Marzo

Congregacionmanta hermanosninkuta munakusqankurayku ancianosqa imatachus yachakusqankumanta wajkunaman yachachinankupaj kallpachakunku (Sal. 71:17, 18). Wajkunata wakichej ancianosqa may sumaj yanapa kanku congregacionpaj, imaraykuchus congregacionta sumajta sayachinku. Chantapis waj hermanosta wakichinku congregacionta yanapanankupaj, nisunman congregación ujchasqa, Diosman cheqa sonqo kananpaj. Jinata wakichisqankoqa kay qhepa tiempopi may sumaj, astawanraj manchay ñakʼariy tiempopaj (Eze. 38:10-12; Miq. 5:5, 6). Chayrayku wajkunata wakichinapaj mana tiempochakushankichejchu chayqa, wakichiyta qallariychejpacha. Yachayku congregacionpi ruwanasta juntʼanapaj mayta llankʼashasqaykichejta. Chayrayku allin kanman chayta ruwanaykichejpaj pisillata tiempochakunaykichej, wajkunata wakichinaykichejpajtaj astawan tiempochakunaykichej (Ecl. 3:1). Chayta ruwaspaqa tiempota mana usuchinkichejchu, congregacionpis yanapasqa kanqa. w15 15/4 1:8-10

Bibliaj nisqan tukuypaj kasqanta yachanchej. Chaywanpis Bibliaqa sapa ujninchejta Diosman qayllaykunapaj yanapawanchej. Chayrayku Bibliata leerishaspa, ukhuncharishaspa ima, imayna sonqowanchus leesqanchejta qhawarikunanchej tiyan. Chantapis tʼukurinanchej tiyan imaynatachus yachakusqanchejman jina ruwananchejpi. Tukuy chayta ruwajtinchejqa Jehovapis parlashawasunman jina kanqa. Jehová yanapawasqanchejta rikuspataj, paywan astawan masichakusunchej (Heb. 4:12; Sant. 1:23-25). Sutʼincharinapaj, Mateo 6:19, 20 versiculospi Jesús nerqa: “Ama kay pachapeqa [...] kapuyniykichejta tantaychejchu”, nispa. Kayta leespa, ¿imayná sientekunchej? Kausayninchejpi Jehovata yupaychayta ñaupajman churashanchejña chayqa, noqanchejwan Jehová kusisqa kashasqanta reparasunchej. Chaywanpis Diosta sirvinapaj kapuyninchejta pisiyachinanchej kasqanta reparanchej chayqa, Payman qayllaykunapaj imatachus ruwananchej kasqanta entiendenapaj Jehová yanapawasqanchejta reparasun. w15 15/4 3:3-5

Noqanchejmanpis Jehovaqa Pabloman jinallataj sumaj willaykunata willananchejta kamachiwanchej. Chantapis paywan “khuska trabaja[sqanchejta]” niwanchej (1 Cor. 3:9; 1 Tes. 2:4). Runasman willayta ñaupajman churasun chayqa, Jehová tukuy ima necesitasqanchejta qonawanchejpi atienekusunman (Mat. 6:33). Chantapis Jehová mañakuykunasninchejman kutichinanta suyakuyta atillasun. Jehovaman astawan qayllaykunapajqa sapa pʼunchay kallpachakunallapuni tiyan. Mana atipayta atina jina chʼampaypi kashaspataj, Jehovaman astawan qayllaykunapaj chay chʼampay uj yanapa kasqanpi yuyana. Bibliata leena, ukhunchana, leesqanchejpi tʼukurinapajtaj tiempochakuna. Diosmanta mañakunallapuni, paytapis yupaychanallapuni. Tukuy chaykunata ruwasun chayqa, kunan, aswan qhepaman ima, chʼampaykunapi rikukuspa Jehová yanapanawanchejpi atienekusun. w15 15/4 4:17, 18

Jatunchakoyqa congregacionta tʼaqanachinman. Wajkunata chejnikunchej chayri aswan sumaj kasqanchejta yuyakunchej chayqa, ichapis sonqonkuta nanachinapaj jina imatapis ruwarparisunman chayri parlarparisunman (Pro. 12:18). Bibliaqa yanapawanchej mana jatunchakunapaj, nitaj wajkunamanta nisqa aswan sumaj kasqanchejta yuyanapaj. Sutʼincharinapaj, Proverbios 16:5 versículo nin: “Diosqa runaykachajkunata millachikun”, nispa. Hechos 17:26 versículo nillantaj Jehová “uj runallamanta tukuy [laya] runasta” mirachisqanta. Chayrayku nisunman runasqa uj rejlla kasqanchejta imaraykuchus tukuypis Adanmanta jamunchej. Arí, Diosninchej wakin runasta astawan sumajta ruwasqanta yuyayqa, mana allinchu. Ajinata yuyaspaqa, Satanás congregacionpi munakuyta chinkachinanta, congregacionta tʼaqanachinanta ima saqeshasunman (Juan 13:35). Satanasta atipanapajqa, mana jatunchakunapaj mayta kallpachakuna tiyan (Pro. 16:18). w15 15/5 2:8, 9

Jehovaqa ajllasqa cristianosman janaj pachapi wiñaypaj kausakunankuta nerqa, waj ovejasmanta kajkunamantaj kay Jallpʼapi wiñaypaj kausakunankuta. Wiñaypaj kausakushajtinchejqa, ni imapis ñakʼarichiwasunchu (Juan 10:16; 17:3; 1 Cor. 15:53). Diosqa yachan kay tiempopi wakin imas ñakʼarichiwasqanchejta, ajinapi rikukojtinchejtaj paypis mayta llakikullantaj. Sutʼincharinapaj, israelitas Egiptopi mayta ñakʼarishajtinku Jehová Diosqa paykunamanta llakikorqa. Bibliaqa kay jinata willawanchej: “Israelitas llakisqa kashajtinku, paypis llakisqallataj karqa”, nispa. (Isa. 63:9). Astawan qhepaman israelitas templota watejmanta sayarichishajtinku, Jehová Diosqa yacharqa enemigosninku ñakʼarichishasqankuta, chayrayku nerqa: “Pillapis aylluyta llankhaykojqa ñawi papaytapis llankhaykunman jina”, nispa (Zac. 2:8). Jehovaqa imaynatachus uj mama wawitanta munakun ajinata munakuwanchej. Chayraykutaj llakiypi rikukojtinchej yanapayta munawanchej (Isa. 49:15). ¿Imaynatá Jehová jina ruwasunman? Pikunachus ñakʼarishanku chaykuna, imaynachus kashasqankupi yuyaspa (Sal. 103:13, 14). w15 15/5 4:2

Jesús chayta nispaqa, mana nisharqachu wajchayay ni jaykʼaj tukukunanta. Manaqa Satanaspa pachanpi wajchayay kanallantapuni nisharqa. May chhikha runasqa sajra kamachejkunaj juchankurayku wajchas kanku. Chaywanpis Jesucristoqa tumpamantawanqa tukuy laya ñakʼariyta chinkachenqa (Sal. 72:16). Jesusqa milagrosta ruwasqanwan, yanapanawanchejpaj atiyninta apaykachayta munasqanta rikuchiwanchej (Mat. 14:14-21). Milagrosta ruwayta mana atispapis, imatachus Biblia nisqanmanta runasman willayta atinchej. Paykunaqa mana yachankuchu imastachus Dios tumpamantawan ruwananta. Noqanchejtaj chay tukuy imasta willamunapaj kamachisqas kanchej (Rom. 1:14, 15). Chaypi tʼukurispaqa, wajkunata yanapanapaj tiemponchejta, kallpanchejta ima churayta munanchej (Sal. 45:1; 49:3). w15 15/6 1:7, 10, 11

Dioswan allinpi kasqanchejta jatunpaj qhawasqanchejrayku, Diospa nisqanman jina yuyanapaj, ruwanapaj ima mayta kallpachakunchej. Nitaj sonqonta nanachinapaj jina imatapis ruwayta munanchejchu. Astawanpis mayta kallpachakunchej llimphu imasllapi yuyanapaj, jinallataj imaschus jatunchanapaj jina kanku chay imaspipis (Sal. 24:3, 4; 51:6; Fili. 4:8). Arí, Jehova juchasapa runas kasqanchejta, wakin kutis sajra yuyaykunata mana atipayta atisqanchejta ima yachan. Sonqonta mana nanachiyta munasqanchejraykutaj, kallpachakunchej sajra yuyaykunata qhesachanapaj, llimphu imasllapi yuyanapaj ima (Gén. 6:5, 6). Diosmanta mana saykʼuspa mañakullasunpuni chayqa, sajra yuyaykunata atipanapaj yanapawasunchej. Imaraykuchus Jehovaqa espíritu santonta qowasunchej, llimphu kanapajtaj kallpachawasunchej. w15 15/6 3:4, 5

Jesusqa mana “tʼantata kunan qoway”, nispa mañakunatachu yachachiwarqanchej, manaqa “tʼantaykuta kunan qowayku”, nispa. Kunantaj qhawarinachej imaynatachus Africapi congregacionesta waturej Victor sutiyoj hermano ruwasqanta. Pay nin: “Jehovaman graciasta qoni imaraykuchus warmiywan noqawan mana llakikuykuchu imatachus mikhunaykumanta, nitaj wasimanta alquilerta paganaykumantapis. Chaykunawan hermanos yanapawayku. Chantapis Jehovamanta mañakuni qolqemanta pisichikoj hermanosta yanapananta”, nispa. Ichapis noqanchejqa mikhunamanta mana pisinchejchu, chaywanpis wajcha hermanosninchejpaj, waj ñakʼariykunapi rikukojkunapaj ima Diosmanta mañapusunman. Chantapis waj imasta ruwallasunmantaj yanapanapaj. Sutʼincharinapaj, imachus kapuwasqanchejmanta paykunaman qorisunman. Chantapis Reinomanta Jallpʼantinpi willakunanpaj qolqenchejmanta qorillasunmantaj. Yachanchej chay qolqeta qosqanchejqa necesitaj hermanosninchejta yanapasqanta (1 Juan 3:17). w15 15/6 5:4-6

Profeta Isaiasqa Diospa llajtanpi ashkha imas waj jinasmanta ruwakunanta, allinchakunanta ima nerqa (Isa. 60:17). Diosta yupaychaj waynas, kunallanraj bautizakojkuna ima, ichapis wajkuna willarisqankurayku chayri publicacionespi leesqankurayku Diospa llajtanpi ashkha imas waj jinasmanta ruwakusqanta, allinchakusqanta ima yachanku. Ashkha watastaña Diosta yupaychaj wakin hermanostaj Diospa llajtanpi chay ruwaykunata paykuna kikin rikorqanku. Chayrayku chay hermanosqa rey Jesucristonejta Dios llajtanta yanapashasqanta yachanku. Chay hermanos imatachus Diospa llajtanpi ruwakusqanmanta willariwajtinchejqa creeyninchej kallpachakonqa, Diospitaj astawan atienekusunchej. Tukuypis Diospa llajtanmanta wajkunaman willarinanchej tiyan. Kay sajra pachapeqa, Jallpʼantinmanta tukuy hermanos ujchasqa, sonqo tiyasqa kasqanchejqa uj milagro. w15 15/7 1:12, 13

Armagedón maqanakoyqa Diospa santo sutinta jatunchanqa. Cabraswan ninakoj runasqa chinkachisqas kanqanku (Mat. 25:31-33, 46). Chantapis kay Jallpʼamanta sajra ruwaykunaqa chinkanqa, may chhika runastaj mana wañonqankuchu. Tukuy kay imas tumpamantawan kananta yachaspa, ¿imatataj ruwananchej tiyan? Apóstol Pedro nerqa: “Ajinata tukuy ima [...] tukuchisqa kananta yachaspa, astawanraj juchamanta tʼaqasqa, cheqan kajman jina kawsanaykichej tiyan. Ajinata Señorpa jamunan pʼunchayta suyaspa, chay jamunanta aswan usqhayta chayachimunkichej [...]. Chayrayku munasqa hermanosníy, chay imasta suyaspaqa, atisqaykichejta kallpakuychej Diospa ñawpaqempi mana juchayoj, mana kʼamina, paywan allimpi kawsakushaj tarisqa kanaykichejpaj”, nispa (2 Ped. 3:11, 12, 14). Chayrayku Diosta yupaychayninchejqa llimphu kanan tiyan, nitaj llulla religionpa yachachiyninwan chʼichichasqachu. Chantapis allin kausayta apamoj rey Jesucristota yanapanallapuni. w15 15/7 2:17, 18

Jehovaj testigosnenqa pachantinpi Tantakuna Wasista ruwaspa mayta llankʼashanku. Paykunaqa mana imata cobraspalla Tantakuna Wasista ruwanankupaj planosta dibujanku, Tantakuna Wasista ruwanku, wakin Tantakuna Wasista allinchanku ima. Ajinata ruwasqankuraykutaj 1 de noviembre de 1999 watamantapacha, Jallpʼantinpi 28.000 Tantakuna Wasismanta astawanña ruwakun, chayrayku nisunman pasaj 15 wataspi sapa pʼunchay 5 Tantakuna Wasista ruwasqankuta. Bibliaqa ashkha kapuyniyojkuna, pisi kapuyniyojkunata yanapanankuta nin. Chayrayku Diospa llajtanqa, Tantakuna Wasista ruwachinanpaj yanapakuyta munaj hermanosta churan, hermanos qolqeta churasqankuwantaj maypichus Tantakuna Wasis necesitakun chay lugarespi ruwachin (2 Cor. 8:13-15). Ajinata ruwakusqanraykutaj, ashkha Tantakuna Wasis ruwakorqa mana pagayta atej congregacionespaj. w15 15/7 4:9-11

Jesusqa imachus qhepa pʼunchaykunapi kananta nerqa, wakichisqa kajkunalla tukukuy pʼunchay chayamusqanta reparanankupaj. Jehová Diospa kamachisnenqa wakichisqapuni kashanchej (Mat. 24:27, 42). Chayrayku 1914 watamantapacha rikushanchej imaynatachus Jesuspa nisqasnin juntʼakushasqanta. Yachanchejtaj qhepa pʼunchaykunapi kausashasqanchejta. Jehová Diostaj maykʼajchus kay sajra pachata chinkachinanta yachanña (Mat. 24:3). Rikunchej jina wakichisqas, rijchʼarisqas kananchej tiyan. ¿Imaraykutaj wakichisqas, rijch’arisqastaj kananchej tiyan? Imaraykuchus Jesucristota kasukuyta munanchej. Chantapis qhepa pʼunchaykunamanta profecías juntʼakushasqanpi creenchej. ¿Imaraykutaj chaypi creenchej? Mana imapipis creesqanchejraykullachu, manaqa Bibliaj profeciasnin juntʼakushasqanta yachasqanchejrayku. Chayrayku wakichisqas, rijch’arisqastaj suyashanchej kay sajra pacha tukukunanta. w15 15/8 2:8, 9

Mosoj pachapeqa kusisqa kausakusunchej, gustawasqanchej imastapis ruwasunchej. Imaraykuchus Jehová Diosqa kusisqas kausakunapaj ruwawarqanchej. Kusisqas kausananchejpajtaj payqa tukuy imata qonawanchejta nin (Ecl. 2:24). Chantapis yuyarikunachej Jehová Dioswan amigos kasqanchej aswan sumaj kajtin, aswan kusisqa kayta atisqanchejta. Mosoj pachapeqa imachus gustawasqanchejta ruwaspapis, kusirikuspapis Jehovata yupaychayta ñaupajman churasunchej. Chayrayku kunanmantapacha ajinata kausakuna, Jehovata sirvisqanchejrayku allin imasta japʼisqanchejpitaj tʼukurina (Mat. 6:33). Mosoj pachapi kausayqa may sumajpuni kanqa. Chaypi kausakuyta munasqanchejtataj kunanmantapacha wakichikuspa rikuchina. w15 15/8 3:17, 18

Jesusqa juntʼa runa karqa. Chaywanpis kay Jallpʼapi kashaspa pantaj runaspa chaupinkupi tiyakorqa. Sutʼincharinapaj tatasnin, hermanosnin ima pantaj runas karqanku. Yachachisqasninpis wakin kutis imatapis paykunallapaj munaj kanku, jatunchakoj ima kanku. Jesús wañuchisqa kanan karqa chay chʼisipis, “siminakuyta qallarerqanku mayqenninkuchus aswan kurajpaj qhawasqa kananmanta” (Luc. 22:24). Jinapis, Jesusqa wiñay tukusqa cristianosman tukunankupi, ujchasqas kanankupi ima atienekorqa. Chayrayku chay chʼisillataj Tatanmanta mañakorqa imaynatachus paywan, tatanwan ujchasqa kashanku, ajina ujchasqas yachachisqasnin kanankupaj yanapananta. Mañakuyninpitaj nerqa: “Ujlla kanankupaj noqanchej jina”, nispa (Juan 17:20-22). w15 15/9 1:10, 11

¿Imaraykú Pedro yaku patata purishaspa manchikuyta qallarerqa? Sinchʼi wayrata rikusqanrayku, nitaj Jesustachu (Mat. 14:24-32). Chayrayku creeynin llauchʼiyarqa, yakumantaj chinkaykuyta qallarerqa. Chay sinchʼi wayra, yaku qhollchoqeyasqan ima, chʼampaykunawan, Supaypa tojllasninwan ima kikinchakunman, chaykunatataj sapa pʼunchay rikunchej. Chaykuna mana atipayta atinapaj jina kajtinpis, Jehová kallpata qowasun aguantanapaj. Chʼampaykunallapi astawan yuyasun chayqa, Jehová yanapanawanchejpi creeyninchej pisiyanman. Mayqennillanchejpatapis creeyninchej pisiyayta atinman. Bibliaqa pisi creeyniyoj kay ‘jucha’ kasqanta nin, “mayqenchus manaraj imallapi chʼipaykuwa[sunman]” (Heb. 12:1). Pedro jina chʼampaykunasnillanchejpi yuyasun chayqa, creeyninchej pisiyanman. w15 15/9 3:1, 6, 7

Pillapis uj regalota qowajtinchej, chay regalota qowasqanchejmanta agradecesqas kasqanchejta rikuchiyta munanchej. Chantapis agradecesqa kasqanchejta rikuchisunman chay regalota apaykachaspa. Jehovaqa tukuy ima necesitasqanchejta kausakunapaj, kusisqa kanapaj ima qowanchej. Jehová mayta munakuwasqanchejta reparaspataj, noqanchejpis munakuyninchejta rikuchiyta munanchej. Qanpis, ¿ajinatachu ruwayta munanki? Jehovaqa ashkha allin imasta israelitasman qorqa. May chhika watasta imastachus kausakunankupaj necesitasqankuta qorqa. Chantapis leyesta qorqa, imatachus ruwanankuta yachanankupaj (Deu. 4:7, 8). Sutʼincharinapaj, leyqa nerqa Jehová Diosman jallpʼankoj “ñawpaj kaj poqoyninta” qonankuta (Éxo. 23:19). Israelitasqa Jehová allin imasta qonallanpajpuni, kasukunanku kasqanta, kapuyninkumanta aswan sumaj kajta qonanku kasqanta yacharqanku. Ajinamantataj Jehovaman may agradecesqas kasqankuta rikuchiyta atinkuman karqa (Deu. 8:7-11). w15 15/9 5:5, 6

¿Kausayniykipi imaynatachus Jehová yanapashasusqanta reparankichu? Sutʼincharinapaj, wakin hermanosqa Jehová cheqa religionta tarinankupaj yanapasqanta ninku. Wakenqa uj umallirichiynejta Jehová yanapasqanta ninku. Chayri Jehová mañakuyninkuman kutichispa yanapasqanta ninku. Wakintaj ichapis ninku Jehová, paypaj astawan llankʼanankupaj yanapasqanta. Wajkunataj ninku Jehová tukuy ima necesitasqankuta qosqanta tantakuykunaman, willayman ima rinankurayku llankʼayninkuta saqejtinku (Heb. 13:5). Jehovaj amigosnin, ‘llimphu sonqoyojtaj’ kasunchej chayqa, tukuy imaymanamanta yanapashawasqanchejta reparasunchej. Chaytaj niyta munan allin imaspi yuyanata, sajra imastataj qhesachanata (2 Cor. 4:2). Jehovaj amigosnin kaspa, cheqanta kausaspataj Jehovaj yanapayninta reparasunchej. w15 15/10 1:17, 19

Wakin griegospis Jerusalenman rerqanku Pascuata judioswan khuska ruwaj. Paykunaqa, imatachus Jesús templopi ruwasqanta rikuspa tʼukushaj qhepakorqanku. Chayraykutaj Felipeta nerqanku Jesuswan parlariyta munasqankuta. Jesustaj mana munarqachu imaraykuchus mana may rejsisqa kaytachu maskʼasharqa. Astawanpis Jehová imatachus kamachisqanta juntʼayta munarqa, nisunman noqanchejrayku kausayninta qoyta. Chantá yachachisqasninman nerqa tumpamantawan wañuchisqa kananta, kausayninkuta qonankupajtaj wakichisqa kanankuta ima. Pay nerqa: “Kawsayninta munakojqa chay kawsayninta chinkachenqa; kay pachapi kawsayninta qhesachajtajrí, chay kawsayninta wiñay kawsaypaj waqaychanqa”, nispa. Chaywanpis chayta ruwajkunaman, kay pʼunchaypaj versiculopi nisqan juntʼakunanta nerqa. Felipeqa chay sumaj willayta kallpachananpaj jina griegosman willarqa (Juan 12:20-25). Jesusqa kay Jallpʼapi kashaspa Diospa Reinonmanta willaykunata ñaupajman churarqa, chaywanpis mana chayllatachu ruwarqa. w15 15/10 3:13, 14

Jesusqa rikorqa yachachisqasnin mayqenninkuchus aswan kurajpaj qhawasqa kanankumanta siminakusqankuta. Chayrayku ashkha kutispi pacienciawan kʼamerqa. Yacharqataj maypichus, maykʼajchus munakuywan kʼaminanta (Mar. 9:33-37). Wawasniykichejta munakusqaykichejrayku kʼaminaykichej kasqanta yachankichej. Mana allin imasta ruwajtinkutaj, ichá sutʼinchanaykichej kanqa imaraykuchus chay ruwasqanku mana allinchu kasqanta. ¿Manapuni kasukojtinkuri? (Pro. 22:15). Jesús jina ruwaychej, pacienciawantaj yachachillaychejpuni, yuyaychallaychejpuni, kʼamillaychejpuni. Maykʼajchus, maypichus munakuywan kʼaminaykichejtataj sumajta ajllaychej. Sudafricamanta Elaine sutiyoj hermana, imaynatachus tatasnin kʼamisqankumanta yuyarikun. Paypa tatasnenqa imaraykuchus seqʼoshasqankuta sutʼinchaj kanku, nitaj phiñasqa kashaspachu chayta ruwaj kanku. Chayrayku Elaineqa tatasnin munakusqankumanta mana iskayrayanchu. w15 15/11 1:5, 6

Jehová Diosninchej runasman munakuyninta mana rikuchinmanchu karqa chayqa, imaynachus kausay kananpi tʼukuriy. Runasqa Kuraj Supaypa atiyninpi purajmanta kamachinakullankumanpuni karqa (2 Cor. 4:3, 4; 1 Juan 5:19; Apo. 12:9, 12). Chaytaj noqanchejpaj may llakiy kanman karqa. Satanasqa Jehová Diospa contranpi oqharikushaspa, Jehovalla kamachej kasqanta iskaychacherqa. Chantapis Satanasqa pay aswan sumaj kamachej kasqanta nerqa (Gén. 3:1-5). Jehová Diostaj may yachayniyoj Dios kasqanrayku, Satanaspa nisqan cheqachus manachus kasqanta rikuchinanpaj uj tiempo pasananta saqerqa. Chaywanpis Satanaspa kamachiynin, runaspa kamachiyninku ima mana allinchu kasqanta sutʼita rikunchej. w15 15/11 3:3, 4

Llampʼu sonqo kasunchej chayqa, Jesuspa yuyaychasqanta kasukusunchej. Payqa uj orqo patapi yachachishaspa nerqa: “Uyarerqankichej nisqa kasqanta: Runa masiykita munakunki, enemigosniykitataj chejninki, nispa. Noqatajrí niykichej: Enemigosniykichejta munakuychej, chejnispa qankunata qhatiykachajkunapajtaj Diosmanta mañapuychej. Ajinamanta, janaj pachapi kashaj Tataykichejpa wawasnin kankichej. Payqa sajra runaspaj, kʼacha runaspajpis intinta llojsichimun. Kikillantataj parachimun tukuypaj, allin runaspaj, sajra runaspaj ima”, nispa (Mat. 5:43-45). Noqanchejqa Diospa kamachisnin kasqanchejrayku enemigosninchejta munakunanchej tiyan, paykuna chejnikuwajtinchejpis. Jehová Diosta, runa masinchejta ima munakusqanchejta tukuy tiempopi rikuchinanchej tiyan. Runas noqanchejman churanakojtinkupis, willayninchejta mana uyarejtinkupis llakiypi rikukojtinku paykunata yanapananchej tiyan. w15 15/11 4:17, 19, 20

Diospa kamachisnenqa parlayninkuwan Jehovata jatunchanku, wajkunamanpis Diosmanta yachachinku. Kay qhepa wataspitaj chayta ruwanankupaj Bibliata waj parlaykunaman tijrachinku. Bibliaqa ashkha qalluspi tiyan, chaywanpis wakin Bibliasqa sumaj tijrachisqa kanku, wakin Bibliastaj mana allin tijrachisqachu kanku. Traducción del Nuevo Mundo nisqa Bibliata Ruwaj Comisionpi llankʼaj hermanosqa, Bibliata cheqanta tijrachinankupaj kinsa imasta juntʼanankuta nerqanku. Chay nisqankuman jinataj 130 kuraj parlaykunamanña tijrachikun. Ñaupaj kaj, Diospa sutin jatunchasqa kananpaj, ñaupa qhelqasqaspi jina Diospa sutin ashkha kutista rikhurinanpaj churaykapunanku karqa (Mat. 6:9). Iskay kaj, atikusqanman jina sapa palabrata tijrachinanku karqa. Mana atikojtintaj imatachus niyta munasqanta tijrachinanku karqa. Kinsa kaj, leeyta, entiendeyta atinapaj jina palabrasta churananku karqa (Neh. 8:8). w15 15/12 2:1, 2

Cornetata mana sutʼita waqachejtinkoqa, israelita soldados mana sutʼita yachankumanchu karqa imatachus ruwanankuta. Parlasqanchejwanpis ajinallataj kanman. Bibliaqa wajkuna entiendenawanchejpaj jina parlananchejta nin. Mana sutʼita parlajtinchejqa runasqa mana entiendewasunchu (1 Cor. 14:9). Entiendenawanchejpaj jina parlaspapis mana wajkunata phiñachinapaj jina parlanachu, manaqa jatunpaj qhawana. Jesusqa sutʼita entiendenapaj jinapuni parlaj. Imaynatachus umallirichiyninpi parlasqanta qhawarina, chaytaj Mateo 5, 6, 7 capitulospi kashan. Jesusqa runas entiendenankupaj jina parlaj, nitaj runaspa sonqonkuta nanachinanpaj jinachu. Astawanpis uyarejkunaj sonqonkuman chayananpaj jina sutʼita entiendeyta atinankupaj jina parlarqa. Sutʼincharinapaj, chay umallirichiyninpi yachachisqasninman imatachus mikhunankumanta mana llakikunankuta yachacherqa. Nisqanta mana qonqanankupajtaj, imaynatachus pʼisqetusman Jehová mikhuchisqanpi tʼukurinankuta nerqa. Chantá tapurerqa: “Manachu qankunaqa aswan munasqa kankichej pʼisqosmanta nisqaqa?”, nispa (Mat. 6:26). Ajinamanta sumajta kallpacharqa, sumajtataj yachacherqa. w15 15/12 3:13, 14

¿Imaynatá “hermanos jina tukuy sonqo” munanakunchej? Imaynatachus familiawan, sumaj amigosninchejwan munanakunchej ajinata (Juan 11:36). Noqanchejqa mana hermanos kayku nillanchejchu, manaqa cheqamantapuni hermanos kanchej (Mat. 23:8). Pablo nerqa: “Hermanos jina tukuy sonqo munanakuychej, ujkuna ujkunata aswan allimpaj qhawaspa [chayri jatunpaj qhawaspa ñaupajpi kaychej]”, nispa (Rom. 12:10). Kaytaj rikuchiwanchej hermanospura mayta munanakunanchej kasqanta. Kay jina munakoyqa Diospa yuyaychaykunasninman jina kashan, chaytaj Diospa llajtanta yanapan uj familia jina kanankupaj, ujchasqa kanankupaj ima. Cheqa cristianospajqa, Jehovata tukuy yupaychajkuna hermanosninku kanku, ima suyumanta kajtinkupis (Rom. 10:12). Imaraykuchus Jehová Diosninchej purajmanta munanakunanchejta yachachiwanchej (1 Tes. 4:9). w16.01 1:5, 6

Jesusta munakusqanchejqa sonqo kʼajaywan willamunapaj, yachachimunapaj ima yanapawanchej (Mat. 28:19, 20; Luc. 4:43). Jesuspa Wañuyninta Yuyarinapaj tiempopi precursores auxiliares jina llankʼayta atisunman 30 chayri 50 horasta ruwaspa. ¿Chayta ruwanaykipaj tiempochakuwajchu? Uj viudo hermano 84 watasniyoj, machitu kasqanrayku, onqosqa kasqanrayku ima, precursor auxiliar jina llankʼayta mana atinanta yuyarqa. Chaywanpis chay lugarmanta precursores autonkupi pusasqankurayku, willananpajpis uj lugarta ajllapusqankurayku ima, chay hermanoqa 30 horasta ruwayta atillarqa. ¿Mayqen hermanollatapis chayri hermanallatapis marzo chayri abril killapi precursor auxiliar kananpaj yanapayta atiwajchu? Mana tukuychu precursores auxiliares kayta atinchej. Jinapis Jehovamanta astawan willamunapaj tiempochakusunman, kallpachakusunman ima. w16.01 2:7, 11

Kay Jallpʼallapiraj kaj ajllasqa cristianospa sutisninkuta mana yachayta atispapis, ¿imaynatataj “qankunawan riyta munayku” nisunman? Bibliaqa ‘chunka runas uj judío runaj pʼachanmanta japʼiykukunankuta’ nerqa, chantataj “qankunawan riyta munayku, imaraykuchus uyariyku qankunawan Dios kasqanta” nispa ninankuta. Chay versículo uj judío runallamanta parlajtinpis, “qankunawan” nispaqa ashkha runasmanta parlashan. Chayrayku nisunman judío runaqa tukuy ajllasqa cristianoswan ninakusqanta. Waj ovejasmanta kajkunataj chayta sumajta yachanku. Chayrayku ajllasqa cristianoswan khuska Jehová Diosta yupaychashanku. Paykunaqa mana ajllasqa cristianospa sutisninkuta yachayta necesitankuchu sapa ujpa qhepanta rinankupaj. Imaraykuchus Bibliaqa Jesuspa qhepallanta rinanchejta kamachiwanchej (Mat. 23:10). w16.01 4:4

Tukuy runas nacekusqanchejmantapacha, wañupunanchejkama wajkuna munakunawanchejta necesitanchej. Chayrayku warminchej chayri qosanchej, familiaresninchej, amigosninchej ima munakunawanchejta necesitanchej. Chaywanpis Jehová Diosninchej munakunawanchejta astawanraj necesitanchej. Ashkha runas yuyanku Jehová Diosman qayllaykuyta amigosnin kayta mana atisqanchejta tukuy atiyniyoj kasqanrayku. Chaywanpis noqanchejqa Jehovawan sumaj amigos kayta atisqanchejta yachanchej. Imaraykuchus Bibliaqa ashkha runas Diospa amigosnin kasqankumanta parlan. Paykunamantataj mayta yachakusunman. Imaraykuchus Jehovawan amigos kayqa, mana ni imawan kikinchakunchu. Abrahampa kausayninmanta mayta yachakusunman (Sant. 2:23). Payqa Jehovapi creesqanrayku paypa amigon karqa. Chayrayku Bibliaqa Abraham “tukuy creejkunaj tatanku” kasqanta nin (Rom. 4:11). w16.02 1:1, 2

Ajazqa Judamanta tukuynin reyesmanta manchay sajra karqa, Ezequiastajrí tukuynin reyesmanta manchay kʼacha karqa (2 Rey. 18:6). Ezequiasqa tatanpa sajra ruwasqasninta chinkacherqa. Diospa templonta llimphucharqa, chantá Diosmanta mañakorqa israelitaspa juchasninta perdonananta, llulla diosesninkutapis chinkacherqa (2 Cró. 29:1-11, 18-24; 31:1). Asiria suyumanta rey Senaquerib Jerusalenman maqanakoj rinanta nejtintaj, Ezequiasqa sinchʼi creeyniyoj kasqanta, mana manchachikoj runa kasqanta ima rikucherqa. Llajtamanta runastapis Jehová salvananpi atienekunankupaj yanaparqa (2 Cró. 32:7, 8). Uj kutitaj runaykachasqanmanta Jehová kʼamejtin llampʼu sonqowan japʼikorqa (2 Cró. 32:24-26). Rikunchej jina tatan jina sajra imasta ruwananmantaqa, Jehová Dioswan amigos kayta ajllarqa. Cheqamantapuni pay jina ruwanapaj mayta kallpachakusunman. w16.02 2:11

Kʼacha kayqa, Jehovaman, wajkunaman ima cheqa sonqo kanapaj yanapawanchej. Uj hermano jatun juchapi urmasqanta yachaspa, ¿imatá ruwasun? Ichapis chay hermanoman cheqa sonqo kayta munanchej, astawanraj chay hermano familiarninchej chayri amigonchej kajtin. Chaywanpis yachanchej Jehová Diosman cheqa sonqo kananchej may sumaj kasqanta. Chayrayku chay kutispi Jehovata kasukuna, chay hermanowanpis kʼacha kana. Ancianospa yanapayninta maskʼananta nina, chayta mana ruwajtintaj noqanchej ancianoswan parlarina. Ajinata ruwaspaqa Jehovaman cheqa sonqollapuni kasunchej, chay hermanomanpis munakuyninchejta rikuchisunchej. Ancianosqa Jehovawan allinpi kanallanpajpuni pacienciawan, munakuywan yanapanqanku (Lev. 5:1). w16.02 4:14

Cheqan kajman jina kausasqaykita rikuchinki, tantakuykunaman, willayman ima rispa, Diosmanta mañakuspa, Bibliata estudiaspa ima. Kausayninchejta Diosman qospaqa chaykunata ruwaspa kusisqa kanchej, nitaj tanqasqa jinallachu ruwanchej. Rey David jinataj ninchej, pay nerqa: “Diosníy, tukuy sonqo munayniykita ruwayta munani. Yachachiwasqasniykita sonqoypi waqaychani”, nispa (Sal. 40:8). Yuyarikuytaj Jehovaman ruwasqasninchejmanta sapa uj cuentata qona kasqanta. Chantapis Jehovawan masichakunaykeqa qanmanta kashan, manataj tatasniykej chayri wajkunaj ruwasqankumantachu. Juchamanta tʼaqakunki, cheqan kajman jinataj kausakunki chayqa, cheqa kajta tarisqaykita, Diospa kamachiykunasninta jatunpaj qhawasqaykita ima rikuchinki. Ajinamantataj bautizakunaykipaj wakichisqa kasqaykita rikuchinki. w16.03 2:10, 12, 15

Moisesman qosqa Leyqa israelitasta khuchichakuy juchamanta, muyuyninkupi kaj llulla religionesmanta ima jarkʼarqa. Israelitasqa Jehová paykunata bendecinanta munaspaqa, kamachiykunasninta kasukunanku karqa. Mana kasukojtinkutaj ñakʼarej kanku (Deu. 28:1, 2, 15). Israelitasqa mosoj kamachiykunata necesitallarqankutaj waj imasrayku. Sutʼincharinapaj, Diospa munaynin juntʼakunanpaj Mesías chayri Cristo kay Jallpʼaman jamunan karqa, Moisespa Leynintaj israelitasta yanaparqa Mesías chayamojtin wakichisqa kanankupaj. Chay Leyqa israelitasta reparacherqa pantaj runas kasqankuta. Chantapis reparachillarqataj juchasninku wiñaypaj pampachasqa kananpajqa, uj juntʼa runa paykunarayku wañunanta necesitasqankuta (Gál. 3:19; Heb. 10:1-10). Chantapis chay Leyqa Mesiaspa familianta jarkʼarqa. Mesías chayamojtinñataj Leyqa israelitasta yanaparqa pichus Mesías kasqanta yachanankupaj. Chayrayku Bibliaqa chay Ley uj tiempota ‘uywaqe’ jina kasqanta nin, mayqenchus Cristoman pusarqa. w16.03 4:6, 7