Ke ku Biblia Fala Aserka di Liberdadi di Skolia? Sera ki i Deus ku ta Kontrola bu Distinu?

Resposta di Biblia

Deus danu dignidadi di fasi skolia, puder di toma no propi disisons en ves di Deus o distinu disidi ja ke ku no na fasi. Jubi ke ku Biblia sina.

• Deus kumpu pekadur na si imaẑen. (Kumsada 1:26) Diferenti di limarias, ku ta aẑi ku instintu, no parsi ku no Kriadur pabia no tene kapasidadi di mostra kualidadis suma amor ku justisa. I suma no Kriadur, no tene liberdadi di skolia.

• Na maioria di kasus, no pudi disidi no futuru. Biblia nsentivanu pa “kuji vida” i pa no “para sintindu pa si palabra,” ku sedu disidi obdisi mandamentus di Deus. (Ripitison di Lei 30:19, 20) Es nsentivu ka na teneba sintidu, te mesmu i na seduba kruel, si no ka teneba liberdadi di skolia. En ves di obriganu fasi ke ki fala, ku amor, Deus falanu: “Si bu sukutaba ña mandamentus, bu pas na seduba suma korenti di yagu na riu”. — Isaias 48:18.

• No susesu o no falias ka ta determinadu pa distinu. Si no misti tene susesu na un tarbaju, no ten di tarbaja duru. Biblia fala: “Tudu ku ciga na bu mon pa fasi, fasil konformi bu forsa”. (Eklesiastis 9:10) I fala tambi kuma: “Algin ku fasi planu ku kudadi, i tarbaja diritu, i na tene ciu”. — Ditus 21:5.

Liberdadi di skolia i un prenda ku bin di Deus, i ta pirmitinu ama Deus di ‘tudu no korson’ — pabia no misti fasil. — Mateus 22:37.

Sera ki Deus ta kontrola tudu kusas?

Biblia sina kuma Deus tene tudu puder, es signifika ki ningin ka pudi limita si puder. (Jo 37:23; Isaias 40:26) Ma i ka ta usa si puder pa kontrola tudu kusas. Pur izemplu, Biblia fala kuma Deus ‘mara si korson’ oca i na lidaba ku antigu Babilonia, inimigu di si povu. (Isaias 42:14) Di mesmu manera aos, Deus disidi tolera kilis ku ta usa mal se liberdadi di skolia pa fasi utrus mal. Ma Deus ka na kontinua tolera elis pa sempri. — Salmu 37:10, 11.