Julio

Jeftej warmi wawan Jehovata sirvinanrayku mana casarakuyta, nitaj wawasniyoj kayta ajllarqa. ¿Imaynatá pay jina ruwasunman? Kay tiempopipis Jehovata yupaychaj ashkha jóvenes Jehovapaj astawan llankʼayta munasqankurayku mana casarakuyta, nitaj wawasniyoj kayta ajllanku. Ashkha machitu hermanospis wawasninkuwan, allchhisninkuwan ima astawan kanankumantaqa, tiempochakunku Jehová Diospaj astawan llankʼanankupaj. Wakin machitu hermanosqa Diosta yupaychanapaj wasispi llankʼanku. Wakintaj Reinomanta Willajkunapaj Escuela nisqaman rinku, chantá pisi willajkuna kanku chayman ripunku. Jehovaqa ni jaykʼaj qonqaponqachu chay cheqa sonqo hermanos payta munakusqankurayku ruwasqankumanta (Heb. 6:10-12). Qanrí, ¿Jehovapaj astawan llankʼayta atiwajchu? w16.04 1:16, 17

Jesús nerqa pay uj michej jina kasqanta, yachachisqasnintaj uj tropa ovejitas jina kasqankuta. Uj tropa ovejitasqa ujchasqapuni kanku, michejninkoj qhepantataj rinku. Iskay ovejitas uj orqopi, iskay ovejitastaj uj vallepi, uj ovejitataj waj ladopi kashankuman chay, ¿nisunmanchu chay phishqa ovejitas uj tropalla kasqankuta? Mana. Jinallataj noqanchejwanpis, “uj tropalla[manta]” kanapaj, uj michejpa qhepallanta rinapaj ima, hermanosninchejwan khuska tantakunanchej tiyan. Tantakuykunaman rispaqa congregación ujchasqa kananpaj yanapanchej (Sal. 133:1). Wakin hermanostaqa Jehovaj testigosnin kasqankurayku tatasninku, hermanosninku ima chejnikunku. Chaywanpis Jesús nerqa uj familiata qonanta, mayqenchus paykunata munakunkuman, qhawankuman ima (Mar. 10:29, 30). Tantakuykunaman rispaqa, ichapis chay hermanospaj tatasninku jina, hermanosninku jinataj kasun. Chaypi tʼukurispaqa, tukuy tantakuykunaman rinapaj mayta kallpachakusun. w16.04 3:9, 10

Kay tiempopi Diosta yupaychanchej paymanta mañakuspa, willamuspa, tantakuykunaman rispa ima. Hermanosninchejwan mana allinta kausakojtinchejqa, Jehová Diosta yupaychasqanchej qhasilla kanqa. Jehová Diospa amigosnin kayta munanchej chayqa, wajkuna pantajtinku sonqonmantapacha perdonananchej tiyan (Luc. 11:4; Efe. 4:32). Jehová Diosqa munan noqanchejpura perdonanakunanchejta, allinta kausakunanchejta ima. Chayrayku allin kanman kayta tapurikunanchej: “¿Nichu hermanosta perdonayta atillani? ¿Paykunawan khuska kayta munanichu?”, nispa. Mana perdonayta atillanchejchu chayqa, Jehová Diosninchejmanta yanapayninta mañakuna. Imaraykuchus Tatanchej Jehovaqa mañakusqanchejta uyariwasunpuni (1 Juan 5:14, 15). w16.05 1:6, 7

Ichá tapurikunchej, ¿maykʼajkamataj willallasunpuni? Jesusqa kay pachaj tukukuyninkama willakunanta nerqa. Chayrayku noqanchejqa kay qhepa pʼunchaykunapi tukuy runasman willashallanchejpuni, Jehová Dios atiyninta qowasqanchejrayku (Hech. 1:8; 1 Ped. 4:14). Waj religionesmanta wakin runaspis Diospa atiyninwan kasqankuta ninku. Chaywanpis chay runas, ¿kay pʼunchaykunapi Jehová Diosmanta willashankuchu? Wakenqa Jehovaj testigosnin jina willayta munanku, chaywanpis mana atinkuchu. Chantapis wakin runasqa willanku uj tiempollata. Wakintaj wasimanta wasi purinku, chaywanpis mana Jehová Diospa gobiernonmanta willankuchu. Cheqamantapuni nisunman chay runasqa, mana Jesús ruwarqa chay llankʼaytachu ruwashasqankuta. w16.05 2:13, 16

Apóstol Pabloqa Éfeso cristianosman kayta nerqa: “Qankunaqa yachakorqankichej, ñaupa kausayniykichejta, ñaupa ruwasqasniykichejtapis saqenaykichejta. Imaraykuchus chay ñaupa kausayniykichejqa, aswan mana allinman tukushan, munayniykichejwan chʼaukiyachikusqaykichejrayku. Qankunaqa yuyayniykichejta mosojyachinallaykichejpuni tiyan. Mosoj runa kaywantaj pʼachallikuychej, mayqenchus Diospa munayninman jina ruwasqa karqa, chaywan. Chaytaj ruwasqa karqa, cheqan kajta ruwanapaj, cheqa sonqotaj kanapaj”, nispa (Efe. 4:22-24). Kay versiculosqa niyta munan kausayninchejta tijrachinapaj kallpachakunallanchejpuni kasqanta, ‘mosoj runa kaywan’ pʼachawan jina pʼachallikunallanchejpuni kasqanta ima. Chayrayku Jehová Diosta unaytaña sirvispapis, kʼacha kaykunasninmanta yachakuyta atillanchejpuni. Diospa Palabrantaj yanapallawasunpuni sumaj cristianos kanapaj, Jehová Dios jina ruwanapaj ima. w16.05 4:8, 9

Jehovaqa sonqo tiyasqa, ujchasqa llajtannejtataj sumajta yachachishawanchej, cheqanchashawanchej ima (Isa. 64:8). Sajra pachapi kausakuspapis, llajtanpi may jarkʼasqas kanchej. Astawantaj Jehová Diosninchejta rejsinchej, munakuwasqanchejraykutaj mayta kusikunchej (Sant. 4:8). Mosoj pachapi Jehová kamachishajtin, Jallpʼantinpi Payllata yupaychasunchej ujchasqas, sonqo tiyasqastaj. Chantapis mana onqoy kanqachu, ni wañuy, ni machuyay, ashkha bendicionestataj japʼisunchej. Chay tiempopeqa Jehová tʼukunapaj jina yachachillawasunpuni, cheqanchallawasunpuni, mayqentachus mana yachallanchejpischu imaynatapunichus ruwananta (Isa. 11:9). Chantapis Diosqa yuyayninchejta, cuerponchejta ima mosojyachenqa. Ajinamanta munasqanman jina paymanta sumajta yachakuyta, kasukuyta ima atillasun. Chayrayku Jehová cheqanchanawanchejta saqenallapuni. Mayta agradecekusqanchejta rikuchinachej, chay jinamanta munakuyninta rikuchiwasqanchejmanta. w16.06 1:8, 9

Chay versiculopi rikhurej palabrastaqa Moisés parlarqa Israel llajtaman qhepa kaj umallirichiyninpi, 1473 watapi Jesús niraj jamushajtin. Israelitasqa Moab jallpʼapi kasharqanku, Sumaj Jallpʼata japʼikapunankupaj Jordán mayuta chimpanankupaj wakichisqa kashajtinku (Deu. 6:1). Moisesqa israelitasta 40 watasta kamacherqa. Ashkha chʼampaykunapi rikukunankuta yachasqanraykutaj mana manchachikunankupaj, Jehovapi atienekunankupaj, cheqa sonqos kanankupaj ima, parlasqanwan kallpacharqa. Chayrayku Jehovaj Chunka Kamachiykunasninmanta, waj leyesninmanta ima parlaytawan Deuteronomio 6:4, 5 versículos imatachus nisqanta yuyaricherqa. Israelitasqa yacharqanku Jehová pay “kʼatalla” Diosninku kasqanta. Cheqa sonqo israelitasqa uj Diosllata yupaycharqanku, ñaupa tatasninkoj Diosninta. w16.06 3:2, 3

Kay Jallpʼapi kashaspa, Jesús chay palabrasta nerqa. Armagedón maqanakuyta Jesús ñaupajman apanqa, chayrayku ichapis payqa chay maqanaku maykʼajchus kananta yachanña (Apo. 19:11-16). Chaywanpis tukuy noqanchejqa mana yachanchejchu maykʼajchus, ima horachus kananta. Chayrayku wakichisqallapuni kananchejqa, ¡may sumaj! Jehovaqa yachan maykʼajchus manchay ñakʼariy tiempo qallarinanta. Chay pʼunchaytaj qayllitapiña kashan. Biblia nin jinataj “chayamonqapuni” (Hab. 2:1-3). ¿Imaraykú chaymanta mana iskayrayananchejchu tiyan? Jehovaqa kamachisninman nin, manchay ñakʼariy tiempopi salvananta, paraisopi wiñay kausayta qonanta ima. Nisqanta juntʼananmantataj mana iskayrayanchejchu. Chayrayku paraisopi kausakuyta munanchej chayqa, wakichisqaspuni kananchej tiyan. w16.07 2:4-6

Uj kuti Jesusman nerqa wajkuna saqerparejtinkupis manapuni sarqerparinanta (Mar. 14:27-31, 50). Chaywanpis Jesusta presochanankupaj japʼisqankutawan, tukuynin apostolesnin saqerparerqanku, Pedropis. Kinsa kutistataj Pedroqa Jesusta mana rejsisqanta nerqa (Mar. 14:53, 54, 66-72). Chayta ruwasqanraykutaj may phutisqa kasharqa. Chayrayku Jehovaqa perdonarqa, waj ruwaykunatapis qollarqapuni. Chay tiempopi Jesuspa yachachisqasnin kasunman karqa chay, Pedroj ruwasqantataj yachasunman karqa chay, ¿Jehovapi atienekullasunmanpunichu karqa? Kay tiempopi kikillantataj pipis pantajtin, ¿yuyarikusunchu Jehová khuyakuyniyoj kasqanta, juchallikojman pesachikunanpaj tiempota qoshasqanta ima? Wakin kutisqa juchallikojkunaqa Jehovaj khuyakuyninta qhesachanku, nitaj juchankumantapis pesachikunkuchu. Jehovaqa maychus tiemponpi cheqan kajta ruwanqa chay runasta llajtanmanta qharqospa. ¿Chayta Jehová ruwananpi atienekusunchu? w16.06 4:8, 9

Jehovaqa kʼacha yanapayninrayku llakisqa kashajtinchej sonqochawanchej (Sal. 51:17). Tesalonicamanta cristianos qhatiykachasqas kashajtinku, Pablo paykunaman nerqa kunan pʼunchaypaj texto nisqanta. Jehová kʼacha munakuyninrayku munakuwasqanchejta, noqanchejmanta llakikusqanta ima yachayqa, mayta sonqochawanchej. Juchasapas kasqanchejrayku, Jehová mana yanapawasunmanchu chayqa, ni ima suyakuyniyoj kasunman (Sal. 49:7-9). Jinapis Jehovaqa uj sumaj suyakuyta qowanchej. Jesús nerqa: “Tataypa munaynenqa kay: Pichus Diospa Wawan kasqayta reparaspa noqapi creejqa wiñay kausayniyoj kanqa”, nispa (Juan 6:40). Chayrayku Diospa kʼacha yanapayninraykulla wiñaypaj kausakuyta atinchej. Pablo nerqa: “Diosqa jatun khuyakuyninta sutʼita rikuchin. Chaytaj tukuy laya runasta salvacionman pusan”, nispa (Tito 2:11). w16.07 3:14, 15

Kunanpis Diospa llajtanpi pillapis qosanta chayri warminta wasanchan chayqa juchallikun. Chaytaj Diospa llajtanpi maypi jinalla rikukun. Uj bautizasqa hermano chayri hermana, casarasqa kashaspa khuchichakuy juchapi urmasqanpi tʼukurina. Payqa warminmanta chayri qosanmanta divorciakun wajwan casarakunanrayku. Chay juchallikusqanmanta mana pesachikojtenqa, congregación llimphu kananpaj qharqochikun (1 Cor. 5:11-13). Payqa “juchamanta kutirikusqa[nta]” rikuchejtillan, congregacionman kutinpuyta atin (Luc. 3:8; 2 Cor. 2:5-10). Qharqochikoj mashkha tiempomantachus congregacionman kutinpuyta atisqanta, mana niyta atisunmanchu. Ichapis uj wata chayri ashkha watas pasanqa juchanmanta pesachikusqanta rikuchinanpaj. Juchallej runa congregacionman kutinpojtinpis, ‘Diospa ñaupaqenpi juzgasqa’ kanqa, rikuchinanpaj tukuy sonqochus manachus pesachikusqanta (Rom. 14:10-12). w16.08 1:12, 13

Apóstol Pabloqa ancianos kanankupaj kallpachakojkunata sumajta ruwashasqankuta nerqa. Chantapis Apóstol Pablo nisqanman jina, imata tarinapajpis imaynatachus kallpachakunchej, ajinallatataj uj hermano siervo ministerial kananpaj mayta kallpachakunan tiyan. Chay hermanoqa reparan may kʼacha kaykunata rikuchinanpaj kallpachakunallanpuni kasqanta. Chantapis siervo ministerial kaspaqa, anciano kananpajñataj kallpachakun. Wakin hermanosqa, Jehová Diosta astawan sirviyta munaspa kausayninkuta tijrachishanku. Sutʼincharinapaj, ichapis hermanos, hermanas imaqa precursores kayta, Betelpi llankʼayta chayri Tantakuna Wasista ruwaysikuyta munanku. Chaypajqa maytapuni kallpachakunanku tiyan ruwanasninkuta juntʼanankupaj. w16.08 3:3, 4

Nehemiasmanta parlarina. Nehemiasqa Jerusalenman rejtin, waj llajtayoj runasqa judiosman churanakusharqanku, Jerusalenpa perqasninta ama sayarichinankupaj. Jerusalenqa mana perqasniyoj kasharqa, judiostaj llakisqas kasharqanku. ¿Imatá Nehemías ruwarqa? ¿Llakikorqachu, makisninta llauchhiyacherqachu? Mana. Payqa Jehová Diosmanta yanapata mañakuyta yachaj, imaynatachus Moisés, rey Asá, Jehová Diospa waj cheqa sonqo kamachisnin ima ruwaj kanku, ajinata (Éxo. 17:8-13; 2 Cró. 14:8-13). Chayrayku Nehemiasqa chay kutipipis Jehová Diospa yanapayninta maskʼarqa. Paymanta mañakorqa, Jehová Diostaj Nehemiasta yanaparqa. ¿Imaynatataj? ‘Jatun atiyninwan’ judiosta kallpachaspa (Neh. 2:17-20; 6:9). Kay tiempopirí noqanchejta, ¿Jehová jatun atiyninwan kallpachawanchejchu? w16.09 1:9

Holanda suyumanta uj periódico, religionta kamachejkunaj ujnin tantakuyninkumanta nerqa: “Ashkhasqa mana iglesiaman rinapaj jinachu pʼachallisqas kasharqanku, astawanraj qʼoñimojtin”, nispa. Ashkha runas, sapa kuti ninku Jehovaj testigosnin sumaj pʼachallisqas kasqankuta. Apóstol Pabloqa cristianosman nerqa: ‘Diosta yupaychaj runas jina maychus kajta pʼachallikuychej, allin yuyaywantaj’, nispa (1 Tim. 2:9, 10). Apóstol Pablo chayta warmisman yuyaychajtinpis, qharistapis yanapallantaj. Jehová Diosqa kamachisnin maychus kajta pʼachallikunankuta munan. Noqanchejtaj Jehová Diosta yupaychasqanchejrayku, sumajta pʼachallikuyta munanchej (Gén. 3:21). Tukuyta Kamachejqa Jehová Dios, Palabranpi sutʼinchan, imaynatachus kamachisnin pʼachallikunankuta. Chayrayku ima ropatachus ajllasqanchejqa Kamachejninchej Jehová Diosta kusichinan tiyan. w16.09 3:1, 2

Wakinmanqa Bibliaj profeciasninta estudiay gustan. Wakintaj Bibliaj nisqanta kikinchanku, unay tiempomanta qhelqajkuna, científicos chayri waj yachayniyoj runas nisqankuwan. Sutʼinchanapaj, Génesis 3:15 nisqanpi tʼukurina. Jehová Diosqa ñaupaj profeciata willarqa, Adanwan Evawan kamachiyninpa contranta oqharikusqankutawan. Chay profeciaqa entiendechiwanchej, imaynatachus Diospa Gobiernon Paylla sumajta kamachiyta atisqanta rikuchinanta, tukuy ñakʼariykunata tukuchinanta ima. ¿Imaynatá Génesis 3:15 estudiawaj? Ima versiculoschus chay profeciata astawan sutʼinchan, chaykunamanta uj listata ruway. Chantá sapa uj maykʼajchus qhelqakusqanta maskʼay, chay fechasman jinataj listapi churay. Ajinapi Bibliata qhelqajkuna mana kikin tiempopichu kausasqankuta reparanki. Jinapis sapa ujpa qhelqasqankoqa, chay profeciata astawan sutʼinchan. Ajinamanta rikuchinki, Bibliata qhelqajkunaqa Jehovaj atiyninwan qhelqasqankuta. w16.09 4:8

Uj tiempota apóstol Pedroqa mana judío kajkunata, mana allinpajchu qhawarqa. Jinapis pisimanta pisi yachakorqa niña ajinata yuyananpaj (Hech. 10:28, 34, 35; Gál. 2:11-14). Noqanchejpis, waj lugarmanta runasta mana allinpajchu qhawanchej chayqa, mayta kallpachakunanchej tiyan, sonqonchejmanta chayta orqhonapaj (1 Ped. 1:22). ¿Imataj yanapawasun? Yuyarikuna tiyan, maymanta kaspapis tukuyninchej juchasapas kasqanchejta, nitaj salvakunapaj jinachu kasqanchejta ima (Rom. 3:9, 10, 21-24). Chayrayku mana yuyanachu tiyan, wajkunamanta nisqa aswan sumaj kasqanchejta. Apóstol Pablo jina yuyananchej tiyan. Payqa cristiano compañerosninman nerqa: “Manaña waj llajtayoj runaschu kankichej, nitaj forasteroschu. Manachayqa [...] Diospa familianmanta[...] kankichej”, nispa (Efe. 2:19). Tukuypis mayta kallpachakunanchej tiyan, runasta mana pisipaj qhawanapaj, mosoj runamanta pʼachawan jina pʼachallikunapaj ima (Col. 3:10, 11). w16.10 1:9

Jehová Diosqa Bibliata qowanchej. Chaynejtataj yachachiwanchej imatachus qhepaman ruwananta, imatachus kusisqa kanapaj ruwananchejta ima. Chayrayku Bibliaj yuyaychayninman jina kausakunanchej, sapa día leenanchej ima may sumajpuni (Sal. 1:1-3; Hech. 17:11). Chantapis Jehovaqa “allin kamachi, yuyayniyoj[nejta]” “tiemponpi mikhunata” qowanchej (Mat. 24:45). Ñaupa tiempomanta Diospa kamachisnin jina, noqanchejpis Jehovaj nisqasninpi tʼukurinanchej, leenanchej ima tiyan. Chaytaj yanapawasun Diosman cheqa sonqollapuni kanapaj, Diospa Gobiernon ima pʼunchaychus kay Jallpʼata kamachinanta suyakunapaj ima (Heb. 11:1). ¿Imapiwantaj Diospa ñaupa tiempomanta kamachisninta yanaparqa sinchʼi creeyniyoj kanankupaj? Jehovamanta yanapata mañakusqanku, mañakusqankuta uyarisqanta yachasqanku ima (Neh. 1: 4, 11; Sal. 34:4, 15, 17; Dan. 9:19-21). w16.10 3:7, 8

Jesús nerqa Diosta munakuy leypa “aswan kuraj, ñaupaj kaj” kamachisqa kasqanta (Mat. 22:35-40). Creeyniyoj, munakuyniyoj kayqa may sumaj. Chayrayku Bibliata qhelqajkunaqa ashkha kutispi chay iskay kʼacha kaykunata khuskata oqharerqanku. Pabloqa cristianosman nerqa: “Creeytawan, munakuytawan pecherata jina churakuna”, nispa (1 Tes. 5:8). Juantaj nerqa: “Payqa kayta kamachiwanchej: Paypa Wawan Jesucristoj sutinpi creenanchejta, purajmantataj munanakunanchejta”, nispa (1 Juan 3:23). Pablo nillarqataj kay tiemponchejpi “creey, suyakuy, munakuy ima [wiñaypaj kananta]. Chaykunamanta aswan kurajtaj munakuy” (1 Cor. 13:13). ¿Imaraykú Pablo munakuy aswan kuraj kasqanta nerqa? Aswan qhepamanqa mosoj pachapi imastachus Dios ruwananpi manaña creeyta necesitasqanchejrayku. Biblia nin jinataj paraisopiña sumajta kausakusun. Jinapis Diosta, runa masinchejta ima munakuyta necesitallasunpuni. Munakusqanchejtaj wiñallanqapuni. w16.10 4:15-17

Wakin hermanosqa congregacionesta waturej kanku, “imastachus Jerusalenpi kaj apostoleswan, ancianoswan kamachisqankuta” willanankupaj (Hech. 16:4). Congregacionesqa chay kamachiykunata kasukoj kanku. Cristianostaj “creesqankupi kallpachasqa karqanku, sapa diataj creejkunaqa astawan astawan yapakusharqanku”. Sucursalespi kamachejkuna, Comité de País nisqapi kajkuna, congregacionesta waturejkuna, ancianospis, Diospa llajtanpa kamachisqanta kasukunanku tiyan. Bibliaqa congregacionta ñaupajman apajkunata kasukunata nin (Deu. 30:16; Heb. 13:7, 17). Diosman cheqa sonqo kajkunaqa, llajtanpa kamachisqanta mana thutuspa kasukunku. Ama Diótrefes jina kanachu. Payqa congregacionta ñaupajman apajkunata mana valechejchu (3 Juan 9, 10). Diospa llajtanpa kamachisqanta kasukojtinchej, hermanoswan allinta kausakunapaj, ujchasqas kanapajtaj yanapakunchej. Tapurikuna: “¿Hermanosta kallpachanichu Diosman cheqa sonqollapuni kanankupaj? ¿Jehovaj kamachisqanta chay ratochu kasukuni?”, nispa. w16.11 2:10, 11

Chay kamachiyta kasukoj judiosqa, Babiloniapi presos kashaspa allillanta kausakorqanku. Babiloniosqa judiosta ruwanasninkuta ruwajta saqellaj kanku, suyuntinta viajajtapis, ima negociosta ruwaytapis. Ñaupa tiempomanta qhelqajkuna nisqankuman jina, judiosqa negociosta ruwayta, ashkha imasta sumajta ruwayta ima Babiloniapi yachakorqanku. Wakintaj qhapajyarqanku ima. Chaypi kausayqa, mana unay watas ñaupajta Egiptopi kausay jinachu karqa. Israelitasqa Egiptopi esclavos karqanku (Éxo. 2:23-25). ¿Atinkumanchu karqa Diosta watejmanta maychus kajta yupaychayta? Runaj yuyayninman jinaqa, ichá paykunaqa niña chayta ruwayta atinkumanchu karqa. Imaraykuchus babiloniosqa presosta ni jaykʼaj kacharejchu kanku. Diostajrí llajtanta kacharichinanta nerqa, kacharicherqapunitaj. Diospa nisqanqa juntʼakunpuni (Isa. 55:11). w16.11 4:3, 5

Jesuspa wañuyninrayku, Diosqa Pablota, tiemponmanta cristianostawan juchasninkumanta perdonarqa. Jehovaqa paykunata atiyninwan ajllarqa wawasninta jina rejsikapunanpaj. Cheqa sonqollapuni kajtinkoqa, cielopi kausakunanku karqa, Jesuswan khuskataj kamachinkuman karqa. Jinapis paykunaqa Jallpʼapiraj kausakusharqanku. Chantá, ¿imaraykutaj Pablo “juchapaj wañunchejña” nispa nerqa? Pabloqa uj kikinchaywan sutʼincharqa, kausayninku manaña ñaupajta jinachu kasqanta. Chantá nerqa Jesús wañusqantawan, mana rikukoj cuerpoyoj, ni jaykʼaj wañunanpajtaj kausarichisqa kasqanta. Chayrayku “wañoyqa manaña paypa patronninchu”. Ajinallataj cristianoswanpis karqa, paykunaqa wañusqa jinaña karqanku. Imaraykuchus niña sajra munayninkuman jinachu ruwasharqanku. Chayrayku kausayninkoqa niña ñaupajta jinachu karqa. Chaymantapachataj Diospa munayninman jina kausakunankupaj kallpachakorqanku. Paykunaqa “juchapajqa wañusqaña” kasharqanku, Diospajtaj kausasharqanku “Cristo Jesusnejta” (Rom. 6:9, 11). w16.12 1:9, 10

Diospa atiyninpa munaynimpi yuyayqa, mana niyta munanchu Jehovallamanta chayri Bibliallamanta parlay, nitaj chaykunallapi yuyaychu. Ñaupa tiempomanta cristianospis, tukuy runas jinallataj kausakorqanku. Paykunaqa mikhoj, ujyaj kanku. Chantapis casarakoj kanku, familiayoj, llankʼayniyoj ima karqanku (Mar. 6:3; 1 Tes. 2:9). Pablowan ñaupa tiempomanta cristianoswanqa, mana ruwanasninkutachu kausayninkupi ñaupajman churarqanku. Yachanchej jina, Pabloqa toldosta ruwaspa kausakoj. Jinapis mana trabajontachu aswan ñaupajman churarqa, manaqa Jehová Diosta sirviyta. Chayrayku Diosmanta runasman willay, yachachiy ima, kausayninpi aswan ñaupajpi karqa (Hech. 18:2-4; 20:20, 21, 34, 35). Romamanta hermanosqa Pablo jina ruwananku karqa. Noqanchejpis pay jinallataj ruwananchej tiyan (Rom. 15:15, 16). w16.12 2:5, 15, 16

Jehovaqa paypaj tukuy imata ruwasqanchejta, may allinpaj qhawan. Payqa iskayrayajtinchej entiendewanchej. Chantapis qolqerayku chayri familianchejpaj llankʼananchejrayku llakikojtinchej, yanapayta munawanchej. Payqa allinta yachan, onqoyrayku chayri sinchʼi llakisqa kasqanchejrayku, manaña Paypaj ñaupajta jinachu ruwayta atisqanchejta. Chantapis Jehovaqa may sumajpaj qhawan, chʼampaykunasniyoj kaspapis cheqa sonqo kanapaj kallpachakusqanchejta. Chaymanta ama iskayrayanachu (Heb. 6:10, 11). Chantapis yuyarikuna, Jehovaqa tukuy mañakuykunata uyarisqanta. Chayrayku Paymanta mañakojtinchejqa uyariwasunpuni (Sal. 65:2). “Khuyakuyniyoj Tata, tukuy imapi sonqochaj Dios[qa]”, paypa qayllallanpipuni kanapaj tukuy imata qowasunchej. Wakin kuteqa ichá hermanosninchejwan yanapachiwasun (2 Cor. 1:3). Jehovaqa wajkunamanta khuyakojtinchej kusikun. (Mat. 6:3, 4). Chayta ruwasqanchejmantataj bendecinawanchejta niwanchej. w16.12 4:13, 14

Jesus kay Jallpʼaman jamuspataj, Satanás juchaman urmachiyta munajtin, payqa mana urmarqachu (Mat. 4:10). Chantá wañunanpaj uj chʼisi faltashajtin, Jesusqa Tatanman nerqa paypa munayninta ruwayta munasqanta. Jesús kayta nerqa: “Tatáy, munanki chayqa, kay copata noqamanta karunchay. Amataj munaynillayqa ruwakuchunchu, astawanqa munayniyki ruwakuchun”, nispa (Luc. 22:42). ¿Jesús jina ruwayta atisunmanchu? ¿Imatapis ajllayta atisunmanchu Diosta jatunchanapaj jina, munaynintataj ruwanapaj? Arí, Jesús jina ruwayta atisunman. Noqanchejpis Diospa rijchʼayninman jina ruwasqa kanchej (Gén. 1:26). Jinapis mana Jehová jinachu tukuy imata munasqanchejman jina ajllayta atinchej. Bibliaqa Jehová kamachiykunata qowasqanchejta nin. Diostaj chay kamachiykunata kasukunanchejta munan. Sutʼincharinapaj, warmisqa qosankuman kʼumuykukoj sonqo kananku tiyan. Wawastaj tatasta kasukunanku tiyan (Efe. 5:22; 6:1). w17.01 2:4, 5

Kunan ashkha tʼukuna imas rikukushan. Jallpʼapi Diospa llajtanqa, tukuy imapi mayta wiñashan. Chayrayku ashkha imas waj jinamanta ruwakushan. Noqanchejpis wakin imasta niña ñaupajta jinachu ruwananchej tiyan, chaytaj ichá mana atikullanchu. ¿Imataj yanapawasunman? Llampʼu sonqo kay. Allinninchejta maskʼanamantaqa, Diospa Gobiernonta ñaupajman churana. Ajinata ruwaspa, ujchasqallapuni kasunchej. Pabloqa cristianosman nerqa: “Cuerponchejqa ashkha imasniyoj, manataj tukuyninkuchu kikin imasta ruwanku”, nispa. Chaywantaj nisharqa, congregacionpi sapa uj waj jina ruwanasniyoj kasqanta (Rom. 12:4, 5). Diospa Gobiernon ñaupajman rinanpaj yanapakuyta munanchej, chaypajtaj ima ruwanatapis tukuy sonqo japʼikunchej. Kuraj hermanosqa jovenesta wakichinkuman. Jovenestajrí ima llankʼaytapis japʼikunanku tiyan llampʼu sonqowan, kuraj hermanosta jatunpaj qhawaspataj. Hermanostaj warminkuta agradecekunku, paykunata yanapasqankumanta. Qosayoj warmisqa Priscila jina ruwankuman. Payqa qosan Aquilata tukuy sonqo yanaparqa (Hech. 18:2). w17.01 5:15, 16

Jehovaqa Gedeonta kamacherqa, Israel llajtata madianitaspa makinmanta salvananta. Gedeontaj Diospi atienekorqa, kasukunantataj nerqa. Jehovaj kamachisqanta entiendenanpajtaj, yanapayninta mañakorqa (Jue. 6:36-40). Wapu runa kajtinpis, yuyayniyoj karqa (Jue. 6:11, 27). Israelitas Gedeonta reyta churayta munajtinkutaj, mana munarqachu. Astawanpis Jehovaj kamachisqanta juntʼaytawan, wasinman riporqa (Jue. 8:22, 23, 29). Congregacionpi mosoj llankʼayta japʼejtinchej, chayri astawan yanapakuyta munajtinchej, ¿jatunchakuytachu munashanchej? Mana. Biblia nin, Jehovapaj astawan llankʼayta munananchejta, hermanosta yanapananchejta, llajtanpitaj ñauparinanchejta (1 Tim. 4:13-15). Jinapis congregacionpi ñauparinapajqa, mana waj llankʼaytapunichu japʼinanchej tiyan. Aswan kʼachas kanapaj kallpachakusunman, jinallataj imastachus ruwayta yachasqanchejta sumajta ruwanapajpis. Jinamantaqa Diosta sumajta yupaychasunchej, hermanosninchejtapis yanapasunchej. w17.01 3:15, 16

Jehová Diosqa juchamanta kacharichinawanchejpaj ashkhata pagarqa (1 Ped. 1:19). Mayta munakuwasqanchejrayku, munasqa Wawanta noqanchejrayku wañunanpaj qorqa. Ajinamanta Jesusqa Adanpa cuentanmanta tatanchejman tukorqa (1 Cor. 15:45). Jesús kausayninta qosqanrayku, mana wiñay kausayllatachu japʼisun, manachayqa Diospa familianmanta kasun. Chantapis mana juchayoj runasman tukuyta atisun, Jehovataj kamachiykunasninta mana pʼakispalla familianpi watejmanta japʼikapuwasun. Jehovata tukukuykama sirvejkuna mana juchayoj runasman tukojtinku, ¡may sumajchá kanqa! Cielopi, jinallataj jallpʼapi tukuy kausajkunaqa, uj familialla kanqanku. Tukuyninchej Diospa wawasnin kasun (Rom. 8:21). Jesuspa wañuyninmanta agradecekusqanchejta rikuchinapaj, Jesús kausayninta qosqanmanta tukuyman willarinanchej tiyan. w17.02 1:17, 19

Kay 15 de julio de 2013 Torremanta Qhawaj revista sutʼincharqa, allin kamachi yuyayniyojqa, Diospa Llajtanta Kamachejkuna kasqankuta. Paykunataj ajllasqa cristianosmanta uj juchʼuy qotu kanku. Diospa Llajtanta Kamachejkunaqa, sapa semana tantakuspa Diospa llajtanpaj wakin imasta ajllanku. Ajinata tantakuspa ujchasqa, uj yuyayllataj kanku (Pro. 20:18). Paykunamanta ni mayqenpis aswan kurajpaj qhawasqachu. Chayrayku sapa wata, paykuna ukhumanta waj hermanoñataj, sapa semana tantakuyninkuta ñaupajman apan (1 Ped. 5:1). Diospa Llajtanta Kamachejkunaj sojta comisionesninpipis, kikillantataj ruwakun. Ni mayqenninkutaj patrón kasqanta yuyakunchu. Astawanpis sapa ujninku ‘kamachislla’ kanku, allin kamachi yuyayniyojpa yachachisqanta, kamachisqantataj japʼikunku. Diospa Llajtanta Kamachejkunaqa mana ninkuchu mana pantasqankuta. Nillataj ninkuchu, Diospa atiynin paykunawan parlasqanta. Chayrayku Bibliata sutʼinchaspa chayri Diospa llajtanpaj imatapis ajllaspa pantankuman. w17.02 4:10-12

Jesús kausayninta qosqanmanta agradecekusqanchejta rikuchinchej, kausayninchejta Jehovaman qopuspa, bautizakuspa ima. Ajinamanta Jesuspa wañuyninpi creesqanchejta, Jehovajta kasqanchejta ima rikuchinchej (Rom. 14:8). Diosqa imatapis munakuwasqanchejrayku ruwan, munantaj payta yupaychajkuna pay jina kanankuta, purajmantataj munanakunankuta (1 Juan 4:8-11). Runasta munakuspaqa, “cielopi kashaj Tata[nchejpa] wawasnin” kayta munasqanchejta rikuchinchej (Mat. 5:43-48). Tukuy kamachiykunamanta kuraj kajqa nin: “Diosniykitaqa munakunayki tiyan tukuy sonqoykiwan”, nispa. Qhepan kajtaj nin: “Runa masiykita munakunayki tiyan”, nispa (Mat. 22:37-40). Runa masinchejta munakusqanchejta rikuchisunman, Diospa Gobiernonmanta sumaj willaykunata paykunaman willaspa. Jehová kamachiwasqanchejman jina wajkunata, astawanraj hermanosninchejta munakojtinchej, Diosta tukuy sonqo munakusun (1 Juan 4:12, 20). w17.02 2:13, 14

Yachayniyoj runaqa qhasi diosta mana yupaychayta munanmanchu. Jinapis Diospa llajtanqa imatachus ruwananta mana ajllayta aterqachu. Bibliaqa nin, israelitas “iskay yuyayniyojllapuni” kasqankuta. Eliasqa paykunata yuyaycharqa, cheqa Diosta yupaychayta ajllanankuta. ¿Imaraykutaj israelitas mana ajllayta atillarqankuchu? Iskay imasrayku. Ñaupaj kaj, paykunaqa mana Jehovapi creerqankuchu, nitaj uyariyta munarqankuchu. Chantapis mana Jehovapi atienekorqankuchu, nitaj yachayninta japʼinankupajpis tiempochakorqankuchu. Chayta ruwankuman karqa chayqa, allinta ajllankuman karqa (Sal. 25:12). Iskay kaj, israelitasqa waj llajtasmanta runas jina kausayta qallarerqanku. Chay runasqa israelitasta waj jinata yuyachiyta qallarerqanku, imatachus ruwanankutapis nerqanku. Jinamantataj israelitasqa chay runasta qhatikuyta qallarerqanku, qhasi diosesninkutataj yupaycharqanku. Jehovaqa unaymantaña nerqa, mana kasukojtinku ajinapi rikukunankuta (Éxo. 23:2). w17.03 2:6, 7

¿Imaynatá Ezequías jina ruwasunman? Ichá imallapis jarkʼashawanchej Diosta mana tukuy sonqochu sirvinapaj, mana tiempoyojtaj kananchejpaj. Kunanpis ashkha runasqa, runasllata uj diosta jina qhawanku. Paykunaqa may rejsisqa runasta jatunchanku, jinallataj waj runastapis. Chayri tiemponkuta churanku chay runaspa qhelqasqankuta leenankupaj, fotosninkuta qhawanankupaj ima. Ashkha runasqa celularesninkupi chayri computadorankupi Internetnejta ashkha runaswan parlanku. Tukuypis atinchej Internetnejta familiaresninchejwan amigosninchejwan parlarikuyta. Jinapis chayta tʼojpirisqalla kaspaqa tiempollata pierdesunman. Chantapis Internetpi fotosninchej chayri imatachus nisqanchej waj runasman gustajtin, umata oqhariyta qallarisunman. Manaña wajkunaman gustajtintaj, phiñakuyta qallarisunman. Tapurikusunmantaj: “¿Kallpachakunichu runasta mana uj diosta jina qhawanaypaj? ¿Qhasi manakaj imaspichu tiempoyta usuchini?”, nispa (Efe. 5:15, 16). w17.03 3:14, 17