Mayo

Jefté yacharqa israelitasta amonitasmanta kacharichinanpaj, Jehovaj yanapayninta necesitasqanta. Pay nerqa: “Sichus amonitasta atipayta yanapawanki chayqa, qampaj jaywanata qʼolachipusqayki, pichari ñawpajta wasiymanta taripawaj llojsimonqa, chayta”, nispa (Jue. 11:30, 31). ¿Imatá niyta munasharqa chayta nispa? Chayta nispa Jefteqa mana nisharqachu, pichus wasinmanta taripaj ñaupajta llojsimojta wañuchinanta. Imaraykuchus runasta ninapi qʼolachiyta Jehová chejnikusqanta yacharqa (Deu. 18:9-11). Israelitaspa tiemponpeqa, uj jaywanata qʼolachispa Jehovaman jaywayqa may sumaj karqa. Chayrayku Jefteqa nisharqa uj runata qonanta tinkukuna toldopi wiñaypaj sirvinanpaj. Jehovaqa Jeftej mañakuyninta uyarerqa amonitastataj makinman jaywaykorqa (Jue. 11:32). Jefteta taripaj llojsimorqa kʼata “ususin”, may munasqa wawan. ¿Imatá Jefté ruwanman karqarí? ¿Imatachus Jehovaman nisqanta juntʼanmanchu karqa? w16.04 1:11-13

Casi tukuy congregacionespi Bibliamanta Yachaqanapaj tantakuypi Jehovaman qayllaykuna nisqa librota estudiarqanchej. Jehová Diospa kʼacha kaykunasninmanta yachakuspa, hermanosninchej tapuykunaman kutichisqanku imaqa, Jehová Diosta astawan munakunapaj yanapawarqanchej, ¿icharí? Chantapis tantakuykunapi Bibliamanta astawan yachakullanchejtaj, umallirichiykunata, rikuchiykunata, Biblia leekusqanta ima sumajta uyarispa. Tantakuykunaqa Bibliaj yuyaychaykunasninman jina kausakunapaj yanapallawanchejtaj (1 Tes. 4:9, 10). Sutʼincharinapaj, Torremanta Qhawaj revistaqa Diospa llajtan imatachus necesitasqanman jina wakichikun. Ichá maykʼajllapis uj yachaqanata estudiarqanchej, mayqenchus yanapawarqanchej Jehová Diospaj astawan llankʼanapaj, aswan sumajta mañakunapaj, hermanosta perdonanapaj ima. Cristiano Kausayninchej nisqa tantakuytaj runasman willamunapaj, Bibliaj yachachiyninta sumajta yachachinapaj ima yanapawanchej (Mat. 28:19, 20). w16.04 3:4, 5

Maykʼajllapis qan tʼukurerqankichu ñaupa tiempomanta runas ima chʼampaykunapichus rikukusqankupi? Sutʼincharinapaj, Génesis libroj ñaupaj capitulosnillanpi leenchej: Caín, Abelta wañuchisqanta (Gén. 4:3-8); Lamectaj uj waynata sajmasqanrayku wañuchisqanta (Gén. 4:23); Abrahampa uywasninta michejkunawan, Lotpa uywasninta michejkunawan maqanakusqankuta (Gén. 13:5-7); Agar, Saramanta nisqa aswan sumaj warmi kasqanta creekusqanta, Sarataj Abrahamwan phiñakusqanta (Gén. 16:3-6); Ismael tukuywan maqanakusqanta, paywanpis tukuy maqanakusqankuta ima (Gén. 16:12). ¿Imaraykú Biblia chay chʼampaykunamanta parlan? Chay runaspa chʼampayninkumanta yachakunanchejpaj. Noqanchejpis paykuna jinallataj pantaj runas kanchej. Kikin chʼampaykunasniyoj kaspataj, allin kajta ruwaj runas jina ruwananchej tiyan, nitaj sajra kajta ruwaj runas jinachu. Ajinamanta wajkunawan allinta kausakuyta yachakusunchej. w16.05 1:1, 2

¿Imaynatataj Jesús, yachachisqasnin ima sumaj willaykunata willarqanku? Maypichá runas kaj kanku chayman rej kanku. Sutʼincharinapaj, paykunaqa callespi, mercadospi ima, tukuyman willarqanku. Wasimanta wasipis willallajtaj kanku (Mat. 10:11; Luc. 8:1; Hech. 5:42; 20:20). Paykunaqa wasimanta wasi willanankupaj wakichikusqankurayku, tukuy laya runasman willayta aterqanku. Jehovaj testigosnillan, Jesús 1914 watamantapacha Rey jina kamachishasqanmanta willashanchej. Noqanchejqa Jesús kamachiwasqanchejman jina tukuy runasman willamuyta kausayninchejpi ñaupajman churanchej. Religionesmanta parlaj uj libro nin: “Jehovaj testigosninpajqa runasman willayqa may sumaj”, nispa. Ajinapunitaj, Jehovaj testigosnenqa imaynatachus Jesús, yachachisqasnin ima willarqanku ajinallatataj Jehová Diospa gobiernonmanta tukuyman willamushanchej. w16.05 2:10, 12

Jehová Diosta kusichinapaj jina imatapis ajllaspaqa, paywan sumaj amigos kanchej, allinpaj qhawawanchej, bendeciwanchejtaj (Sant. 4:8). Kaytaj creeyninchejta astawan sinchʼiyachin. Chayrayku imatachus Jehová Dios yuyasqanta entiendenapajqa, imatachus Diospa Palabran yachachiwasqanchejpi tʼukurina. Imaraykuchus Jehová Diosmantaqa yachakullasunpuni (Job 26:14). Jehová Diosmanta astawan sumajta yachakunanchejpaj kallpachakusun chayqa, allin yuyayniyoj kasun, allin imastataj ajllasun (Pro. 2:1-5). Runasqa imatachus ruwayta munasqankuta, yuyasqankuta ima tijrachinku, Jehovatajrí kasqan jinallapuni. Salmista nerqa: “Tata Diospa ruway munasqantajrí wiñaypaj sayan, sonqompa yuyasqampis wiñay wiñaypaj”, nispa (Sal. 33:11). Cheqamantapuni nisunman Jehová Dios jina yuyayta yachakusun, kusichinapaj jina imatapis ruwasun chayqa, sumajta imatapis ajllasunchej. w16.05 3:17

Cheqan runasta Jehová Dios payman pusananpi, ajllananpi ima atienekunchej. Chayrayku hermanosninchejta, pikunamanchus predicanchej chay runasta ima mana juzganchejchu (Juan 6:44). Jehová Diosta Sumaj Manka Llutʼajninchejta jina qhawasun chayqa, hermanosta pay jina qhawasun (Isa. 64:8). Sapa ujninkutataj sumaj cristianos kanankupaj yanapashallasqantapuni qhawasun. Jehová Dioslla imachus sonqonchejpi kasqanta qhawan, yachantaj mana wiñaypajchu pantaj runas kananchejta. Chantapis pay yachallantaj imayna runasmanchus tukuchiyta atiwasqanchejta (Sal. 130:3). Allin ñawiwan hermanosta qhawaspaqa, Jehová Dios jina ruwashanchej. Chantapis Jehová Dioswan khuska llankʼasunman hermanosninchejta congregacionpi ñauparinankupaj yanapakuspa (1 Tes. 5:14, 15). Kay ruwaypitaj ancianos ñauparinanku tiyan (Efe. 4:8, 11-13). w16.06 1:4-6

Sumaj willaykunamanta runasman willamoyqa llampʼu sonqo kanapaj, espirituj poqoyninta rikuchinapaj ima yanapawanchej (Gál. 5:22, 23). Jesucristo jina ruwasunchej chayqa, willayninchejta runas uyariyta munanqanku, ichá niña ñaupajpi jinachu noqanchejmanta yuyanqanku. Sutʼincharinapaj, Australiapi iskay hermanos wasimanta wasi willashajtinku, uj señorata tariparqanku. Chay señoraqa paykunawan mayta phiñakorqa. Jinapis chay hermanosqa kʼachamanta uyarerqanku. Chay señoraqa chay hermanoswan phiñakusqanmanta pesachikorqa, uj cartatataj sucursalman apacherqa. Chay cartapi nerqa: “Perdonta mañakuni chay iskay llampʼu sonqo, kʼacha runasmanta, phiñakuspa kʼumuykachachisqaymanta. May wampupuni karqani Diospa Palabranmanta willashawajtinku mana uyariyta munasqayqa”, nispa. Willashaspaqa sonqo tiyaykusqa kay, may sumaj kasqanta reparanchej. Cheqamantapuni predicacionqa noqanchejta yanapawanchej, wajkunatapis. w16.06 2:12, 13

Adanqa juchallikusqanrayku tukuyninchej juchasapas nacekunchej (Rom. 5:12, 19). Chayrayku ichá mayqen hermanollapis sonqonchejta nanachinawanchejpaj jina imatapis ruwanqa chayri nenqa. ¿Imatá chay kutispi ruwasun? ¿Diosta munakullasunpunichu? ¿Cheqa sonqollapunichu kasun Jehovaman, hermanosman ima? Elijpa kausayninpi tʼukurina. Payqa Israelpi kuraj kaj sacerdote karqa, iskaynin wawasnintaj Diospa leyesninta mana kasukorqankuchu. Biblia nin: “Elijpa churisnenqa millay kawsayniyoj karqanku, manataj [Jehovata] manchachikojchu kanku”, nispa (1 Sam. 2:12, 13). Eliqa yacharqa wawasnin millay imasta ruwashasqankuta, jinapis tumpallata kʼamerqa. Chayrayku Diosqa payta, wawasninta ima castigarqa. Niñataj saqerqachu mirayninmanta ni pi kuraj kaj sacerdote kananta (1 Sam. 3:10-14). Elijpa tiemponpi kausashasqanchejpi tʼukurina, reparanchejtaj Elí wawasninta sajra imasta ruwajta saqeshallasqanta. ¿Imatá ruwasunman karqa? ¿Creeyninchej pisiyanantachu, Jehovamanta karunchanawanchejtachu saqesunman karqa? w16.06 4:5, 6

Kausayninchejpi Diospa gobiernonta ñaupajman churasunchej chayqa, Jehová tukuy ima necesitasqanchejta qonawanchejta nin. Jesusqa sutʼincharqa imaraykuchus Diospa nisqanmanta mana iskayrayananchejta. Pay nerqa: “Cielopi kaj Tataykichejqa yachanña chay tukuy imasmanta pisichikusqaykichejta”, nispa. Jehovaqa yachan imatachus necesitasqanchejta, niraj noqanchej yachashajtinchej (Fili. 4:19). Yachallantaj ima pʼachatachus necesitasqanchejta, imatachus mikhunanchejta ima. Chantapis yachallantaj familianchejwan tiyakunanchejpaj uj wasita necesitasqanchejta. Jehová necesitasqanchej imasta qowasunchej. Chantapis imatachus niwasqanchejta ñaupajpi churasunchej chayqa, imatachus necesitasqanchejmanta astawanraj qonawanchejpi atienekusunman. Chantapis yachanchej Dioswan amigos kaspaqa kusisqa kananchejta. Chaytaj mikhunayoj kaspa, pʼachayoj kaspa ima sonqo juntʼasqa kakunapaj yanapawanchej (1 Tim. 6:6-8). w16.07 1:17, 18

Jesús kausayninta qosqanrayku, Dioswan allinyakuyta atinchej. Chayrayku Dioswan allinpi, amigosnin ima kayta atinchej. Pablo chaymanta sutʼincharqa, imaynatachus Jehovaj kʼacha yanapayninwan ujchasqas kasqanta, ajllasqa cristianosman kayta nispa: “Creeyninchejrayku cheqan runaspajña qhawasqa kaspa, Dioswan allinpi kanallapuni Señorninchej Jesucristonejta. Paypi creesqanchejrayku, Diosman qayllaykuyta atinchej, jatun khuyakuyninta japʼinapaj” (Rom. 5:1, 2). Mayta agradecekunchej, Jehovawan allinpi kasqanchejmanta, amigosnin kasqanchejmanta ima. Profeta Danielqa kay qhepa pʼunchaypi ajllasqa cristianos “ashkha runasman cheqa kajta” yachachinankuta nerqa (Dan. 12:3). Ajllasqa cristianosqa predicaspa, Jesuspa may chhika waj ovejasninmanta kajkunaman yachachispa ima, paykunata yanapanku Diospa ñaupaqenpi cheqan runaspaj qhawasqa kanankupaj (Juan 10:16). Tukuy chayta ruwakun Diospa kʼacha yanapayninraykulla. (Rom. 3:23, 24). w16.07 3:10, 11

Chay ángeles warmiswan casarakusqankoqa, manapuni allinchu karqa. Wawasninkoqa jatunkaray runas, may sajrastaj karqanku, nefilim sutisniyoj. Chay tiempopi ‘runasqa ashkha millay sajra imasta ruwasharqanku, tukuy tiempotaj sajrallatapuni ruwayta yuyarqanku’ (Gén. 6:1-5). Diosqa sajra runasta chinkachinanpaj Jatun Parata apachimunanta nerqa. “Cheqan kajta willaj” Noetaj chayta runasman willarqa (2 Ped. 2:5). Paykunaqa mana uyarerqankuchu, imaraykuchus mikhusharqanku, ujyasharqanku, casarakusharqanku ima. Jesusqa imaynachus Noej tiempon karqa, jinallataj kay tiempo kananta nerqa (Mat. 24:37- 39). Chayrayku ashkha runas Diospa gobiernonmanta sumaj willaykunata mana uyariyta munankuchu. Chaytaj niraj kay pachaj tukukuynin kashajtin Jallpʼantinpi willakushan. Noej tiemponqa, yachachiwanchej Jehovaj pʼunchaynin qayllitapiña kasqanta mana qonqanata. Jinallataj casarakuyta, wawasniyoj kayta ima, kausayninchejpi mana ñaupajman churanata. w16.08 1:8, 9

Qhepa pʼunchaykunapi kashasqanchejrayku, kausayqa may llakiy, sajrataj (2 Tim. 3:1-5). Chayrayku kay pachaj yuyayninmanta jarkʼakunapaj, Jehovawan sumaj amigos kananchej tiyan. Pablo kunan pʼunchaypaj texto chayta nispaqa, mana nisharqachu casarasqa cristianos familiapi ruwanasninkuta qonqapunankuta. Jinapis qhepa pʼunchaykunapi kasqanchejrayku, Jehovata yupaychayta ñaupajman churananchej tiyan (Mat. 6:33). Kay sajra pʼunchaykunapi ashkha qhariwarmis tʼaqanakunku. ¿Imaynatá qhariwarmis kusisqas kausakunkuman? Jehovaj qayllanpi kaspa, llajtanpa qayllanpi kaspa, Bibliaj yuyaychayninta kasukuspa, Jehovaj atiyninwan yanapachikuspa ima. Chayta ruwaspaqa, “Diospa ujchasqantaqa” jatunpaj qhawashanku (Mar. 10:9). w16.08 2:17, 18

Congregacionpi ancianosqa, wajkunata wakichinanku tiyan ancianos kanankupaj. Apóstol Pabloqa Timoteoman nerqa: “Imastachus yachachisqayta uyarerqanki chaykunataqa, wajkunamantapis uyarillarqankitaj. Chay uyarisqaykitataj, atienekunapaj jina kaj runasman yachachiy. Paykunataj sumaj wakichisqa kanqanku wajkunaman yachachinankupaj”, nispa (2 Tim. 2:1, 2). Apóstol Pabloqa anciano karqa, apostoltaj. Timoteotaj ashkha imasta paymanta yachakorqa: sumajta willayta, hermanosta yanapaytapis (2 Tim. 3:10-12). Pabloqa tukuy tiemponta churarqa Timoteota sumajta wakichinanpaj (Hech. 16:1-5). Kay tiempopipis ancianos Pablo jina ruwankuman, hermanosta waturej rispa siervos ministerialesta pusankuman. Ajinamanta paykunaqa yachakonqanku: imaynatachus ancianos yachachisqankuta, pacienciayoj, munakuyniyoj ima kayta. Yachakullanqankutaj Jehová Diospi atienekuyta paypa ovejitasninta qhawashajtinku. w16.08 4:16, 17

Wakin kutisqa, Diospa Palabranqa uj runaj makisnin llauchhiyasqanta nin. Chayta nispaqa uj runa llakiywan atipachikusqanta chayri niña allin imas kananta yuyasqanta niyta munan (2 Cró. 15:7; Heb. 12:12). Ajinapi rikukuspa, noqanchejpis ichapis “kaykamalla kachun” ninapaj jina kanchej. Tukuyninchej Satanaspa sajra pachanpi kausasqanchejrayku, imaymana llakiykuna kanqapuni. Chay llakiykunataj niña ñaupajman rejta saqewasunmanchu (Pro. 12:25). ¿Imastaj noqanchejta llakichiwasunman? Ichapis kanman familianchejmanta pillapis wañupusqan, sinchʼi onqoykuna, wajkuna churanakuwasqanchej chayri familianchejpaj sinchʼita llankʼananchej kasqan. Chay jina llakiykunaqa kallpanchejta pisiyachinman, niñataj kusisqaschu kasunman. Chay jinapi rikukuspapis Jehová Dios yanapanawanchejpi atienekusunman (Isa. 41:10, 13). w16.09 1:2, 4

Pantaj runas kasqanchejrayku, wakenqa sajra munayninkuwan maqanakushanku. Wakintaj Jehová Diosmanta kusiywan willamunankupaj kallpachakunanku tiyan. Wajkunataj onqoyrayku chayri sapallanku kasqankurayku llakikusqankuta atipananku tiyan. Wakin runasrí, sonqonkuta nanachejkunata perdonanankupaj kallpachakunanku tiyan. Jehová Diosta ashkha watastaña chayri niraj unaytachu sirvispapis, tukuyninchej Jehová Diosta sirvinallapajpuni imatapis atipananchej tiyan. Yuyarikunataj Jehová Dios cheqa sonqo kajkunata bendecinanta. Ajinapi rikukunchej chayqa, Jehovamanta atiyninta mañakuna. Chaytaj allin kajta ruwanapaj kallpata qowasun, Jehová Diospa bendicionesnintataj japʼisunchej. Chayrayku Jehová Diosmanta mañakusqanchejman jina kausana. Kallpachakunataj Jehová Diospa Palabranta sapa día leenanchejpaj, sapallanchejpi estudiananchejpaj, familiapi Diosta yupaychananchejpaj ima (Sal. 119:32). w16.09 2:10, 11

Ichá pipis nisunkiman: “Noqaqa kausay jinallamanta rikhurisqanta creeni, científicos chayta nisqankurayku. ¡Imaynatá Diospi creenkiri! Manaqa pi runapis payta rikunchu”, nispa. Ashkhas ajinata yuyanku. Ajinapunitaj, Diostaqa mana pipis rikunchu, nillataj imata ruwajtapis (Juan 1:18). Kausay jinallamanta rikhurisqanta nejkunaqa, mana rikusqanku imasllapitaj creenku. Ni mayqen cientificopis, nitaj waj runapis uj katarita waj animalman tukushajta rikunchu (Job 38:1, 4). Chayrayku imaschus Dios kasqanta rikuchisqanta ukhuncharina. Chay imaspi sumajta tʼukurina, yachakusqanchejman jinataj imapichus creenata ajllana. Pabloqa chaymanta parlaspa qhelqarqa: “Diospa mana rikukoj imasnenqa, nisunman wiñay atiynin, paypuni Dios kasqanpis, paypa ruwasqasninpi sutʼi rikukun, runata rikhurichisqanmantapacha. Chayrayku mana niyta atinkuchu Dios mana kasqantaqa”, nispa (Rom. 1:20). w16.09 4:4

Jehová Diosqa forasterosta kʼachamanta qhawaj. Chayrayku waj llajtayojkuna chajmakuyta atej kanku (Lev. 19:9, 10). Jehovaqa israelitasta kamacherqa forasterosta jatunpaj qhawanankuta. Munarqataj paykuna yuyarikunankuta, runaj llajtanpi tiyakuy imaynachus kasqanta (Éxo. 23:9). Egipciosqa israelitasta chejnikojña kanku niraj esclavosninkuman tukushajtinku (Gén. 43:32; 46:34; Éxo. 1:11-14). Israelitasqa waj llajtapi kashaspa llakiyta kausakorqanku. Chayrayku Jehovaqa munarqa chayta yuyarikunankuta, waj llajtayojkunawan kʼachas kanankuta ima (Lev. 19:33, 34). Jehovaqa kasqan jinallapuni. Chayrayku waj llajtayoj hermanos congregacionninchejman jamojtinku, yuyarikuna Jehová paykunawan kʼacha kasqanta (Deu. 10: 17-19; Mal. 3:5, 6). Waj llajtayojkuna ima chʼampaykunapichus rikukushasqankupi tʼukurina. Ichapis paykunaqa ripusqanku lugarpi parlakusqanta mana entiendeyta atishankuchu chayri kʼumuykachachisqa kashanku. Chayrayku paykunata yanaparinapaj, paykunawan kʼacha kanapaj ima kallpachakuna (1 Ped. 3:8). w16.10 1:3-5

Santiago nerqa: “Rikuchiway mana ruwasqasniyoj creeyniykita, noqataj creesqayta ruwasqasniywan rikuchisqayki”, nispa (Sant. 2:18). Payqa sutʼincharqa creeyniyoj kanapajqa, mana Diospi creeyllachu kasqanta. Imaraykuchus supaykunapis Dios kasqanta creenku, jinapis supaykunaqa Diospi creesqankuta mana rikuchinkuchu ruwasqasninkuwan. Astawanpis Jehovawan sinchʼita churanakunku (Sant. 2:19, 20). Creeyniyoj runaqa Diosta kusichiyta munan sumaj imasta ruwaspa. Abrahampis allin imasta ruwarqa. Santiago qhelqarqa: “¿Manachu tatanchej Abrahanqa ruwasqasninnejta cheqan runapaj qhawasqa karqa? Imaraykuchus payqa wawan Isaacta altar pataman churarqa jaywananpaj. Reparanki jina, paypa creeynenqa ruwasqasninpi rikukorqa. Chay creeynintaj ruwasqasninnejta juntʼasqa karqa”, nispa (Sant. 2:21-23). Chantá Santiagoqa sutʼincharqa creeyninchejta ruwasqasninchejwan mana rikuchejtinchejqa qhasi manakajlla kasqanta. w16.10 4:8

Ashkha cientificosqa cielopi, Jallpʼapi imaschus kasqanta qhawarispa, tukuy imata runasta yanapanankupaj jina ruwanku. Jinapis runaspa tapuykunasninkuman mana kutichiyta atinkuchu. Cientificosqa mana niyta atinkuchu, imaynatachus kausay qallarisqanta, imaraykuchus kay Jallpʼallapi runas, plantas, animales ima kausasqankutapis. Casi tukuy runastaj mana yachankuchu, imaraykuchus tukuypis wiñaypaj kausayta munasqanchejta. ¿Imaraykú runas chay imasta mana yachankuchu? Científicos, waj runas ima, Dios mana kasqanta, kausay jinallamanta rikhurisqanta nisqankurayku ima. Diosrí chay tapuykunaman Palabranpi kutichiwanchej. Jehovaqa Jallpʼapi, cielopi kaj tukuy imaspaj, leyesta jina churarqa. Chay leyestaj kikillanpuni kanku. Luzta, yakuta instalajkuna, ingenieros, avionta apaykachajkuna, doctores, wajkuna ima, chay leyesman jina trabajanku. w16.11 2:4, 5

Ashkha imasmanta Jehovaman agradecekusunman. Imajtinchus payrayku kausanchej, kuyurinchej, kanchejtaj. Chantapis Jehovaqa Palabranta qowanchej. Tesalonicamanta cristianos jina, noqanchejpis chay regalota jatunpaj qhawanchej. Imaraykuchus Bibliaj nisqanqa Diosmanta jamun (1 Tes. 2:13). Bibliaqa Jehovaman qayllaykunapaj yanapawanchej. Payman qayllaykojtinchejtaj, paypis qayllaykamuwanchej (Sant. 4:8). Tatanchej Jehová llajtanman wajyariwasqanchejrayku, may agradecesqas kashanchej. Salmista jinataj ninchej: “Tata Diosman graciasta qoychej, kʼacha kasqanrayku, imaraykuchus khuyakuynenqa wiñaypaj”, nispa (Sal. 136:1). Chay Salmoj sapa versiculonpi, “khuyakuynenqa wiñaypaj” nispa nin. Sichus Jehovaman cheqa sonqo kasun, llajtannejta kamachiwasqanchejtapis kasukusun chayqa, payqa wiñay kausayta qowasunchej. Chay Salmoj nisqan juntʼakusqantataj rikusunchej. w16.11 3:18, 19

Chay versiculoqa, ¿Imatapunitaq Biblia yachachin? chantá ¿Imatá Biblia yachachin? nisqa librospi ashkha kutista rikhurin. Chay librospa 3, 5, 6 yachaqanasninta wawasninchejwan chayri waj runaswan estudiashaspa, ichá Romanos 5:12 versiculota leeripunchejpuni. Chay versiculowan sutʼinchasunman: imaraykuchus Jallpʼa mana uj paraisochu kasqanta, imaraykuchus Jesús wañunanta necesitasqanchejta chayri imaraykuchus wañuy kasqanta. Chaywanpis chay versiculoqa yanapallawasunmantaj, Jehovaman qayllaykusqanchejmanta astawan agradecekunapaj, payta astawan kusichinapaj, imatachus qonawanchejta nisqanta suyakunapajpis. Tukuyninchej juchasapas kanchej, chayraykutaj sapa día pantanchej. Jinapis Jehovaqa khuyakoj Dios. Payqa yachan pantaj runas kasqanchejta, perdonanawanchejpajtaj wakichisqa kashan (Sal. 103:13, 14). Jesusqa nerqa, Diosmanta mañakunata juchasninchejta pampachananpaj (Luc. 11:2-4). Jehová juchasninchejta perdonan chayqa, manaña chay juchaspi yuyanachu tiyan. w16.12 1:1-3

Roma llajtamanta cristianosqa reparakunanku karqa, imaspichus astawan yuyasqankuta. ¿‘Aychaj imasnillanpichu’ yuyasharqanku? Kunanpis imastachus aswan ñaupajman churasqanchejpi tʼukurinanchej tiyan. ¿Imamantataj astawan parlanchej? ¿Imastataj astawan ruwayta munanchej? Wakin runasqa kay imasllapi yuyanku: imaymana vinosta llamiypi, wasisninkuta kʼachanchaypi, mosoj ropata rantikuypi, qolqeta mirachiypi, waj lugaresta rejsimuypi ima. Chay ruwaykunaqa mana juchachu, chaykunatataj ruwanchejpuni. Uj kuti Jesuspis casarakupi yakuta vinoman tukucherqa. Apóstol Pablotaj Timoteoman onqoyninmanta sanoyapunanpaj, “uj chhika vinota ujya[nanta]” nerqa (1 Tim. 5:23; Juan 2:3-11). Chaywanpis mana vinotachu kausayninkupi ñaupajman churarqanku. ¿Noqanchejrí? ¿Imatá kausayninchejpi ñaupajman churanchej? w16.12 2:5, 10, 11

Chay nisqanqa, yanapawanchej Mateo 6:33 nisqanpi atienekunapaj. Apóstol Pedroqa Jesusta taporqa: “Yachanki jina, noqaykoqa tukuy imata saqespa qhepaykita jamuyku. ¿Imataj noqaykupaj kanqari?”, nispa (Mat. 19:27). Jesusqa Pedrota chayta tapusqanmanta mana rimarqachu. Astawanpis Jesusqa yachachisqasninman nerqa, Jehová Diospa Gobiernonrayku imastachus ruwasqankumanta tʼinkata japʼinankuta. Apóstoles, wakin cheqa sonqo cristianos ima, Jesuswan cielopi kamachenqanku. Chaywanpis Jesusqa nillarqataj, Diospa kamachisnin kay tiempopipis bendecisqa kanankuta. Pay nerqa: “Pichus wasisninta, hermanosninta, hermanasninta, tatanta, mamanta, wawasninta chayri jallpʼasninta sutiyrayku saqen chayqa, pachaj jinastawanraj japʼenqa, wiñay kausaytapis japʼillanqataj”, nispa (Mat. 19:29). Kay tiempopi Jesuspa yachachisqasnenqa, congregacionpi tatasta, mamasta, hermanosta, hermanasta, wawasta ima tarinkuman. Chaytaj Diospa Gobiernonrayku imallatapis saqesqanchejmanta nisqaqa, aswan sumajraj. w16.12 4:4, 5

Jehovaqa sumaj imasta ruwananta niwanchej. Sutʼincharinapaj, sutinta llimphuchanqa, munaynintataj ruwanqa cielopi jinallataj kay Jallpʼapipis (Mat. 6:9, 10). Kay imas ruwakunantaqa mayta suyakushanchej. Chantapis Jehovaqa nillawanchejtaj cielopi chayri Jallpʼapi wiñay kausayta qonawanchejta (Juan 10:16; 2 Ped. 3:13). Chantapis suyakushallanchejtaj kay qhepa pʼunchaykunapi, Jehová imaynatachus yanapanawanchejta, ñaupajman pusanawanchejta ima. Biblia nin: “Creeyniyoj kajqa mana iskayrayanchu imatachus suyakushan chay juntʼakunanmantaqa”, nispa. Kaytaj niyta munan, tukuy creejkuna Jehovaj tukuy ima nisqan juntʼanantapuni yachasqanchejta. Kay tiempopi ashkha runasqa imallatapis japʼiyta suyakushanku chayri munashanku. Jinapis mana yachankuchu chay imasta maykʼajllapis japʼinankutapuni. Sutʼincharinapaj, uj runaqa ichapis ashkha qolqeta sorteopi ganakuyta munanman. Jinapis mana yachanchu gananantapuni. w16.10 3:1, 2

Jehová Diosqa kʼacha kasqanrayku, sapa ujman ruwanapaj uj atiyta qowarqanchej. Llampʼu sonqo kasunchej chayqa, Pay munasqanman jina imatapis ruwasun (Rom. 12:4-8). Jehovaqa imastachus ruwayta atisqanchejwan, payta jatunchananchejta munan, wajkunata yanapananchejta ima. Diospa llajtanpi imatachus ruwashasqanchejqa, qhepaman niña kikinchu kanman. Jesús kausayninpi imastachus ruwasqanpi tʼukurina. Qallariypeqa Tatallanwan kausakorqa (Pro. 8:22). Chantá Tatanta yanapaysikorqa, angelesta, runasta, tukuy kaj chhikatawan ruwananpaj (Col. 1:16). Chaymantataj Jallpʼaman jamorqa. Payqa wawita jina nacekuspa, Jallpʼapi kuraj runa kanankama kausakorqa (Fili. 2:7). Wañupuspataj cieloman kutiporqa, 1914 watapitaj Jehová Diospa Gobiernonmanta Reyman tukorqa (Heb. 2:9). Aswan qhepamantaj Jesusqa waranqa watasta Rey jina kamachenqa, chantá Reinota Tatanman jaywaponqa. Chantataj Jehová ‘Dioslla tukuyta kamachenqa’ (1 Cor. 15:28). w17.01 3:11, 12

Uj warmi kausayninpi uj imata ajllananpaj kashajtin, amigonta nerqa: “Ama tʼukuriy niwaychu, imatachus ruwanallayta niway. Chaytaqa ruwayta atillasaj”, nispa. Chay warmeqa imatachus ruwananta ninankuta munarqa, sapallanmanta imatachus ruwananta ajllananmantaqa. Payqa Diospa regalonta pisipaj qhawasharqa. ¿Imataj chay regalo? Kausayninchejpi imatapis ajllayta atisqanchej. Qanrí, ¿qanpunichu kausayniykipi imatapis ajllanki? Chayrí, ¿wajkuna qanrayku ajllanankutachu munanki? Imatapis ajllayta atisqaykita, ¿jatunpajchu qhawanki? Runasqa imatapis ajllayta atisqanchejmanta, tukuy imata ninku. Wakenqa ninku: “Diosqa imatachus ruwananchejta ajllanña, niña imatapis ajllayta atisunmanchu”, nispa. Wakintaj ninku: “Imatapis munayninchejman jina ajllayta atispalla, ajllayta atisqanchejta nisunman”, nispa. Jinapis Bibliaqa yachachin, imatapis sumajta ajllanapaj ruwasqa kasqanchejta. w17.01 2:1, 2

Rey Davidqa yuyanman karqa, Salomón mana chay jatun llankʼayta ruwananpaj wakichisqachu kashasqanta. Imaraykuchus Jehová Diospaj templonqa “may mentasqa”, may kʼachitutaj kanan karqa, Salomontajrí jovencitollaraj karqa. Chaywanpis Davidqa yacharqa, Jehová Dios Salomonta yanapananta chay llankʼayta ruwananpaj. Chayrayku tukuy atisqanta Salomonta yanaparqa, templopaj tukuy imata wakichispa. Ajinallatataj kuraj hermanosqa mana llakikunankuchu tiyan, Diospa llajtanpi wakin ruwanasninkuta jovenesman qonankumanta. Tukuyninchej yachanchej, Diospa llajtan ñaupajman rinan aswan sumaj kasqanta. Astawanpis jovenesta jatuchaj ruwaykunata japʼikunankupaj wakichiytaj chaypaj yanapanqa. w17.01 5:8, 9

Jesusqa Diospa Gobiernonmanta rey jina Satanasta wiñaypaj chinkachenqa, jinallataj tukuy sajra ruwasqasnintapis. Jesusqa yachachisqasninta yanaparqa Diospa Gobiernon kamachinanpuni kasqanta entiendenankupaj. ¿Imaynamantá? Bautizakuytawan, Jesusqa “Diospa Gobiernonmanta sumaj willaykunata” tukuynejpi willayta qallarerqa (Luc. 4:43). Yachachisqasninmantaj nerqa: “Noqamantataj testigos jina willamunkichej [...], kay jallpʼaj tukuy kʼuchusnintinpi”, nispa (Hech. 1:6-8). Kunanpis Diospa Gobiernonmanta willakushasqanrayku, runasqa Jehová preciowan rantiwasqanchejmanta yachakuyta atinku, Gobiernonpa kamachiyninpi kaytapis. Noqanchejqa Diospa Gobiernonpa kamachiyninpi kasqanchejta rikuchinchej, ajllasqa cristianosta sumaj willaykunata willamuypi yanapakuspa (Mat. 24:14; 25:40). w17.02 2:7, 8

Apostoleswan ancianoswan ñaupa cristianosta kamachejtinkupis, paykunaqa yacharqanku Jesús kamachejninku kasqanta. ¿Imaynatá? Apóstol Pablo nerqa: “[Cristoqa] qorqa chay regalosmanta wakenqa apóstoles” kanankupaj, nispa. Chantá nillarqataj, Cristoqa ‘cuerpoj chayri congregacionpa uman’ kasqanta (Efe. 4:15). Jesuspa yachachisqasnenqa mana uj apostolpa sutinwanchu rejsichikorqanku, manaqa Diospa munayninman jina “cristianos” nisqa karqanku (Hech. 11:26). Pabloqa yacharqa, Diospa llajtanta kamachejkunaj yachachisqankuta japʼikunanku kasqanta. Imaraykuchus Diospa Palabranmanta yachachisharqanku. Jinapis Pablo nerqa: “Yachanaykichejta munani, Cristoqa qharej uman kasqanta”, nispa. Chayta nispaqa Diospa llajtanta kamachejkunamantawan parlasharqa. Chantá nerqa: “Diostajrí Cristoj uman”, nispa (1 Cor. 11:2, 3). Sutʼi reparanchej, Jehovaqa llajtanta Jesucristonejta kamachisqanta. w17.02 4:7

Wajkunata jatunpaj qhawayqa, yanapawanchej mana noqallanchejpichu yuyanapaj, wajkuna jatunchawajtinchejpis llampʼu sonqollapuni kanapaj ima. Yanapallawanchejtaj, respetasqanchej runas Jehovamanta karunchakojtinku, mana urmananchejpaj. Chantapis wajkunata jatunpaj qhawaspaqa Diospa llajtanman ujchasqallapuni kasunchej. Diospa llajtanqa ni mayqen hermanotapis, nitaj pi runatapis jatunchanchu. Wajkunata jatunpaj qhawaspaqa Diosta kusichinchej. Imaraykuchus Diosta kasukusqanchejta rikuchinchej, payman kʼaskasqataj kanchej. Ajinamanta Jehovaqa Satanasman llulla kasqanta niyta atenqa (Pro. 27:11). Ashkha runasqa mana yachankuchu, imaynatachus wajkunata jatunpaj qhawanankuta. Noqanchejtajrí Jehovaman mayta agradecekunchej, runasta munasqanman jina respetayta yachachiwasqanchejmanta. w17.03 1:13, 20, 21

Josafatqa tatan jinallataj runasta yanaparqa Jehová Diosta sirvinallankupajpuni. Josafatqa runasta kacharqa, “Diospa leynin librota apaspa” Judá llajtaspi yachachimunankupaj (2 Cró. 17:7-10). Chantapis Israelpa jallpʼasninpi kaj Efraín orqokama rerqa, “Diosman paykunata kutichimunampaj” (2 Cró. 19:4). Kunanpis Diosqa munan mundontinmanta runas paymanta yachakunankuta. Noqanchejtaj runasman yachachiyta atinchej. Qanrí, ¿sapa killachu predicacionpi yanapakunki? Wajkunapis Diosta yupaychayta qallarinankupaj, ¿paykunaman Bibliamanta yachachiyta munankichu? ¿Runasman willakunanpaj Diosmanta mañakunkichu? Kallpachakunki chayqa, Jehová yanapasonqa uj runallamanpis Bibliamanta yachachinaykipaj. Samarikunayki ratopis, ¿runasman Bibliamanta yachachiwajchu? Imaynatachus Josafat runasta Diosman kutirikunankupaj yanaparqa, ajinallatataj noqanchejpis niña predicaj hermanosta yanaparisunman. w17.03 3:10, 11