Junio

Jeftej wawanqa tinkukuna toldopi Diosta sirvinanrayku mana casarakunanchu, nitaj wawasniyojchu kanan karqa, chayrayku tatanpa sutin chinkapunman karqa, nitaj jallpʼantapis pipis japʼinmanchu karqa (Jue. 11:34). Jinapis Jefteqa tukuy sonqo nerqa: “Chaywampis kunanqa juraspa Tata Diosman, qosaj nisqayta juntʼanay tiyan”, nispa (Jue. 11:35). Kayqa Jefté sinchʼi creeyniyoj kasqanta rikuchiwanchej. Jehovaqa Jeftej ruwasqanta allinpaj qhawarqa, chayraykutaj bendicerqa. Jefté kasunman karqa chay, ¿pay jinachu sinchʼi creeyniyoj kasqanchejta rikuchisunman karqa? Jehovaman kausayninchejta qoshaspa, nerqanchej munayninta ruway noqanchejpaj aswan sumaj kasqanta. Yacharqanchejtaj chayta juntʼay mana atikunallanta. Chaywanpis, ¿imaynatá qhawanchej mana gustawasqanchej imasta ruwananchejta Jehová niwajtinchej? Jefté jina sinchʼi creeyniyoj kasun chayqa, Jehovaman nisqanchejta juntʼasunchej, tukuy sonqotaj kasukusunchej. Jehovataj bendeciwasunchej ruwasqanchejmanta astawanraj (Mal. 3:10). w16.04 1:11, 14, 15

Jesusqa Diospa atiyninwan congregacionta ñaupajman apashan. Diospa atiynenqa yanapawanchej juchaman mana urmanapaj, mana manchachikuspa willanapaj, sumaj imasta ajllanapaj ima. Chayrayku mayta kallpachakunanchej tiyan tantakuymanta mana faltakunapaj. Ajinamanta Jehová atiyninwan yanapawasun. Tantakuykunapeqa sapa kuti parlakun imaynatachus Bibliaj profeciasnin juntʼakusqanmanta. Chaytaj yanapawanchej Jehovaj nisqasnin juntʼakunanpi atienekunapaj. Chantapis hermanosqa umallirichiyninkuwan, tapuykunaman kutichisqankuwan, tukuy sonqo takisqankuwan ima mayta kallpachallawanchejtaj (1 Cor. 14:26). Niraj tantakuykuna qallarikushajtin, tukukojtin ima, hermanoswan parlariypis mayta kallpachallawanchejtaj, imaraykuchus ashkha amigosniyoj kasqanchejta rikunchej, mayqenkunachus noqanchejmanta llakikunku (1 Cor. 16:17, 18). w16.04 3:6, 7

Jesusqa yachachisqasnin ‘Diospa Gobiernonmanta sumaj willaykunata jallpʼantinpi willanankuta’, yachachinankuta ima nerqa (Mat. 24:14). Kamacherqataj “tukuy laya runasta” yachachisqasninman tukuchimunankuta. Chayrayku cheqa cristianos jina, sumaj willaykunamanta Jallpʼantinpi willamunanchej tiyan. Rikunchej jina, Jesusqa sumaj willaykuna tukuynejpi willakunanta nerqa. ¿Imaraykú chayta ninchej? Estados Unidos suyupi, llulla religionesta kamachejkunaqa 600.000 jinalla kanku. Curastaj Jallpʼantinpi 400.000 jinalla kanku. Chaywanpis Jehovaj testigosnin Estados Unidos suyupi 1.200.000 jina kanku, Jesuspa yachachisqantataj willashanku. Chantapis 8 millonesmanta astawan testigos 240 suyuspi, llajtitaspi ima willashanku. Sutʼita rikunchej, Jehovaj testigosnillan Jallpʼantinpi sumaj willaykunamanta willashasqankuta. Chaytaj cheqamantapuni Jehovata mayta jatunchan (Sal. 34:1; 51:15). w16.05 2:13, 14

Ashkha runasqa yuyanku paykuna kikinkumanta imachus allin, imatachus mana allinchu kasqanta ajllayta atisqankuta. Chay jinata yuyaj runasqa jatunchakunku, paykunallapi yuyanku, atipanakupi jina kanku, imatachus ajllasqanku wajkunaj sonqonkuta nanachinanmantapis mana llakikunkuchu. Chay jina yuyayqa chʼampaykunata rikhurichin (Gén. 3:1-5). Jesusqa yachachisqasninman tukuywan allinta kausakuyta maskʼanankuta yachacherqa, chayta ruway wakin kutis mana allinninkupajchu kajtinpis. Jesús Orqopi yachachishaspataj wajkunawan allinta kausakunankupaj sumajta yuyaycharqa. Sutʼincharinapaj, pay yachachisqasninman nerqa kʼachas kanankuta, wajkunawan allin kausayta maskʼanankuta, mana phiñakunankuta, chʼampayninkuta usqhayllata allinchanankuta, enemigosninkuta munakunankuta ima (Mat. 5:5, 9, 22, 25, 44). w16.05 1:4, 5

Niraj Jehovaj testigosnin kashaspaqa, noqanchejmanta ashkhas kausayninchejta tijrachinanchej karqa. Ajinamantataj Diospa Palabran nisqanta juntʼarqanchej. Chaywanpis ichapis reparakunchej Jehová Dios jina, Jesucristo jina astawan ruwanapaj kausayninchejta tijrachinanchejraj kasqanta (Efe. 5:1, 2; 1 Ped. 2:21). Sutʼincharinapaj, ichá reparakunchej anchata quejakusqanchejta, cuento qʼepis kasqanchejta, runata manchachikusqanchejta chayri imapipis pantasqanchejta. Ichapis ashkha watastaña sumaj cristianos kanapaj kallpachakunchej, jinapis kikin imaspi pantashallanchejpuni. Chaywanpis pantaj runasllapuni kasqanchejrayku, ashkha watastaña bautizasqa kaspapis pantashallanchejpuni (Col. 3:9, 10). Ichapis wakin kutisqa mana allin imaspi yuyasunman chayri mana allin imasta munasunman. Manachayri kausayninchejpi imatapis mana atipayta atishallanchejchu. Ichapis chayta atipanapaj ashkha watastaña kallpachakushanchej (Sant. 3:2). w16.05 4:3-5

Ichá pillatapis nejta uyarerqanchej: “Wawasniyoj kasparaj tatasniy kʼamiwasqankuta jatunpaj qhawarqani”, nispa. Machu runas kasparaj tatasninchej kʼamiwasqanchejta aswan jatunpaj qhawanchej, imaraykuchus yachanchej munakuwasqanchejrayku kʼamiwasqanchejta (Heb. 12:5, 11). Jehová Diosqa wawasnin kasqanchejrayku mayta munakuwanchej. Chayrayku pacienciawan kʼamiwanchej, cheqanchawanchej ima. Chantapis munan allin imasta ajllananchejta, kusisqa kananchejta, tatanchejta jina munakunanchejta ima (Pro. 23:15). Mana munanchu juchasninchejmanta mana pesachikusqanchejrayku ñakʼarinanchejta, wañunanchejta ima (Efe. 2:2, 3). Niraj Jehovata rejsishaspa, ichapis mana kusichinanchejpaj jinachu kausakorqanchej. Jinapis ñaupa kausayninchejta saqepunapaj pay yanapawarqanchej, kunantaj sumaj cristianos kanchej (Isa. 11:6-8; Col. 3:9, 10). w16.06 1:7, 8

Casi tukuy wawas llampʼu sonqos kanku, tukuy imatataj yachakuyta munanku (Mat. 18:1-3). Chayrayku may allin kanman tatas munasqa wawasninkuta yanapananku wawamantapacha cheqa kajmanta yachakunankupaj, cheqa kajta munakunankupaj ima (2 Tim. 3:14, 15). Chayta sumajta ruwanankupajtaj tatasqa paykunaraj cheqa kajta munakunanku tiyan, Bibliaj nisqanman jinataj kausakunanku tiyan. Tatas chayta ruwajtinkoqa, wawasninku cheqa kajta munakuyta atillanqanku. Chantapis reparanqanku paykunata Jehová munakusqanrayku tatasninku yachachishasqankuta. Llampʼu sonqos kasunchej, Jehovatataj kasukusunchej chayqa, Danielta jina Jehová munakuwasunchej (Dan. 10:11, 19). Palabrannejta, atiyninnejta, llajtannejta imataj cheqanchallawasunpuni. w16.06 2:14, 17

Rey Davidqa kʼacha kaykunasniyoj karqa, chayraykutaj Jehová Diosqa mayta munakorqa (1 Sam. 13:13, 14). Jinapis Davidqa jatun juchapi urmarqa. Uj kuti Uriaspa warmin Betsabewan puñuykorqa, Urías maqanakupi kanankama. Chay warmeqa onqoj rikhurerqa. Chayrayku David imatachus Betsabewan ruwasqanta ni pi yachananta munaspa, Uriasta wajyacherqa, wasinman kachananpaj. Munarqataj Urías, Betsabewan puñuykunanta, chay wawa Uriaspata kasqanta runas yuyanankupaj. Uriastajrí mana wasinman rerqachu. Chayraykutaj Davidqa maqanakupi wañunanpaj ñaupajman churacherqa. Chayta ruwasqanraykutaj pay, familian ima mayta ñakʼarerqanku (2 Sam. 12:9-12). Jinapis Jehovaqa khuyarqa, perdonarqa ima. Yacharqa cheqan kajta David ruwayta munasqanta (1 Rey. 9:4, 5). Chay tiempopi kausakusunman karqa chay, David ruwasqantataj yachasunman karqa chay, ¿imatá ruwasunman karqa? ¿Niñachu Jehovata sirvisunman karqa? w16.06 4:7

Jehovaj testigosnenqa Jesuspa yuyaychasqanta kasukunchej. Imaraykuchus ‘tukukuy pʼunchaykunapi’ kausashasqanchejta, tumpamantawan “manchay ñakʼariy” qallarinanta yachanchej (Dan. 12:4; Mat. 24:21). Jesús nerqa jinataj, Jehová Diospa llajtanqa Jallpʼantinpi sumaj willaykunata willashan. Chantapis tukuynejpi guerrasta, onqoykunata, jallpʼa ikhakuykunata, yarqhaykunata, maqanakuykunata ima rikunchej. Kay tiempopi religionta kamachejkunataj ni jaykʼaj jina runasta chʼaukiyashanku (Mat. 24:7, 11, 12, 14; Luc. 21:11). Noqanchejqa maytapuni suyakushanchej Jesús jamunanta, Tatanpa munayninta ruwananta ima (Mar. 13:26, 27). Chaywanpis noqanchej mana yachanchejchu maykʼajchus manchay ñakʼariy tiempo qallarinanta. w16.07 2:2-4

Jehová Diospa kʼacha yanapayninrayku, paymanta mañakuyta atinchej. Jesusnejta ima ratollapis Jehová Diosmanta mañakuyta atinchej. Chaytaj may sumaj. Apóstol Pablo nerqa: “Creesqanchejrayku, mana manchachikuspa parlayta atinchej, mana ima jarkʼayniyojtaj Diosman qayllaykuyta atinchej”, nispa (Efe. 3:12). Pabloqa yanapata necesitashajtinchej Jehová Diosmanta mañakunata yuyaychawarqanchej, Diospa khuyakuyninta, “jinallataj jatun khuyakuyninta” maychus tiemponpi tarinanchejpaj (Heb. 4:16b). Chʼampaykunapi rikukuspa, Jehová Diospa yanapayninta mañakuyta atinchej. Mañakuyninchejta mana uyarinawanchej kajtinpis, payqa uyariwanchej. Congregacionmanta hermanosnejtataj astawan yanapawanchej. Mañakuykunasninchejta uyariwasqanchejraykutaj, astawanpis ninachej: “Jehová Diosmin yanapawajneyqa, mana manchachikusajchu. ¿Imanawanqataj runari?”, nispa (Heb. 13:6). w16.07 3:12, 13

Noeqa uj warmiyojlla karqa, jinallataj wawasninpis. Chaywanpis Jatun Para pasaytaqa, ashkha qharis ashkha warmisniyoj karqanku. Ashkha llajtaspi khuchichakuy juchata mana sajrapajchu qhawakoj. Astawanpis chaywan llulla diosesninkuta yupaychaj kanku. Abrahamwan Sarawan Canaanman ripojtinku, muyuyninkupi runasqa millay imasta ruwaj kanku, casarasqa kausaytapis pisipaj qhawaj kanku. Jehová Diosqa Sodoma, Gomorra llajtasta chinkacherqa, chay llajtayoj runas millay khuchi runas kasqankurayku. Jinapis Abrahamqa sumaj qosa, sumaj tata ima karqa, Sarataj qosanta jatunpaj qhawaj (1 Ped. 3:3-5). Abrahamqa, wawan Isaac Jehovata yupaychaj warmiwan casarakunanta munarqa. Isaacpis, wawan Jacob Jehovata yupaychaj warmiwan casarakunanta munarqa. Israel llajtaj 12 ayllusnintaj paykunamanta jamorqa. w16.08 1:10

Kay profeciaqa kay tiempopi juntʼakushan. Kay 2015 watapi Jehovaj testigosnenqa Jallpʼantinpi 8.220.105 karqanku, sumaj willaykunamantataj willarqanku. Jehovaqa imaynatachus llajtan wiñananmanta nerqa: “Noqa Tata Diosmin chaytaqa nini. Chay imasqa usqhayta juntʼakonqapuni”, nispa. Tiempo pasasqanman jina, Diospa llajtanpi astawan llankʼaykuna kanqa. ¿Tukuy atisqanchejtachu ruwashanchej Diosmanta willamunapaj, yachachimunapaj ima? Ashkha hermanos, hermanas ima precursores auxiliares chayri regulares jina llankʼashanku. Wakenqa pisi willajkuna kanku chayman Diosmanta willaj ripunku. Wakintaj Tantakuna Wasista ruwaypi mayta yanapakushanku. Cheqamantapuni tukuyninchej “Señorpa ruwayninpi” mayta llankʼananchej tiyan (1 Cor. 15:58). w16.08 3:1, 2

Israelitas Egiptomanta kacharichisqa kasqankumanta pisi tiemponman, amalecitasqa paykunawan maqanakoj llojserqanku. Moisestaj Josueta kamacherqa, israelitasta maqanakupi kamachinanpaj. Josueqa wapu runa karqa. Chantá Moisesqa Aaronta, Hurtawan uj loma puntaman pusarqa. Chaymantapachataj israelitas maqanakushasqankuta qhawayta aterqanku. Moisesqa israelitas amalecitasta atipanankupaj imatachus ruwananta yacharqa. Payqa Jehová Diospa qosqan tojnuta cieloman oqharerqa. Chayta ruwajtintaj, Jehovaj atiyninrayku israelitasqa amalecitasta atipanayasharqanku. Jinapis Moisespa makisnin utiykojtin, payqa tumpata uraykucherqa. Chayraykutaj amalecitasqa israelitasta atipanayasharqanku. Chayta rikuspa, Aaronwan Hurwanqa “uj rumita churaporqanku, chaypi tiyakunampaj”. Chantá “sapa uj makinmanta japʼerqanku. Ajinamanta Moisespa makisnenqa oqharisqallapuni karqa inti chinkaykunankama”. Israelitasqa Jehovaj jatun atiyninrayku amalecitasta atiparqanku (Éxo. 17:8-13). w16.09 1:5-7

Pabloqa yachallarqataj, Jehovamanta mañakojtin, paypa yanapayninpi atienekojtin, Jesuspa wañuyninpi creejtin ima, atipayta atisqanta. ¿Noqanchejrí? ¿Sajra munayninchejta atipayta atisunmanchu? Arí. Chaypajqa Pablo jina ruwana, Jesuspa wañuyninpi creena, kallpanchejpi atienekunamantataj Jehovapi tukuy sonqo atienekuna. Wakin kutis, Jehovaqa uj chʼampaymanta may jinatachus llakikusqanchejta rikuyta munan. Sutʼincharinapaj, ujnin familiarninchej sinchʼi onqosqa kajtin chayri pillapis payta qhasimanta ñakʼarichejtin, ¿imatá ruwasun? ¿Noqanchej ajinapi rikukojtinchejrí? Jehovapi tukuy sonqo atienekojtinchejqa, cheqa sonqos kanapaj paymanta kallpata mañakusun, jinallataj kusisqallapuni, amigosnillanpuni kanapajpis (Fili. 4:13). Ñaupa tiempomanta, jinallataj kay tiempomanta cristianospa kausayninkupis, kayta yachachiwanchej: Jehovamanta mañakojtinchejqa, pay kallpachawasun ñakʼariykunata aguantanapaj. w16.09 2:14, 15

Unay tiempopeqa griegota parlaj wakin judiosqa, hebreota parlaj judiospaj thutuyta qallarerqanku, sapa pʼunchay mikhuna rakʼiypi viudasninkuman mana jaywasqankumanta. Chayrayku apostolesqa, qanchis qharista churarqanku tukuy viudasman mikhunata rakʼinankupaj. Paykunaqa griego sutisniyoj qharista churarqanku, ichapis viudas kusisqa kanankupaj (Hech. 6:2-6). Reparajtinchej chayri manapis, lugarninchejmanta costumbresman yachasqa kanchej (Rom. 12:2). Ichá vecinosninchejta, compañerosninchejta, llankʼaj masisninchejta ima, waj lugarniyoj runaspaj sajra imasta parlajta uyarinchej. ¿Paykuna jinachu noqanchejpis yuyanchej? Pillapis suyunchejmanta, costumbresninchejmanta asikojtin, ¿imatá ruwanchej? w16.10 1:7, 8

Cielopi, Jallpʼapi ima tukuy kaj chhikata qhawarispa sumajta tʼukurinchej chayqa, tukuy chaykuna tʼukunapaj jina ruwasqa kasqankuta reparanchej. “Creesqanchejrayku yachanchej” tukuy chay imasta Dios ruwasqanta, payta mana rikojtinchejpis. Reparanchejtaj Diosqa may kʼacha, jatun yachayniyojtaj kasqanta (Heb. 11:3, 27). Científicos imastachus yachakusqankumanta leespa, Diospa ruwasqasninmanta astawan yachakusunman. Chaykunamanta wakintataj tarisunman: Diospa ruwasqasnenqa jatun kayninta rikuchin videopi, Obra de un Creador, chantá El origen de la vida nisqa folletospi, ¿Existe un Creador que se interese por nosotros? nisqa libropi ima. ¡Despertad! revistaqa, wakin cientificospa chayri waj runaspa kausayninkumanta parlan. Chay runastaj imaraykuchus Diospi creeyta qallarisqankuta sutʼinchanku. Chay revistapeqa “¿Casualidad o diseño?” nisqa yachaqana llojsillantaj. Chaypitaj wakin animalitos chayri waj imas imatachus ruwayta atisqankuta sutʼinchan. Willantaj imaynatachus científicos kikin imasta ruwayta munasqankuta. w16.09 4:4, 5

Diospa waj kamachisninmanta parlakullantaj, pikunachus “creesqankurayku” Diosta kusicherqanku. Yachallarqankutaj, wañupojtinku paykunata Jehová kausarichinanta. Nitaj suyasharqankuchu cielopi kausarichisqa kayta, imaraykuchus Jesusqa niraj wañuporqachu chay suyakuy kananpaj (Gál. 3:16). Suyakorqankutaj kay Jallpʼapi wiñaypaj kausakuyta, uj kʼachitu paraíso kajtin (Sal. 37:11; Isa. 26:19; Ose. 13:14). Hebreos 11:13 Diospa cheqa sonqo kamachisninmanta nin: “Tukuy chay runasqa wañupunankukama creeyniyoj karqanku, imatachus Dios qonanta nisqan mana tiemponkupi juntʼakojtinpis. Chaywanpis paykunapajqa chayta juntʼakojta rikunkumanñapis jina karqa, chaytataj kusiywan japʼikorqanku”, nispa. Paykunaqa paraisota suyakusharqanku, chaypiñapis tiyakushankuman jinataj yuyaj kanku. Paykunamanta ujnenqa Abraham karqa. Jesús paymanta nerqa: “Rikuytapuni munarqa imastachus ruwanay karqa chayta, rikuspataj maytapuni kusikorqa”, nispa (Juan 8:56). Sara, Isaac, Jacob, wajkuna ima suyakullarqankutaj Diospa Gobiernon ima pʼunchaychus kay Jallpʼata kamachimunanta (Heb. 11:8-11). w16.10 3:4, 5

Jehovaqa atiyninwan yanapawanchej Paymanta, Wawanmanta cheqa kajta entiendenapaj, paykunapi creenapaj ima (Luc. 10:21). Chayrayku Jehovaman agradecekunallanchejpuni tiyan, Jesusnejta amigosnin kasqanchejta saqewasqanchejmanta, “pichus creeyninchejman pusawanchej, creeyninchejtataj juntʼachin” (Heb. 12:2). Chantapis creeyninchejta kallpachanallanchejtaj tiyan Diosmanta mañakuspa, Bibliata estudiaspa ima (1 Ped. 2:2). Jehovaj nisqasninpi sinchʼita creenchej chayqa, ruwasqasninchejwan chayta rikuchisun. Sutʼincharinapaj, Diospa gobiernonmanta runasman willallasunpuni, Jesuspa qhepanta rinankupajtaj yanapasunchej. Chantapis tukuypaj allin kajta “ruwana[llapuni], astawanqa creeypi hermanosninchejpaj” (Gál. 6:10). Kallpachakunallapunitaj ‘ñaupa ruwasqasninchejtapis’ saqepunapaj, imaraykuchus mana ni ima Jehovamanta karunchanawanchejta munanchejchu (Col. 3:5, 8-10). w16.10 4:11, 12

Jallpʼapi, cielopi kaj imasqa maychus kajpi churasqa kashanku. Chayrayku Jehovaqa munan, kamachisnin maychus kajta yupaychanankuta. Payqa Bibliata qowanchej, imaynatachus yupaychanata yachachinawanchejpaj. Biblianejta, llajtannejta ima kamachiwasqanchejta kasukuspalla kusisqa, sonqo juntʼasqataj kausakusun. Diosqa israelitasman Leyninta qorqa, imatachus ruwanankuta yachanankupaj. Chayrayku wakin warmis “Dioswan Tinkukuna Toldo punkupi” sirvej kanku (Éxo. 38:8). Aswan qhepaman, rey Davidqa levitasta, sacerdotestawan templopi ruwanasninkuman jina rakʼirarqa (1 Cró. 23:1-6; 24:1-3). Ñaupa tiemponmanta congregacionesqa, mana munayninkutachu ruwaj kanku. Astawanpis uj junta directiva jina karqa, congregacionesta imatachus ruwanankuta kamachinanpaj. Qallariypeqa chay juntapi apostoleslla karqanku (Hech. 6:1-6). Chay juntamanta, paykunata yanapakojkunamanta ima wakenqa cartasta qhelqarqanku. (1 Tim. 3:1-13; Tito 1:5-9). w16.11 2:3, 6, 8, 9

Jesús niraj jamushajtin 607 watapi, Nabucodonosor II Babiloniapi kamachisharqa. Paytaj may chhika soldadosninwan khuska Jerusalenwan maqanakoj rerqa. Bibliaqa nin: “[Nabucodonosorqa] Diospa Templompi waynasta espadawan wañuchicherqa manataj khuyarqachu wayna runasta, nitaj sipas warmistapis, nitaj machu runastapis, nitaj allin achachistapis. [...] Chay jawaqa Diospa Templontapis ruphaykucherqanku, Jerusalén llajtaj perqasnintataj thuñirarqanku. Tukuy jatuchaj wasismampis ninata japʼiykucherqanku. Chay valorniyoj kaj imastapis tukuyninta tʼunaykorqanku”, nispa (2 Cró. 36:17, 19). Judiosqa Jerusalén thuñisqa kashajtin mana tʼukunankuchu karqa. Imajtinchus Diosqa unaytaña profetasninta Jerusalenman kacharqa. Paykunawantaj willacherqa, judíos mana kasukojtinkoqa babilonios llajtankuta chinkachinankuta. Ashkha judíos wañuchisqa kananku karqa, puchojkunataj Babiloniaman presos apasqa kananku karqa. w16.11 4:1, 2

Adán juchallikusqanrayku, tukuyninchej juchasapas kanchej, wañunchejtaj. Chayrayku Biblia nin: “Uj runaj juchanraykulla, wañoyqa rey jina kamachin”, nispa. Jinapis Jehová Diosqa qhasilla kʼacha yanapayninta qowarqanchej. Chayrayku tukuy runasta salvananpaj uj runata kachamorqa, “Jesucristonejta” (Rom. 5:12, 15, 17). “Ajinallatataj uj runa kasukusqanrayku ashkhas cheqan runapaj qhawasqa kanqanku”. Paykunataj wiñay kausayta suyakuyta atinku “Señorninchej Jesucristonejta” (Rom. 5:19, 21). Kaypi tʼukurina: Jehovaqa mana Wawanta noqanchejrayku wañunanpaj qonanchu karqa. Jinapis Jehovaqa may kʼacha kasqanrayku, juchamanta, wañuymanta ima salvanawanchejpaj Wawanta kachamorqa. Jehovawan Jesuswan imatachus noqanchejrayku ruwasqankutaqa, qhasillamanta japʼishanchej. Mayta agradecekunchej Dios perdonawasqanchejmanta, wiñaypaj kausakuyta atisqanchejmanta ima, ¿icharí? Chayrayku Diosman agradecesqa kasqanchejta kausayninchejwan rikuchina. w16.12 1:1, 6, 7

Pablo nerqa: “Aychaj munaynimpi yuyayqa wañuyman pusan”, nispa (Rom. 8:6). ¿Imatá chaywan niyta munarqa? ‘Aychaj munayninman jina’ kausaspaqa, Jehovamanta karunchakusunman, wiñay kausaytataj niña japʼisunmanchu. Chaywanpis mana ajinapi rikukunapaj, kausayninchejta cheqanyachiyta atisunman. ¿Corintopi khuchichakoj runamanta yuyarikunkichu, pichus congregacionmanta qharqochikorqa chaymanta? Payqa kausayninta cheqancharqa, sajra munaynintataj niña kasorqachu. Chantá watejmanta Jehovata llimphu sonqowan yupaycharqa (2 Cor. 2:6-8). Chay runaqa ancha millaytapuni kausarqa, aychaj sajra munayninta ruwaspa. Jinapis kausayninta cheqancharqa. Chayrayku kay tiempopi, pillapis Diosta kasukunanmanta sajra munayninta kasuyta qallarishan chayqa, kausayninta cheqanchayta atinman. Pabloj yuyaychasqanqa noqanchejtapis yanapawasunman, kausayninchejpi imallatapis cheqanchanapaj. w16.12 2:5, 12, 13

Jehovaman llakiyninchejta saqejtinchej, payqa yanapawasun. Chaytaj mayta sonqochawanchej. Diosqa mañakojtinchej, “yuyasqanchejmantapis aswan ashkhataraj” qowasun (Efe. 3:20). Arí, Jehovaqa mana ashkhallatachu qowasunchej, manaqa “aswan ashkhataraj”. Jehovaj bendicionesninta japʼinapajqa, paypi tukuy sonqo creenanchej tiyan, kamachiwasqanchejtataj kasukunanchej tiyan. Moisesqa Israel llajtata nerqa: “Señorniykichej Tata Diostaj sumajta bendecisonqachej, ima jallpʼatachus herenciata jina japʼikapunaykichejpaj qosunkichej, chaypi. Ajina kanqa sichus qankuna Señorniykichej Tata Diospa nisqasninta uyarinkichej, juntʼankichejtaj kay kamachisqasninta kunan qoshaykichej, chaykunata chayqa. Arí, Señorniykichej Tata Dios bendecisonqachej nisusqaykichejman jina”, nispa (Deu. 15:4-6). Jehová Diosqa cheqa sonqowan sirvillajtinchejpuni bendecinawanchejta niwanchej. ¿Chaypi atienekunchejchu? Ajina kananpi, ashkha imasrayku atienekusunman. w16.12 4:8, 9

Jehovaqa israelitasta ajllarqa, imatachus Abrahamman nisqanta juntʼayta munasqanrayku (Gén. 22:15-18). Chantapis payqa imatapis munakuywan ajllan, cheqan kajman jinataj. Chaytataj sutʼita reparasunman, israelitas mana kasukojtinku imaynatachus paykunata cheqanchasqanpi. Israelitas tukuy sonqo pesachikojtinku, Jehovaqa paykunata khuyakoj, munakojtaj. Pay nerqa: “Noqa paykunata jampisaj juchachakusqankumanta. Noqa paykunata tukuy sonqo munakusaj mana munakunapaj jina kashajtinkupis”, nispa (Ose. 14:4). Jehovaqa imatachus ajllasqanwan wajkunata yanapaj. Paymantataj mayta yachakusunman. Payqa angelesta, runasta ima ajllayta atinankupaj jina ruwarqa. Ñaupajtaqa Jesusta ruwarqa. Payqa Diospa rijchʼayninman jina ruwasqa karqa, kausayninpi imatapis ajllayta atinanpaj jinataj (Col. 1:15). ¿Imaynatá Jesús imatapis ajllarqa? Niraj kay Jallpʼaman jamushaspa, Tatanmanta ni jaykʼaj karunchakuyta ajllarqa. Diospa contranta Satanás oqharikojtintaj, mana payman ujchakorqachu. w17.01 2:3, 4

Ichapis kunanqa Jehovapaj astawan llankʼayta atinchej chayri pisillataña. Machitus, jóvenes, onqosqa kanchej chaypis, Diosqa yachan imaynatachus paypaj sumajta llankʼayta atisqanchejta. Manataj mañawanchejchu imatachus mana ruwayta atisqanchejta. Astawanpis Jehovaqa payta yupaychanapaj imatachus ruwasqanchejwan kusikun. Jesusqa Tatan ima ruwaykunatachus qosqanta, tukuy sonqo ruwarqa. Noqanchejpis kikillantataj ruwasunman (Pro. 8:30, 31). Llampʼu sonqo kajtinchejqa, congregacionpi ima llankʼaytapis japʼisqanchejwan kusisqa kasunchej, nitaj wajkunaj ruwanasninkumanta envidiakusunchu. Astawanqa Diospa llajtanpi ima ruwaytachus japʼisqanchejwan kusisqa kasunchej. Jehová chay ruwayta qowasqanchejrayku. Llampʼu sonqo kaspaqa hermanosta jatunpaj qhawasun, tukuy sonqotaj yanapasun. Reparasuntaj Jehová paykunamanpis llajtanpi uj ruwanata qosqanta (Rom. 12:10). w17.01 3:13, 14

Wakin kutis jovenesqa encargados jina churasqa kanku, kuraj hermanospa chayri unaytaña llankʼaj hermanospa ruwanasninkumanta. Jovenesqa kuraj hermanosmanta allinta yachakunkuman. Timoteo Pablomanta aswan joven karqa, unaytataj Diospaj khuska llankʼarqanku. Pabloqa Corintopi cristianosman nerqa: “Timoteota kachamushaykichej. Payqa munasqa waway jina, Señortataj tukuy sonqo sirvishan. Payqa yuyarichisonqachej, Cristo Jesusta sirvisqaypi imaynatachus imatapis ruwashasqayta”, nispa (1 Cor. 4:17). Chaypi reparanchej, Pablowan Timoteowan khuska allinta llankʼasqankuta, yanapanakusqankutataj. Payqa tiempochakorqa, Timoteoman yachachinanpaj. Timoteotaj sumajta yachakorqa. Pabloqa Timoteota munakorqa, yacharqataj Timoteo Corintomanta hermanosta sumajta yanapananta. Ancianosqa waj hermanosta Pablo jina wakichinkuman, congregacionta ñaupajman apanankupaj. w17.01 5:13, 14

Jehovaqa “kawsay yaku juturi”, wañusqasta kausarichimuspataj paykunaj Tatankuman tukun (Sal. 36:9). Padrenuestro mañakuypi, Jesús nerqa: “Cielopi kashaj Tatayku”, nispa (Mat. 6:9). Jehovaqa Jesusman atiyta qon wañusqasta kausarichimunanpaj (Juan 6:40, 44). Chayrayku Jesús nerqa: “Noqa kani kausarimuy, kausaytaj”, nispa (Juan 11:25). Nillarqataj: “Pichus Diospa munayninta ruwajqa, chaymin hermanoy, hermanay, mamaytaj”, nispa (Mar. 3:35). Diosqa munan “may chhika” runas tukuy nacionesmanta, ayllusmanta, tukuy parlaykunamantawan payta yupaychanankuta. Paykunaqa mana yupay atina kanku, Jesús juchasninchejrayku wañusqanpi creenku, Diostataj kasukuyta munanku. Paykunaqa Diosta yupaychaspa ninku: “Salvacionqa Diosninchejmanta jamun, pichus kamachina tiyanapi tiyasqa kashan, chaymanta, Corderomantawan”, nispa (Apo. 7:9, 10). w17.02 2:10, 11

Bibliamanta waj parlaykunapi yachachinankupaj, Zionʼs Watch Tower Tract Society nisqata, 1884 watapi autoridadeswan registracherqanku. Chayqa uj asociacionman rijchʼakorqa, hermano Russelltaj presidente karqa. Payqa Bibliata sumajta estudiarqa, nitaj manchikorqachu runasman niyta, iglesiaspi llullata yachachisqankuta. Imajtinchus yachachej kanku alma mana wañusqanta, Dios kinsa uyayoj kasqanta ima. Hermano Russellqa yachakorqa Jesuspa kutimuynin mana runaspa rikunantachu kananta, ‘mana judío kajkunaj’ pʼunchayninkupis 1914 watapi tukukunanta (Luc. 21:24). Payqa tiemponta, kallpanta, qolqenta ima churarqa yachakusqanta runasman willarinanpaj. Arí, hermano Russelltaqa Jehovawan Jesuswan yanaparqanku llajtanta ñaupajman pusananpaj. Hermano Russellqa mana jatunchachikuyta munarqachu. Kay 1896 watapi qhelqarqa, ni paypis ni paywan kajkunapis, wajkunawan jatunpaj qhawachikuyta munasqankuta. Paykunaqa mana munarqankuchu sumaj sutista churanankuta, nitaj pipis sutisninkuwan rejsisqa kananta. Aswan qhepaman hermano Russell nerqa: “Kay llankʼayqa mana runaspatachu”, nispa. w17.02 4:8, 9

Noqanchejqa imatachus ruwananchejta sapa kuti ajllananchej tiyan. Wakin kutisqa imatachus ruwananchejpi ashkhata tʼukurina tiyan, wakin kutistaj mana. Imaraykuchus wakin imasta ajllasqanchejqa, kausayninchejta allinman chayri mana allinman chayachinman. Imatapis sumajta ajllajtinchejqa llakiykunasninchej pisi kanqa, kusisqataj kausakusunchej. Mana allinta ajllajtinchejrí ashkha llakiykunasniyoj kasunchej, manataj kusisqachu kausakusunchej. ¿Imataj yanapawasun kausayninchejpi imatapis sumajta ajllanapaj? Diospi, Palabranpi ima creey yanapawasun. Diospi creesqanchejta rikuchisunman, yanapayta munawasqanchejpi, yachayta qonawanchejpi ima atienekuspa. Palabranpi creesqanchejtataj rikuchisunman, yuyaychaykunasninpi atienekuspa (Sant. 1:5-8). Diosman astawan qayllaykojtinchej, Palabrantapis astawan munakojtinchej, Jehová allinninchejtapuni munasqanpi astawan atienekusun. Ajinamanta niraj imatapis ajllashaspa, Palabrantaraj leerisun. w17.03 2:2, 3

Josafatqa enemigosnin Judaman maqanakoj jamojtinku, tatan Asa jinallataj Jehovawan yanapachikorqa (2 Cró. 20:2-4). Payqa enemigosninta manchikorqa. Jinapis paykunata atipananpaj Jehovamanta mañakorqa: “Noqaykojtaqa mana kallpayku kanchu”, nispa. Chantá nillarqataj ni imata ruwayta atisqankuta. Josafatqa mana iskayrayarqachu Jehová yanapananmanta. Chayrayku Diosman nerqa imatachus kunan pʼunchaypaj texto nisqanta. Wakin kutisqa, llakiypi kaspa Josafat jina ni imata ruwayta atisunmanchu, chayri manchikuyta qallarisunman (2 Cor. 4:8, 9). Jinapis Josafatpa ruwasqanta yuyarikuna. Payqa “tukuy runaspa chawpinkupi” Diosmanta mañakuspa nerqa, mana kallpayoj kashasqankuta (2 Cró. 20:5). Tatas chayri qosaspis Josafat jina ruwankuman. Paykunaqa problemasta allinchanankupaj Diosmanta yuyaychayta, kallpata ima familiankoj ñaupaqenpi mana pʼenqakuspa mañakunkuman. Ajinamanta familianku reparanqa Jehovapi atienekusqankuta. Jehovataj paykunata Josafatta jina yanapanqa. w17.03 3:12, 13