Abril

Jesuspa wañuyninpi mana creejkunataqa, Dios enemigosninta jina qhawan. Chayrayku chay runasman ninanchej tiyan Dioswan amigos kayta atisqankuta. Juan nerqa: “Diospa Wawanpi creejqa wiñay kausayniyoj kanqa, Diospa Wawanta mana kasojrí, mana wiñay kausayta japʼenqachu, astawanpis Diospa kʼajaj phiñakuynin paypa patanpi kanqa”, nispa (Juan 3:36). Mayta kusikunchej Jesuspa wañuyninrayku, Dioswan amigos kayta atisqanchejmanta (2 Cor. 5:18-20). Chayrayku tukuyman predicashanchej, cheqa kajmantataj yachachishanchej, Dioswan amigos kanankupajtaj yanapashanchej. Chaytaj may sumajpuni, imaraykuchus Diospa kʼacha yanapayninmanta sumaj willaykunata willashanchej. w16.07 4:8-10

Jesusqa Diosmanta mañakuyta yachachishaspa, ñaupajtaqa Diospa sutin jatunchasqa chayri llimphupaj qhawasqa kananta nerqa. Jehovaqa santo chayri may llimphu kasqanrayku, tukuy ima ruwasqan, leyesninpis mana chʼichiyoj. Jinapis Edén huertapi, Satanasqa Dios kamachiykunata churananpaj derechoyoj kasqanta iskayrayacherqa. Payqa Jehovamanta llullakorqa, sutintataj chʼichicharqa paymanta sajrata parlaspa (Gén. 3:1-5). Jesusqa Jehovaj sutinta mayta munakoj, tukuy atisqantataj ruwarqa Diospa sutin jatunchasqa kananpaj (Juan 17:25, 26). ¿Imaynatá chayta ruwarqa? Jesusqa kausayninwan yachachisqanwantaj, wajkunata yanaparqa Jehovaj kamachiykunasnin cheqanpuni, allinninchejpajtaj kasqanta reparanankupaj (Sal. 40:8-10). Jesusqa Diosta mana wasancharqachu. Payqa rikucherqa mana pantaj runa tukuy imapi Diosta kasukuyta atisqanta. w17.02 2:2-4

Corderomanta parlaspaqa, Jesucristomanta parlashan. ¿Imaynatá chayta yachanchej? Jesús Jallpʼapi kashajtin, paymanta nerqanku: “¡Kaymin Diospa Corderonqa! Payqa kay mundomanta juchata chinkachenqa”, nispa (Juan 1:29). Tukuy reyesmanta nisqaqa, Jesuslla kausayninta tukuy sonqo qorqa kamachiyninpi kajkunata juchamanta kacharichinanpaj. Chayrayku payta jatunchananchej tiyan, “kamachejkunaj Reynin, señorkunaj Señornintaj” kasqanrayku (1 Tim. 6:14-16). Cielopi kausajkuna takispa ninku: “Wañuchisqa karqa chay Corderoqa japʼinanpaj jinapuni atiyta, qhapaj kayta, yachayta, kallpata, jatunpaj qhawasqa kayta, jatunchasqa kayta, bendiciontawan”, nispa (Apo. 5:12). Jesusta, Jehová Diosta ima jatunchasun chayqa, wiñaypaj kausayta atisun (Sal. 2:11, 12; Juan 5:23). w17.03 1:3, 4

Jefteqa “wapu maqanakoj runa karqa”. Chantá israelitaspa kausayninkumanta, Moisespa Leyninmanta ima sumajta yacharqa. Imaynatachus Jehová llajtanta qhawasqanpi tʼukurisqanqa, imachus allin, imatajchus mana allin kasqanta reparananpaj yanaparqa (Jue. 11:12-27). Chaytaj kausayninpi ima ruwaytapis sumajta ajllananpaj yanaparqa. Payqa yacharqa Dios kamachisnin purajmanta munanakunankuta munasqanta, vengakuytataj chejnikusqanta ima. Chantapis Leymanta yachakorqa imaynatachus wajkunata qhawananta, chejnikojkunata ima (Éxo. 23:5; Lev. 19:17, 18). Ichapis Josej kausaynin Jefteta yanapallarqataj. Payqa yacharqachá José hermanosninmanta khuyakusqanta hermanosnin chejnikojtinkupis (Gén. 37:4; 45:4, 5). Ichá Jefteqa José imatachus ruwasqanpi tʼukurerqa, chaytaj Jehovata kusichinanpaj jina ruwananpaj yanaparqa. Jefteqa maytachá ñakʼarerqa hermanosnin paywan chejninakojtinku. Jinapis mana chay llakiynillanpichu tʼukorqa. Imaraykuchus paypajqa Jehovaj sutinrayku, llajtanraykutaj maqanakoyqa aswan sumaj karqa (Jue. 11:1-3). w16.04 1:8, 9

Diospa kamachisnenqa tantakuykunata may jatunpaj qhawanku. Sutʼincharinapaj, ñaupa tiempomanta cristianosqa mayta munaj kanku tantakuyta Jehovata yupaychanankupaj, paymanta yachakunankupaj ima. Noqanchejpis tantakuykunaman riyta mayta munanchej. Chaywanpis ichá noqanchejmanta wakenqa ashkha horasta llankʼasqanchejrayku, ashkha ruwanasniyoj kashasqanchejrayku chayri may saykʼusqas kashasqanchejrayku tantakuykunaman riyta mana atillanchejchu. Wakin hermanosqa onqoyrayku chayri waj imasrayku mana tantakuykunaman riyta atillankuchu. Jinapis chay hermanosqa imaynachus kashasqankuta Jehová entiendesqanpi, Payta sirvinankupaj kallpachakusqankuta jatunpaj qhawasqanpi ima atienekuyta atinkuman. Ancianostaj chay hermanosta yanapankuman tantakuykunata telefononejta uyarichispa chayri grabapuspa. w16.04 3:3

Diospa cheqa sonqo kamachisninpi tʼukuriy yanapawasun, kay pachaman mana satʼikunapaj. Ñaupa tiempopi ashkha cheqa sonqo runas mana manchachikorqankuchu, sumajtataj ajllarqanku mayqenchus yanaparqa kay pachaman mana satʼikunankupaj. Sutʼincharinapaj, Sadrac, Mesac, Abed-nego ima, mana qorimanta ruwasqa lantita yupaycharqankuchu, Babiloniaj gobiernowan ninakusqanrayku (Dan. 3:16-18). Kay kinsa jovenespa kausayninkoqa, kay tiempomanta ashkha hermanosta yanapan suyunkumanta banderata mana yupaychanankupaj, mana manchachikunankupaj ima. Jesuspis mana politicaman satʼikorqachu, nitaj runasta tʼaqanachej imasmanpis. Yacharqataj sumajta ruwasqan yachachisqasninta yanapananta. Chayrayku paykunaman kallpachakunankuta nerqa. Hermanosqa kay pachaj imasninman mana satʼikunapaj yanapawasunman. Congregacionmanta waj hermanospis llakiyninchejmanta yachaspaqa yanapallawasuntaj. Nisunmantaj Diosmanta mañapunawanchejta. Noqanchejpis hermanosninchejta yanapananchej tiyan, Diosmanta mañapunanchej tiyan (Mat. 7:12). w16.04 4:16, 18

¿Jehovaj testigosnin qolqeta mañanchejchu willamunapaj? Mana. Astawanqa Diosmanta willamunchej, runa qolqeta munasqanman jina qosqanwan (2 Cor. 9:7). Bibliamanta yachachimusqanchejmanta mana uj sueldota japʼispapis, 2015 watapi 1.930 millones horasta willamorqanchej, sapa killataj runasman 9 millonesmanta astawan yachachimorqanchej. Chayta ruwananchejpajtaj, qolqenchejta may kusiywan churanchej. Uj yachayniyoj runa, Jehovaj testigosninpa llankʼayninkumanta nerqa: “Paykunaqa mana qolqenkuta usuchinkuchu, imaraykuchus mana paganankuchu tiyan pastoresninkuman. Paykunaqa Diosmanta willamuyta, yachachimuyta ima ñaupajman churanku”, nispa. Mana qolqeraykuchu willanchej chay, ¿imaraykutaj willamunchej? Diosta, runa masinchejta ima munakusqanchejrayku. Ajinata ruwaspataj kunan diapaj texto nisqanta juntʼanchej. w16.05 2:9

Bibliaqa niwanchej sajra imasta yuyanapaj, ruwanapaj tanqaj imaswan mana sonqonchejta kusirichinata. Imastachus Jehová chejnisqanta, munakusqanta ima sutʼita yachaspaqa, mana hermanosninchejta tapusunchu ima librostachus leenata, ima peliculastachus qhawanata, ima pujllaykunatachus ajllanata ima. Manaqa noqanchej yachasunchej imatachus ruwanata. Imallatapis ajllananchej kajtin, sumajta tʼukurinanchej tiyan imachus Diosta kusichisqanpi. Chayman jinataj ajllayta atisunchej. Chaywanpis uj sumaj imata ajllananchej kajtenqa, allin kanman uj ancianoj yuyaychayninta chayri wiñay tukusqa cristianoj yuyaychayninta maskʼananchej (Tito 2:3-5; Sant. 5:13-15). Jinapis mana allinchu kanman paykunata ninanchej cuentanchejmanta imatapis ajllanankuta. Apóstol Pablo nerqa: “Imaraykuchus sapa uj qʼepinta apanan tiyan”, nispa (Gál. 6:5, sutʼinchaynin). Chayrayku imatachus Biblia yachachisqanpi sumajta tʼukurinanchej tiyan, chaymantataj noqanchej kikin ajllananchej tiyan (Heb. 5:14). w16.05 3:15, 16

Diosqa runasta mana noqanchej jinachu ñawisninpa rikusqallanta qhawan. Manaqa imaynachus sonqonku kasqanta qhawan (1 Sam. 16:7b). Cristiana congregacionta rikhurichishajtintaj, chay sutʼi rikukorqa. Jehovaqa, pisipaj qhawasqa runasta payman, wawanman ima pusarqa (Juan 6:44). Chaykunamanta ujnintaj Saulo sutiyoj uj fariseo karqa. Jinapis Jehovaqa Sauloj sonqonta rikorqa, sumaj llinkʼi tʼuru jina kasqantataj qhawarqa (Pro. 17:3). Chayrayku “willananpaj” ajllarqa, “mana judío kajkunaman, reyesman, Israelpa wawasninmanpis” willamunanpaj (Hech. 9:15). Jehovaqa waj runastapis ajllallarqataj, sapa ujninkutataj cheqancharqa sumaj tʼuru vasota jina, “jatun pʼunchayllapi oqharinapaj” (Rom. 9:21). Chay runasmanta wakintaj suwas karqanku, machaj kanku, khuchichakoj ima kanku (1 Cor. 6:9-11). Diosmanta yachakuspataj creeyninkuta sinchʼiyacherqanku, saqerqankutaj Jehová cheqanchananta. w16.06 1:4

Jehová Diosqa makinpi llinkʼi tʼuru jina churakunallapajpuni Palabrannejta, congregacionnejta, willaynejta ima yanapawanchej. Bibliata sapa pʼunchay leey, tʼukuriy ima, Jehovaj makinpi llinkʼi tʼuru jina churakunallapajpuni yanapawanchej. Payqa Israel llajtamanta reyesta kamacherqa leyninta qhelqanankuta, sapa pʼunchay leenankuta ima (Deu. 17:18, 19). Apostolesqa Diosmanta Qhelqasqata sapa pʼunchay leey, tʼukuriy ima, willamunankupaj sumaj kasqanta yacharqanku. Paykunaqa ashkha kutispi Hebreopi Qhelqasqasmanta, qhelqasqasninkupi oqharerqanku. Willaypitaj runasman Diosmanta Qhelqasqata leenankuta, leesqankupi tʼukurinankuta ima nej kanku (Hech. 17:11). Noqanchejpis reparanchej, Bibliata sapa pʼunchay leey, chaypitaj tʼukuriy may sumaj kasqanta (1 Tim. 4:15). Kaytaj llampʼu sonqosllapuni kanapaj, Jehová Diostaj cheqanchanawanchejpaj ima yanapawanchej. w16.06 2:10

Kunanpis Diospa kamachisnenqa purajmanta munanakusqankuta rikuchillankutaj, guerras kajtinpis. Sutʼincharinapaj, Iskay kaj Guerra Mundialpi 55 millones runas jina wañorqanku. Chaywanpis Jehovaj llajtanqa chay wañuchinakupi mana chhapukorqachu (Miq. 4:1, 3). Ajinamantataj Diospa llajtanqa “mana juchayojchu” karqa runas wañusqankumanta (Hech. 20:26). Kay tiempopi Diospa llajtanqa wiñashallanpuni, ‘kay mundoj diosnin’ Satanás enemigon kajtinpis (2 Cor. 4:4). Satanasqa kay pachamanta gobiernosnejta, radionejta, telenejta, Internetnejta ima tukuy imata ruwan mana willamunanchejpaj. Jinapis ni imata ruwayta atinchu sayachinanpaj. Yachantaj paypaj “pisi tiempollaña kasqanta”, chayraykutaj tukuy imata ruwashallanpuni Jehovata niña yupaychananchejpaj (Apo. 12:12). w16.06 4:3, 4

Jesusqa yachachisqasninman nerqa Jehová tukuy ima ruwasqanta qhawasqanta. Chayraykutaj ‘campo tʼikasmanta’ parlarqa. Campo tʼikasqa pʼachallisqa jina kanankupaj mana llankʼankuchu, nitaj phuskankuchu. Jinapis may kʼachitus kasqankurayku, Jesús nerqa: “Ni Salomonpis tukuy qhapaj kayninpi, ujnin tʼika jinallapis ropata churakorqachu”, nispa. Imaynatachus Jehová campo qhorata kʼachituta “pʼachallichi[sqanmanta]” parlaytawan, Jesusqa taporqa: “¿Manachu astawanraj qankunataqa pʼachallichisonqachej pisi creeyniyoj runas?”, nispa (Mat. 6:29, 30). Arí, Jehovaqa aswan sumajtaraj noqanchejpaj ruwanman. Jesuspa yachachisqasnenqa pisi creeyniyoj karqanku (Mat. 8:26; 14:31; 16:8; 17:20). Paykunaqa Jehová paykunata qhawananpi, paykunarayku imatachus ruwananpi ima atienekunanku karqa. Noqanchejrí, ¿sinchʼi creeyniyojchu kanchej? ¿Jehová qhawayta munakuwasqanchejpi, imatachus necesitasqanchejta qonawanchejpi atienekunchejchu? w16.07 1:15, 16

Ima chʼampaypi kajtinchejpis, Jehová chay chʼampayta aguantanapaj imatachus necesitasqanchejta qowasun (1 Ped. 1:6). Jehová imaymana kʼacha yanapayninta rikuchiwasqanchejrayku, ashkha bendicionesta japʼinchej. Arí, Jehová juchasninchejta perdonawanchej. Diosqa kʼacha yanapayninrayku perdonawanchej. Jinapis tukuy sonqo pesachikojtillanchej, sajra imasta niña ruwanapaj kallpachakojtillanchej perdonawanchej (1 Juan 1:8, 9). Pabloqa: “Diosmin laqhayaypa atiyninmanta kacharichiwarqanchej, munasqa Wawanpa kamachiyninmantaj pusaykuwarqanchej. Diospa Wawannejta preciowan kacharichisqa kasqanchejrayku, juchasninchej pampachasqa kanku”, nispa (Col. 1:13, 14). Jehovata jatunchayta munanchej, kʼacha yanapayninmanta may agradecesqas kashasqanchejrayku. Juchasninchejta perdonawasqanchejraykutaj, bendicionesta japʼiyta atinchej. w16.07 3:7-9

Satanás Edén huertapi Adanta, Evata ima chʼaukiyajtinpis, Jehovaqa runasta mana jinallatachu saqerparerqa. Astawanpis uj suyakuyta paykunaman qorqa. Chaytaj Bibliaj ñaupaj kaj profecianpi kashan. Jehovataj uj angelta ajllarqa Satanasta pʼaltarparinanpaj. Warmej miraynenqa, kasukoj runasta yanapanqa kay Jallpʼapi wiñaypaj kausakuyta atinankupaj, imaynatachus Jehová qallariypi munarqa, ajinata (Juan 3:16). Adanwan Evawan juchallikusqankoqa, qhariwarmi kausayninkupaj llakiyta rikhuricherqa, jinallataj paykunamanta jamoj qhariwarmispajpis. Sutʼincharinapaj, Evaqa wawasninta nanaywan onqokunan karqa, jinallataj mirayninmanta kaj warmispis. Warmisqa qosasninkuwan kaymanta wañurinkuman karqa, qosastaj warmisninkuta kamachinkuman karqa, wakin kutistaj maqankuman karqa. Chayqa kay tiempopi ashkha qhariwarmispi rikukun (Gén. 3:16). Jehovaqa munan qosas warmisninkuta munakunankuta. Munallantaj warmisqa qosasninkuta jatunpaj qhawanankuta (Efe. 5:33). Qhariwarmis purajmanta yanapanakojtinku, ashkha chʼampaykunata atipankuman. w16.08 1:6, 7

Bibliaqa rikuchin qhariwarmis ujchasqallapuni kananku kasqanta, qosa chayri warmi Diosta mana yupaychajtinpis (1 Cor. 7:12-14). Imaraykuchus mana creej qosaqa chayri warmeqa “llimphu” kashan, Jehovata yupaychajwan casarasqa kasqanrayku. Wawasninpis “llimphus kanku”, chayraykutaj Jehovaqa paykunata jarkʼan. Casi tukuy congregacionespi, qosanta chayri warminta Jehovaj testigonman tukunanpaj yanapaj cristianos tiyan. Apóstol Pedroqa cristiana warmista yuyaycharqa qosasninkuman kʼumuykukoj sonqoyoj kanankuta. Chantá nerqa: “Ajinamanta mayqellanpis Diospa palabranta mana kasukunchu chayqa, warminpa kausayninta rikuspa mana parlasqalla kasukuyta atenqa. Chaytataj ruwayta atenqa, warminpa llimphu kausayninta, sonqomantapacha jatunpaj qhawasqanta ima rikusqankurayku”, nispa (1 Ped. 3:1-4). w16.08 2:14, 15

Jehovaqa munan kamachisnin munanakunankuta, yanapanakunankuta ima (Luc. 22:24-27). Bibliaqa sutʼinchan Jesús wajkunarayku tukuy imata qosqanta, kausaynintapis (Mat. 20:28). Dorcasqa “ashkha allin ruwanasta ruwaj, wajchastapis yanapaj” (Hech. 9:36, 39). Romamanta Mariapis hermanospaj “mayta llankʼarqa” (Rom. 16:6). ¿Imaynatataj mosoj willajkunata yanapasunman, hermanosta yanapay may sumaj kasqanta yachanankupaj? Mosoj willajkunata wajyarisunman, machitu hermanosta chayri onqosqa hermanosta waturikamoj rinapaj. Tataspis onqosqasta chayri machitu hermanosta waturikamoj rejtinku, allin kanman wawasninkuta pusananku. Chantapis ancianosqa, jovenesta chayri mosoj willajkunata ninkuman machitu hermanospa wasinkuta allinchanankuta chayri waykʼupunankuta. Jóvenes, mosoj willajkuna ima, hermanos purajmanta yanapanakusqankuta rikuspa, kikinta ruwayta munanqanku. Uj cheqapi willashaspa uj anciano chay lugarpi tiyakoj hermanosta imaynachus kashasqankuta waturiyta yachaj. Chay ancianowan rej joventaj yachakorqa imaynasmantachus hermanosta yanapananpi (Rom. 12:10). w16.08 4:13, 14

Franciamanta uj sipas hermana nerqa: “Colegioymanta profesoresqa, wakin yachakojkuna Bibliapi creesqankumanta tʼukunku”, nispa. Kay tiempopi, ashkha runas mana creenkuchu Dios ruwawasqanchejta. Jehová Diosta yupaychaj joven kanki chay, chayri paymanta yachakushanki chayqa, ichá wakin kuti tapukunki: “¿Imaynatá rikuchiyman Diospuni tukuy imata ruwasqanta?”, nispa. Bibliaqa imatachus uyarisqanchejpi, leesqanchejpi ima allinta tʼukurinapaj yanapawanchej. Biblia nin: “Tanteyayqa allinta qhawasonqa”, nispa. Chayqa yanapasonqa, llulla yachachiykunata qhesanaykipaj, Jehovapi creesqaykita kallpachanaykipaj ima (Pro. 2:10-12). Jehovapi creeyninchej sinchʼi kananpajqa, payta astawan rejsinanchej tiyan (1 Tim. 2:4). Chayrayku Bibliata chayri publicacionesta leerishaspaqa, imatachus nishasqanpi tʼukurinayki tiyan. Leesqaykita entiendenaykipaj kallpachakuy. w16.09 4:1-3

Chʼampaykunasninchejqa may jatuchaj kajtinpis, ñaupajllamanpuni rinapaj kallpachakunanchej tiyan. Chayta ruwasun chayqa, Jehová Dios bendeciwasunpuni (Gén. 39:21-23). Kunanpis, noqanchejqa imaymana chʼampaykunasniyoj kanchej. Ichapis qhasimanta ñakʼarichisqas, chejnisqas, asipayasqas ima kanchej, chayri enviadiarayku pillapis llakichiwanchej. Jina kajtin ama phutikunachu. Astawanpis Jacobmanta, Raquelmanta, Josemanta ima yuyarikuna. Tʼukurinataj imachus Jehovata sirvinallankupajpuni yanapasqanpi. Diosqa paykunata kallpacharqa, bendicerqataj. ¿Imaraykú? Paywan amigos kasqankuta sumajpaj qhawasqankurayku. Paykunaqa ñaupajman rinankupaj mayta kallpachakorqanku, mañakusqankuman jinataj ruwarqanku. Tukukuy pʼunchaykunapi kausashasqanchejrayku, ñaupaqenchejpi churasqa kashan chay suyakuymanta chʼipakuna tiyan. Chayrayku Jehovaj bendicionninta japʼinanchejpaj, tukuy atisqanchejta kallpachakunallapuni. w16.09 2:8, 9

Wawasniykeqa Jehovapi creesqayki sinchʼi kajtin, mayta yachakonqanku. Paykunaqa ruwasqaykita qhawanqanku. Chayrayku creeyniykita kallpachallaypuni. Wawasniykeqa reparachunku Dios amigoyki kasqanta. Islas Bermudasmanta uj tatamama ninku: “Ima llakiyniyoj kajtiykupis, Jehovaj yanapayninta wawasniykuwan khuska mañakuyku. Paykunatapis Jehovamanta mañakunankuta niyku. Kuraj wawaykuta niyku: ‘Diospi tukuy sonqo atienekuy, Gobiernonpaj llankʼallaypuni, nitaj anchata llakikuychu’, nispa. Uj chʼampay allinchakojta rikuspa, wawaykoqa Jehová yanapashawasqaykuta reparan. Chaytaj Diospi, Bibliapi ima creesqanta mayta sinchʼiyachin”, nispa. Tatas, wawasniykichejta mana tanqayta atinkichejchu Diospi creenankupaj. Qankunaqa tarpuwajchej, qarpawajchejtaj, jinapis Jehovalla wiñachiyta atin (1 Cor. 3:6). Chayrayku wawasniykichejman Diosmanta yachachinapaj, mayta kallpachakuychej. Creeyniyoj kanankupaj Diospa atiyninta mañakuychej. Paytaj kallpachakusqaykichejta bendicenqapuni (Efe. 6:4). w16.09 5:16-18

Sergepi, warmin Murielpi ima tʼukurina. Paykunaqa waj parlaypi kaj congregacionpi, kinsa wata kurajta karqanku. Repararqankutaj wawanku willaypi, tantakuykunapi ima mana kusisqachu kashasqanta, chaypacha wawanku 17 watasniyoj kasharqa. Serge nin: “Wawayku congregacionpi mana ñauparishasqanta reparasqaykurayku, ñaupaj congregacionniykuman kutipuyta ajllarqayku”, nispa. ¿Imapitaj tatas tʼukurinanku tiyan, ima parlaytachus wawasninku astawan entiendenku, chay congregacionman ripunankupaj? Uj kaj, tʼukurinanku tiyan wawasninkuman Diosmanta yachachinankupaj, waj parlayta yachachinankupaj ima, tiemponku kananpichus, manachus. Iskay kaj, ichá tatasqa reparanqanku wawasninku willayman llojsiyta, tantakuykunaman riyta, waj parlaypi kaj congregacionpi Diosta sirviyta ima mana munasqankuta. Ajinapi rikukuspa tatasqa, ima parlaytachus wawasninku astawan entiendenku, chay congregacionman ripuyta ajllanqanku. Wawasninku Dioswan sumajta masichakusqankutawan, ichá tatasqa waj parlaypi kaj congregacionman kutipuyta ajllanqanku (Deu. 6:5-7). w16.10 2:14, 15

Noeqa uj jatun arcata ruwarqa. Ichá vecinosnenqa taporqanku imaraykuchus chayta ruwashasqanta. Noeqa mana chʼinllachu qhepakorqa, imajtinchus Bibliaqa “cheqan kajta willaj” kasqanta nin (2 Ped. 2:5). Payqa runasman willarqa Dios Jatun Parata apamunanta, sajra ruwaykunata chinkachinanpaj. Jehovataj nerqa: “Noqa tukuchisaj kay runasta. Paykunaj juchallikusqankurayku imaymana jucha kay pachaman juntʼan”, nispa. Ichá Noeqa Jehová payman nisqanta, kikisitunta runasman willarqa. Jehovaqa Noeman nillarqataj: “Jatun parata parachimusaj [...] kay pachata pʼampanankama, kay pachapi tukuy kawsajkunata chinkachinampaj. Jallpʼa patapi tukuy ima kawsajkuna wañonqanku”, nispa. Noetaj runasman sutʼincharqachá imatachus ruwanankuta salvakunankupaj. Jehová payman nisqa: “Qan yaykunki arcaman”, nispa (Gén. 6:13, 17, 18). w16.10 4:7

Jehovaqa tatasta Biblianejta yuyaychan, imaynatachus wawasninkuta uywanankuta. Cristiano tatasqa sumajta qhawarikunanku tiyan, ama kay sajra pachamanta runas jina yuyanankupaj (Efe. 2:2). Wakin lugarespi tatasqa ninku: “Wawastaqa warmis yachachinanku tiyan”, nispa. Bibliarí iskayninkuta kamachin, wawasninkuta Jehovamanta yachachinankuta (Efe. 6:4). Jehová Diosta munakoj tatamamasqa, wawasninku Samuel jina kanankuta munanku. Payqa juchʼuymantapacha Jehovaj amigon karqa (1 Sam. 3:19). Chantapis familianchejpi chayri trabajonchejpi niraj imatapis ajllashaspa, allin kanman Bibliaj nisqanpiraj tʼukurinanchej. Noqanchejqa kausayninchejpi imatachus ruwananchejta mana niyta atisunmanchu, chayrayku Tatanchej Jehovaj yanapayninta maytapuni necesitanchej. w16.11 3:14, 15

Jehová Diospa ruwasqasninta qhawarispaqa, sutʼita reparanchej payqa mana imatapis patan urantachu ruwasqanta. Jehovaqa “kay pachata ruwarqa sumaj yachaywan, cielotapis sayacherqa sumaj yuyaywan” (Pro. 3:19). Jehová Diospa ruwasqasninmantaqa, ‘uj chhichiyta jinalla’ yachanchej (Job 26:14). Ajina pisillata yachaspapis, sutʼita reparayta atinchej tukuy ima maychus kananpi kashasqanta. Cielopi may chhika chʼaskas tiyan, chaykunataj mana takanakuspa kuyushanku. Jallpʼanchej, waj planetaspis intita muyushanku mana takanakuspalla. Chay tukuy imasqa ajina, Jehová Dios planetasta, chʼaskastawan maynintachus purinankuta kamachisqanrayku. Cielota, Jallpʼata ima tʼukunapaj jina ruwarqa. Chayraykutaj payta jatunchayta, cheqa sonqowan yupaychayta ima munanchej (Sal. 136:1, 5-9). w16.11 2:3

Malaquías 3:1-3 versiculospi sutʼinchan, imachus Bibliamanta Yachaqajkunawan kasqanta 1914 watamanta 1919 watakama. Cheqa ‘Señor’ Jehová Diosqa, ‘tratomanta willaraj’ Jesucristowan khuska “levitasta” qhawarej jamorqa. Chay levitasqa ajllasqa cristianoswan ninakunku. Jehová paykunata cheqanchasqantawan, llimphuchasqantawan ima, wakichisqa kasharqanku waj ruwayta japʼinankupaj. Jesusqa 1919 watapi ‘allin kamachi, yuyayniyojta’ churarqa Jehová Diospa llajtanta ñaupajman pusananpaj, yachachinanpajtaj (Mat. 24:45). Jehová Diospa kamachisnenqa Jatun Babiloniamanta kacharichisqa karqanku. Chaymantapachataj paykunaqa Diospa munayninmanta astawan yachakorqanku, Diostapis astawan munakorqanku. Chay sumaj bendicionta japʼisqankumanta mayta agradecekunku. w16.11 5:14

Noqanchejqa “munakunchej, Jehová Diosninchej ñaupajta munakuwasqanchejrayku” (1 Juan 4:19). Jehová Diosninchejta astawan munakojtinchej, creeyninchejqa astawan sinchʼiyanqa, nitaj iskayrayasunchu Payta munakojkunata tʼinkananmanta (Heb. 11:6). Jehová Diosqa tʼinkata qoyta yachanpuni. Paypi creeyninchej sinchʼi kananpajtaj, creenanchej tiyan Diosqa payta tukuy sonqo maskʼajkunaman tʼinkata qonanta. Imaraykuchus “creeyniyoj kajqa mana iskayrayanchu imatachus suyakushan chay juntʼakunanmantaqa” (Heb. 11:1). Noqanchejqa mana iskayrayanchejchu Jehová cheqa sonqo kajkunata bendecinanmanta, imaynatachus kunan pʼunchaypaj texto nisqanta. Chay niwasqanchejman jina ruwaspaqa, Diosman mayta agradecekunchej. w16.12 4:1-3

Uj cristianoqa Jehová Diosta unaytaña sirvispapis, ‘aychaman jina’ kausayta qallarinman. Apóstol Pablo imatachus Romanos 8:6 versiculopi nisqanman jina, ¿juchachu mikhunapi, trabajopi, kusirikuypi chayri munanakuypi yuyay? Mana. Chay imastaqa ruwanchejpuni. Jesuspis mikhurikorqa, wajkunatapis mikhucherqa. Chantapis samarikunan kasqanta yacharqa. Apóstol Pablotaj casarasqasta yuyaycharqa, qhariwarmi jina puñuykunankutapuni. Pablo “aychaj munayninpi yuyayqa” nisqan, ¿ima niyta munan? Apóstol Pablo griegopi oqharisqan palabraqa, niyta munan uj imapi manchayta yuyay. Uj yachayniyoj runa sutʼinchasqanman jina, chayta ruwaj runaqa “munaynillanpi yuyan, chayllamanta parlan”, chayman jinataj kausan. w16.12 2:5, 9, 10

Noqanchejqa sajra munayninchejwan atipachikuspa, jatunchakuyta atisunman. Ñaupa tiempopi ashkha runasqa jatunchakoj runasman tukorqanku, wajkunawan ancha sumajpaj qhawachikuyta munasqankurayku, envidiakusqankurayku, phiñakusqankurayku ima. Chaytaj Diospa Palabranmanta wakin runaspa kausayninkupi rikukorqa. Paykunamanta karqanku Absalón, Uzías, Nabucodonosor. Paykuna jatunchakusqankurayku, envidiakusqankurayku, phiñakusqankurayku ima Jehová Dios paykunata kʼumuykachacherqa (2 Sam. 15:1-6; 18:9-17; 2 Cró. 26:16-21; Dan. 5:18-21). ¿Imaraykutaj runas wakin kutis jatunchakunkuman? Chayta yachanapajqa Abimelecpi, Pedropi ima tʼukurina kanman (Gén. 20:2-7; Mat. 26:31-35). ¿Runaykachaspachu imatapis ruwarqanku? ¿Mana tukuy imata yachasqankuraykuchu pantarqanku? Chayri, ¿imatapis mana tʼukurispallachu ruwarqanku? Noqanchejqa imachus runaj sonqonpi kasqanta mana yachayta atisunmanchu. Chayraykutaj mana wajkunata juchachayta atisunmanchu. w17.01 3:9, 10

Kay tiempopis, ashkha hermanosninchej Jehovapi tukuy sonqo atienekullankutaj wajcha viuda jina. Noqanchejpis Diospa Gobiernonta ñaupajman churasun chayqa, Jehovaqa ni imata pisichiwasunchu (Mat. 6:33). Imatachus mana ruwayta atisqankupi yuyanankumantaqa, imatachus ruwayta atisqankupi yuyanku. Hermano Malcolmpi tʼukurina. Payqa Diosman cheqa sonqo karqa. Señoranwan khuska Jehovata unayta sirvispa kusikorqanku, wakin kutis llakiypi kajtinkupis. Malcolm nerqa: “Imachus kausayninchejwan kanantaqa mana yachayta atisunmanchu. Chaywanpis Diosqa paypi atienekojkunata bendecinpuni”, nispa. Chantataj nerqa: “Tukuy atisqanchejta willanapaj Diosmanta yanapata mañakuna. Imatachus ruwayta atisqallanchejta ruwana, manataj mana atisqanchejtaqa”, nispa. Kay sajra mundoqa ‘sajra kasqanmanta aswan sajraman’ tukushan. Chayrayku astawan llakiykunasniyoj kasunchej (2 Tim. 3:1, 13). Jinapis mana chay llakiykunawan atipachikunachu tiyan. Astawanpis Jehovapi atienekuna, imastachus ruwayta atisqanchejtataj ruwana. w17.01 1:17-19

Davidqa uj sumaj templota Jehovapaj ruwayta munarqa. Jinapis Jehovaqa mana chaytachu munarqa imaynatachus kunan pʼunchaypaj texto nin jina. Chaywanpis Jehovaqa Davidman nerqa paywanpuni kananta, jinapis templotaqa ujnin wawan ruwananta. ¿Imaynataj David kasharqa? (1 Cró. 17:1-4, 8, 11, 12; 29:1). Davidqa Jehovapaj uj templota ruwapuytapuni munarqa. Chayrayku mana paychu ruwananta yachaspa, ichá sonqo pʼakisqa kasharqa. Jinapis wawan Salomón templota ruwananpaj, tukuy imata wakicherqa. Davidqa trabajajkunata tantarqa, jinallataj qorita, qolqeta, bronceta, fierrota, maderatapis. Payqa mana llakikorqachu, pichus templota ruwaspa jatunchasqa kananmanta. Chay temploqa Salomonpa templon sutiwan rejsikun. Astawanpis Davidqa, Salomonta nerqa: “Kunanqa wawáy, Tata Diosqa qanwan kachun, Señorniyki Tata Diospa Templonta jatarichiyta atinaykipaj, imaynatachus qan ruwanaykita nisqanman jina”, nispa (1 Cró. 22:11, 14-16). w17.01 5:6, 7

Qhatiykachasqa kaspapis, Dios kamachiwasqanchejman jina kausakunapaj kallpachakunchej. Ajinamantataj sutinta jatunchanchej (Mat. 5:14-16). Llimphu kausayniyoj kaspaqa, rikuchinchej Satanás llulla kasqanta, Diospa kamachiykunasnintaj allinninchejpaj kasqanta. Juchasapas kasqanchejrayku, imapipis pantasunpuni. Chay kajtintaj juchanchejmanta pesachikuna, tukuy atisqanchejtataj kallpachakuna Jehovaj sutinta manaña chʼichichanapaj. Ajllasqa cristianosmanta chayri waj ovejasmanta kajtinchejpis, Jehovaqa Jesuspa wañuyninpi creejtinchej juchasninchejta perdonawanchej. Jehovaqa kausayninkuta payman qojkunata, payta yupaychanankupaj japʼikapun. Ajllasqa cristianostaqa cheqan runaspaj qhawan wawasnin kanankupaj, waj ovejasmanta kajkunatataj amigosnin kanankupaj (Juan 10:16; Rom. 5:1, 2; Sant. 2:1-25). Jesús kausayninta qosqanrayku, Diosman qayllaykuyta atinchej, sutinta jatunchaytapis. w17.02 2:5, 6