Enero

Congregacionesta waturej hermanosqa, ashkha congregacionespi ancianos waj hermanosta wakichinankupaj pisillata tiempochakushasqankuta reparanku. ¿Imaraykutaj mana tiempochakuyta atillankuchu? Anciano kanki chayqa, yachanki waj hermanosta wakichiy may allin kasqanta. Chantapis yachallankitaj congregacionespi, mosoj congregacionespi ima astawan wakichisqa hermanos necesitakusqanta (Isa. 60:22). Bibliaqa ancianos wajkunaman yachachinanku kasqanta nin. Jinapis ichá chayta ruwanaykipaj mana tiempochakuyta atillankichu, familiaykita uywanaykipaj llankʼanaykirayku, congregacionpi ima ruwaytapis juntʼanaykirayku, chayri waj imasta ruwanaykirayku. Chaywanpis may allin waj hermanosta wakichinaykipaj tiempochakunayki. Congregacionpi ashkha wakichisqa hermanos kajtinkoqa astawan yanapakuyta atenqanku. w15 15/4 1:2, 3

Congregacionpi ima ruwaykunatapis japʼinki chayqa, ama yuyaychu uj jinamanta ruwanayki kasqanta. Astawanpis chayta ruwayta atinki congregación necesitajtillan chayri Diospa llajtan uj jinamanta ruwanata kamachejtillan, nitaj jaykʼajpis munasqaykiraykullaqa chayta ruwaychu. Chayrayku congregacionpi ima ruwanatapis japʼinki chayqa, Bibliaj nisqanman jina ancianos yuyaychasusqankuta ruway, ajinamanta paykunata jatunpaj qhawasqaykita rikuchinki, congregacionmanta hermanostaj qanpi atienekusonqanku. Astawan yachakuspañataj, congregacionta yanapayta atinki Diospa llajtan imatapis uj jinamanta ruwanata kamachisqanman jina ruwananpaj, imaraykuchus Diospa llajtanqa ñaupajllamanpuni rishan. Tiempo pasasqanman jinataj, Jehovaqa yanapasonqa. Ichapis yachachisoj hermanosmanta nisqaqa congregacionpaj astawanraj ruwayta atinki (Juan 14:12). w15 15/4 2:17

Ichapis uj jatun chʼampaypi rikukushanki, Pablo jinataj “leonpa siminmanta” librasqa kayta necesitashanki (2 Tim. 4:17). Ajinapi rikukuspa Jehová Diospi atienekunaykeqa may sumaj. Sutʼincharinapaj, ichapis onqosqa familiarniykita qhawashanki. Jehovamantataj yanapata mañakorqanki imatapis sumajta ajllanaykipaj, aguantanaykipaj kallpata qosunanta ima. Jehová imaynachus kashasqaykita yachasqanta yuyarikuspa, ichapis manaña anchata llakikunkiñachu. Jehovaqa aguantanaykipaj, cheqa sonqollapuni kanaykipaj ima yanapasonqa. Wakin kutisqa ichapis yuyawaj Jehová mana yanapashasusqanta. Ichapis onqosqa familiarniykita jampej doctores imaynatachus jampinankumanta mana uj yuyayllaman chayayta atinkumanchu. Chayri suyasharqanki familiaresniyki sonqochasunankuta, reparasqaykiman jinataj chʼampayllata astawan rikhurichinku. Ajinapi rikukuspa may allin kanman Diosmanta kallpata mañakunallaykipuni. Paymantaj astawan qayllaykunallaykipuni (1 Sam. 30:3, 6). Imaynatachus Jehová yanapasusqanta rikuspataj, astawan payman qayllaykunki. w15 15/4 4:10, 11

Noqanchejqa mana chʼaukiyachikunchejchu, imaraykuchus yachanchej Satanás kasqantapuni. Yachallanchejtaj pay, uj katarinejta Evawan parlasqanta, Job interesraykulla Diosta yupaychan nisqanta, Jesusta kinsa kutirayku juchaman urmachiyta munasqanta, Jesús 1914 watapi rey jina churasqa kasqantawan, Jallpʼapiraj kaj ajllasqa cristianoswan ‘maqanakusqanta’ ima (Gén. 3:1-5; Job 1:9-12; Mat. 4:1-10; Apo. 12:17). Kunankamapis Satanasqa Diospa tukuy kamachisninwan maqanakushallanpuni. Payta atipanapajtaj, contranpi maqanakunallapuni tiyan, creeyninchejpis may sinchʼi kanan tiyan. Satanasqa maytapuni jatunchakun. ¿Imaraykutaj chayta ninchej? Imaraykuchus Jehová Dios mana kamachinawanchejpaj jinachu kasqanta nerqa. Chantapis tukuy runaswan yupaychachikuyta munarqa. Rikunchej jina Satanasqa maytapuni jatunchakun, chayrayku payta atipanapajqa mana jatunchakoj runaschu kananchej tiyan, manaqa “kʼumuykukoj sonqoyoj” kananchej tiyan (1 Ped. 5:5). w15 15/5 2:3, 4

Noqanchejqa, janaj pachapi chayri kay pachapi kausakuyta suyakuspapis, imatachus Jehová Dios qonawanchejta niwasqanchejpi yuyanchej. Qan, ¿chaykunapi tʼukurinkichu? Chayta ruwayqa kusichisonqa. Mosoj pachapi kashasqaykipi tʼukuriy, yuyaytaj kay Jallpʼata uj kʼachitu paraisoman amigosniykiwan tukuchinaykipaj llankʼashasqaykipi. Qan jinataj, tukuy runas Jehovata munakonqanku. Chantapis mana onqonkichu, mana llakikunkichu, aswan kallpayojtaj kanki. Qanmanta llakikoj runastaj imatachus ruwanaykita nisonqanku. Chantapis may kusisqa kanki, imaraykuchus imatachus ruwayta yachasqaykiwan wajkunata yanapanki, Jehovata jatunchanki ima. Ichapis wañuymanta kausarimojkunata Jehovata rejsinankupaj yanapanki (Juan 17:3; Hech. 24:15). Kay imasqa mana uj cuentollachu kanku. Astawanpis juntʼakonqapuni, imaraykuchus chayta Biblia niwanchej (Isa. 11:9; 33:24; 35:5-7; 65:22). w15 15/5 3:15

Jesusqa, Jehová Diospa atiyninwan ashkha runaspaj yakuta sumaj vinoman tukucherqa (Juan 2:6-11). Jesusqa mana ni jaykʼaj atiyninta apaykacharqachu munaynillanta ruwananpaj. Sutʼincharinapaj, Kuraj Supay rumista tʼantaman tukuchinanta nejtin, mana kasorqachu (Mat. 4:2-4). Jesusqa atiyninta apaykacharqa runasta yanapananpaj. ¿Imaynatataj pay jina ruwasunman? Pay nerqa: “Qoriychej wajkunaman”, nispa (Luc. 6:38). Chaypajqa hermanosninchejta wasinchejman mikhurinapaj wajyarisunman. Chantapis tantakuy tukukusqantawan paykunawan parlarinapaj tiempochakusunman. Ichapis mayqen hermanollapis umallirichiyninta wakichikusqanta uyarinata munanman, chayri aswan allinta willananpaj yanaparinata munanman. Wajkunata yanapaspa, paykunamanta khuyakuspa imaqa, Jesús jina ruwashanchej. w15 15/6 1:3, 4, 6

Tukukuykama Diosman cheqa sonqollapuni kasunchej chayqa, Armagedón kashajtin mana wañusunchu, chaytaj uj jatun milagro noqanchejpaj kanqa. Chantapis Armagedón pasayta ashkha milagrosta rikusunchej. Tukuy runastaj juntʼa runasman tukonqanku (Isa. 35:5, 6; Apo. 21:4). Manañataj mayqenninchejpis lentesta, tojnusta, muletasta, silla de ruedasta, audifonosta ima necesitasunchu. Chantapis kay Jallpʼata uj paraisoman tukuchisunchej (Sal. 115:16). Jesuspa milagrosninmanta Bibliapi leespaqa, “may chhika runas[man]ta” kajkuna tukuy ima onqoy tumpamantawan chinkananpi astawan atienekunku (Apo. 7:9). Jesuspa milagrosnenqa, pay mayta munakuwasqanchejta rikuchiwanchej (Juan 10:11; 15:12, 13). Runasmanta khuyakusqanpis, Jehová kamachisninta mayta munakusqanta rikuchiwanchej (Juan 5:19). w15 15/6 2:16, 17

Europapi uj guerra 1914 watapi qallarerqa, chaytaj Jallpʼantinman chayarqa. Chay wataspeqa ashkha runas yarqhaymanta wañorqanku. Kay 1918 watapitaj gripe españolawan ashkha runas wañullarqankutaj. Tukuy chaykunataj Jesús nisqanman jina juntʼakusharqa (Mat. 24:3-8; Luc. 21:10, 11). Chaytaj, Jesús 1914 watapi kamachiyta qallarisqanta rikucherqa. Chay watapitaj Jesusqa “atipaspa llojserqa”, atipanallanpajpunitaj (Apo. 6:2). Chaypacha Jesusqa Satanasta, supaykunasnintawan, kay Jallpʼaman wijchʼumorqa. Chay watapitaj kay pʼunchaypaj versiculopi kaj profecía juntʼakorqa. w15 15/6 4:13

Apóstol Pabloqa ñaupajmantaña nerqa congregación ukhullamantataj wakinkuna cheqa kajta qʼewispa llullasta yachachinankuta (Hech. 20:28-30; 2 Tes. 2:3, 4). Chaytaj juntʼakuyta qallarerqa cristiana congregación rikhurisqanmanta niraj pachaj watas kashajtin. Chayrayku chay wataspi mana yachakorqachu pikunachus cheqa cristianos kasqankuta. Chaywanpis ashkha watasninmanraj Jehová Diosqa, Jesusnejta pikunachus mana rikukoj templonpi Payta sirvishasqankuta sutʼincharqa. Kay 1919 watapajqa mana rikukoj templopi, pikunachus Diosta sirvishasqanku sutʼi karqa. Imaraykuchus paykunaqa Diosta munasqanman jina yupaychanankupaj chay watapi llimphuchasqa karqanku (Isa. 4:2, 3; Mal. 3:1-4). Chay tiempopi Pablo imatachus mosqoypi jina rikusqan juntʼakuyta qallarerqa. Chaytataj qhawarinachej. Imatachus mosqoypi jina Pablo rikusqanqa, kay 2 Corintios 12:2-4 versiculospi kashan. Chay mosqoypi jina Pabloman Jehová rikuchisqanqa, imachus aswan qhepaman kananta rikuchin. w15 15/7 1:6-8

Kayqa, ¿ninayanchu ajllasqa cristianos arrebatasqas kanankuta? Ashkha runas creenku cristianos aycha cuerpopi janaj pachaman apasqas kanankuta. Chantapis creellankutaj Jesús kay Jallpʼata kamachinanpaj aycha cuerpopi jamunanta. Chaywanpis Bibliaqa sutʼita rikuchin mana aycha cuerpopichu jamunanta. Biblia nin: “Runaj Churimpa señalnin cielopi rikhurenqa [...] cielo phuyus patapi jam[onqa]”, nispa (Mat. 24:30). Chantapis Bibliaqa nillantaj: “Aycha cuerpollaqa mana atinchu Diospa reinonta herenciapaj japʼiyta”, nispa. Pikunachus cieloman apasqa kanqanku chaykunaqa “uj jinaman tukuchisqa ka[nanku tiyan], ujllata, uj ñawi chʼirmiypi, cornetaj waqaynimpa tukukuynimpi” (1 Cor. 15:50-53). Cieloman apasqa kajkunamanta mana nisunmanchu arrebatasqas kanankuta, imaraykuchus chayta nispaqa llulla religiones jina yachachishasunman. Chaywanpis Jallpʼallapiraj kaj cheqa sonqo ajllasqa cristianosqa, uj ñawi chʼirmiypi cieloman apasqa kanqanku, nitaj aycha cuerpopichu. w15 15/7 2:14, 15

Tantakuna Wasipeqa Jehovata yupaychanapaj tantakunchej. Tantakuykunasninchejqa Jehová Diosmanta uj sumaj regalo kanku, imaraykuchus chaykunaqa Jehovawan astawan masichakunapaj yanapawanchej. Chaykunanejta Diospa llajtan necesitasqanchej kamachiykunata qowanchej, kallpachawanchej ima. May sumajpuni Jehovaj “mikhunanmanta” mikhunanchejpaj wajyarisqa kasqanchejqa (1 Cor. 10:21). Chay wajyariytataj ni jaykʼaj qonqananchejchu tiyan. Jehovaqa payta yupaychanapaj, hermanosninchejwan kallpachanakunapaj ima, tantakuykunaman rinanchejta Biblianejta niwanchej (Heb. 10:24, 25). Jehovata jatunpaj qhawasqanchejraykutaj tukuy tantakuykunaman rinapaj kallpachakuna. Tantakuykunamanta Jehovaman agradecesqas kasqanchejta, tantakuypi tapuykunaman kutichinapaj wakichikuspa rikuchinchej. w15 15/7 4:3, 4

Chay kamacheyqa, Jesús rijchʼarisqa kananchejta nisqanta yuyarichiwanchej. Diospa llajtanpis tukukuy pʼunchaypaj wakichisqas, rijchʼarisqas kananchejta, mosoj pachapi yuyananchejta ima sapa kuti niwanchej (2 Ped. 3:11-13). Ñaupa tiempomanta cristianosqa Jehovaj pʼunchayninpaj wakichisqas, rijchʼarisqas kananku karqa. Kunan tiempotaj astawanraj tukukuy pʼunchaypaj wakichisqas kananchej tiyan. ¿Imaraykú? Imaraykuchus Jesuspa profeciasnin rikuchiwanchej pay kamachishasqantaña, qhepa pʼunchaykunapi kausakushasqanchejta ima. Sutʼincharinapaj, kay pachaqa astawan sajrayashan, Reinomanta willaytaj Jallpʼantinpi willakushan. Tukuy kaytaj 1914 watamantapacha juntʼakushan (Mat. 24:3, 7-14). Jesusqa mashkha unaytachus qhepa pʼunchaykuna kananta mana nerqachu. Chayrayku wakichisqa kananchej tiyan, imaraykuchus tukukuy pʼunchayqa ima ratollapis chayamonqa. w15 15/8 2:4, 5

Mosoj pachapeqa Jehovaj amigosnin kasqanchej astawan kusichiwasun (Mat. 5:3). Jehovata sirviy may sumaj kanqa, chayta ruwaspataj kusikusunchej. Chayrayku mosoj pachapi kausanapaj wakichikuyta munanchej chayqa, kunanmantapacha Jehovata sirviyta may sumajpaj qhawanachej tiyan (Mat. 6:19-21). ¿Imaynatataj Jehovata sirvispa astawan kusikusunman? Imatachus aswan qhepaman ruwananchejpi tʼukurispa. Sutʼincharinapaj, wayna chayri sipas kanki chayqa, imaynatachus aswan qhepaman Diosta sirvinaykipi tʼukuriy. Ichapis chaypajqa Diospaj astawan llankʼanaykipi tʼukuriwaj. Chayta ruwanaykipajtaj publicacionesninchejpi imaynasmantachus Diospaj astawan llankʼayta atisqaykimanta parlaj yachaqanasta tarinki. Chantapis ashkha watastaña Diospaj astawan llankʼaj hermanoswan parlariwaj. Diosta tukuy kausayniypi sirvinki chayqa, mosoj pachapi kausakunaykipaj ashkha imasta yachakunki. w15 15/8 3:13, 14

Espirituman jina kausaj runasqa, kallankutaj kʼachas, pacienciayoj ima, sajra munayninkuwantaj mana atipachikunkuchu (Gál. 5:22, 23). Ajina kaspa, wiñay tukusqa cristianosqa chʼampaykunapi kaspa mana usqhayllata phiñakunkuchu, astawanqa imapis mana allin llojsejtin pacienciawan allinchakunanta suyanku. Kay kʼacha kaykunaqa, chʼampaykunapi kajtinku mana phiñakunankupaj yanapan. Bibliata ukhunchashaspataj, imachus allin imatajchus mana allinchu kasqanta yachanankupaj yuyaychaykunata maskʼanku. Yachakusqankuman jinataj ima ruwaytapis ajllanku. Llampʼu sonqos kanku, reparankutaj Jehovaj yuyaychayninman jina, kamachiykunasninman jina kausakuy aswan allin kasqanta. Chantapis sonqo kʼajaywan sumaj willaykunata willanku, congregación ujchasqa kananpajtaj mayta kallpachakunku. Ashkha watastaña Diosta sirvispapis chayri manapis, tukuyninchej tapurikunanchej tiyan: “¿Imastataj ruwanallaypuni tiyan Jesús jina ruwanaypaj?”, nispa. w15 15/9 1:6, 7

Uj kutipi Jesuspa yachachisqasnenqa, Galilea qocha chaupita Jesusta yaku patata purishajta rikorqanku. Pedroqa Jesusta nerqa: “Niway kay yaku patata qanman jamunayta”, nispa. Jesustaj “jamuy”, nerqa. Pedrotaj botemanta uraykuytawan, yaku patanta Jesusman riyta qallarerqa. Tumpata puriytawantaj sinchʼi wayrata rikuspa mancharikorqa, yakuman chinkaykoj jina kashaspataj Jesuspa yanapayninta mañakorqa. Jesustaj usqhayta makinta aysariytawan, payta japʼiykuspa, kay pʼunchaypaj versiculopi nisqanta payman nerqa (Mat. 14:24-32). ¿Imaraykutaj Pedro Jesús yaku patata jamuy nejtin botemanta uraykuytawan yaku patata puriyta qallarerqa? Jehová, Jesusta jina yanapananpi creesqanrayku. Jinallatataj noqanchejpis Jesús yachachisqasnin kananchejpaj wajyariwajtinchej, Jehovaman qokorqanchej, bautizakorqanchejtaj. ¿Imaraykú? Jehovawan, Jesuswan yanapanawanchejpi mayta creesqanchejrayku (Juan 14:1; 1 Ped. 2:21). w15 15/9 3:1, 3

Uj kʼacha tataqa ima llakiymantapis wawasninta jarkʼan. Jehovapis ajinallatataj noqanchejta jarkʼawanchej. Kaypi tʼukuriy. Ñawisninchejtaqa imallamantapis usqhayllata jarkʼanchej, ¿icharí? Ajinallatataj Jehovapis imallamantapis usqhayllata jarkʼawanchej. Chaytataj munakuwasqanchejrayku ruwan (Zac. 2:8). Jehovaqa Estebanta jina, wakin cheqa sonqo kamachisninta enemigosninku wañuchinankuta saqen. Jinapis llajtanta Satanaspa tojllasninmanta jarkʼan, chayrayku llajtanman willan Satanás imaymana tojllasta churasqanta (Efe. 6:10-12). Sutʼincharinapaj, Jehovaqa Biblianejta, publicacionesnejta ima willawanchej, qolqeta munapayay, sonqota kusirichinapaj khuchichakuykunata, maqanakuykunata qhaway, Internetpi sajra imasta qhaway ima, mana allinchu kasqanta. Sutʼita rikunchej Jehová uj kʼacha Tata jina munakuwasqanchejta, jarkʼayta munawasqanchejta ima. w15 15/9 4:15, 17

Jehovaqa kamachisninta jarkʼan willayninkuman churanakojkunamanta (Fili. 1:7). Sutʼincharinapaj, wakin gobiernosqa mana willajta saqewarqanchejchu, chayraykutaj tribunalesman demandakoj rerqanchej. Jallpʼantinpi 268 demandaspi atiparqanchej. Sutʼincharinapaj, 2000 watamantapacha Tribunal Europeo de Derechos Humanos nisqapi 24 kutista atiparqanchej. Chaytaj Jehová llajtanta yanapananta ni ima jarkʼayta atisqanta rikuchiwanchej (Isa. 54:17). Jehovaj yanapaynillanwan sumaj willaykunamanta kay pachaj kʼuchusninpi ima willakushan (Mat. 24:14; Hech. 1:8). Chantapis Jehovaj yanapaynillanwan Jallpʼantinmanta kamachisnin ujchasqas kashanku. Chaytaj Diospa llajtallanpi rikukun. Jehovata mana yupaychaj runaspis ninku: “Cheqamantapuni Dios qankuna ukhupi kashasqa”, nispa (1 Cor. 14:25). Jehová yanapashawasqanchejta ashkha imas rikuchiwanchej (Isa. 66:14). w15 15/10 1:13, 14

Apóstol Pablo nerqa kay pachaj imasninwan mana anchata kusikunata (1 Cor. 7:29-31). Chayrayku sumajta qhawarikunanchej tiyan mana kay pachaj imasninpi tiemponchejta usuchinanchejpaj. Chaywanpis wakin imasqa yanapawasunman. Apóstol Pabloj yuyaychasqanta kasukusunchej chayqa, mana kay pachaj imasninpi tiemponchejta usuchisunchu. Ajinamanta Jehovapaj mayta llankʼallasunpuni (Efe. 5:15-17). ¿Imastaj tiemponchejta qhechuwasunman? Librosta leey, televisionta qhaway, wakin lugaresta rejsej riy, mana necesitasqanchej imasta rantej riy, mensajesta apachinakuy, noticiasta anchata qhaway, deportespi mayqenchus ganasqanta qhawayta munay chayri mosoj celulares, computadoras, waj imas rikhurimushasqanmanta yachayta munay. Wakenqa chay imasllaman anchata qokunku (Ecl. 3:1, 6). Satanasqa Jehovata manaña sirvinanchejpaj, kay pachaj imasninpi astawan yuyananchejta munan. Chayta ruwarqa ñaupa tiempomanta cristianoswan, kunanpis ajinallatataj ruwashan (2 Tim. 4:10). Chayrayku kay pʼunchaypaj ajllasqa versiculopi nisqanta japʼikuna tiyan. w15 15/10 3:7, 8

Diospa angelnenqa, Manoaj warminman rikhurispa wawayoj kananta nerqa. Chay warmi qosanman willajtintaj qosanqa mayta kusikorqa, imaynatachus wawitankuta uywanankupitaj tʼukurerqa. Manoa, warmin ima, ¿imaynatá wawitankuman yachachinkuman karqa Jehovata munakuyta, sirviyta ima, ashkha israelitas sajra imasta ruwashajtinkupis? Manoaqa Jehovamanta mañakorqa: “Mañarikuyki Señorníy, ujtawan kachamunaykita chay runata willarinawaykupaj imastachus ruwanaykuta nacenan kashan, chay qhari wawawan”, nispa (Jue. 13:1-8). Qan tata chayri mama kanki chayqa, Manoa imaynatachus wawitanta uywananmanta llakikusqanta entiendenkichá. Qanpis wawasniykiman Jehová Diosta munakuyta, sirviyta ima yachachinayki tiyan (Pro. 1:8). Familiapi Diosta Yupaychanapaj tantakuypi Jehová Diosmanta, Bibliamanta ima yachakunallankupajpuni yanapawaj. Astawanqa yanapanaykipaj Jesusmanta yachakuwaj (Deu. 6:6-9). w15 15/11 1:1, 2

Wawasniykichej imatachus yuyasqankuta mana Jesús jina yachayta atispapis, paykunata entiendeyta atiwajchej. Jehová yanapasonqachej kʼacha kaykunasninkuta qhawanaykichejpaj. Wakin kuti pantajtinku ama niychejchu mana allin wawaschu kasqankuta nitaj ni imapaj sirvisqankuta. Astawanpis kʼacha kaykunasninkuta qhawasqaykichejta, allin kajta ruwayta munasqankuta yachasqaykichejta ima niychej. Allin runas kanankupaj kallpachakusqankuta qhawaychej, niychejtaj allinta ruwankichej nispa. Atikojtintaj ima ruwaykunatapis ruwachiychej ñauparinallankupajpuni. Jesusqa ajinata ruwarqa. Sutʼincharinapaj, Natanaelta rejsisqanmanta wata khuskanninman apostolnin kananpaj ajllarqa, Natanaeltaj chay ruwayta sumajta juntʼarqa (Luc. 6:13, 14; Hech. 1:13, 14). Qankunapis wawasniykichejta kallpachaychej, allinta ruwasqankuta ima niychej. Ni imata allinta ruwayta atisqankuta yuyanankumantaqa, Jehovapaj allinta llankʼayta atisqankuta yuyanqanku. w15 15/11 2:15, 16

Qhepa pʼunchaykuna 1914 watapi qallarishajtin, ajllasqa cristianosqa Jallpʼantinpi mana ashkhachu karqanku. Paykunaqa chʼampaykunapi rikukuspapis runa masinkuta munakusqankurayku, Diospa espíritu santonpa yanapayninwan ima willallarqankupuni. Ajinata willamusqankuraykutaj “may chhika” runasta, nisunman kay Jallpʼapi wiñaypaj kausakuyta suyakojkunata tantakushan. Kay tiempopitaj chay “may chhika” runasqa Jallpʼantinpi 8 millones jinaña kanku, 115.400 congregacionespitaj tantakunku, yapakushallankupunitaj. Sutʼincharinapaj, 2013 septiembre killamanta 2014 agosto killakama, 275.500 runasmanta astawan bautizakorqanku. Kaytaj niyta munan sapa semana 5.300 runas bautizakusqankuta. Diospa kamachisnenqa yapakushallanchejpuni Diospi creesqanchejrayku, Bibliata Diospa Palabranta jina qhawasqanchejrayku ima (1 Tes. 2:13). Satanás churanakuwajtinchejpis, chejnikuwajtinchejpis Jehovawan allinpi kasqanchejmanta kusikunchej (2 Cor. 4:3, 4). w15 15/11 4:12, 14, 16

Yachayniyoj runasqa Diospa Palabranmanta unay qhelqasqasta, chay ñaupa Bibliaswan kikincharqanku. Repararqankutaj Bibliaj yachachisqan pachallan kasqanta. Bibliata tukuy sonqo estudiajkunaqa, Bibliapi leesqanku Diospa yuyayninpuni kasqanta yachanku. Bibliata chinkachinankupaj tukuy imata ruwajtinkupis, mana chinkachiyta atinkuchu, imaraykuchus kay pʼunchaykunapi Bibliata 2.800 kuraj parlaykunapi leeyta atinchej. Ni mayqen libropis Biblia jinaqa ashkha qallusman tijrachikunchu. Ashkha runas Diospi mana creejtinkupis, Bibliaqa tukuy runasman chayashallanpuni. Wakin Biblias waj parlayman mana allin tijrachisqapunichu kajtinpis, runasta yanapan uj suyakuyniyoj kanankupaj, wiñay kausayta tarinankupaj ima. w15 15/12 1:13, 14

Imatachus nisqanchejqa runasta sonqochanman chayri astawan llakichinman. Chayrayku sumajta tʼukurinanchej tiyan imatachus ninanchejpi. Kay pachapi ashkha runasqa wajkunaj sonqonkuta nanachinankupaj jina parlanku, espadata jina qallunkuta filoyachinku, jaya parlasqankuta venenoyoj flechasta jina kachaykunku (Sal. 64:3). Chaytataj telenejta, peliculasnejta ima yachakunku. Chaywanpis Diosta yupaychajkunaqa ni chanzallapipis runaj sonqonta nanachinapaj jina imatapis parlananchejchu tiyan. Asirikunapaj jina parlayqa mana juchachu, astawanpis sumajta parlarikunapaj yanapawanchej. Chaywanpis ni jaykʼaj imatapis wajkunaj sonqonkuta nanachinapaj jina parlanachu, nitaj pitapis pʼenqaypi rikhurichinapaj jina parlanachu, wajkunata asichinanchejraykullaqa. Biblia nin: “Simiykichejmantapis ama ima sajra parlaykuna llojsichunchu, manachayqa maychus kajta parlaychej, uyarisojkuna chaywan yanapasqa kaspa, Diospi wiñanankupaj”, nispa (Efe. 4:29, 31). w15 15/12 3:10

Ñaupa tiempopi Diospa llajtanta kamachejkunaqa chay palabraswan tukuchaspa congregacionesman cartasta apacherqanku. Walejllata kakushaychej nispaqa, waj parlaypi waj kutikama nisharqanku. Chaytaj yuyarichiwanchej Diosta sirvinapaj tukuypis mana onqoyta munasqanchejta. Kay sajra pachapi kausashasqanchejrayku, juchasapas kasqanchejrayku ima, onqollasunpuni. Rikunchej jina mana suyasunmanchu kay tiempopi Jehová uj milagronejta sanoyachinawanchejta. Chaywanpis mosoj pachapi Jehovaqa manaña onqonanchejta saqenqachu. Apóstol Juanqa ‘kausay yakumanta’, ‘kausay sachʼamantawan’ parlarqa, mayqenkunachus tukuy “nacionesta” sanoyachenqa (Apo. 22:1, 2). Chaywanqa mana nisharqachu kay tiempopi, paraisopi ima jampikunapaj hierbasta ujyanata. Astawanqa Jehovawan, Jesuswan ima, wiñaypaj kausakunapaj imastachus ruwanankumanta parlasharqa (Isa. 35:5, 6). w15 15/12 4:17, 18

Jehovaqa tiemponchejpi kay profecía juntʼakunanta nerqa: “Waj llajtasmanta chunka runas uj judío runaj pʼachanmanta japʼiykukuspa, nenqanku: Qankunawan riyta munayku, imaraykuchus uyariyku qankunawan Dios kasqanta”, nispa (Zac. 8:23). ‘Judío runaqa’, ajllasqa cristianoswan ninakun, mayqenkunatachus Dios espíritu santonwan ajllan. Paykuna “Diospa nacionnin Israel kanku” (Gál. 6:16). ‘Chunka runastaj’, kay Jallpʼapi wiñaypaj kausakuyta suyakojkunawan ninakun. Paykunaqa imaynatachus Jehová ajllasqa cristianosta bendecisqanta yachanku, chayraykutaj ajllasqa cristianoswan khuska Jehovata yupaychayta may jatunpaj qhawanku. Jesusqa profeta Zacarías jinallataj Diospa llajtan ujchasqa kananta nerqa. Janaj pachapi tiyakuyta suyakojkunata “juchʼuy tropa ovejas[...]” kasqankuta nerqa, kay Jallpʼapi kausakuyta suyakojkunatataj “waj ovejas” kasqankuta nerqa. Chaywanpis Jesusqa janaj pachapi tiyakuyta suyakojkuna, kay Jallpʼapi tiyakuyta suyakojkuna ima “uj tropalla” kanankuta, paypa qhepanta rinankuta, kʼata michejninkuta jina qhawanankuta nerqa (Luc. 12:32; Juan 10:16). w16.01 4:1, 2

Satanaspa sajra pachanpi kausakusqanchejrayku, pantaj runas kasqanchejrayku ima, sumajta qhawarikuna tiyan mana kay pachamanta runas jina yuyanapaj, ruwanapaj ima. Imaynatachus may chhika yakuyoj mayuta waytʼaspa pasanapaj mayta kallpachakunchej, ajinallatataj Jehovawan amigos kasqanchejta jarkʼanapaj mayta kallpachakuna tiyan. Diosmanta runasman willayqa Jehovawan amigos kasqanchejta jarkʼanapaj yanapawanchej. Imaraykuchus Diosmanta, Bibliamanta ima runasman parlaspaqa, sumaj imaspi yuyanchej, nitaj creeyninchejta llauchʼiyachin chay imaspichu. Chantapis runasman willayqa Diospi creeyninchejta astawan sinchʼiyachin, imaraykuchus imatachus Dios noqanchejpaj munasqanta, kamachiykunasninta ima yuyarichiwanchej. Chantapis kʼacha kaykunata rikuchinapaj yanapawanchej, chaytaj Satanasmanta, pachanmanta ima jarkʼawanchej (Efe. 6:14-17). Diosta yupaychaypi ruwanasninchejqa, mana llakiykunasnillanchejpi yuyanapaj yanapawanchej. w16.01 5:12, 13

Rut, Jehovata munakusqanqa Booztapis tʼukuchillarqataj, paytaj aswan qhepaman Jehovaj lijrasnin urapi pakakusqanmanta allinta ruwasqanta nerqa (Rut 2:11, 12). Chay nisqantaj yuyarichiwanchej uj chilwisitu mamanpaj lijarasnin urapi imamantapis jarkʼakunanpaj pakakusqanta (Sal. 36:7; 91:1-4). Ajinallatataj Jehovapis uj kʼacha tata jina Rutta jarkʼarqa, creeyninraykutaj bendicerqa. Rutqa ni jaykʼaj pesachikorqachu imatachus ajllasqanmanta. Kunanpis ashkha runas Jehová Diosta rejsispapis, mana lijrasnin urapi pakakuyta maskʼankuchu. Nitaj yuyankuchu Diosman qokuspa bautizakuyta. Qanpis bautizakuyta mana yuyashankichu chayqa, imaschus jarkʼashasusqanpi tʼukuriy. Tukuypis uj diosta chayri waj imata sirviyta ajllanku (Jos. 24:15). Chaywanpis Jehovata sirviyta ajllananchejqa aswan sumaj. Jehovaman qokuspaqa paypi creesqanchejta rikuchinchej, paytaj pakakunanchej kanqa. Chʼampaypi rikukojtinchejpis, Rutta jina yanapawasunchej payta yupaychanallapajpuni. w16.02 2:6, 7

Abisaiqa Davidman cheqa sonqo kayta munasqanrayku Saulta wañuchiyta munarqa. Chaywanpis Jehovamanraj cheqa sonqo kananmanta qonqapusharqa. Chayrayku David Saulta wañuchinanmanta jarkʼarqa. Nerqataj Jehovaj “ajllasqan reyta” wañuchiy mana allinchu kasqanta (1 Sam. 26:9-11). ¿Imatá Abisai ruwasqanmanta yachakunchej? Pimanrajchus cheqa sonqo kananchej kasqanta mana yachaspaqa, Bibliaj nisqanpi tʼukurinanchejta. Cheqa sonqo kanapajqa sonqonchej aysawanchej, chaywanpis sonqonchej chʼauka kasqanrayku chʼaukiyawasunman (Jer. 17:9). Ichapis sajra imasta ruwaj amigonchejman chayri familiarninchejman cheqa sonqo kanapaj sonqonchej aysawasunman. Chaywanpis paykuna cheqa kajmanta karunchakojtinku, Jehovallaman cheqa sonqo kananchej tiyan (Mat. 22:37). w16.02 4:5, 6

¿Imaraykú chayta reparanayki tiyan? Timoteoj kausayninpi tʼukuriy. Payqa Diospa Palabranmanta sumajta yacharqa maman, abuelan ima yachachisqankurayku. Chaywanpis Pablo payman nerqa: “Allinta sayay imatachus yachaqakusqaykipi, creesqaykipi ima”, nispa (2 Tim. 3:14, 15). Timoteoqa imatachus mamanwan abuelanwan yachachisqanku cheqapuni kasqanta yacharqa. Japʼikorqataj mana mamanwan abuelanwan japʼikunanta nisqankuraykullachu, manaqa pay kikin yachakusqanpi tʼukurisqanrayku, cheqa kaj kasqanta reparasqanrayku ima (Heb. 5:14). Ajinallatataj, qanpis Bibliata sumajta estudianki chayqa, ima tapuykunamanpis kutichiyta atillanki, nitaj imamantapis iskayrayankichu, imapichus creesqaykitapis sutʼita yachanki (Hech. 17:11). w16.03 2:3, 4, 7

Israelitas Jehovata yupaychaj Jerusalén temploman rinankupaj purajmanta yanapanakoj kanku. Imastachus viajepaj necesitasqankutapis khuska wakichej kanku. Khuska viajaj kanku, purajmantataj yanapanakoj kanku. Temploman chayaspataj Jehovata khuska yupaychaj, jatunchaj ima kanku. Noqanchejpis mosoj pachapi kausakunapaj wakichikushanchej. Chayrayku tukuyninchej ujchasqa kananchej tiyan, purajmantataj yanapanakunanchej tiyan. Kay pachamanta runasqa mana ujchasqaschu kanku, tukuy imasraykutaj maqanakunku. Chaywanpis noqanchejqa Jehovaman mayta agradecekunchej sonqo tiyasqa kanapaj, Bibliaj yachachiyninta entiendenapaj ima yanapawasqanchejmanta. Jallpʼantinpitaj Jehová munasqanman jina yupaychashanchej. Mana jaykʼaj jinataj kay qhepa pʼunchaykunapi ujchasqa kashanchej. Imaynatachus Isaías, Miqueas nerqanku jina, tukuyninchej “Diospa orqonman wichari[shan]chej” (Isa. 2:2-4; Miq. 4:2-4). Kay tiempopi ujchasqallapuni kasunchej chayqa, tumpamantawan mosoj pachapi kausakusunchej. Chaypitaj tukuy runas “sumaj ujchasqa” kasunchej, Jehovata yupaychanapajtaj purajmanta yanapanakusunchej, ¡chaymá may sumaj kanqa! w16.03 3:16, 17

Wakin ancianosqa mana anchata tiempochakunkuchu wajkunata wakichinankupaj. Ichá yuyanku, congregacionpi waj imas, aswan allin kasqanta chaykunatataj usqhayllata allinchana kasqanta. Chayri ichapis yuyanku wajkunata mana wakichejtinku congregación allillan kananta. Chay yuyasqanku, ¿cheqachu? Cheqamanta nisunman wakin imas usqhayllata allinchana kasqanta. Chaywanpis waj hermanosta mana wakichinkichu chayqa, mana congregacionpa allinninta maskʼashankichu. Arí, Ancianosqa congregacionpi wakin ruwanasta usqhayllatapuni ruwananku tiyan. Chaywanpis hermanosta wakichinankupaj ancianos mana tiempochakonqankuchu chayqa, ima ratollapis, congregacionpi ruwanasta juntʼanankupaj wakichisqa hermanos mana kanqankuchu. Ama ni jaykʼaj pisipaj qhawaychu wajkunata wakichiyta. Congregacionta yanapayta munaj ancianosqa wajkunata yanapanankupaj tiempochakunku. Chayta ruwaspaqa yuyayniyoj kasqankuta rikuchinku, congregacionpajpis uj sumaj yanapa kanku (1 Ped. 4:10). w15 15/4 1:4, 6, 7