Octubre

Jehovaqa wakin cristianosta ajllayta qallarerqa Jesús kausarimusqanmanta qhepaman. Chay tiempopeqa tukuy cristianos kajkunasina ajllasqas karqanku. Chantapis ashkha watasninman cristianos kayku nejkunamanta ashkhas mana Jesuspa yachachisqasninchu karqanku. Chaywampis chay wataspi Jehová Diosqa cheqa cristianosmanta wakinta ajllarqa. Chay ajllasqa cristianosqa trigowan ninakorqanku, mayqentachus Jesús cizaña qhorawan khuska wiñajta saqenankuta nerqa (Mat. 13:24-30). Jehová Diosninchejqa kay qhepa pʼunchaykunapipis cheqa cristianosta ajllashallanpuni 144.000 kajkunamanta kanankupaj. Jehovaqa niraj tukukuy pʼunchay chayamushajtin cheqa sonqo cristianosta ajllayta munajtin, cheqan kajta ruwashasqanpi atienekunanchej tiyan (Isa. 45:9; Dan. 4:35; Rom. 9:11, 16). Manataj munasunmanchu uvas huertapi trabajaj peones jina kayta, mayqenmantachus Jesús rijchʼanachinanpi parlarqa. Chay peonesqa patronninkupaj mayta rimarqanku qhepa jamojkunaman uj horallataña trabajasqankumanta paykunaman jinallataj pagasqanmanta (Mat. 20:8-15). w16.01 4:15

Kay tiempopi Jehovaqa mana wawasninchejta qʼolachinanchejtachu niwanchej, manaqa leyesninta kasukunanchejta. Wakin kuteqa ichá mana entiendeyta atillasunchu imaraykuchus imatapis kamachiwasqanchejta. Chayri ichá mana kasukuyta atinapaj jinachu kasqanta yuyasunman. Wakenqa ichapis manchalis kasqanchejrayku mana rejsisqa runasman willayta mana atillanchejchu. Wakintaj llankʼayninchejpi, escuelapi ima Jehovaj testigosnin jina rejsichikuyta manchachikunchej (Éxo. 23:2; 1 Tes. 2:2). Ajinapi rikukuspa, Abraham sinchʼi creeyniyoj, mana manchachikoj kasqanpi ima tʼukurisunman. Chantapis ñaupa tiempomanta waj cheqa sonqo runaspi tʼukurillasunmantaj. Ajinamanta paykuna jina ruwasun, Jehovawanpis amigosllapuni kasun (Heb. 12:1, 2). w16.02 1:3, 14

Saúl Davidta wañuchiyta munasqanta nejtin, Jonatanqa pimanrajchus cheqa sonqo kananta ajllanan karqa. Payqa tatanman cheqa sonqo kayta munarqa, jinallataj Davidmanpis. Yacharqataj Davidta Jehová yanapashasqanta, nitaj Saultachu. Chayrayku Davidman cheqa sonqo kayta ajllarqa. Willarqataj tatan wañuchiyta munashasqanrayku pakakamunanta, chantapis tatanman Davidta mana wañuchinanta nerqa (1 Sam. 19:1-6). Jehovata munakunchej chayqa, payman astawan cheqa sonqos kasunchej. Nitaj suyunchejmanchu, colegionchejmanchu, pelotata jaytʼaj equiponchejmanchu. Sutʼincharinapaj, Henryta colegionmanta equiponwan ajedrezta pujllay gustaj, chayta pujllaspataj colegionmanta equiponwan ganayta munarqa. Sapa semana tukukuyta ajedrezta pujllasqanrayku, tantakuykunaman, willayman ima mana riyta atejchu. Henryqa Jehovaman cheqa sonqo kananmantaqa, colegionman astawan cheqa sonqo kashasqanta repararqa. Chayrayku ajedrez pujllayta saqeporqa (Mat. 6:33). w16.02 3:10, 12

Joven, imaraykuchus bautizakuyta munasqaykita yachanaykipajqa, imaynatachus Diosmanta mañakushasqaykipi tʼukuriwaj. Tapurikuytaj: “¿Jehovamanta sapa kutichu mañakuni chayri manachu? ¿Imapichus yanapanawanta sutʼitachu mañakuni chayri manachu?”, nispa. Kay tapuykunaqa Diospa sumaj amigonchus manachus kasqaykita yachanaykipaj yanapasonqa (Sal. 25:4). Jehovaqa wakin kutis Biblianejta mañakuykunasninchejman kutichiwanchej. Chayrayku imaraykuchus bautizakuyta munashasqaykita, tukuy sonqochus Jehovata sirviyta munashasqaykita ima yachallawajtaj Bibliata sumajta estudiaspa (Jos. 1:8). Tapurikuytaj: “¿Sapa semanachu Bibliata ukhunchani? Tatasniy familiapi Diosta yupaychanapaj tantakuyta ruwajtinku, ¿tukuy sonqochu chaypi kani?”, nispa. Kay tapuykunaqa, Jehovata tukuy sonqo sirviyta munasqaykiraykupunichus manachus bautizakuyta munasqaykita yachanaykipaj yanapasonqa. w16.03 1:11, 13

Jallpʼantinpi imaynachus willayninchejpi riwasqanchejmanta Anuario libropi leespaqa mayta kusikunchej. Chantapis jatuchaj tantakuykuna hermanosninchejwan ujchasqa kanapaj yanapallawanchejtaj. Chay tantakuykunapeqa umallirichiykunata uyarinchej, dramasta, rikuchiykunata ima qhawanchej, chaykunataj Jehovata astawan sirvinapaj yanapawanchej. Jesuspa Wañuyninta Yuyarinapaj tantakuypis ujchasqas kananchejpaj yanapallawanchejtaj (1 Cor. 11:23-26). Chay tantakuyman semanas faltashajtin Jallpʼantinpi runasta wajyarinchej. Chantá tukuyninchej inti yaykusqantawan 14 de nisán pʼunchaypi tantakunchej. Ajinamanta Jesús kamachisqanta kasukunchej, Jehovamantaj noqanchejrayku ruwasqanmanta mayta agradecekunchej. Noqanchejpis sapallanchejqa Jallpʼantinpi mana willayta atisunmanchu. Chaywanpis tukuyninchej khuska llankʼanchej. Chayraykutaj ashkha runasman willayninchejwan chayayta atinchej Jehovamanta yachachinapaj, ajinamanta paykunapis Jehovata yupaychanankupaj, jatunchanankupaj ima. w16.03 3:4, 6, 7

Congregacionpi sirviyta yachakushanku chay hermanosqa, Biblia yuyaychasqanman jina ruwayta yachakunanku tiyan. Sutʼincharinapaj, uj ancianoqa uj hermanota Tantakuna Wasej punkunta llimphuta, ni pi imanarpakunanpaj jina japʼinanta nishaspa, Tito 2:9, 10 versiculosta leeripunman. Sutʼincharinmantaj Tantakuna Wasej punkunta llimphuta japʼispaqa, Reinomanta willayninchejta allinpaj qhawachisqanta. Chantapis ninman imaynatachus machitu hermanosta pampa mana joqʼo kajtin yanapananpi tʼukurinanta. Chaytaj yanapanqa wajkunapi yuyananpaj, nitaj kamachiykunata juntʼanallanpichu. Ruwasqanwan hermanos yanapachikusqankuta rikuspataj, hermanosta sirvispa kusikonqa. Chantapis ancianoqa, yachakoj hermano yuyaychasqanman jina ruwajtin, “allinta ruwanki” ninan may allin. Imaraykuchus ajinata ruwaspa congregacionpi ñauparinanpaj yanapanqa. Uj hermanota “allinta ruwanki” neyqa, uj plantitata wiñananpaj qarpay jina. w15 15/4 2:7, 8

¿Maykʼajllapis jatun chʼampaypi kaspa ni piniyoj kasqaykita yuyarqankichu? Ichá mana llankʼayniyoj qhepakorqanki chayri escuelapi uj chʼampayniyoj karqanki. Ichá onqoykorqanki chayri jatun llakiypi karqanki. Ni pi yanapasusqanta rikuspa, ichá sonqo pʼakisqa kasharqanki. Arí, wakin chʼampaykunata runas mana allinchayta atinkuchu, ¿ajinapi kaspa imatá ruwawaj? Bibliaqa Jehovapi atienekunanchejta nin (Pro. 3:5, 6). ¿Jehovapi atienekuyta atisunmanpunichu? Arí. Bibliapi ashkha runasmanta leenchej, chaytaj Jehová llajtanta yanapasqanta rikuchiwanchej. Ama llakikuychu yanapata necesitashajtiykipuni wajkuna mana yanapasojtinku. Astawanpis Pablo jina yuyay, chay chʼampay Jehovapi tukuy sonqo atienekunaykipaj yanapasusqanta. Kausayniykipitaj rikunki imaynatachus Jehová qhawasusqanta. Ajinamanta Jehovapi astawan atienekunki, astawantaj qayllaykunki. w15 15/4 4:3-5

Satanasqa runasta Jehovaj contranpi churakunankupaj chʼaukiyan (1 Juan 4:8). ¿Imaynatá chayta ruwan? Runasta “sonkoncupi Diosmanta pisiskas caskancuta”, nisunman Diosman qayllaykuyta necesitasqankuta mana reparanankupaj tanqaspa (Mat. 5:3, DP). Payqa, “mana creejkunaj yuyayninkuta laqhayachin” Diosmanta cheqa kajta mana yachanankupaj. Satanasqa yachan, Jehová payllata yupaychananchejta munasqanta (Éxo. 20:5). Chayrayku llulla religionesnejta runasta chʼaukiyan. Payqa mayta kusikun, runas Jehovata yupaychanankumantaqa ñaupa tatasninkuta, animalesta, Diospa ruwasqasninta, waj imasta ima yupaychajtinku. Chay imasta yupaychaj runasqa, ruwasqankuta Dios allinpaj qhawasqanta yuyanku, jinapis chay ruwasqanku, creesqanku ima qhasilla. Isaiaspa tiemponpipis israelitasqa kikillantataj ruwaj kanku. Jehovaqa israelitasta yanapayta munaspa llulla religionta mana allin mikhunawan kikincharqa, nerqataj: “Imaraykutaj ganakusqaykichejta tukunkichej mana sajsachej imaspiri? Uyariwaychej allinta, [...] sumaj mikhunaswantaj miskʼirichikunkichej”, nispa (Isa. 55:2). w15 15/5 1:14, 15

Abelqa Jehovaj chay nisqan imaynatachus juntʼakunanta mana yacharqachu. Chaywanpis maytachá chaypi tʼukurerqa. Ichá tapurikorqa pitachus katari chaki talonninmanta khaninanta, pichus runastapis juntʼa runasman tukunankupaj yanapananta ima. Chay imaspi yuyasqanqa, yanaparqa qhepaman allin kausay kananpi yuyananpaj. Abelqa Diospa nisqan juntʼakunanpi creerqa. Chayrayku Jehovaqa allinpaj qhawarqa uywa qʼolachisqanta (Gén. 4:3-5; Heb. 11:4). Noepis Jehovaj nisqasninpi creellarqataj, chayrayku Jatun Parapi mana wañorqachu (Heb. 11:7). Creesqanraykutaj “uywa wañuchisqa[s]ta” Jehovapaj qʼolacherqa (Gén. 8:20). Jatun Para pasayta runasqa watejmanta sajrayallarqankutaj. Nimrod sutiyoj runa kamachiyta qallarerqa, munarqataj tukuy runasta Jehovaj contranpi churayta (Gén. 10:8-12). Jinapis Noeqa, Jehovapi mayta creellarqapuni. Abel jinataj yacharqa, Jehová uj pʼunchay juchata, wañuyta ima chinkachinanta. Ichá yuyallarqataj sajra kamachejkuna chinkachisqas kajtinku imaynachus kausay kananpi. Noqanchejpis chaypi yuyallasunmantaj, imaraykuchus may qayllitapiña kashan (Rom. 6:23). w15 15/5 3:4, 6

Anchata llakikuspaqa onqoykusunman, niñataj Jehovapi atienekusunmanchu. Biblia kay pʼunchaypaj versiculopi nisqanta ama qonqanachu. Chayrayku imallapis llakichisojtenqa, sumajta rejsisoj hermanowan chayri hermanawan parlariy. Ichapis parlariwaj tatasniykiwan, qosaykiwan chayri warmiykiwan, manachayri uj sumaj amigoykiwan, pikunachus Jehovapi atienekunaykipaj, mana anchata llakikunaykipaj ima yanapasonqanku. Jehová Dioslla llakiypi rikukojtinchej imaynachus kashasqanchejta yachan, chayrayku chay kutispi yanapawanchej. Pablo nerqa: “Ama imamantapis phutikuychejchu, astawanqa Diosmanta mañakuspaqa, imatachus munasqaykichejta mañakuychej, tukuy imamanta graciasta qospallapuni. Chantá Diosqa chay mana unanchay atina sonqo tiyaykuyninta sonqosniykichejman churanqa, chaytaj sonqoykichejta, yuyayniykichejtawan waqaychanqa Cristo Jesuspi”, nispa (Fili. 4:6, 7). Llakisqa kashanki chayqa, Jehová ima yanapastachus amigollanpuni kanaykipaj qosusqanpi yuyay. Sutʼincharinapaj, Payqa hermanosnejta, ancianosnejta, allin kamachi yuyayniyojnejta, angelesnejta, Jesusnejta ima yanapawanchej. w15 15/5 4:16, 17

Jerusalenpi Betesda sutiyoj estanque karqa, chaytaj temploj patanejninpi kasharqa. Chay estanquemanqa ashkha runas rej kanku. ¿Imaraykutaj? Imaraykuchus yuyaj kanku, chay estanquepi yaku kuyurisqantawan bañakojtinku sanoyapunankuta. Jesusqa runasta munakusqanrayku, uj suchu runaman qayllaykorqa. Chay suchu runaqa, Jesús niraj nacekushajtin onqosqaña kasharqa (Juan 5:6-9). Jesusqa chay suchu runata taporqa: “Munawajchu sanoyakuyta?”, nispa. Chay runataj may llakisqa nerqa: “Mana piniypis tiyapuwanchu, estanquepi yaku kuyurejtin ichuykunawampaj”, nispa. Jesustajrí nerqa: “Sayarikuy; phulluykita oqharikuytawan, ripuy”, nispa. Chay runataj sayariytawan riporqa. Jesús kay milagrota ruwasqanqa, tumpamantawan paraisopi milagrosta ruwananpi tʼukurichiwanchej. Chantapis runasta mayta munakusqanta rikuchiwanchej. Jesusqa yanapata necesitaj runasta estanqueman maskʼaj rerqa. ¿Imaynatataj Jesús jina ruwasunman? Kay sajra pachapi ñakʼarejkunata yanapanapaj maskʼaj rispa. w15 15/6 2:8-10

Jesusqa mañakuyninta qallarerqa “janaj pachapi kashaj Tatayku”, nispa. Ajinata mañakusqantaj yuyarichiwanchej Jehová Dios Jallpʼantinmanta hermanosninchejpa tatan kasqanta (1 Ped. 2:17). Jehovaqa wakin cristianosta cielopi kausakunankupaj ajllan, wawasninpajtaj rejsikapun. Chayrayku nisunman Jehová paykunaj tatanku kasqanta (Rom. 8:15-17). Jallpʼapi wiñaypaj kausakuyta suyakojkunapis Jehovata “Tatáy” nispa niyta atillankutaj, kausayta, imatachus necesitasqankuta ima qosqanrayku. Paykunaqa juntʼa runasman tukojtinku, waranqa watas tukukusqantawan pruebata pasajtinku ima, Jehová Diospa wawasnin kanqanku (Rom. 8:21; Apo. 20:7, 8). Tatasqa wawasninkuman uj sumaj regalota qonku, Jehová tatanku kasqanta, imaynatachus mañakunankuta yachachispa ima. Rikunchej jina, tatas wawasninkuman Diosmanta yachachinanku, Dioswan masichakunankupaj yanapananku imaqa sumaj regalo kasqanta. w15 15/6 4:4-6

Chayta nispaqa Diosmanta mañakushanchej Satanasmanta jarkʼanawanchejta. ¿Imaynatataj jarkʼanawanchejta munasqanchejta rikuchisunman? Kay pachaman mana satʼikuspa, kay ‘pachapi kaj imasninta’ mana munakuspa ima (Juan 15:19; 1 Juan 2:15-17). Jehovaqa, tumpamantawan Satanasta wataykonqa, kay sajra pachatataj chinkachenqa. Satanastaj manchay phiñasqa kashan, paypaj pisi tiempollaña kasqanta yachasqanrayku. Tukuy imatataj ruwanqa Diosta mana sirvinanchejpaj. Chayrayku Diosmanta mañakunallanchejpuni tiyan Satanasmanta jarkʼanawanchejta (Apo. 12:12, 17). Mosoj pachapi kausakuyta munanchej chayqa, Diospa Reinon jamunanta, sutin jatunchasqa kananta, munaynin kay Jallpʼapi ruwakunanta ima mañakunallanchejpuni tiyan. Atienekunataj Jehová imatachus kausakunapaj, payman cheqa sonqo kanapaj ima sapa pʼunchay qonawanchejpi (Mat. 6:9-13). w15 15/6 5:12, 17, 18

¿Imataj chay tiempopi kanqa? Mana yachanchejchu. Ichapis mayta ñakʼarisun, wakin imastapis ichá waj jinamanta ruwananchej kanqa. Jerusalén chinkachisqa kashajtin, cristianosqa wasisninkuta saqerqanku, mana wañunankupajtaj ashkha llakiykunata atiparqanku (Mar. 13:15-18). Chayrayku tapurikunachej: “¿Wakichisqachu kashani kapusqallaywan kausakunaypaj? Jehová Diosman cheqa sonqollapuni kanaypaj, ¿tukuy imatachu ruwayta munani?”, nispa. Chaywanpis chay tiempopeqa ima llakiy kajtinpis, noqallanchej profeta Daniel jina Diosta yupaychasunchej (Dan. 6:10, 11). Manchay ñakʼariy tiempopeqa manaña “janaj pacha reinomanta” willasunchu, imaraykuchus tukukuy tiempo kanqa (Mat. 24:14). Astawanpis mana manchachikuspa runasman juchachana willayta willamusunchej. Ichapis chay willayqa kanqa Satanaspa pachan wiñaypaj chinkachisqa kananmanta. w15 15/7 2:3, 8, 9

Chayrayku Jesús runas chejnikunawanchejta nerqa. Yuyarinataj chay runas mana entiendesqankuta, noqanchejpaj Diospa gobiernonpi atienekuy may sumaj kasqanta. Jehová Diosman cheqa sonqo kayta munanchej chayqa, runas imata nejtinkupis chayri ruwajtinkupis payta kasukunapaj kallpachakunanchej tiyan (Dan. 3:16-18). Ichapis wakin waynuchitus, sipasitas ima, kay pachamanta runas jina kayta munanku. Wakinkunaqa runasta manchachikusqankurayku banderata napaykunkuman chayri suyoj raymisninpipis chhapukunkuman. Chayrayku tatasqa wawasninkuta escuelapi mana manchachikunankupaj yanapananku tiyan. ¿Imaynatá yanapankuman? Familiapi Diosta Yupaychanapaj Chʼisipi imaynatachus chaykunata Jehová Dios qhawasqanta parlarispa. Chantapis yachachillankumantaj imapichus creesqankuta, sutʼita, jatunpaj qhawaspa sutʼinchanankuta ima (Rom. 1:16). Wakin kutisqa ichá tatasqa wawasninpa yachachejninkuman imapichus creesqankumanta sutʼincharinanku kanqa. w15 15/7 3:15, 16

Jehovaqa Wawanta noqanchejrayku kachamuspa munakuwasqanchejta rikuchillantaj. Payqa chayta ruwarqa “paynejta kawsayniyoj kananchejpaj” (1 Juan 4:9). Apóstol Pablo nerqa: “Maychus tiempompi Cristo wañorqa juchasapasrayku. Cheqamanta mana pipis wañullanmanchu uj cheqan runarayku; ichapis atinman wañuyta uj kʼacha runarayku. Chay tukuywampis Dios munakuyninta rikuchiwanchej; juchasapasllaraj kashajtinchej, Cristo wañorqa noqanchejrayku”, nispa (Rom. 5:6-8). Jehová Wawanta noqanchejrayku qosqanqa may jatun munakuyninta rikuchiwanchej, chantapis paywan amigos kayta atinanchejpaj yanapawanchej. Jehová noqanchejrayku Wawanta qosqanqa tukuyta munakuwasqanchejta rikuchin. Diosman cheqa sonqo kasunchej chayqa, paraisopi sumaj kausayta qowasunchej, chayta yachaytaj mayta kusichiwanchej. Jesús noqanchejrayku kausayninta qosqanqa, Jehová munakuwasqanchejta rikuchin. Chayrayku chayta ruwasqanmanta tukuy sonqo agradecesqa kasqanchejta rikuchinallapuni. w15 15/8 1:13, 15

May sumajpuni kanqa Jehová Diosta sirviy kay Jallpʼata kamachimushajtin. Chayrayku tukuy sonqo llajtan imatachus niwasqanchejta kasukuna. Ichapis llajtanqa wakin kutis niwasun waj lugarespiñataj Diosta sirvinata. Sutʼincharinapaj, Estados Unidos sucursalpi llankʼaj wakin hermanosta manaña Betelpichu llankʼanankuta nerqanku. Congregacionesta waturejkunamanta wakin hermanostapis machitusña kasqankurayku chayri waj imasrayku precursores especiales jina llankʼanankuta nerqanku. Tukuy chay hermanostaj chay mosoj llankʼayninkuwan kusisqa kashanku, Jehovataj paykunata mayta bendecishan. Noqanchejpis kusisqa kayta, Jehová bendecinawanchejta ima munanchej chayqa, Jehovamanta yanapata mañakunanchej tiyan, payta sirvinapaj tukuy imata ruwananchej tiyan, llajtan ima ruwaytapis qowasqanchejwan kusisqa kananchej tiyan (Pro. 10:22). Mosoj pachapi kashajtinchej mana munasqanchej lugarpipunichu tiyakunanchejta niwajtinchej, ¿imatá ruwasun? Cheqamantapuni, maypi tiyakuspapis, ima llankʼayta ruwaspapis, Jehovaman mayta agradecekusun mosoj pachapi tiyakojta saqewasqanchejmanta. w15 15/8 3:8

Noeqa sajra runas chaupipi kausakuspapis, mana chay runas jinachu karqa. Payqa ni jaykʼaj Jehovata mana munakoj runaswan masichakorqachu. Astawanpis warminwan, wawasninwan, ñojchʼasninwan ima masichakorqa, tukuyninkutaj arcata ruwarqanku, runasmanpis willamorqanku (2 Ped. 2:5). Chayraykutaj Jatun Parapi mana wañorqankuchu. Tukuyninchejtaj paykunamanta jamunchej, chantapis mayta agradecekunchej Noé, familian ima Jehovata kasukusqankumanta, sajra runaswan mana masichakusqankumanta ima. Ñaupa tiempomanta cristianospis mana masichakorqankuchu Jehovata mana yupaychaj runaswanqa. Chayraykutaj Jerusalén 70 watapi thuñisqa kashajtin mana wañorqankuchu (Luc. 21:20-22). w15 15/8 4:17, 18

Sonqota kusirichinapaj imatachus ajllasqanchej yanapanawanchejpajqa, sumajta qhawarikuna imaswanchus, mashkha unaytachus kusirikusqanchejta. ¿Imaynatá sonqo yuyayninchej chaykunata allinta ajllanapaj yanapawanchej? Biblia nin: “Sutʼi kanku aychaj ruwasqasnenqa”, nispa. Chaykunataj kanku “khuchichakuy, chʼichi kawsay, millay puriy, lantita yupaychay, layqa kay, chejninakuy, maqanakuy, tumpanakuy, phiñanakuy, churanakuy, phiñanakuspa tʼaqanakuy, waj yachachiykunata kasuy, envidianakuy, machakuykuna, millay fiestaspi puriykuna, chantá waj millay imaspiwan ima”. Pabloqa “chay imasta ruwajkunaqa mana Diospa reinonta herenciata jina japʼenqankuchu” nerqa (Gál. 5:19-21). Chayrayku tapurikuna: “¿Sonqo yuyayninchej saqellawanchejchu maqanakusmanta deportesta chayri suyunkurayku deportistasta pujllashasqankuta telepi qhawajta? ¿Sonqo yuyayninchej saqellawanchejchu khuchichakuyman, machayman, layqa ruwayman tanqaj peliculasta qhawajta?”, nispa. w15 15/9 2:11, 12

Biblianejtaqa mana sapallanchejmanta imachus allin, imatajchus mana allin kasqanta ajllanapajchu ruwasqa kasqanchejta yachanchej. Diosninchej Jehovaqa imachus noqanchejpaj allin kasqanta yachan. Chayrayku payta kasukojtillanchej, payta jatunpaj qhawajtillanchej, kusisqa, sonqo tiyasqas ima kausakusunchej. Tukuy kaytataj mayta munakuwasqanchejrayku willawanchej. Uj kʼacha tataqa, wawasninpa kausaynin imaynachus qhepaman kananmanta llakikun, munantaj kusisqas kausakunankuta. Chaywanpis kay tiempopi ashkha runasqa mana yachankuchu imaynachus kausayninku qhepaman kananta. Qhasillata kallpankuta tukuchinku kapuyniyoj kanankupaj llankʼaspa, imajtinchus chay kapuyninkoqa mana wiñaypajchu kanqa (Sal. 90:10). Chaywanpis noqanchejqa Jehová Diosman mayta agradecekunchej kay tiempopi kusisqa kausakunapaj yachachiwasqanchejmanta, qhepaman sumaj kausayta qonawanchejmanta ima. w15 15/9 4:10, 11

Ñaupa tiempomanta ashkha runas imaynatachus Dios Israel llajtata yanapasqanta rikuyta aterqanku. Sutʼincharinapaj, Jehovaqa ashkha milagrosta ruwarqa llajtanta Egiptomanta orqhomunanpaj, Sumaj Jallpʼapitaj ashkha reyesta atiparqa (Jos. 9:3, 9, 10). Chay reyesqa sonqosninkuta rumiyachisqankurayku, Jehová llajtanta yanapashasqanta mana reparayta munasqankurayku ima, chay maqanakupi atipachikorqanku. Ashkha watasninman sajra rey Achabpis imaynatachus Jehová llajtanta yanapasqanta rikuyta atillarqataj. Chantapis Eliasqa Diosmanta mañakorqa cielomanta nina uraykamunanta, Jehovataj mañakuyninta uyarerqa. Chantapis Eliasqa Achabman nillarqataj Jehová mayta parachimunanta, ajinamanta chay chʼaki watas tukukunanpaj. Chaytaj nisqanman jinapuni karqa (1 Rey. 18:22-45). Chaywanpis Achabqa, Jehová chay milagrosta ruwasqanta mana creerqachu. ¿Imatataj Achabpa, wajkunaj kausayninkupis yachachiwanchej? Diospa yanapayninta reparayta atisqanchejta. w15 15/10 1:4, 5

Jehovapi atienekusun, nisqanman jinataj ruwasun chayqa pay yanapawasunpuni. Pabloqa nerqa: “Diosqa tukuy imata ruwayta atin, mañakusqanchejmantapis yuyasqanchejmantapis aswan ashkhataraj, noqanchejpi trabajashan, chay atiyninman jina”, nispa (Efe. 3:20). Noqanchejqa Jehová Diosta sirvinapaj tukuy atisqanchejta ruwanchej, chaywanpis chaytaqa mana sapallanchej ruwayta atisunmanchu. Chayrayku Jehovaman mayta agradecekunchej kallpachakusqanchejrayku bendecishawasqanchejmanta, noqanchejwan kashasqanmanta ima. Jehová Diosqa imatachus munayninman jina mañakojtinchej, qonawanchejtapuni niwanchej (1 Juan 5:14). Chayrayku astawan creeyta mañakojtinchej, pay qonawanchejtapuni yachanchej. Jehová Diospi tukuy sonqo atienekusunchej chayqa, pay bendeciwasunchej, astawan creeyta mañakojtinchejpis qowasunchejpuni. Ajinamantataj sinchʼi creeyniyoj kasun, “Diospa reinonman yaykunapaj” jinataj qhawasqa kasun (2 Tes. 1:3, 5). w15 15/10 2:16-18

Jehová Diospi, Jesuspi ima tʼukureyqa wiñay tukusqa cristianos kanapaj, sinchʼi creeyniyoj kanapaj ima yanapawasun (Heb. 5:14; 6:1, 2). Pisillata Jehovapi tʼukurejtinchejtaj, pisimanta pisi paymanta karunchakuyta qallarisunman, creeyninchejpis pisimanta pisi chinkapunman, ajinamantataj manaña amigosninpis kasunmanchu (Heb. 3:12). Jesusqa Bibliapi leesqanchejta mana tukuy sonqochu japʼikojtinchej, ‘kay pachaj imasnin, qhapaj kaykunasnin, aychaj munaynin imaʼ Jehovamanta karunchanawanchejta nerqa (Luc. 8:14, 15). Chayrayku Diospa Palabranpi tʼukurinanchej, sapa pʼunchaytaj Jehovata astawan rejsinanchejqa may sumaj. Chaytaj pay jina ruwanapaj, kʼacha kaykunasninta rikuchinapaj ima yanapawasun (2 Cor. 3:18). Chayrayku Jehovamanta yachakunapaj, pay jina ruwanapajtaj kallpachakunallapuni. Chayta ruwayqa may sumaj (Ecl. 3:11). w15 15/10 4:13, 14

Tatas, qankunaqa munankichejchá wawasniykichej Jehovaj sumaj amigosnin kanankuta. Chayrayku Jehová Diosqa kamachisunkichej paymanta wawasniykichejman yachachinaykichejta (Efe. 6:4). Chayrayku wawasniykichejmanqa Bibliamanta yachachillaychejpuni. Sutʼincharinapaj, uj kʼacha tataqa wawasninta munajta mana munajta escuelaman kachan, yachakusqanku kausayninkupi yanapananta yachasqanrayku. Ajinallatataj cristiano tataspis wawasninku Diosmanta yachakunankutapuni munanku, kausayninkupi yanapananta yachasqankurayku. Chayrayku tantakuykunaman, jatun tantakuykunaman rinankuta, Familiapi Diosta Yupaychanapaj tantakuypi kanankuta ima kamachinku. Qankunapis wawasniykichejman yachachiychej willayman llojsinallankutapuni. Jesús jinataj yanapaychej Bibliamanta wajkunaman willaspa kusiyta tarinankupaj. w15 15/11 2:6

Jehovaqa familiapi pichus kamachej uma kananta ajllan. Chaywanpis Jehovaqa mana munanchu pipis sajra capataz jina familianta kamachinanta. Qosa, warminpa kamachej uman jina kajtinpis, Bibliaqa qosata warminta “sumajpaj qhawa[nanta]” yuyaychan (1 Ped. 3:7). ¿Imaynatá uj qosa warminta jatunpaj qhawasqanta rikuchinman? Imatachus necesitasqanta qhawaspa, chantá atikojtenqa munasqanman jina imatapis ruwaspa. Biblia nin: “Qosas, sapa ujpis warmiykichejta munakuychej imaynatachus Cristoqa Iglesiata munakorqa, ajinata, Iglesiaraykutaj kawsayninta churarqa”, nispa (Efe. 5:25). Rikunchej jina, Jesusqa yachachisqasninta mayta munakorqa, paykunaraykutaj kausaynintapis qorqa. Uj qosa Jesús jina ruwajtin, warminta munakuywan qhawajtin ima, warmenqa munakuyta, jatunpaj qhawayta, yanapayta ima atillanqa (Tito 2:3-5). w15 15/11 4:6, 7

Tiempo pasasqanman jina ashkha cristianos griegota parlaj kanku, hebreota parlanankumanta nisqaqa. Tukuy runas griegota parlasqankuraykutaj, Mateo, Marcos, Lucas, Juan libro ima griegopi qhelqakorqa. Chantapis Pabloj cartasnin, Bibliaj waj librosnin ima griegopi qhelqakullarqataj. Griego Qhelqasqasta qhelqajkunaqa, wakin palabrasta Hebreopi Qhelqasqasmanta copiananku kajtin, Septuaginta nisqamanta copiaj kanku, Septuaginta griegopi qhelqasqaña kasqanrayku. Chayta pantaj runas tijrachisqankurayku, wakin palabrasqa mana Hebreo Qhelqasqaswan kikinpunichu. Jinapis Diosqa chay qhelqasqata Palabranpi kananta saqerqa. Chaytaj Jehová Dios tukuy laya parlaykunata allinpaj qhawasqanta yachachiwanchej (Hech. 10:34, 35). w15 15/12 1:8, 9

Bibliaqa ‘uj tiempo tiyan chʼinyanapaj’ nin (Ecl. 3:7). Kayqa niyta munan wakin kutis chʼinlla kananchej kasqanta. Sutʼincharinapaj, wajkuna parlashajtinku paykunata jatunpaj qhawasqanchejrayku uyarinanchej tiyan (Job 6:24). Nitaj imallatapis yachaspaqa wajkunaman willarqonachu (Pro. 20:19). Pillapis sonqonchejta nanachinawanchejpaj jina imatapis nejtenqa, mana phiñakunachu, astawanqa chʼinlla kakunanchej tiyan (Sal. 4:4). Chaywanpis Bibliaqa ‘uj tiempo tiyan parlanapajʼ nispa nin (Ecl. 3:7). Amigonchej may valorniyoj regalota qowajtinchej, mana pakaykusunmanchu, ¿icharí? Astawanqa chay regalota allinta apaykachaspa jatunpaj qhawasqanchejta rikuchisunman. Ajinallatataj Jehovaman may agradecesqa kasqanchejta rikuchisunman allin yuyaywan parlaspa, imaraykuchus pay parlayta atinanchejpaj jina ruwawarqanchej. Sutʼincharinapaj, parlayninchejwanqa Diosta jatunchasunman, wajkunata kallpachasunman, imatachus yuyasqanchejta, imatachus necesitasqanchejtapis willakuyta atisunman. w15 15/12 3:4, 5

Kay tiempopeqa ni mayqen hermanopis onqoyninchejmanta sanoyachinawanchejpaj uj milagrota ruwayta atinchu (1 Cor. 12:9). Chaywanpis ichá wakenqa allinyarinanchejrayku yanapayta munawasunman, mana mañakojtinchejpis yuyaychawasunman. Arí, wakin yuyaychaykunaqa ichá allin kanman. Sutʼincharinapaj, apóstol Pabloqa Timoteoman uj chhika vinota ujyananta yuyaycharqa. Imaraykuchus Timoteoqa wijsa nanaywan kasharqa, ichapis chʼichi yakuta ujyasqanrayku. Chaywanpis sumajta qhawarikunanchej tiyan imatachus wajkuna yuyaychawasqanchejta. Uj hermano ichá ima jampitapis chayri ima qhoratapis ujyanata niwasunman. Chayri ichapis nillawasunmantaj imatachus mikhunanchejta, imatatajchus mana. Ichapis niwasunman ujnin familiarninta chayta ruwasqan onqosqa kashajtin yanapasqanta. Chaywanpis chayqa mana ninayanchu noqanchejtapis sanoyachinawanchejta. Uj jampi chayri uj tratamiento ashkha runasta yanapanman, wakintataj astawan onqochinman (Pro. 27:12). w15 15/12 4:13

Noqanchejqa Adanmanta juchata herenciata jina japʼisqanchejrayku wañunchej (Rom. 5:12). Chaywanpis Jehovaqa mayta munakuwasqanchejrayku, Wawanta kay Jallpʼaman kachamorqa “tukuy runasrayku wañunampaj” (Heb. 2:9). Jesús kausayninta qosqanqa mana wañuyllamantachu kacharichiwanchej, manaqa wañuytapis wiñaypaj chinkachenqa (Isa. 25:7, 8; 1 Cor. 15:22, 26). Jesuspi creejkunaqa wiñaypaj kusisqas, sonqo tiyasqas ima kausakonqanku, wakenqa Cristowan khuska janaj pachapi, wakintaj kay Jallpʼapi (Rom. 6:23; Apo. 5:9, 10). ¿Ima bendicionestawantaj japʼisunchej Jehová Wawanta wañunanpaj qosqanrayku? Jehová Diosninchej Wawanta wañunanpaj qosqanrayku, kay Jallpʼa uj kʼachitu paraisoman tukonqa, onqosqas sanoyanqanku, wañusqaspis kausarimonqanku (Isa. 33:24; 35:5, 6; Juan 5:28, 29). Chayraykutaj Jehovata, Jesusta ima mayta munakunchej (2 Cor. 9:15). w16.01 2:5, 6

Jehová ajllasqa cristianosta niraj janaj pachaman rinankupaj wajyarishajtin, ichapis paykunaqa kay Jallpʼapi wiñaypaj kausakuyta suyakusharqanku. Ichapis mayta suyakusharqanku Jehová kay Jallpʼata uj paraisoman tukuchinanta, sajra kausayta chinkachinanta ima. Chantá ichapis wañuymanta kausarimoj familiankuwan chayri uj amigonkuwan tinkushasqankupi yuyaj kanku. Ichapis tʼukurillajtaj kanku paraisopi uj wasita ruwakuspa tiyakunankupi, chayri imaymana poqoyniyoj sachʼasta churaspa poqoyninta mikhunankupi (Isa. 65:21-23). ¿Imaraykú uj jinata yuyayta qallarerqanku? ¿Llakisqa kasqankuraykuchu chayri mayta ñakʼarisqankuraykuchu? ¿Kay Jallpʼapi wiñaypaj kausaspa mana kusisqachu kanankuta yuyasqankuraykuchu? Chayri, ¿imaynachus janaj pachapi kausay kasqanta yachayta munasqankuraykuchu? Mana. Chay cristianosqa waj jinata yuyayta qallarinku Jehová chay yuyayta qosqanrayku. Jehová uj cristianota janaj pachaman rinanpaj ajllajtin, espíritu santonwan yanapan uj jinata yuyananpaj, janaj pachapi kausayta suyakunanpaj ima. w16.01 3:11, 13

Jehová Dios tukuy imata ruwan. Paylla may yachayniyoj, may atiyniyojtaj. Chaytataj Job sutʼita entienderqa. Chayrayku nerqa: “Noqa yachani qanqa tukuy imata ruwayta atisqaykita; qampajqa mana imapis kanchu mana atikojqa”, nispa (Job 42:2). Arí, Jehová Diostaqa imatachá ruwayta munan chayta ruwayta atinman ni pejpa yanapaynillanwan. Chaywanpis munakuwasqanchejrayku paywan khuska llankʼananchejpaj wajyariwanchej. Jehová Diosqa niraj ni imata ruwashaspa Jesustaraj ruwarqa. Chantapis janaj pachapi, jinallataj kay pachapi tukuy imata ruwaysinanta saqerqa (Juan 1:1-3, 18). Jehová Diosqa Wawan tukuy imata ruwaysinanta saqespapis, wajkunapis chayta yachanankuta saqerqa. Chayta ruwasqantaj, ¡manchay sumajpuni! (Col. 1:15-17). w16.01 5:1, 2