Junio

Pillapis sonqonchejta nanachinawanchejpaj jina imatapis niwajtinchejqa, aswan allin kanman miskʼi simiwan kutichinanchej (Pro. 15:1). Uj mamapi tʼukurinachej. Payqa wawanta sapallan uywasharqa. Wawanqa pakayllamanta sajra imasta ruwasharqa. Uj pʼunchaytaj uj hermana chayta yachaytawan, chay mamata kallpachariyta munaspa, nerqa: “Wawaykita mana allintachu yachachisqaykeqa, ¡llakikunapaj jinapuni!”, nispa. Chay mamaqa niraj imatapis kutichishaspa sumajta tʼukurerqa, phiñakuynintataj ñitʼiykukorqa. Nerqataj: “Wawayta yachachinaypaj tiempo kanraj. Chaypajtaj mayta kallpachakusaj. Armagedón pasaytarajchá yachasunchej allintachus manachus yachachisqayta”, nispa. Ajinata ruwasqanraykutaj iskayninku amigasllapuni kanku. Chayta uyarispa wawanpis manaña sajra imasta ruwarqachu, astawanpis bautizakorqa, Betel wasipitaj llankʼarqa. ¿Imatá chaymanta yachakunchej? Familiaresninchejwan, hermanoswan, mana rejsisqa runaswan parlashaspaqa, kʼacha simiwan, kachiwan kachinchasqata jina parlananchej kasqanta, nisunman wajkunata jatunpaj qhawaspa (Col. 4:6). w15 15/12 3:15, 17

Jesuspa 120 yachachisqasnenqa, Pentecostés 33 watapi Jehová espíritu santonwan paykunata ajllasqanta ni jaykʼaj qonqanqankuchu. Imaraykuchus sapa ujninku umankuman “nina larway qallus jina” tiyaykorqa. Jehová Dios paykunaman atiyta qosqanraykutaj waj parlaykunapi parlayta qallarerqanku (Hech. 2:6-12). Chaywanpis chay tʼukuna imasqa mana Jehová sapa uj cristianota espíritu santonwan ajllashajtinpunichu rikukun. Sutʼincharinapaj, chay kikin pʼunchayllapitaj Jehová ashkha runasta ajllarqa, chaywanpis Bibliaqa mana ninchu chay runaspa umasninkuman nina lauray qallus jina tiyaykusqanta. Jehová Diosqa chay runasta bautizakushajtinku ajllarqa (Hech. 2:38). Chaywanpis mana tukuy ajllasqa cristianostachu bautizakushajtinku ajllarqa. Samariamanta cristianostaqa bautizakusqankumanta pisi tiemponman ajllarqa (Hech. 8:14-17). Corneliota, wasinpi kajkunata imataj, niraj bautizakushajtinku ajllarqa (Hech. 10:44-48). w16.01 3:3, 5

Ajllasqa cristianosqa mana yuyankuchu waj ovejasmanta nisqa aswan sumaj kasqankuta. Nillataj yuyankuchu paykunamanta nisqa espíritu santota astawan japʼisqankuta, Bibliaj yachachiyninta astawan entiendesqankuta ima. Nillataj mayqen cristianotapis ajllasqa kasqanta yuyaspa Señorpa Cenanpi tʼantata mikhunanta, vinota ujyananta ninkuchu. Paykunaqa llampʼu sonqos kasqankurayku, Jehovalla mayqen cristianotapis janaj pachaman rinanpaj wajyayta atisqanta yachanku. Ajllasqa cristianosqa mana suyankuchu wajkuna jatunchanankuta (Efe. 1:18, 19; Fili. 2:2, 3). Yachankutaj mana tukuypa rikunankutachu Jehovaqa paykunata ajllasqanta. Chayrayku uj ajllasqa cristianoqa mana tʼukunchu ajllasqa kasqanta wajkuna mana creejtinku. Imajtinchus Bibliaqa pillapis Dios uj llankʼayta “qowan” niwajtinchej, mana chay rato creena kasqanta yuyaychawanchej (Apo. 2:2). w16.01 4:6, 7

Jehová uj milagronejta Abrahamta, warminta ima chay kutipipis jarkʼallarqataj (Gén. 12:10-20; 20:2-7, 10-12, 17, 18). Tukuy chaykunataj Abrahamta sinchʼi creeyniyoj kananpaj yanaparqa. Noqanchejrí, ¿Jehovawan sumaj amigos kayta atisunmanchu? Arí. Abraham jinallataj noqanchejpis Jehovamanta yachakunanchej tiyan. Imatachus Jehovamanta yachakuyta necesitasqanchejta, imaynatachus kamachisninta yanapasqanta Bibliapi leeyta atinchej. Abrahammanta nisqaqa astawan yachakuyta atinchej (Dan. 12:4). Bibliaqa “cielotawan, kay pachatawan Ruwaj[manta]” mayta parlan. Bibliapi yachakusqanchejtaj Jehovata munakunapaj, jatunpaj qhawanapaj ima yanapawanchej (Gén. 14:22). Chaytaj Payta kasukunapaj yanapawanchej. Kasukusqanchejraykutaj payqa bendeciwanchej, jarkʼawanchej ima, ajinamanta rikunchej imaynatachus Jehová kausayninchejpi yanapawasqanchejta. Jehovata tukuy sonqo sirvispaqa, kusikunchej, sonqo tiyasqataj kanchej (Sal. 34:8; Pro. 10:22). Jehovamanta astawan yachakojtinchej, kausayninchejpi yanapawasqanchejta rikojtinchej ima, paywan amigosllapuni kasunchej, creeyninchejpis kallpachakonqa. w16.02 1:7, 8

Chay palabrasqa rikuchiwanchej Diospa Palabranta María sumajta rejsisqanta. Imaraykuchus paypa nisqan yuyarichiwanchej, Samuelpa maman Ana mañakuyninpi ima palabrastachus oqharisqanta (1 Sam. 2:1-10). Mariaqa Lucas 1:46-55 versiculospi 20 kutista jina Diospa Palabranta oqharerqa. Chantapis payqa Amigon Jehovamanta ashkha imasta yachakorqa, chaykunamanta parlariytaj mayta gustaj. Maykʼajllapis Jehovamanta uj sumaj ruwayta japʼispa mana juntʼayta atinanchejta yuyanchej chayqa, María jina ruwana, chay ruwayta llampʼu sonqowan japʼikuna, Jehová chay ruwayta juntʼanapaj yanapanawanchejpitaj atienekuna. Chantapis María jina Jehová yachachiwasqanchejta uyarina, paymanta yachakusqanchejpi, imatachus aswan qhepaman ruwananpi ima tʼukurina. Chaykunamanta wajkunaman willarinapajtaj kallpachakuna (Sal. 77:11, 12; Luc. 8:18; Rom. 10:15). w16.02 2:17, 18

Sapa wata may chhika jóvenes bautizakunku (Ecl. 12:1). Jinapis cristiano tatas, ancianos ima, qhawarinanku tiyan jóvenes Jehovata sirviyta munasqankuraykupuni bautizakuyta munasqankuta, bautizakuy imachus ninayasqanta entiendesqankuta ima. Diosman kausayninchejta qospa, bautizakuspa ima, Diospa kamachin jina kausakuyta qallarinchej. Chayta ruwajtinchejtaj Jehová mayta bendeciwanchej, Supaytaj ashkha tojllasta churawanchej (Pro. 10:22; 1 Ped. 5:8). Chayrayku cristiano tatasqa tiempochakunanku tiyan wawasninkuman yachachinankupaj Cristoj yachachisqasnin kay imachus niyta munasqanta entiendenankupaj. Uj jovenpa tatasnin mana cristianoschu kajtinkutaj, ancianos payta yanapankuman imaynatachus Diosman kausayninta qonanta, imapajchus bautizakunanta entiendenanpaj (Luc. 14:27-30). Pipis uj wasita ruwayta munan chayqa sumajta wakichikunan tiyan. Ajinallatataj Jehovata “tukukuykama” cheqa sonqollapuni sirvinanpaj ruwanan tiyan (Mat. 24:13). w16.03 1:1, 2

Jehovaqa israelitasman Moisesnejta Leyta qorqa. Jinapis Jehovaqa mosoj kamachiykunata, mosoj leyesta ima qollarqataj. Imaraykuchus kamachisnenqa manaña uj llajtamantachu kananku karqa, manaqa ashkha llajtasmanta. Mosoj congregacionqa “Cristoj leyninta” kasukorqa. Imaraykuchus chay leyqa Bibliaj yuyaychaykunasninman jina kashan, nitaj rumipichu qhelqasqas kashanku, manaqa sapa uj cristianoj sonqonpi qhelqasqa kashan. Cristoj leynenqa tukuy cristianosta maypi tiyakojtinkupis yanapan (Gál. 6:2). Cristiana congregacionmanta kajkunaqa Cristoj leyninwan mayta yanapachikorqanku. Niraj mosoj trato qallarishajtin, Jesusqa iskay sumaj kamachiykunata qorqa. Chay iskay kamachiykunamanta ujnenqa Diosmanta runasman willamuy karqa. Ujnintaj cristianos imaynatachus kausakunankumanta karqa. Chay kamachiykuna tukuy cristianospaj kasqanrayku, kay Jallpʼapi kausakuyta chayri cielopi kausakuyta suyakuspapis chay kamachiykunata kasukunanchej tiyan. w16.03 4:10, 11

Anciano kanki chayqa, uj hermanota wakichinaykipaj, chay hermanoj amigon kanayki tiyan. Ajinata ruwajtiyki chay hermanoqa mana manchachikusonqachu. Chaytataj ruwawaj maypichus tiyakunki chaypi imaynatachus hermanos ruwasqankuman jina. Ashkha ruwanayoj kaspapis, tiempochakuy wakichishanki chay hermanowan masichakunaykipaj. Ajinamanta rikuchinki payta yanapayta munasqaykita. Cheqamantachá chay hermanoqa, munakusqaykita, yanapayta munasqaykita ima rikuspa, may agradecesqa kanqa. Uj sumaj ancianoqa mana hermanosta wakichillanchu, manaqa chay hermanosta munakun (Juan 5:20 kikinchay). ¿Imaraykutaj chayta ruway may allin? Imaraykuchus yanapayta munasqaykita uj hermano reparanqa chayqa astawan yachakuyta munanqa. Chayrayku ancianos, ama hermanosta wakichillaychejchu, manaqa paykunawan masichakuychej (Pro. 17:17; Juan 15:15). w15 15/4 1:19, 20

Bibliaqa rey Azariasmanta (rey Uzías) mana tukuy imatachu willawanchej, jinallataj waj runaspa kausayninkumantapis (2 Rey. 15:7, 32; 2 Cró. 26:3-5, 16-21). Jina kajtin, ¿Jehová cheqan kajtapuni ruwasqanmanta iskayrayasunchu? Chayrí, ¿cheqan kajta ruwasqanpi atienekullasunpunichu? (Deu. 32:4). Bibliaqa Jehová Diosta sumajta rejsinapaj, Paypi atienekunapaj ima, tukuy imata willawanchej. Payta rejsisunchej, munakusunchej ima chayqa, mana necesitasunchejchu imaraykuchus imatapis ruwasqanta yachayta. Bibliata ukhunchasqanchejman jina Jehovapi astawan atienekusunchej, paymantaj astawan qayllaykusunchej (Sal. 77:12, 13). w15 15/4 3:8, 10

Angelesqa may ‘kallpayoj’ kanku. Runamanta nisqaqa astawan yuyayniyoj, astawan atiyniyoj ima kanku. Cheqa sonqo angelesqa atiyninkuwan allin imasta ruwanku. Sutʼincharinapaj, uj kuti uj angellla, Diospa llajtanpa enemigosninmanta 185.000 asirio soldadosta wañucherqa, chaytaqa uj runalla mana ruwayta atinmanchu karqa, nitaj ashkha soldadospis (2 Rey. 19:35). Waj kutipitaj uj ángel, Jesuspa apostolesninta carcelmanta orqhorqa. Carcelta qhawajkuna mana reparanallankuta, chay ángel uj imata jinalla carcelpa punkunta kicharerqa, apostolesta orqhomorqa, watejmantataj punkusta wisqʼaykorqa (Hech. 5:18-23). Cheqa sonqo angelesqa allin imasta atiyninkuwan ruwanku, Satanastajrí sajra imasta ruwan. ¿Imastataj ruwan? Bibliaqa “kay pachata kamachej[...]” kasqanta nin (Juan 12:31). w15 15/5 1:5, 6

Solteros, casados ima khuchichakuypi mana urmanapaj mayta kallpachakuna tiyan. Chayta ruwaytaj mana atikullanchu. Sutʼincharinapaj, ashkha waynasqa compañerosninkuta uyarinku qhariwarmi jina pillawanpis puñuykusqankumanta, celularnejta qhariwarmi jina puñuykuymanta mensajesta, fotosta ima apachisqankumanta ima mayta jatunchakuspa parlasqankuta. Wakin suyuspeqa ajina mensajesta apachiy, wawasta khuchichachisqankumanta fotosta apachiywan ninakun. Chaywanpis Biblia nin: “Pichus khuchichakojrí cuerpompa contrampi juchallikun”, nispa (1 Cor. 6:18). Ashkha runasqa pillawanpis qhariwarmi jina puñuykuspa millay onqoykunawan chimpachikunku, chayraykutaj wañunku chayri mayta ñakʼarinku. Ashkha waynasqa mana casarakuspalla qhariwarmi jina puñuykunku, aswan qhepamantaj pesachikunku. Ashkha libros, películas, takiykunas imaqa, Diospa leyesninta pʼakejtinchej ni imapis kananta yuyachiwanchej. Chaytaj llulla. Ajinata yuyaymanta mana jarkʼakusunchu chayqa, juchaj chʼaukiyayninpi urmasunman. w15 15/5 2:14

Jesuspis Tatan jinallataj may kʼacha. ¿Imataj Jesusta yanaparqa runaswan kʼacha kananpaj? Nisqanwan, ruwasqanwan ima, imaynachus runas kanankupi yuyasqan. Sutʼincharinapaj, uj juchasapa warmi Jesús kasharqa chayman rerqa. Payqa mayta waqasqanrayku, waqayninwan Jesuspa chakisninta joqʼocharqa. Jesusqa chay warmi sajra imasta ruwasqanmanta may llakisqa kashasqanta, sajra ruwayninmanta pesachikusqanta ima yacharqa. Repararqataj mana munakuywanchu parlapayajtin astawan llakikunanta. Chayrayku chay warmita allin imasta ruwasqanmanta allinta ruwasqanta nerqa, perdonarqa ima. Chantapis Jesusqa, chay warmiwan parlasqanta mana allinpaj qhawaj fariseowan kʼachallamanta parlarqa (Luc. 7:36-48). Jehová jina kʼacha kanapaj, ¿imatataj ruwasunman? Apóstol Pablo nerqa: “Señorpa kamachenqa mana churanakojchu kanan tiyan, manachayqa tukuypaj kʼacha”, nispa (2 Tim. 2:24). Chaykunapi rikukuspaqa imaynachus wajkuna kashasqankupi, chantá nisqanchejwan imaynachus kanankupi ima tʼukurinanchej tiyan. Ajinallamanta paykunawan kʼachas kasunchej, Jehová jinataj ruwasunchej (Pro. 15:28). w15 15/5 4:8, 9

Hermanosninchej llakiypi kashajtinku, sonqochasunman, Dioswan masichakunankupaj yanapasunman, imatachus necesitasqankutapis qorisunman (Pro. 17:17). Sutʼincharinapaj, jatun llakiykuna kajtin hermanosninchejta yanapasunman. Uj viuda hermanaj wasinta sinchʼi wayra thuñirparerqa. Payqa hermanos wasinta allinchaypi yanapasqankurayku, Jehovaj testigon kasqanmanta may agradecesqa kasharqa. Chantapis hermanos necesitasqanta qosqankurayku, Diosta yupaychanallanpajpuni kallpachasqankuyrayku ima agradecekullarqataj. Uj soltera hermanapis sinchʼi wayra wasinta thuñirparisqanrayku ajinallapitaj rikukorqa. Hermanos yanapasqankumanta imayna agradecesqachus kasqanta mana niyta atispapis, “¡gracias, Jehová Diosníy!”, nispa nerqa. Tukuypis mayta agradecekunchej hermanosninchej ajinata yanapawajtinchej. Astawanpis Jehovata, Jesusta agradecekunchej, mana saqerpariwasqanchejmanta. w15 15/6 1:17

Bibliaqa llimphu sonqowan tukuyta qhawananchejta yuyaychawanchej. Uj casarasqa hermanoqa, munakuyninta warmillanman rikuchinan tiyan. Uj soltero hermanopis piwanchus casarakonqa chayllaman munakuyninta rikuchinan tiyan. Wakin runasqa, yuyanku mana llankhanakuspa, coqueteanakuy mana juchachu kasqanta. Chaywanpis uj qhariwan uj warmiwan coqueteanakuspaqa, aychaj sajra munayninta rijchʼarichiyta qallarinkuman, jinamantataj khuchichakuy juchapi urmankuman. Ajinapi ashkha runas rikukorqanku, noqanchejpis ichá ajinapi rikukullasunmantaj. Josemanta mayta yachakusunman. Patronninpa warmenqa payta munapayaspa nerqa: “Jamuy, noqawan puñuykunki”, nispa. Josetajrí mana munarqachu. Chayraykutaj chay warmeqa sapa pʼunchay Joseta parlapayaj paywan puñuykunanta yuyaspa (Gén. 39:7, 8, 10). Chaywanpis Joseqa chay warmiwan mana ni imata munarqachu, nitaj uyarejllapis tukojchu. w15 15/6 3:10, 11

Diosqa munan hermanosninchejpi yuyananchejta, paywan allinpi kanankupi ima. Chaytataj rikuchisunman contranchejpi juchallikojtinku perdonaspa. Imaraykuchus hermanosninchejqa contranchejpi mana jatun juchastachu ruwanku. Hermanosninchejta perdonaspaqa paykunata munakusqanchejta, Jehová Diosman perdonawasqanchejmanta may agradecesqa kasqanchejta ima rikuchinchej (Efe. 4:32). Juchasapas kasqanchejrayku, ichapis wakin kutis hermanosninchejta mana perdonayta atillasunchu (Lev. 19:18). Uj hermano contranchejpi juchallikusqanmanta wajkunaman willasunchej chayqa, ichapis paykunaqa noqanchejman kutikuwasunchej, hermanoj contranpitaj parlanqanku. Chaytaj congregacionta tʼaqanachinman. Ajinata ruwasunchej, nitaj chay chʼampayta allinchanapaj kallpachakusunchu chayqa, Jesús kausayninta qosqanta pisipaj qhawachisunman (Mat. 18:35). Wajkunata mana perdonasunchu chayqa, noqanchejtapis Jehová mana perdonawasunchu (Mat. 6:14, 15). Jehová perdonanawanchejta munanchej chayqa, Paypa contranpi mana juchallikunachu (1 Juan 3:4, 6). w15 15/6 5:9-11

Diosqa llajtan ujchasqa kananpaj, sonqo tiyasqa kananpaj ima yanapakunanchejta saqewanchej. ¿Imaynatá yanapakusunman? Sonqo kʼajaywan runasman Bibliamanta willamuspa, yachachispa ima. Runasta Jehovaj testigosnin kanankupaj yanapaspaqa, Diospa llajtan ashkhayananpaj yanapakushanchej (Isa. 26:15; 54:2). Diospa llajtan ujchasqa, sonqo tiyasqa kananpaj ima, sumaj cristianos kanapaj sapa pʼunchay kallpachakuspa yanapallasunmantaj. Ajinata ruwajtinchejqa, Diospa llajtanman runas yaykuyta munanqanku. Imaraykuchus runasqa Diospa llajtanman yaykuyta, Diosmanta, Jesusmanta ima yachakuyta munanku, mana Bibliamanta sumajta yachakusqanchejraykuchu, manaqa Bibliaj nisqanman jina kausakusqanchejta rikusqankurayku. Jesuswan, Jehovawanqa maytachá kusikunku ujchasqas, sonqo tiyasqas kausakusqanchejmanta. Noqanchejpis kusikullanchejtaj Diospa llajtan ujchasqa, sonqo tiyasqa kananpaj yanapakusqanchejmanta. Astawantaj kusikusunchej kay Jallpʼata uj paraisoman tukuchispa. w15 15/7 1:18-20

Jehovatajrí, sapa ujta saqewanchej pitachus Kamachejninchejta jina ajllakunata. Chayrayku tapurikunachej: “¿Sumaj kamachej kasqanta yachasqayraykuchu Jehovata kasukuni? ¿Sumajtachu yachani Diospa gobiernollan kay pachamanta chʼampaykunata chinkachinanta? Chayri, ¿yuyanichu runas sapallankumanta allinta kamachinakunankuta?”, nispa. ¿Imatá kutichiwaj pillapis mayqen partidollamantapis chayri mayqen organizacionllamantapis imatachus yuyasqaykita tapurisojtin? Chay organizaciones runaj allinninta maskʼajtinkupis, runasta yanapayta munajtinkupis, Diospa gobiernollan kay pachamanta chʼampaykunata, sajra imastawan chinkachenqa. Chayrayku Jehovallapi atienekunchej. Mana ajinata ruwasunmanchu chayqa, congregación ukhupi tʼaqanakuy kanman. w15 15/7 3:7, 8

Jehová Diospa ruwasqasninta qhawarispa, ¿reparayta atisunmanchu munakuwasqanchejta? Arí, Jehová Diospa ruwasqasninta qhawarispaqa, mayta munakuwasqanchejta reparayta atisunman (Rom. 1:20). Sutʼincharinapaj, Jehová Diosqa kusisqa kausananchejpaj kay Jallpʼata tukuy imayojta ruwapuwarqanchej. Chantapis imaymana poqoykunata mikhunanchejpaj churapuwanchej (Ecl. 9:7). Jehovaqa imaynatachus ruwawasqanchejpi munakuyninta rikuchillawanchejtaj. Payqa imaymana ruwaykunata ruwananchejpaj yuyayniyojta ruwawarqanchej. Chayrayku chaykunata ruwaspaqa mayta kusikunchej (Ecl. 2:24). Chantapis kay Jallpʼaman mirayninchejwan juntʼanapaj, llankʼanapaj, challwasta, pʼisqetusta, tukuy ima kausajkunatawan qhawanapaj ruwawarqanchej (Gén. 1:26-28). Chantá ruwallawarqanchejtaj Pay jina kʼacha kaykunasta rikuchinapaj (Efe. 5:1). w15 15/8 1:4, 5

Sutʼita rikunchej Bibliaj profeciasnin juntʼakushasqanta, tukukuy pʼunchay tumpamantawan chayamunanta ima. Suyashanchejtaj Apocalipsis 17:16 nisqanman jina tumpamamntawan “chunka wajras” nisunman kamachejkuna, chantá phiña animal ima llulla religionespa contrankupi sayaykunankuta (Apo. 17:16). Chayrayku mana allinchu kanman yuyananchej chay imas kananpaj unaytaraj suyana kasqanta. Chantapis mana qonqanachu Jehová Dios chay kamachejkunata llulla religionespa contrankupi sayaykunankupaj tanqayta atisqanta. Chaytaj ima ratollapis, usqhayllatataj kanqa (Apo. 17:17). Tumpamantawan Satanaspa sajra pachan chinkachisqa kanqa. Chayrayku Jesuspa nisqanta kasukuna, mayqentachus kay pʼunchaypaj versiculopi tarinchej (Apo. 16:15). Wakichisqallapuni kanachej, Diostataj sirvinallapuni. Wakichisqa kajkunata, rijchʼarisqa kajkunata salvananpitaj atienekuna (Isa. 64:4). w15 15/8 2:17

Tukuywan kʼacha kayta munaspapis, Jehová Diosta mana kasukojkunawan mana masichakunanchejchu tiyan. Chayrayku mana allinchu kanman uj soltero hermano chayri uj soltera hermana Diosta mana yupaychajwan rejsinakunanpaj llojsinan. Imaraykuchus Diospa amigon kay aswan sumaj, Payta mana yupaychajkunawan amigos kanamanta nisqaqa. Amigosta ruwakuna Diospa kamachiykunasninman jina kausakojkunallawan. Sajra runaswan masichakojkunaqa, jatuchaj llakiykunapi rikukunku. Ajina karqa israelitaswan (Éxo. 23:24, 25). Ashkha israelitas Diosta mana kasukorqankuchu, niñataj cheqa sonqoschu karqanku (Sal. 106:35-39). Chayrayku, ¿imapitaj rikukorqanku? Jehová paykunata qhesacharqa, cuentankumantataj cristiana congregacionta ajllarqa llajtan kananpaj (Mat. 23:38; Hech. 2:1-4). w15 15/8 4:7, 8

Jehovaqa imatapis sumajta ajllanapaj sonqo yuyayniyojta ruwawarqanchej. Chaytaj imachus allin imatajchus mana allin kasqanta reparanapaj yanapawanchej. Bibliaj nisqanman jina sumaj yachachisqa kajtintaj mana sajra imasta ajllasunchu. Sonqo yuyayniyojta Jehová ruwawasqanchejqa munakuwasqanchejta, kusisqas kausakunanchejta munasqanta ima rikuchin. Diospa leyesninta mana rejsej runaspis allin imasta ruwanku, sajra ruwaykunatataj chejnikunku (Rom. 2:14, 15). Chaytataj sonqo yuyayninku imaschus allin, imatajchus mana allin kasqanta reparachisqanrayku ruwanku. Runas mana sonqo yuyayniyojchu kankuman chayqa, kay pachaqa astawan sajrayanman. Chayrayku Jehovaman mayta agradecekuna sonqo yuyayniyojta ruwawasqanchejmanta. w15 15/9 2:1, 2

Apóstol Juanqa, chay nisqanwan Jehová mayta munakuwasqanchejpi, imaynatachus chay munakuyninta rikuchiwasqanchejpi ima yuyanapaj yanapawarqanchej. Chaypi yuyasunchej chayqa, Jehovawan may sumaj amigos kasunchej, astawantaj payta munakusunchej. Llakikunapaj jina wakin runasqa mana creenkuchu Dios munakuwasqanchejta. Yuyankutaj noqanchejmanta mana dakusqanta, kamachiykunallata churasqanta, mana kasukojkunatataj castigasqanta ima. Wakin religionesqa Diosninchej sajra kasqanta yachachinku. Chayraykutaj ashkha runas Diosta mana munakuyta atisqankuta yuyanku. Wakin runastajrí allin kajta, mana allin kajta ruwajtinchejpis Dios munakunallawanchejtapuni yuyanku. Noqanchejtajrí Bibliata ukhunchaspa Diospa kʼacha kaykunasninmanta munakuynin aswan ñaupajpi kashasqanta, Jehová mayta munakuwasqanchejrayku Wawanta noqanchejrayku wañunanpaj kachamusqanmanta ima yachakunchej (Juan 3:16; 1 Juan 4:8). w15 15/9 4:1, 2

Pablo chayta nejtinpis, Jehovaj kʼamiynintaqa japʼikunanchejpuni kasqanta nillarqataj. Ajinamanta cheqan kajta ruwayta yachakusunchej, sonqo tiyasqataj kausakusunchej. Jehová niwasqanchejta kasukusunchej, kausayninchejtapis cheqanchasunchej chayqa, payta munakusqanchejta rikuchisunchej. Kay pachamanta runasqa jatunchakunku, munaynillankutataj maskʼanku. Wajkuna kʼamejtinku chayri imatachus ruwanankuta nejtinkupis phiñakunku. Wakinkunataj mana tukuy sonqochu japʼikunku. Chaywanpis Bibliaqa mana chay runas jina kanapaj yuyaychawanchej. Yachakunanchejtaj tiyan imatachus Jehová ruwananchejta munasqanta, kasukuyta ima (Rom. 12:2). Jehovaqa necesitashajtinchejpuni llajtannejta yuyaychawanchej. Sutʼincharinapaj, Jehovaqa yuyaychawanchej hermanosninchejta chayri uj hermanasninchejta allin yuyaywan qhawananchejta, sumaj amigosta ajllananchejta, sonqota kusirichinapaj ima ruwaytapis sumajta ajllananchejta ima. Jehovaj kʼamiyninta japʼikuspa, kusichinapaj jina imatapis ruwaspaqa, yuyaychawasqanchejmanta agradecesqa kasqanchejta, munakusqanchejta ima rikuchinchej (Juan 14:31; Rom. 6:17). w15 15/9 5:13, 15

Sinchʼi creeyniyoj kayta munanchej chayqa, Jehová Diosmanta espíritu santota mañakunanchej tiyan. Imaraykuchus creeyniyoj kayqa espirituj poqoyninmanta jamun (Gál. 5:22, 23). Chayrayku Jesusqa espíritu santota mañakunanchejta nerqa. Payqa sutʼita niwarqanchej: “Janaj pachapi kaj Tataykichejqa Espíritu Santota qonqa mañakojkunaman”, nispa (Luc. 11:13). Sinchʼi creeyniyoj kaspañapis, sinchʼi kanallanpajpuni kallpachakuna tiyan. ¿Imaraykú? Imaraykuchus creeyqa, uj nina lauray jina. Qallariypeqa sinchʼita laurarinman. Chaywanpis niña llantʼata churajtinchejqa ninaqa wañurparinman, brasasninpis ushphallamanña parapunman. Creeyninchejwanpis kikillantaj kanman. Sinchʼi creeyniyoj kanallapajpuneqa Bibliata sapa pʼunchay leenanchej tiyan, ukhunchananchej ima tiyan. Ajinamantataj Jehovata astawan munakusun, Bibliaj nisqanman jinataj kausakusun, creeyninchejpis astawan sinchʼiyanqa. w15 15/10 2:6, 7

Ñawillanchejwan leenamantaqa, chhichispa jina leenanchej tiyan. Científicos nisqankuman jina, ajinata leeyqa imatachus leesqanchejta astawan yuyarikunapaj yanapawanchej. Jehová Diosninchejqa ruwawasqanchejrayku chaytaqa yacharqaña. Chayrayku Josueman, Leymanta librota “unancha[nanta]” chayri chhichispa jina leenanta kamacherqa (Jos. 1:8). Bibliata ajinata leeyqa, mana waj imaspi yuyanapaj, leesqanchejtataj yuyarikunapaj yanapawasun. Wakin kutisqa imatachus ukhunchashasqanchejpi tʼukuriyta mana atillanchejchu saykʼusqa chayri ancha chʼajwa kasqanrayku. Chayrayku allin kanman leesqanchejpi tʼukurinanchej samarishaspa, chʼinnejpi kashaspa ima. Rey Davidpis chʼisisnin camanpi kashaspa tʼukuriyta yachaj (Sal. 63:6). Jesuspis tʼukurinanpaj, Jehová Diosmanta mañakunanpaj ima chʼin lugaresman riyta yachaj (Luc. 6:12). w15 15/10 4:4, 6, 7

Uj pʼunchay Galileamanta runas Jesusta maskʼasharqanku (Juan 6:22-24). Jesustajrí imachus runaspa sonqonkupi kasqanta yachasqanrayku sut’ita repararqa chay runasqa mana yachachisqanta uyarinankupajchu maskʼashasqankuta yacharqa, manaqa mikhunata mañakunankupaj. Chayrayku chay runasta pacienciawan kʼamerqa, mana ajina runas kanankupajtaj imatachus ruwanankuta sutʼincharqa (Juan 6:25-27). Wawasniykichej yuyasqankuta mana yachayta atispapis, imaynachus kashasqankuta entiendenaykichejpaj kallpachakuwajchej. Sutʼincharinapaj, ashkha tatasqa willaypi samariyta yachanku wawasninku refrescota tomarinankupaj chayri imallatapis mikhurinankupaj. Chayrayku tapurikuwajchej: “¿Imataj wawasniyman gustan? ¿Willaychu chayri samariychu?”, nispa. Wawasniykichejman willayman llojsiy mana gustasqanta reparaspaqa, willayman tukuy sonqo riyta munanankupaj jina imatapis ruwawajchej. Allin kanman willaypi parlarinankupaj jinalla imatapis yachachinaykichej. w15 15/11 1:10, 11

Munakuyniyoj Diosninchej Jehovaqa cheqa sonqo kamachisninpaj allin kajtapuni ruwan. Bibliaqa nillantaj: “Payqa tukuy waqayta ñawisninkumanta pichanqa, manañataj wañuy kanqachu, nitaj waqaypis, nitaj qhapariypis, nitaj nanaypis”, nispa. Arí, tukuy ima sajra kajqa chinkanqa. Biblia jinata nin: “Cheqan runata, llimphu kawsayniyoj runatawan reparay; paypajqa allin kawsay kanqa. Mana kasukoj runasrí pampachasqa kanqanku, juchasapastaj tukuchisqa kanqanku”, nispa (Sal. 37:37, 38). Jehová Dios llimphu kausayniyoj runata jina qhawanawanchejta munanchej chayqa, tukuy ima nisqanta kasukunanchej tiyan, chantá Payta, Jesusta ima rejsinanchej tiyan (Juan 17:3). Chantapis kay sajra pacha tumpamantawan chinkachisqa kananmanta mana iskayrayananchejchu tiyan, imaraykuchus “Diospa munayninta ruwaj[lla], wiñaypaj kawsanqa” (1 Juan 2:17). Kay pachaj tukukuynin qayllitapiña kasqanrayku, Diosta kasukunanchej, paypitaj suyakunanchej may sumaj (Sal. 37:34). w15 15/11 3:11, 12

Diospa llajtanqa sumaj willaykunata tukuy runasman imaymanamanta willashan. Chaytaj may sumaj karqa Jallpʼantinpi pisi willajkunalla kashajtinku. Sutʼincharinapaj, unayqa periodicosnejta willakoj karqa. Sapa semanataj hermano Russellqa noticiasta rikuchej empresaman Bibliamanta uj umallirichiyta apachej. Chay noticiasta rikuchej empresataj chay umallirichiyta Canadapi, Europapi, Estados Unidospi kaj periodicosman apachej. Kay 1913 watapaj, hermano Russellpa umallirichiykunasnenqa 2.000 periodicospi llojserqa, chaytataj 15 millones runas jinataj leej kanku. Chantapis radionejta willayqa manchay sumajllataj karqa. Kay 16 de abril de 1922 watapi hermano Rutherfordqa ñaupaj kutirayku radionejta umalliricherqa. Chay umallirichiytataj 50.000 runas jina uyarerqanku. Pisi tiemponmantaj WBBR nisqa radionejta willakorqa, chay radiotaj noqanchejpata karqa. Kay 24 de febrero de 1924 watapitaj ñaupaj kutirayku chay radionejta willakorqa. w15 15/11 5:10, 11

¿Imaynatá Jehová munayninta juntʼananpaj imatapis chayri pillatapis imallamanpis tukuchiyta atin? Sutʼincharinapaj, Jehová Diosta Noeta arcata ruwajman tukucherqa, Bezaleltataj uj sumaj herreroman. Chantapis Gedeonta sumaj maqanakoj runaman tukucherqa, Pablotataj mana manchachikoj misioneroman. Cheqamantapuni Diospa sutin imachus niyta munasqanqa may sumaj. Chayrayku Traducción del Nuevo Mundo nisqa Bibliata Ruwaj Comisionpi llankʼaj hermanosqa, Diospa sutinta mana orqhorqankuchu, astawanpis maychus kananman churaykaporqanku. Traducción del Nuevo Mundo nisqa Biblia 130 kuraj parlaykunapi tiyan, chay Bibliaspi Diospa sutin rikhurisqanqa, Diospa sutinta jatunchan (Mal. 3:16). Waj Bibliasta tijrachejkunaqa Diospa sutinta churanankumanta “Señor” palabrata chayri suyunkupi ima diostachus yupaychanku chaypa sutinta churanku. Chayrayku Diospa Llajtanta Kamachejkunaqa, tukuy runas parlayninkupi Bibliayoj kanankuta munanku. w15 15/12 2:7-9

Jehovaqa atiyninwan wakin runasta onqoykuchiyta atin. Sutʼincharinapaj, Egiptoj ujnin reyninta, Moisespa hermananta ima uj onqoywan castigarqa (Gén. 12:17; Núm. 12:9, 10; 2 Sam. 24:15). Israelitastataj mana kasukusqankurayku ‘unaypaj manchay nanaykunawan, millay onqoykunawan’ ima castigarqa (Deu. 28:58-61). Chaywanpis Jehovaqa kamachisninta sanoyachiyta aterqa, manataj onqonankutapis saqerqachu (Éxo. 23:25; Deu. 7:15). Sutʼincharinapaj, Jobta onqoyninmanta sanoyacherqa, Jobqa sinchʼi onqosqa kasqanrayku wañupuyta munarqa (Job 2:7; 3:11-13; 42:10, 16). Jesuspis Jehová jinallataj runasta onqoyninkumanta sanoyachiyta atin. Kay Jallpʼapi kashaspa lepra onqoyniyojkunata, suchusta, ciegosta, tʼuku onqoyniyojkunata ima sanoyacherqa (Mat. 4:23, 24; Juan 9:1-7). Chay milagrosta ruwasqanqa, paraisopi imatachus ruwananta rikuchiwanchej. w15 15/12 4:3, 4