Agosto

Abrahamqa Jehová Dioswan sumajta masichakorqa tukuy imapi payta kasukusqanrayku. Yacharqataj Jehovawan tukuy imamanta parlariyta atisqanta, mana entiendesqan imasmantapis. Sutʼincharinapaj, Jehová Sodoma, Gomorra llajtasta chinkachinanta nejtin, Abrahamqa kʼacha runas sajra runaswan khuska chinkachisqa kanankuta yuyasqanrayku mayta llakikorqa. Ichapis llakikorqa Sodomapi sobrinon Lot, familianwan tiyakushasqanrayku. Chaywanpis Abrahamqa “pachantinta juzgaj” Jehovapi atienekorqa. Chayraykutaj Jehovawan llakiyninmanta llampʼu sonqowan parlarerqa. ¿Imaynatá Jehová yanaparqa? Paywan pacienciakorqa, khuyakuyniyoj kasqantataj rikucherqa. Nerqataj runasta juzgashaspa, kʼacha runasta maskʼasqanta, salvasqanta ima (Gén. 18:22-33). Abrahamtaqa Jehovamanta tukuy imata yachakusqan, kausayninpi yanapasqan ima, Jehovaj amigollanpuni kananpaj yanaparqa. w16.02 1:11, 12

Mana wasanchaj runastaqa jatunpaj qhawanchej. Jonatanpajqa Jehová Diosman cheqa sonqo kay aswan sumaj karqa. Chayrayku Davidta munakorqa, nitaj enemigonta jinachu qhawarqa. Iskayninku Jehovaman cheqa sonqosllapuni karqanku, nitaj paykunapurapis wasanchanakorqankuchu. Noqanchejpis familianchejman, amigosninchejman, congregacionmanta hermanosman ima cheqa sonqos kananchej tiyan (1 Tes. 2:10, 11). Astawantaj Jehová Diosman, imaraykuchus pay kausayta qowanchej (Apo. 4:11). Jehovaman cheqa sonqo kaspaqa, kusisqas, sonqo juntʼasqas ima kasunchej. Chʼampaykunapipis Jehovaman cheqa sonqo kananchej tiyan. w16.02 3:3, 4

Pay jina sumajta tʼukuriyta yachanki chayqa, Jehovata kasukunayki tiyan wakin kuti mana atinaykipaj jinalla kajtinpis. Chayrayku tantakuykunapi, colegiopi ima kashaspa Diospa amigon jina imatapis ruwanayki tiyan. Juchaman urmanaykipaj tanqasqa kashaspapis Diosman cheqa sonqollapuni kanayki tiyan (Efe. 4:14, 15). Jóvenes chayri machitus kaspapis tukuy pantanchej (Ecl. 7:20). Chaywanpis bautizakuyta munanki chayqa, tapurikunayki tiyan Jehová Diospa munaynintapunichus ruwayta munasqaykita chayri manachus. Sajra ruwayman kunallanraj tanqasqa kashaspa imatachus ruwasqaykipi tʼukuriy. ¿Atillarqankichu cheqan kajta reparayta? Chayrí, ¿Danielta jinachu ashkha imas Diosmanta karunchasuyta munarqa? Ichá pillapis nisunki: “Joven kashaspa estudianayki tiyan, sumaj profesionniyoj kanaykipaj allintataj kausanaykipaj”, nispa. Ajinapi rikukuspa, ¿imatachus Jehová ruwanaykita munasqanta reparayta atillankichu? (Efe. 5:17). w16.03 1:7-9

Qhepa manchay sajra pʼunchaykunapi kausakushanchej. Tumpamantawantaj manchay ñakʼariy tiempo qallarenqa, mayqenchus ni jaykʼaj karqachu (2 Tim. 3:1). Chantapis Kuraj Supay, supaykunasnin ima kay Jallpʼaman wijchʼuchikamunku, kay Jallpʼapitaj ashkha runasta pantachishanku (Apo. 12:9, 12). Noqanchejtaj Jesús kamachiwasqanchejta kasukuspa Jallpʼantinpi Diosmanta runasman willamushanchej. Mana jaykʼaj jinataj may chhika parlaykunapi ashkha runasman willashanchej. Jehová bendecinawanchejpajqa, congregacionnejta kamachiykunata qowasqanchejta kasukunanchej tiyan. Kay tiempopi Diospa kamachiykunasninta kasukusunchej chayqa, manchay ñakʼariy tiempopi kasukuyta atillasun. Chay manchay ñakʼariy tiempopeqa Satanaspa sajra pachan chinkachisqa kanqa (Mat. 24:21). Chay pasasqantawantaj mosoj pachapi kausakunapaj mosoj kamachiykunata necesitallasuntaj. w16.03 4:16, 18

Uj kuti apóstol Juanqa mosqoypi jina qanchis angelesta cornetata waqachishajta rikorqa. Phishqa kaj ángel cornetata waqachejtintaj Juanqa “uj chʼaskata cielomanta kay pachaman urmamojta” rikorqa. Chay chʼaskamantaj uj llave qosqa karqa, chaywantaj chinkay chinkay pujyoj punkunta kicharerqa. Chay pujyoqa manchay ukhu, laqhataj karqa, qʼosñitaj llojsimuyta qallarerqa. Chay qʼosñimantataj langostas jallpʼaman llojsimorqanku. Chay langostasqa mana sachʼastachu, nitaj plantastachu mikhukaporqanku, manachayqa “frentesninkupi Diospa sellon mana kanchu, chaykunallata” (Apo. 9:1-4). Juanqa Egiptopi jina langostas tukuy imata mikhukapusqankuta yacharqa (Éxo. 10:12-15). Juan rikusqan langostasqa ajllasqa cristianoswan ninakun. Chay cristianosqa Dios sajra kajta tumpamantawan chinkachinanta willashanku. Kay Jallpʼapi kausakuyta suyakojkunapis paykunawan khuska willashallankutaj. Tukuyninku willashasqankurayku, ashkha runas llulla religionesmanta llojsipunku, Satanaspa atiyninmantapis kacharichisqas kanku. w16.03 3:3

Imaynatachus cheqa yachachiy uj hermanota yanapashasqanta yachanapaj, allin kanman uj anciano tapurinan imaynatachus Jehovaman qokusqan kausayninpi imatapis ajllananpaj yanapasqanta. Chayqa yanapanqa, Jehová Diosta tukuy sonqo imaynatachus sirvinamanta parlarinankupaj (Mar. 12:29, 30). Chantá hermanowan khuska Jehovamanta mañakunman, espíritu santonta qonanpaj congregacionpi ima ruwaytapis japʼejtin juntʼananpaj. Anciano Diosmanta mañapusqanta uyarispataj, congregacionpi yanapakunanpaj chay hermano kallpachakonqa. Uj hermanota wakichiyta qallarishaspa, ancianoqa Bibliapi parlakusqan runasmanta mayqenchus yanapayta atisqanmanta parlarinman. Ajinapi chay hermano congregacionmanta hermanosta yanapay aswan allin kasqanta reparananpaj, atienekunapaj jina kananpaj, llampʼu sonqo kananpaj ima (1 Rey. 19:19-21; Neh. 7:2; 13:13; Hech. 18:24-26). Chay kʼacha kaykunaqa wanu jina kanku, mayqentachus chajra runa jallpʼaman churan tarpunanpaj. Chaytaj hermanota congregacionpi ñaupajman rinanpaj yanapanqa, Bibliaj “kʼacha kamachisqasni[n]ta” entiendenanpaj ima. w15 15/4 2:3, 4

Jehovaman qayllaykuyta munanchej chayqa, may allin kanqa paywan parlarinanchej. ¿Imaynamantataj paywan parlarisunman? Paywan parlarinapajqa mana saykʼuspa mañakunanchej tiyan (Sal. 142:2). Jehová parlarinawanchejpajtaj Bibliata leenanchejpuni tiyan, imatachus leesqanchejpitaj tʼukurinanchej tiyan (Isa. 30:20, 21). Wakin kutis ichá mana reparayta atillasunchu Jehová mañakuykunasninchejta uyarisqanta. Chayrayku imapipis yanapanawanchejta munanchej chayqa, sutʼita willana, ajinamanta Jehová uyariwasqanchej sutʼi reparay kanqa. Ajinamantataj Jehovaqa sumaj amigonchej kanqa. Payman tukuy llakiyninchejta willajtinchejqa, astawan qayllaykamuwasun. Jehovaman wiñaypaj qayllaykuyta atillasunpuni. Chayrayku Diosta uyarinallapuni sapa pʼunchay Bibliata ukhunchaspa, mañakuynejtataj paywan parlarinallapuni. Chayta ruwasunchej chayqa sapa pʼunchay Diosman astawan qayllaykusunchej. Yanapayninwantaj chʼampaykunata aguantasun. w15 15/4 3:3, 14, 16

Kay pʼunchaypaj textoqa, Satanás manchay sajrapuni kasqanta rikuchin. Kay pachamanta runas atiyninpiña kajtinpis, uj león jina yarqhasqallapuni kashan. Satanasqa Jehovaj llajtanta chinkachiytapuni munan. Ñaupa tiempomantapacha kunankama cristianosta qhatiykachasqanqa, manchay sajrapuni kasqanta rikuchin. Imaynatachus uj yarqhasqa león mana khuyakuspa uj animalta mikhuykunanpaj wañuchin, ajinallatataj Satanaspis mana khuyakunchu ñakʼarichishan chay runasmanta. Imaynatachus Israel llajtata Diosmanta karunchayta munasqanpi tʼukurina. Zimritaqa, waj israelitasta ima khuchichakuy juchapi urmacherqa. Giezita, waj israelitasta imataj munapayaypi urmacherqa. Chaytaj tukuy israelitasta mayta ñakʼaricherqa. Satanasqa maytachá kusikorqa chayta ruwasqanmanta (Núm. 25:6-8, 14, 15; 2 Rey. 5:20-27). w15 15/5 1:8, 9

¿Imaynatá Satanasta atipasunman? Jesús nerqa: “Diospi japʼicuspapuni allinta sayaskayquichejwan wiñay causayta japʼinquichej”, nispa (Luc. 21:19, DP). Ni pi wiñaypaj chinkachiwasunchu. Jehovaman cheqa sonqosllapuni kasunchej chayqa, ni pi Jehovamanta karunchawasunchu (Rom. 8:38, 39). Cheqa sonqos wañupusunchej chayqa, mana Satanás atipawasunchu, imaraykuchus Jehová kausarichimuwasunchej (Juan 5:28, 29). ¿Imataj kanqa Satanaswan? Dios kay sajra pachata chinkachisqantawan, Cristo waranqa watasta wataykonqa (Apo. 20:1-3). Chaymantataj kacharisqa kanqa, ashkha runastataj chʼaukiyanqa. Chaymantataj chinkachisqa kanqa (Apo. 20:7-10). Rikunchej jina Satanaspajqa mana ima suyakuypis kanchu. Chaywanpis qanqa uj suyakuyniyoj kanki. Chayrayku Satanaswan maqanakunaykipaj kallpachakullaypuni, creeypitaj sinchʼita sayallaypuni (1 Ped. 5:9). Satanasta atipayta atisqaykimantataj ama iskayrayaychu. w15 15/5 2:1, 18

Yachayniyoj kasunchej chayqa, imapichus yuyasqanchejta qhawarikusunchej. Imaraykuchus yuyayninchejqa uj ninawan kikinchakunman. Ninaqa, waykʼunapaj, waj imaspaj ima yanapawanchej. Chaywanpis ninata mana allinta apaykachajtinchejqa wasinchejta ruphaykunman, noqanchejtapis wañuchiwasunman. Ajinallataj imapichus yuyasqanchejwanpis, Jehová yachachiwasqanchej imaspi yuyasun chayqa, may allin riwasun. Sajra imaspi yuyasun chaytaj mana allinchu riwasun. Sutʼincharinapaj, khuchichakushasqanchejpi yuyasun chayqa, ichapis khuchichakusunpuni. Chayta ruwaspataj Jehovamanta karunchakusunman (Sant. 1:14, 15). Jesusqa pillawanpis qhariwarmi jina puñuykuypi yuyay mana allinchu kasqanta yuyaycharqa. Pay nerqa: “Sichus pipis uj warmita qhawan munapayaspa chayqa, ñapis paywan sonqompi khuchichakunña”, nispa (Mat. 5:28). w15 15/5 4:11, 12, 14

Jesús, Diospa Gobiernonmanta willashaspa milagrosta ruwasqanwantaj, tukuy runasta munakusqanta rikucherqa. Uj kutipi, Jesusqa lepra onqoywan ñakʼarej runawan tinkorqa (Mar. 1:39, 40). Chay runaqa manchay onqosqa kasharqa. Chayraykutaj Lucasqa chay runa lepra onqoywan juntʼa kashasqanta nerqa (Luc. 5:12). Biblia nin jinataj, chay runaqa Jesusta rikuytawan, pampakama kʼumuykuspa, mañakorqa: “Señor, munankichus chayqa, atinki onqoyniymanta llimphuchawayta”, nispa. Chay runaqa Jesús sanoyachiyta atinanta yacharqa. Chaywanpis mana yacharqachu sanoyachiyta munanantachus manachus. Jesustajrí khuyakusqanrayku chay runata makinwan llankharispa, nerqa: “Arí, munani; llimphuchasqa kay”, nispa. Chayta nejtinkamataj onqosqa runaqa lepramanta sanoyaporqa (Luc. 5:13). Cheqamantapuni Jesusqa runasta mayta munakusqanta rikucherqa (Luc. 5:17). w15 15/6 2:3-5

Ashkha watastaña Diosta yupaychaj hermanowan chʼampayniykimanta parlarinaykeqa, allin kanman yanapasunanpaj (Heb. 3:12, 13). Imaraykuchus paykunaqa, kausayniykipi imatachus allinchanayki kashan chayta allinchanaykipaj yanapasonqanku. Yanapasusqankuman jinataj ruway, Diospa amigollanpuni kanaykipaj. Ancianosqa mayta yanapawasunman (Sant. 5:13-15). Khuchichakuymanta millay imasta qhawayta yachanki chayqa, usqhayllata yanapata maskʼay. Imaraykuchus chayta mana ruwankichu chayqa, ichapis khuchichakuyman urmawaj. Chayman urmajtiykeqa, familiaresniyki, amigosniyki ima mayta llakikunkuman. Runaspis Diospa contranpi sajrata rimankuman. Ashkha hermanosqa, ancianospa yanapayninkuta maskʼarqanku, ancianos yuyaychasqankutataj japʼikorqanku. Ajinamanta chay hermanosqa Jehovaj qayllallanpipuni, congregacionllapipuni ima kashanku (Sant. 1:15; Sal. 141:5; Heb. 12:5, 6). w15 15/6 3:15-17

Llulla religiones chinkachisqa kajtinku, chay religionespi kajkuna mana tukuychu chinkachisqa kanqanku. ¿Imaraykutaj chayta ninchej? Religionta kamachejkunamanta wakenqa, chay llulla religionespi ni jaykʼaj kasqankuta ninankuta (Zac. 13:5, 6). ¿Imataj Diospa llajtanwan kanqa llulla religionesta chinkachikushajtin? Jesús nerqa: “Chay pʼunchaykunachus mana pisiyachisqa kankuman chayqa, mana pipis salvasqachu kanman. Ajllasqasraykutaj chay pʼunchaykuna pisiyachisqa kanqanku”, nispa (Mat. 24:22). Kay 66 watapi romano soldados Jerusalenta muyuykuytawan, uj pisi tiempota riporqanku. Chay kutipitaj ajllasqa cristianosqa ayqekuyta aterqanku. Kay tiempopis kikillantaj kanqa, imaraykuchus manchay ñakʼariy tiempoqa, ajllasqa cristianosrayku pisiyachisqa kanqa. Jehovaqa mana saqenqachu kay pachamanta kamachejkuna Diospa llajtanta chinkachinankuta (Apo. 17:16). Astawanpis uj pisi tiempota mana ima ñakʼariypis kanqachu. w15 15/7 2:5, 6

Noqanchej ajllananchej tiyan juchaman urmanapaj tanqasqa kashaspa sinchʼita sayaytachus manachus (Mat. 6:13; Sant. 1:13-15). Jesuspi tʼukurinachej. ¿Imatataj pay ruwarqa Satanás juchaman urmananpaj tanqashajtin? Usqhayllata qhesacharqa, nerqataj imatachus Diospa Palabran nisqanta. Jesusqa Diosman cheqa sonqo kayta ajllarqa. Chaywanpis Satanasqa Jesusta tentayta tukuytawan, pisi tiempota chinkarerqa (Luc. 4:13). Jesusqa, Satanás juchaman urmachiyta munajtinpis Diosta kasukullarqapuni. Kunanpis Satanasqa Diosta mana kasukunapaj juchaman urmachiyta munawanchej. Satanás, Diospa contranpi imastachus nisqanqa sutʼinchakunanraj tiyan. Chayrayku Jehovaqa Satanás juchaman urmachinawanchejta saqeshallanpuni. Chaywanpis yuyarikunachej mana Jehovachu juchaman urmanapaj tanqashawasqanchejta. Astawanpis payqa noqanchej cheqa sonqos kananchejpi atienekun, chayraykutaj yanapawanchej. Nitaj munanchu tanqasqa jinalla Payta kasukunanchejta. Astawanpis saqewanchej cheqa sonqo kaytachus manachus ajllananchejta. ¿Imatataj ruwasunchej sinchʼita sayanapaj juchaman tanqasqa kashaspa? Jehovawan sumajta masichakunanchej tiyan, yanapaynintataj mana saykʼuspa mañakunanchej tiyan. w15 15/6 5:13, 14

Sonqo yuyayninchejta wakichinanchej tiyan, ni jaykʼaj kay pachaj imasninwan chhapukunapaj (Rom. 14:19). Mirjeta sutiyoj hermanamanta parlarina. Payqa Yugoslavia suyupi nacekorqa. Wiñakorqataj Serbiamanta runasta chejnikoj kanku chay lugarpi. Chaywanpis yachakorqa Jehová Dios tukuy runasta uj rejllata qhawasqanta. Yachakullarqataj runasta, Satanás chejninachiyta munasqanta. Chayrayku mayta kallpachakorqa yuyayninta tijrachinanpaj. Suyunpi uj guerra qallarejtintaj watejmanta serbiosta chejnikuyta qallarerqa, nitaj Jehovamantapis paykunaman willayta munarqachu. Yacharqataj ajinata ruwaspa mana allintachu ruwashasqanta, chayraykutaj Jehovamanta yanapata mañakorqa chay yuyayninta tijrachinanpaj. Pay nin: “Runasta Jehová jina munakunapaj kallpachakoyqa, mana kay pachamanta runas jina yuyanapaj yanapawanchej”, nispa. w15 15/7 3:11-13

Judamanta rey Josafatpa kausayninpi tʼukurina. Payqa Israelmanta rey Achabman ujchaykukorqa asirioswan maqanakunanpaj. Chayta ruwaspataj pantarqa. Tawa pachaj llulla profetastaj rey Achab chay maqanakupi atipananta nerqanku. Chaywanpis Diospa profetan Micaiasqa Josafatman nerqa chay maqanakupi maqanakojtin atipachikunanta. Ajinapunitaj karqa. Imaraykuchus Israelmanta reyqa chay maqanakupi wañorqa, Josafatpis casi wañorqa. Chantá Jehová profeta Jehuta kacharqa Josafatta chay sajra reywan ujchaykukusqanmanta kʼaminanpaj, “qampi tarikullantaj allin imas” ninanpaj ima (2 Cró. 18:4, 5, 18-22, 33, 34; 19:1-3). Arí, Josafat Israelmanta reywan ujchaykukuspa pantajtinpis, Jehovaqa allin imasta ruwasqanta mana qonqarqachu (2 Cró. 17:3-10). ¿Imatá chay yachachiwanchej? Tukuy pantajtinchejpis, Jehovaqa payta sirvinallapajpuni kallpachakojtinchej munakullawasunpuni, nitaj allin imasta ruwasqanchejmanta qonqaponqachu. w15 15/8 1:8, 9

¿Imaynatataj wakichikusunman mosoj pachapi kausakunapaj? Chayta entiendenapaj kaypi tʼukurina. Pillapis waj suyuman tiyakoj ripuyta munan chayqa, ¿imaynatataj chay suyupi tiyakunanpaj wakichikunman? Ichá tukuy imata ruwanman chay suyupiñapis tiyakushanman jina. Ichapis ima qallutachus parlanku chay qalluta yachakuyta qallarinman, chay suyupi tiyakoj runaspa costumbresninmantapis astawan yachakunman. Chantapis chay suyumanta mikhunasta ñaupajmantaña llamirinman. Kikillantataj mosoj pachapi kausakunapaj wakin imasta chaypiñapis kashasunman jina ruwasunman. Ashkha runas yuyanku paykunallamanta imatapis ruwananku kasqanta, nitaj munankuchu ni pi ni imata paykunata ninanta. ¿Chay yuyasqanku allinchu? Mana, ajinata yuyasqankuraykutaj mayta ñakʼarinku, nitaj kusisqachu kausakunku (Jer. 10:23). Jehovatajrí may munakuyniyoj kamachej. Mosoj pachapitaj manaña kunan jinachu kausakusunchej imaraykuchus tukuypis Diosta kasukonqanku. w15 15/8 3:4, 5

Casarakuyta munaj cristianosqa sumajta qhawarikunanku tiyan, pikunawanchus masichakushasqankuta. Bibliaqa Jehová Diospa kamachisnin ‘Diospi creejllawan’ casarakunankuta nin, chayqa niyta munan uj bautizasqa cristianollawan chayri bautizasqa cristianallawan casarakuyta atisqankuta (1 Cor. 7:39). Kaytaj niyta munan Diospa kamachiykunasninman jina kausakoj hermanollawan chayri hermanallawan casarakunata. Jehovata munakojllawan casarakusunchej chayqa, Diosman cheqa sonqo kanapaj yanapawasunchej. Jehovaqa yachan imachus noqanchejpaj aswan allin kasqanta. Chayraykutaj kamachisninman Payta yupaychajkunallawan casarakunankuta kamachin. Imatachus israelitasman kamachisqanta qhawarinachej. Pay Moisesnejta nerqa: “Ama paykunawan aylluchanakunkichejchu. [...] Manachayqa paykunaqa wawasniykichejta Tata Diosmanta karunchachinkuman waj dioskunata yupaychachispa”, nispa (Deu. 7:3, 4). w15 15/8 4:12, 13

Sonqo yuyayninchejta yachachinapaj mana Bibliallatachu leena. Astawanqa Bibliata ukhunchananchej, leesqanchejpi tʼukurinanchej, yachakusqanchejman jina kausanapajtaj Jehovamanta yanapata mañakunanchej tiyan. Bibliata ukhunchaspa Jehovata astawan rejsinchej, imachus kusichisqantataj yachanchej. Sonqo yuyayninchej sumaj yachachisqa kajtenqa, Jehová jina yuyayta qallarisunchej. Chaywanpis, ichá wakin kutis imaynatachus uj hermano jampichikuyta ajllasqanta mana entiendeyta atillasunchu. Jinapis imatachus ajllasqanmanta mana qhawaranachu, nitaj waj jinamanta jampichikunanta ninachu. Ichapis chay hermanoqa sonqo yuyayninta yachachinanraj tiyan (1 Cor. 8:11, 12). w15 15/9 2:4, 8, 10

Jehovaqa kay Jallpʼata ruwarqa kausakunapaj jina tukuy imayojta, chantapis kʼachitu kananpaj, kusisqa kausakunanchejpaj ima (Isa. 45:18). Kay Jallpʼanchejta imaynatachus Jehová ruwasqanpi tʼukurispaqa, cheqamantapuni mayta munakuwasqanchejta rikunchej (Job 38:4, 7; Sal. 8:3-5). Jehovaqa pay jina kʼacha kaykunata rikuchinapaj ruwawarqanchej, ajinamantataj munakuwasqanchejta rikuchillawanchejtaj (Gén. 1:27). Chayrayku munakuwasqanchejta rikunchej, noqanchejpis payta munakuyta atinchej. Jehová Diosqa yachan munakuwasqanchej kusichiwasqanchejta, imaraykuchus wawasqa kusisqa kanku tatasninku munakojtinku. Chantapis Jesús yachachiwarqanchej Jehovaj qayllanpi kaspalla kusisqa kananchejta (Mat. 5:3). Biblia nin: “[Jehová] tukuy imata qowanchej mana michʼakuspa chay imaswan kusisqa kawsananchejpaj”, nispa (1 Tim. 6:17). Sutʼita rikunchej Jehová khuyakuyniyoj, munakuyniyoj ima kasqanta (Sal. 145:16). w15 15/9 4:6, 7

Jehovata mayta munakoj, paypitaj atienekoj uj salmista qhelqarqa: “Diospi suyakuyniyta churani, paytataj yupaychasajraj. Paymin Salvawaj Diosneyqa. Ukhuypi almayqa may llakisqa kashan. Chayrayku qanmanta yuyarikusaj”, nispa (Sal. 42:5, 6). Chay salmista jinachu, ¿qanpis ninki? Ichapis qanqa Jehovapi atienekunkiña. Chaywanpis tukuyninchej Jehovapi astawan atienekuyta yachakusunman. Biblia nin: “Tukuy sonqoykiwan Tata Diospi atienekuy; ama qampa yachasqallaykipeqa atienekuychu. Tukuy ima ruwasqaykipi Tata Diosmantaqa yuyarikuy. Paymin cheqan ñanta pusasonqa”, nispa (Pro. 3:5, 6). Rikunchej jina, Jehová ñaupajta munakuwarqanchej. Ajinamanta payta munakuyta yachachiwarqanchej (1 Juan 4:19). Chayrayku noqanchejrayku imastachus ruwasqanpi, munakuwasqanchejpi ima tʼukurinallapuni. Munakusqanchejtataj tukuy sonqonchejwan, tukuy almanchejwan, tukuy yuyayninchejwan ima rikuchinallapuni (Mar. 12:30). w15 15/9 5:17-19

Wajkunaman Bibliamanta yachacheyqa sinchʼi creeyniyoj kanapaj yanapawanchej. ¿Imaraykú? Imaraykuchus willaspaqa, ñaupa tiempomanta cristianos jina Jehovapi astawan atienekuyta yachakunchej, nitaj manchachikunchejchu (Hech. 4:17-20; 13:46). Mañakuykunasninchejman Jehová kutichisqanta, yanapawasqanchejta ima rikojtinchej creeyninchej sinchʼiyallantaj. Ajinapi Josué, Caleb ima rikukorqanku. Paykunaqa Jehovapi creesqankuta rikucherqanku Sumaj Jallpʼaman wateqaj rispa. Watas pasasqanman jinataj, Jehovaj yanapayninta rikusqankurayku creeyninku astawan sinchʼiyarqa. Chayraykuchá Josueqa israelitasman nerqa: “Diosqa imatachus nerqa qonasuykichejta, chay allin imasta juntʼasqanta”, nispa. Aswan qhepamanpis nillarqataj: “Diosta manchachikuychejpuni, paytataj tukuy sonqo sirviychej”, nispa (Jos. 23:14; 24:14). Noqanchejpis Jehovapi atienekusun chayqa, imaynatachus yanapawasqanchejta reparasun, creeyninchejpis astawan sinchʼiyanqa (Sal. 34:8). w15 15/10 2:10, 11

Tantakuykunapi chayri jatun tantakuykunapi qhelqakuyta yachanchej chayqa, chay qhelqakusqanchejta qhawaykurinapaj tiempochakusunman. Tapurikunataj: “¿Imatataj Bibliapi leesqaymanta, Diospa llajtanmanta ima yachakuni?”, nispa. Chantapis Torremanta Qhawaj, ¡Despertad! revistasta, jatun tantakuykunapi llojsej publicacionesta ima leesqanchejpi tʼukurisunman. Chayri Anuario nisqa libropi uj hermanoj kausayninmanta leerispa tiempochakuna chay leesqanchejpi tʼukurinapaj, ajinamanta chay leesqanchej sonqonchejman chayanqa. Chantapis publicacionesta leeshaspaqa wakin palabrasta rayasunman chayri kantitusninpi qhelqasunman. Chaytaj yanapawasunman umallirichiykunata wakichikunapaj chayri uj hermanota kallpacharej rinapaj chayri Bibliamanta yachakojman kutinapaj. Imatachus leesqanchejpi tʼukurinapaj tiempochakusunchej chayqa, leesqanchej sonqonchejman chayanqa, chantapis Jehová Diosman mañakuynejta agradecekusun allin imasta yachakusqanchejmanta. w15 15/10 4:9, 10

Cristiano tatasqa wawasninku bautizakojtinku mayta kusikunku. Berenice sutiyoj hermanaqa tawa wawasniyoj, wawasnintaj niraj 14 watasniyoj kashaspa bautizakorqanku. Pay nin: “Qosaywan mayta kusikuyku wawasniyku Jehovata sirviyta ajllasqankumanta. Chaywanpis yacharqayku jovenyasqankuman jina chʼampaykunapi rikukunankuta”, nispa. Uj doctor nisqanman jina, wakin tatasqa ichá wawasninku wampu jina imatapis ruwarparillasqankuta, juchʼuysitus jinallapuni imatapis ruwasqankuta ima yuyanku. Chaywanpis chay doctorqa jovencitos tukuy imata ruwaypi yuyasqankuta, munayninkupis yapakusqanta, amigosninkuwanpuni kayta munasqankuta ima nillantaj. Jovencitosqa Jehovaj sumaj amigosnin kayta atinkuman, imaynatachus Jesús jovencito kashaspa ruwarqa, ajinata. w15 15/11 2:1, 2

Jehová Diosqa munakuyninta rikuchillawanchejtaj Reinonnejta. Chay Reinoqa uj gobierno, mayqentachus Jehová rikhuricherqa, chaypi kamachinanpaj uj reyta churarqa, pichus runasta mayta munakun, kamachinanpajtaj sumaj wakichisqa kashan (Pro. 8:31). Chay kamachejqa Jesucristo. Chantapis Jehovaqa Cristowan khuska janaj pachamanta kamachimunankupaj 144.000 runasta ajllallantaj. Chay runasqa noqanchej jinallataj pantaj runas kanku, chayraykutaj kamachimushajtinku yanapayta atiwasunchej (Apo. 14:1). Jesús kay Jallpʼapi kashaspa, Diospa Reinonmanta astawan willarqa. Payqa chay reinota, bendicionesninta ima mañakunankuta yachachisqasninman yachacherqa. Bibliaqa Diospa Reinon 1914 watamantapacha, janaj pachapi kamachiyta qallarisqanta niwanchej. Chaymanta pisi tiemponmantaj Jallpʼapiraj kaj ajllasqa cristianosta tantakuyta qallarikorqa Cristowan khuska janaj pachamanta kamachimunankupaj. Chantapis “may chhika” runasta tantakushallantaj, chay runasqa kay sajra pacha chinkachisqa kashajtin mana wañonqankuchu, paraisopitaj wiñaypaj kausakonqanku (Apo. 7:9, 13, 14). w15 15/11 3:16, 18

Diosqa niraj imata ruwashaspa Jesusta ruwarqa, apóstol Juantaj Jesús ‘Palabra’ kasqanta nerqa (Juan 1:1; Apo. 3:14). Jehovaqa Jesuswan imatachus yuyasqanmanta, imaynachus kashasqanmanta ima parlarej (Juan 1:14, 17; Col. 1:15). Apóstol Pablotaj angelespa parlayninku mana runaspa parlayninku jinachu kasqanta nerqa (1 Cor. 13:1). Diosqa angelesta, runasta ima sumajta rejsin, pay ruwasqanrayku. Payqa ashkha runas kikin rato mañakojtinku uyarin. Chantapis ima parlaypi mañakojtinchejpis entiendewanchej. Mañakuyninchejta uyarishaspataj, angeleswanpis parlashallantaj, kamachiykunatapis qoshallantaj. Cheqamantapuni Diospa yuyaynin, imaynatachus runaswan parlasqan imaqa mana runajta jinachu (Isa. 55:8, 9). Chayrayku parlanawanchej kajtin, entiendenanchejpaj jinalla parlawanchej. w15 15/12 1:1, 2

Ashkha suyuspi pisi runaslla uj Bibliayoj kanku, tariyta mana atinapaj jina kasqanrayku chayri ashkha qolqe valesqanrayku. Sutʼincharinapaj, Ruandapi Jehovaj testigosninwan ashkha yachakojkuna, mana ñauparisharqankuchu, Biblianku mana kasqanrayku. Suyunkupi kaj iglesias vendesqanku Bibliasqa mana entiendekojchu, ashkhataj valej. Parlayninkupi Traducción del Nuevo Mundo nisqa Biblia llojsejtintaj tawa wawasniyoj uj familia, Jehovaman, allin kamachi yuyayniyojman ima mayta agradecekorqa. Chay familiaqa Traducción del Nuevo Mundo nisqa Biblia niraj llojsishajtin, mana sapa ujninkupaj uj Bibliata rantiyta aterqankuchu, kunantaj sapa ujninku Bibliayoj kanku. Jehovaman may agradecesqa kasqankuta rikuchinankupajtaj, familia jina sapa pʼunchay Bibliata leenku. w15 15/12 2:15, 16

Kay 41 Salmo, rey David sinchʼita onqoykusqanmanta parlashan. Paypa cuentanmanta wawan Absalón kamachiyta munashasqanraykusina may llakisqa kasharqa. Jinapis sinchʼi onqosqa kashasqanrayku mana ni imata ruwayta aterqachu. Yacharqataj Betsabewan khuchichakusqanrayku familian ajina llakiypi kashasqanta (2 Sam. 12:7-14). ¿Imatataj David ruwarqa? Davidqa Jehová juchanta perdonasqanta yacharqa, onqosqa kashaspataj Jehovaj yanapayninta maskʼarqa. ¿David suyarqachu Jehová Ezequiasta jina uj milagronejta sanoyachinanta? Mana. Astawanpis imaynatachus Jehová ‘mana kallpayoj wajchapi yuyaj runata’ yanapan, ajinata yanapananta suyarqa (Sal. 41:3). Jehovaj sumaj amigon kasqanraykutaj onqosqa kashajtin sonqochananta, qhawananta ima mañakuyta aterqa. Chantapis onqoyninmanta allinyarikunanpaj yanapayninta mañakorqa. Noqanchejpis pay jinallataj ruwayta atisunman (Sal. 103:3). w15 15/12 4:8, 9

Ajllasqa cristianosqa mana necesitankuchu ni pi sutʼinchananta paykunata Dios ajllasqanta. Imaraykuchus Jehová yanapan chayta yachanankupaj. Apóstol Juan ajllasqa cristianosman nerqa: “Diosqa Espíritu Santota qosorqachej, tukuyniykichejtaj yachayniyoj kankichej”, nispa. Chantá nillarqataj: “Qankunamanrí Diosqa Espíritu Santota qosorqachej, paytaj qankunapi tiyakushan. Chayrayku mana pejpa yachachinanrajchu kanaykichej tiyan. Espíritu Santoqa tukuy imata yachachisunkichej. Paypa yachachisqanqa cheqa, manataj llullachu. Chayrayku qankunaqa paywan ujchasqapuni kakuychej, imaynatachá Espíritu Santo yachachisorqachej, ajinata”, nispa (1 Juan 2:20, 27). Ajllasqa cristianosqa Diospa tukuy kamachisnin jinallataj Jehová yachachinanta necesitanku. Chaywanpis mana necesitankuchu pillapis ajllasqas kankichej ninankuta. Imaraykuchus Jehovaqa espíritu santonnejta ajllasqa kasqankuta sutʼita rikuchin. w16.01 3:9, 10

Jehovapi atienekuspaqa, kapuwasqallanchejwan kusisqas, sonqo juntʼasqataj kausakusun. ¿Imaynatá hermanosninchejta munakusqanchejta rikuchinapaj kay yanapawasunchej? Kapuwasqanchejwan kusisqa kaspaqa, qolqemanta chayri waj imasmanta nisqa hermanosninchej aswan sumaj kasqankuta reparasunchej (1 Tim. 6:6-8). Chantapis hermanosninchejta mana qhawarasunchu, nitaj kausayninchejmanta quejakusunchu. Manataj hermanosninchejmanta envidiakusunchu, nitaj astawan kapuyniyoj kayta maskʼasunchu. Astawanpis kapuwasqanchejmanta wajkunaman qoriyta atisun (1 Tim. 6:17-19). Jehovapi atienekusunchej chayqa, jatuchaj chʼampaykunapi rikukuspapis mana manchachikusunchu, kusisqallapunitaj kasunchej (Heb. 13:6). Chaytaj hermanosninchejta kallpachanapaj, sonqochanapaj ima yanapawasunchej (1 Tes. 5:14, 15). Jehovapi atienekullasunpuni chayqa, manchay ñakʼariy tiempopi mana manchachikusunchu, kacharichisqa kayninchej qayllapiña kasqanrayku (Luc. 21:25-28). w16.01 1:16, 17

Señorpa Cenanpi tʼantata mikhojkuna, vinotapis ujyajkuna ashkha watas pasasqanman jina pisiyarqanku. Chaywanpis kay qhepa wataspi astawan yapakunku. Ajinata yapakusqanrayku, ¿llakikunanchejchu tiyan? Mana. Kunantaj imaraykuchus mana llakikunachu kasqanta qhawarina. Jesuspa Wañuyninta Yuyarinapaj tantakuypi mashkha runaschus tʼantata mikhusqankuta, vinotapis ujyasqankuta yupaj hermanosqa, mana yachayta atinkuchu pikunachus ajllasqas kasqankuta, pikunatajchus mana. Chay hermanos ukhupi kashallankutaj ajllasqa kasqankuta pantasqata yuyajkuna. Sutʼincharinapaj, wakenqa chay tantakuypi tʼantata mikhoj kanku, vinotapis ujyaj kanku, kunantaj manaña chayta ruwankuchu. Wakenqa mana yuyayninkupi kasqankurayku chayri mana allinta yuyasqankurayku Jesuswan khuska kamachimunankupaj rinankuta yuyanku. Kaytaj sutʼita rikuchiwanchej kay Jallpʼapi ajllasqa cristianosmanta mashkharajchus kashasqankuta mana yachasqanchejta. Bibliaqa mana ninchu jatun ñakʼariy tiempo qallarishajtin mashkha ajllasqa cristianosrajchus kay Jallpʼapi kashanankuta. w16.01 4:12-14