Septiembre

Biblia nisqanman jina aguantayqa llakiykunapi rikukuspa mana llakiywan atipachikuy niyta munan. Jinapis mana manchikunapaj, cheqa sonqos kanapaj, pacienciakunapaj ima yanapawanchej. Uj libro nisqanman jina, aguantayqa sinchʼi creeyniyoj kanapaj, llakiykunasninchejwan mana atipachikunapaj, jatuchaj llakiykunata aguantanapaj ima yanapawanchej. Llakiykunapi sinchʼita sayasun chayqa, mana chaykunawan atipachikusunchu. Chayllapi yuyanamantaqa, aguantasqanchejwan imatachus tarinanchejpi yuyana. Munakoyqa aguantanapaj yanapawanchej (1 Cor. 13:4, 7). Diosta munakunchej chayqa, imaschus munaynin juntʼakunanpaj yanapan chay imasta aguantayta atillasun (Luc. 22:41, 42). Hermanosta munakuspaqa, contranchejpi pantajtinku aguantallasun (1 Ped. 4:8). Qosanchejta chayri warminchejta munakuspaqa kausayninchejpi llakiykunata aguantallasun. Imaraykuchus allinta kausakoj qhariwarmispis llakiykunasniyoj kanku. Munakuyta rikuchiytaj astawan ujchasqas kanapaj yanapawasun (1 Cor. 7:28). w16.04 2:3, 4

Ñaupa tiempopeqa, Romamanta gobiernos, Israelmanta kamachejkuna ima cristianosta qhatiykachajtinkupis, cristianosqa tantakullarqankupuni. Tantakuyta mana atillajtinkupis tantakunallankupajpuni mayta kallpachakorqanku. Kunanpis tantakuykuna kasqanmanta mayta agradecekunchej. George Gangaspi tʼukurina, payqa 22 watasmanta astawan Diospa Llajtanta Kamachejkunamanta ujnin karqa. Pay nerqa: “Hermanoswan tantakoyqa kusichiwan, kallpachawan ima. Yuyayniypis, sonqoypis tantakuykunallapi kashan”, nispa. ¿George Gangas jinachu tantakuykunata qhawanki? Ajina kajtenqa tantakuykunapi kanaykipaj kallpachakuy, mana atikullajtinpis. David jinataj niy: “Dios, wasiykita noqa munakuni”, nispa (Sal. 26:8). w16.04 3:16-18

Uj hermano chayri uj hermana imatachus nisqanchejmanta, ruwasqanchejmanta phiñakusqanta yachasqanchejpi tʼukurina. ¿Imatá ruwasunman? Jesuspa yuyaychasqanman jina ruwana, chay hermanowantaj chayri hermanawantaj parlarina. Mana qonqanachu tiyan imaraykuchus paywan parlariyta munasqanchejta. Parlarispaqa mana paypuni juchayoj kasqanta ninanchejchu tiyan, manaqa noqanchej pantaykusqanchejta ninanchej tiyan, allinyakuytataj maskʼananchej tiyan. Imaraykuchus hermanoswan allinpi kay aswan sumaj imamantapis. Qhawarinachej Abrahampa, sobrinon Lotpa kausayninkuta. Paykunaqa ashkha uywasniyoj karqanku. Uywasninkuta michejkunasninkutaj mayta churanakuspa maqanakorqanku, maypichus kasharqanku chay cheqa pisilla kasqanrayku. Abraham, sobrinonwan allinta kausakuyta munasqanrayku, saqerqa sumaj jallpʼasta ajllakunanta (Gén. 13:1, 2, 5-9). Abrahammanta, ¡mayta yachakusunman! Kʼacha kasqanrayku mana allin jallpʼaswan qhepakuspapis, payqa mana ñakʼarerqachu. Imaraykuchus Dios chay ratopacha payman nerqa kapusqanmanta astawanraj qonanta (Gén. 13:14-17). Abrahammanta yachakunchej: munakuywan ima chʼampaytapis allinchasun chayqa, kapuwasqanchejmanta astawanraj Jehová qowasun. w16.05 1:11, 12

Jehovaqa Bibliapi leyesta qowanchej. Sutʼincharinapaj, llulla dioskunata mana yupaychanata, mana suwakunata, mana machanata, mana khuchichakunata ima (1 Cor. 6:9, 10). Jesuspis yachachisqasninman qollarqataj kay kamachiyta: “Rispa, tukuy laya runasta yachachisqasniyman tukuchimuychej, bautizaspa Tata Diospa sutinpi, Wawanpa sutinpi, atiyninpa sutinpiwan. Yachachimuychej paykunaman imastachus noqa kamacherqaykichej, chayta paykunapis kasukunankupaj. Ama qonqaychejchu, noqaqa qankunawan tuta pʼunchay kasaj, kay mundoj imasnin tukukunankama”, nispa (Mat. 28:19, 20). Tukuy imata Jehová, Jesús ima niwasqanchejqa allinninchejpajpuni. Jehovaj leyesnenqa noqanchejta, familianchejta ima jarkʼawanchej. Chantapis chay leyesta kasukoyqa mana onqonapaj, kusisqa kausakunapaj ima yanapawanchej. Astawantaj Jehovaj leyesninta kasukojtinchej, willayman rejtinchej ima, Jehová mayta kusikonqa, bendeciwasuntaj. w16.05 3:1

Bibliata sapa pʼunchay leena tiyan, leesqanchejpi tʼukurina tiyan, Jehovamantataj atiyninta mañakuna tiyan (Luc. 11:13; Gál. 5:22, 23). Chayta ruwajtinchejqa Jehová yanapawasunchej imaschus kusichisqanta entiendenapaj, chantapis pay jina yuyayta yachakusunchej. Ajinamantataj imatachus yuyasqanchej, ruwasqanchej, nisqanchej ima Jehovata astawan kusichenqa. Jinapis cheqan kajta ruwanapaj kallpachakunallapuni tiyan (Pro. 4:23). Jehová jina kʼacha kaykunasta rikuchinapaj mayta kallpachakunallanchejpuni tiyan. Imaraykuchus ichapis reparanchej sumaj cristianosman tukunapaj mana usqhayllatachu kausayninchejta tijrachishasqanchejta, chaypajqa pacienciakuna tiyan. Ichapis ñaupajtaqa Biblia nisqanman jina ruwanapaj mayta kallpachakunanchej kanqa. Chaywanpis ama saykʼunachu. Jehová Dios jina ruwanapaj, yuyanapaj astawan kallpachakusun chayqa, pay jina yuyayta, cheqan kajta ruwayta ima atillasun (Sal. 37:31; Pro. 23:12; Gál. 5:16, 17). w16.05 4:14, 16

Jehovaqa Biblianejta, atiyninnejta, congregacionnejta ima cheqanchashawanchej. Biblia cheqanchanawanchejta munanchej chayqa, leenanchej tiyan, leesqanchejpitaj tʼukurinanchej tiyan, kasukunapajtaj yanapata mañakunanchej tiyan. Rey David Jehová Diosman nerqa: “Puñunaypi sirisqa kashaspa, qanmanta yuyarikuni, qampitaj [tʼukurini]”, nispa (Sal. 63:6). Chantá qhelqallarqataj: “Tata Diosta yupaychasaj, pay yuyaychawasqanrayku. Sonqoy ukhupi chʼisisnin pay kʼamiwan”, nispa (Sal. 16:7). Rikunchej jina Davidqa Jehovaj makinpi llinkʼi tʼuru jina churakorqa. Payqa Jehovaj yuyaychaykunasninpi tʼukurej, Jehovaj yuyaychasqanta mana japʼikuyta atillaspapis, yuyasqanta, sonqonpi kasqanta cheqanchananta saqerqa (2 Sam. 12:1-13). ¿Imaynatá David jina llampʼu sonqos kasunman, kasukusunman ima? Tapurikuna: “¿Bibliata leespa tʼukurinichu, saqenichu Jehovaj yuyaychaykunasnin yuyayniyta, sonqoyta ima cheqanchananta? ¿Aswan sumajta ruwayta atiymanrajchu?”, nispa (Sal. 1:3). w16.06 1:11

Tukuypis juchasapas kanchej, pantanchejtaj. Chayrayku mana suyasunmanchu hermanosninchej cheqan kajtapuni ruwanankuta chayri parlanankuta. Nillataj allinchu kanman pantasqasninkupi yuyanallanchejpuni. Pantasqallankupipuni yuyasun chayqa, ichapis Jehová Diosta niña kusisqachu yupaychasunman. Jehovapi creeyninchejtaj pisiyanman, Jehovaj llajtanmantataj karunchakusunman. Ajinamantataj niña Jehovata yupaychayta atisunmanchu, niñataj mosoj pachapipis kausakuyta suyakusunmanchu. Jehovata kusisqas yupaychanallapajpuni, uj suyakuyniyoj kanallapajpuni ima, Jehová kay nisqanta ama qonqanachu: “Noqaqa mosoj cielota, mosoj kay pachatawan ruwasaj. Chay ñawpaj kajkunaqa qonqasqa kanqa, manapunitaj yuyarisqachu kanqa”, nispa (Isa. 65:17; 2 Ped. 3:13). Jehovaqa chay bendicionesta qowasun, payman cheqa sonqollapuni kajtinchej. w16.06 4:13, 14

“Pay kʼatalla” nisqaqa, Jehová atienekunapaj jinapuni kasqanta, nisqasnintapis juntʼasqantapuni niyta munan. Jehová Diosqa mana wasanchaj Dioschu, nisqantaqa juntʼanpuni, cheqa sonqo, nitaj jaykʼajpis llullakunchu. Payqa Abrahamman nerqa miraynin Sumaj Jallpʼapi kausakunanta. Chay nisqanta juntʼananpajtaj ashkha milagrosta ruwarqa. Abrahamman nisqanmanta 430 watasña pasajtinpis, nisqanta juntʼayta munallarqapuni (Gén. 12:1, 2, 7; Éxo. 12:40, 41). Ashkha watasninman Jehovaqa israelitas testigosnin kasqankuta nishaspa, jinata nerqa: “Noqamanta ñawpajtaqa mana ima diospis karqachu, manataj qhepamampis kanqachu”, nispa. Jehovaqa munayninta mana tijrachisqanta rikuchinanpaj, “[tukuy tiempo] noqaqa kikillampuni” kani, nispa nerqa (Isa. 43:10, 13; 44:6; 48:12). Cheqamantapuni israelitasqa Jehovallata yupaychayta aterqanku pichus kasqan jinallapuni, cheqa sonqotaj. Noqanchejpis Jehovallata yupaychayta atinchej (Mal. 3:6; Sant. 1:17). w16.06 3:6, 7

Kunanpis gobiernosqa ashkha soldadosniyoj, fronterasninkuta qhawanankupajtaj kunallanraj rikhurimusqan aparatosniyoj ima kanku. Chay gobiernosqa suyunkuta enemigosninkumanta chayri imamantapis sumajta jarkʼanku. Jinapis paykunaqa mana reparankuchu cielopi may atiyniyoj uj gobierno kasqanta, chay gobiernopitaj Jesús kamachishasqanta. Tumpamantawantaj chay gobiernoqa tukuy gobiernosta chinkachenqa (Isa. 9:6, 7; 56:10; Dan. 2:44). Chay pʼunchay chayamunantataj mayta suyashanchej, munanchejtaj wakichisqas kayta. Chayrayku Bibliaj profeciasnin juntʼakushasqanta reparanchej, Jehovatataj cheqa sonqosllapuni sirvishanchej (Sal. 130:6). Noqanchejpis qhepa pʼunchaykunapi kausashanchej. Chayrayku sumajta qhawarikunanchej tiyan mana puñurparinapaj. ¿Imaraykú? Kay pachaj tukukuynin aswan qayllitapiña kasqanrayku, ichá mana atillasunchu rijchʼarisqa chayri wakichisqa kayta. May llakiy kanman puñurparinanchej. w16.07 2:2, 9, 10

Pabloqa sutʼita yacharqa Diospa khuyakuyninta mana ganakusqanta, nitaj khuyakunapaj jinachu kasqanta ima. Payqa cristianosta qhatiykachayta yachaj. Pabloqa niraj wañupushaspa Timoteoman ajinata qhelqarqa: “Agradecekuni atiyta qowaj Señorninchej Cristo Jesusman. Imaraykuchus payqa noqapi atienekorqa, uj llankʼayta qowaspa”, nispa (1 Tim. 1:12-14). ¿Ima ruwaymantataj Pablo parlasharqa? Chaymanta parlaspa Pabloqa Éfeso congregacionmanta ancianosman nerqa: “Chaywanpis kausayniytaqa mana valorniyojpajchu qhawani, astawanpis Señor Jesusmanta ruwanata japʼisqallayta juntʼayta munani, chay ruwaytaj kashan Diospa jatun khuyakuyninmanta sumaj willaykunata allinta sutʼinchanay”, nispa (Hech. 20:24). Pabloqa sonqo kʼajaywan Diosmanta willarqa, kay tiempomanta cristianostaj pay jina sonqo kʼajaywan willamunankupaj mayta yachakunkuman. Pabloqa rikucherqa Diospa kʼacha yanapaynin paypaj mana qhasipajchu kasqanta. w16.07 4:1-3

¿Imataj kanman congregacionpi unaytaña uj ruwayta suyashanchej chay, chayri kausayninchej manaña ñaupajta jinachu chay? Pacienciakunanchej kanqa. Ichapis Jehová Dios saqellanqa chaykuna ajina kananta. Chaywanpis pay yanapanawanchejpi atienekunallapuni. Abrahampa kausayninpi tʼukurina. Paymanqa Jehová wawayoj kananta nerqa, chaywanpis ashkha watasninmanraj Isaac nacekorqa. Tukuy chay tiempopi, Abrahamqa pacienciakorqa, nitaj Jehovapi creeyninta pisiyacherqachu (Gén. 15:3, 4; 21:5; Heb. 6:12-15). Suyakoyqa mana atikullanchu (Pro. 13:12). Chaywanpis imapichus rikukushasqanchejpi yuyallasunpuni chayqa, mayta llakikusunman. Chayta ruwanamantaqa, allin kanman congregacionpi yanapakunapaj, kʼacha kaykunata wiñachinapaj ima tukuy tiemponchejta churananchej. Bibliata leesun, leerisqanchejpitaj tʼukurisun chayqa, yachayniyoj kasun, tʼukuriyta yachakusun, imatapis sumajta ajllasun. Sapa pʼunchaytaj chay yachakusqanchejman jina imatapis ajllayta atisunchej, Jehovata kusichinapaj. w16.08 3:9-11

Jehovaqa llajtanta yanaparqa amalecitasta, etiopesta ima atipanankupaj. Chantapis Nehemiasta, judiosta ima kallpacharqa Jerusalenpa perqasninta sayarichinankupaj. Jehová Diosqa ajinallatataj noqanchejtapis kallpachawasun. Jinamantataj llakiykunasniyoj kaspapis Diosmanta willallasunpuni, jinallataj runas churanakuwajtinchej chayri mana uyariyta munawajtinchejpis (1 Ped. 5:10). Jehovaqa mana uj milagronejtachu llakiykunasninchejta chinkachenqa. Chayrayku, kallpachasqas kayta munaspaqa, mana jinallachu kananchej tiyan. ¿Imatá ruwananchej tiyan? Bibliata sapa día leena, tantakuykunapaj wakichikuna, nitaj faltakunachu. Chantapis sapallanchejpi Bibliata estudiana, familiapi Diosta yupaychana, Jehovamantataj yanapata mañakuna. Jehovaqa chaykunawan kallpachawanchej, yanapachikunapajtaj tukuy imata ruwana. Chaykunamanta mayqellantapis mana ruwashanchejchu chayqa, Jehovaj yanapayninta mañakuna. Reparasuntaj imaynatachus Jehovaj atiynin munayninta ruwanapaj, ruwayta atinapaj ima kallpachawasqanchejta. w16.09 1:12

Pabloqa soltero jina qhepakunata yuyaycharqa, chaywanpis nerqa: “Khuchichakuy juchapi ashkhas urmasqankurayku, sapa qhareqa warmiyoj kachun, jinallataj sapa warmipis qosayoj kachun”, nispa. Chantá nillarqataj: “Munayninkuta mana atipayta atejkunaqa, casarachunku. Aswan walejmin casarakoyqa, munaywan qʼoñirisqa kanamantaqa”, nispa. Ichá uj runaqa casarakuyta ajllanman, khuchichakuy juchapi chayri sajwakuypi (chayri masturbacionman) mana urmananpaj. Jinapis solterosqa sumajta qhawarikunanku tiyan casarakunankupaj jinañachus manachus kasqankuta. Pablo nerqa: “Sichus pipis mana soltero kakuyta atinchu chayqa, tʼika jina joven kaynintapis pasanña chayqa, munaspaqa casarakuchun, mana juchallikunchu”, nispa (1 Cor. 7:9, 36; 1 Tim. 4:1-3). Jinapis mana allinchu kanman, uj joven qhariwarmi jina puñuykuyta munasqanraykulla casarakunanqa. Imaraykuchus ichapis payqa niraj wakichisqachu kashan qhariwarmi kausayta ñaupajman apananpaj. w16.08 1:17

Runaqa ropanchejta qhawarispa imaynachus kasqanchejta ninkuman (1 Sam. 16:7). Jehová Diospa kamachisnenqa, ropata ajllashaspa mana gustunchejtachu, nitaj allinninchejtachu astawan valechinchej, manaqa Bibliaj nisqanta kasukunchej. Chayrayku mana churakusunmanchu matʼi chayri kʼaka ropata, nitaj aychaj sajra munayninta rijchʼarichej ropatapis. Imaraykuchus chay jina ropasqa, tukuy imanchejta rikuchinman. Ropanchejqa mana pitapis pʼenqachinanchu tiyan, nitaj waj ladota qhawachiyta munananchu tiyan. Ropanchej llimphu kajtin, maychus kajtataj pʼachallikojtinchej, kʼachanchakojtinchej ima, runasqa Jehovaj kamachisninta jina qhawawasun, llajtantapis jatunpaj qhawanqanku. Chantapis yupaychanchej chay Diosmanta astawan yachayta munankuman. Ichá willayninchejtapis uyariyta munanqanku. w16.09 3:5, 6

Wakenqa kausay jinallamanta rikhurisqanta creespapis, Diospi creellankutaj. Paykuna yuyasqankuman jina, Diosqa tukuy imata wakicherqa, kausay jinallamanta rikhurinanpaj. Wakintaj escuelaspi yachachikusqanrayku, kausay jinallamanta rikhurisqanta creenku. Wakinrí religionespi sajra imasta rikusqankurayku, Jehová Diospi niña creenkuchu. Chayrayku piwanpis parlarishaspa, ñaupajta tapuriy imapichus creesqanta, imaraykuchus chaypi creesqanta ima. Chantá kutichisqanta sumajta uyariy. Chayta ruwajtiyki ichá uyarisonqa. Diospi creesqaykirayku pillapis asipayasojtin, ¿imatá niwaj? Chay runata respetowan tapuriy: “Yuyasqaykiman jina, ¿imaynatá kausay qallarerqa?”, nispa. Chantá niwaj: “Kausay jinallamanta rikhurinman karqa chayqa, imachus ñaupajta kausajqa mirananpaj atiyniyoj kanan karqa”, nispa. w16.09 4:12, 13

Diospa ashkha kamachisnin cheqa sonqosllapuni karqanku, chʼampaykunapi rikukuspapis. Imapichus Nabot, Zacarías ima rikukusqankupi tʼukurina. Paykunaqa Diosta kasukusqankurayku rumiswan chʼanqasqa wañorqanku (1 Rey. 21:3, 15; 2 Cró. 24:20, 21). Danielqa wijchʼuykusqa karqa yarqhasqa leonesman. Kinsa amigosnintaj nina larwashaj hornoman wijchʼuykusqas karqanku. Paykunaqa wañuytapis mana manchachikorqankuchu, Diosman cheqa sonqo kayta munasqankurayku. Paykunaqa Dios atiyninta qonanpi, ima ñakʼariytapis aguantanankupaj yanapananpi ima atienekorqanku (Dan. 3:16-18, 20, 28; 6:13, 16, 21-23; Heb. 11:33, 34). Ashkha profetas Micaya, Jeremías jina “pruebaman churasqa karqanku”. Elías jinataj wakin profetasqa “chʼin pampaspi, orqospi ima purerqanku. Pakakorqankutaj qaqa juskʼuspi, jallpʼa juskʼuspi ima”. Ajinapi rikukuspapis tukuyninku cheqa sonqollapuni karqanku. Imaraykuchus yacharqanku ‘imatachus suyakusqankuta juntʼakunantapuni’ (Heb. 11:1, 36-38; 1 Rey. 18:13; 22:24-27; Jer. 20:1, 2; 28:10, 11; 32:2). w16.10 3:10, 11

Tantakuykunapi waj llajtayojkunata “allin jamusqa kankichej” nispa, munakuyninchejta rikuchisunman. Wakin runasqa waj suyuman chayaytawan manchachikunku chayri runasmanta karunchakunku. Ichapis waj suyumanta runaspa ñaupaqenkupi pisipaj qhawakunku costumbresninkurayku chayri wajcha kasqankurayku. Chayrayku paykunaman napaykunapaj qayllaykuna, munakuyninchejta rikuchinapaj, imaynachus kashasqankuta waturinapaj ima. JW Language nisqa programa parlayninchejpi kan chayqa, chay runasta parlayninkupi napaykunapaj yanapawasunman (Fili. 2:4). Waj costumbresniyoj runaswan parlarinapaj, ¿imatá ruwasunman? Ichapis noqanchejmanta imallatapis willarisunman. Ajinamanta ichá reparasunman ashkha imaspi kikillantataj yuyasqanchejta. Yuyarikunataj, sapa lugarpi imaymana costumbres kasqanta. w16.10 1:13, 14

Biblia niwanchej, imatachus sapa uj ruwananchej kasqanta congregacionninchej juchamanta ‘tʼaqasqa’ kananpaj. Corinto congregacionmanta parlarina. Apóstol Pabloqa chay congregacionmanta hermanosta mayta munakorqa, wakinkunatapis Diosmanta yachakunankupaj yanaparqa (1 Cor. 1:1, 2). Jinapis uj hermanoqa millay juchata ruwasharqa, hermanostaj qhawashallarqanku. Chayta yachaspa Pabloqa maytachá llakikorqa, ancianostataj nerqa: “Chay juchallikoj runata Satanasman jaywaykuychej”, nispa. Paykunaqa chay hermanota congregacionmanta qharqonanku karqa (1 Cor. 5:5-7, 12). Kay tiempopipis ancianosqa, juchallikoj mana pesachikojtin, congregacionmanta qharqonku. Jina kajtin, ¿Bibliaj nisqanta kasukusunchu niña chay qharqochikojwan masichakuspa? Kasukusun chayqa, congregación llimphu kananpaj yanapakusunchej. Chantá ichapis chay hermanota yanapasun, pesachikuspa Jehovamanta perdonta mañakunanpaj. w16.11 2:14

Wajkunata kallpacharejtinchejrí, paykunata mayta yanapasunman. Rubén nin: “Unaytaña kallpachakushani mana pisipaj qhawakunaypaj. Uj kuti ancianowan predicasharqani, paytaj repararqa mana allinchu kashasqayta. Llakiyniyta willakojtiy, payqa sumajta uyariwarqa. Chantá niwarqa imastachus allinta ruwashasqayta. Yuyarichiwarqataj Jesuspa kay nisqanta, “qankunaqa ashkha pʼisqetusmantapis astawanraj valenkichej”. Chay versiculota yuyarikullanipuni, sapa kutitaj sonqochawan. Chay hermanoj niwasqanqa mayta yanapawarqa”, nispa (Mat. 10:31). Bibliaqa nin, purajmanta kallpachanakuna kasqanta. Apóstol Pabloqa hebreo cristianosman nerqa: “Sapa pʼunchay purajmanta kallpachanakullaychejpuni [...]. Ajinamanta ni mayqenniykichej, juchaj atiyninwan chʼaukiyachikuspa sonqonta rumiyachinanpaj”, nispa (Heb. 3:13). Pipis allinta ruwanki niwajtinchejqa, mayta kallpachawanchej. w16.11 1:2, 3

Cristo jamusqanmanta 313 watasninman, Romata kamachej Constantinoqa Diosta wasanchaj cristianospa religionninkuta legalizacherqa. Chaymantapachataj Iglesiaqa, Romaj gobiernonwan khuska llankʼayta qallarerqa. Kamachej Constantinoqa, iglesiata kamachejkunawan tantakorqa. Chay tantakuytaj Concilio de Nicea nisqa sutikun. Chay tantakuy pasayta, kamachej Constantinoqa Arrio sutiyoj sacerdoteta Roma suyumanta qharqocherqa, Jesusqa mana Dioschu kasqanta nisqanrayku. Chay qhepatataj Teodosio I (379-395) Romata kamacherqa. Kamachishajtintaj Iglesia Catolicaqa romanospa religionninkuman tukorqa. Ñaupa tiempomanta qhelqajkuna nisqankuman jina, waj diosesta yupaychaj Roma suyoqa, Teodosio I kamachishajtin “cristiana” religionman yaykuporqa. Jinapis chay tiempopajqa, Diosta wasanchaj cristianosqa llulla yachachiykunata japʼikorqankuña, Jatun Babiloniawanpis ujchasqaña karqanku. Chaywanpis wakin cheqa sonqo cristianos karqaraj. Paykunaqa Jesuspa rijchʼanachinanmanta trigowan ninakorqanku, tukuy atisqankuman jinataj Diosta yupaycharqanku. (Mat. 13:24, 25, 37-39). w16.11 4:8, 9

Kay tiempopi, Satanasqa ‘qhaparirishaj león jina muyuykachashan, mayqellantapis oqoykuyta munaspa’ (1 Ped. 5:8; Apo. 12:17). Chayrayku kausayqa may llakiy. Jehovaj kamachisninpis llakikullankutaj. Ñaupa tiempomanta Diospa kamachisninpis, wakin kutis llakikullarqankutaj. Biblia nisqanman jina, rey Davidqa wakin kutis llakikorqa (Sal. 13:2). Apóstol Pablopis ‘tukuy hermanosmanta sapa pʼunchay llakikorqa’ (2 Cor. 11:28). ¿Imatá ruwasunman manchay llakisqa kaspa? Munakuyniyoj Tatanchej Jehová Diosqa, ñaupa tiempomanta kamachisninta yanaparqa llakiykunasninkuta atipanankupaj. Kay tiempopipis yanapallaytataj munawanchej. ¿Imaynatá chayta ruwasunman? Kay jinamanta: 1) Diosmanta mañakuna, 2) Bibliata leena, chaypitaj tʼukurina, chantá 3) Jehovaj atiyninwan yanapachikuna, 4) pipichus atienekunchej chaywan parlarina. w16.12 3:1, 2

Ñaupa tiempopi, Corintomanta wakin runasqa kay jina karqanku: suwas, qharipura jinanakojkuna, qhenchachakojkuna, llulla diosesta yupaychajkuna, machajkuna ima. Jinapis Jehová Diosta rejsispa, payta munakusqankurayku ñaupa kausayninkuta saqerqanku. Sajra imasta ruwasqankumantataj pʼenqakorqanku (Rom. 6:21; 1 Cor. 6:9-11). Romamanta cristianospis kikillantataj ruwananku karqa. Pablo paykunaman nerqa: “Amallataj cuerpoykichejta juchaman jaywaychejchu, chaynejta sajra imasta ruwanapajqa. Astawanqa Diosman jaywakuychej, wañusqas ukhumanta kausarimusqas jina. Jinallataj cuerpoykichejtapis Diosman jaywaychej, allin kajta ruwanaykichejpaj”, nispa (Rom. 6:13). Pabloqa yacharqa Romamanta cristianos cheqan kajta ruwanankuta. Ajinamantataj Diospa qhasilla kʼacha yanapayninta japʼinallankutapuni. w16.12 1:13

Diosqa ashkha imasta ruwayta atinanchejpaj ruwawarqanchej. Payqa tanteyayta yachanapaj ruwawarqanchej. Chaytaj yanapawanchej chʼampaykunata allinchanapaj, imastachus qhepaman ruwananchejta yuyaycharikunapaj ima (Pro. 2:11). Yuyaycharikusqanchejman jina ruwanapajtaj, atiyta qowarqanchej. Ajinamanta imatachus ruwayta munasqanchejta juntʼanapaj (Fili. 2:13). Jehovaqa sonqo yuyayniyojta ruwawarqanchej, imachus allin, imatajchus mana allin kasqanta reparanapaj. Chaytaj yanapawanchej juchapi mana urmanapaj, pantasqasninchejta allinchanapaj ima (Rom. 2:15). Hebreo Qhelqasqaspeqa nin: “Imatapis ruwanampaj kʼuchi runaj wakichisqanqa allimpuni llojsin”, nispa. Chantá nillantaj: “Imachus ruwanaykipaj tiyan, chayta tukuy kallpaykiwan ruway”, nispa (Pro. 21:5; Ecl. 9:10). Griego Qhelqasqaspitaj nin: “Atikushajtenqa, sapa kuti tukuypaj allinta ruwana”, nispa. Chantá nillantaj: “Sapa ujniykichej ruwanapaj atiyta Diosmanta japʼerqankichej. Chay japʼisqaykichejman jina, purajmanta sirvinakuychej”, nispa (Gál. 6:10; 1 Ped. 4:10). Rikunchej jina, Jehová Diosqa munan tukuy atisqanchejta ruwananchejta allinninchejpaj, wajkunaj allinninkupajpis. w17.01 1:1, 2

Adanwan Evawan juchallikusqankurayku, tukuy runas juchata, wañuyta ima herenciata jina japʼinchej. Jinapis imatachus ruwananchejta ajllayta atisunmanraj. Chaytataj yachanchej, imatachus Jehová Israel llajtawan ruwasqanpi. Jehová Diosqa israelitasta ajllajta saqerqa, sumaj ayllun kayta munasqankutachus manachus (Éxo. 19:3-6). Israelitasqa Jehovaj ayllun kayta ajllarqanku, kamachiykunasninta kasukuytapis. Israelitas nerqanku: “Tata Diospa nisqasnintaqa kasusqayku”, nispa (Éxo. 19:8). Jinapis israelitasqa, imatachus Jehová Diosman nisqankuta juntʼayta qonqaporqanku. Ama paykuna jina ruwanachu. Ajllayta atisqanchejtaqa, may sumajpaj qhawana. Chantapis Jehovaj qayllallanpipuni kana, kamachiykunasnintataj kasukuna. w17.01 2:9

Israelmanta rey Jeroboamqa, llulla diosesninta yupaychananpaj Betel llajtapi uj altarta ruwacherqa. Chayrayku Jehovaqa Judamanta uj profetata kacharqa, Jeroboamta juchachananpaj. Chay llampʼu sonqo profetataj, Jehovaj nisqanta Jeroboamman willamorqa. Reytajrí profetapaj mayta phiñakorqa. Jinapis Jehová Diosqa profetanta jarkʼarqa (1 Rey. 13:1-10). Jehovaqa profetanta kamacherqa, Israel llajtapi ni imata mikhunanta, nitaj ujyananta. Chantá nillarqataj, waj ñanta wasinman kutipunanta. Jinata kutipushajtin, ñanpi uj machu runawan tinkorqa. Chay runatajrí, Jehovamanta uj willayta japʼisqanta nispa llullaykukorqa. Chantá profetata wasinman wajyakorqa, mikhunanpaj, ujyananpajtaj. Profetatajrí Jehovata mana kasukuspa, chay machu runaj wasinman rerqa. Jehovataj mayta phiñakorqa. Chayrayku profeta ripushajtin, ñanpi uj león wañurpacherqa (1 Rey. 13:11-24). Mana yachanchejchu, imaraykuchus chay profeta Diosta kasukunanmanta, chay runata kasukusqanta. Kayllata yachanchej: Chay profetaqa manaña ‘llampʼu sonqochu karqa, nitaj Diostapis kasukorqachu’. w17.01 4:1-3

Bibliaqa ajinata qallarin: “Qallariypeqa Dios cielotawan, kay pachatawan ruwarqa”, nispa. Chaytaj mayta tʼukuchiwanchej (Gén. 1:1). Jehová Diosta ruwasqasninnmantaqa, pisillata rikunchej. Imaschus cielopi kasqanmanta, kʼanchaymanta, imaraykuchus tukuy ima pampaman urmasqanmanta ima, uj chhikitallata yachanchej (Ecl. 3:11). Diosqa Jallpʼapaj, runaspaj ima, imastachus ruwayta munasqanta willan. Payqa runasta rijchʼayninman jina ruwarqa, kay Jallpʼapi kusisqa kausakunankutataj munarqa (Gén. 1:26). Runasqa wawasnin kananku karqa, paytaj Tatanku kanan karqa. Génesis kinsa capitulopeqa yachakunchej, Diospa munaynin mana juntʼakunanpaj oqharikusqankuta (Gén. 3:1-7). Jinapis Jehová Diospajqa, ni imapis kanchu mana allinchay atinaqa, munayninta juntʼananpajtaj mana pipis jarkʼayta atinmanchu (Isa. 46:10; 55:11). Jehovaj munaynenqa maychus tiemponpipuni juntʼakonqa. w17.02 1:1, 2

¿Sutʼichu karqa Moisesta Jehová yanapashasqan? Arí. Diosqa atiyninta Moisesman qorqa milagrosta ruwananpaj, jinallataj Egiptota kamachej faraonman Diospa sutinta rejsichinanpajpis (Éxo. 7:1-3). Jehová Diospa atiynenqa Moisesta yanapallarqataj, israelitasta munakuywan, pacienciawantaj pusaykachananpaj. Sutʼita reparanchej Jehovapuni Moisesta ajllasqanta llajtanta pusaykachananpaj. Jehovaqa waj runastapis atiyninwan yanapallarqataj llajtanta ñaupajman apanankupaj. Biblia nin: “Nunpa churin Josueqa sumaj yachaywan juntʼa karqa”, nispa (Deu. 34:9). Chantá nillantaj: “Diospa Espiritonqa Gedeonman jamorqa”, nispa (Jue. 6:34). Davidmantataj nin: “Diospa Espiritonqa Davidman jamorqa”, nispa (1 Sam. 16:13). Tukuy chay runasqa Diospa atiyninwan yanapachikuspa tʼukuna imasta ruwarqanku. Chaytataj kallpallankuwanqa mana ruwayta atinkumanchu karqa (Jos. 11:16, 17; Jue. 7:7, 22; 1 Sam. 17:37, 50). w17.02 3:3-5

Apóstol Pablo imatachus ruwasqanmanta tukuy yachakusunman. Payqa yacharqa, sapa hermano kausayninpi imatachus ruwananta ajllanan kasqanta, chaytataj jatunpaj qhawarqa. Kay tiempopis apóstol Pablo jina ancianosqa wajkunaman yuyaycharishaspa, pay jina ruwankuman. ¿Imaynamantá? Uj hermanota Diospa Palabranwan yuyaycharispapis, sapa hermanota imatachus ruwananta ajllajta saqenanku tiyan. Imajtinchus sapa hermano, ajllasqanman jina allinpi chayri mana allinpi rikukonqa. ¿Imatá chaymanta yachakusunman? Wajkunata Bibliaj yuyaychaykunasninwan yanapariyta atispapis, saqenanchej tiyan paykunapuni kausayninkupi imatapis ajllanankuta. Sumajta ajllajtinkutaj, paykunata allin renqa. Ni jaykʼaj yuyananchejchu tiyan, hermanosninchejman imatachus ruwanankuta ninanchejpaj derechoyoj kasqanchejta. w17.03 2:11

Diospa Llajtanta Kamachejkunaqa, sumaj willaykunata sonqo kʼajaywan willaspa may jatun creeyninkuta rikuchinku. ¿Chay llankʼaypi yanapakushanchejchu? Yanapakuspaqa kusisqa kasun. Jesustaj niwasun: “Imatachus kay aswan juchʼuy hermanosniymanta ujninpaj ruwarqankichej, chaytaqa noqa kikiypaj ruwarqankichej”, nispa (Mat. 25:34-40). Jesusqa cieloman kutipuytawan, yachachisqasninta mana sapankutachu saqerparerqa (Mat. 28:20). Paytaqa Jallpʼapi kashajtin Diospa atiynin, Palabran, ángeles ima yanaparqanku. Kay tiempopitaj, Jesusqa allin kamachi yuyayniyojta chay imasllawantaj yanapashan. Diospa Llajtanta Kamachejkunaqa, ‘Corderoj qhepanta rishanku mayllamanpis rejtin’ (Apo. 14:4). Paykunata kasukuspaqa, Kamachejninchej Jesusta kasukushanchej. Paytaj pisimantawan wiñay kausayta qowasun (Apo. 7:14-17). Chaytataj ni mayqen kamachejpis ruwayta atinmanchu. w17.02 4:17-19

Imayna chʼampaypi kaspapis Jehová Diosmanta yanapata mañakunanchej tiyan. Allin kanman kaykunapi tʼukurinanchej: Uj chʼampaypi rikukuspa, ¿imachus noqanchejpaj allin kasqanman jinallachu allinchanchej? Chayrí chay chʼampayta allinchanapaj, ¿Diospa Palabranta nisqantarajchu qhawarinchej? ¿Imatá ruwasunman familiaresninchej tantakuykunaman chayri jatun tantakuykunaman rejta mana saqewajtinchej? Imatachus ruwananchejta yachanapaj, ¿Jehovaj yanapantachu mañakusun? Manachayrí, ¿imatá ruwasunman unaytaña mana trabajoyoj kashajtinchej, uj runa trabajachinawanchejta niwajtinchej? ¿Willarisunchu sapa semana tantakuykunaman rinanchej kasqanta, trabajota pierdej jina kajtinchejpis? Ima chʼampaypi kaspapis, Diospa Palabran nisqanta yuyarikuna tiyan imaynatachus kunan pʼunchaypaj texto nisqanta. w17.03 4:6