Febrero

Jehovaj testigosnenqa Diosman qayllaykuyta atisqanchejta jatunpaj qhawanchej. Chayrayku mayta kallpachakuna Jehová Diospa qayllallanpipuni kananchejpaj. Imaraykuchus Satanaspa pachan, juchasapa kasqanchej imaqa, Diosmanta karunchayta atiwanchej. Qanrí, ¿Jehovata uj sumaj amigoykita jinachu qhawanki? ¿Munawajchu chayta astawan kallpachayta? Kay pʼunchaypaj ajllasqa versiculoqa Santiago 4:8. Chay versiculotaj imaynatachus chayta ruwananchej kasqanta niwanchej. Rikunchej jina, Jehovawan amigos kanaykichejpajqa iskayniykichej uj imata ruwanaykichej tiyan. Jehová Diosman qayllaykunki chayqa, paypis qayllaykamullasonqataj. Jehovaman astawan qayllaykunki chayqa, paywan astawan masichakunki. Jesús jinataj ninki, pay nerqa: “Noqata kachamuwajqa cheqapuni [...]. Noqarí payta rejsini”, nispa (Juan 7:28, 29). w15 15/4 3:1, 2

Familiaykimanta pillapis congregacionmanta qharqochikusqanpi tʼukuriy. Yachankitaj Biblia nisqanman jina, qharqochikojkunawan mana parlanachu kasqanta (1 Cor. 5:11; 2 Juan 10). Familiaykita mayta munakusqaykirayku, ichapis yuyanki chay kamachiyta mana kasukuyta atillasqaykita. Ajinapi rikukojtiyki, Jehová kallpachasonqa cheqa sonqo kanaykipaj, kasukunaykipaj ima. Jehovapi atienekullaypuni, payman astawan qayllaykunaykipaj, amataj qonqaychu chay chʼampay yanapasusqanta. Adanpa ruwasqanqa yachachiwanchej, pi runamanta nisqapis Jehovata astawan munakunanchej kasqanta (Mat. 22:37, 38). ¿Imaraykutaj? Imaraykuchus chayta ruwasqanchej familiaresninchejta yanapanqa, paykuna Jehovata yupaychajtinku chayri manapis. Familiaykimanta pillapis qharqochikusqanrayku llakisqa kashanki chayqa, Jehovaman chay llakiyniykimanta willakuy (Fili. 4:6, 7). w15 15/4 4:14, 16

Wajkuna allinta ruwasqankumanta, noqanchej imatapis ruwasqanchejmanta ima kusikoyqa yanapawasunman. Chayrayku familianchejmanta, llajtanchejmanta, nacekusqanchej llajtamanta ima mana pʼenqakunanchejchu tiyan (Hech. 21:39). Jatunchakoj runas kaspaqa, amigosninchejwan mana allintachu kausakusunman, nitaj Jehovamanpis astawan qayllaykuyta atisunmanchu. Nillataj wajkuna yuyaychawasqanchejtapis japʼikuyta munasunmanchu (Sal. 141:5). Jatunchakoj runasqa may kasqankuta, wajkunamanta nisqataj aswan sumaj runas kasqankuta ima yuyanku. Ajinata yuyaj runastataj Jehová chejnikun (Eze. 33:28; Amós 6:8). Satanastajrí, munan runas pay jina jatunchakunankuta. Chayrayku maytachá kusikorqa, Nimrod, Faraón, Absalón ima jatunchakojtinku (Gén. 10:8, 9; Éxo. 5:1, 2; 2 Sam. 15:4-6). w15 15/5 2:5, 6

Jesús kay Jallpʼapi kashaspa Tatan jina ruwarqa, ashkha runasmantaj imatachus necesitasqankuta qorqa (1 Cor. 1:24). Chaytataj mana atiyniyoj kasqanta rikuchinallanpajchu ruwarqa, manaqa runasta khuyakusqanrayku. Sutʼincharinapaj, imatachus Mateo 14:14-21 versículos nisqanta qhawariy. Tukuy llajtasmanta ashkha runas Jesuspa qhepanta chakipi rerqanku (Mat. 14:13). Chʼisiyaykuytataj Jesuspa yachachisqasnenqa, chay runasta saykʼusqasta, yarqhasqasta ima rikorqanku. Chayrayku Jesusman nerqanku: “Kachapullayña runasta [...] mikhunata rantikamunankupaj”, nispa. ¿Imatataj Jesús ruwarqa? Jesusqa uj milagrota ruwarqa, phishqa tʼantaswan iskay challwaswan ashkha runasman mikhuchinanpaj. Chay mikhojkunamanta qharistaj phishqa waranqa jina karqanku, chantá warmis, wawitas ima kallarqankutaj. Biblia nisqanman jina tukuyninku mikhorqanku sajsanankukama. Puchoj tʼantastataj oqharerqanku chunka iskayniyoj canastastapuni. Rikunchej jina, Jesusqa kallpachananpaj jina mikhuyta chay runasman qorqa, ajinamanta wasisninkuman chayapuyta atinankupaj (Luc. 9:10-17). w15 15/6 1:8, 9

Jehovaqa yanapayta atiwanchej munasqanman jina kausakunapaj. Kay pachamanta runas millay chʼichi imaspi yuyajtinkupis, noqanchejqa llimphu imaspi yuyayta atinchej. Tukuypis juchasapa runas kanchej. Chayraykutaj imaynatachus wawasman miskʼi mayta gustan, ajinallatataj ichapis wakin sajra imas gustawasunman. ¿Imatataj ruwasunman sajra imaspi yuyajtinchej? Usqhayllata yuyayninchejmanta orqhonanchej tiyan. Chayta mana ruwajtinchejqa, ichá sajra imaspi astawan yuyayta qallarisunman. Chay jina yuyaytaj juchapi urmachiwasunman (Sant. 1:14, 15). Chayrayku Diosta kusichiyta munanchej chayqa, sajra yuyaykunata qhesachananchejpuni tiyan. Rikunchej jina, imatachus yuyasqanchejta sumajta qhawarikunanchej tiyan. Sajra yuyaykunata qhesachasunchej chayqa, mana khuchichakuy juchapi urmasunchu, nitaj ñakʼarisunchu (Gál. 5:16). w15 15/6 3:1-3

Casi 6.000 watas jina kashan, Diospa munaynin kay Jallpʼapi ruwakusqanmanta. Chayrayku Jehová “tukuy ima ruwasqanqa sumajpuni kasqanta” nerqa (Gén. 1:31). Satanastajrí, Diospa contranpi churakorqa, chaymantapachataj ashkha runas Diospa munayninta mana ruwankuchu. Jinapis kunanqa kay Jallpʼapi Diospa kamachisnin 8 millonesmanta astawan kanku. Paykunaqa mana Diospa munaynin kay Jallpʼapi ruwakunallantachu mañakunku, manaqa Diospa munayninta ruwanankupaj mayta kallpachakunku. Mañakusqankuman jinataj kausakunku, tukuy sonqotaj wajkunaman yachachinku. Noqanchejqa, Diospa munaynin ruwakunanta mañakullasunpuni, Diospa enemigosnin chinkachisqa kanankukama. Chantá kay Jallpʼaqa uj paraisoman tukonqa, ashkha runastaj kausarimonqanku. Jesús nerqa: “Ama chay nisqaymanta tʼukuychejchu. Hora chayamonqa, chaypachataj tukuy pʼampasqa kajkunaqa [parlasqayta] uyarenqanku [...] kawsarimponqanku[taj]”, nispa (Juan 5:28, 29). Maytachá kusikusunchej munasqa familiaresninchejwan kausarimojtinku tinkuspa. w15 15/6 4:15, 17

Publicacionesninchejqa, Diospa llajtanpi kajkuna uj paraisopi jina kausakushasqankuta sutʼinchayta yachan. ¿Imaraykú? Imaraykuchus Jehová llajtanman sonqo tiyaykuyta qon. Chaytaj sutʼita rikuchin paykunalla Jehová Diosta yupaychashasqankuta mana rikukoj templonpi (Mal. 3:18). ¿Imawantaj chay templon ninakun? Jesuspa wañuyninnejta Jehová Diosta yupaychayta atisqanchejwan. May kusiypuni Jehová 1919 watamantapacha juchasapa runasta, ujchasqas, sonqo tiyasqas ima kanankuta saqesqanqa. Jinallataj ashkhayanankuta, sinchʼiyanankuta ima saqesqanpis. Qan chay ruwaypi, ¿yanapaysikushankichu? Jehovata jatunchanapaj, paywan khuska trabajayta, ¿jatunpajchu qhawanki? w15 15/7 1:10, 11

Diospa llajtanpa contranpi Gog churanakuyta qallarishajtin, wakin ajllasqa cristianos kay Jallpʼallapiraj kashanqanku. Diospa llajtanpa contranpi churanakuy kajtin, ¿imatataj ruwasunchej? Biblia nin: “Kay kutipeqa manamin qankunachu maqanakunkichej. Chaynejpi allinta sayakuspa, kakullaychej mana kuyukuspa, rikunkichejtaj imaynatachus Tata Dios qankunata librasunaykichejta [...] ama manchachikuychejchu, nitaj kharkaychejchu”, nispa (2 Cró. 20:17). Rikunchej jina, Magogmanta Gog Diospa llajtanpa contranpi churanakuyta qallarejtinña Jallpʼallapiraj kaj cristianos cieloman apasqas kanqanku. ¿Imataj chantá kanqa? Apocalipsis 17:14 versículo sutʼinchan, Diospa llajtanpa enemigosnin “Corderoj contrampi maqanak[unankuta], Corderotaj[...] paykunata atipayk[unanta], imaraykuchus payqa señorkunaj Señornin, reyespa Reynintaj. Paywan khuska kanqanku paypa wajyasqasnin, ajllakusqasnin, payta mana wasanchajkunataj”. Ajinamanta Jesuswan, 144.000 reyeswan ima, kay Jallpʼapi kaj Diospa llajtanta salvanqanku. w15 15/7 2:16

Jehová tantakuykunaman wajyariwasqanchejrayku, tantakuyman rinapaj maychus kajllata pʼachallikuna tiyan, yachachikusqantapis sumajta uyarina tiyan. Jehovaqa munan tantakuykunaman tukuy rejkuna kusikunankuta. Chayrayku mana imatapis ruwayta munanchejchu Jehovata pisipaj qhawachinanpaj jinaqa. Chayraykutaj maychus kajta pʼachallikuna tiyan. Nitaj tantakuna horapi mensajesta apachinachu, nitaj wajkunawan parlanachu, nillataj imatapis mikhunachu chayri ujyanachu. Chantapis tatasqa wawasninkuman yachachinanku tiyan Tantakuna Wasipi mana pujllanankuta, mana correykachanankuta ima. Tantakuykunamanqa Jehovata yupaychaj rinchej, paymanta yachakoj ima. Chayrayku tantakuykunapeqa mana negociosmanta parlanachu tiyan (Nehemías 13:7, 8 kikinchay). Jesusqa mayta phiñakorqa templopi runas vendeshasqankuta rikuspa, chayraykutaj chay runasta wijchʼumorqa (Juan 2:13-17). w15 15/7 4:7, 8

Bibliaqa kay pʼunchaykunapi runas astawan sajrayanankuta nerqa (2 Tim. 3:13; Mat. 24:21; Apo. 12:12). Chayrayku kay pʼunchaykuna manchay sajra kajtinpis, astawan sajrayallanqapuni. ¿Chay ninayanchu tukukuy pʼunchay chayamunanpaj kay pacha astawanpuni sajrayananta? Wakin runasqa manaraj manchay ñakʼariy tiempo qallarishajtin tukuy suyuspi yarqhay, onqoy, maqanakuykuna ima kananta yuyanku (Apo. 7:14). Chaywanpis chayqa mana jinachu kanqa. ¿Imaraykú chayta ninchej? Imaraykuchus ajina kanman chayqa tukuy runas reparankuman Bibliaj profeciasnin juntʼakushasqanta. Bibliaj nisqanpi mana creej runaspis chayta reparallankumantaj. Chaywanpis Jesusqa ashkha runas qhepa sajra pʼunchaykunapi kausashasqankuta mana reparanankuta nerqa. Payqa tukukuy pʼunchay mana suyashajtillanku chayamunanta nerqa, ni ima kananta yuyaspa kausakushasqankurayku (Mat. 24:37-39). Jesuspa nisqanpi tʼukurispa, ¿imatataj reparanchej? Niraj manchay ñakʼariy tiempo qallarishajtin, kay pachaqa sajra kasqanmanta manaña astawan sajrayanqachu (Luc. 17:20; 2 Ped. 3:3, 4). w15 15/8 2:6, 7

Mosoj pachapi kausakunapaj wakichikuspa, ¿tiemponchejta usuchishasqanchejtachu nisunman? Mana. Jehová Diosta sirviyqa ni imawan kikinchakuyta atinmanchu. Chantapis Jehová Diostaqa sirvinchej mana wajkuna tanqawasqanchejraykuchu, nitaj kay sajra pacha chinkachisqa kashajtin salvakuyta munasqanchejraykuchu. Jehová Diosninchejpa amigosnin kayqa, astawan sumajta kausakunanchejpaj, kusisqa kananchejpaj ima yanapawanchej. Chantapis Jehovaqa payman qayllaykunapaj ruwawarqanchej. Chayrayku paypa munakuynin, yuyaychaynin ima, ni imawan kikinchakunchu (Sal. 63:1, 2). Jehovata tukuy sonqonchejwan yupaychasunchej chayqa, mayta kusikusunchej. Chay cheqa kasqantataj ashkha watastaña Jehovata yupaychaj hermanos kausayninkupi rikunku (Sal. 1:1-3; Isa. 58:13, 14). w15 15/8 3:16

Creeyniyoj kayqa mana atikoj ruwaykunata ruwanapaj yanapawanchej (Mat. 21:21, 22). Sutʼincharinapaj, noqanchejmanta may ashkhas ñaupa kausayninchejta saqerqanchej. Rejsiwanchej chay runaspis chayta reparanku. Chaytataj ruwarqanchej Jehová Diosta mayta munakusqanchejrayku, pay yanapawasqanchejrayku ima (Col. 3:5-10). Chantá creeyninchejrayku Jehová Diosman qokunchej, amigosnin ima kanchej. Kaykunatataj Diospa yanapaynillanwan ruwarqanchej. Creeyninchejqa yanapawanchej Satanaspa tojllasninman churanakunapaj (Efe. 6:16). Chantá yanapallawanchejtaj chʼampaykunata atipanapaj. Chayrayku Jehová Diosqa paypi creejtinchej, payta yupaychayta ñaupajman churajtinchej ima, necesitasqanchejta qowasunchej (Mat. 6:30-34). Chantá mosoj pachapi wiñay kausayta qollawasunchejtaj (Juan 3:16). w15 15/9 3:4, 5

¿Imaraykutaj Biblia Jehová ñaupajta munakuwasqanchejta nin? Imaraykuchus “juchasapasllaraj kashajtinchej” Jehovaqa Wawanta wañunanpaj kachamorqa (Rom. 5:8). Munakoyqa Jehovaj ujnin kʼacha kaynin. Chayrayku Jesús nerqa: “Señor Diosniykitaqa munakunki tukuy sonqoykiwan, tukuy almaykiwan, tukuy yuyayniykiwan, tukuy kallpaykiwan ima. Chaymin kuraj kaj kamachisqaqa”, nispa (Mar. 12:30). Jehová Diosqa tukuy sonqonchejwan payta munakunanchejta munan. Paymanta nisqa waj runata chayri imallatapis astawan munakojtinchejqa sonqonta mayta nanachisunman. Chaywanpis Jehová Diosta munakusqanchejqa, mana sonqollanchejpichu kanan tiyan. Payqa munan tukuy kallpanchejwan, tukuy yuyayninchejwan munakunanchejta. Chaytaj tukuy ima ruwasqanchejpi, imaynatachus yuyasqanchejpi ima rikukunan tiyan (Miq. 6:8). w15 15/9 5:1-3

Wakin kuteqa ichapis mana reparanchejchu Jehová Dios yanapashawasqanchejta. ¿Imaraykú? Ichapis chʼampaykunasnillanchejpi yuyasqanchejrayku qonqapusunman Jehová imaynatachus ñaupajta yanapawasqanchejmanta. Ajinallapitaj rikukorqa profeta Elías. Payqa mana manchachikoj runa karqa. Chaywanpis reina Jezabel wañuchiyta munajtin, Jehová imaynatachus ñaupajta yanapasqanmanta qonqaporqa. Chayrayku Bibliaqa Elías mayta manchachikusqanrayku wañupullaytaña munasqanta nin (1 Rey. 19:1-4). ¿Imaynatataj kallpachasqa kanman karqa, yanapatapis japʼinman karqa? Jehovaj yanapayninta maskʼaspa (1 Rey. 19:14-18). Jobpis Elías jinallataj rikukorqa. Chʼampaykunasninmanta may llakisqa kashasqanrayku, mana Jehová jinachu qhawasharqa (Job 42:3-6). Noqanchejpis chʼampaykunasniyoj kaspa, Jehovaj yanapayninta ichá mana reparasunmanchu. ¿Imataj Jehovaj yanapayninta reparanapaj yanapawasun? Biblia chʼampaykunasninchejmanta imatachus nisqanpi tʼukuriy. Ajinata ruwasunchej chayqa, Jehovata rikushasunmanpis jina qhawasunchej. w15 15/10 1:15, 16

Jesusqa willayninta ni ima jarkʼananta saqerqachu. Sutʼincharinapaj, uj kuti Capernaum llajtapi willasharqa. Willayta tukusqantawantaj runas mana ripunanpaj jarkʼayta munarqanku. Chaywanpis, ¿imatá Jesús ruwarqa? “Wajkunamampis Diospa reinonmanta evangeliota willamunallaytaj tiyan, imaraykuchus chaypaj kachamusqa kani”, nispa nerqa (Luc. 4:42-44). Jesusqa may karusta purerqa runasman yachachinanpaj. Juntʼa runa kaspapis purisqanpi saykʼukoj, samarikuytataj munaj (Luc. 8:23; Juan 4:6). Uj pʼunchay Jesús yachachisqasninman yachachishajtin, uj runa qayllaykorqa, yanapatataj mañakorqa chʼampayninta allinchananpaj. Nerqataj: “Yachachej Señor, niripuway wawqeyman herenciata rakʼinakunaykuta”, nispa. Chaywanpis Jesusqa chay runata mana yanaparqachu. ¿Imaraykú? Imaraykuchus yachachisqasninman yachachisharqa, nitaj ni ima pantachinanta munarqachu (Luc. 12:13-15). w15 15/10 3:10, 11

Jehovaj waj kʼacha kaykunasninmanta munakuynin astawan ñaupajpi. Payqa mana munakuyta rikuchillanchu, manaqa paypuni munakuy. Tukuy imatataj munakuyninrayku ruwan. Chayrayku Jehovaman may agradecesqa kashanchej munakuyninrayku janaj pachata, kay pachata, tukuy kausajkunatawan ruwasqanmanta. Jehovaqa tukuy ima ruwasqanta munakun, chaytataj sutʼita yachanchej. Chayrayku imatachus niwasqanchejta juntʼananmantapuni mana iskayrayanchejchu. Sutʼincharinapaj, Payqa munakuwasqanchejrayku “uj pʼunchayta wakichinña, mayqempichus cheqa kayninman jina tukuy kay pachapi runasta [Jesucristonejta] juzganqa” (Hech. 17:31). Manataj iskayrayanchejchu Jesús cheqan kajman jina juzganawanchejmanta. Chantá kasukoj runasqa wiñaypaj allin kausaypi kusisqas kausakuyta atenqanku. w15 15/11 3:1, 2

Willaypeqa wakin runas uyariwanchej, wakintaj mana. Willayninchejta uyarejtinkupis chayri manapis, Diosqa Bibliaj nisqanta kasukunanchejta munan. Runa masinchejta munakusqanchejraykutaj, imapichus creesqanchejmanta “llampʼu sonqowan, paykunata sumajpaj qhawaspa” sutʼinchana tiyan (1 Ped. 3:15). Runas willayninchejta qhesachajtinku chayri phiñakojtinku munakuyninchejta rikuchillanchejpuni, Jesús jina ruwanapajtaj kallpachakullanchejpuni. Payqa “runas maldicejtinku, [...] mana maldecillarqatajchu. Ñakʼarichisqa kashaspapis, mana nerqachu chaymanta pagachikunanta”. Astawanqa Jehovaj makinman saqerqa (1 Ped. 2:23). Chayrayku willayninchejta qhesachajtinku, phiñakojtinku ima mana vengakunchejchu, astawanpis llampʼu sonqos kanchej. Arí, “sajramanta sajralla[wan]taj” kutichinamantaqa, kʼacha imasta paykunarayku ruwanapaj kallpachakunchej (1 Ped. 3:8, 9). w15 15/11 4:17, 18

Jesusqa sapa kuti yachachisqasninman munakusqanta nej (Juan 15:9). Nitaj yachachejnillankuchu karqa, manaqa amigonku (Mar. 6:31, 32; Juan 2:2; 21:12, 13). Ajinallatataj qankunapis tatamamas, wawasniykichejmanqa munakusqaykichejta niychej, ruwayniykichejwantaj munakusqaykichejta rikuchiychej (Pro. 4:3). Australiamanta Samuel sutiyoj hermano nin: “Waynuchitu kashajtiy, tatayqa sapa chʼisi Biblia Yachachisqanmanta librituy nisqa librota leepuwaj. Tapuykunasniymanpis kutichiwaj, abrazaykuwaj, puñukapunaypajtaj muchʼaykuwaj. Ashkha watasninmantaj yacharqani tataytaqa juchʼuy kashajtin abuelosniy mana muchʼaykojchu, nitaj abrazaykojchu kasqankuta. Jinapis tatayqa mayta kallpachakorqa munakuyninta rikuchinawanpaj”, nispa. Chayrayku Samuelqa tatasninpa jarkʼayninpi may kusisqa wiñakorqa. Tatanwantaj sumaj amigos karqanku. Qankunapis wawasniykichejman munakusqaykichejta nejtiykichejqa, Samuel jina kusisqas kanqanku. Chayrayku paykunata abrazaykuychej, muchʼaykuychej, paykunawan parlariychej, mikhuriychej, pujllariychej ima. w15 15/11 1:3, 4

Kay 1919 watapi Bibliata yachaqajkunamanta uj qotituta “allin kamachi, yuyayniyojtaj kan[anpaj]” ajllakorqa. Chay tiempopeqa kay allin kamachi yuyayniyoj Diospa llajtanman inglespi yachachej. Kunantaj chay kamacheqa Bibliamanta orqhosqa publicacionesta 700 kuraj parlaykunapi qowanchej. Chantapis sutʼi rikukorqa Diospa llajtanqa entiendenapaj jina allin tijrachisqa Bibliata necesitasqanta. Chayrayku Diospa Llajtanta Kamachejkuna uj qotu hermanosta Bibliata tijrachinankupaj churarqanku. Chay qotutataj Traducción del Nuevo Mundo nisqa Bibliata Ruwaj Comisión sutiwan rejsikorqa. Paykunataj 1950 watamanta 1960 wata chaynejpi ima, sojta tomospi Bibliata orqhorqanku. Ñaupaj kaj tomotataj hermano Nathan Knorr uj jatun tantakuypi rikucherqa, chay jatun tantakuytaj 2 de agosto de 1950 watapi ruwakorqa. Chay hermanoqa munarqa Traducción del Nuevo Mundo nisqa Biblia ashkha runasta Jehovata rejsinankupaj yanapananta. w15 15/12 1:15, 17

Salomón ruwasqanmanta yachakunchej parlanapaj kʼacha palabrasta ajllana kasqanta. Chayta ruwanapajtaj Bibliata, publicacionesninchejtawan leey yanapawasun. Wakin palabrasta mana rejsispaqa, imachus ninayasqanta ukhunchananchej tiyan. Chantapis Jesusmanta yachakusunman pay jina ruwanapaj, wajkunata kallpachanapaj jina parlanapaj ima. Jesusqa imatachus ninanta yacharqa, Jehová ‘saykʼusqasman kallpachananpaj jina parlananta’ yachachisqanrayku (Isa. 50:4). Niraj imatapis parlashaspa tʼukurejtinchejqa, kallpachanapaj jina kʼacha palabraswan parlasunchej (Sant. 1:19, 20). Tapurikunataj: “¿Kayta pimanpis nejtiy, imatataj entiendenqa? ¿Imaynataj sientekonqa?”, nispa. w15 15/12 3:12

Jesusqa ashkha watas ñaupajta “Jerusalén llajtata soldadoswan muyurisqata rikuspa” Judeapi kaj, Jerusalenpi kaj cristianos orqosman ayqenankuta nerqa (Luc. 21:21-24). Chayta Jesús nisqanmanta 28 watasña pasarqa. Chay tiempopi Judeamanta cristianosqa qhatiykachasqas, ñakʼarichisqas kasharqanku, jinapis creeyninkupi sinchʼita sayallarqankupuni (Heb. 10:32-34). Chaywanpis chay hermanospa creeyninku mana jaykʼaj jina pruebaman churasqa kanan karqa (Mat. 24:20, 21; Heb. 12:4). Chay hermanosqa Jesuspa nisqanta kasukunankupaj, mana wañunankupaj ima, creeyniyoj kananku karqa, sinchʼitataj sayananku karqa (Heb. 10:36-39). Chayrayku Jehová Diosqa munarqa chay hermanosman apóstol Pablo cartata qhelqananta. Chay cartatataj Hebreos sutiwan rejsinchej. Chay cartaqa hermanosta aswan qhepapaj wakicherqa, kallpacharqa ima. w16.01 1:1, 2

Jehová Dios munakunawanchejta munanchej chayqa, hermanosninchejta munakunanchej tiyan (1 Juan 3:16). ¿Imaynatá hermanosninchejta munakusqanchejta rikuchisunman? Jesusqa ruwasqanwan, imaynatachus wajkunata munakunata yachachiwarqanchej. Kay Jallpʼapi kashaspataj yanapata necesitaj runasta astawan yanaparqa. Onqosqasta, ciegosta, suchusta, joqʼarasta, opasta ima sanoyacherqa (Mat. 11:4, 5). Manataj religionta kamachejkuna jinachu karqa, astawanpis Diosmanta yachakuyta munajkunaman yachachispa mayta kusikorqa (Juan 7:49). Llampʼu sonqosta munakorqa, yanapananpajtaj kallpachakorqa (Mat. 20:28). Noqanchejrí, ¿congregacionninchejmanta hermanosninchejta, astawantaj machitu hermanosninchejta yanapasunmanchu? Arí, machitu hermanosninchejta yanaparisunman. Ajinamanta Jehová Dios munakuwasqanchejqa, hermanosninchejta munakunanchejpaj yanapawanchej. w16.01 2:12-14

Waj ovejasmanta kajkunaqa mana necesitanchejchu ajllasqa kajkunaj sutisninkuta yachayta. Imaraykuchus mana sutʼita yachayta atinchejchu “kawsay pilluta” japʼinankutapunichus manachus. Jehová janaj pachaman rinankupaj wajyajtinpis, “kawsay pilluta” japʼenqanku Payman cheqa sonqollapuni kajtinku. Satanastaj chayta sumajta yachan, chayrayku ‘llulla profetasnejta’ paykunata pantachiyta munan (Mat. 24:24). Ajllasqa cristianosqa, janaj pachapi “kawsay pilluta” japʼenqanku, Jehová chayta japʼinankupaj jina kasqankuta nejtillan. Jehovaqa chayta nenqa paykuna niraj wañupushajtinku chayri “jatun ñakʼariy tiempo[...]” niraj qallarishajtin (Apo. 2:10; 7:3, 14). w16.01 4:2, 3

Runasman willamoyqa Jehová Diospaj munaynin juntʼakunanpaj yanapan. ¿Imaynamantá? Jehovaqa runas wiñaypaj kausakunankuta munarqa, chay munaynintaj Adán juchallikojtinpis mana tijrakorqachu. Jehová Diosqa wañuymanta, juchamantawan kacharichinawanchejpaj, Jesusta Jallpʼaman kachamorqa noqanchejrayku kausayninta qonanpaj. Jesuspa wañuynin yanapanawanchejta, wiñaypajtaj kausakuyta munanchej chayqa, Diosta kasukuna. Jesusqa runasman yachacherqa imatachus Dios ruwanankuta munasqanta, yachachisqasninmantaj kikinta runasman yachachimunankuta nerqa. Chayrayku Diosmanta willamunchej, runastapis paywan masichakunankupaj yanapanchej. Chayta ruwaspataj Jehovawan khuska llankʼashanchej, runasta wañuymanta, juchamanta salvananpajtaj yanapakushanchej. Chayta ruwaspaqa, runa masinchejta, Jehovata ima munakusqanchejta rikuchishanchej. Payqa “munan tukuy runas salvasqa kanankuta, cheqa kajtataj rejsinankuta” ima (1 Tim. 2:4). w16.01 5:15, 16

Ajazpa wawan Ezequiasqa tatanta sajra imasta ruwajta rikuspa, ichapis Jehovapaj phiñakunman karqa. Kay tiemponchejpi ashkha cristianos, uj llakiypi rikukuspa Diospa llajtanpaj chayri Jehovapaj mayta phiñakunku (Pro. 19:3). Wakintaj familiaresninku Diosta mana kasukusqankurayku, paykunapis mana kasukunankuta chayri tatasninku jinapuni ruwananku kasqanta yuyanku (Eze. 18:2, 3). ¿Chay cheqachu? Chay mana cheqachu kasqanta Ezequiaspa kausaynin rikuchiwanchej. Ni jaykʼaj Jehovawan phiñakunachu. Imaraykuchus mana paychu juchayoj runas sajra imaspi rikukusqankumanta (Job 34:10). Cheqamantapuni nisunman tatasqa wawasninkuta kʼacha runas chayri sajra runas kanankupaj tanqayta atisqankuta (Pro. 22:6; Col. 3:21). Chaywanpis kayqa mana ninayanchu tatasninchej imatachus ruwanku chaytapuni ruwananchej kasqanta. Imaraykuchus Jehovaqa sapallanchejmanta imatapis ajllayta atinanchejpaj jina ruwawarqanchej. Chayrayku imayna runachus kayta, imatachus kausayninchejwan ruwaytapis ajllayta atinchej (Deu. 30:19). w16.02 2:8-10

Abnerqa Saulta yanaparqa Davidta qhatiykachananpaj. Payqa yacharqa Saulpa cuentanmanta Davidta Jehová Israelpa reynin kananpaj ajllasqanta (1 Sam. 26:1-5). Jinapis Abnerqa Saúl wañusqantawan mana Davidta rey kananpaj yanaparqachu, manaqa Saulpa wawan Is-bosetta. Chantá ichá pay rey kayta munarqa, ichapis chayrayku Saulpa ujnin warminwan puñuykorqa (2 Sam. 2:8-10; 3:6-11). Davidpa wawan Absalonpis, Diosman mana cheqa sonqochu karqa, nillataj llampʼu sonqochu. Payqa rey kayta munaspa, “maqanakupaj carretata wakichicherqa, caballosta ima, phishqa chunka runastawan wajyakorqa mayllamampis rejtin, ñawpaqenta purinankupaj” (2 Sam. 15:1). Chantá ashkha israelitasta tanqarqa payman kutisqa kanankupaj. Tatantapis wañuchiyta munarqa, Jehová rey kananpaj ajllasqanta yachaspapis (2 Sam. 15:13, 14; 17:1-4). ¿Imatá Abnermanta, Absalonmanta ima yachakunchej? Mana llampʼu sonqo kajtinchej, atiyniyoj kayta maskʼajtinchejpis Diosman mana cheqa sonqo kayta atillasunchu. Jehovata munakunchej chayrí, mana Abner jina, Absalón jina kasunchu. w16.02 4:9-11

Creeyniyoj kanki, imapichus creesqaykitataj sutʼita yachanki chayqa, ruwasqasniykiwan creesqaykita rikuchinayki tiyan. Jovenespis “juchamanta tʼaqasqa, cheqan kajman jina kawsana[nku]” tiyan (2 Ped. 3:11). Juchamanta tʼaqakunaykipajqa llimphu kausayniyoj kanayki tiyan. Sutʼinchanapaj, imatachus kay qhepa sojta killaspi ruwasqaykipi tʼukuriy. Imatapis ajllanayki kajtin, ¿reparallarqankichu imachus allin, imatajchus mana allin kasqanta? (Heb. 5:14). ¿Aychaj sajra munayninta atipayta atillarqankichu? ¿Waj jóvenes sajra ruwayman tanqasojtinku sinchʼita sayayta atillarqankichu? ¿Jehovaj testigon jinachu rejsichikunki chayri compañerosniyki jinachu ruwanki mana asipayasunankupaj? (1 Ped. 4:3, 4). Tukuypis pantaj runas kanchej. Jehovata ashkha watastaña sirvejkunapis ichá wakin kuti manchachikunku Jehovaj testigosnin jina rejsichikuyta. Chaywanpis Jehovaman kausayninkuta qojkunaqa, Jehovaj testigon kasqankuta jatunpaj qhawanku, chaytataj llimphu kausayniyoj kaspa rikuchinku. w16.03 2:10, 11

Jehová Diosqa qallariymantapacha runasman kamachiykunata qorqa. Sutʼincharinapaj, Edén huertapi kamachiykunata churarqa runas kusisqas, wiñaypajtaj kausakunankupaj (Gén. 2:15-17). Chaywanpis Adanwan, Evawanqa Jehová Diospa kamachiykunasninta mana kasukorqankuchu. Evaqa Satanás uj katarinejta nisqanta kasukorqa, Adantaj warminpa nisqanta kasukorqa. Chayraykutaj Adanwan, Evawan ñakʼarerqanku, wiñaypajtaj wañorqanku. Noqanchejpis wañunchej paykuna mana kusukusqankurayku. Kunanpis, Jehová Diosqa wiñay kausayman pusaj ñanpi kanallapajpuni yanapawanchej, kamachiykunasta ima churapuwanchej. Payqa uj sumaj michej jina cheqan ñanta pusashawanchej, mana pantananchejpaj ni pañaman, nitaj lloqʼemanpis. w16.03 4:2, 3