston ka ta selebraba nasimentu di [Jesus] pabia e ta konsidera selebrason di aniversariu di kualker algin suma un kustumu pagon.” — The World Book Encyclopedia.

2. Dia 25 di Dizembru: I ka ten provas di kuma Jesus padidu nes data. Talves lideris riliẑiosu kuji es data pa i pudi kai na mesmu dia ku festas pagon ku ta fasidu na kil ku purtugis ta coma di solstício do inverno.

3. Troka di prendas, jantar spesial, festas: Encyclopedia Americana fala: “Saturnu, i un festa Romanu ku ta fasiduba na metadi di mis di dizembru, ku sedu mudelu di manga di kustumus ligadu ku Natal. Pur izemplu i na es selebrason ki sai kustumu di fasi festas garandi, troka di prendas ku kema velas.” Encyclopædia Britannica fala kuma “tudu tarbaju ku nogos ta suspendidu” duranti festa di Saturnu.

4. Lus di Natal: Di akordu ku Encyclopedia of Religion, Europeus ta fasiba dikorason di se kasas ku “lus ku sempri-verdi di tudu tipu” pa selebra festa di solstício do inverno i pa serka spiritus mau.

5. Visco ku azevinho: “Druidas ta pensaba kuma es plantas tene puder maẑiku. Sempri-verdi ta adoradu suma un purmesa di kuma sol na riba.” — The Encyclopedia Americana.

6. Arvuri di Natal: “Adorason di arvuri, ku ta ojaduba na metadi di Europeus pagon, kontinua dipus di e konverti pa kristianismu.” Un di maneras ku adorason di arvuri kontinua i kustumu di “pui arvuri di Natal na entrada o dentru di kasa na tempu di friu.” — Encyclopædia Britannica.