Abril

Supayqa uj tiempopi Jehová Dioswan allinpi karqa. Chaywanpis uj pʼunchay runaswan yupaychachikuyta munarqa. Chay munayninta wiñachisqanraykutaj juchallikorqa (Sant. 1:14, 15). Mana yachanchejchu niraj Jehovaj contranpi oqharikushaspa imachus chay ángel sutikusqanta, kunanqa Satanás sutiwan rejsinchej. Nitaj ‘jaykʼajpis cheqa kajpi sayarqachu’, Jehovaj contranpitaj oqharikorqa, “llullakuypa tatan[mantaj]” tukorqa (Juan 8:44). Satanasqa churanakuyta qallarisqanmantapacha, Jehovaj enemigonman tukorqa, jinallataj runaspa enemigonmanpis. Imatachus Biblia paymanta niwasqanchejrayku, imayna sajrachus kasqanta yachanchej. Satanás suteqa “churanakoj” niyta munan, chaytaj rikuchin Diospa kamachiyninta qhesachasqanta, tukuy atiyninwantaj churanakusqanta. Payqa mana munanchu Jehová kamachinanta. w15 15/5 1:1, 2

Bibliata ukhunchaspaqa Jehovata sumajta servinapaj imastachus ruwananchej kasqanta allinta yachakunchej. Chantapis yachakullanchejtaj ima kʼacha kaykunasniyojchus Jehová kasqanta, imastachus munakuyninrayku ruwasqanta ima. Kayta yachakuspataj astawan Diosninchejta munakunchej. Diosninchejpis astawan munakuwanchej. Ajinamantataj Payman astawan qayllaykusun. Diosman qayllaykuyta munanchej chayqa, Bibliata tukuy sonqo ukhunchananchej tiyan. Jesús nerqa: “Kaymin chay wiñay kawsayqa: Qan kʼata cheqa Diosta rejsisunanku, kachamusqayki Jesucristotapis”, nispa (Juan 17:3). Noqanchejqa Bibliata leespa ashkha mosoj sumaj imasta yachakuyta atisunman. Chaywanpis Bibliataqa ukhunchananchej tiyan, Jehová Diosta astawan rejsiyta munaspa (Éxo. 33:13; Sal. 25:4). Jehová Diosta uj sumaj amigonchejta jina qhawasunchej chayqa, mana llakikusunchu imaraykuchus imatapis ruwasqanta Biblia mana sutʼinchasqanmanta. w15 15/4 3:6-8

Tukuy laya suyusmanta ashkha ancianosta wajkunata wakichisqankupi may allin rerqa. Kunallanraj chay ancianosmanta wakinta tapurerqanku imaynatachus wajkunata wakichisqankuta. Tʼukunapaj jinataj mana uj suyullamantachu kajtinkupis, tukuyninku kikillanta yuyaycharqanku. Kaytaj sutʼita rikuchin Bibliaj yuyaychaykunasnin may sumaj kasqanta, Jallpʼantinmanta tukuy congregacionespi kaj hermanosta wakichinapaj. Uj ancianoqa pi hermanotachus wakichenqa chay hermanoj sonqontaraj wakichinan tiyan. ¿Imaraykutaj? Sutʼincharinapaj, uj chajra runa mujuta tarpuyta munan chayqa, ñaupajta jallpʼataraj sumajta wakichinan tiyan. Imajtinchus ajinallamanta imatachus tarpusqan sumajta poqonqa. Ajinallatataj uj anciano uj hermanota wakichiyta munan chayqa, chay hermanoj sonqontaraj wakichinan tiyan. ¿Imaraykú chayta ruwanan tiyan? Imaraykuchus ajinallamanta chay hermano yachakunanpaj wakichisqa kanqa. ¿Imaynatataj chay hermanoj sonqonta wakichinman? Chayta ruwananpajqa, profeta Samuelmanta yachakunman, pichus Saulta wakicherqa Israel llajtata ñaupajman apananpaj (1 Sam. 9:15-27; 10:1). w15 15/4 1:11, 12

Kay pachapeqa tukuy ima tiyan, chaywanpis mana tukuy imapunichu allin imas kanku. Satanastaj chaykunata apaykachan, munayninchejwan atipachikuspa Jehová Diosta mana kasukunanchejpaj. Satanasqa kay pachaj imasninta munakunanchejpaj, Jehovata mana tukuy sonqochu sirvinanchejpaj ima tanqawasunman (1 Juan 2:15, 16). Ñaupa tiempomanta wakin cristianospis kay pachaj imasninta astawan munakorqanku. Sutʼincharinapaj, Pabloqa uj cristianomanta nerqa: “Demasqa saqerpariwaspa [...] ripun, kay pachaj imasninta munakusqanrayku”, nispa (2 Tim. 4:10). ¿Imatataj Demas munakorqa? Bibliaqa mana chayta ninchu. Ichapis payqa qolqeta munakorqa, astawan Diosta sirvinanmanta nisqaqa. Chayraykutaj Jehovata yupaychaypi sumaj imasta niña ruwayta aterqachu. ¿Chay ruwasqan allinchu karqa? Mana. Imaraykuchus payqa Pabloj yanapajnin jina llankʼayta atillanmanpuni karqa. Nitaj kay pachamanta imapis, Jehovaj qosqan ruwaywan kikinchakorqachu (Pro. 10:22). w15 15/5 2:10, 11

Jesusqa kay Jallpʼapi kashaspa, runas llakiypi kashaspa imaynachus kashasqankuta entiendej, ajina llakiypi mana rikukuspapis. Sutʼincharinapaj, yacharqa religionta kamachejkuna runasta ñakʼarichisqankuta, runasman llullakusqankuta, yuyayninkuman jinalla kamachiykunata churasqankuta ima. Chayraykutaj runasqa paykunata manchachikoj kanku (Mat. 23:4; Mar. 7:1-5; Juan 7:13). Jesustajrí mana paykunata manchachikojchu, nitaj llulla yachachiyninkutapis creejchu. Chaywanpis imaynachus runas kashasqankuta entienderqa, chayraykutaj mayta llakikorqa. Nerqataj mana michejniyoj ovejas jina kasqankuta (Mat. 9:36). Jesusqa, Tatanmanta yachakusqanrayku runasman munakuyta, khuyakuyta ima rikucherqa. Paykunata ñakʼarejta rikuspataj yanaparqa. Chaytataj Tatanmanta yachakorqa. Uj kuti pay, yachachisqasnin ima, may karuta rerqanku runasman willaj. Saykʼusqas kashasqankuraykutaj, samarikunankupaj uj lugarta maskʼarqanku. Jesustajrí rikorqa ashkha runas paymanta yachakuyta munaspa qhepanta risqankuta. Chayraykutaj saykʼusqaña kaspapis chay runas yanapata necesitasqankuta rikuspa, “paykunaman tukuy imata yachachiyta qallarerqa” (Mar. 6:30, 31, 34). w15 15/5 4:3, 4

Jehová Diosqa jatun yachayninta kʼata Churin Jesusta ruwaspa rikucherqa. Tukuy imata ruwashajtintaj, Jesusqa yanapaj maestro jina kasharqa. Chayrayku cheqamantapuni nisunman Jehová “cielota” ruwashajtin, “jallpʼaj cimientosninta” churashajtin ima Jesús kusikusqanta. Chaywanpis Jesús astawan kusikorqa runasta Jehová ruwasqanmanta (Pro. 8:22-31). Arí, Jesusqa runasta qallariymantapacha munakorqa. ¿Imaynatataj Jesús rikucherqa Diosta, runasta ima munakusqanta? Wañuymanta, juchamanta ima kacharichinawanchejpaj, kausayninta noqanchejrayku qonanpaj kay Jallpʼaman jamuspa (Mat. 20:28; Fili. 2:5-8). Payqa maytapuni munakuwanchej. w15 15/6 2:1, 2

Imatachus Jehová qanrayku ruwasqanmanta agradecesqa kashanki chayqa, Jehovaman kausayniykita qoy, bautizakuy ima. Yachanki jina Jehovaman kausayniykita qospaqa, munaynintapuni wiñaypaj ruwanaykita nishanki. Jinapis Jehovaman chayta niyta mana manchachikunaykichu tiyan. Imaraykuchus Jehovaqa allinniykitapuni munan, payta kasukojkunatataj bendecinanta nin (Heb. 11:6). Jehovaman kausayniykita qojtiyki, bautizakojtiyki ima, kausayniykeqa aswan sumaj kanqa. Rikunchej jina Jehovaqa allinniykitapuni munan. Satanastajrí mana, imaraykuchus payqa munaynillanta maskʼan. Satanaspa munayninta ruwanki chayqa, mana ima allin kajtapis qosonqachu. w16.03 2:16, 18, 19

Jehovaj sumaj amigosnin kayta munanchej chayqa, pay mañakuyninchejta uyariwasqanchejmanta mana iskayrayanachu tiyan. Jesuspi tʼukurina. Payqa niraj kay Jallpʼaman jamushaspa imaynatachus Jehová kamachisninpa mañakuyninkuta uyarisqanta rikorqa. Jallpʼaman jamuspañataj, mañakuyninpi imatachus yuyasqanta, imaynachus kashasqanta ima Jehovaman willarqa. Uj kutipi “sutʼiyanankama mañakorqa” (Luc. 6:12; 22:40-46). ¿Ajinata mañakunmanchu karqa Dios mana uyarisqanta yachaspa? Chantapis Jesusqa yachachisqasninman imaynatachus Jehovamanta mañakunankuta yachacherqa. ¿Yachachinmanchu karqa Dios mañakuykunata mana uyarisqanta yachaspa? Jesusqa sutʼita yacharqa Jehová mañakuykunata uyarisqantapuni. Noqanchejpis Jehová mañakuykunasninchejta uyarisqanpi atienekuyta atisunman (Sal. 65:2). w15 15/4 3:11, 13

Tatas, llampʼu sonqowan Diosmanta mañakusqaykichejta wawasniykichej uyarispaqa, paykunapis Jehovaj yanapayninta maskʼanqanku. Brasilmanta Ana sutiyoj hermana nin: “Tatasniy chʼampaykunapi rikukuspa, abuelosniy onqoykojtinku ima, chay llakiyta atipanankupaj Jehovamanta kallpata mañakoj kanku, jinallataj imata ajllanankupajpis yachayta mañakoj kanku. Sinchʼi llakiykunapi rikukuspapis Jehovaman llakiyninkuta saqej kanku. Ajinata ruwasqankutaj Jehovapi atienekunaypaj yanapawarqa”, nispa. Diosmanta mañakushaspaqa ama wawasnillaykichejpaj mañakuychejchu, manaqa qankunapajpis mañakullaychejtaj. Ichapis vecinoykiman Diosmanta willanaykipaj, jatun tantakuypaj patronniykimanta permisota mañakunaykipaj Jehovamanta kallpata mañakuwaj. Wawasniykichej llampʼu sonqo kasqaykichejta, Jehovapi atienekusqaykichejta ima rikuspaqa, kikillantataj ruwanqanku. w15 15/11 1:7, 8

Diosta mayta munakunaykipajqa, Wawanta salvanawanchejpaj qosqanpi tʼukurinayki tiyan (2 Cor. 5:14, 15; 1 Juan 4:9, 19). Jehová Wawanta noqanchejrayku qosqanpi tʼukurinaykipaj tiempochakunki chayqa, Jehovaman chayta ruwasqanmanta mayta agradecekunki. Tʼukuriy pillapis yakuman chinkaykushajtiyki salvasusqanpi. ¿Imatá ruwawaj? ¿Salvasoj runata mana agradecekuspachu wasiykiman pʼachaykita cambiakoj ripuwaj? Mana, ¿icharí? Astawanpis chay runaman maytachá agradecekuwaj. Ajinallatataj noqanchejpis Jehovaman, Jesusman ima mayta agradecekunanchej tiyan. Paykuna mayta munakuwasqanchejrayku, kay Jallpʼa uj paraisoman tukojtin wiñaypaj kausakuyta atisunchej. w16.03 2:16, 17

Jehovaqa yacharqa Jesús Jallpʼaman jamuspa payman cheqa sonqo kananta, imaraykuchus may chhika unayta janaj pachapi kashaspa payman cheqa sonqo karqa. Jesustaj Jallpʼapi kashaspa, Jehovalla kamachiyta atiwasqanchejta sonqo kʼajaywan rikucherqa, ñakʼarispapis wañupunankama cheqa sonqollapuni karqa. ¿Imaynatá Jesuspa wañuynin yanapawanchej? Paraisopi wiñaypaj kausakunanchejpaj yanapawanchej. Apóstol Juan nillarqataj: “Kay jinamanta Diosqa munakuyninta rikuchiwarqanchej: Payqa uj kʼata Churinta kay pachaman kachamorqa, paynejta kawsayniyoj kananchejpaj. Chay munakoyqa kay jinapi rikukun: Mana noqanchej Diosta munakusqanchejpichu, manachayqa Dios munakuwasqanchejpi, Churinta kachamusqampitaj juchasninchejmanta Diospa phiñakuyninta wañuyninwan thasnunampaj”, nispa (1 Juan 4:9, 10). w15 15/11 3:13, 14

Tukuypis Adanmanta juchata, wañuytawan herenciata jina japʼinchej. Chayrayku ni pi nisunmanchu wañuymanta, juchamantawan kacharichisqa kayta mana necesitasqanchejta. Diospa aswan cheqa sonqo kamachinpis juchamanta, wañuymanta kacharichisqa kayta necesitan. Chayrayku kacharichiwasqanchejmanta Jehovaman manu kanchej. Jehovaj khuyakuynin, munakuynin ima, ¿imata ruwanapajtaj tanqanawanchej tiyan? Pi hermanollawanpis phiñasqallapuni kashanchej chayqa, Jehová jina ruwanapaj kallpachakuna, payqa perdonanawanchejpaj “wakichisqa” kashan (Neh. 9:17; Sal. 86:5). Jehová noqanchejrayku imatachus ruwasqanta jatunpaj qhawaspaqa, wajkunata tukuy sonqo perdonasun. Jehová perdonanawanchejta, munakunawanchejta munanchej chayqa, noqanchejpis hermanosninchejwan kikilllantataj ruwana tiyan (Mat. 6:14, 15). Wajkunata perdonajtinchejpis, imatachus contranchejpi ruwasqankuta mana allinchayta atisunchu. Chaywanpis perdonayqa kusisqa kausakunapaj yanapawasun. w16.01 2:5, 15-17

Jesusqa chayta Pedroman, waj yachachisqasninman iman nerqa. Ajinamanta paykuna imachus qhepaman kananta yuyayninkupi rikunankupaj. Paykunaqa cielomanta Jesuswan khuska kamachimunankupi, runasta juntʼa runas kanankupaj yanapanankupi ima yuyarqanku. Diospa nisqasnin juntʼakunanpi tʼukureyqa, kamachisninta creeyninkuta sinchʼiyachinankupaj yanaparqa. Sutʼincharinapaj, Abelqa Jehová aswan qhepaman imatachus ruwananta nisqanpi yuyarqa. Chaypi creesqanrayku Jehová paywan may kusisqa kasharqa. Abrahamtaj, warmej mirayninmanta imastachus Jehová nisqan maykʼajchus juntʼakunanpi yuyarqa (Gén. 3:15). Ajinata yuyasqanraykutaj, chʼampaykunapi rikukuspapis Jehovata kasukorqa. Moisespis Jehová imatachus qonanta nisqanpi yuyarqa, chaytaj yanaparqa Jehovata munakunanpaj, cheqa sonqo kananpaj ima (Heb. 11:26). Imatachus Jehová qonawanchejta nisqanta juntʼananpi yuyaspaqa, payta astawan munakusunchej, astawantaj paypi creesunchej. w15 15/5 3:17, 18

Diosta yupaychaypi wiñay tukusqa cristianos kayta munanchej chayqa, Jesús jina ruwananchej tiyan, Bibliaj yachachiynintapis entiendenanchej tiyan. Chaypajtaj Bibliaj ukhu yachachiyninta sumajta ukhunchananchej tiyan, imaraykuchus “khamuna mikh[oyqa] wiñay tukusqa runaspajña” (Heb. 5:14). Chantapis wiñay tukusqa cristianosqa, “Diospa Churinta allinta” rejsiyta munanchej (Efe. 4:13). Chayrayku kaykunata tapurikuna: “¿Sapa pʼunchaychu Bibliata leeni? ¿Sapallaypi Bibliata ukhunchanichu? ¿Sapa semanachu familiapi Diosta yupaychanapaj tantakuyta ruwani?”, nispa. Bibliata ukhunchaspaqa, imatachus Jehová yuyasqanta, sajra imasta rikuspa imaynachus sientekusqanta ima yachakusunchej. Chaytaj ima ruwaytapis allinta ajllanapaj yanapawasunchej. Chantapis Diosman astawan qayllaykuchiwasunchej. w15 15/9 1:5, 9, 10

Jesusqa yachan imayna ruwasqachus Jallpʼa kasqanta. Yachallantaj imaynatachus sinchʼi wayrata, phiñarikoj qochatapis thañichiyta. Jesusqa kay Jallpʼapi kashaspa, Diospa atiyninwan manchay sinchʼi wayrata sayachiyta atisqanta rikucherqa. Yaku qhollchoqeyaspa boteta mayta wajtaykachashasqanpi, yaku boteman juntʼaykushasqanpi ima tʼukuriy. Sinchʼi wayraqa manchaytapuni sonarisharqa, botetapis kayman jaqayman apaykachasharqa. Jinapis Jesusqa may saykʼusqa kasqanrayku puñusharqa. Yachachisqasnintaj may mancharisqas kashasqankurayku, Jesusta rijchʼarichispa nerqanku: “Señor, salvawayku, chinkaykushanchejña”, nispa (Mat. 8:25). Jesustaj jatarimuytawan, ‘wayrata kʼamerqa, qochatapis chʼin kay’ nispa nerqa (Mar. 4:39). Wayrataj thañerqa, may chʼintaj karqa. Sutʼita rikunchej, Jesús sinchʼi wayrata sayachiyta atisqanta. w15 15/6 1:12-14

Jesusqa Diosmanta mañakunata yachachiytawan, yachachillarqataj imastachus necesitasqanchejmanta mana anchata llakikunata. Sutʼincharqataj campo tʼikasta Dios kʼachituta pʼachallichisqanta. Chantá tapurerqa: “Pisi creeyniyoj runas. Manachu qankunapajqa aswan sumajtaraj ruwanqa?”, nispa. Chantapis pay nillarqataj: “Ama phutikuychejchu ari, qʼaya pʼunchaymanta”, nispa (Mat. 6:30-34). Chay nisqanmanta kapuwasqallanchejwan kusisqas kausakunata yachakunchej. Sutʼincharinapaj, Diosmanta mañakusunman maypichus tiyakunata, mikhunapaj uj llankʼayta, onqosqa kashaspa imaynatachus jampichikuyta sumajta ajllanapaj yanapanawanchejta ima. Chaykunata mañakuspapis, ¿imastawanraj Diosmanta astawan mañakusunman? Diosmanta mañakunallanchejpuni tiyan, cheqa yachachiyta mikhunata jina maychus tiemponpi qonawanchejpaj. ¿Imaraykú ajinata mañakunchej? Jesús nerqa: “Mana tʼantallawanchu runaqa kawsanqa; astawanqa, Diospa siminmanta tukuy llojsimoj palabraswan kawsanqa”, nispa (Mat. 4:4). w15 15/6 5:4, 7, 8

Juchaman tanqasqa kashaspaqa, mana urmanapaj yanapanawanchejta Diosmanta mañakullasunmantaj. Ichapis manaraj Jehovaj testigon kashaspa, sajra imasta ruway gustawaj kanchej. Wakin kutistaj ichapis chaykuna watejmanta yuyayninchejman jamunman. Chaywanpis Jehová yanapawasunman chay sajra imasta mana ruwanapaj. Rey Davidpis uj casarasqa warmiwan khuchichakorqa. Chay ruwasqanmanta pesachikuspataj, Diosmanta yanapata mañakorqa, pay nerqa: “Diosníy, llimphu sonqota qoway. Ukhuypi mosoj cheqan espirituta churay”, nispa (Sal. 51:10, 12, 13). Chayrayku sajra yuyaykunata mana atipayta atishankichu chayqa, Jehovamanta yanapata mañakuy. Imaraykuchus Pay yanapasonqa tukuy sonqo kasukuyta munanaykipaj, sajra yuyayniykita atipanaykipaj, sajra imasta mana ruwanaykipaj ima (Sal. 119:133). w15 15/6 3:5, 6

Ñaupaj wataspeqa sapa congregacionpi uj ancianolla congregacionta ñaupajman apaj, sapa sucursalpitaj uj hermanolla kamachej, Jehovaj testigosninpa centralninkupipis uj hermanolla kamachej. Chay hermanosta waj hermanos yanapajtinkupis, congregacionpi uj ancianolla, sucursalpitaj uj hermanolla, Jehovaj testigosninpa centralninkupipis uj hermanolla ima ruwaytapis ajllaj. Chaywanpis 1970 watamanta qhepaman, waj jinamanta ruwakorqa. Sapa congregacionpi uj qotu ancianos imatapis ajllananku karqa, jinallataj sucursalpipis. Jehovaj testigosninpa centralninkupipis uj qotu ajllasqa ancianos kamachinanku karqa, chay qotu ajllasqa ancianostataj Diospa Llajtanta Kamachejkuna sutiwan rejsinchej. Diospa llajtanpi ashkha imas waj jinasmanta ruwakusqanqa, Bibliaj nisqanman jina ruwakun. Uj hermanolla ima ruwaytapis ajllananmantaqa, Diospa llajtan ñaupajman rinanpaj tukuy ancianos yanapanku. Chay ancianostaqa Jehová congregacionesman churan (Efe. 4:8). w15 15/7 1:14, 15

Noqanchejqa mana runasta tʼaqanachej chʼajwaspi satʼikunchejchu. Imaraykuchus Jehovata munakunchej, payman cheqa sonqo kanchej, payta kasukunchej (1 Juan 5:3). Maypi tiyakuspapis, maymanta kaspapis Jehovaj kamachiykunasninta kasukunchej. Noqanchejpajqa Jehovapi, Reinonpi ima atienekuy aswan sumaj (Mat. 6:33). Chayrayku nisunman ‘mana kay pachamantachu kasqanchejtaʼ (Isa. 2:4; Juan 17:11, 15, 16). Ashkha runasqa wajkunamanta nisqa, suyunku, costumbresninku ima aswan sumaj kasqanta yuyanku. Chay runasmanta ashkhastaj pelota jaytʼaymanta chayri waj jina pujllaymanta equiponku aswan sumaj kasqanta yuyallankutaj. Chaytaj paykunapura atipanakunankupaj, chejninakunankupaj, mana paykuna jina yuyajkunatapis wañuchinankupaj tanqan. Chayrayku uj gobierno mana cheqan kajta ruwajtenqa, ichapis chay gobiernoj contranpi rimayta qallarisunman. w15 15/7 3:1, 2

Jehovaqa may santo, llimphutaj. Munantaj sumaj wakichisqa kananchejta. Chayrayku Tantakuna Wasita llimphuta, sumaj kʼuchunchasqata ima japʼinanchej tiyan (1 Cor. 14:32, 33). Jehová jina santo, llimphu kanapajqa, yuyasqanchej, yupaychasqanchej ima llimphu kanan tiyan. Cuerponchejpis llimphullataj kanan tiyan (Apo. 19:8, MT 1956). Tantakuna Wasita llimphuta japʼisunchej chayqa, runastapis wajyariyta atillasunchej. Paykunataj rikonqanku cheqamantapuni mosoj pachapi kausakuyta munasqanchejta, mayqenchus may llimphu kanqa. Chantapis llimphu Diosta yupaychasqanchejta rikonqanku, pichus Jallpʼata uj kʼachitu paraisoman tukuchenqa (Isa. 6:1-3; Apo. 11:18). Maypi tiyakuspapis, Tantakuna Wasitaqa llimphuta, kʼuchunchasqata ima japʼinanchej tiyan. ¿Imaraykú? Imaraykuchus Diosta chaypi yupaychanchej (Deu. 23:14). w15 15/7 4:13-15

Cristianosqa, 1914 watamantapacha Jesús kamachiyta qallarisqanta entiendeytawan, repararqanku tukukuy pʼunchay ima ratollapis chayamuyta atisqanta. Chayrayku wakichikorqanku. ¿Imaynatá? Runasman astawan willamuspa. Marcos 13 capitulopi Jesusqa kamachispa patronninku suyasqankumanta aswan qhepata chayamunanta nerqa. Paykunaqa wakichisqa kananku karqa patronninku maykʼajchus chayamunanta mana yachaspapis. Tukukuy pʼunchay chayamunanta unaytaña suyajtinchejpis, mana nisunmanchu manaraj chayamunanta chayri ni jaykʼaj chayamunanta. Chayrayku wakichisqallapuni kananchej tiyan. Kunantaj mosoj pachapiña kashasqaykipi tʼukuriy. Qhepa pʼunchaykunapi imachus kananta Jehová nisqan, juntʼakusqanta rikorqanki. Chayraykutaj Jehovapi mana jaykʼaj jina astawan atienekunki, yachankitaj tukuy ima nisqasnin juntʼakunanta (Jos. 23:14). Qanqa Jehovaman may agradecesqa kashanki, maychus tiemponpi Satanaspa sajra pachanta tukuchisqanrayku, kamachisninta wakichisqas, rijchʼarisqas kanankuta kamachisqanrayku ima (Hech. 1:7; 1 Ped. 4:7). w15 15/8 2:10, 11, 14

Kay tiempomanta ashkha runasqa sajra ruwaykunata ruwaspa, khuchichakuspa, layqa ruwaykunata ruwaspa ima kusikunku. Chay imastataj sumaj ruwaykunapis kanman jina Internetpi, telepi, peliculaspi, librospi, revistaspi ima, rikuchinku. Chantapis wakin suyuspi leyesqa manaña ñaupajpi jinachu, imaraykuchus imachus ñaupajpi sajra karqa, chay imasta runas ruwanankuta saqellan. Chaywanpis Jehová Diosqa leyesninta mana tijrachinchu, sajra ruwaykunataqa chejnikullanpuni (Rom. 1:28-32). Ñaupa tiempomanta runaspis sajra ruwaykunata ruwaspa, khuchichakuspa ima kusikoj kanku. Jesuspa yachachisqasnintajrí mana chayta ruwajchu kanku, astawanqa Diospa kamachiykunasninta kasukoj kanku. Chayraykutaj runasqa paykunamanta asikoj kanku, qhatiykachaj ima kanku (1 Ped. 4:4). w15 15/8 4:2, 3

Wiñay tukusqa cristianosqa congregación ujchasqa kananpaj mayta kallpachakunku (Efe. 4:1-6, 15). Tukuypis Diospa llajtan “sumaj ujchasqa” kananpaj yanapakuyta munananchej tiyan. Chaypajtaj llampʼu sonqos kananchej tiyan. Sutʼincharinapaj, ¿imatataj ruwanchej uj hermano pantajtin chayri sonqonchejta nanachinanpaj jina imatapis ruwajtin? ¿Manañachu chay hermanota parlapanchej? Chayrí, ¿chay hermanowan allinyakuytachu maskʼanchej? Wiñay tukusqa cristianos kanchej chayqa, chay chʼampayta allinchanapaj kallpachakusun, nitaj uj jatun chʼampayman tukuchisunchu. Qanrí, ¿munankichu yanapakuyta congregación ujchasqa kananpaj? w15 15/9 1:12, 13

Jesusqa sumajta yacharqa Bibliaqa Diospa yuyaychasqanpuni kasqanta, Bibliapi sumaj yuyaychaykuna kasqanta ima. Jesús jina yuyanapajqa, Bibliata sapa pʼunchay leena, yachakusqanchejpitaj tʼukurina. Ima yachachiykunamantachus iskayrayanchej chaykunatapis sumajta ukhuncharina. Sutʼincharinapaj, qhepa pʼunchaykunapi kausashasqanchejpi creeyninchejta kallpachanapajqa, qhepa pʼunchaykunamanta parlaj profeciasta ukhunchana. Jehová Dios imatachus qhepaman ruwananta nisqanpi creeyninchejta kallpachanapajtaj, ima profeciaschus juntʼakunña chaykunata ukhunchana. Chantapis Bibliaj yuyaychaykunasninpi astawan atienekuyta munanchej chayqa, Bibliaj yuyaychaykunasnin hermanosta kausayninkuta tijrachinankupaj yanapasqanmanta yachaqanasta leena (1 Tes. 2:13). Jesús jina ruwanapajqa, Jehová Dios imatachus ruwananta niwasqanchejpi sumajta tʼukurina (Heb. 12:2). Yuyaytaj qanman nisusqanrayku Jehová nisqanta juntʼananta, manataj tukuy runasman nisqanraykullachu. w15 15/9 3:16, 17

¿Imaynasmantá Diosta munakusqanchejta rikuchisunman? Chaytaqa ruwasunman tantakuykunapi cajitasman qolqeta churaspa, Jallpʼantinpi Reinomanta willakunanpaj, congregacionta yanapanapaj ima. Mana tukuychu tukuy imayoj kajtinchejpis, tukuyninchej imachus kapuwasqanchejmanta qospa Jehovata munakusqanchejta rikuchiyta atisunman (2 Cor. 8:12). Chantapis munakuyninchejta waj jinasmanta rikuchiyta atillasunmantaj. Jesusqa mana anchata phutikunata nerqa imatachus mikhunanchejmanta, imawanchus pʼachallikunanchejmanta ima. Jehovaqa kausayninchejpi Reinonta ñaupajman churajtinchej tukuy chaykunata qonawanchejta nin (Mat. 6:31-33). Jehovata munakusqanchejta rikuchillanchejtaj imatachus qonawanchejta nisqanpi atienekuspa. Imaraykuchus paypi mana atienekuspaqa mana nisunmanchu payta munakusqanchejta (Sal. 143:8). Chayrayku sapa ujninchej kayta tapurikuna: “Imaynatachus tiempoyta, kallpayta ima apaykachasqaywan, ¿Jehovata munakusqayta rikuchinichu? ¿Sapa pʼunchaychu tukuy ima necesitasqayta qonawanpi atienekusqayta rikuchini?”, nispa. w15 15/9 5:7, 8

Manchay ñakʼariy tiempo chayamojtin Jehová salvasunantachus manachus, ¿maykʼajllapis tapurikorqankichu? Salvanawanchejta munanchej chayqa, creeyninchejta sinchʼiyachinapaj mayta kallpachakuna tiyan. Apóstol Pedro nerqa, creesqanchej cheqachus manachus kasqanta qhawarikuna kasqanta (1 Ped. 1:7). Manchay ñakʼariy tiempo qayllitapiña kasqanrayku salvakunapaj jina creeyniyoj kananchej tiyan (Heb. 10:39). Chayrayku creeyninchej astawan sinchʼi kananpaj kallpachakuna tiyan. Ajinamanta Jesús kay sajra pachata chinkachishajtin salvawasun. Jehovamantataj mañakusunman imaynatachus uj runa Jesusmanta mañakorqa ajinata, chay runa nerqa: “Yanapaway ari, astawan creenaypaj”, nispa (Mar. 9:24). Chantá imaynatachus Jesusmanta apostolesnin mañakorqanku ajinata mañakullasunmantaj, paykuna nerqanku: “Astawan creeyta yanapawayku”, nispa (Luc. 17:5). w15 15/10 2:1, 2

Pabloqa “aswan allin” kajta maskʼarqa. Diospa Reinonta ñaupajman churasqanraykutaj, Siriaman, Asia Menorman, Macedoniaman, Judeaman ima viajarqa. Payqa nerqa: “Chayta qonqayman churaspa, atisqayta kallpakuni ñawpajpi kajta taripanaypaj. Ñawpajman rishallanipuni, maymanchus chayana kashan, chayman chayanaykama, tʼinkata japʼinaypaj”, nispa (Fili. 1:10; 3:8, 13, 14). Pabloqa soltero kasqanrayku, “ni imaj jarkʼasqan” Jehovata tukuy sonqo sirviyta aterqa (1 Cor. 7:32-35). Kay tiempopipis wakin hermanosqa, Jehovata astawan sirviyta munasqankurayku soltero kakuyta ajllanku (Mat. 19:11, 12). Imaraykuchus solterosqa casadosmanta nisqa aswan pisi ruwanasniyoj kanku. Solteros chayri casados kaspapis, tukuyninchej ni imaj jarkʼasqan Jehovata tukuy sonqo sirvinapaj kallpachakuna. Sutʼincharinapaj, ichá wakenqa imaschus tiemponchejta qhechuwanchej chayta saqenanchej kanqa Jehovata astawan sirvinapaj. w15 15/10 3:15, 16

Biblia nin, “runaqa kawsayninmanta mana dueñochu kasqanta, nitaj kawsaynimpi imatachus ruwananta niyta atisqanta” ima (Jer. 10:23). Kayqa cheqapuni. Runaj kausaynenqa sutʼita rikuchiwanchej, mana runapura kamachinakunanchejpajchu Jehová ruwawasqanchejta. ¿Imaraykutaj Jehová saqen sajra runas kausanallankutapuni? Paypa kamachiynillan may sumaj kasqanta rikuchinanpaj. Aswan qhepamantaj tukuy sajra runasta chinkachenqa. Chantá pillapis Jehovalla kamachej kasqanta watejmanta iskaychachejtin usqhayllata chay runata chinkarparichenqa. ¿Imaraykú? Imaraykuchus Pay yachan runaj kamachiynin ñakʼariyllata apamusqanta. Chayrayku manaña watejmanta saqenqachu runas kamachinakunankuta. w15 15/11 3:5, 6

Jesusmanqa Diospa Reinonmanta parlariy mayta gustaj. Kay Jallpʼapi kashaspa Diospa Reinonmantapuni astawan parlarej. Willayninpitaj Reinomanta pachaj kutismanta astawan parlarqa. Paypajqa Reinomanta parlay may sumaj karqa (Mat. 12:34). Jesusqa kausarimusqanmanta pisi tiemponman, ashkha runasman rikhurerqa, phishqa pachaj kuraj tantasqa kashajtinku (1 Cor. 15:6). Ichapis chay kutipi Jesusqa “tukuy laya runasta” yachachisqasninman tukuchimunankuta kamacherqa. Chaywanpis Jallpʼantinmanta tukuy runasman willayta mana atikullanmanchu karqa. Jesustaj “kay pacha tukukunankama” willakunan kasqanta nerqa. Kay pʼunchaykunapi sumaj willaykunata willamuspaqa Jesuspa nisqan juntʼakunanpaj yanapakushanchej (Mat. 28:19, 20). Diosninchejqa “tukuy imata” qowanchej runasman willamunapaj. w15 15/11 5:1-3

Diospa sutenqa hebreo parlaypi tawa letraspi rikhurin. Chantá chay suteqa ñaupa hebreo ashkha qhelqasqaspi rikhurin, Wañusqa Qochapi tarikusqan qhelqasqaspi jina. Septuaginta nisqamanta wakin copiaspipis Diospa sutin rikhurillantaj. Chay copiastaj qhelqakuyta qallarerqa Jesús niraj jamushajtin iskay pachaj watas ñaupajta jina, Jesús jamusqanmanta pachaj watasninman jinataj tukukorqa. Ashkha runasqa ñaupa qhelqasqaspi Diospa sutin ashkha kutista rikhurisqanmanta tʼukunku. Diospa sutenqa Bibliapi rikhurinanpuni karqa. Chaywanpis ashkha Bibliaspi Diospa sutin mana rikhurinchu. Kay 1952 watapi American Standard Version nisqa Biblia allinchasqa llojsillarqataj. Kay 1901 watapi American Standard Version nisqa Biblia llojsishajtin Diospa sutenqa rikhurerqa, 1952 watapi allinchakojtintaj chay Bibliapi Diospa sutin manaña rikhurerqachu. ¿Imaraykutaj mana rikhurerqachu? Imaraykuchus chay Bibliata tijrachejkunaqa, Diospa sutinta churay “mana allinchu” kasqanta yuyarqanku. Bibliata inglés parlayman ashkha tijrachej runas, waj parlaykunaman tijrachej runaspis kikillantataj ruwarqanku. w15 15/12 2:3-5