Mayo

Kʼachamanta parlarinapajqa wajkunata, imatachus yuyasqankutapis jatunpaj qhaway yanapawasunchej. Jesusqa chayta ruwaj. Sutʼincharinapaj, payqa ashkha runasta rikorqa uyarinankupaj kallpachakusqankuta, khuyakuywan qhawaspataj chay runasman “tukuy imata yachachiyta qallarerqa” (Mar. 6:34). Enemigosnin maldicejtinkupis, payqa mana maldecillarqatajchu (1 Ped. 2:23). Familiaresninchejta, amigosninchejta ima munakuspapis, ichá paykunata sumajta rejsisqanchejrayku sonqonkuta nanachinapaj jina imatapis parlarparillasunman. Ichapis paykunawan parlashaspaqa imatachus parlashasqanchejta mana qhawarikunanchejchu kasqanta yuyasunman. Chaywanpis Jesús parlasqanpi tʼukurina. Payqa amigosninta jatunpaj qhawaj. Mayqenninkuchus kurajpaj qhawasqa kananmanta siminakushajtinkutaj, munakuywan kʼamerqa. Manaña jinata yuyanankupajtaj uj wawita jina llampʼu sonqo kanankuta yachacherqa (Mar. 9:33-37). Congregacionmanta ancianosqa pi hermanollatapis yuyaychashaspa Jesús jina kʼachamanta yuyaychananku tiyan (Gál. 6:1). w15 15/12 3:15, 16

¿Imaraykú purajmanta munanakunanchej may allin? Hermanosninchejwan purajmanta munanakunanchej tiyan, Jehová kamachiwasqanchejrayku. Jehovata mana munakuyta atisunmanchu, hermanosninchejta mana munakuspaqa (1 Juan 4:7, 20, 21). Chantapis hermanosninchejwan purajmanta munanakunallanchejtaj tiyan, llakiykunapi rikukuspa yanapanakuyta necesitasqanchejrayku. Pablo hebreo cristianosman cartanta qhelqashaspa, yacharqa wakin cristianos wasisninkuta, tukuy imasninkuta saqespa ayqenanku kasqanta. Jesusqa imaynachus chay ñakʼariy pʼunchaykuna kananta nerqaña (Mar. 13:14-18; Luc. 21:21-23). Niraj chay tiempo chayamushajtintaj, cristianosqa astawanraj tukuy sonqo purajmanta munanakunanku karqa (Rom. 12:9). Tumpamantawan manchay ñakʼariy tiempo qallarenqa (Mar. 13:19; Apo. 7:1-3). Chayrayku mana tantakuykunaman rinallanchejchu tiyan. Pabloqa hebreo cristianosta yuyaricherqa ‘purajmanta kallpachanakuspa yanapanakunankuta, munanakuypi kausakunankuta, allin ruwaykunata ruwanankuta ima’ (Heb. 10:24, 25). w16.01 1:6-8

Pentecostés 33 watapi, Jerusalenpi uj wasi alto patapi Jesuspa 120 yachachisqasnin uj sonqolla Diosmanta mañakusharqanku (Hech. 1:13-15). Imaschus chay pʼunchaypi kasqanqa, profeta Joelpa qhelqasqanta juntʼarqa (Joel 2:28-32; Hech. 2:16-21). Pentecostés 33 watapi Jehová, chay cristianosta espíritu santonwan ajllarqa (Hech. 1:8). Chantá paykunaman ashkha runas qayllaykorqanku, chay cristianostaj imatachus rikusqankumanta, uyarisqankumanta ima parlayta qallarerqanku. Apóstol Pedroqa chay runasman imachus kasqanmanta, imaraykuchus chay imas may sumaj kasqanmanta ima sutʼincharqa. Nerqataj: “Diosman kutiriychej sapa ujniykichej; bautizachikuychejtaj Jesuspa sutimpi, juchasniykichej pampachasqas kanampaj. Diostaj Santo Espirituta qhasilla qosonqachej”, nispa. Chay pʼunchayqa 3.000 runas jina bautizakorqanku, paykunamanpis Dios espíritu santonta qorqa (Hech. 2:37, 38, 41). w16.01 3:1-3

Uj ajllasqa cristiano Dioswan mana allinpi kaspa, Señorpa Cenanpi tʼantata mikhuspa, vinotapis ujyaspa, pisipaj chay tantakuyta qhawashasqanta rikuchishanman (Heb. 6:4-6; 10:26-29). Kay yuyaychayqa may sumaj, imaraykuchus uj ajllasqa cristiano Diosman mana cheqa sonqochu kanqa chayqa, ‘patamanta Dios wajyan Cristo Jesuspi chay tʼinkata mana japʼenqachu’ (Fili. 3:13-16). Pablo ajllasqa cristianosman nerqa: “Tukuy sonqo niykichej, wajyasqa karqankichej, imaynachus purina kasqanman jina purinaykichejta”, nispa. ¿Imaynatá kayta ruwananku karqa? Pablo sutʼincharqa: “Llampʼu sonqo kaywan, kʼumuykukuywantaj purajmanta paciencianakuspa, munakuypi kawsakuychej. Kʼuchi kaychej Espiritupi ujlla kasqaykichejta waqaychanaykichejpaj, allin kawsaypi uj sonqolla kaspa”, nispa (Efe. 4:1-3). Jehovaqa espíritu santonwan kamachisninta llampʼu sonqos kanankupaj yanapan, nitaj jatunchakunankupajchu (Col. 3:12). w16.01 4:5, 6

Abrahamta rikushasunmanpis jina tʼukurina. Payqa 125 watasniyoj jinaña kashan, ñakʼaytataj uj orqoman wicharishan. Qhepantataj wawan Isaac llantʼa qʼepirisqa rishan, payqa 25 watasniyojña. Abrahamtaj uj cuchillota, ninata japʼichinanpaj imastawan apashan. Ichapis chay kutipi Abrahamqa mana riyta atishallanchu, Jehová wawanta qʼolachinanta nisqanrayku. Manataj machitu kasqanraykuchu, imaraykuchus payqa kallpayojraj karqa (Gén. 22:1-8). Ichapis chay kutipi Abrahamqa sinchʼi creeyniyoj kasqanta rikuchinan karqa. Chaywanpis Abrahamqa cheqa creeyniyoj karqa, chayrayku imatachus ruwashasqanta yachaspa Jehovata kasukorqa. Chantapis yacharqa Jehová ñakʼarichinanpaj jina ima kamachiytapis mana qonanta. Astawanpis yachallarqataj Jehovata kasukojtin, pay, wawan ima bendecisqa kananta. ¿Imaynatataj chayta yacharqa? Jehovamanta imastachus yachakusqanrayku, kausayninpi yanapasqanrayku ima. w16.02 1:3, 4

Mariaqa Diospa khuyakuyninta tarisqanrayku wijsayoj rikhurerqa, uj qhari wawata nacechikorqa, uywarqataj, chay wawaqa Jehová Diospa wawan karqa. Mariaman uj sumaj ruwayta Jehová Dios qosqanmanta sapa kuti parlarinchej. Chaywanpis, ¿tʼukurerqanchejchu imaschus Mariata llakichinanpi? Sutʼincharinapaj, ángel Gabrielqa nerqa uj qhariwan mana puñuykuspalla uj milagronejta onqoj rikhurinanta. Chaywanpis chay angelqa Mariaj familiaresninman, vecinosninman ima, chayta mana sutʼincharqachu. ¿Imatataj paykuna yuyankuman karqa chayta yachaspa? ¿Imaynatataj Joseman mana wasanchasqanta willanman karqa? Mariaqa Diospa wawanta uywanan karqa. Mana tukuy llakiykunasninmanta yachaspapis, ángel Gabrielwan parlasqanmanta qhepaman imatachus ruwasqallanmanta yachanchej. Chay ruwasqantaj, kay pʼunchaypaj ajllasqa versiculopi tarikun (Luc. 1:26-37). w16.02 2:13, 14

Husaiqa Davidpa amigon karqa. Jehovaman, Davidman ima, cheqa sonqo kananpaj mana manchachikoj kanan karqa. Imaraykuchus israelitas Davidpa wawan Absalonta rey kananpaj churayta munasharqanku. Husaiqa Absalón soldadosninwan Jerusalenman jamusqanta, David ayqekusqanta ima yacharqa (2 Sam. 15:13; 16:15). ¿Imatá Husai ruwarqa? ¿Davidta saqerparispachu Absalonta yanaparqa? Mana. David machituña kajtinpis, runas wañuchiyta munajtinkupis, Davidman cheqa sonqollapuni kayta munarqa, Davidta rey kananpaj Jehová churasqanta yachasqanrayku. Chayrayku Olivos orqoman Davidwan tinkoj rerqa (2 Sam. 15:30). Davidtaj Husaita Jerusalenman kutinanta nerqa, Absalonpa amigonman jina tukunanpaj. Husaiqa munarqa Absalón yuyaychasqanta japʼikunanta, Ahitofelpa yuyaychasqanta japʼikunanmanta nisqaqa. Husaiqa mana manchachikoj karqa, kausaynintapis wañuypataman churarqa Davidpa nisqanta kasunanpaj, Jehovaman cheqa sonqo kananpaj ima. Davidqa Jehovamanta mañakorqa Husaita yanapananpaj, Jehovataj mañakusqanta uyarerqa. Absalonqa Ahitofelpa yuyaychasqanta uyarinanmantaqa Husaipa yuyaychasqanta uyarerqa (2 Sam. 15:31; 17:14). w16.02 4:15, 16

Moisespa Leynenqa noqanchejtapis mayta yanapallawanchejtaj. Imaraykuchus chay Leypeqa sumaj yuyaychaykunata tarisunman, chaykunapitaj tʼukurisunman. Moisespa Leyninta niña juntʼananchej kajtinpis, chaypi yuyaychakusqanqa imaynatachus kausakunapaj, imaynatachus Jehovata yupaychanapaj ima yanapawanchej. Jehovaqa Moisespa Leynin Bibliapi kananta saqerqa, Leymanta yachakunapaj, yuyaychaykunasninman jina kausakunapaj ima. Chantapis mayta agradecekusunman Jesús Moisesman qosqa Leymanta nisqa aswan sumajtaraj yachachiwasqanchejmanta. Sutʼincharinapaj, Jesuspa kay nisqanpi tʼukurisunman: “Qankuna uyarerqankichejña nisqa kasqanta: Ama qhenchachakunkichu khuchichakuspa, nispa. Noqatajrí niykichej: Sichus pipis uj warmita qhawan munapayaspa chayqa, ñapis paywan sonqompi khuchichakunña”, nispa. Rikunchej jina mana qhenchakuyllamantachu jarkʼakunanchej tiyan, manaqa ima sajra yuyaymantapis (Mat. 5:27, 28). w16.03 4:6, 8

Samuelqa, mana uj reyta israelitaspaj ajllapuyta munarqachu. Chayrayku Jehová kinsa kutita israelitaspa mañakusqankuta uyarinanta nerqa (1 Sam. 8:7, 9, 22). Jina kajtinpis, Samuelqa cuentanmanta waj runa kananta yachaspa mana phiñakorqachu, nitaj envidiakorqachu. Jehová, Saulta rey kananpaj ajllananta nejtinpis tukuy sonqo ruwarqa. Jehovata munakusqanrayku tukuy sonqo kasukorqa, nitaj tanqasqa jinallachu. Kunanpis unaytaña llankʼaj ancianos Samuel jina ruwanku, munakuywantaj wajkunata wakichinku (1 Ped. 5:2). Kʼacha hermanos kasqankuraykutaj hermanoswan congregacionpi ruwanasninkuta ruwaysichikunku. Paykunataqa uj sumaj yanapata jina qhawanku (2 Cor. 1:24; Heb. 13:16). Chantapis mayta kusikunku, chay hermanos tukuy yachasqankuta congregacionta yanapanankupaj apaykachasqankuta rikuspa (Hech. 20:35). w15 15/4 1:16, 17

Rey Azariasqa “Tata Diospa ñawpaqempi cheqan kajta ruwa[llarqapuni]”. Jinapis Jehovaqa Azariasta lepra onqoywan castigarqa (2 Rey. 15:1-5). ¿Imaraykutaj? Kausayninmanta parlaspa 2 Reyes libropi mana ninchu imaraykuchus Jehová castigasqanta. Wakin runasqa ichá yuyankuman Jehová qhasimanta castigasqanta. Chaywanpis noqanchejqa Jehovata sumajta rejsinchej, yachanchej imatapis cheqantapuni ruwasqanta. Rey Azariastaqa, Uzías sutiwan rejsikullantaj (2 Rey. 15:7, 32). Kay 2 Crónicas 26:3-5, 16-21 versiculospi Azariaspa kausayninmanta parlaspa nin: “Ruwasqasnenqa cheqan karqa Tata Diospa qhawaynimpeqa”, nispa. Chantapis nillantaj: “Sonqompi runaykachayta qallarerqa”, nispa. Chay reyqa uj kuti sacerdotespa ruwanankuta ruwayta munarqa. Chantá 81 sacerdotes chayta mana ruwananta nerqanku. Paytaj runaykachayta qallarisqanrayku paykunawan phiñakorqa, nitaj kasorqachu. Kayqa imaraykuchus Jehová chay reyta lepra onqoywan castigasqanta entiendenapaj yanapawanchej. w15 15/4 3:8, 9

Kay pʼunchaypaj versiculoqa rikuchin, Satanaspa ujnin sutin Kuraj Supay kasqanta, chay suteqa “llullakuspa tumpaj” niyta munan. Kaytaj yuyarichiwanchej, Jehová Diosta llullamanta tumpasqanta. “Ñawpa katari” palabrataj yuyarichiwanchej Edén huertapi uj katarinejta Evata chʼaukiyasqanta. Chantapis Satanastaqa “jatun sierpe” nikullantaj, manchay phiña animal jina kasqanrayku. Payqa Diospa llajtanta chinkachiyta munan, nitaj Jehovaj munaynin juntʼakunanta munanchu. Sutʼi rikukun Satanás, Jehová Diosman cheqa sonqo kananchejta mana munasqanta. Chayrayku Biblia yuyaychawanchej: “Allinta qhawaychej, imaraykuchus enemigoykichej Kuraj Supayqa, phiña león jina qhaparirispa muyuykachasunkichej, mayqellantapis oqoykunampaj”, nispa (1 Ped. 5:8). Satanasqa kusikun Diospa ujnin kamachin jatun juchapi urmajtin. Chay kutispitaj Jehová Diosta asipayan (Pro. 27:11). w15 15/5 1:3, 4, 10

Jehovaqa kusisqa kausakunanchejta munan. Imaraykuchus Adanta, Evata ima uj kʼacha huertaman tiyakunankupaj churarqa (Gén. 2:9). Chaywanpis Satanasqa imatachus munasqanchejwan “qhapajyayta munapayay[man]” tanqawasunman (Mat. 13:22). Imaraykuchus ashkha qolqeta ganaspa, tukuy imata rantispa ima astawan kusisqas kananchejta yuyanata munan. Ajinata yuyaspaqa, Diospa ñaupaqenpi niña allinpajchu qhawasqa kasunchej. Chayrayku Jesús nerqa: “Mana pipis atinchu iskay patronesta ujllapi sirviyta, imaraykuchus ujninta chejnenqa, ujnintataj munakonqa; chayri, ujninman kʼaskakonqa, ujnintataj qhesachanqa. Mana atinkichejchu ujllapi sirviyta Diosta, qhapaj kaytawan”, nispa (Mat. 6:24). Qolqellapi astawan yuyasunchej chayqa, qolqej wata runasninman tukusunchej. Nitaj Jehovata sirviyta atillasunchu. Satanastaj ajinapi rikukunanchejta munan. Chayrayku payta atipanapajqa, ni jaykʼaj yuyanachu ashkha qolqeyoj kay, tukuy imata rantiy ima, Jehovaj amigosnin kanamanta aswan sumaj kasqanta (1 Tim. 6:6-10). w15 15/5 2:12

Wajkuna llakiypi kashaspa imaynachus kashasqankuta mana entiendeyta atillanchejchu, mana chay llakiypi rikukuspaqa. Sutʼincharinapaj, ashkha hermanos onqoykusqankurayku, machuyapusqankurayku, accidentakusqankurayku ñakʼarinku. Wakintaj sinchʼi llakisqas kasqankurayku, wajkuna ñakʼarichisqankuta yuyarikusqankurayku ima ñakʼarinku. Wakin hermanosqa sapallanku wawasninkuta uywashanku chayri familiankupi mana tukuychu Diosta sirvinku. Arí, tukuypis chʼampaykunasniyoj kanchej, yanapatataj necesitanchej. Chayrayku kallpachakunanchej tiyan ñakʼarishanku chay hermanosta yanapanapaj, paykunaman munakuyta rikuchinapaj ima. Chaypajtaj, paykuna imatachus niwasqanchejta sumajta uyarina, imaynachus kashasqankuta entiendenapajtaj kallpachakuna. Chantapis yuyarichisunman Jehová chʼampaykunasninchejmanta llakikusqanta. Tukuy chaykunata ruwaspataj Jehová jina ruwasunchej (Rom. 12:15; 1 Ped. 3:8). w15 15/5 4:6, 7

Jehová, Jesusman atiyta qorqa sinchʼi wayrata thañichinanpaj. Chayrayku yachanchej Jehovapis chayta ruwananpaj atiyniyoj kasqanta. Niraj Jatun Para kashajtin, Jehová nerqa: “Qanchis pʼunchaymantawan parachimusaj tawa chunka pʼunchayta, tawa chunka tutatawan”, nispa (Gén. 7:4). Chantapis Éxodo 14:21 versículo nillantaj: “Diostaj tukuy chay tuta inti llojsimuynejmanta sumajta wayrachimuspa, yakuta iskayman khallarparerqa”, nispa. Jonás 1:4 versiculopi nin: “Diosqa sinchʼita wayrachimorqa. Jatun Qocha chawpitaña rishajtinku, maytapuni para wayraqa yakuta qhollchoqeyachispa, barcotaqa qʼopata jina kayman jaqayman apaykacharqa, phirinampaj jina”, nispa. Chay jina atiyniyoj Jehová kasqanqa, paypi atienekunanchejpaj yanapawanchej. Cheqamantapuni paraisopeqa sinchʼi wayra, waj llakichej imas manaña kanqachu. Paraisopeqa chay llakiykuna kananmanta manaña manchachikusunchu, imaraykuchus Jehová tukuy runasta yanapanqa (Apo. 21:3, 4). Cheqamantapuni nisunman Jesucristoqa, Jehovaj atiyninwan tukuy imata allinchananta. w15 15/6 1:15, 16

Proverbios 7 capitulopeqa, uj waynamanta parlashan. Chay waynaqa laqhayaykushajtinña phisu warmi tiyakorqa chaynejman puriykacharej rerqa. Chay waynaqa sajra munayninwan atipachikusqanrayku khuchichakorqa. Niraj juchaman urmashaspa imaspichus rikukunanpi tʼukurinman karqa chayqa, chay warmiwan mana khuchichakunmanchu karqa (Pro. 7:6-27). Noqanchejpis ñaupajta imaspichus rikukunanchejpi mana tʼukurisunchu chayqa, sajra imasta ruwayman urmasunman. Sutʼincharinapaj, mana allinchu kanman teleta chʼisisnin qhawashaspa tukuy canalesta qhawananchej. Imaraykuchus ajinata ruwaspaqa ichapis khuchichakuymanta imasta qhawasunman. Internetpi kashaspapis mana allinchu kanman yaykunanchej mana rejsisqanchej paginasman, millay khuchichakuykunamanta fotos rikhurin chay paginasman ima. Imaraykuchus chaykunata rikuspaqa, ichapis mana munashaspalla sajra imaspi yuyayta qallarisunman, Diospa kamachisqantataj pʼakisunman. w15 15/6 3:8, 9

Jesusqa Diosmanta imaynatachus mañakunata yachachishaspa, nerqa: “Manu caskaycumanta perdonawaycu[...]”, nispa. Chantá waj kutipi nillarqataj: “Juchasniykuta pampachapuwayku”, nispa (Mat. 6:12, MT 1956; Luc. 11:4). Jesús chayta nerqa, juchasninchej uj manuwan kikinchakusqanrayku. Inglés parlaypi Torremanta Qhawaj revista 1952 watapi sutʼincharqa Diosta munakunanchej, kasukunanchej ima kasqanta. Chantapis nillarqataj juchallikuspaqa, Diospa sonqonta nanachishasqanchejta. Chayrayku nisunman Dioswanqa manupi jina kasqanchejta. Jehová munanman chayqa manaña amigonchejchu kanman. Chantapis chay revistaqa nillarqataj: “Juchallikuspaqa, Diosta mana munakusqanchejta rikuchinchej”, nispa (1 Juan 5:3). Jehová Diosman mayta agradecekunchej, Jesusta juchasninchejrayku wañunanpaj kachamusqanmanta. Sapa pʼunchay Jehová perdonanawanchejta necesitanchej. Jesús kausayninta qosqanmanta iskay waranqa watasmanta astawan kashan, wañuynintaj kunankama yanapashallawanchejpuni. Chayrayku Jehovaman mayta agradecekunanchej tiyan. Jesús kausayninta mana qonmanchu karqa chayqa, juchamanta, wañuymanta ima mana kacharichisqachu kasunman karqa (Sal. 49:7-9; 1 Ped. 1:18, 19). w15 15/6 5:9, 10

Kunan tiempopi publicacionesninchejqa runasta astawan yanapananpaj jina, aswan kʼachitustaj kanku, chaykunawan willamuspataj mayta kusikunchej. Chantapis imastachus runas rikhurichinku, chaykunanejta Diosmanta runasman willallanchejtaj. Internetpi jw.org nisqanejta ashkha runasta Diosmanta yachakunankupaj yanapashallanchejtaj. Tukuy kaytaj Jehová runasta munakusqanta, paykunamanta khuyakusqanta ima rikuchin. Familianchejwan chayri sapallanchejpi Bibliata ukhunchanapaj tiemponchej kananpaj, tantakuykuna waj jinamanta ruwakusqanta may jatunpaj qhawanchej. Chantapis mayta agradecekunchej jatuchaj tantakuykuna waj jinamanta ruwakusqanmanta. Sapa wata chay jatuchaj tantakuykuna aswan sumaj wakichisqa kashan. Chantapis Diospa llajtanpi imaymana escuelaspi yachachiwasqanchejmanta mayta agradecekullanchejtaj. Tukuy kaykunataj rikuchiwanchej, Jehová llajtanta ñaupajman apashasqanta, aswan sumajta ujchaykushasqanta, sonqo tiyasqa kanankupaj yachachishasqanta ima. w15 15/7 1:16, 17

Kay pachaman chhapukunapaj tanqasqa kashaspa, tapurikuy: “¿Imatá Jesús ruwanman karqarí?”, nispa. Jesús Jallpʼapi kashajtin Judeamanta, Galileamanta, Samariamanta runas mana allintachu kausakoj kanku. Judioswan samaritanoswanqa mana parlapayanakojchu kanku (Juan 4:9). Fariseoswan, saduceoswanpis siminakullajpuni kanku (Hech. 23:6-9). Moisesman qosqa Leymanta yachaj judiospis, chay Leymanta mana yachajkunata pisipaj qhawaj kanku (Juan 7:49). Ashkhastaj impuestosta cobrajkunata, romanosta ima chejnikoj kanku (Mat. 9:11). Chaywanpis Jesusqa mana chay chʼampaykunasninkuman satʼikojchu. Payqa Jehovamanta cheqa kajta yachachispapis, judiosta Dios llajtanta jina ajllasqanta yachaspapis, ni jaykʼaj yachachisqasninman yachacherqachu paykuna wajkunamanta nisqa aswan sumaj kasqankuta (Juan 4:22). Astawanpis tukuy laya runasta munakunankuta yachacherqa. w15 15/7 3:5

Jehovaqa munakuyta rikuchinanchejpaj, wajkuna munakuyta rikuchinawanchejpaj ima ruwawarqanchej. Chaywanpis onqosqa kajtinchej, qolqe pisiwajtinchej, willaypi ni pi uyariwajtinchej mayta llakikusunman. Ajinapi rikukuspataj ichapis Jehová manaña munakuwasqanchejta yuyasunman. Ajinapi rikukuspaqa yuyarikunanchej tiyan Jehová noqanchejmanta llakikusqanta, yanapayta munawasqanchejta ima. Payman cheqa sonqo kajtinchej ni jaykʼaj saqerpariwasunchu (Isa. 41:13; 49:15). Brigitteqa qosan wañupusqantawan iskay wawasninta sapallan uywanan karqa, pay nin: “Satanaspa pachanpi wawasta uywayqa mana atikullanchu, astawanraj sapallanchej uywana kajtin. Chaywanpis llakiypi kashajtiy Jehová yanapawarqapuni, nitaj jaykʼajpis llakiypi saqerpariwarqachu. Chayrayku niyman Jehová mayta munakuwasqanta”, nispa (1 Cor. 10:13). w15 15/8 1:1-3

Profeta Habacucqa Jerusalén llajta chinkachisqa kananta willashaspa pacienciawan suyarqa chinkachisqa kananta. Paymanta aswan ñaupajta waj profetaspis chay kikin willayllatataj ashkha watasta willarqanku. Chay tiempomanta runas mana jaykʼaj jina astawan sajrayasqankuta rikorqa. Chayrayku Jehovaj yanapayninta mañakorqa, tapurerqataj: “Maykʼajkamataj qanta qhaparikamuspa, yanapata mañakusaj, mana uyarichikuspa?”, nispa. Jehovaqa Habacucman “juntʼakunan tiempoqa chayamonqapuni”, nispa nerqa (Hab. 1:1-4). Kaypi tʼukuriy: Habacucqa saykʼusqaña kashan Jerusalén thuñisqa kananta suyakuspa, nintaj: “Ashkha watastaña chinkachisqa kananta suyashani. Ichapis manaraj chayamonqachu, chayrayku manasina allinchu kanman willamunallaypuni. Wajkuna willamuchunku ari”, nispa. Ajinata Habacuc yuyanman karqa chayqa, ¿imataj kanman karqa? Jehovawan allinpi kayninta chinkachinman karqa. Jerusalén thuñisqa kananpaj mana wakichisqachu kaspataj wañunman karqa. w15 15/8 2:12, 13

Jehovawan amigosllapuni kanapajqa, sajra imasta ruwajkunawan mana masichakunachu. Nillataj masichakunanchejchu tiyan Diosta sirvini nishaspa, Diosta mana kasukojkunawan. Paykunamanta mayqellanpis jatun juchata ruwaspa mana pesachikojtin, paywan manaña parlanchejchu, niñataj paywan masichakunchejchu (Rom. 16:17, 18). Sajra imasta ruwajkunawan masichakuspaqa, paykuna jina sajra imasta ruwayta qallarisunman. ¿Imaraykú chayta ninchej? Imaraykuchus runasqa amigosninku jina kayta munanku, nitaj pʼenqaypi rikhuriyta munankuchu. Sutʼincharinapaj, khuchichakojkunawan masichakuspaqa, paykuna jina khuchichakuyta qallarisunman. Ajinapi wakin hermanosninchej rikukorqanku. Wakin hermanosninchejqa pesachikorqanku, wakintaj mana pesachikusqankurayku congregacionmanta qharqochikorqanku (1 Cor. 5:11-13). Juchankumanta mana pesachikojtinku imachus kananta 2 Pedro 2:20-22 nin. w15 15/8 4:4-6

Jesusqa sumajta ajllakorqa pikunawanchus masichakuyta. Payqa qhepanta tukuy sonqo rejkunallawan, tatanta tukuy sonqo yupaychajkunallawan masichakoj. Noqanchejpis Jehovata tukuy sonqo yupaychajkunallawan masichakunanchej tiyan. ¿Imaraykú? Jehová Diospa llajtanpi munakuy kasqan, wiñay tukusqa cristianosman tukunanchejpaj yanapawasunman. Qan wayna chayri sipas kanki chayqa, ¿imatachus kausayniykipi ruwanaykita yachankiñachu? Kausayniykipi imatapis allinta ajllayta munanki chayqa, congregación ujchasqallapuni kananpaj yanapakoj hermanoswan, ashkha watastaña Diosta yupaychaypi llankʼaj hermanoswan ima masichakuy. Chay hermanosqa ichá kausayninkupi, Diosta yupaychayninkupi ima chʼampaykunapi rikukorqanku. Paykunawan masichakuytaj allinta kausakunaykipaj, imatapis sumajta ajllanaykipaj, wiñay tukusqa cristiano kanaykipaj ima yanapasonqa (Heb. 5:14). w15 15/9 1:14, 15

Jesusqa yachachisqasninpa creeyninkuta kallpachananpaj jina imatapis ruwaj, parlaj ima (Mar. 11:20-24). Noqanchejpis ajinata ruwananchej tiyan. Ajinata ruwaspataj creeyninchejtapis kallpachayta atisunman (Pro. 11:25). Runasman willashaspa, imaraykuchus Dios kasqanpipuni creesqanchejta, munakuwasqanchejta, Bibliata qowasqanchejta ima sutʼinchasunman. Hermanosninchejtapis creeyninkuta sinchʼiyachinankupaj yanapallasunmantaj. Sutʼincharinapaj, uj hermano ancianospa contrankupi rimayta qallarejtenqa, ama chay hermanopaj phiñakunachu. Astawanpis kʼachamanta yanapananchej tiyan Jehová Diospi astawan creenanpaj, hermanospi atienekunanpaj ima (Jud. 22, 23). Colegiopi kashanki chayqa, profesorniyki kausay jinallamanta rikhurisqanmanta yachachejtin, mana manchachikuspa Dios tukuy imata ruwasqanta sutʼinchay. Chayta ruwajtiyki ichapis profesorniyki, compañerosniyki ima mana phiñakonqankuchu. Jehovaqa sinchʼi creeyniyoj kananchejpaj yanapanawanchej (1 Ped. 5:10). Sinchʼi creeyniyoj kanapaj mayta kallpachakoyqa, mana qhasichu kanqa. w15 15/9 3:20, 21

Kunanpis Jehovaqa paymanta ashkha imasta yachachiwanchej, nisunman ruwasqasninmanta, imatachus ruwananta nisqanmanta, Palabranmanta ima. Kay sajra pachapi runasqa universidadespi tukuy imata yachakuyllapi yuyanku, Diosta munakuymantataj qonqapunku. Jehová Diostajrí mana tukuy imata yachakunallanchejtachu munan, manaqa allin imasta ajllayta yachakunanchejtapis. Payqa imatachus yachachiwasqanchejta, allinninchejpaj, wajkunata yanapanapaj ima apaykachananchejta munan (Pro. 4:5-7). ¿Imaynatataj chayta ruwasunman? Runasta salvakunankupaj ‘cheqa kajta rejsinankupaj’ yanapaspa (1 Tim. 2:4). Imatachus Diospa Reinon noqanchejrayku ruwananmanta tukuy runasman yachachimusunchej chayqa, Jehovata, runa masinchejta ima munakusqanchejta rikuchisunchej (Sal. 66:16, 17). w15 15/9 5:10, 11

Bibliaqa profeta Eliaspa creeynin sinchʼi kasqanmanta parlan. Qallarinapajqa rey Achabman nerqa, Jehová mana parachimunanta, nisqantataj juntʼanantapuni (1 Rey. 17:1). Chantapis Eliasqa chay chʼaki tiempopi payman, waj runasman ima Jehová tukuy necesitasqankuta qonanpi atienekorqa (1 Rey. 17:4, 5, 13, 14). Chantá atienekullarqataj Jehová uj viudaj wawanta kausarichinanpi (1 Rey. 17:21). Yachallarqataj Carmelo orqopi jaywasqanta Jehová cielomanta ninawan qʼolaykuchinanta (1 Rey. 18:24, 37). Chantapis Eliasqa niraj chʼaki tiempo tukukushajtin, Jehová watejmanta parachimunanta sumajta yacharqa, chayrayku Achabman ajinata nerqa: “Riy, mikhumuy, ujyamuytaj, imaraykuchus paraqa jamushanña”, nispa (1 Rey. 18:41). Kaykunata yachakuspa tapurikusunman: “¿Elías jinachu sinchʼi creeyniyoj kani?”, nispa. w15 15/10 2:4, 5

Runasqa animalesmanta nisqa, waj imastawan ruwayta atinchej (Sal. 139:14; Apo. 4:11). Jehová payman rijchʼakojta ruwawasqanchejrayku imatapis munasqanchejman jina ajllajta saqewanchej (Gén. 1:27). Chayrayku parlayninchejwan Jehovata jatunchayta, sirviyta ima ajllayta atinchej. Jehovaqa, payta imaynatachus jatunchayta, sirviyta ima yachananchejpaj Bibliata qowanchej. Kay tiempopi Bibliaqa 2.800 parlaykunamanta astawanña tiyan tukuynin chayri wakin librosnillan. Bibliata leespa, leesqanchejpi tʼukurispa imaqa, Jehová Diosninchej jina yuyayta yachakunchej (Sal. 40:5; 92:5; 139:17). Jehová jina yuyasunchej chayqa, allinta ajllayta yachasun, wiñaypajtaj kausakusun (2 Tim. 3:14-17). Tʼukureyqa imatachus ruwashanchej chaypi yuyayninchejta churay niyta munan (Sal. 77:12; Pro. 24:1, 2). Chantapis Jehovamanta, Jesusmanta yachakusqanchejpi tʼukurinapaj tiempochakunanchejpuni tiyan (Juan 17:3). w15 15/10 4:2-4

Jesusqa yachachisqasninman mana llampʼu sonqo kanallankutachu nerqa, manaqa ruwayninwan yachacherqa (Luc. 22:27). Payqa Jehová Diosrayku, wajkunata yanapananrayku ima tukuy imata ruwarqa, chayta rikuspa apostolesninpis kikillantataj ruwarqanku. Qankunapis wawasniykichejman ruwayniykichejwan yachachiychej. Kunantaj Debbie sutiyoj hermanamanta parlarina. Payqa iskay wawasniyoj, nintaj: “Qosay anciano ruwanasninta juntʼananpaj ashkha tiemponta churajtinpis ni jaykʼaj saqerpayasqa jinachu sientekoj kani. Yacharqanitaj familiayku yanapata necesitajtin, yanapananpaj chaypipuni kananta”, nispa. ¿Imaynatá Debbie ruwasqan, qosan Pranas ruwasqan ima familiankuta yanaparqa? Pranas nin: “Wawasneyqa jatuchajña kaspa congregacionpi, jatun tantakuykunapi ima yanapakoj kanku. Hermanoswanpis sumajta masichakoj kanku, may kusisqastaj kaj kanku”, nispa. Kunantaj chay familiaqa tukuyninku Diospaj astawan llankʼashanku. Rikunchej jina qankuna llampʼu sonqo kankichej, wajkunatapis yanapankichej chayqa, wawasniykichejpis kikillantataj ruwanqanku. w15 15/11 1:9

Jehovaqa tukuy imaymanamanta jatun munakuyninta rikuchiwanchej. Sutʼincharinapaj, janaj pacha may jatun kasqanpi, kʼachitutaj kasqanpi tʼukurina. Janaj pachapeqa may chhika planetas, chʼaskas ima tiyan. Chay chʼaskasmanta ujnintaj Inti. Manachus Inti kanman chayqa, Jallpʼapi mana kausay kanmanchu. Tukuy chaytaj, kay pʼunchaypaj versículo nisqanman jina Jehová Ruwawajninchej, atiyniyoj, yachayniyoj, munakuyniyoj ima kasqanta rikuchiwanchej. Jehovaqa Jallpʼata may kʼachituta ruwarqa plantas, animales, runas ima kanankupaj. Chantá uj kʼachitu huertaman runasta tiyakunankupaj churarqa. Paykunataqa may sumaj yuyayniyojta, wiñaypaj kausakuyta atinankupaj jina cuerpoyojta ima ruwarqa (Apo. 4:11). Chantapis Jehovaqa munakuynin wiñaypaj kasqanrayku “runasman, uywasmampis” mikhuchin (Sal. 136:25). w15 15/11 3:7, 8

Noqanchejqa Reyninchej Jesucristo tukuy laya yanapasta qowasqanchejwan yanapachikunchej willayninchejta runas uyarinankupaj. Chay yanapasmanta wakintaj pisi tiempollata yanapawarqanchej, wakintaj kunankama yanapashallawanchejpuni. Chaywanpis chay tukuy yanapasqa sumajta willamunapaj yanapawanchej. Kay 1933 watapi, hermanosqa willayniyoj papelitos nisqawan willayta qallarerqanku, chaytaj may ashkhasta yanaparqa Diosmanta willayta qallarinankupaj. Chay papelitopitaj Bibliamanta uj willay pisi parlayllapi rikhurej. Willayniyoj papelitosqa hermanosta willayninkupi mayta yanaparqa. Imaraykuchus wakin hermanosqa willayta munaspapis manchalis kasqankurayku yachakusqankumanta mana parlayta atejchu kanku. Wakin hermanostaj mana manchachikusqankurayku pisi minutosllapi yachakusqankumanta sutʼincharej kanku. Chaywanpis wakin kutisqa kʼachamanta parlariyta mana atillajchu kanku. Willayniyoj papelitosqa mayta yanaparqa tukuyman sutʼita, entiendenankupaj jina willanankupaj. w15 15/11 5:3-6

Bibliapi Diospa sutin rikhurinanta, runas rejsispa jatunchanankuta ima, ashkha versículos rikuchiwanchej (Éxo. 3:15, NM; Sal. 83:18; Isa. 42:8; 43:10, QC; Juan 17:6, 26; Hech. 15:13, 14). Jehová Bibliata qhelqajkunata yuyaycharqa sutinta qhelqanankupaj. Chayrayku ñaupa qhelqasqaspi ashkha kutista sutin rikhurin (Eze. 38:23). Bibliata tijrachejkuna Diospa sutinta orqhorparispaqa, Diosta pisipaj qhawasqankuta nisunman. Kay tiempopi astawanraj rikunchej Diospa sutin Bibliapi rikhurinanpuni kasqanta. Kay 2013 watapi Traducción del Nuevo Mundo nisqa Biblia inglespi llojserqa, chay Bibliapeqa 7.216 kutista Diospa sutin rikhurin, nisunman 1984 watapi orqhokusqanmanta 6 kutispiwan. Chay sojtamanta phishqaqa 1 Samuel 2:25; 6:3; 10:26; 23:14, 16, versiculospi rikhurin. ¿Imaraykú? Imaraykuchus Wañusqa Qochapi kunallanraj tarikusqan qhelqasqaspi chay phishqa versiculospi Diospa sutin rikhurin. Ujnintaj Jueces 19:18 versiculopi rikhurin, ñaupa qhelqasqasta ukhunchasqankuman jina. w15 15/12 2:5, 6

Noqanchejpis kay tiempopi hermanosninchejwan purajmanta munanakusqanchejta kallpachananchej tiyan. Imaraykuchus chayqa qhepaman mana allin imasta aguantanapaj yanapawasun. Niraj manchay ñakʼariy tiempo qallarishajtin hermanosninchejman munakuyninchejta imaymanamanta rikuchiyta atisunman. Ashkha hermanosninchej jallpʼa ikhakuykuna, pʼampaj yakus (tsunamis), sinchʼi wayras, loco paras, waj imas kasqanrayku ima mayta ñakʼarinku. Wakin hermanosninchejtaj sinchʼi qhatiykachasqas kanku (Mat. 24:6-9). Wakinkunataj kay sajra pachapi kausakusqanchejrayku sapa pʼunchay qolqemanta ñakʼarinku (Apo. 6:5, 6). Hermanosninchej chʼampaykunapi astawan rikukojtinku, munakuyninchejta astawan rikuchiyta atinchej. Kay pachamanta runas munakuyta mana rikuchejtinkupis, noqanchejqa hermanos jina tukuy sonqo munanakunallanchejpuni tiyan (Mat. 24:12). w16.01 1:8, 9