Agosto

Gedeonqa israelita soldados ima enemigosninkuwan maqanakusharqanku. Tutantintaj enemigosninkuta 32 kilometrosta jina qhatiykorqanku. Chay enemigosninkoqa israelitasta watasta ñakʼaricherqanku. Chayrayku Gedeón, soldadosnin ima enemigosninkuta tukuchinankukama qhatiykullarqankupuni (Jue. 7:22; 8:4, 10, 28). Kunanpis uj maqanakupi jina kashanchej. Enemigosninchejqa kanku: Satanás, sajra pachan, juchasapa kayninchej ima. Wakin hermanosqa chaykunata atipanankupaj kallpachakushanku. Diospa yanapayninwantaj ashkha kutispi atipanku. Wakin kutisqa chaykunata atipanapaj kallpachakuspa, kay pacha tukukunanta suyaspa ima, ichá saykʼusunman. Yuyarikunataj kallpachakunallapuni kasqanta. Jesús nerqa kay qhepa pʼunchaykunapi chʼampaykunapi rikukunanchejta, qhatiykachasqa kananchejta ima. Nillarqataj tukukuykama sinchʼita aguantajtillanchej atipananchejta (Mat. 24:13). w16.04 2:1, 2

Tantakuykunapeqa Bibliata estudianchej, imatachus Jehová ruwananchejta munasqantataj yachakunchej (Isa. 30:20, 21). Diosta mana yupaychajkunapis tantakuykunaman jamuspa, reparanku ‘cheqamantapuni Diosqa noqanchejwan kashasqanta’ (1 Cor. 14:23-25). Diosqa tantakuykunata atiyninwan ñaupajman apashasqanrayku, tantakuykunapi yachakusqanchejqa paymanta jamun. Chayrayku chayman rispaqa imatachus Dios niwasqanchejta uyarinchej, reparanchejtaj mayta munakuwasqanchejta. Ajinamanta payman astawan qayllaykunchej. Jesús congregacionta ñaupajman apashan, nerqataj: “Maypichá iskay chayri kinsa sutiypi tantasqa kashanku, chaypi noqaqa kashani paykunaj chaupinkupi”, nispa (Mat. 18:20). Bibliaqa congregaciones ‘chaupipi’ Jesús kashasqanta nillantaj (Apo. 1:20–2:1). Reparanchej tantakuykunapi noqanchejwan Jehová, Jesús ima kashasqankuta, kallpachawasqanchejta ima. ¿Imaynataj Jehová kashan payman, wawanwan ima qayllaykunanchejpaj kallpachakushasqanchejta rikuspa? w16.04 3:13, 14

Uj hermana iskay hermanoswan parlarisqanpi tʼukurina. Imaynatachus chay hermana parlasqanqa ujnin hermanota phiñacherqa. Chay hermanos iskaynillanku kashaspataj, phiñakoj hermanoqa hermanamanta quejakuyta qallarerqa. Ujnin hermanotaj yuyaricherqa chay hermana chʼampaykunapi rikukuspapis, Dios 40 watastaña cheqa sonqo sirvisqanta. Nitaj sonqonta nanachiyta munaspapunichu chayta parlasqanta. Phiñasqa hermanotaj tʼukurispa nerqa: “Razonniykipi kashanki”, nispa. Chayrayku chaymanta qonqaporqa. ¿Imatataj chaymanta yachakunchej? Pillapis sonqonchejta nanachiwajtinchej, imatachus ruwayta ajllayta atinchej. Munakuyniyoj kasun chayqa perdonayta atillasun (Pro. 10:12; 1 Ped. 4:8). “Phiñakuyta qonqayman chura[jtinchej]” Jehovaqa chayta may allinpaj qhawan (Pro. 19:11). Pillapis sonqonchejta nanachinawanchejpaj jina imatapis nejtin chayri ruwajtin, tapurikuna: “¿Chay niwasqanta qonqapuymanchu? ¿Allinchu kanman imatachus niwasqanpi tʼukurinallaypuni?”, nispa. w16.05 1:8, 9

¿Pikunataj kay pʼunchaykunapi Diospa gobiernonmanta willashanku? Jehovaj testigosnillan. Imaraykuchus noqanchej Diospa gobiernonmanta sumaj willaykunata willamushanchej. Chantapis runasta maskʼanchej Diosmanta willanapaj. Willamunchejtaj Jehová Diosta, runa masinchejta munakusqanchejrayku, nitaj qolqeta maskʼasqanchejraykuchu. Chantapis tukuy laya runasman, tukuy parlayniyoj runasman ima willanchej. Kay pachaj tukukuyninkamataj mana saykʼuspa Diospa gobiernonmanta willamullasunpuni. Jehovaj llajtan kay qhepa pʼunchaykunapi imatachus ruwasqanqa tʼukunapaj jina. Chaywanpis, ¿imaynatá sumaj willaykunata Jallpʼantinpi willamunchej? Apóstol Pablo kunan pʼunchaypaj textopi kuticherqa. Chayrayku Jehovamanta kallpata mañakunallapuni, Diospa gobiernonmanta willamunallapajpuni, mayqentachus Jesucristo kamachiwarqanchej ruwananchejta (2 Tim. 4:5). w16.05 2:17, 18

Dios saqewanchej payta kasukuytachus manachus ajllananchejta. Kasukuyta ajllajtinchej, imatachus munasqanta ruwanapaj kallpachakojtinchej ima, payta munakusqanchejta, agradecekusqanchejta ima rikuchinchej. Satanasqa Jehová mana allintachu kamachin nispa nin. Jinapis Diosta kasukuspa pay kamachinawanchejta munasqanchejta rikuchinchej. Diostaj payta sirvinapaj kallpachakusqanchejta jatunpaj qhawan (Job 2:3-5; Pro. 27:11). Mana atikullajtinpis cheqanta ruwanapaj kallpachakojtinchejqa, cheqa sonqo kasqanchejta, kamachinawanchejta munasqanchejta ima rikuchinchej. Diosqa pay jina kʼacha kaykunata rikuchinapaj kallpachakunanchejta nin (Col. 3:12; 2 Ped. 1:5-7). Imatachus yuyasqanchejwan, imachus sonqonchejpi kasqanwan ima mana atipachikunata munanchu (Rom. 8:5). Dios nisqanman jina ruwaspaqa, sumaj cristianosman tukunapaj Biblia yanapashawasqanchejta rikunchej. w16.05 4:12, 13

Imaynatachus manka llutʼaj runa makinpi kaj llinkʼi tʼuruta sumajta rejsin, ajinallatataj Jehovapis sumajta rejsiwanchej. Yachan pantaj runas kasqanchejta, maykamallachus imatapis ruwayta atisqanchejta. Chayman jinataj cheqanchawanchej (Sal. 103:10-14). Diosqa imaynatachus qhawawasqanchejta aswan sutʼita yachasunman, imaynatachus Jesús apostolesta pantajtinku qhawasqanpi. Apostolesqa wakin kutis siminakoj kanku, mayqenninkuchus kurajpaj qhawasqa kananmanta. Chaypi kashasunman karqa chay, ¿imatataj apostolesmanta yuyasunman karqa? Ichá yuyasunman karqa, mana sumaj llinkʼi tʼuru jinachu kasqankuta. Jinapis Jesusqa mana jinatachu yuyarqa. Yacharqataj yuyayninkuta tijranankupaj yanapayta atisqanta. ¿Imaynatá? Kʼachamanta, pacienciawan yuyaychaspa, llampʼu sonqo kaspa ima (Mar. 9: 33-37; 10:37, 41-45; Luc. 22:24-27). Jesús kausarimusqanmanta qhepaman apostolesqa Diospa atiyninta japʼerqanku, manañataj llakikorqankuchu mayqenninkuchus kurajpaj qhawasqa kananmanta. Astawanpis imatachus Jesús kamachisqanta juntʼanankupi yuyarqanku (Hech. 5:42). w16.06 1:10

Paylla tukuyta Kamachej, pay jinataj mana waj dios kanchu (2 Sam. 7:22). Chayrayku Moisesqa Jehová “pay kʼatalla” kasqanta nerqa, israelitasta yuyarichinanpaj Jehovallata yupaychananku kasqanta. Paykunaqa mana waj llajtasmanta runas jinachu ruwananku karqa, chay llajtasmanta ashkha llulla diosesta yupaychaj kanku. Yuyajtaj kanku diosesninku atiyniyoj kasqanta tukuy imata ruwanankupaj. Sutʼincharinapaj, egipciosqa Intej diosnin Ra nisqata, cieloj china diosnin Nut nisqata, Jallpʼaj diosnin Geb nisqata, Nilo mayoj diosnin Hapi nisqata ima yupaychaj kanku. Animalestapis yupaychajllataj kanku. Diostajrí 10 ñakʼariykunawan rikucherqa mana chay llulla dioses jinachu kasqanta. Cananeosqa Baal nisqa diosta yupaychaj kanku. Yuyajtaj kanku Baal kausayta qosqanta, cielomanta dios kasqanta, parachimusqanta, qhon qhonkunata apachimusqanta ima. Ashkha lugarespi, yuyaj kanku Baal dios jarkʼasqanta (Núm. 25:3). Israelitasqa yuyarinanku karqa Jehovalla “cheqa Dios kasqanta”, ‘kʼata’ Diosninku kasqanta ima (Deu. 4:35, 39). w16.06 3:4, 5

Jesusqa yacharqa imasraykuchus Jehovapi, llajtanpi ima atienekuyta. Noqanchejpis pay jinallataj yachanchej imasraykuchus Jehovapi, llajtanpi ima atienekuyta. Kay qhepa pʼunchaykunapi Jehová yuyaychashawasqanchejta sutʼita rikunchej. Jallpʼantinpi cheqa kajmanta willamunapajtaj yanapashawanchej. Chay llankʼaytataj noqallanchej ruwashanchej. Jehová Dios yachachiwasqanchejraykulla ujchasqas, kusisqastaj kashanchej. Jehová nerqa: “Kamachisneyqa tukuy sonqowan sumajta takirikonqanku”, nispa (Isa. 65:14). Mayta kusikunchej Jehová yuyaychawasqanchejrayku, sumaj imasta ruwanapaj yanapawasqanchejrayku ima. Kay pachanmanta runastajrí, mana kusisqaschu kanku, nitaj uj suyakuyniyojchu kanku. Chayrayku Jehovaman cheqa sonqo kana, yuyaychawasqanchejtapis kasukunallapuni. w16.06 4:10-12

Ñaupa tiempo llajtasta qhawajkunamanta mayta yachakusunman. Jerusalén, waj llajtas ima, jatuchaj perqasniyoj karqanku enemigosninku mana yaykunankupaj. Qhawajkunaqa perqa pataspi qhepakoj kanku, llajtaj muyuyninpi imachus kasqanta qhawanankupaj. Wakintaj llajta punkuta qhawaj kanku. Paykunaqa tuta, pʼunchay sumaj wakichisqas kananku karqa. Enemigosninkuta rikuspataj, llajtaman willananku karqa (Isa. 62:6, 7). Qhawajkunaqa yacharqanku rijchʼarisqas kananku kasqan, imachus kashasqanmanta sumajta yachananku kasqan ima may sumaj kasqanta. Puñurparejtinkutaj, ashkha runas wañunkuman karqa (Eze. 33:6). Kay 70 watapi, Jesús jamusqanmantaña, romano soldadosqa Jerusalenman yaykuykorqanku. ¿Imaynatá? Unay tiempomanta qhelqaj judío Josefo nisqanman jina, llajtata wakin qhawajkuna puñurparisqanku. Romanostaj yaykuykuspa templota ruphaykucherqanku, Jerusalentataj thuñerqanku. Mana jaykʼaj jinataj chay kutipi judiosqa mayta ñakʼarerqanku. w16.07 2:2, 7, 8

Jehovaj kʼacha yanapayninrayku ashkha bendicionesta japʼiyta atinchej. Chaywanpis Diospa yanapayninta mana tijranachu, munasqanchejman jina millayta kausanapaj. Ñaupa cristianospa tiemponkupi, wakenqa Diospa kʼacha yanapayninta tijrayta munarqanku munasqankuman jina millayta kausanankupaj (Jud. 4). Jehovata wasanchaj cristianosqa, yuyaj kanku juchallikojtinku Jehová perdonanallanta. Wajkunatapis paykuna jina juchallikunankupaj tanqayta munarqanku. Pillapis kunan chayta ruwajqa, “jatun khuyakuyta qoj Diospa atiyninmanta[...]” alqochakun (Heb. 10:29). Kunanpis Satanasqa wakin cristianosta yuyachin juchallikuyta atisqallankuta, Jehová perdonanallanta ima. Jehovaqa juchankumanta tukuy sonqo pesachikojkunata perdonananpaj wakichisqa kashan. Jinapis sajra munayninchejwan mana atipachikunapaj kallpachakunata munan. w16.07 3:16, 17

Uj qosa chayri uj warmeqa, wasanchaj qosan chayri warmin pesachikojtin, payta perdonayta atin. Profeta Oseasqa, wasanchaj warmin Gomerta perdonarqa. Jehovapis Israel llajtata perdonarqa, wasanchasqanmanta pesachikojtin (Ose. 3:1-5). Pipis qosan chayri warmin wajwan khuchichakusqanta yachaspa, watejmanta paywan puñuykun chayqa, perdonasqanta rikuchin. Manañataj divorciakuyta atinchu. Jesusqa soltero qhepakuyta uj regalota jina qhawajkunamanta parlarqa, nerqataj: “Pichus mana casarakuspalla kakuyta atejqa, ajinalla kakuchun”, nispa (Mat. 19:10-12). Ashkha hermanosninchej, Jehovapaj astawan llankʼayta munasqankurayku solteros kayta ajllanku. Chayta ruwajkunata, “allinta ruwanki” ninanchej tiyan. w16.08 1:15, 16

Jovenesqa kallpayoj kasqankurayku, Jehová Diospaj mayta llankʼayta atinku (Pro. 20:29). Betelpi wakin jovenesqa, librosta, Bibliasta ima imprimispa llankʼanku. Waj jovenestaj, Tantakuna Wasista ruwaspa chayri allinchaspa llankʼanku. Wakintaj sinchʼi llakiykunapi yanapakunku. Wakintaj precursores kanku, yachakushankutaj waj qalluta parlayta chayri pisi willajkuna kanku chayman ripunku. Salmista nerqa: “Qhawaychej, yachaychejtaj Tata Diosqa kʼacha kasqanta. [...] Diosta maskʼajkunarí ni imamanta pisichikonqankuchu”, nispa (Sal. 34:10). Arí, Jehová Diosta yupaychanapaj tukuy atisqanchejta ruwasun chayqa, cheqamantapuni kusisqas kasunchej. Imaraykuchus yachanchej chayta ruwasqanchej Jehovata kusichisqanta. Paytaj qhawanawanchejta nisqanta juntʼanqa. w16.08 3:5, 8

Jehová Diosqa yanapayta munawanchej, chayta ruwananpajtaj atiyniyoj (1 Cró. 29:12). Satanasta, sajra pachanta ima atipayta munanchej chayqa, Jehovaj atiyninta mañakunanchej tiyan (Sal. 18:39; 1 Cor. 10:13). Jehová Diosqa Biblianejta kallpachawanchej. Chaymantataj may agradecesqas kashanchej. Sapa killa publicacionespi imastachus yachakusqanchejpi tʼukurina. Chantapis Zacarías 8:9, 13 imatachus nisqanta yuyarikuna. Chay palabrasqa Jerusalén templo watejmanta sayarichikushajtin nikorqa. Chaytaj noqanchejtapis kallpachawasunman. Diosqa kallpachallawanchejtaj tantakuykunanejta, jatun tantakuykunanejta, llajtanpi escuelasnejta ima. Chaypi imastachus yachakusqanchejqa, yanapawanchej Jehová Diosta allin sonqowan yupaychanapaj, llajtanpi astawan ruwayta munanapaj, payta yupaychaypi ruwanasninchejta juntʼanapaj ima (Sal. 119:32). Chay yachachiykunawan kallpachakunanchejpaj, ¿tukuy imatachu ruwashanchej? w16.09 1:10, 11

Moisespa leyninpi kamachiykunaqa, qharis warmi ropata churakunankuta chayri warmis qhari ropata churakunankuta millachikusqanta rikuchin (Deu. 22:5). ¿Imatataj chaymanta yachakunchej? Diosqa chejnikun, qharis warmiman rijchʼachej ropata churakunankuta, jinallataj warmis qhariman rijchʼachej ropata churakunankutapis. Nillataj munanchu churakunanchejta, mayqen ropachus mana sutʼita rikuchinchu qharichus warmichus kasqanchejta, chayta. Bibliaj yuyaychaykunasnenqa, ima ropatachus churakuyta sumajta ajllanapaj yanapawasunman. Chay yuyaychaykunataj yanapawanchej, maymanta kajtinchejpis, ima costumbresniyoj kajtinchejpis, qʼoñi lugarpi chayri chiri lugarpi tiyakojtinchejpis. Ima ropachus allin, imatajchus mana allinchu kasqanta yachanapajqa, mana uj listatachu necesitanchej. Astawanpis Bibliaj yuyaychaykunasnillanta necesitanchej. Chay yuyaychaykunataj imaynatachus pʼachallikuyta ajllajta saqewanchej. w16.09 3:3, 4

Tʼukurillaytaj Bibliata qhelqajkunapi. Paykunaqa mana manchachikuspa cheqanta qhelqarqanku. Chay tiempopi qhelqaj runasqa, llajtankumanta, reyesninkumantapis, allin kajllata qhelqarqanku. Jehovaj profetasninrí, israelitasmanta, reyesninkumanta ima tukuy imata qhelqarqanku, sajra ruwayninkutapis (2 Cró. 16:9, 10; 24:18-22). Paykunaqa pantasqasninkutapis mana pakarqankuchu, nillataj Diospa waj kamachisninpatapis (2 Sam. 12:1-14). Bibliaj yuyaychasqanman jina kausakojtinchejqa, sumajta yanapawasqanchejta reparasun. Chaytaj Biblia Diospa Palabranpuni kasqanta rikuchiwasun (Sal. 19:7-11). Bibliaqa ashkha runasta reparachin, imapichus creesqanku mana cheqachu kasqanta (Sal. 115:3-8). Chantapis tukuy atiyniyoj Jehová Diospi atienekunankupaj yanapan. Pikunachus Dios mana kasqanta nejkunarí, paypa ruwasqasninta diosninkupaj qhawanku. Wakintaj runas sumaj kausayta apamunankuta ninku. Jinapis imastachus ruwasqankoqa, chʼampaykunata kunankama mana tukuchiyta atinchu. Biblialla aswan qhepaman sumaj kausay kananta nin (Sal. 146:3, 4). w16.09 4:10, 11

Booz Rutmanta forastera jina imaspichus rikukusqanmanta llakikorqa. Chayrayku Rutta nerqa qhepakunanta sipas kamachisninwan khuska, chajranpi llankʼajkuna mana imananankupaj. Chantapis Boozqa Rutman mikhunata, yakuta ima qorqa llankʼajkunasninman jina. Boozqa Rutta respetarqa, kallpacharqataj (Rut 2:8-10, 13, 14). Boozqa Rutmanta khuyakorqa suegran Noemiman kʼacha munakuyta rikuchisqanrayku. Chantapis khuyakullarqataj Jehovata yupaychasqanrayku, jarkʼayninta maskʼasqanrayku ima. Boozqa Rutta khuyakuspa Jehová jina munakuyta rikucherqa (Rut 2:12, 20; Pro. 19:17). Ajinallatataj kay tiempopipis munakuyta rikuchispaqa “tukuy laya runas[ta]” cheqa kajmanta yachakunankupaj, Jehová paykunata mayta munakusqanta yachanankupaj ima yanapasun (1 Tim. 2:3, 4). w16.10 1:10-12

Noqanchejpis creeyninchej sinchʼiyanqa Jehová Diosmanta yanapata mañakojtinchej, mañakusqanchejta uyarisqanta yachajtinchej, maychus tiemponpi necesitasqanchejta qowajtinchej ima (1 Juan 5:14, 15). Jehová Diospa atiyninta mañakunallapuni, sinchʼi creeyniyoj kanapaj (Luc. 11:9, 13). Jehová Diosmanta mañakushaspaqa, mana necesitasqallanchejtachu mañakunanchej tiyan. Manaqa mañakushaspa agradecekunanchej tiyan, sapa diataj jatunchananchej tiyan. Imaraykuchus Jehová Diosqa noqanchejpaj ruwarqa ashkha tʼukuna imasta (Sal. 40:5). Chantapis Jallpʼantinmanta hermanospaj mañakunanchej tiyan. Sutʼincharinapaj, mañakusunman carcelpi kaj hermanospaj, ancianospaj ima. Mañakuykunasninchejta Jehová uyarisqanta yachaspaqa, astawan payman qayllaykunchej, creeyninchejtaj astawan sinchʼiyan (Heb. 13:3, 7). w16.10 3:8, 9

Kay tiempomanta Diospa kamachisninpis, Diospa atiynin kausayninkupi yanapananta saqenku. Chayrayku Diospa Gobiernonpi creenku, chay gobierno ñauparinanpajtaj yanapakunku. Chantapis purajmanta mayta munanakunku (Gál. 5:22, 23). Chayraykutaj Jallpʼantinpi 8 millonesmanta astawan testigos kanku, congregacionespitaj ujchasqas, sonqo tiyaykusqas ima kashanku. Sutʼita rikunchej munakuyniyoj kay, creeyniyoj kay may sumaj kasqanta. Ajina ujchasqas kanku Jehová Diospa yanapaynillanwan. Chayraykutaj Jehová Dioslla jatunchanapaj jina (Isa. 55:13). Jehovaqa runasta yanapallanqapuni paypi creenankupaj. Uj pʼunchaytaj kay Jallpʼaqa mana juchayoj runasmanta, cheqan runasmanta ima juntʼa kanqa, kusiywantaj Jehová Diosta wiñay wiñaypaj yupaychanqanku. w16.10 4:18, 19

Ancianosqa Diospa Palabranman jina yuyaychawanchej, congregacionta jarkʼayta munasqankurayku. Noqanchejqa kikillantataj chay yuyaychaykunata kasukunchej, allinninchejpaj kasqanrayku. Apóstol Pabloqa chay jina hermanowan imatachus ruwanankuta nerqa: “Chay runata señalaychej, amañataj paywan masichakuychejchu”, nispa. Chaywanpis mana enemigonkuta jinachu qhawananku karqa (2 Tes. 3:11-15). Kay tiempopi ancianosqa, Bibliaj yuyaychaykunasninta mana kasukojta yanapallankutaj. Ichá pillapis Jehová Diosta mana yupaychajwan casarakunanpaj rejsinakushanman (1 Cor. 7:39). Chay hermano mana kasukojtin, ancianosqa ichapis umallirichenqanku sutʼinchanankupaj chay hermanoj ruwasqan congregacionta mana allinpaj qhawachishasqanta. Chay umallirichiyta kasukuspaqa, pantasqata purej hermanota yanapasun. Ajinamanta payqa pantasqanta, Jehová Diostapis phiñachisqanta reparakuspa ichapis pesachikonqa. w16.11 2:13

Pentecostés 33 watapi, may chhika judíos, judiospa yachachiyninta qhatikojkuna ima, Jehová Diospa atiyninwan ajllasqa karqanku. Ajinamanta paykunaqa karqanku: “Ajllasqa ayllu [...], reyestaj sacerdotestaj, Diospaj tʼaqasqa suyu, paypa ajllakusqan llajtataj” (1 Ped. 2:9, 10). Apostolesqa kausashaspa congregacionesta allinta qhawarqanku. Chaywanpis apóstoles wañupojtinku, congregacionmanta wakin runasqa cheqa kajta qʼewispa, creejkunata qhepankuta pusayta qallarerqanku. Chay runasqa Aristotelespa, Platonpa yachachisqankuta astawan valecherqanku. Paykunaqa chay runaspa nisqankuta yachachiyta qallarerqanku, Diospa Palabranmanta yachachinankumantaqa (2 Tes. 2:6-8). Paykunamanta ashkha runasqa congregacionespi allinpaj qhawasqa runas karqanku, wakintaj ancianos karqanku. Jesús yachachisqasninta tukuyniykichej “hermanos kankichej” nejtinpis, uj qotu runas aswan kurajpaj qhawachikuyta qallarisharqanku (Mat. 23:8). w16.11 4:8

Noqanchejrí, ¿juchapaj wañusqallatajchu kanchej? Ichapis ñaupajtaqa juchallikorqanchej, imatachus Jehová Dios yuyasqanta mana reparaspalla. Arí, qokorqanchej “millay imasman, sajra kajmanwan”, nisunman “juchaj esclavosnin” karqanchej (Rom. 6:19, 20). Diospa Palabranta estudiasparí, imaynatachus Jehová Dios kausananchejta munasqanta yachakorqanchej. Chayrayku ñaupa kausayninchejta saqespa, Diosman kausayninchejta jaywarqanchej, bautizakorqanchejtaj. Ajinapi “juchamanta kacharichisqa” karqanchej, “cheqan kajpa esclavosnin[mantaj]” tukunchej (Rom. 6:17, 18). Noqanchejmanta kashan aychaj sajra munayninchejwan atipachikunanchej chayri mana atipachikunanchejqa. Tapurikunachej: “¿Saqenichu sajra munayniy wiñananta atipanawankama? Chayri, ¿chay ratochu chinkachini?”, nispa. Diospa qhasilla kʼacha yanapayninta tukuy sonqo agradecekunchej chayqa, tukuy imata Payta kusichinapaj jina ruwasunchej. w16.12 1:11, 12

Noqanchejqa Jehová Dios yanapawasqanchejrayku, sonqo tiyasqas kausakunchej. Chayrayku familianchejwan, hermanoswanpis allinta kausakuyta atinchej. Jinapis pantaj runas kasqanchejrayku, wakin kutisqa hermanosninchejwan phiñanakusunman. Ajinapi rikukojtinchejqa, Jesuspa kamachisqanta kasukuna. Pay nerqa: “Hermanoykiwan ñaupajta allinyakamuy”, nispa (Mat. 5:24). Ama qonqanachu, hermanosninchejpis “sonqo tiyaykuyta qoj” Jehová Diosllatataj sirvisqankuta (Rom. 15:33; 16:20). “Diospa atiyninpi” yuyaspaqa, Dioswanpis allinpi kausakullasuntaj. Profeta Isaías nerqa: “Pichus qampi sonqonta churajtaqa sonqo tiyaykuypi waqaychanki, imaraykuchus payqa qampipuni atienekun”, nispa (Isa. 26:3; Rom. 5:1). w16.12 2:5, 18, 19

Satanaspa sajra pachan tukukuyninpiña kashajtinpis, Diosqa llajtanta bendecishan. Llajtanpi kasqanchejrayku ashkha imasta yachachishawanchej, kʼachata kausakunapajtaj yanapashawanchej (Isa. 54:13). Arí, Jesús nerqa jina, Jehovaqa bendecishawanchej Jallpʼantinmanta hermanosninchejwan uj familia jina kanapaj (Mar. 10:29, 30). Chantapis Jehová Diosta tukuy sonqo maskʼajkunaqa, sonqo tiyasqas, kusisqas, sonqo juntʼasqas ima kausakushanku (Fili. 4:5-7). “Diospa munayninta” ruwaspa kausasun chayqa, cheqamantapuni Jehová Diospa “imatachus qonanta nisqanta” japʼisunchej (Heb. 10:35, 36). Chayrayku creeyninchejta kallpachanallapuni, tukuy atisqanchejtataj Jehovapaj tukuy sonqo llankʼana. Imaraykuchus Jehová Diosqa cheqamantapuni tʼinkawasunchej (Col. 3:23, 24). w16.12 4:17, 20

Tukuy kamachiykunata kasukuna kajtin, ¿imaraykutaj nisunman kausayninchejpi imatapis ajllayta atisqanchejta? Imaraykuchus kamachiykunaqa allinninchejpaj kanku. Sutʼincharinapaj, autota waj llajtaman apananchejpi tʼukurina. Chay lugarpi leyes mana kajtenqa, autosqa munasqankuman jina correnkuman, chayri may ladontapis rillankuman. Ajinapi autota apaytaqa manchachikusunman, ¿icharí? Chayrayku kamachiykuna kasqanqa allinninchejpajpuni, sumajta ajllanapajtaj yanapawanchej. Kunantaj Jehová Diospa Palabranmanta wakin runaspa kausayninkumanta yachakuna. Paykunaj kausayninkoqa, Jehová Diospaj kamachiykunasnin allinninchejpajpuni kasqanta rikuchiwasunchej. Sutʼincharinapaj, Adanmanta parlaspa, pay mana mikhunanchu karqa chay sachʼaj poqoyninta, chaywanpis mikhuykorqa. Chayta ruwaspataj Jehová Diospa kamachiykunasninta mana kasukorqachu. Adán mana allintachu ajllasqanrayku, may unaytaña ñakʼarinchej (Rom. 5:12). Adán juchallikusqanrayku imaschus kasqanta yuyareyqa, yanapawasun imatapis allinta ajllanananchejpaj, Jehová Diosta kasukunanchejpaj ima. w17.01 2:6, 8

Mosoj llankʼayta japʼiyta munanchej chayqa, maykamallachus ruwayta atisqanchejta reparakuspaqa, ichapis “mana atisajchu” nina kanqa. Jehová Dios payta yupaychaspa, kʼumuykukoj sonqo kananchejta munan (Miq. 6:8). Chayrayku mosoj llankʼayta japʼispaqa, unay tiempomanta Gedeón jina ruwana. Astawanpis Jehová Diospa yanapayninta mañakuna. Chantapis sumajta tʼukurina, imatachus Jehová Palabrannejta, llajtannejta ima niwasqanchejpi. Amataj qonqanachu, Jehová Dios llampʼu sonqo kasqanrayku, yanapawasqanchejraykutaj imatapis paypaj ruwayta atisqanchejta, manataj noqanchejpa atiyninchejraykuchu (Sal. 18:35). Arí, Llampʼu sonqo kaspaqa, mana wajkunamanta aswan sumaj kasqanchejta yuyakusunchu. w17.01 3:17, 18

Jesusqa wajkunata tukuy sonqo wakicherqa. Yacharqataj kay Jallpʼamanta ripojtin, llankʼayninta wajkuna ruwanankuta. Yachachisqasnenqa pantaj runas karqanku. Yachallarqataj, paykuna sumaj willaykunata tukuynejpi willamunankuta, pay ruwasqanmanta astawanraj (Juan 14:12). Chayrayku yachachisqasninta sumajta wakicherqa. Paykunataj chay llankʼayta sumajta ruwarqanku (Col. 1:23). Jesús wañupusqantawan, Jehovaqa payta kausarichimorqa. Astawan llankʼayta qorqa, churarqataj “tukuy gobiernosmanta, atiyniyojkunamanta, kallpayojkunamanta, kurajkunamanta, tukuy sutismanta ima aswan patapi kananpaj” (Efe. 1:19-21). Diosman cheqa sonqo kajtinchejqa, niraj Armagedón chayamushajtin wañupuspapis, kausarimusunchej, paraisopitaj sumaj llankʼayta japʼisunchej. Kunanpis Diosmanta sumaj willaykunata willashanchej, runastataj Jesuspa yachachisqasninman tukuchishanchej. Chayrayku sapa ujninchej “Señorpa ruwayninpi” astawan ruwayta atisunman. w17.01 5:17, 18

Jesusqa uj kutillata wañuspa, juchamanta kacharichiwarqanchej (Heb. 9:24-26). Adanpa juchanrayku wañuyllata japʼinchej, Jesús kausayninta qosqanraykutaj wiñay kausayta japʼiyta atisun. Jehová preciowan rantiwasqanchejrayku, Satanaspa mundonmanta kacharisqa kanchej, wañuytataj manaña manchachikunchejchu (Heb. 2:14, 15). Imaynatachus ruwasqasninpaj churasqan leyes juntʼakunpuni, ajinallatataj Diospa nisqasnenqa juntʼakonqapuni. Payqa kasqan jinallapuni. Jehovaqa mana kausayllatachu qowanchej, manaqa munakullawanchejtaj. Biblia nin: “Yachanchej, creenchejtaj Dios munakuwasqanchejta. Diosqa munakuymin”, nispa (1 Juan 4:16). Pisimantawan kay Jallpʼaqa uj kʼachitu paraisoman tukonqa. Chaypi tiyakojkunaqa Dios jina ruwanqanku, purajmantataj munanakonqanku. Tukuy kamachisnintaj cielopi, jinallataj Jallpʼapipis nenqanku: “Yupaychasqa kay, jatunchasqa kay, jatunpaj qhawasqa kaypis Diosninchejpaj kachun wiñay wiñaynintinpaj, pichus yachayniyoj, agradecekunapaj jina, atiyniyoj, kallpayojtaj, chaypaj. Amén”, nispa (Apo. 7:12). w17.02 2:16, 17

Kay 1973 watapi, 15 de octubre La Atalaya revista nerqa: “¿Atinchu bautizakuyta cigarro pitayta mana qonqaj runa?”, nispa. Biblia nisqanman jinataj sutʼincharqa mana bautizakuyta atisqanta. Ashkha versiculosta oqharispataj, sutʼincharqa cigarrota pitajkunata congregacionmanta qharqonata (1 Cor. 5:7). Nillarqataj, chay kamacheyqa mana runasmantachu kasqanta, manaqa “Diosmanta, pichus Palabrannejta willawanchej imatachus ruwananchejta”. Jehovaj testigosnillan Bibliaj nisqanta kasukunapaj kallpachakunchej. Estados Unidospi religionesmanta parlaj libro, nerqa: “Ashkha pastoresqa iglesiankupi yachachisqankuta sapa kuti qhawarinku. Chaytataj ruwanku iglesiankuman rejkunata, waj runasta ima kusichinankupaj jina yachachinankupaj”, nispa. Diospa Llajtanta Kamachejkunatajrí, Biblia nisqanman jina ruwanku. Chaytaj rikuchiwanchej Jehová llajtanta kamachishasqanta. w17.02 4:15

Ancianosqa michejkuna jina llampʼu sonqos kanku. Nitaj munankuchu rejsisqa runas jina qhawasqa kayta. Paykunaqa mana kay tiempomanta curas chayri pastores jinachu kanku, nitaj Jesuspa tiemponmanta religionta kamachejkuna jinachu. Jesusqa paykunamanta nerqa: “Jatun mikhuykunapipis aswan sumaj lugarpipuni tiyakuyta munanku, sinagogaspipis ñaupajpipuni tiyayta munanku. Mercado plazaspipis runaswan [...] napaykuchikuyta munanku”, nispa (Mat. 23:6, 7). Ancianosqa Jesuspa nisqanta kasukunku: “Ama ‘Yachachejníy’ nichikuychejchu. Ujlla Yachachejniykichejqa, tukuyniykichejtaj hermanos kankichej. Amataj pitapis kay jallpʼapi tatáy niychejchu. Ujlla Tataykichejqa, cielopitaj kashan. Amallataj yachachejníy nichikuychejchu, imaraykuchus Yachachejniykichejqa ujlla, chaytaj Cristo. Qankunamanta kurajpaj qhawasqa kajqa, sirvisunaykichej tiyan”, nispa (Mat. 23:8-11). Ancianos llampʼu sonqo kajtinku, Jesuspa nisqantataj kasukojtinku, hermanosqa paykunata munakonqanku, respetanqanku, jatunpajtaj qhawanqanku. w17.03 1:14, 15

Imatapis allinta ajllanapajqa, Bibliawan yanapachikuna. Chayrayku mana suyanachu tiyan, wajkuna imatachus ruwanata ninawanchejta. Astawanpis yachakunanchej tiyan imatachus Dios munasqanta, chayman jinataj imatapis ruwana tiyan. Imata ruwanapajpis wajkuna tanqanawanchejta saqejtinchejqa, mana allintachu ajllasunman (Pro. 1:10, 15, 16). Astawanpis sapa ujninchej, Bibliamanta yachakusqanchejman jina imatapis ajllananchej tiyan. Wajkuna noqanchejpaj ajllanankuta saqesun chayqa, runallata qhatisun, llakiypitaj rikukusun. Pabloqa Galaciamanta hermanosman nerqa, paykuna kikinpuni imatachus ruwanankuta ajllananku kasqanta (Gál. 4:17). Wakin hermanostaj, wajkunata nisharqanku imatachus ruwanankuta. w17.03 2:8-10

Josiasqa Jehová Diosta kusichinanpaj kallpachakorqa. Joven kanki chayqa, pay jina ruwayta, Jehovatapis sumajta rejsiyta atinki. Josiasqa awelon Manasés pesachikusqanmanta yachakorqa, chaytaj rikuchiwanchej Jehová perdonanawanchejpaj wakichisqa kasqanta. Qanpis awelitusniykimanta, congregacionpi kuraj hermanosmanta ima yachakuyta atinki. Paykunaqa Jehová ima sumaj imastachus paykunapaj ruwapusqanmanta willarisunkuman. Josiasqa Diospa Leynin imatachus nisqanta yachaytawan, Jehová Diosta kusichiyta munaspa, usqhayllata chay Ley nisqanman jina ruwayta qallarerqa. Ajinallatataj qanpis, Bibliata leespa Diosta astawan kasukuyta munanki. Chayta ruwaspataj Jehovaman astawan qayllaykunki, aswan kusisqataj kanki. Chantá wajkunamanpis Jehovamanta willariyta munanki (2 Cró. 34:18, 19). Bibliata estudiaspaqa, qanpis reparallankitaj Diosta yupaychayniykipi wakin imasta allinchanayki kasqanta. Chayta reparaspataj, tukuy atisqaykita ruway allinchanaykipaj, imaynatachus Josías ruwarqa, ajinata. w17.03 3:18, 19