Septiembre

Abrahamqa niraj orqoman Isaacwan wicharishaspa, kamachisninman nerqa: “Qankunaqa kayllapi burrowan qhepakuychej, noqataj churiywan jaqayman rispa, Jehová Diosta yupaychaytawan kutimpusqayku”, nispa (Gén. 22:5). ¿Imaraykú Abraham kamachisninta “kutimpusqayku” nispa nerqa? Abrahamqa allinta yacharqa chay orqo patapi churinta Jehová Diospaj q’olachinan kasqanta. Ajinata kamachisninman nispa, ¿llullakusharqachu? Mana. Diospa Palabranqa nin, Abrahamqa, Isaacta, Jehová kausarichimunanpi atienekusqanta (Heb. 11:19). Chantapis Abrahamqa yacharqa pay, warmin ima, viejitusña kajtinkupis wawayoj kanankupaj Jehová yanapasqanta (Heb. 11:11, 12, 18). Chayrayku yacharqa Diospajqa tukuy ima atikusqanta. Abrahamqa chay pʼunchaypi imachus kananta mana yachaspapis, Isaacta Jehová kausarichimunanpi atienekorqa, Diospa tukuy ima nisqan juntʼakunanpaj. Chayrayku Bibliaqa Abraham “tukuy creejkunaj tatanku” kasqanta nin (Rom. 4:11). w16.02 1:3, 13

Jonatán, israelitas ima may llakiypi kasharqanku, Saúl Diospa “kamachina tiyanampi” tiyasqa kashaspa, sajra imasta ruwashasqanrayku (1 Cró. 29:23). Jehová Diosqa Saulta rey kananpaj ajllarqa, aswan qhepamantaj mana kasukusqanrayku Saulta qhesacharqa (1 Sam. 15:17-23). Jinapis ashkha watasta kamachinanta saqerqa. Chayrayku israelitasqa Jehová Diosman cheqa sonqo kayta mana atillarqankuchu. Saulpa wawan Jonatantaj Jehovaman cheqa sonqollapuni karqa. Noqanchejpis Jehová Diosman cheqa sonqos kasunman, suyunchejpi kamachejkunata atikusqanman jina kasukuspa. Jehová Diosqa chay ‘kamachejkuna’ kananta saqen, munantaj respetananchejta (Rom. 13:1, 2). Chayrayku tukuy kamachejkunata respetanchej, mana respetanapaj jina kajtinkupis. Jehová munallantaj kamachinawanchejpaj pikunatachus churan chaykunata respetananchejta (1 Cor. 11:3; Heb. 13:17). w16.02 3:5, 6, 8

Bibliaqa Diospa tukuy kamachisnin nisunman machitus, jóvenes ima, tukuy sonqo payta sirvinankuta nin. Chayrayku bautizakuyta yuyashanki chayqa, sumajta qhawarikunayki tiyan qan ajllasqaykiraykupunichus manachus bautizakuyta munasqaykita. Astawanraj cristiano familiapi uywasqa karqanki chayqa. Ichapis wiñasqaykiman jina wajkunata bautizakojta rikunki. Ichapis hermanosniyki chayri amigosniyki bautizakunkuña. Chaywanpis sumajta qhawarikunayki tiyan. Amataj yuyaychu bautizakunaykipaj edadniyojña kasqaykirayku chayri wajkuna bautizakusqankurayku bautizakunayki kasqanta. ¿Imataj yanapasonqa Jehová jina bautizakuyta qhawanaykipaj? Allin kanman tiempochakunayki, kay imaspi t’ukurinaykipaj: ¿Imaraykupunitaj bautizakuyta munashani? ¿Imaraykutaj bautizakunay tiyan? w16.03 1:11, 12

Chay wajyariytaqa juntʼasunchej congregacionpi ujchasqa kaspa, purajmanta yanapanakuspa ima (Efe. 4:16). Ashkha runasman willayninchejwan chayanapajqa, congregacionpi kamachikusqanman jina ruwananchej tiyan. Chay kamachiykunaman jina ruwaspaqa sumajta llankʼasunchej. Sutʼincharinapaj, willayman llojsinapaj tantakuytawan Reinomanta willaj rinchej, ashkha publicacionestataj saqenchej. Wakin kutisqa astawan willamunapaj campañasta wakichikun, chaypi yanapakunanchejtataj niwanchej. Chay llankʼaypi yanapakuspaqa, Jallpʼantinmanta hermanosninchejwan khuska llankʼashanchej, imaraykuchus kikin willaymanta tukuyninchej willanchej. Chantapis angeleswan khuska llankʼashallanchejtaj, imaraykuchus paykunaqa willamunapaj yanapashawanchej (Apo. 14:6). w16.03 3:4, 5

Mosoj pachapi, Biblia nisqanman jina ‘mosoj libros kicharikonqa’. Chay mosoj librosta ukhunchaspataj imatachus Jehová ruwananchejta munasqanta yachakusunchej. Wañuymanta kausarimojkunapis, chay kamachiykunawan yanapachikonqanku. Chay mosoj librospi kamachiykunaqa, imatachus Jehová yuyasqanta sutʼita yachanapaj yanapawasunchej. Chantapis Bibliaj yachachiyninta sumajta entiendenapaj yanapallawasuntaj. Chantapis hermanosninchejwan purajmanta munanakusunchej, respetanakusunchej ima (Isa. 26:9). Jesucristoj kamachiyninpeqa ashkha imastachá yachakusunchej, wajkunamanpis chayta willarisunchejchá. Chaytaj, ¡may sumajpuni kanqa! Mosoj libropi kaj kamachiykunata kasukusunchej, waranqa watas tukukuy pruebapi Jehová Diosman cheqa sonqo kasunchej chayqa, “kawsay libro[man]” sutisninchejta qhelqanqa. Chayrayku nisunman wiñay kausayta japʼinanchejqa noqallanchejmanta kashasqanta. w16.03 4:19, 20

Unaytaña anciano jina llankʼaj ashkha hermanosqa, congregacionmanta waynuchitusta wakicheyqa may allin kasqanta ninku. Paykunamanqa mashkha watayojchus kasqankuman jina congregacionpi ruwaykunasta qonkuman. ¿Imaraykutaj ancianos waynuchitusta wakichinanku may allin? Imaraykuchus waynuchitusta wiñasqankuman jina waj imasta ruwayta munajtinkupis, Diosta yupaychaypi astawan llankʼanankupaj yanapanqa (Sal. 71:17). Uj hermano Diosta yupaychaypi astawan llankʼayta munananpajqa, ancianosqa mana imatachus ruwanallantachu ninanku tiyan. Astawanqa imaraykuchus chayta ruwananta sutʼinchananku tiyan. Chayta ruwaspaqa, Sumaj Yachachej Jesús jina kasqankuta rikuchenqanku. Payqa apostolesninman runasman willamunankuta niytawan, ñaupajtaqa imaraykuchus kasukunankuta nerqa. Nerqataj: “Tatayqa kamachina tukuy atiyta qowan janaj pachapi, kay pachapipis. Chayrayku rispa, tukuy laya runasta yachachisqasniyman tukuchimuychej”, nispa (Mat. 28:18-20). w15 15/4 2:5, 6

Ñaupa tiempomanta cristianosqa Roma suyupi manchay sajra pʼunchaykunapi tiyakorqanku. Romanosqa paykunata mana khuyakuspa qhatiykacharqanku, uj llajtata ninawan japʼiykuchisqankuta nispa. Apóstol Pabloqa chay tiempopi presochasqa karqa. Ichapis payqa tapukorqa wakin cristianos yanapanankutachus manachus. ¿Imaraykutaj? Imaraykuchus ñaupaj kutipi mana pipis yanaparqachu (2 Tim. 4:16). Pabloqa mana iskayrayarqachu chay chʼampayninta allinchananpaj, aswan qhepapi chʼampaykunapi rikukojtin atipananpaj Jehová yanapananmanta ima. Chayrayku nerqa: “Tukuy ima sajramanta Señorqa jarkʼawanqa”, nispa (2 Tim. 4:18, QB). Pabloqa yachakorqa, wakin chʼampaykunapi kashajtin hermanos mana yanapajtinkupis, Jehovawan Jesuswan yanapanankupi atienekuyta. w15 15/4 4:1-3

Satanasqa mana kusikorqachu Jesús nacekusqanmanta, imaraykuchus yacharqa Mesías kananta. Satanaspajqa uj wawitata wañuchiy mana sajrachu karqa. Imaraykuchus paypajqa allin kajta ruway, mana allin kajta ruway ima kikillan. Chayrayku Jesusta wawita kashajtin wañuchiyta munarqa. ¿Imaynamantá? Rey Herodesqa “judiospa reynin” nacekusqanta yachaytawan mayta phiñakorqa, wañuchiytataj munarqa (Mat. 2:1-3, 13). Chayrayku kamacherqa Belén llajtapi, muyuynimpi ima tukuy qhari wawasta wañurachinankuta iskay watayojmanta uraman (Mat. 2:13-18). Jesustatajrí, mana wañucherqankuchu. Satanás wawitasta wañuchichisqanqa, runaspa kausaynin, wawitaspa kausaynin ima, mana valorniyojchu paypaj kasqanta rikuchin. Arí, Satanasqa uj “phiña león jina[puni]” (1 Ped. 5:8). Chayrayku ni jaykʼaj qonqanachu Satanás manchay sajrapuni kasqanta. w15 15/5 1:10, 12, 13

Jehovaqa uj sumaj regalota qowanchej. Chaytaj mana rikusqanchej imaspi tʼukuriy. Chaytaj yanapawanchej imachus aswan qhepaman kananpi yuyanapaj, ñaupajmantapacha wakichikunapaj, chʼampaykunapi mana rikukunapaj ima. Jehová Diosqa imachus qhepaman kananta yachan, niwanchejtaj imatachus qhepaman qonawanchejta. Chay imasta mana rikuspapis imaynachus kananpi yuyayta, juntʼakunanpitaj creeyta ima atinchej (2 Cor. 4:18). Profeta Samuelpa maman Anaqa, uj pʼunchay wawanta Diosta yupaychana Toldoman sacerdoteswan llankʼananpaj apananta Jehovaman nerqa. Imaynachus chay pʼunchay kananpitaj yuyallajpuni. Imaraykuchus pay ajllarqa wawanta sacerdoteswan llankʼananpaj apayta, chayrayku yuyasqanqa mana qhasichu karqa, astawanpis kallpacharqa nisqanta juntʼananpaj (1 Sam. 1:22). Ajinallatataj noqanchejpis imatachus Jehová ruwananta nisqanpi yuyayta atinchej, imaraykuchus yachanchej Jehová nisqanta juntʼanantapuni (2 Ped. 1:19-21). Ñaupa tiempomanta Diospa ashkha kamachisnenqa, Jehovaj nisqasninpi yuyarqanku. w15 15/5 3:1-3

Bibliaqa yuyaychawanchej Jehová Diospa munayninta ruwaypi yuyananchejta, manataj qolqeta ganaypichu. Jesús nisqanman jina, qolqeta maskʼananrayku Jehovapaj pisillataña llankʼaj runaqa wampu. Imaraykuchus qhapajyajtinpis, Diospa ñaupaqenpeqa mana imayoj (Luc. 12:16-21). Tukuy kapuyninchejta janaj pachapi tantajtinchej, Jehová Diosta kusichinapaj jina imatapis ruwajtinchej ima, Jehovaqa mayta kusikun, noqanchejpis kusikullanchejtaj (Mat. 6:20; Pro. 27:11). Diospa amigon kayqa mana ni imawan kikinchakunchu. Kay pachapi kapuyniyoj kayta munasunchej chayqa, ashkha llakiykunapi rikukusunchej (Mat. 6:19). Jesús yachacherqa qolqellapi yuyaspa, Jehovata yupaychayta mana ñaupajman churayta atinanchejta (Mat. 13:18, 19, 22). w15 15/5 4:15, 16

Jesusqa Diospa atiyninwan tʼukunapaj jina milagrosta ruwarqa. Sutʼincharinapaj, payqa lepra onqoyniyoj runasta, waj onqoyniyoj runasta ima sanoyacherqa. Kay tiempopi doctoresqa, uj onqosqa runata jampinankupaj runas cuerponkumanta imallatapis qonankuta munanku. Chaywanpis Jesusqa uj runata sanoyachinanpaj mana chay imasta ruwayta necesitarqachu. Imaraykuchus payqa runaj cuerpon imanasqa kajtinpis, usqhayllata sanoyachiyta aterqa. Uj onqosqa runa paymanta may karupi kajtinpis sanoyacherqa (Juan 4:46-54). ¿Imatataj chaymanta yachakunchej? Reyninchej Jesucristoqa onqoykunata wiñaypaj chinkachinanpaj atiyniyoj kasqanta, chinkachiyta munasqanta ima. Jesús kay Jallpʼapi kashaspa runasmanta khuyakusqanqa, Paraisopi ‘llampʼu sonqoyojkunamanta, wajchasmanta’ ima khuyakunanta rikuchiwanchej (Sal. 72:13). Arí, Jesusqa tukuy ñakʼarej runasta yanapayta munanpuni, tumpamantawantaj chayta ruwanqa. w15 15/6 2:6

Ashkha runasqa padrenuestro nisqa mañakuyta sumajta yachanku. Noqanchejtaj runasman willashaspa chay mañakuymanta parlarinchej, Diospa Reinon uj gobierno kasqanta, tumpamantawan chay gobierno kay Jallpʼata uj paraisoman tukuchinanta ima runasman yachachinapaj. Chantapis “sutiyki jatunchasqa kachun” nisqa palabrasmanta parlarillanchejtaj, Diosninchej sutiyoj kasqanta rikuchinanchejpaj, chay sutita may jatunpaj qhawananchej kasqanta rikuchinapaj ima (Mat. 6:9). Ashkha runasqa Diosmanta mañakushaspa kikin palabrasllata oqharinku. Chaywanpis Jesusqa mana ajinata mañakunatachu yachacherqa. Astawanpis payqa jinata nerqa: “Ama kutipakuspa ashkhata parlaychejchu”, nispa (Mat. 6:7). Chantá waj kutipipis Jesusqa yachachisqasninman imaynatachus Diosmanta mañakunankuta yachachishaspa, mana kikin palabrasllatachu oqharerqa (Luc. 11:1-4). Jesuspa mañakuynenqa imasmantachus mañakuna kasqanta yachachiwanchej. w15 15/6 4:1, 2

Jehovaqa juchaman urmanapaj tanqasqa kashajtinchej, sinchʼita sayanapaj atiyninta qowanchej. Chantá Biblianejta, congregacionnejta ima yanapallawanchejtaj. Yuyaychawanchejtaj mana necesitasqanchej imaspi mana tiemponchejta, kallpanchejta, qolqenchejta ima usuchinata. Uj qhariwarmi, pikunachus ñaupajta precursores karqanku, iskay wawasninkuta uywanku. Chay qhariwarmimanta qosa nin: “Diosmanta mayta mañakuyku, cristiano ruwanasniykuta pisillataña ruwasqaykurayku sinchʼita sayanaykupaj. Mañakullaykutaj paypa qayllallanpipuni kanaykupaj, sonqo kʼajaywan willamunaykupaj ima”, nispa. Millay khuchichakuykunata qhawanapaj tanqasqa kaspapis sinchʼita sayanallataj. Wakenqa chay millay imasta qhawarqanku, sajra imaspi yuyasqankuta mana qhesachasqankurayku. Chaywanpis ashkha hermanos ajinapi rikukuspa sinchʼita sayarqanku. Noqanchejpis paykuna jina ruwayta atisunman (1 Cor. 10:13). w15 15/6 5:15, 16

¿Imataj kanqa llulla religiones chinkachisqa kasqankutawan? Chay tiempopeqa Jehovata cheqamantapunichus manachus munakusqanchejta rikuchinanchej kanqa. Ashkha runasqa kay pachamanta organizacionespi, nisunman “qaqa juskʼuspi, orqo juskʼuspi ima” jarkʼakuyta maskʼanqanku. Noqanchejtajrí Jehovapi jarkʼakuyta maskʼasunchej. ¿Suyasunmanchu ajinallamanta ashkha runas Diospa kamachisninman tukunankuta? Mana. Jerusalenmanta soldados ripojtinku, ashkha judíos mana cristianosmanchu tukorqanku. Astawanpis cheqa cristianoslla Jesuspa nisqanta kasukuspa Jerusalenmanta jawaman llojserqanku. Ajinallatataj llulla religionespa contranpi churanakuy qallarejtin, mana suyasunchu tukuy runas cristianosman tukunankuta. Astawanpis chay tiempopi Jehová Diosta munakusqanchejta, ajllasqa cristianosta tukuy sonqo yanapashasqanchejta ima rikuchinanchej kanqa (Mat. 25:34-40). w15 15/7 2:7

Diospa kamachisnenqa Jallpʼantinpi ujchasqa kashanchej. Chayrayku mana yuyanachu tiyan, uj lugar waj lugarmanta chayri uj suyu waj suyumanta aswan sumaj kasqanta. Ichá familianchej, llajta masisninchej llajtanchejta munakunanchejta yachachiwarqanchej. Ichá yuyallanchejpuni waj llajtayojkuna, waj costumbresniyoj, waj rijchʼayniyoj, waj parlayniyoj runas ima mana allinchu kasqankuta. Ajinata yuyanki chay, ¿imataj yanapasunkiman? Imaynatachus Jehová, suyunkumanta jatunchakojkunata, wajkunamanta aswan sumaj kasqankuta creekojkunata ima qhawasqanpi tʼukuriy. Chaykunamanta parlaj yachaqanasta maskʼarisunman. Jehovamantataj yanapata mañakusunman, runasta pay jina qhawanapaj (Rom. 12:2). Chaytataj ruwananchej tiyan, Jehovata kasukusqanchejrayku wakin kutis vecinosninchej, familiaresninchej, llankʼaj masisninchej, yachaywasimanta compañerosninchej ima, mana paykuna jinachu kasqanchejta reparanankupaj. w15 15/7 3:14, 15

Jehová mañakuyninchejta uyarisqanqa, mayta munakuwasqanchejta rikuchin. Bibliaqa parlan cheqa sonqo qharis, warmis ima, imachus sonqonkupi kasqanta Diosman willasqankumanta. Chay mañakuykunamanta yachakusunman. Ichá familia jina Diosta yupaychashaspa chaykunata ukhuncharisunman. Chaykunapi tʼukureyqa imaynachus kashasqanchejta Diosman willanapaj yanapawasun. Ichapis tʼukurisunman Jonás jatun challwaj wijsanpi kashaspa imaynatachus Diosmanta mañakusqanpi (Jon. 1:17–2:10). Chantá tʼukurisunman Salomón, Jehová Diosman templota jaywashaspa tukuy sonqo mañakusqanpi (1 Rey. 8:22-53). Jesús yachachisqasninman imaynatachus Diosmanta mañakuyta yachachisqanpipis tʼukurillasunmantaj (Mat. 6:9-13). Mana saykʼuspataj “tukuy imamanta graciasta qospallapuni” Diosmanta mañakuna. Ajinata ruwajtinchejtaj “Diosqa chay mana unanchay atina sonqo tiyaykuyninta sonqo[sninchejman] churanqa, chaytaj sonqo[n]chejta, yuyayni[n]chejtawan waqaychanqa” (Fili. 4:6, 7). w15 15/8 1:11, 12

Mosoj pachapi kausakuyta munanchej chayqa, niraj chayman yaykushaspa Diospa llajtanpa nisqanta kasukuyta yachakunanchej tiyan. ¿Imaraykú? Imaraykuchus mosoj pachapeqa kay Jallpʼata uj kʼachitu huertaman tukuchinapaj, wañuymanta kausarimojkunaman yachachinapaj ima kamachiykunata japʼisunchej. Jehovaqa ashkha imasta kamachiwasun. Kayta tapurikuna: “Diospa llajtan mana gustawanchu chay imasta ruwanayta niwajtin, ¿tukuy sonqochu ruwasaj?”, nispa. Mosoj pachapi kausakunapaj wakichikunapajqa, mana Diospa llajtanta kasukuyllatachu yachakunanchej tiyan. Manaqa imatachus ruwananchejta ruwaspa kusisqa kayta, wajkunata yanapakuyta ima yachakuna tiyan. Sutʼincharinapaj, Diospa llajtan waj ruwaypi yanapakunata niwajtinchej, kallpachakuna tiyan tukuy sonqo yanapakunapaj, kusisqallapuni kanapaj ima. Kunanña Diospa llajtanta kasukuyta yachakusun chayqa, paraisopi Dios kamachiwasqanchejta kasukullasun. w15 15/8 3:6, 7

Salomonqa waj llajtayoj warmiswan casarakusqanrayku, may yachayniyoj kashaspapis Diosmanta karunchakorqa (1 Rey. 11:1-6). Noqanchejpis Salomón jina ruwasun chayqa, Diosmanta karunchakullasunmantaj. Chayrayku Jehovata mana munakoj runawan casarakuytaqa mana yuyanallanchejpischu tiyan. Pillapis casarasqa kashaspaña Diosta yupaychayta qallarejtin, ¿imatá ruwanman? Biblia nin: “Sapa ujpis qosaykichejwan kʼumuykukoj sonqoyoj kaychej. Ajinamanta Diospa palabrampi mana creejkunapis, warmisninkoj sumaj kawsayninta rikuspa, mana parlasqalla Señorman kutirikunkuman kawsayniykichejta, kʼumuykukoj kasqaykichejtapis rikusqankurayku”, nispa (1 Ped. 3:1, 2). Kay yuyaychayqa, Diosta mana yupaychaj warmiwan casarasqa qosastapis yanapallantaj. Bibliaqa nin, allin qosa chayri allin warmi kanata, qhariwarmipaj Dios imatachus kamachisqanta kasukunata ima. Qosayki chayri warmiyki Bibliaj nisqanman jina kausakunaykipaj kallpachakusqaykita rikuspa, ichapis Jehovata yupaychayta munanqa. Chaytaj ashkha qhariwarmispi rikukun. w15 15/8 4:15, 16

Kay tiempopeqa wakin onqoykunapaj mana jampi kanchu. Chayrayku sumajta qhawarikunanchej tiyan, jampinawanchejpaj jina jampismanta, imaraykuchus mana yachanchejchu jampinawanchejtachus manachus. Pablopis nerqa: “Allinta qhawakuychej imaynatachus kawsasqaykichejta; ama kawsaychejchu wampus jinaqa, manachayqa yuyayniyojkuna jina”, nispa (Efe. 5:15). Pabloj yuyaychasqanman jina ruwasunchej chayqa, Jehová Diosta yupaychananchejpi astawan yuyasun nitaj onqoynillanchejpichu chayri noqallanchejpichu (Fili. 2:4). Yachanchej kay sajra pachapeqa onqonanchejtapuni. Chayrayku Jehovata sirviyta kausayninchejpi ñaupajman churananchej tiyan (Fili. 1:10). Sapa ujninchej allinta qhawarikunanchej tiyan imaynatachus jampichikunanchejta. Chaymantapis sapa uj cuentayoj kasunchej. w15 15/9 2:8, 10

Jehová Diostajrí, cheqa Dios (Sal. 31:5). Chayrayku kausayninchejpi yanapayta munawanchej, imaynatachus yupaychananchejtapis yachachiwanchej. ¿Imastataj yachachiwanchej? ¿Imaraykutaj chay yachachiwasqanchej munakuwasqanchejta rikuchillantaj? Qallarinapaj, Jehová Diosqa pichus pay kasqanta yachachiwanchej. Sutʼincharinapaj, imachus sutin kasqanta willawanchej. Arí, sutenqa Bibliapi ni mayqen suti jina ashkha kutista rikhurin. Chantapis kʼacha kaykunasninta rejsichiwanchej. Tukuy imata ruwasqantaj may atiyniyoj, may yachayniyoj kasqanta ima rikuchiwanchej, Bibliataj cheqan kayniyoj, munakuyniyoj kasqanta rikuchillawanchejtaj (Rom. 1:20). Jehovaqa may yachayniyoj, may atiyniyoj kaspapis, cheqan Dios, munakuyniyojtaj, chaytaj payman qayllaykunapaj yanapawanchej (Sant. 4:8). w15 15/9 4:8, 9

Runasqa, yuyanku Diosninchej mana noqanchejmanta llakikusqanta. Sutʼincharinapaj, noviembre de 2013 watapi, sinchʼi muyoj wayra kasqanrayku mama qochamanta yaku wasaykamuspa Filipinaspa ashkha churusninta chinkarparicherqa. Chay pasayta uj llajtamanta alcalde nerqa: “Diosqa ashkha ruwanasniyoj kasqanrayku runasta yanapananpaj mana tiempoyojchu”, nispa. Wakin runasqa imatachus ruwasqanchejta Dios mana rikusqanta yuyanku (Isa. 26:10, 11; 3 Juan 11). Apóstol Pabloqa tiemponpi kausakoj runas Diosmanta qonqapusqankuta nerqa. Imaraykuchus chay runasqa “mana cheqan ruwaykunawan, sajra ruwaykunawan, qolqe munapayaywan” ima juntʼa kasharqanku (Rom. 1:28, 29). Noqanchejqa yachanchej Dios tukuy ima ruwasqanchejta qhawashasqanta. Chaywanpis tapurikuna: “¿Creenichu Dios noqamanta interesakusqanta? ¿Reparanichu imaynatachus kausayniypi yanapashawasqanta?”, nispa. w15 15/10 1:1-3

Runasman Diospa Reinonmanta willaspaqa sinchʼi creeyniyoj kasqanchejta rikuchinchej. Imaraykuchus chayta ruwaspaqa tukukuy pʼunchay qayllitapiña kasqanpi creesqanchejta rikuchinchej, chaytaj maychus tiemponpi chayamonqapuni (Hab. 2:3). Creeyninchej sinchʼichus manachus kashasqanta yachanapajqa kaykunata tapurikusunman: “¿Willayta jatunpajchu qhawani? ¿Tukuy runasman Diosmanta willanaypaj kallpachakushanichu? ¿Imaynallamantapis astawan willanaypaj kallpachakunichu?”, nispa (2 Cor. 13:5). Tukuy runasman willanapaj kallpachakunchej chayqa, creeyninchej sinchʼi kasqanta rikuchisunchej (Rom. 10:10). Chantapis creeyniyoj kasqanchejta rikuchillasunmantaj kausayninchejpi chʼampaykunata aguantaspa. Wajchayaypi rikukuspa, onqosqa, sonqo pʼakisqa, pisi kallpayoj kaspa chayri waj chʼampaypi rikukuspa, maychus tiemponpi Jehová, Jesús ima yanapanawanchejpi atienekuna (Heb. 4:16). Jehová Diospa yanapayninta mañakojtinchejqa paypi atienekusqanchejta rikuchisunchej. w15 15/10 2:12-14

Bibliata qhechuwajtinchejpis, Bibliaj textosninta chayri Jehová Diosman takiykunata yuyayninchejpi japʼisqanchejtaqa, ni pi qhechuwasunchu (Hech. 16:25). Jehovaqa espíritu santonwan yanapawasunchej imatachus yachakusqanchejta yuyarinapaj, payman cheqa sonqollapuni kanapaj ima (Juan 14:26). Chayrayku sapa semana Bibliata leenapaj wakichikusqanta leerinapaj tiempota tʼaqana. Chay leesqanchejpi tʼukurinapajpis tiempochakuna. Waj pʼunchaytaj Mateo, Marcos, Lucas, Juan evangeliosta leerisunman, chantá imatachus Jesús ruwasqanpi, yachachisqanpitaj tʼukurisunman (Rom. 10:17; Heb. 12:2; 1 Ped. 2:21). Leesqanchejta sumajta japʼeqanapajtaj Jesús imatachus Jallpʼapi kashaspa ruwasqanmanta sutʼinchaj publicacioneswan yanapachikusunman (Juan 14:6). w15 15/10 4:11, 12

Ñaupa tiempomanta runasqa, imatachus yuyasqankumanta, imaynachus kashasqankumanta ima mana kamachisninkuman willajchu kanku. Chaywanpis Jesusqa mana chay runas jinachu karqa. Astawanpis payqa apostolesninman nerqa, mana kamachista jinachu qhawasqanta manachayqa amigosninta jina. Chayrayku paykunaman imaynachus kashasqanmanta willarerqa, paykunapaj tiempochakorqa, imaynachus kashasqankuta, imatachus yuyasqankuta willajtinkupis sumajta uyarerqa (Mar. 6:30-32). Chaytaj apostolesta yanaparqa Jesuswan sumaj amigos kanankupaj, qhepaman ima ruwaytapis japʼispa juntʼanankupaj ima. Jesusqa yachachisqasnin Reinomanta runasman willamuspa kusisqas kanankuta yacharqa. Chayrayku Reinomanta willayta kausayninkupi ñaupajman churanankuta, chay llankʼayta juntʼanankupaj yanapananta ima nerqa (Mat. 28:19, 20). w15 15/11 2:3, 5

Jehovaqa may munakuyniyoj Dios (1 Juan 4:16). Jesucristopis pay jina munakuyniyojllataj. Payta Jehová tukuy imamanta ñaupajta ruwarqa. Jehovawan khuskataj cielopi may chhika watasta karqa. Chayraykutaj Jesusqa imayna munakuyniyojchus Jehová kasqanta sumajta yacharqa (Col. 1:15). Janaj pachapi, kay Jallpʼapi imataj, Jesusqa chay munakuyta rikucherqa. Chayrayku yachanchej Jehovawan, Jesuswan munakuywan kamachimunankuta. Jesusqa, leypa kamachisqasninmanta mayqenchus aswan kuraj kasqanta tapojtinku kayta nerqa: “Señor Diosniykitaqa munakunki tukuy sonqoykiwan, tukuy almaykiwan, tukuy yuyayniykiwantaj. Chaymin leypa kamachisqasninmanta aswan kuraj, ñawpaj kajtaj. Qhepan kaj kamachisqapis ñawpaj kajman rijchʼakullantaj: Runa masiykita munakunki qan kikiykita jina”, nispa (Mat. 22:37-39). Tukuy runasman munakuyninchejta rikuchinanchej tiyan. Jesusqa Jehovata, runa masinchejta ima munakunanchejta nerqa. w15 15/11 4:1-3

Jehovaqa mana hebreo parlayllapichu runaswan parlarqa. Wakin israelitasqa arameota parlaj kanku Babiloniamanta Jerusalenman kutipusqankumanta qhepaman. Ichapis chayrayku Jehovaqa profeta Danielwan, Jeremiaswan, sacerdote Esdraswan ima arameopi Bibliaj wakin versiculosninta qhelqacherqa. Alejandro Magno ashkha suyusta japʼikapusqanrayku tukuynejpi griegota parlakoj. Ashkha judiostaj griegota parlayta qallarerqanku, chayraykutaj Hebreopi Qhelqasqasta griegoman tijrachikorqa. Chaytataj Septuaginta nisqa sutiwan rejsikun. Chaypacha Bibliata ñaupaj kutirayku tijrachikorqa, chay ruwakusqantaj may sumajpuni karqa. Yachayniyoj runastaj yuyanku chayta tijrachejkuna 72 runas kasqankuta. Chay runasmanta wakenqa sapa palabritata tijracherqanku, wakintaj entiendesqankuman jinalla. Chayrayku chay Bibliaqa imaymana tijrachisqa kashan. Chaywanpis hebreota parlaj judíos, cristianos ima chay Septuaginta nisqata Diospa Palabranta jina qhawaj kanku. w15 15/12 1:4-6

Pay sutʼincharqa: “Qallurí uj nina jina”, nispa. Chay versiculoqa parlayta atisqanchejmanta parlashan. Imaynatachus nina runasta ñakʼarichin, ajinallatataj parlasqanchejpis wajkunata ñakʼarichinman. Chaywanpis mana chayraykuchu manaña parlananchej kanqa. Ninawanqa wajkunata ñakʼarichisunman, chaywanpis mana chayraykuchu ninata manaña japʼichinanchej kanqa. Imaraykuchus ninaqa waykʼunapaj, qʼoñikunapaj, tutanpi kʼanchakunapaj ima yanapawanchej. Ajinallatataj Bibliapis niwanchej: “Wañuywan, kawsaywanqa runaj simimpi kashan”, nispa (Pro. 18:21). Chayrayku sumajta qhawarikunanchej tiyan imaynatachus parlasqanchejta. Sutʼincharinapaj, parlayninchejwanqa Jehovata jatunchayta, wajkunata yanapayta ima atinchej (Sal. 19:14). Jehovaqa imatachus yuyasqanchejta, sonqonchejpi imachus kasqanta willakuyta atinapaj jina ruwawarqanchej. Chaytataj señas parlaypipis ruwayta atisunman. Jinapis parlayninchejwan wajkunata kallpachana tiyan (Sant. 3:9, 10). w15 15/12 3:1-3

Lucasqa doctor karqa, Pablowan khuskataj viajaj. Ichapis chay viajespi Pablota, waj cristianosta ima onqoykojtinku yanaparqa (Gál. 4:13). Jesús nerqa jina “onqosqaslla” uj doctorpa yanapayninta necesitanku (Luc. 5:31). Lucasqa cheqamantapuni uj doctor karqa. Biblia doctor kananpaj maypichus estudiasqanta mana nejtinpis, Laodiceapi kaj escuelapisina yachakorqa. ¿Imaraykú chayta ninchej? Imaraykuchus Pabloqa Laodiceaj qayllanpi kaj Colosasmanta cristianosman Lucas napaykamusunkichej nispa nerqa. Lucas Laodiceapi estudiarqa chayqa, Colosasmanta hermanosta rejserqachá. Chantapis Lucasqa evangelionpi Jesús onqosqasta sanoyachisqanmanta parlaspa, Hechos libropi wakin imasmanta parlaspa doctorespa parlayninkuman jina qhelqarqa. Chaytaj rikuchiwanchej payqa doctorpuni kasqanta. w15 15/12 4:11, 12

Jehovaqa mayta munakuwasqanchejrayku may munasqa Wawan Jesucristota kay Jallpʼaman kachamorqa, noqanchejrayku kausayninta qonanpaj (Juan 3:16; 1 Juan 4:9, 10). Kaytaj Jehová tukuy imata qowasqanchejmanta aswan jatun regalo. Chayrayku apóstol Pabloqa ‘mana willay atina qowasqanchej’ kasqanta nerqa. Pablo yacharqa Jehová, Jesuspa wañuyninnejta tukuy ima nisqanta juntʼananta (2 Cor. 1:20). Dios ‘mana willay atina qowasqanchejqa’, Wawanpa kausayninta qosqanwan, mayta munakuwasqanchejwan, tukuy ima allin kajta qowasqanchejwan ima ninakun. Jehová kay regalota qowasqanchejqa may sumajpuni. ¿Imaynataj sientekunchej aswan jatun regalota Jehová qowasqanchejmanta? ¿Imatataj ruwasunman? ¿Kausayniykipi wakin imasta tijrachiwajchu? Wajkunatapis, ¿astawan munakuwajchu, khuyakuwajchu ima? ¿Sonqoykita nanachisojkunatapis perdonawajchu? Yuyarikuy, Jehová Wawanta noqanchejrayku kausayninta qonanpaj kachamusqanqa, aswan sumaj regalo (1 Ped. 3:18). w16.01 2:1, 2, 4, 5

Ichapis uj ajllasqa cristianoqa tapurikun imaraykuchus payta Jehová ajllasqanta, manataj waj cristianotachu. Chantapis ichá tapurikullantaj chay llankʼayta ruwananpaj jinachus manachus kasqanta. Chaywanpis chay cristianoqa mana iskayrayanchu payta Jehová ajllasqanmanta. Astawanpis mayta kusikun, Jehovamanpis mayta agradecekun. Ajllasqa cristianosqa apóstol Pedro jina sientekunku, Pedro nerqa: “Yupaychasqa kachun Dios, Señorninchej Jesucristoj Tatan. Payqa jatun khuyakuyninrayku watejmanta nacechiwarqanchej, Jesucristota wañusqakunamanta kawsarichisqannejta, wiñay kusiy kawsayta suyananchejpaj. Payqa churallawanchejtaj mana ismoj, mana chʼichichasqa, nitaj chinkapoj herenciata japʼinanchejpaj. Chayqa janaj pachapi qankunapaj waqaychasqa kashan”, nispa (1 Ped. 1:3, 4). Ajllasqa cristianos kayta leespaqa, Jehová paykunaman parlashasqanta sutʼita yachanku. w16.01 3:11, 12