Julio

¿Ima ninayantaj chay? Pabloqa mana rejsisqa runaswan kʼachas kananchejta nisharqa. Ichapis kayqa imatachus Abraham, Lot ima ruwasqankuta yuyarichiwanchej. Paykunaqa forasterosta nisunman mana rejsisqa runasta wasinkuman wajyarikorqanku, chantaraj yacharqanku chay runas ángeles kasqankuta (Gén. 18:2-5; 19:1-3). ¿Imaynatataj wajyarikoj kasqanchejta rikuchisunman? Hermanosninchejta wasinchejman wajyarisunman mikhurinapaj, purajmanta kallpachanakunapaj ima. Chantapis congregacionninchejta waturej hermanota, warminta ima mana allinta rejsispapis, congregacionninchejta waturishajtinku wasinchejman wajyarisunman (3 Juan 5-8). Chaypajtaj mana ashkha mikhunatapunichu waykʼunanchej kanqa, nitaj ashkha qolqetapunichu gastananchej kanqa. Astawanpis purajmanta kallpachanakuyta munanchej, nitaj jatunpaj qhawachikuytachu maskʼanchej. Chantapis hermanostaqa wasinchejman wajyarinchej mana wasinkuman wajyarinawanchejta suyaspachu (Luc. 10:42; 14:12-14). Ashkha ruwanasniyoj kaspapis, ni jaykʼaj wajyarikuyta qonqanachu. w16.01 1:11, 12

Jehová Diosqa tukuy ajllasqa kajkunaman espíritu santonta qon. Chay espíritu santotaj janaj pachaman rinankupaj ajllasqa kasqankuta sutʼita reparanankupaj yanapan. Chayrayku Pablo nerqa Diospa espíritu santonqa “herencian[koj] señan” chayri garantía kasqanta, aswan qhepaman janaj pachapi wiñaypaj kausakunankupaj, manataj kay pachapichu (2 Cor. 1:21, 22; 5:5). Chay cristianoqa janaj pachaman rinanpaj wajyasqa kasqanta sutʼita yachan. Chaywanpis Jehovaman cheqa sonqo kajtillan “kawsay pilluta” japʼenqa. Pedro nerqa: “Chayrayku hermanos, may kʼuchi kaychej wajyasqas, ajllasqastaj kasqaykichejpi sumajta sayanaykichejpaj. Sichus chay imasta ruwankichej chayqa, mana jaykʼajpis urmankichejchu. Chay jinamanta, Señor Jesucristo Salvawajninchejpa wiñay reinonman may kusiypi pusaykusqa kankichej”, nispa (2 Ped. 1:10, 11). Chayrayku sapa uj ajllasqa cristiano Jehovata yupaychanallanpajpuni kallpachakunan tiyan. Cielopi tiyakunanpaj wajyasqa kajtinpis, cheqa sonqo kajtillan cieloman renqa (Heb. 3:1; Apo. 2:10). w16.01 3:6, 7

Mana allinchu kanman pillatapis jatunchananchej, ni ajllasqa cristianostapis. Bibliaqa ancianospa creeyninkumanta yachakuna kasqanta niwanchej, jinapis mana niwanchejchu paykunaj chayri mayqen runaj qhepantapis rinanchejta (Heb. 13:7). Cheqamanta Bibliaqa noqanchej ukhumanta wakinta “aswan allinpaq qhawa[nanchejta]” nin, mana ajllasqa kasqankuraykuchu, manaqa Jehová Diosninchejmanta willaspa, yachachispa mayta llankʼasqankurayku (1 Tim. 5:17, MR). Ajllasqa cristianosta mayta jatunchaspaqa, ichá pʼenqachisunman. Astawantaj ichá jatunchakunankupaj tanqashasunman (Rom. 12:3). Ni mayqenninchejpis Cristoj wauqesninta creeyninkupi urmachiyta munanchejchu, ¿icharí? (Luc. 17:2). w16.01 4:9

Uj amigoqa may valorniyoj. Chayta uj plantitawan kikincharina. Uj plantita wiñananpaj, tʼikarinanpaj imaqa sumajta qhawana, qarpana ima. Ajinallataj amigos kaywanpis. Pillawanpis amigosllapuni kanapajqa mayta kallpachakunanchej tiyan. Abrahamqa Jehová Diospa amigon kasqanta may jatunpaj qhawarqa, kallpachakorqataj amigollanpuni kananpaj. ¿Imaynatá chayta ruwarqa? Abrahamqa Jehová Diosta kasukunanpaj, jatunpaj qhawananpaj ima mayta kallpachakullarqapuni. Canaanman familianwan, kamachisninwan ima rishaspapis tukuy ima ruwasqanpi Jehová yanapananta saqerqa. Chantá Jehovaqa Isaac nacekunanpaj uj wata faltashajtin, Abrahamman wasinpi tukuy qharista circuncidananta kamacherqa. Chaypachaqa Abraham 99 watasniyoj kasharqa. ¿Imatataj Abraham ruwarqa Jehová kamachejtin? ¿Iskayrayarqachu? Chayrí, ¿imatapis maskʼarqachu mana kasukunanpaj? Mana. Astawanpis Jehová Diospi atienekorqa, “chay kikin pʼunchaypacha[taj]” wasinpi kaj tukuy qharista circuncidarqa (Gén. 17:10-14, 23). w16.02 1:9, 10

Uj wawaqa jovencitoña kaspa imachus allin, imatajchus mana allinchu kasqanta reparayta atinman, imaynatachus Diosman kausayninchejta qonatapis entiendeyta atinman. Chayrayku uj joven, sumajta tʼukuriyta yachanña, Diosmanpis kausayninta qonña chayqa, may sumaj kanman bautizakunan (Pro. 20:7). ¿Imaynatá reparanchej uj runa sumajta tʼukuriyta yachasqanta? Sumajta tʼukurej runaqa “imachus allin, imatajchus mana allin” kasqanta sutʼita reparan, nitaj ashkha watasniyojpunichu kanan tiyan (Heb. 5:14). Sumajta tʼukurej runaqa imachus allin kajta sutʼita reparaytawan, chayta tukuy sonqo ruwan. Chantapis sajra imasta mana ruwananpaj kallpachakun, nitaj necesitanchu pillapis “allin kajta ruway” ninanta. Qan bautizakunki chayqa, allin kajta ruwanaykipaj kallpachakunayki tiyan, mana tatasniykiwan chayri waj runaswan kashaspapis (Fili. 2:12). w16.03 1:4, 5

Jonatanqa tʼukulla kasharqa. Imaraykuchus tatan Saulpa ñaupaqenpi mana manchachikoj waynuchitu Goliatpa “uman aysarisqa” kasharqa. Chay waynuchitoqa David karqa, Goliattataj wañucherqa (1 Sam. 17:57). Jonatanqa sutʼita yacharqa Davidwan Jehová kashasqanta, chaymantapachataj Davidwan sumaj amigos karqanku. Purajmanta cheqa sonqo kanankupajtaj uj tratota ruwarqanku (1 Sam. 18:1-3). Jonatanqa tukuy kausayninpi Davidta mana wasancharqachu. Jonatanqa Davidta munakullarqapuni Saulpa cuentanmanta rey kananpaj Davidta Jehová Dios ajllajtinpis. Chantá Saúl Davidta wañuchinanpaj maskʼajtinpis, Jonatanqa Davidmanta llakikorqa. Yacharqataj David chʼin pampapi Hores qayllapi pakakushasqanta, chayrayku chay lugarman rerqa Jehovapi atienekunallanpajpuni kallpacharej. Jonatán Davidman nerqa kay pʼunchaypaj versiculopi nisqanta (1 Sam. 23:16). w16.02 3:1, 2

Jehovawan, Jesuswanqa tukuy imata ruwayta qallarisqankumantapacha khuska llankʼarqanku. Ajinallatataj kay Jallpʼapi Diospa ñaupa kamachisninpis, imatachus Jehová ruwanankuta kamachisqanta khuska ruwarqanku. Sutʼincharinapaj, Noeqa, familianwan khuska arcata ruwarqa. Aswan qhepamantaj israelitaspis Dioswan tinkukuna toldota khuska ruwarqanku, wajnejman rinankupajpis khuska oqharej kanku, chayaspataj khuskallataj sayachej kanku. Templopitaj israelitasqa Jehovata jatunchanankupaj platilloswan, arpaswan, waj imaswan ima khuska takej kanku. Diospa kamachisnenqa tukuy chay imasta ruwaj kanku purajmanta yanapanakusqankurayku (Gén. 6:14-16, 22; Núm. 4:4-32; 1 Cró. 25:1-8). Apostolespa tiemponpipis cristianosqa purajmanta yanapanakorqanku. Apóstol Pabloqa chay cristianos imaymana ruwanasniyoj kajtinkupis, imaymana imasta ruwayta atejtinkupis Jesuspa qhepanta risqankurayku ujchasqas kashasqankuta nerqa. Pabloqa chay cristianosta uj cuerpowan kikincharqa, cuerpojtaqa ashkha imasnin tiyan, chaykunataj khuska llankʼanku (1 Cor. 12:4-6, 12). w16.03 3:1, 2

Ñaupa tiempopi mana judío kajkunaqa, Jehovata sirviyta munaspa Israel llajtaman rinanku karqa (1 Rey. 8:41-43). Chaywanpis aswan qhepaman, Jesusqa yachachisqasninman kay pʼunchaypaj textopi nisqanta kamacherqa. Nerqataj runasta paykuna maskʼaj rinanku kasqanta. Pentecostés 33 watapi Jehovaqa sumaj willaykuna pachantinpi willakunanta munasqanta sutʼita rikucherqa. Chay pʼunchaypeqa, mosoj cristiana congregacionmanta 120 cristianos Diospa “espíritu santonwan juntʼasqa karqanku”. Jinapi chay cristianosqa judiosman, judiosman tukojkunaman, waj llajtayojkunaman ima waj parlaykunapi Diosmanta parlayta qallarerqanku (Hech. 2:4-11). Chantá samaritanosmanpis Diosmanta willayta qallarerqanku. Kay 36 watapitaj mana judío kajkunamanpis willayta qallarillarqankutaj. Sutʼita rikunchej cristianosqa pachantinpi willananku kasqanta. w16.03 4:12

Diospa kamachisnenqa sumajta yachanku imapis allinta ruwakunanpaj sumaj wakichisqa runas necesitakusqanta. Abrahamqa sumaj wakichisqa “kamachisninta tanta[ykorqa]”, Lotta enemigosninmanta kacharichinanpaj, chay kamachisnenqa mayta maqanakuspa atiparqanku (Gén. 14:14-16). Rey Davidpa tiemponpipis, takejkuna Jehovata jatunchanankupaj sumaj wakichisqas karqanku (1 Cró. 25:7). Noqanchejpis, Satanaswan, pachanwan ima maqanakushanchej (Efe. 6:11-13). Diosta yupaychanapaj, willamunapaj ima mayta kallpachakuna tiyan (Heb. 13:15, 16). Unay Diospa kamachisnin jina, Diosta yupaychaypi allin rinawanchejpaj wakichisqa kana tiyan. Jehovataj ancianosta kamachin hermanosta wakichinankuta. Uj ancianoqa, congregacionpi wakin ruwanasta uj hermanoman yachachinanpaj, ichá Bibliaj wakin versiculosninta leeriponqa. Chaytaj hermanota yanapanqa, ima ruwaytapis japʼispa, sumajta juntʼananpaj (1 Tim. 4:6). w15 15/4 2:1, 2

Chayqa mana ninayanchu Supay runasta wañuchisqanta. Chantá, ¿imaraykutaj Biblia nin “wañuypa atiyninta” japʼishasqanta? Imaraykuchus Satanás runasta tanqan chejninakunankupaj, wañuchinakunankupaj ima. Chantapis tukuy juchallikunchej, wañunchej ima, Supaywan Eva chʼaukiyachikusqanrayku, Diosta Adán mana kasukusqanrayku ima (Rom. 5:12). Chayrayku ninchej Kuraj Supay wañuypa atiyninta japʼishasqanta. Jesusqa Satanás “runa wañuchi[...]” kasqanta nerqa (Juan 8:44). Arí, Satanasqa may atiyniyoj enemigonchej. Satanasman churanakuspaqa, paywan kajkunamanpis churanakullanchejtaj, imaraykuchus paykunaqa Diosman churanakunku. Satanaswan kajkunamanta wakenqa ángeles kanku, paykunatataj supaykuna sutiwan rejsikun (Apo. 12:3, 4). Chay supaykunaqa, unaytaña runasmanta aswan atiyniyoj kasqankuta rikuchinku runasta ñakʼarichispa (Mat. 8:28-32; Mar. 5:1-5). Ni jaykʼaj qonqanachu Satanás, supaykunapis atiyniyoj kasqankuta (Mat. 9:34). Jehovaj yanapaynillanwan Satanasta atipayta atisun. w15 15/5 1:6, 7

Pillawanpis qhariwarmi jina puñuykuyta munanki chay, ¿imatá ruwawaj? “Jucha ruwayman” tanqasqa kayta atisqaykita ama qonqaychu (Rom. 7:22, 23). Jehovamanta kallpata mañakuy (Fili. 4:6, 7, 13). Amataj imatapis chay juchaman urmachisunanpaj jina ruwaychu (Pro. 22:3). Chay juchapi urmanapaj tanqasqa kashaspataj, usqhayllata qhesachay (Gén. 39:12). ¿Imatá Jesús ruwarqa Satanás juchaman urmachiyta munajtin? Imatachus Satanás qonanta nisqanwan mana chʼaukiyachikorqachu. Nitaj paypa nisqanpi tʼukurerqachu. Astawanpis usqhayllata “Diosmanta Qhelqasqapi nin”, nispa kuticherqa (Mat. 4:4-10). ¿Imatá Jesusmanta yachakunchej? Payqa Diospa Palabranta sumajta rejserqa, chayrayku Satanás urmachiyta munajtin, wakin versiculosta yuyarikorqa. Satanasta atipanapajqa, imaschá khuchichakuyman urmanapaj tanqawanchej chay imasta qhesachananchej tiyan. w15 15/5 2:15, 16

Jehová Diosqa may yachayniyoj kasqanrayku, imachus aswan qhepaman kananta yachan. Chaywanpis noqanchejqa, chayta mana yachanchejchu, jinapis Jehová Dios jina yachayniyoj kasunman. ¿Imaynamantá? Niraj ima ruwaytapis ajllashaspa, ruwasqanchejwan imaynachus kananchejpi, wajkuna imaynachus kanankupi ima yuyananchej tiyan. Sutʼincharinapaj, pillawanpis casarakunaykipaj rejsinakushanki chayqa, yuyarikuy paywan khuska kayta munasqaykita, qhariwarmi jina puñuykuyta munayniykipis yapakusqanta. Chayrayku tukuy atisqaykita kallpachakuy Jehovaj sonqonta mana nanachinaykipaj. Jehová Diospa yuyaychasqanta kasukuy. Payqa niwanchej: “Yuyayniyojqa sajra kajta rikuspa, pakakun; mana yuyayniyojrí sajraman chimpaykun, chantaqa ñakʼarin”, nispa (Pro. 22:3). w15 15/5 4:10, 11

Ajinapi rey David rikukorqa, Biblia paymanta parlaspa nin: “Kamachinan wasi altos patapi puriyachashaspataj, rikuykorqa uj may kʼachita warmita mayllarikushajta”, nispa. Payqa chay warmita qhawallarqapuni, chantapis chay warmipi yuyallarqapuni (2 Sam. 11:2). Chay warmi qosayoj kajtinpis, paywan kayta munarqa, chayraykutaj chay warmiwan puñuykorqa. Millay yuyaykunata qhesachananchejpajqa, Job jina ruwananchej tiyan, pay nerqa: “Noqa sonqoypi nikorqani, ni sipas solterallatapis munapayanayta”, nispa (Job 31:1, 7-10). Job jina, ajllananchej tiyan mana pitapis khuchichakuy yuyaywan qhawananchejpaj. Internetpi, revistaspi chayri waj imaspi, millay khuchichakuymanta fotos rikhurejtenqa mana qhawanachu. Ichapis reparanchej imallapipis yuyayninchejta allinchananchej kasqanta. Jina kajtenqa, usqhayllata chayta ruwana. Jehovata kasukusunchej chayqa, mana khuchichakuypi urmasunchu, ñaupaqenpipis llimphus kasunchej (Sant. 1:21-25). w15 15/6 3:12-14

Jesusqa Diosmanta imaynatachus mañakunata yachachishaspa, ajinata nerqa: “Amataj saqeychu juchaman urmanaykuta”, nispa. Jesustaqa bautizakusqanmanta pisi tiemponman, Diospa espiritun chʼinnejman pusarqa. ¿Imapaj? “Kuraj Supay atispaqa Jesusta juchaman urmachinampaj” (Mat. 4:1). ¿Imaraykutaj Jehová chayta saqerqa? Jehovalla Kamachej kasqanta rikuchinanpaj. Imaraykuchus Satanasqa, Adanwan Evawan Diosta mana kasukusqankurayku, Jehová Kamachinanpaj atiyniyoj kasqanta iskayrayacherqa. Satanás nerqa, Dios mana allintachu runasta ruwasqanta. Chantapis nillarqataj ni mayqen juntʼa runa juchaman tanqasqa kaspa Diosman cheqa sonqo kananta. Chantapis nillarqataj runas kusisqas kausakunankuta sapallankumanta kamachinakuspa (Gén. 3:4, 5). Chaywanpis Jesusqa Diosman cheqa sonqo karqa, Satanás llulla kasqantataj rikucherqa. Satanás imastachus iskayrayachisqanqa tumpamantawan sutʼinchakonqa. Chantá janaj pachapi, kay pachapi tiyakojkuna ima, yachanqanku Jehovalla sumaj Kamachej kasqanta. w15 15/6 5:12

Manchay ñakʼariy tiempoqa, tukuy llulla religionesta chinkachispa qallarenqa. Bibliaqa llulla religiones “Jatun Babilonia, Phisu Warmispa Maman” kasqanta nin (Apo. 17:5-7). ¿Imaraykutaj llulla religionesta phisu warmiwan kikinchan? Imaraykuchus chay llulla religionespi yachachejkunaqa, Diosman mana cheqa sonqoschu kanku. Jesusta, Reinonta ima yanapanankumantaqa, kay pachamanta kamachejkunata yanapanku. Chantapis Bibliaj yachachiykunasninta qhesachanku, astawan atiyniyoj kanankupaj. Paykunaqa mana ajllasqa cristianos jinachu Diosta llimphu sonqowan yupaychanku (2 Cor. 11:2; Sant. 1:27; Apo. 14:4). Chantá, ¿pitaj tukuy llulla religionesta chinkachenqa? Bibliaqa puka phiña animalpa chunka wajrasnin chinkachinanta nin. Chay phiña animalqa, Naciones Unidas nisqawan ninakun, chunka wajrasnintaj kay pachamanta tukuy kamachejkunawan ninakun, pikunachus Naciones Unidas nisqata yanapashanku. Biblia nin jinataj chay kamachejkunata llulla religionesta chinkachinankupaj Dios tanqanqa (Apo. 17:3, 16-18). w15 15/7 2:3, 4

Chayrayku Pabloqa paykunaman nerqa: “Ama qankuna ukhupi tʼaqanaku kachunchu, astawanqa allin ujchasqapuni kaychej, uj sonqolla, uj yuyayllataj”, nispa (1 Cor. 1:10, 11, 13). Kunanpis Pabloj yuyaychaykunasninta kasunanchej tiyan. Ni jaykʼaj congregacionpi tʼaqanakuy kananchu tiyan (Rom. 16:17, 18). Pabloqa ajllasqa cristianosman yuyaricherqa paykunaqa janaj pacha llajtayoj kasqankuta, kay pachaj imasninta mana maskʼanankuta ima (Fili. 3:17-20). Chantapis nillarqataj ajllasqa cristianosqa Diospa sutinpi, Cristoj sutinpi ima willanankupaj kachasqa kasqankuta. Waj suyuman kachasqa runaqa, chay suyoj politicanman, chʼampaykunasninman ima mana satʼikunchu. Ajinallatataj ajllasqa cristianospis kay pachaj chʼampaykunasninman, politicanman ima mana satʼikunkuchu (2 Cor. 5:20). Kay Jallpʼapi kausakuyta suyakoj cristianospis nillataj kay pachaj sajra ruwaykunasninman satʼikunkuchu. Astawanpis Diospa gobiernollanpi atienekunku. w15 15/7 3:9, 10

Kay versiculoj nisqanpi tʼukureyqa, Jehová mayta munakuwasqanchejpi, noqanchejmanta dakusqanpi ima atienekunapaj yanapawanchej (1 Ped. 5:6, 7). Bibliataqa jatunpaj qhawananchej tiyan, imaraykuchus Jehová chaynejta parlawanchej. Uj tata wawanwan sumajta parlarispaqa astawan munanakunku, purajmanta atienekunku ima. Jehová Diosta mana rikunchejchu, nitaj parlasqantapis uyarinchejchu. Chaywanpis Biblianejta parlawanchej. Chayrayku Bibliata leespaqa imatachus niwasqanchejta sumajta uyarinanchej tiyan (Isa. 30:20, 21). Ajinamanta Jehová yanapayta, jarkʼayta ima munawasqanchejta rikusun. Chantá astawan Paypi atienekusun, astawantaj rejsisun (Sal. 19:7-11; Pro. 1:33). w15 15/8 1:6, 7

Paraisopi kausayta suyakuspapis, Jehovata yupaychaspa astawan kusikusunchej. Tukuy runas Diospa sutinta jatunpaj qhawajtinku, Jehovata Kamachejninkuta jina kasukojtinku ima, imaynachus kausay kananpi tʼukurina (Mat. 6:9, 10). Maytachá kusikusunchej Jehovaj munayninman jina mana juchayoj runaslla kay Jallpʼapi kausakojtinku. Chantapis pisimanta pisi juntʼa runasman tukusunchej Jehovamantaj astawan qayllaykusunchej (Sal. 73:28). Jehová tukuy ima nisqanta juntʼananmanta mana iskayrayanchejchu. Imaraykuchus Bibliaqa Diospaj “tukuy ima atiku[sqanta]” niwanchej (Mat. 19:25, 26). Pabloqa wiñay kausayta japʼinanchejpaj mayta kallpachakunanchej kasqanta nerqa (1 Tim. 6:19). Chayrayku kausakusqanchejwan kay pachaj tukukuynin ima ratollapis chayamunanpi creesqanchejta rikuchinanchej tiyan. Mosoj pachapi kausakuyta munanchej chayqa, kunan wakichikunanchej tiyan chaypi kausakunapaj. w15 15/8 3:2, 3

Ashkha películas, revistas, libros, takiykunas, telepi chayri Internetpi rikhurej imasqa Diosmanta karunchawasunman. Imaraykuchus chaykunaqa Satanaspa sajra pachanpi atienekunapaj tanqawasunman, nitaj Jehovapi, nisqasninpi ima atienekunapaj yanapawasunmanchu. Chayrayku sumajta qhawarikunanchej tiyan. Ni jaykʼaj kay pachaj imasninta munapayanapaj tanqaj imasta leenachu, uyarinachu, nitaj qhawanachu (Tito 2:12). Satanaspa pachanmanta nisqaqa, Jehovaj llajtanqa wiñay kausayta japʼinapaj jina kausakunapaj yanapawanchej. Jehovaqa llajtannejta revistasta, folletosta, librosta, videosta, Internetpi jw.org nisqata ima qowanchej, chaykunataj Payta yupaychanallapajpuni yanapawanchej. Chantapis Diospa llajtanqa Jallpʼantinpi 110.000 kuraj congregacionespi Bibliamanta yachakunapaj tantakuykunata wakichin. Chay tantakuykunapi, jatuchaj tantakuykunapi ima yachakusqanchejqa Jehovapi, nisqasninpi ima atienekunapaj yanapawanchej (Heb. 10:24, 25). w15 15/8 4:9, 11

Noqanchejqa sonqonchejta yachachiyta munanchej, imachus allin imatajchus mana allin kasqanta reparananchejpaj. Chaypajqa Bibliamanta yachakuna, astawantaj Jehovaj leyesninta jatunpaj qhawana, allinninchejpaj kasqanpitaj atienekuna. Chayrayku apóstol Pablo nerqa: “Kay kamachisqaqa churasqa kashan cheqamanta munakuy kanampaj chʼuwa sonqomanta, mana juchachaj sonqo yuyaymanta, tukuy sonqo creeymantataj”, nispa (1 Tim. 1:5). Sonqo yuyayninchejta sumajta yachachisun, imatachus niwasqanchejtapis uyarisun chayqa, congregación ujchasqa kanallanpajpuni yanapakusun, Jehová Diostapis astawan munakusun, paypitaj atienekusun. Chantapis amigosnin kasqanchejta, kusichiyta munasqanchejta ima rikuchisunchej. Ajinamantataj imayna runachus kasqanchej sutʼi rikukonqa. w15 15/9 2:2, 3

Jehová Diosqa tukuy runasta ruwawarqanchej (Sal. 100:3-5). Chayrayku Bibliaqa Adán “Diospa churin” kasqanta nin (Luc. 3:38). Chantapis Jesusqa yachachiwarqanchej Jehová Diosmanta mañakushaspaqa ninanchejta: “Janaj pachapi kashaj Tatayku“, nispa (Mat. 6:9). Chayrayku imaynatachus uj kʼacha tata wawasninta munakun, ajinallatataj Jehovapis munakuwanchej. Wakin runastaqa wawas kashajtinku tatasninku mayta ñakʼaricherqanku. Chayrayku ichapis mana yuyayta atillankuchu uj tata munakuyniyoj kasqanta. Chaywanpis Jehovaqa mana ni jaykʼaj ñakʼarichiwasunmanchu. Ashkha tatas k’achas kajtinkupis ni pipis paymanta aswan sumaj tataqa kanchu (Sal. 27:10). Payqa mayta munakuwanchej, tukuy imaymanamantataj jarkʼawanchej. Munakuyninta astawan rikusunchej chayqa, astawan payta munakusunchej (Sant. 4:8). w15 15/9 4:3, 4

Jehová Diospi atienekusqanchejrayku, payta munakusqanchejrayku ima manaraj imatapis ajllashaspa yanapanawanchejta munanchej. Profeta Samuelpa tiemponpi, israelitasqa filisteoswan maqanakuspa atipachikusharqanku. Chay kutipi Diospi atienekunankumanta, imatachus ruwanankuta tapurinankumanta imaqa, Diospa arcanta chay maqanakuman aparqanku, Jehová paykunata yanapananta yuyaspa. Paykunaqa mana kallpachakorqankuchu imatachus Jehová yuyasqanta yachanankupaj. Astawanpis yuyasqankuman jinalla ruwarqanku. Chayraykutaj kinsa chunka waranqa israelitas wañuchisqas karqanku (Pro. 14:12). Chantapis filisteosqa chay maqanakupi Diospa arcanta japʼikaporqanku (1 Sam. 4:2-4, 10, 11). w15 15/9 5:16, 17

Creeyninchej sinchʼillapuni kananpajqa, mana qhepakunanchejchu tiyan niraj bautizakushaspa imastachus yachakusqallanchejwan. Manachayqa Bibliamanta sapa p’unchay astawan astawan yachakunallanchejpuni tiyan (Heb. 6:1, 2). Sutʼincharinapaj, imaynatachus Bibliaj wakin profeciasnin juntʼakusqanta ukhuncharisunman. Chantapis Bibliata ukhunchashaspaqa qhawarikunanchej tiyan creeyninchej sinchʼichus manachus kashasqanta (Sant. 1:25; 2:24, 26). Apóstol Pabloqa cristianos purajmanta “kikin creesqanchejrayku” kallpachanakuyta atisqanchejta nerqa (Rom. 1:12). Arí, congregacionmanta hermanoswan kajtinchejqa creeyninchej kallpachakun, astawanraj chʼampaykunapi cheqa sonqollapuni kajkunawan kajtinchej (Sant. 1:3). Sajra amigosqa creeyninchejta llauchʼiyachinkuman, kʼacha amigostajrí creeyninchejta sinchʼiyachinapaj yanapawasunman (1 Cor. 15:33). Chayrayku Biblia niwanchej tantakuykunaman mana faltakuspa rinanchejta, imajtinchus chaypeqa purajmanta kallpachanakunchej (Heb. 10:24, 25). w15 15/10 2:2, 8, 9

Bibliamanta yachachinapaj wakichikushaspaqa, tiempochakunanchej tiyan tʼukurinapaj. Ichá uj tapuypi chayri Bibliamanta yachakoj Jehová Diospa amigon kananpaj imachus yanapananpi ima tʼukurisunman. Chaypi tʼukureyqa creeyninchej aswan sinchʼi kananpaj, sonqo kʼajaywan yachachinapajtaj yanapawasun. Chantapis tʼukurillasunmantaj niraj willayman rishaspa (Esd. 7:10). Ichá Hechos libroj mayqen capitulollantapis leerisunman chayri runaspaj ima versiculostachus leerinanchejpi chayri ima publicacionestachus saqenanchejpi tʼukurisunman. Chayta ruwayqa astawan sonqo kʼajaywan willamunapaj yanapallawasuntaj (2 Tim. 1:6). Chantapis maypichus willanchej chaypi tiyakoj runas, imamantachus yachakuyta munasqankupi, yachakunankupaj jinataj imastachus niyta atisqanchejpi ima tʼukurisunman. Ajinamantataj Bibliawan aswan sumajta willayta yachakusun (1 Cor. 2:4, 5). w15 15/10 4:9

Tatamamas, tapurikuychej: “¿Wawasniy yachankuchu imaraykuchus khuchichakuymanta millay imasta mana qhawanachu kasqanta? ¿Imataj chayta qhawayta munanankupaj tanqanman? ¿Imallamantapis noqawan parlarinankupaj atienekuwankuchu? Khuchichakuymanta millay imasta qhawayta munajtinku, ¿willawanqankuchu?”, nispa. Wawasniykichej juchʼuysitusllaraj kajtinkupis, kayta niwajchej: “Maykʼajllapis Internetpi khuchichakuymanta millay imas rikhurisojtin, qhawaytataj munanki chayqa, mana manchikuspa, nitaj pʼenqakuspa willaway. Noqaqa yanapayta munayki”, nispa. Qankunapis sumaj yuyaywan ajllanaykichej tiyan imawanchus sonqoykichejta kusirichiyta. Pranas sutiyoj tata nin: “Tatasqa tukuy imata wawasninkuman niyta atinku, wawasninkutaj imatachus tatasninku ruwasqallankuta ruwanku”, nispa. Qankuna sumaj takiykunata, peliculasta, librosta ima ajllankichej chayqa, wawasniykichejpis ichá kikillantataj ruwanqanku (Rom. 2:21-24). w15 15/11 1:12-14

Maypichus ashkha runas kanku chaypi publicacionesniyoj mesaswan, carritoswan ima willaypis, ashkha runasman willayninchejwan chayanapaj yanapashawanchej. Chantapis mayta kallpachakullanchejtaj autos, trenes sayanku chaypi, plazaspi, mercadospi ima willanapaj. Ashkha runas kanku chaypi willayta manchachikunki chay, ¿imatá ruwawaj? Jehovamanta yanapata mañakuy, congregacionesta waturej Angelo Manera sutiyoj hermanoj nisqanpi tʼukuriy. Chay hermano nerqa: “Jehová Diosta jatunchallanchejtaj waj jinasmanta willamuspa. Ajinata ruwaspataj payman cheqa sonqo kasqanchejta, creeyniyoj kasqanchejta ima rikuchillanchejtaj. Chantapis imatachus Dios ruwanaykuta munasqanta ruwaytapuni munasqaykuta rikuchiyta munarqayku”, nispa. Manchachikuyninchejta atipasunchej, waj jinasmantataj willamusunchej chayqa, Jehovapi astawan atienekusunchej, sumaj willajkunataj kasunchej (2 Cor. 12:9, 10). Ashkha hermanosninchej Internetpi jw.org nisqamanta willaypi parlaspa mayta kusikunku. Karu llajtaspi tiyakoj runasman sumaj willaykunata Internetnejta chayachishanchej. w15 15/11 5:12, 13, 15

Inglespi Traducción del Nuevo Mundo nisqa Bibliata waj parlaykunaman tijracheyqa, mana atikullarqachu. Sutʼincharinapaj, Eclesiastés 9:10 versiculopi, waj versiculospi ima, 1984 watapi llojsej inglés Bibliapi “Seol” palabra rikhurerqa. Inglés parlaypi waj Bibliaspipis chay palabrallataj rikhurerqa. Chaywanpis ashkha parlaykunapi “Seol” palabraqa mana rejsisqachu, nitaj diccionariospipis rikhurinchu. Ashkha runastaj uj lugarpa sutin kasqanta yuyanku. Chayrayku 2013 watapi llojsimoj Bibliapeqa, hebreopi “Seol” palabrata, griegopitaj “Hades” palabrata, “sepultura” palabraman tijrachikorqa. Ajinata tijrachikusqantaj aswan sutʼi, entiendeyta atinapaj jina karqa. Mana entiendekoj palabrastataj orqhorqanku, sutʼi, entiendekunanpaj jina kananpajtaj kallpachakorqanku. Rikunchej jina Bibliata waj parlaykunaman tijrachejkunaqa, Traducción del Nuevo Mundo nisqa Biblia inglespi allinchakunanpaj yanaparqanku. w15 15/12 2:10, 12

Sinchʼi onqosqa kashanchej chayqa, Jehová Dios sonqochanawanchejpi, yanapanawanchejpi ima atienekuna. Payqa ñaupa tiempomanta kamachisninta jina yanapallawasuntaj. Rey Davidqa kay pʼunchaypaj versiculopi nisqanta qhelqarqa. Chaywanqa David mana nisharqachu wajkunata yanapaj runa mana wañunanta. Chantá, ¿imaynatá Jehová Dios chay kʼacha runata yanapanman karqa? David nin: “Tata Diosqa payta onqoynimpi kallpachanqa. Onqoyninmanta sanoyachiponqa”, nispa (Sal. 41:3). Jehovaqa ñakʼarishasqanchejta yachan, nitaj noqanchejmanta qonqakapunchu, astawanqa sapa ujninchejmanta yuyarikun, chaytaj mayta kallpachawanchej. Payqa ima onqoyta atipanapajpis kallpata, yachayta ima qowanchej. Chantapis sapallanmanta sanoyananpaj jina cuerpoyojta ruwawarqanchej. w15 15/12 4:7

Pablo chayta nispaqa, creeyninkurayku hermanos presochasqa kashasqankumanta parlasharqa. Pabloqa hebreo cristianosta “presosta khuya[sqankurayku]” sumajta ruwankichej nerqa (Heb. 10:34). Chantapis Pablota, Romapi tawa watata preso kashajtin chay qayllapi tiyakoj hermanos yanaparqanku. Romamanta karupi tiyakoj hermanostaj Diosmanta paypaj mayta mañapuspa yanapayta aterqanku (Fili. 1:12-14; Heb. 13:18, 19). Kay tiempopipis ashkha hermanosninchej creeyninkurayku carcelpi kashanku. Chay qayllapi tiyakoj hermanostaj paykunata imaymanamanta yanapayta atinku. Chaywanpis noqanchejmanta ashkhas chay carcelpi kajkunamanta karupi tiyakunchej. Chay hermanosmanta mana qonqakapusqanchejta, yanapayta ima munasqanchejta rikuchisunman, paykunapaj Diosmanta mayta mañapuspa. w16.01 1:13, 14

Jehovaqa runasta kay Jallpʼapi wiñaypaj kausakunankupaj ruwarqa, manataj cielopi kausakunankupajchu (Gén. 1:28; Sal. 37:29). Jinapis Jehovaqa wakin runasta cielopi reyestaj, sacerdotestaj kanankupaj ajllan. Chayrayku espíritu santonwan ajllajtin paykunaj yuyayninku, suyakuyninku, imaynachus sientekusqanku ima tijrakun, chaymantapachataj cielopi tiyakuyta suyakunku (Efe. 1:18). ¿Imaynatá uj cristiano yachan cieloman rinanpaj ajllasqa kasqanta? Imatachus Pablo Romapi ajllasqa cristianosman nisunman “Diospaj tʼaqasqa” kajkunaman nisqanta yuyarina. Pay nerqa: “Mana wata runa kay sonqochu qankunaman qosqa karqa, ujtawan manchasqalla kanaykichejpaj, astawanqa Diospa Espiritun qankunaman qosqa karqa Diospa wawasnin kanaykichejpaj. Chayrayku Diosmanta mañakunchej: Tatáy, Tatáy”, nispa (Rom. 1:7; 8:15). Jehovaqa atiyninnejta pitachus ajllan chayman sutʼita rikuchin, Reinonpi Jesuswan kamachimunanpaj ajllasqa kasqanta (1 Tes. 2:12). w16.01 3:8, 9

¿Imaynatataj jatunpaj qhawasqanchejta rikuchisunman Jehová ajllan chay cristianosta? Imaynatachus ajllasqa kasqankuta mana tapuspa. Imaraykuchus wajkunaj kausayninkuman mana satʼikunachu (2 Tes. 311). Nillataj yuyananchejchu tiyan qosan chayri warmin, tatasnin, waj familiaresnin ajllasqasllataj kasqankuta. Ajllasqa kaytaqa mana uj herenciata jinachu japʼinchej (1 Tes. 2:12). Nillataj sonqonta nanachinapaj jina tapuykunata ruwanchejchu. Sutʼincharinapaj, ajllasqa cristianoj warminta chayri qosanta mana tapunchejchu imaynachus sientekusqanta paraisopi sapallanña kausakunamanta. Imaraykuchus mosoj pachapi Jehová Dios tukuy ima necesitasqanchejta qonawanchejta yachanchej (Sal. 145:16). Ajllasqa cristianosta tukuy hermanosta jina qhawayqa, llakiykunamanta jarkʼawanchej. Imaraykuchus Bibliaqa congregación ukhupi “llulla hermanos” rikhurinankuta, ajllasqa kani ninankuta ima niwanchej (Gál. 2:4, 5; 1 Juan 2:19). w16.01 4:10, 11